1-2. Bible zirlai chu baptisma chang thei khawpa hmasâwn tûrin tute’n nge ṭanpui thei?

FIJI rama awm Unaunu Amy-i chuan: “Bible aṭanga ka thu zirte chu ka ngaina hle a. Thutak a ni tih pawh ka hria. Mahse, unaute nêna kan inkawm hnuah chauh ka nunah inthlâk danglamna siamin, baptisma chang thei khawpin hma ka sâwn a ni,” tiin a sawi. Amy-i thiltawn chuan he thu dik pawimawh tak hi a târ lang: Bible zirlai chuan kohhrana unau dangte ṭanpuina a dawn hian baptisma chang thei tûra hma a sâwn chhoh a beiseiawm lehzual a ni, tih hi.

² Thuchhuahtute hian mi tharte chu kohhran chhûnga mi rawn ni tûrin an ṭanpui ṭheuh thei a. (Eph. 4:16) Vanuatu rama pioneer unanu Leilani-i chuan: “Naupang pakhat enkawl seilian tûr chuan khaw pum ṭanrual a ngai tia sawi a ni ṭhîn a. Zirtîr siamnaah pawh chutiang bawk chu niin ka hria; mi tuemaw thutaka hruai lût tûr chuan kohhran pum ṭanrual a ngai ṭhîn,” tiin a sawi. Naupang chu mi puitling ni tûra ṭanpuinaah chhûngkuaa mite, ṭhian te, leh zirtîrtute an tel vek a. An za chuan naupang chu fuihin leh zir tûr pawimawhte zirtîrin an ṭanpui a. Chutiang bawkin, thuchhuahtute chuan Bible zirlaite chu thurâwn pe a, an fuih bâkah, entawn tûr ṭhate siamin, baptisma chang thei khawpa hmasâwn tûrin an ṭanpui a ni.—Thuf. 15:22.

3. Unaunu Ana-i te, Leilani-i te, leh Unau Dorin-a te thusawi aṭangin eng nge kan zir theih?

³ Engvângin nge Bible zirpuitu chuan zirlai ṭanpui theitu thuchhuahtu dangte ṭanpuina chu a pawm ang? Moldova rama special pioneer Unaunu Ana-i sawi hi lo chhinchhiah ang che,  ani chuan: “Bible zirlaiin hma a sâwn ṭan hian a mamawh zawng zawngte mahnia pêk vek chu thil harsa tak a ni,” tiin a sawi. Chumi rama special pioneer thawk mêk Unau Dorin-a pawhin: “Thuchhuahtu dangte chuan ka lo ngaihtuah ngai miah loh, zirlai thinlung khawih tak thute an sawi ṭhîn,” tiin a sawi. Unaunu Leilani-i chuan lâwm taka ṭanpuina kan pawm a ngaih chhan dang pawh hetiang hian a sawi a ni: “Zirlai chunga unau dangte lantîr hmangaihna leh ngilneihna chuan ani chu Jehova Thuhretute hre chiang tûrin a ṭanpui thei,” tiin.—Joh. 13:35.

4. He thuziakah hian eng nge kan sawiho vang?

⁴ Mahse, ‘Zirna kaihruaitu ka nih loh chuan, engtin nge zirlai chu hmasâwn tûra mi mal taka ka ṭanpui theih ang?’ tiin i ngaihtuah mai thei. Bible zirpuituin an zirnaa tel ve tûra min sâwm huna kan tihtheihte leh zirlai chu inkhâwma a lo tel ṭan huna kan tihtheihte chu i lo sawiho vang u. Chu bâkah, Bible zirlaite chu baptisma chang thei khawpa hmasâwn tûra upate’n an ṭanpui theih dân pawh kan sawiho bawk ang.

5. Bible zirnaa tel ve tûra sâwm i nih huna i chanvo chu eng nge ni?

⁵ Bible zirnaah, Pathian Thu hre thiam tûra zirlai ṭanpuinaa mawhphurtu ber chu a zirpuitu a ni a. A zirpuituin an zirnaa tel ve tûra a sâwm che a nih chuan, amah thawhpuitu angin inthlîr ang che. I chanvo chu amah ṭanpui hi a ni. (Thur. 4:9, 10) Bible zirna an neih chhûnga ṭanpuitu ṭha tak ni tûrin eng nge i tih theih?

6. Bible zirnaah i tel ve dâwn a nih chuan, engtin nge Thufingte 20:18-a kan hmuh thu bul chu i nunpui theih?

⁶ Bible zirna atân inbuatsaih rawh. A hmasa berin, a zirpuitu chu a Bible zirpui chanchin tlêm azâwng zâwt ang che. (Thufingte 20:18 chhiar rawh.) Heti hian i zâwt thei a ni: “Bible zirlai thurin te, kum te, leh chhûngkua chungchâng chu eng nge ni? Eng thu nge in sawiho dâwn? Zirlaiin hria se i tih chu eng nge ni? Zirna neih laia sawi tûr leh sawi loh tûr te, tih tûr leh tih loh tûrte a awm em? Zirlaiin hma a sâwn theih nân eng thu nge sawipui ila ṭha ang?” tiin. Ni e, zirpuitu chuan zirlai thurûk eng mah chu a hrilh lo vang che a; mahse, a thil hrilh che chu a ṭangkai ngei ang. Missionary nia rawngbâwl Unaunu Joy-i chuan Bible zirnaa amah thawhpuitute hnênah chutiang chuan a ti a. Ani chuan: “Chutianga sawihona chuan zirlai chunga ngaihsakna lantîr tûr leh zirna neih laia a sawi tûrte hre tûrin a ṭanpui a ni,” tiin a sawi.

7. Engvângin nge thawhpuitu chu zirna atâna a lo inbuatsaih ve a ngaih?

⁷ Zirnaa tel ve tûra sâwm i nih chuan, sawiho tûr thute i lo inbuatsaih theih chuan a ṭha ang. (Ezr. 7:10) A chunga kan sawi tâk Dorin-a chuan: “Ka thawhpuiin zirna atâna a lo inbuatsaih lâwk hian ka lâwm hle a. Chutiang chuan,  awmze nei takin a tel ve thei a ni,” tiin a sawi. Chu bâkah, zirlai chuan in pahnihin ṭha takin in inbuatsaih lâwk tih a hria ang a, chu chu a tân entawn tûr ṭha a ni ang. Zir tûr thute chu ṭha taka i inbuatsaih hman lo a nih pawhin, a thu pawimawh lai tal hriat tum ang che.

8. Bible zirnaa i ṭawngṭaina chu engtin nge awmze nei tak i nihtîr theih?

⁸ Ṭawngṭaina hi Bible zirnaa pêng pawimawh tak a nih avângin, ṭawngṭai tûra sâwm i nih huna i sawi tûrte chu lo ngaihtuah lâwk ang che. Chutianga i tih chuan, i ṭawngṭainain awmzia a nei lehzual ngei ang. (Sâm 141:2) Japan rama Unaunu Hanae-i chuan amah zirpuituin a rawn hruai unaunu pakhat ṭawngṭaina chu a la hre reng a. Ani chuan: “Jehova nên inlaichînna nghet tak a nei tih ka hria a, amah ang nih ka duh a ni. A ṭawngṭainaa ka hming a lam tel chuan min hmangaih nia inhriatna ka nei bawk,” tiin a sawi.

9. Jakoba 1:19-a sawi angin, Bible zirnaah ṭanpuitu ṭha ni tûrin nge nge i tih theih?

⁹ Zirna neih laiin a zirpuitu chu ṭanpui rawh. Nigeria rama special pionner Unaunu Omamuyovbi-i chuan: “Ṭanpuitu ṭha chuan zirna neih laiin ṭha takin a ngaithla ṭhîn a. Awmze nei taka sawi ve zauh châng nei mah se, a zirpuitu chu zirna kaihruaitu ber a ni tih a hriat avângin, a ṭawng tam lutuk lo,” tiin a sawi. Engtin nge zirna neih laia thusawi hun tûr leh sawi dân tûr i hriat theih ang? (Thuf. 25:11) A zirpuitu leh zirlai sawite chu ngun takin ngaithla ang che. (Jakoba 1:19 chhiar rawh.) Chutianga i tih chauhvin, a ṭûl hunah i ṭanpui thei ang a. Mahse, remhriatna i neih erawh a ngai ang. Entîr nân, a zirpuituin a chhûtpui hunah leh thupui dang a hmêlhriattîr huna amah tibuai khawpa ṭawng tam lutuk chu i duh lo ngei ang. Mahse, an sawiho mêk thute tichiang lehzual tûrin thu tâwi tê, tehkhin thu pakhat, a nih loh leh zawhna pakhat hmangin i ṭanpui thei a ni. A châng chuan, zirnaah sawi belh tûr nei lo niin i inhre mai thei a. Mahse, zirlai chu i fak a, a chunga ngaihsakna i lantîr chuan hma sâwn tûrin nasa takin i ṭanpui a ni ang.

10. Engtin nge i thiltawnin Bible zirlai chu a ṭanpui theih?

¹⁰ I thiltawnte chu hrilh rawh. A inâwm a nih chuan, zirlai hnênah thutak i hmuh dân te, harsatna i paltlang dân te, leh i nuna Jehova ṭanpuina i hmuh dânte chu tâwi têin i hrilh thei a. (Sâm 78:4, 7) I thiltawn chu zirlai mamawh tak a ni thei. Chu chuan a rinna a tichakin, baptisma chang thei khawpa hmasâwn zawm zêl tûrin a ṭanpui thei a ni. Chu bâkah, a hmachhawn mêk fiahnate paltlang theih dân hre tûrin a ṭanpui thei bawk. (1 Pet. 5:9) Brazil rama pioneer thawk mêk Unau Gabriel-a chuan Bible zirna a hlâwkpui dân a sawi a. Ani chuan: “Unaute thiltawn ka hriat chuan Jehova’n kan hmachhawn harsatnate a hmu tih ka hria a. Chûngte chu an paltlang  thei a nih chuan, kei pawhin ka paltlang thei ang,” tiin a sawi a ni.

11-12. Engvângin nge inkhâwma lo tel Bible zirlai chu ṭha taka kan lo lawm ang?

¹¹ Bible zirlai chu baptisma chang thei khawpa hmasâwn tûr chuan, kohhran inkhâwmahte tel ziahin, a hlâwkpui tûr a ni. (Heb. 10:24, 25) Bible zirpuitu chuan inkhâwma lo tel tûra a sâwm ngei a rinawm a. A lo inkhâwm a nih chuan, inkhâwm zawm zêl tûrin kan fuih ṭheuh thei a ni. A nih chuan, eng kawngtein nge kan fuih theih?

¹² Zirlai chu ṭha takin lo lâwm rawh. (Rom 15:7) Zirlai chuan inkhâwma ṭha taka lawm nia a inhriat chuan, inkhâwm zawm zêl a duh ngei ang. A lutuk ni lovin, a âwm tâwkin lo lâwm la, unau dangte hmêlhriattîr ang che. Ani chu unaute’n an lo ngaihsak tûrah ngai mai suh; amah zirpuitu chu inkhâwm a tlai emaw, chanvo dang a nei emaw pawh a ni thei a. A thusawite chu ngun takin ngaihthlâksak la, a chungah mi mal ngaihsakna lantîr ang che. Chutianga ṭha taka i lo lawmna chuan a chungah eng nghawng nge a neih theih? Kum tam vak lo kal taa baptisma chang a, tûna kohhranho rawngbâwltu ni ta Unau Dmitrii-a thiltawn hi lo chhinchhiah ang che. A inkhâwm hmasak ber ṭum chu sawiin, ani chuan: “Unaupa pakhat hian Kingdom Hall pâwn lama inthlahrung taka ka ding chu min hmu a; tichuan, Kingdom Hall chhûngah min hruai lût a. Unau tam takin min lo chibai a. Mak ka ti lutuk. Nuam ka tih êm avângin, nî tin inkhâwm ila ka ti hial a. Chutiang chu hmun dangah ka la tawng ngai lo,” tiin a sawi.

13. I nungchangin Bible zirlai chungah eng nghawng nge a neih theih?

¹³ Entawn tûr ṭha siam rawh. I nungchang chuan Bible zirlai chu thutak a hmu tih hre chiang tûrin a ṭanpui thei a. (Mt. 5:16) Moldova rama pioneer Unau Vitalii-a chuan: “Kohhrana unaute nun dân leh awm dânte chu ka hmu a. Chu chuan Jehova Thuhretute hi sakhaw dik awmchhun an ni tih min rinnghehtîr a ni,” tiin a sawi.

14. Engtin nge i entawn tûr siam chuan tuemaw chu hmasâwn zêl tûra a ṭanpui theih?

¹⁴ Baptisma chang thei tûr chuan, zirlaiin a thu zirte chu a nunpui a ngai a. Chu chu a awlsam reng lo. Mahse, Bible thu bulte nunpuina i hlâwkpui dânte a hmuh chuan nangmah entawn tûra chêttîrin a awm thei a ni. (1 Kor. 11:1) Kan sawi tâk Unaunu Hanae-i thiltawn hi han ngaihtuah teh. Ani chuan: “Unaute chu ka thuzirte a taka nunpuitute an ni a. Fuihna ka pêk theih dân leh mite ka ngaihdam theih dân bâkah, hmangaihna ka lantîr theih dânte chu ka hmu a. Mi dangte fakna thu chauh an sawi ṭhîn a. Anni chu entawn ka duh a ni,” tiin a sawi.

15. Thufingte 27:17-na chuan engtin nge rawn inkhâwm zawm zêltu Bible zirlai chu ṭhiana kan siam a ngaih chhan hre thiam tûra min ṭanpui?

 ¹⁵ Zirlai chu ṭhianah siam rawh. Zirlai chu inkhâwmahte a tel zawm zêl rualin, a chungah mi mal ngaihsakna lantîr zawm zêl la. (Phil. 2:4) Ani chu hriat chian lehzual tum ang che. Mi mal thila inrawlh thûk si lovin, a ṭha lama a inthlâk danglamnate chu fak la, a Bible zirna te, a chhûngkua leh a hnathawh chungchângte chu zâwt ang che. Chutianga inbiak pawhna chuan a inhnaihtîr lehzual thei che u a ni. Zirlai chu ṭhiana i siam tawh chuan, baptisma chang thei khawpa hmasâwn tûrin i ṭanpui tihna a ni. (Thufingte 27:17 chhiar rawh.) Hanae-i chu tûnah chuan regular pioneer a ni tawh a. Inkhâwma a rawn tel hmasak ber ṭum chu sawiin, ani chuan: “Kohhrana unaute nêna ṭhiana kan insiam hnu chuan inkhâwm hunte chu ka nghâkhlel lehzual a, ka chauh hunah pawh ka tel hrâm hrâm ṭhîn. Ka ṭhian tharte nêna inkawm chu nuam ka ti hle a, chu chuan ka rinna min ṭâwmpui lotu ka ṭhiante kawm bânsan tûrin min ṭanpui a. Pathian Jehova leh ka unaute hnaih chu ka duh a ni. Chuvângin, baptisma ka chang ta a ni,” tiin a sawi.

16. Bible zirlai chu kohhran chhûnga mi nia inhre tûrin eng dang nge i tih theih?

¹⁶ Zirlaiin hma a sâwn a, inthlâk danglamnate a siam zawm zêl hian kohhran chhûnga mi a ni tih inhre tûrin ṭanpui rawh. Chu chu a chunga khualchhâwn thiamna lantîrin i ti thei a ni. (Heb. 13:2) Moldova rama rawngbâwl Unau Denis-a chuan Bible a zir lai hunte thlîr lêtin heti hian a sawi a ni: “Unaute chuan an inkawm khâwmnaah kan nupain min sâwm ṭhîn a. Jehova’n amahni a ṭanpui dân an sawite kan hriat chuan min tichak hle a. Jehova rawngbâwl kan duh tih leh nun awmze nei takin min hmuak tih hre chiang tûrin min ṭanpui a ni,” tiin. Bible zirlai chu thuchhuahtu ni tûra a tlin tawh chuan, i ruala rawngbâwlnaa tel tûrin i sâwm thei a. Brazil rama thuchhuahtu Diego-a chuan: “Unaute’n rawngbâwlnaa tel tûrin min sâwm ṭhîn a. Chu chu anmahni hriat chian theih dân kawng ṭha tak a ni. Chutianga rawngbâwlnaa ka tel chuan thil tam tak ka zir a, Jehova leh Isua ka hnaih lehzual a ni,” tiin a sawi.

17. Engtin nge upate’n Bible zirlaite an ṭanpui theih?

¹⁷ Bible zirlaite chu hun pe rawh. Kohhran upate u, in ngaihsakna duhawm tak chuan zirlaite chu baptisma chang thei khawpa hmasâwn tûrin a ṭanpui thei a ni. Anni chu inkhâwmahte in be ziah thei ang em? An hmingte in hriat chuan in ngaihsakzia an hria ang a, a bîk takin chhânna an pêk hmasak ber ṭum aṭanga an hminga in koh theih chuan an hre lehzual ang. Thuchhuahtuin tuemaw Bible a zirpui huna in zui theih nân in hun duante  chu in siamrem thei reng ang em? In rin aia nasain zirlai chungah nghawng in nei thei a ni. Nigeria rama pioneer Unaunu Jackie-i chuan heti hian a sawi a ni: “Zirlai tam tak chuan anmahni ka zirpui huna min zuitu unaupa chu kohhran upa a ni tih an hriat chuan mak an ti hle a. Zirlai pakhat chuan: ‘Kan pastor chuan hetiang hian a ti ngai lo vang. Ani chuan mi hausate leh sum pe theite chauh a tlawh ṭhîn!’ tiin a sawi,” tiin. Chu Bible zirlai chu tûnah chuan inkhâwmahte a tel tawh a ni.

18. Petera thawn khat 5:2-naa sawi angin, engtin nge upate chuan an hnêna kawltîr mawhphurhna chu an hlen theih?

¹⁸ Bible zirpuitute chu zirtîr la, fuih rawh. Kohhran upate u, thuchhuahtute chu thu hriltu thiam tak leh zirtîrtu ṭha tak ni tûra ṭanpuinaah mawhphurhna lian tak in nei a ni. (1 Petera 5:2 chhiar rawh.) Tuemaw chuan in awm laia Bible zirna kaihhruai a hreh a nih chuan, kaihhruaisak ang che u. Kan sawi tâk Jackie-i chuan: “Upate chuan ka Bible zirpuite chanchin min zâwt fo ṭhîn a. Bible zirtîrnaa harsatnate ka neih hian thurâwn ṭha takte min pe ṭhîn,” tiin a sawi. Upate chuan Bible zirpuitute chu theih tâwp chhuah tûrin an fuih thei a ni. (1 Thes. 5:11) Jackie-i chuan: “Upate’n min fuih a, theih tâwp ka chhuahnate an ngaihhlut thu min hrilh hian ka lâwm thei hle a. Chûng min fuihnate chuan khaw lum laia tui vâwt tak in ang maiin min tiharh sawng sawng ṭhîn a ni. An mi faknate chuan inrintâwkna min neihtîr lehzual bâkah, mite Bible zirpuina aṭanga ka neih hlimna pawh a tipung bawk,” tiin a sawi—Thuf. 25:25.

19. Kan za hian eng ang hlimna nge kan neih ṭheuh theih?

¹⁹ Tûnah Bible zirpui kan nei lo a nih pawhin, tuemaw chu thlarau lama hmasâwn tûrin kan ṭanpui thei a ni. Bible zirpuitute chu an zirnaa kan zui hunah ṭawng tam lutuk lo leh sawi tûrte ṭha taka lo inbuatsaihin, anni chu kan ṭanpui thei a. Zirlaite chu Kingdom Hall-a an lo kal hunah nêlawm taka lo lâwmin, an tân entawn tûr ṭha kan siam thei a. Upate chuan zirlaite chu hun pein leh anmahni zirpuitute chu zirtîrin leh fakin an fuih thei a ni. Kan tihtheih chu tlêm tê pawh ni se, kan Pa vâna mi, Pathian Jehova hmangaih tûr leh a rawngbâwl tûra tuemaw ṭanpuinaah kan tel ve tih hriatna aia hlimna nasa zâwk a awm thei dâwn em ni?