1. Jehova mite chuan eng ang fiahnate nge an hmachhawn?

FIAHNA khirh tak i hmachhawn em? Kohhrana tuemawin i rilru a tina pawh a ni thei a. (Jak. 3:2) A nih loh leh, i hnathawhpuite emaw, i school kalpuite emawin Jehova Thuhretu i nih avângin an sawichhia che pawh a ni thei. (1 Pet. 4:3, 4) A nih loh leh, i chhûngte chuan inkhâwma tel tawh lo tûr leh mite hnêna thu hril tawh lo tûrin dan che an tum pawh a ni thei bawk. (Mt. 10:35, 36) I hmachhawn fiahna chu tawrh hrehawm tak a nih chuan, Jehova rawngbâwl bânsan chu thil ṭha ber niin i ngai hial thei a ni. Mahse, eng harsatna pawh hmachhawn mah la, Jehova chuan paltlang thei tûra i mamawh finna leh chhelnate a pe ang che tih i ring tlat thei a ni.

2. Rom 15:4-a sawi angin, Bible chhiarna chuan kan chungah eng nghawng nge a neih theih?

² Jehova chuan a Thu, Bible-ah ṭha famkim lo mihringte’n fiahna khirh tak tak an hmachhawn dân chipchiar takin a chhinchhiah a ni. Engvângin nge? An hnên aṭanga kan inzir theih nân a ni. Chuvângin, Jehova chuan tirhkoh Paula chu Rom 15:4-a thute hi ziak tûrin a chêttîr a. (Chhiar rawh.) Chûng Bible thute chhiarna chuan thlamuanna leh beiseina min neihtîr thei a ni. Mahse, chûngte hlâwkpui tûr chuan Bible chhiar mai aia tam kan tih a ngai a. Bible chu kan ngaihtuahna leh thinlung kan inthununtîr tûr a ni. Harsatna engemaw bîk tak hmachhawn thei tûra kaihruaina kan zawng a nih chuan eng nge kan tih theih? Hêng tih dân palite hi kan hmang thei ang: (1) Ṭawngṭai, (2) Mitthla, (3) Chhût ngun, leh (4) Nunpui te hi. Chûng tih dân paliin a ken telte chu a mal malin i lo sawiho vang u. * Chumi hnuah, Lal Davida leh tirhkoh  Paula nuna thilthlengte zir chian nân chûng inzirna neih dânte chu kan hmang ang.   

3. Bible i chhiar ṭan hmain eng nge i tih ang a, engvângin nge?

³ (1) Ṭawngṭai. Bible i chhiar ṭan hmain, i thu chhiarte i hlâwkpui theih nân ṭawngṭaiin Jehova ṭanpuina dîl ang che. Entîr nân, buaina hmachhawn dân chungchângah kaihhruaina i zawng a nih chuan, Jehova hnênah a Thu, Bible-a thu bulte hmu thei tûrin a ṭanpuina dîl rawh.—Phil. 4:6, 7; Jak. 1:5.

4. Bible thute tinung tûrin engin nge ṭanpui thei che?

⁴ (2) Mitthla. Jehova chuan thilte mithla theihna mak danglam tak min pe a. Bible thute tinung tûr chuan, a chanchin kan chhiarte dinhmuna ding anga inchanin mitthla tum la. A thil hmuhte chu hmuh tumin, a rilru awm dân tûrte chu hriatthiam tum ang che.

5. Chhût ngunna chu eng nge ni a, engtin nge i chhût ngun theih?

⁵ (3) Chhût ngun. Chhût ngun tih chu i thu chhiarte leh chûng thute i nunpui theih dân ngun taka ngaihtuah hi a ni a. Chu chuan i thu chhiarte hre thiam lehzual tûrin a ṭanpui ang che. Chhût ngunna tel lova Bible chhiar chu milem bung hrang hrang, rem khâwm lova en satliah ang mai a ni. Chhût ngunna chu milem pum pui lan dân hriat theih nâna chûng milem bung hrang hrangte rem khâwm ang a ni a. Chhût ngunna i neih theih nân, hêng zawhnate hi i inzâwt thei a ni: ‘He Bible thua a chanchin kan chhiara hian a harsatna chu engtin nge a chinfel? Engtin nge Jehova’n a ṭanpui? Chûng kan thu zirte chu fiahnate chhel taka tuar chhuak thei tûra min ṭanpuitu atân engtin nge ka hman theih?’ tihte hi.

6. Engvângin nge kan thu zirte chu kan nunpui ang?

⁶ (4) Nunpui. Isua chuan kan thu zirte kan nunpui loh chuan, ṭiauvut chunga in satu ang mai kan ni ang tih a sawi a. Chu in satu chuan thawk rim hle mah se, a thawk rim thlâwn mai a ni. Engvângin nge? Thli leh ruahte a lo thawh hunah in chu a chim dâwn vâng a ni. (Mt. 7:24-27) Chutiang bawkin, ṭawngṭaina te, mitthlana te, leh chhût ngunnate nei mah ila, kan thu zirte kan nunpui leh si loh chuan kan thawk rim thlâwn mai a ni ang a. Kan rinna chu nêksâwrnate leh tihduhdahnatea fiah a nih hunah a nghet tâwk lo vang. Kawng leh lamah chuan, kan thu zirte kan nunpui hian thu tlûkna ṭha lehzual kan siam theiin, remna kan nei lehzual a, kan rinna pawh a nghet lehzual bawk a ni. (Is. 48:17, 18) Kan sawiho tâk tih dân palite hmangin, Lal Davida nuna thilthleng aṭanga kan zir theihte chu i lo en ang u.

7. Tûnah, Bible-a tu chungchâng nge kan sawiho vang?

⁷ I ṭhian emaw, i chhûngte zînga mi emawin a phatsan ngai tawh che em? A phatsan ngai tawh che a nih chuan, a pa Davida phatsan a, a lalram chhuhsak tumtu Absaloma chanchin ennawnna chu i hlâwkpui ngei ang.—2 Sam. 15:5-14, 31; 18:6-14.

8. Jehova ṭanpuina dawng tûrin eng nge i tih theih?

⁸ (1) Ṭawngṭai. I thu chhiar chu rilrua vawng rengin, dik lo taka cheibâwl i nih avânga i rilru nat dân chu Jehova hnênah thlen rawh. (Sâm 6:6-9) I rilru nat dân chiah chu zêp nei lovin hrilh rawh. Chumi hnuah, i harsatna chingfel thei tûra ṭanpui theitu thu bulte hmu thei tûrin Jehova ṭanpuina dîl ang che.

9. Davida leh Absaloma inkâra thilthlengte chu engtin nge i khaikhâwm ang?

⁹ (2) Mitthla. He Bible thua thilthlengte hi ngaihtuah la, chu chuan Lal Davida a nghawng dân chu mitthlain hmuh tum rawh. Davida fapa Absaloma chuan mite thinlung hneh tumin kum tam tak chhûng a bei a. (2 Sam. 15:7) Hmalâk hun nia a hriatah  chuan, mite’n ani chu an lal atâna pawm tûra an inbuatsaih theih nân Israel ram pum puiah enthlatute a tîr a. Chu helnaa amah thlâwp tûrin Davida ṭhian hnai tak leh a thurâwn petu Ahithophela pawh a hmin thei hial a ni. Absaloma chuan lal a nih thu a puang a; tichuan, chutih hun laia nasa taka dam lo Davida chu man a, tihhlum a tum ta a ni. (Sâm 41:1-9) Davida’n chu phiarrûkna chungchâng a hriat chuan Jerusalem khua ata a tlân chhuak a. A tâwpah, Absaloma sipaite chu Davida sipai rinawmte nên an indo va. Hel pâwla tel sipaite chu an tlâwm a; tichuan, Davida fapa Absaloma chu tihhlum a ni ta a ni.

10. Lal Davida’n eng thilte nge tih a duh mai theih?

¹⁰ A hnuah, chûng thil zawng zawng a chunga a thlen avânga Davida rilru awm dân tûr chu han ngaihruat chhin teh. Ani chuan Absaloma chu a hmangaihin, Ahithophela chu a ring hle a. Mahse, an pahnih chuan an phatsan ve ve a ni. A rilru an tina hlein, tihhlum hial an tum a. Davida chuan a ṭhian dangte pawh Absaloma lama ṭang angah ngaiin anmahni a rinna a hloh mai thei a. Mahni chauh inngaihtuahin, amah chauhva tlân chhiat chu a duh mai thei. A nih loh leh, a lunghnual lutuk avângin a beidawng thei bawk. Mahse, Davida’n chutiang chuan a ti lo. Chu aiin, a hmachhawn fiahna khirh tak chu a paltlang zâwk a ni. Engvângin nge chutianga a paltlang theih?

11. Engtin nge Davida’n dinhmun harsa tak chu a chhân lêt?

¹¹ (3) Chhût ngun. Kan sawi tâk Bible thu aṭang khân eng thu bulte nge kan zir theih? He zawhna, “Davida’n harsatnate a hmachhawn theih nân eng nge a tih?” tih hi chhâng rawh. Davida chu rilru chiaiin a awm lo va, ani chuan hmanhmawh takin thu tlûkna âtthlâk tak a siam hek lo. Hlauh avânga eng mah ti thei lovin a awm lo va. Chu aiin, Jehova hnênah ṭanpuina dîlin a ṭawngṭai zâwk a ni. A ṭhiante hnênah pawh ṭanpuina a dîl a. A thu tlûkna siam angin hma a la nghâl vat a ni. Davida chuan tuar nasa hle mah se, chûngte chu mi dangte rin loh phah nân leh huat phah nân a hmang lo va. Jehova leh a ṭhiante chu a la ring zawm zêl a ni.

12. Jehova’n Davida ṭanpui tûrin eng nge a tih?

¹² Engtin nge Jehova’n Davida a ṭanpui? Zir bingna ṭhenkhat i neih chuan Jehova’n Davida chu fiahnate chhel taka tuar chhuak thei tûrin a mamawh chakna a pe tih i hria ang. (Sâm 3:1-8; a chunga thuziak) Jehova’n Davida thu tlûkna siam chu mal a sâwm a. Chu bâkah, amah humhim tûra beitu a ṭhian rinawmte chu a ṭanpui bawk.

13. Mi dangin kawng engemawti taka i rilru a tinâ a nih chuan engtin nge Davida i entawn theih? (Matthaia 18:15-17)

¹³ (4) Nunpui. Heti hian inzâwt rawh, ‘Engtin nge Davida ka entawn theih ang?’ tiin. Buainate chingfel tûra hma i lâk vat a ngai a. Dinhmun azirin, Matthaia bung 18-a chhinchhiah Isua fuihna chu a ngial a nganin emaw, a thu bulin emaw i nunpui thei a ni. (Matthaia 18:15-17 chhiar rawh.) Rilru veina maia innghat thu tlûknate chu hmanhmawh takin i siam tûr a ni lo. Buainate chingfel thei tûra rilru thlamuanna leh finna pe tûr chein Jehova hnênah i ṭawngṭai thei a ni. I ṭhiante chungah rinna hloh mai suh. Chu aiin, an ṭanpuina chu lâwm takin pawm ang che. (Thuf. 17:17) Pathian Jehova’n a Thu, Bible aṭanga fuihna a pêk che zawm chu thil pawimawh ber a ni.—Thuf. 3:5, 6.

14. Eng dinhmunte’n nge 2 Timothea 1:12-16; 4:6-11, 17-22-a thute chu ngaihventîr thei che?

¹⁴ I chhûgte hnên aṭangin dodâlna i tâwk em? Nasa taka kan rawngbâwlna khuahkhirh,  a nih loh leh khap beh hialna rama awm i ni em? Chutiang a nih chuan, 2 Timothea 1:12-16 leh 4:6-11, 17-22-na chhiar chu i chak phah thei a ni. * Paula chuan tân ina a awm laiin chûng Bible chângte chu a ziak a ni.

15. Jehova hnênah eng nge i dîl theih?

¹⁵ (1) Ṭawngṭai. Chûng Bible chângte i chhiar hmain, i hmachhawn buaina leh chumiin a nghawng dân che chu Jehova hnênah hrilh la, zêp nei lovin hrilh vek rawh. Chumi hnuah, i hmachhawn harsatna chinfel dân hre tûrin Paula tawh fiahnate chungchâng sawina Bible-a thu bulte i hriatthiam theih nân Jehova hnênah ṭanpuina dîl ang che.

16. Paula chungah eng thil nge thleng?

¹⁶ (2) Mitthla. Paula dinhmuna awm angah han inchan teh. Ani chu Rom khuaa tân inah khaidiat bunin a awm a. Tûn hmain tân inah lo tâng tawh ṭhîn mah se, tûn ṭumah erawh tihhlum a ni dâwn tih a inhre chiang a ni. A ṭhian ṭhenkhatin an kalsan a, amah ngei pawh tisa lamah a chau hle a ni.—2 Tim. 1:15.

17. Paula’n eng tih nge a duh mai theih?

¹⁷ Paula chuan duh thlanna dang lo siam ta ila chuan manin ka awm lo tûr tia ngaihtuahin, hun kal tawhte chu a ngaihtuah thei a. Amah kalsantu Asia rama awmte chungah a thinrim thei a, a ṭhian dangte a rinna pawh a hloh thei bawk. Mahse, chutiang chuan a ti lo. Engvângin nge rinnghehna leh beiseina a neih tlat theih?

18. Engtin nge Paula’n a hmachhawn fiahna chu a chhân lêt?

¹⁸ (3) Chhût ngun. He zawhna, “Engtin nge Paula’n chakna a neih theih?” tih hi chhâng rawh. Paula chuan tihhlum a ni thuai dâwn tih a hre chung pawhin, Jehova chawimawi chu thil pawimawh ber a ni tih a theihnghilh ngai lo. Chu bâkah, mi dangte a fuih theih dân tûr pawh a ngaihtuah reng bawk a ni. Ṭawngṭai ziahna hmangin Jehova a rinchhan tlat a. (2 Tim. 1:3, 4) Amah kalsantute chungchâng a lutuka ngaihtuah aiin, kawng ṭangkai taka amah thlâwpa ṭanpuitu a ṭhian rinawmte avânga a lâwmzia a sawi zâwk a ni. Chu bâkah, Paula chuan Pathian Thu, Bible chu a zir zawm zêl bawk. (2 Tim. 3:16, 17; 4:13) A pawimawh berah chuan, Jehova leh Isua’n an hmangaih tih a ring nghet tlat a ni. Anni chuan an thlahthlam lo va, rinawm taka a rawngbâwlna avângin lâwmman an pe ang.

19. Engtin nge Jehova’n Paula a ṭanpui?

¹⁹ Jehova’n Paula hnênah Kristian a nih avângin tihduhdahna chu chhel taka a tawrh a ngai dâwn tih a hrilh a. (Tirh. 21:11-13) Engtin nge Jehova’n a ṭanpui? Paula ṭawngṭainate chu ngaihthlâksakin chakna a pe a ni. (2 Tim. 4:17) Paula chu lâwmman hmu tûra theih tâwp a chhuah avângin a hmu ngei dâwn tih hriattîr a ni a. Jehova chuan Paula ṭhian rinawmte chu amah ṭanpui tûrin a chêttîr bawk.

20. Rom 8:38, 39-na chu rilruah dahin, engtin nge Paula kan entawn theih?

²⁰ (4) Nunpui. Heti hian inzâwt rawh, ‘Engtin nge Paula ka entawn theih?’ tiin. Paula angin, keni pawhin rinna avângin tihduhdahna kan tuar ang tih kan beisei thei a. (Mk. 10:29, 30) Fiahna hmachhawn chung pawha rinawmna vawng reng thei tûr chuan, ṭawngṭaia Jehova kan rinchhan leh inzirna hun duan ṭha kan neih reng a ngai a ni. Kan tihtheih azawnga pawimawh ber chu Jehova chawimawi hi a ni tih kan hre reng tûr a ni a. Jehova’n min kalsan ngai lo vang tih leh min hmangaihna chu tu man an tichhe thei lo tih kan chiang thei a ni.—Rom 8:38, 39 chhiar rawh; Heb. 13:5, 6.

21. Unaunu Aya-i leh Unau Hector-a chu an hmachhawn harsatnate hneh tûrin engin nge ṭanpui?

²¹ Kan dinhmunte chu eng pawh ni se, Bible-a entîrnate aṭangin chakna kan hmu thei a. Entîr nân, Japan rama pioneer Unaunu Aya-i chuan Jona chanchinin vântlâng hmuna thu hrilh a hlauhna hneh tûra a ṭanpui thu a sawi a. Indonesia rama ṭhalai Unau Hector-a pawhin a nu leh pa chu Jehova rawngbâwltu ni lo mah se, Ruthi entawn tûr siamin Jehova chanchin zir tûr leh a rawngbâwl tûra a chêttîr thu a sawi a ni.

22. Bible ṭanchan lemchan, a nih loh leh “An Rinna Chu Entawn Rawh,” tih thuziakte chu engtin nge i hlâwkpui theih ber ang?

²² Nangmah tichak theitu Bible-a mi rinawmte chanchin chu khawiah nge i hmuh theih? Kan video-te, ngaihthlâk tûr awthun te, leh “An Rinna Chu Entawn Rawh,” tih thuziakte chuan Bible-a thilthlengte chu a tinung a ni. * Ṭha taka buatsaih chûng hmanruate i en hma, i ngaihthlâk hma, leh i chhiar hmain, i nunpui theih tûr thu pawimawhte i hriat theih nân ṭawngṭaiin Jehova ṭanpuina dîl la. Chûng mi rinawmte dinhmuna awm angah inmitthla ang che. An thiltihte leh an hmachhawn harsatnate paltlang thei tûra Jehova’n a ṭanpui dân chu chhût ngun la. Tichuan, i dinhmun azirin chûng i thu zirte chu nunpui ang che. Jehova’n a ṭanpui che avângin a hnênah lâwmthu hrilh la. Mi dangte fuih leh ṭanpui theihna hun remchâng zawngin, a ṭanpuina i dawnte avânga i lâwmzia lantîr bawk ang che.

23. Isaia 41:10, 13-a sawi angin, Jehova’n eng nge min tiam?

²³ Setana thunun he khawvêla nun hi a khirhin, a châng chuan a beidawnthlâk hle thei a. (2 Tim. 3:1) Mahse, kan lungkham emaw, kan hlauh emaw a ngai lo. Jehova chuan kan harsatna tawhte chu a hria a. Kan lo tlu a nih pawhin, a kut ding lam chak takin min chelh ding leh ang tih min tiam a ni. (Isaia 41:10, 13 chhiar rawh.) A ṭanpuina chu ring nghet tlatin, Bible chhiarna aṭangin chakna kan hmu thei a, eng ang harsatna pawh kan paltlang thei bawk a ni.