1. Kan ṭhalai unaupate chungchângah eng nge sawi theih kan neih?

ṬHALAI unaupate u, kohhranah mi ṭangkai tak in ni thei a. In zînga tam tak chu in chakin, in hrisêl ṭha hle a. (Thuf. 20:29) Kohhrana unaute chu nasa takin i ṭanpui a. Kohhranho rawngbâwltu i nih hun tûr chu i nghâkhlel pawh a ni thei. Mahse, hna pawimawh tak chelh tûr chuan la naupang lutuk leh thiltawn la nei tlêm lutuk angin mi dangte’n an thlîr che niin i inhria pawh a ni thei a. La naupang deuh pawh ni la, kohhrana mite rin leh zahkai tûrin tûnah ngei pawh tihtheih i nei a ni.

2. He thuziakah hian eng nge kan sawiho vang?

² He thuziakah hian, Lal Davida nun kawng kan bih chiang ang a. Juda lal pahnih, Asa leh Jehosaphata te nuna thilthlengte pawh tâwi têin kan ennawn ang. Chûng mi pathumte hmachhawn an harsatna te, an chhân lêt dân te, leh an thiltawn aṭanga ṭhalai unaupate zir theihte chu kan sawiho bawk ang.

3. Ṭhalai unaupate’n kohhrana kum upa unaute an ṭanpui theih dân kawng khat chu eng nge ni?

³ Davida chuan a tleirâwl laiin mi dangte ngaihhlut tak thiamnate a nei a. Ani chu thlarau mi tak leh rimawi tum thiam tak a ni a, chu a thiamna chu Pathian hriak thih lal Saula ṭanpui nân a hmang a ni. (1 Sam. 16:16, 23) Nangni ṭhalai unaupate u, kohhrana unaute hlâwkpui theih tûr thiamna engemaw in nei em? In zînga tam tak chuan in nei ngei ang.  Entîr nân, kum upa unau ṭhenkhat chu mi mala inzirna neih nân leh inkhâwm nâna an phone leh tablet-te hman dân in hrilh hian an lâwm ṭhîn hle tih in hria. Ni e, chûng in thiamnate chu anni ang kum upa unaute chuan an ṭangkaipui hle thei a ni.

4. Davida angin ṭhalai unaupate chuan eng miziate nge an neih ang? (A kâwma milem en rawh.)

⁴ Davida chuan a nî tin nunah mawhphurhna la thei mi rin tlâk a nihzia a lantîr a. Entîr nân, tleirâwl a nih laiin a pa berâmte chu taima takin a enkawl a. Chu chu hna hlauhawm takah a chang a ni. A hnuah, Davida’n Lal Saula hnênah: “I chhiahhlawh hian ka pa berâm ka vêng ṭhîn a; sakeibaknei emaw, savawm emaw a lo kala berâm rual zîng ata berâm no a lâk te hian, ka ûm a, ka bei a, a kâ ata chu ka chhanchhuak ṭhîn asin,” tiin a hrilh a. (1 Sam. 17:34, 35) Davida chuan berâmte vênhim chu a mawhphurhna a ni tih a hriat avângin chûng sakawlhte chu huaisen takin a bei a ni. Ṭhalai unaupate chuan an chanvo dawn eng pawh chu taima taka thawkin Davida an entawn thei a ni.

5. Sâm 25:14-a sawi angin, ṭhalai unaupate tihtheih azawnga pawimawh ber chu eng nge ni?

⁵ Tleirâwl Davida chuan Jehova nêna inlaichînna ṭha tak a nei a. Chu inlaichînna chu Davida huaisenna leh rimawi a tum thiamnate aiin a pawimawh zâwk a. Jehova chu Davida Pathian mai ni lovin, a Ṭhian ṭha tak pawh a ni. Davida ngeiin: “Amah ṭihtute chu LALPA ṭhian an ni,” tiin a sawi. (Sâm 25:14, C.L. Re-edited.) Ṭhalai unaupate u, in tihtheih azawnga pawimawh ber chu in Pa vâna mi nêna in inlaichînna tihngheh hi a ni a, chu chuan chanvo hlu dangte a dawn belhtîr thei che u a ni.

6. Mi ṭhenkhatin Davida chungah eng ang thlîr dân dik lo nge an neih?

⁶ Davida chuan mite’n a chunga thlîr dân dik lo an neih chu a hneh a ngai a. Entîr nân, Goliatha bei tûra a inpêk khân, Lal Saula chuan: ‘Nang zawng, tleirâwl chauh i la ni si a,’ tia sawiin dan a tum a ni. (1 Sam. 17:31-33) Chumi hma lawkah, a u ngei pawhin ani chu mawhphurhna la thei lo angah a lo puh tawh bawk. (1 Sam. 17:26-30) Mahse, Jehova chuan Davida chu la puitling lo leh mawhphurhna la thei lo angin a thlîr lo. Chu tleirâwl chu a hre chiang hle a. Davida chuan chakna nei tûra a Ṭhian, Jehova a rinchhan tlat avângin Goliatha chu a hneh thei a ni.—1 Sam. 17:45, 48-51.

7. Davida thiltawn aṭangin eng nge i zir theih?

 ⁷ Davida thiltawn aṭangin nge nge i zir theih? Dawhtheihna kan neih a ngai tih kan hria a. I naupan lai aṭanga hretu che tân chuan puitling anga thlîr thei tûr chein hun engemaw chen a ngai thei a. Jehova erawh chuan kan pâwn lam lan dân piah lam thlengin a hmu tih i chiang thei a ni. Ani chuan i nihna leh i tihtheihte chu a hria a. (1 Sam. 16:7) Chuvângin, Pathian nêna in inlaichînna chu tinghet ang che. Davida chuan Jehova thil siamte ngun taka enin chutiang chuan a ti a. Chûng thil siamte’n Siamtu chungchâng an târ lante chu a ngaihtuah a ni. (Sâm 8:3, 4; 139:14; Rom 1:20) I tihtheih dang leh chu Jehova chakna rinchhan hi a ni a. Entîr nân, Jehova Thuhretu i nih avângin i school kalpui ṭhenkhatin an nuihsawh che em? Chutiang a nih chuan, chu harsatna hmachhawn thei tûrin Jehova hnênah ṭanpuina dîl la. A Thu Bible te, Bible ṭanchhan thu leh hla chhuah te, leh video-tea i hmuh thurâwn ṭangkai tak takte chu nunpui ang che. Harsatna hmachhawn thei tûra Jehova ṭanpuina i dawn apiangin amah rinchhan lehzual duhna i nei ang. Chu bâkah, mi dangin Jehova i rinchhanzia an hmuh chuan an rin i hlawh ngei bawk ang.

8-9. Davida chu lal a nih hun tûr dawhthei taka nghâk tûrin engin nge ṭanpui a, ṭhalai unaupate’n a entawn tûr siam aṭangin eng nge an zir theih?

⁸ Davida hmachhawn harsatna dang leh hi han ngaihtuah teh. Davida chuan lal tûra hriak thih a nih hnuah pawh, dân ang taka Juda lal nia rorêl tûrin kum tam tak a nghah a ngai a. (1 Sam. 16:13; 2 Sam. 2:3, 4) Chutih hun chhûng chuan, dawhthei taka nghâk tûrin engin nge ṭanpui? Lunghnual avânga eng mah tithei lova awm aiin, a tihtheihte chu a ngaihven tlat a ni. Entîr nân, Philistia rama râl tlâna a awm lai khân, Israel hmêlmate beih theihna hun remchâng a zawng a. Chutianga tiin, Juda ramrite chu a vênghim a ni.—1 Sam. 27:1-12.

⁹ Ṭhalai unaupate’n Davida entawn tûr siam aṭangin eng nge an zir theih? Unaute tâna rawngbâwlsak theihna hun remchâng i neihte chu hmang ṭangkai rawh. Unau Ricardo-a * thiltawn hi han ngaihtuah teh. A tleirâwl chhoh chuan, regular pioneer nia rawngbâwl chu thiltumah a nei a. Mahse, upate chuan la tling lo niin an hria a. Beidawng leh lungni lova awm aiin, rawngbâwlnaah a inhmang tam lehzual a ni. Ani chuan: “Ka’n thlîr lêt leh hian, a ṭûl anga hmasâwnna neih chhoh hi ka tân a ṭha tih ka hria. Rawngbâwlnaa tuina nei ka hmuhte chu ṭha taka tlawhkîr zêl ka tum a. Tichuan, a vawi khatna atân, Bible zirpui ka nei thei ta a. Rawngbâwlnaa ka inhman tam poh leh mahni inrintâwkna ka nei lehzual a ni,” tiin a sawi. Tûnah chuan, Unau Ricardo-a chu regular pioneer leh kohhranho rawngbâwltu ṭhahnemngai tak a ni tawh a ni.

10. Ṭum khat chu Davida’n thu tlûkna pawimawh a siam hmain eng nge a tih?

¹⁰ Davida nuna thilthleng dang pawh hi han ngaihtuah teh. Lal Saula avânga Philistia rama a tlânchhiat laiin, Davida leh a mite chu an chhûngte kalsanin râl bei tûrin an chhuak a. An awm loh hlânin, hmêlmate chuan an inte chu rawkin, an chhûngte chu salah an man a ni. Davida chu sipai a nih anga a thiltawnte ṭanchhanin, hmêlmate kuta awm an chhûngte chhan chhuah dân chungchângah ruahmanna siam thei niin a inngai thei a. Mahse, chutianga tih aiin, Jehova kaihhruaina chu a rinchhan zâwk a. Ani chuan puithiam Abiathara ṭanpuinain Jehova hnênah: “Chûngho chu ûm ila ka la ûmpha ang em le?” tiin a zâwt a. Jehova chuan va ûm tûrin a  hrilh a, a hlawhtlin tûr thu pawh a hrilh a ni. (1 Sam. 30:7-10) He thilthleng aṭang hian eng nge i zir theih?

11. Thu tlûknate i siam hmain eng nge i tihtheih?

¹¹ Thu tlûknate i siam hmain mi dang hnênah thurâwn la hmasa rawh. I nu leh pa chu râwn ang che. Tawn hriat ngah kohhran upate hnên aṭang pawhin thurâwn ṭhate i hmu thei bawk. Jehova chuan upate chu a rin avângin nang pawhin i ring ve thei a. Anni chu kohhran tâna “thilpêkte” angin a thlîr a ni. (Eph. 4:8) An rinna i entawn a, an thurâwn pêk ṭha takte i zawm chuan i hlâwkpui ngei ang. Tûnah chuan, Lal Asa hnên aṭanga kan zir theihte chu i lo ngaihtuah ang u.

12. Lal Asa’n ro a rêl ṭan khân eng miziate nge a neih?

¹² Lal Asa chu a tleirâwl chhoh chuan mi inngaitlâwm tak leh huaisen tak a ni a. Entîr nân, a pa Abija aiawha a lal khân, milem biakna chu a ram chhûng aṭangin a nuai bo va. Ani chuan “Juda-hote chu LALPA an pi leh pute Pathian zawng tûr leh a dân leh a thupêk zâwm tûrin thu a pe a.” (2 Chro. 14:1-7) Ethiopia mi Zera chuan sipai 1,000,000 nên Judai ram a rawn rûn khân, Asa chuan Jehova hnênah: “Aw LALPA kan Pathian, min ṭanpui rawh khai; nangmah ringin i hmingin hêng mipuiho hi kan rawn bei a ni a. Aw LALPA, kan Pathian i ni a, mihringin nang chu ngam suh se,” tiin ṭanpuina a dîl a. Asa ngenna chuan amah leh a mite chu Jehova’n a chhan chhuak thei tih a rinzia a târ lang a ni. A Pa vâna mi chu a rinchhan tlat avângin, ‘LALPAN Ethiopia mite chu a beihsak a ni.’—2 Chro. 14:8-12.

13. A hnu lamah Asa chungah eng nge lo thleng a, engvângin nge?

¹³ Sipai 1,000,000 hmachhawn chu chona lian tham tak a ni tih i pawm ngei ang; mahse, chumi ṭum chuan Lal Asa’n hnehna a chang a ni. Mahse, chona tênau zâwk a lo awm khân, Jehova a râwn lo chu a lungchhiatthlâk hle. Israel Lal sual Baasa’n a rawn beih dâwn khân, Asa chuan Suria lal hnênah ṭanpuina a dîl a. Chu thu tlûkna chuan chhiatna a thlen ta! Jehova chuan a zâwlnei Hanania hmangin Asa hnênah: “LALPA i Pathian ring lovin Suria lal i ring a; chuvângin, Suria lal sipai rualte chu i chhuah ta a ni,” tiin a hrilh a. Chumi hun aṭang chuan, Asa’n do a nei ta reng a ni. (2 Chro. 16:7, 9; 1 Lal. 15:32) Kan zir tûr chu eng nge ni?

14. Engtin nge Jehova i rinchhan theih a, 1 Timothea 4:12-a sawi angin, chutianga tihna chuan eng nge a thlen ang?

 ¹⁴ Inngaitlâwm taka awmin, Jehova chu rinchhan zawm zêl rawh. Baptisma i chan khân, Jehova chunga rinna i neihzia leh amah i rinchhanzia i lantîr a. Tichuan, Jehova chuan a chhûngkaw zînga mi ni tûrin hlim takin a lo lâwm che a ni. Tûna i tih tûr chu Jehova rinchhan zawm zêl hi a ni a. Nun thlâk danglam thei thu tlûknate siam a ngaih hunah Jehova rinchhan chu awlsam tak angin a lang thei a; mahse, hun dangahte chuan eng nge i tih ang? Intihhlimna te, hnathawh tûr te, leh nuna thiltumte chungchânga thu tlûknate i siam huna Jehova rinchhan chu a va pawimawh tak êm! Mahni finna chu rinchhan suh. Chu aiin, i dinhmun nêna inmil Bible thu bulte chu zawng la, chu kaihhruaina milin thil ti ang che. (Thuf. 3:5, 6) Chutianga i tih chuan, Jehova i tilâwm ang a, kohhrana unaute zah i kai bawk ang.—1 Timothea 4:12 chhiar rawh.

15. Chronicles pahnihna 18:1-3; 19:2-a chhinchhiah angin, Lal Jehosaphata’n eng thil sual nge a tih?

¹⁵ Ṭhalaite u, keimahni ang bawka ṭha famkim lo in nih avângin thil tihsual châng in nei thei a. Mahse, chu chuan in theihna zawng zawnga Jehova rawng in bâwlna chu a dâl tûr a ni lo. Lal Jehosaphata thiltawn hi han ngaihtuah teh. Ani chuan mize ṭha tam tak a nei a. A lal ṭantirh phat aṭangin, ‘an pi leh pute Pathian chu a zawng a, a thupêkte a zâwm a ni.’ Chu bâkah, a mi liante chu mite hnêna Jehova chungchâng zirtîr tûrin Judai ram khuaahte a tîr chhuak bawk. (2 Chro. 17:4, 7) Chutiang mi chu ni mah se, Jehosaphata chuan thu tlûkna ṭha lo siam châng a nei a. Ṭum khat phei chu Jehova zâwlnei pakhatin a zilh hial a ni. (2 Chronicles 18:1-3; 19:2 chhiar rawh.) Chu thilthleng aṭang chuan eng nge i zir theih?

16. Unau Rajeev-a thiltawn aṭangin eng nge i zir theih?

¹⁶ Zilhna chu pawm la, zâwm rawh. Ṭhalai dang tam tak angin, i nunah thil pawimawh zâwkte dah hmasak chu harsa i ti thei a. Mahse, lunghnual mai suh. Ṭhalai Unau Rajeev-a thiltawn hi lo chhinchhiah ang che. A tleirâwl chhoh lai vêl chu ngaihtuah lêtin: “A châng chuan, ka nuna ka tih duh ber pawh ka hre lo. Ṭhalai dang tam takte ang bawkin, inkhâwm leh rawngbâwlnaa tel aiin infiamna leh ṭhiante nêna intihhlim chu nuam ka ti zâwk,” tiin a  sawi. Unau Rajeev-a chu engin nge ṭanpui? Kohhran upa ngilnei tak pakhatin fuihna a pe a. Unau Rajeev-a chuan: “Timothea thawn khat 4:8-a thu bul chhût tûrin min ṭanpui a ni,” tiin a sawi. Fuihna a dawn chu inngaitlâwm taka chhâng lêtin, nuna a dah pawimawh zâwk tûrte chu a ngaihtuah chiang a. “Thlarau lam thilte chu dah hmasak ka tum ta a ni,” tiin a sawi. Eng nge a rah chhuah? “Chu fuihna ka dawn hnu kum rei vak lo vah kohhranho rawngbâwltu ni tûrin ka tling ta a ni,” tiin a sawi belh bawk.

17. Kum upa unaute chuan Jehova rawngbâwl ṭhalai unaute chu engtin nge an thlîr?

¹⁷ Kum upa unaute chuan nangni ṭhalaite nêna “thu khat vuaa” Jehova rawngbâwl tlân theihna an neih chu an ngaihlu hle! (Zep. 3:9) Anni chu in ṭhahnemngaihna rilru put hmang avâng leh in chanvo neihte phûr tak leh taima taka in thawh ṭhin avângin an lâwm tak zet a. An tân in hlu hle a ni.—1 Joh. 2:14.

18. Thufingte 27:11-a târ lan angin, Jehova’n a rawngbâwltu ṭhalai unaupate chu engtin nge a thlîr?

¹⁸ Ṭhalai unaupate u, Jehova’n a hmangaih che uin, a ring tlat che u tih theihnghilh ngai suh ang che u. Ani chuan hun hnuhnûngahte chuan mahni duh thua inpe ṭhalai unaupa tam tak an awm tûr thu a sawi lâwk a. (Sâm 110:1-3) Amah in hmangaihin, in theihna zawng zawnga a rawngbâwl in duh tih chu a hria a ni. Chuvângin, mi dangte chungah leh mahni chungah ngei pawh dawhtheihna nei ang che u. Thil in tihsual palh hunah pawh thununna leh zilhna in dawnte chu Jehova hnên aṭanga lo kal anga thlîrin pawm ang che u. (Heb. 12:6) In chanvo dawnte chu theih tâwp chhuahin thawk ang che u. Eng dang zawng aiin, in thiltih zawng zawngah in Pa vâna mi thinlung tihlâwm tum tlat ang che u.—Thufingte 27:11 chhiar rawh.