Kristian ṭhenkhat chuan an chhûngte leh Thuhretu unau dangte nêna inbiak pawh nân tûn lai thiamnate chu an hmang a. Kristian puitling chuan he fuihna: “Mi fing chuan thil ṭha lo a hmu a, a biru ṭhîn a. Mi mâwl erawh chuan a tâwn ṭhîn a, a tuar phah ṭhîn,” tih hi a hre reng ang.—Thuf. 27:12.

Pathian Jehova’n min vênhim a duh tih kan hria a. Chuvângin, inṭhen darhna awmtîrtu te, kohhran aṭanga hnawhchhuah te, a nih loh leh zirtîrna dik lo chawilârtute nêna inzawmna neih chu kan duh lo. (Rom 16:17; 1 Kor. 5:11; 2 Joh. 10, 11) Kohhrana mi ṭhenkhat chuan Bible tehnate an zâwm lo mai thei a. (2 Tim. 2:20, 21) Chuvângin, ṭhian kan siam hunah kan fîmkhur tûr a ni. Mahse, thu inthawnna app-te hmanga ṭhian ṭha thlan chu a awlsam lo mai thei.

A bîk takin, mi tam tak telna group-a kan tel ve hian fîmkhur taka ṭhian thlan chu a pawimawh lehzual a. Kristian ṭhenkhat chuan mi tam tak telna group an zawm avângin rah ṭha lo tak an seng a ni. A nih chuan, unau tuemaw chu mi a za têl, a nih loh leh a sâng têl telna group-a a tel ve a nih chuan engtin nge a fîmkhur theih ang? Chu group-a tel zawng zawngte thlarau lam dinhmun leh an nihna dik tak chu hriat vek theih a ni lo vang. Sâm 26:4-na chuan: “Mi eng mah lo mai maite hnênah ka ṭhu ngai lo va; vervêkte hnênah pawh ka lût hek lo,” tiin a sawi. Chu chuan thu inthawnna app hmanga mite kan biak hunah kan mi hriat chiante chauh biak a finthlâkzia a târ lang a ni lâwm ni?

Mi tlêm tê telna group a nih pawhin, Kristian chuan a hun hman zât tûr leh an thu inthawnte chu a chhût a ngai a. Kan thu dawn chu eng chungchâng pawh niin, chhân lêt nân hun a duh rei emaw, rei lo emaw pawh ni se, chhân lêt ngei ngei tûrah kan ngai tûr a ni lo. Paula chuan Timothea chu ‘kamtam leh mite thiltih rêlsak chîngte’ chungchângah vaukhânna a pe a. (1 Tim. 5:13) Tûn laiah pawh, chutiang thil chu phone leh tablet-te hmanga tih theih a ni.

Kristian puitlingte chuan an Kristian unaute chu a chhe zâwngin an sawi lo vang a, an chungchâng thurûk eng mah an sawi chhuak hek lo vang. (Sâm 15:3; Thuf. 20:19) Chu bâkah, a nihna bâka thusawite leh thu belh chian dâwl lote rin emaw, ngaihthlâk emaw chu an duh lo ngei bawk ang. (Eph. 4:25) Kan website jw.org aṭang leh thla tin chhuak JW Broadcasting^® aṭangin thlarau lam chaw ṭha tak takte leh rinchhan tlâk chanchin thar ber berte chu kan dawng a ni.

Thuhretu ṭhenkhat chuan thu inthawnna app-te chu thil zawrh nân te, lei nân te, fakmawi nân te, leh hnathawktu tûr zawn nânte an hmang a. Chûngte chu thlarau lam thil ni lovin, sumdâwnna lam thil a ni. “Tangka ngainatna tel lo” rilru put hmang neitu Kristiante chuan an unaute chu sum leh pai lama hlâwkna hmuh nâna hman duhna engpawh chu an do a ni.—Heb. 13:5.

Ṭanpui ngaite leh leilung chhiatna tâwk Kristian unaute ṭanpuina sum khawn nâna thu inthawnna app-te hman chungchâng hi eng nge ni ve? Kan unaute chu kan hmangaih avâng leh an ṭhatna tûr kan ngaihtuah avângin inṭanpui tawn leh infuih tawn chu kan duh a. (Jak. 2:15, 16) Mahse, mi tam tak telna group hmanga chutianga tihna chuan tualchhûng branch office, a nih loh leh kohhranin ruahmanna ṭha zâwk a siamte chu a tibuai thei a ni. (1 Tim. 5:3, 4, 9, 10, 16) Kan zînga tu mah hian kan unaute ngaihsak tûra mawhphurhna nei bîk anga mite ngaihtîr chu kan duh lo ngei ang.

Pathian chawimawina thlentu thilte tih chu kan duh a. (1 Kor. 10:31) Chuvângin, thu inthawnna app-te emaw, tûn lai thiamna dangte emaw i hman dâwn leh dâwn loh chungchânga thu tlûkna i siam hunah a hlauhawm theihna chu ngaihtuahin, fîmkhur ang che.