Midian mite’n Aigupta rama Josefa an hruai hnu chuan thlahtu Jakoba leh a chhûngte chu Kanaan ram aṭangin Aigupta ramah an insawn tih Bible chuan a sawi a. Anni chuan Aigupta ram Nile lui mawng lam, Gosen ram an tihah chuan awmhmun an khuar ta a ni. (Gen. 47:1, 6) Israel mite chu “an lo pung a, an lo tam ta êm êm mai a.” Aigupta mite chuan Israel mite chu an hlauh tâk avângin salah an siam ta a ni.—Ex. 1:7-14.

Tûn laia sawisêltu ṭhenkhat chuan he Bible thu hi thawnthu mai a ni tia sawiin an nuihsawh a. Mahse, Sema thlahte * chu hmân lai Aigupta ramah sal angin an lo awm tawh ṭhîn tih finfiahna a awm a ni.

Entîr nân, thil hlui chanchin zir mite chuan Egypt (Aigupta) hmâr lamah hmân lai khuate an lai chhuak a. Dr. John Bimson-a chuan Egypt hmâr lam bialah Sema thlahte khua 20 aia tam a awm tih finfiahna a awm thu a sawi a. Chu bâkah, Aigupta chanchin zir mi James K. Hoffmeier-a chuan: “B.C. 1800 aṭanga 1540 hun chhûng vêl chuan Aigupta ram chu Asia khawthlang lama awm Semitic ṭawng hmangte tân pêm luh nâna hmun duhawm tak a ni a. Chûng hun lai vêla thiltih dânte chu ‘Thlahtute Hun’ laia thiltih dânte nên a inmil avângin, Genesis bu-a târ lan hunte leh dinhmunte nên a inmil bawk,” tiin a sawi.

Egypt chhim lam aṭang pawhin finfiahna dang a awm a. Middle Kingdom (B.C.E. c. 2000–c.1600) hun lai vêla phairuanga siam lehkhaah Aigupta chhim lama awm in pakhata chhiahhlawhte hming a chuang a. Chûng hming zînga 40 aia tam chu Sema thlahte an ni. Chûng bâwihte, a nih loh leh chhiahhlawhte chu chaw chhûmtu te, puan tahtu te, leh hnathawktute an ni a. Hoffmeier-a chuan: “Thebaid-a [Egypt chhim lama] awm in pakhatah Sema thlah mi sawmli aia tamin hna an thawh avângin, Aigupta ram pumah Sema thlahte chu, a bîk takin, Lui mawng lamah chuan an ṭhahnem hle niin a lang,” tiin a sawi.

Thil hlui chanchin zir mi David Rohl-a chuan chu chhinchhiahnaa bâwih hming ṭhenkhat chu “Bible-a târ lan hmingte nên a inang hle,” tiin a ziak a. Entîr nân, hming ṭhenkhat chu Isakara te, Asera te, leh Siphraii te hming nên a inang a ni. (Ex. 1:3, 4, 15) Rohl-a chuan: “Hei hi Aigupta ramah Israel mite chu sal tângin an awm tawh ngei tih finfiahna chiang tak a ni,” tiin thu tâwp a siam a ni.

Dr. Bimson-a chuan: “Aigupta rama sal anga an awm hnuah, chuta ta chu an kal chhuak tia Bible sawi hi finfiahna chiang ber a ni,” tiin a sawi.