1. Matthaia 24:9-a sawi angin, engvângin nge khawvêlin min hua a nih chuan mak kan tih loh vang?

JEHOVA chuan mite hmangaih tûr leh hmangaihna dawng tûrin min siam a. Chuvângin, tuemawin min huat hian kan rilru a nâin, hlauhna kan nei hial thei a ni. Entîr nân, Europe khawmuala awm Unaunu Georgina-i chuan: “Kum 14 mi ka nihin ka nu chuan Jehova rawng ka bâwl avângin min haw ṭan a. Hnâwl nia inhriatna ka neih bâkah, mi ṭha ni pawhin ka inhre tawh lo,” * tiin a sawi. Unau Danylo-a pawhin: “Sipaite’n Jehova Thuhretu ka nih avânga min vuak a, min sawichhiat a, min vau hian ka hlauvin, mualpho hle ni hian ka inhria,” tiin a ziak a. Chutianga mite min huatna chuan min tihrehawm mah se, chu chu mak kan ti lo. Isua ngeiin mite huat kan ni dâwn tih a sawi lâwk si a.—Matthaia 24:9 chhiar rawh.

2-3. Engvângin nge Isua hnungzuitute chu huat an nih?

² Khawvêl mite chuan Isua hnungzuitute chu an hua a. Engvângin nge? Isua anga ‘khawvêla mi kan nih loh’ vâng a ni. (Joh. 15:17-19) Mihring sawrkârte chu kan zah hle rualin politics-ah kan tualdâwih a, ram flag chibai kan bûk lo va, ram hla pawh kan sa hek lo. Jehova hnênah inpêkna pumhlûm kan hlân a. Pathianin mihringte chungah rorêl tûrin dikna a nei tih kan pawm tlat a, chu chu Setana leh a “thlahte” chuan nasa takin an do a ni. (Gen. 3:1-5, 15) Pathian Ram chu mihringte beisei tûr awmchhun a ni tih leh chu Lalram chuan a dodâltu zawng zawng chu a nuai bo thuai dâwn tih thu kan puang a ni. (Dan. 2:44; Thup. 19:19-21) Chu thuchah chu mi thuhnuairawlhte tân chanchin ṭha a nih laiin,  mi suaksualte tân erawh chanchin ṭha a ni lo.—Sâm 37:10, 11.

³ Pathian tehna felte mila kan nun avângin mite huat kan ni bawk. Chûng tehnate chu khawvêl nungchang tlachhe tak nên chuan a inkalh chiang hle a ni. Entîr nân, tûn laia mi tam tak chuan Pathianin Sodom leh Gomorra a tihboral chhan ber nungchang bawlhhlawhna râpthlâk tak chu an pawm zam mai mai a! (Jud. 7) Chutiang nungchang lam chungchângah Bible tehnate kan vawn tlat avângin, mi tam tak chuan min sawisêlin, rilru zîmah min puh a ni.—1 Pet. 4:3, 4.

4. Eng miziate’n nge mite huat kan nih hunah min tichak?

⁴ Mite’n min huat a, min sawichhiat hunah chhel taka tuar thei tûrin engin nge min ṭanpui thei? Jehova’n min ṭanpui ang tih rinna nghet tak kan neih a ngai a. Kan rinna chuan phaw angin ‘mi sual thal alh thei zawng zawng chu a timit’ thei a ni. (Eph. 6:16) Mahse, rinna mai aia tam kan neih a ngai a. Hmangaihna kan neih a ngai a ni. Engvângin nge? Hmangaihna chu “a thinur duh lo va.” Min tina theitu zawng zawng chu chhel takin a tuar chhuak thei a ni. (1 Kor. 13:4-7, 13) Tûnah, Pathian Jehova kan hmangaihna, Kristian unaute kan hmangaihna, leh hmêlmate kan hmangaihnain mite huatna tuar chhuak thei tûra min ṭanpui dân i lo en ang u.

5. Engtin nge a Pa a hmangaihna chuan Isua a tihchak?

⁵ Isua chuan hmêlmate tihhluma a awm hma zân khân, a hnungzuitu rinawmte hnênah: ‘Keiin Pa ka hmangaih avângin Pain thu mi pêk ang zêlin thil ka ti,’ tiin a hrilh a. (Joh. 14:31) Jehova a hmangaihna chuan a tawh tûr fiahnate hmachhawn thei tûrin a tichak a. Jehova kan hmangaihna chuan keini pawh chutiang bawkin min tichak thei a ni.

6. Rom 5:3-5-a sawi angin, engtin nge Jehova chhiahhlawhte’n khawvêl mite huatna chu an ngaih?

⁶ Pathian an hmangaihna chuan Jehova chhiahhlawhte chu tihduhdahnate chhel taka tuar chhuak thei tûrin a ṭanpui reng ṭhîn. Entîr nân, Juda supreme court-in tirhkohte chu thu hril tawh lo tûra a tih khân, Pathian an hmangaihna chuan ‘mihring thu aia Pathian thu zâwm zâwk’ tûrin a chêttîr a ni. (Tirh. 5:29; 1 Joh. 5:3) Chutiang hmangaihna nghet tak chuan tûn laia unaute pawh a tichak a, an zînga tam tak chu sawrkâr râwng tak leh thiltihthei takte dodâlna kârah pawh an ding nghet tlat a. Lunghnual mai aiin, khawvêl mite huat kan ni chu chanvo hlu angin kan ngai zâwk a ni.—Tirh. 5:41; Rom 5:3-5 chhiar rawh.

7. Engtin nge chhûngkaw zînga mite’n min dodâl hunah kan chhân lêt ang?

⁷ Mahni chhûngkaw zînga mite hnên aṭanga fiahna kan tawh hi fiahna khirh berte zînga mi a ni thei a. Thutak kan ngaihven ṭan hian kan chhûngte zînga ṭhenkhat chuan buma awm niin min ngai thei a. Mi dangte chuan kan â ta niin an ngai thei bawk. (Marka 3:21 nên khaikhin rawh.) Anni chuan nasa takin min dodâl hial pawh a ni thei. Chutiang dodâlnate chu mak kan ti tûr a ni lo. Isua chuan: “Mi a hmêlmate chu ama chhûngte zînga mi ngei an ni ang,” tiin a sawi si a. (Mt. 10:36) Kan chhûngte chuan eng ang pawhin min cheibâwl mah se, anni chu hmêlma anga cheibâwl kan duh lo. Kawng leh lamah chuan, Pathian Jehova kan hmangaihna a nasat poh leh mite kan hmangaihna pawh a nasa lehzual ang. (Mt. 22:37-39) Mahse, mite tihlâwm kan duh avâng maiin Bible dânte leh thu bulte zâwm lovin kan awm ngai lo vang.

8-9. Engin nge unaunu pakhat chu dodâlna nasa tak tuar chhuak thei tûrin ṭanpui?

⁸ A chunga kan târ lan tâk Unaunu Georgina-i chuan nasa taka a nu dodâlna chu a tuar chhuak thei a. Ani chuan: “Jehova Thuhretute chuan  ka nu nên Bible min zirpui ṭan a. Mahse, thla ruk vêl a liam hnua inkhâwma tel ka tum chuan ka nu’n min dodâl ṭan a ni. Kalpêngte nên inzawmna an lo nei reng tih a hnuah ka hria a, kan inbiak hunah pawh an mi sawichhiatnate chu a sawi lang fo va. Ka nu chuan min hau va, ka samahte min kêkin, ka nghâwngahte min rêk a, ka lehkhabute chu a paih darh vek a ni. Chuti chung pawhin, kum 15 mi ka nih chuan baptisma ka chang a. Ka nu chuan ruihhlo hmangte leh dân bawhchhe ṭhîn tleirâwlte dah khâwmnaah min dah lûtin, Jehova rawngbâwlna bânsantîr min tum a ni. Dodâlna hi a bîk takin, min hmangaihtu tûr leh ngaihsaktu tûr hnên aṭanga lo kal a nih hian tawrh a harsa lehzual ṭhîn,” tiin a sawi.

⁹ Engtin nge Unaunu Georgina-i chuan a tawrh chhuah theih? Ani chuan: “Ka nu’n min dodâl ṭan nî chu Bible bu pum ka chhiar chhuah nî chiah a ni a. Tûnah chuan, thutak ka hmu tawh tih ka chiangin, Jehova hnaih hle niin ka inhria. A hnênah ka ṭawngṭai fo va, ani’n min ngaihthlâksak ṭhîn. Chu ina ka awm lai chuan, unaunu pakhatin a ina lêngah min sâwm a; tichuan, Bible zirna kan nei dûn a. Chutih hun chhûng chuan unaute chuan min tichak a. Anni chuan an chhûngkaw zînga mi angin min cheibâwl a ni. Min dodâltute chu tute pawh ni se, Jehova chu anni aiin a chak zâwk tih chiang takin ka hria,” tiin a sawi a ni.

10. Kan Pathian Jehova chungah eng rinnghehna nge kan neih theih?

¹⁰ Tirhkoh Paula chuan eng mahin “kan Lalpa Krista Isuaa awm Pathian hmangaihna ata chu mi ṭhen thei lo vang,” tiin a ziak a. (Rom 8:38, 39) Hun engemawti chhûng hrehawm kan tuar pawh a ni thei; mahse, Jehova chu min thlamuan tûr leh min tichak tûrin kan lamah a ṭang reng ang. Unaunu Georgina-i thiltawnin a târ lan angin, Jehova chuan thlarau lama kan unaute hmangin min ṭanpui a ni.

11. Engtin nge Johana 15:12, 13-a Isua sawi hmangaihna chuan a zirtîrte chu a ṭanpui? Entîrna pe rawh.

¹¹ Isua chuan a thih hma zân khân, a zirtîrte chu inhmangaih tawn tûrin a hriatnawntîr a. (Johana 15:12, 13 chhiar rawh.) Mahni hmasial lo hmangaihna chuan inpumkhat tlat tûr leh khawvêl mite huatna tuar chhuak thei tûrin a ṭanpui ang tih a hria a ni. Thessalonika kohhrana thilthleng hi han ngaihtuah teh. Unaute chuan chu kohhran din a nih aṭangin tihduhdahna an hmachhawn a. Mahse, anni chuan  rinawmna leh hmangaihna kawngah kan tân entawn tûr an siam a ni. (1 Thes. 1:2, 3, 6, 7) Paula chuan anni chu “nasa lehzuala” hmangaihna lantîr zawm zêl tûrin a fuih a. (1 Thes. 4:9, 10) Hmangaihna chuan rilru hahna neite thlamuan a, chak lote ṭanpui tûrin anni chu a chêttîr ang. (1 Thes. 5:14) Chûng unaute chuan Paula kaihhruainate chu an zâwm tih kan hria a ni, kum khat vêl a liam hnua a lehkhathawn pahnihnaah Paula’n: “In zaa in inhmangaih tawn ṭheuhna chu a pung lehzual si a,” tia a ziah avângin. (2 Thes. 1:3-5) An inhmangaih tawnna chuan an hmachhawn harsatna leh tihduhdahnate tuar chhuak thei tûrin a ṭanpui a ni.

12. Engtin nge ram pakhata unaute chuan indo hun laiin inhmangaih tawnna an lantîr?

¹² A chunga kan târ lan tâk Unau Danylo-a leh a nupui thiltawn hi han ngaihtuah teh. Ram chhûnga indonain an khua a rawn thlen hnuah pawh inkhâwmahte an tel zawm zêl a, an theih ang tâwkin thu an hril a, ei tûr an neih ang ang chu unaute an sem a ni. Ni khat chu, Unau Danylo-a inah râlthuam keng sipaite an lo kal a. Ani chuan: “Ka rinna phatsan tûrin min tilui a. Chutianga ka tih theih loh thu ka hrilh chuan, min vua a, chung lamah silaite kâp chhovin, kah hlumah min vau va. An chhuah dâwn chuan, ka nupui pâwngsual tûra an lo kal leh tûr thu sawiin min sawiṭhaih a. Mahse, kan unaute chuan khaw dang pan tûr rêlah min thawn nghâl a. Chûng kan unaute lantîr hmangaihna chu ka theihnghilh thei tawh ngai lo vang. Kan va thlenna khuaah chuan tualchhûng unaute’n ei tûrte min pein, hnathawh tûr leh chênna tûr inte min zawn hmuhsak nghâl a! Chutianga unaute min ṭanpuina avângin râltlân unau dangte kan ṭanpui thei a ni,” tiin a sawi. Chutiang thiltawnte chuan Kristian hmangaihnain huatna tuar chhuak thei tûrin min ṭanpui thei tih a târ lang a ni.

13. Engtin nge mite huat kan nih huna chhel taka Jehova rawngbâwl zawm zêl tûrin thlarau thianghlimin min ṭanpui?

¹³ Isua chuan a hnungzuitute chu an hmêlmate hmangaih tûrin a hrilh a. (Mt. 5:44, 45) Chutianga tih chu a awlsam em? Awlsam hauh lo! Mahse, Pathian thlarau thianghlim ṭanpuina hmanga tih theih a ni. Pathian thlarau rah pêngte zîngah chuan hmangaihna pawh tiamin, dawhtheihna te, ngilneihna te, thuhnuairawlhna te, leh insûmtheihna te a tel a. (Gal. 5:22, 23) Chûng miziate chuan mite huatna tuar  chhuak thei tûrin min ṭanpui a ni. Min dodâltu tam tak chuan ringtu an pasal te, nupui te, fa te, a nih loh leh ṭhenawmte’n chûng Pathian miziate an lantîr avângin an thinlung an thlâk danglam tawh a. An zînga tam tak chu kan unau duhawm takte an ni tawh a ni. Chuvângin, Jehova rawng i bâwl avânga nangmah hawtute chunga hmangaihna lantîr harsa i tih chuan, Pathian thlarau thianghlim dîlin ṭawngṭai la. (Lk. 11:13) Pathian kawng chu englai pawhin a ṭha ber tih ring tlat ang che.—Thuf. 3:5-7.

14-15. Engtin nge Rom 12:17-21-na chuan Unaunu Yasmeen-i chu a pasalin nasa taka a dodâl chung pawha a chunga hmangaihna lantîr tûra a ṭanpui?

¹⁴ Middle East-a awm Unaunu Yasmeen-i thiltawn hi han ngaihtuah teh. Jehova Thuhretu a rawn nih chuan a pasalin buma awm nia a ngaih avângin, Pathian rawng a bâwl chu bânsantîr a tum a. A nupui chu sawichhiain, a chhûngkhat laina te, sakhaw hruaitu te, leh dawithiamte chu a nupui sawiṭhaih tûra a fuih bâkah, chhûngkaw tikehdarhtu-ah a puh a ni. A pasal chuan kohhran inkhâwm neih laiin unaute hmaah nasa takin a vau bawk. Unaunu Yasmeen-i chu ṭha lo taka cheibâwl a nih avângin a ṭap zing hle.

¹⁵ Kingdom Hall-a thlarau lama a chhûngte chuan thlamuanin, an tichak a. Kohhran upate chuan Rom 12:17-21-a thute chu nunpui tûrin an fuih a. (Chhiar rawh.) Yasmeen-i chuan, “Nunpui chu a harsa khawp mai. Mahse, Jehova hnênah ṭanpuina ka dîl a; tichuan, Bible sawite chu theih tâwp chhuahin nunpui ka tum a. Ka pasalin chokâ a tihbalh luih hunah pawh thinrim lovin ka tifai a. Min sawichhiat hunah pawh zaidam takin ka chhâng a. A dam loh hunah pawh ṭha takin ka ngaihsak ṭhîn bawk,” tiin a sawi.

16-17. Unaunu Yasmeen-i entawn tûr siam aṭangin eng nge kan zir?

¹⁶ Unaunu Yasmeen-i chuan a pasal chunga hmangaihna a lantîr avângin malsâwmna a dawng a. Ani chuan: “Ka pasal chuan thu dik ka hrilh reng ṭhin avângin min ring lehzual ṭan a. Sakhaw chungchâng kan sawi dun hunah pawh ṭha taka min ngaithlâksak bâkah, chhûngkuaa inrem taka awm chu a duh a ni. Tûnah chuan, inkhâwmte pawh min phalsak tawh a. Ka pasal nêna kan inlaichînna chu a ṭha tawh hlein, kan in chhûng boruak pawh a nuam tawh hle. Ka pasal hian thutak pawmin, Jehova rawng kan la bâwl dûn ang tih ka beisei tlat a ni,” tiin a sawi.

¹⁷ Unaunu Yasmeen-i thiltawn chuan hmangaihnain “engkim a tuar hrâm hrâm a, . . . engkim a beisei a, engkim a tuar chhuak ṭhîn,” tih a târ lang. (1 Kor. 13:4, 7) Huatna chu thiltithei  tak leh tawrh hrehawm tak ni mah se, hmangaihna chuan nasa takin thil a tithei zâwk a ni. Mite thinlung a hneh thei a, Jehova thinlung a tilâwm bawk. Min dodâltute chuan min haw chhun zawm zêl a nih pawhin, hlimna kan nei reng thei a ni. Chu chu engtin nge a nih theih?

18. Engvângin nge huat kan nih hunah pawh kan hlim theih?

¹⁸ Isua chuan: ‘Miten an huat che u hunah in eng a la thâwl ang,’ tiin a sawi. (Lk. 6:22) Mite huat nih chu kan duh lo va. Rinna avânga tihduhdahna tawrh chu nuam kan ti hek lo. A nih chuan, engvângin nge huat kan nih huna kan hlim theih? A chhan pathum hi han ngaihtuah ta ila. Pakhatna, chhel taka kan tawrh chhuah hian Pathian duhsakna kan dawng a ni. (1 Pet. 4:13, 14) Pahnihna, kan rinna chu fiah a nih avângin a nghet lehzual a. (1 Pet. 1:7) Pathumna, lâwmman hlu tak, chatuana nunna kan dawng dâwn a ni.—Rom 2:6, 7.

19. Engvângin nge tirhkohte chu vuak an tawrh hnuah pawh an hlim theih?

¹⁹ Isua thawhleh hnu rei vak lo vah, tirhkohte chuan Isua sawi hlimna chu an nei a. Vuak an nih a, thu hril tawh lo tûra tih an nih hnuah pawh an hlim reng a ni. Engvângin nge? “[Isua] hming avâng chuan mualpho tuar tlâka ruat an nih avângin.” (Tirh. 5:40-42) An hmêlmate huat nih an hlauhna aiin, an Hotu an hmangaihna chu a nasa zâwk a. An hmangaihna chu ‘bâng lova’ chanchin ṭha puanchhuahna hmangin an lantîr a ni. Tûn laia kan unau tam tak pawhin harsatna kârah rinawm takin rawng an bâwl zawm zêl a. Jehova’n an rawngbâwlna leh a hming chunga an lantîr hmangaihna chu a theihnghilh lo vang tih an hria a ni.—Heb. 6:10.

20. A dawta thuziakah eng nge kan sawiho vang?

²⁰ Setana khawvêl a tâwp hma chu mite huat kan ni zêl ang. (Joh. 15:19) Mahse, kan hlauh a ngai lo. A dawta thuziaka kan hmuh tûr angin, Jehova chuan a mi rinawmte chu “a tinghetin, . . . a hum ang.” (2 Thes. 3:3) Chuvângin, Pathian Jehova, kan Kristian unaute, leh kan hmêlmate chu i hmangaih chhun zawm zêl ang u. He fuihna hi kan zâwm a nih chuan kan inpumkhat tlatin, kan rinna a nghet lehzual ang a, Jehova chawimawina kan thlen bâkah, hmangaihna chuan huatna aiin nasa takin thil a ti thei zâwk tih kan lantîr a ni ang.