1. Engvângin nge Isua’n Jehova hnênah a zirtîrte hum tûra a ngensak?

ISUA chuan a hringnun a hman hnuhnûn ber zânah a zirtîrte hmachhawn tûr harsatnate chu a ngaihtuah a. Hmangaihnain a chêttîr avângin, a Pa hnênah, ‘mi sual laka hum’ tûrin a ngensak a ni. (Joh. 17:14, 15) Isua chuan vâna a kîr leh hnuah, Diabol-Setana’n Jehova rawngbâwl duhtu zawng zawngte chu a do zawm zêl dâwn tih a hria a. Jehova mite chuan humhim an ngai dâwn tih a chiang a ni.

2. Engtin nge Jehova’n kan ṭawngṭainate min ngaihthlâksak ang tih kan chian theih?

² Jehova chuan a Fapa Isua a hmangaih avângin a ṭawngṭaina chu a ngaihthlâksak a. Keini pawhin theih tâwp chhuaha amah tihlâwm kan tum chuan min hmangaih ang a, vênhimna leh ṭanpuina dîla kan ṭawngṭainate chu min ngaihthlâksak ang. Hmangaihna nei tak chhûngkaw Lû ber angin, Jehova chuan a fate chu hmangaihna nei takin a ngaihsak zawm zêl ang. Chutianga a tih loh chuan, a hming a chhe dâwn si a!

3. Engvângin nge tûn laiah Jehova humhimna kan mamawh?

³ Jehova humhimna chu tûn hma zawng aiin kan mamawh a. Setana chu vân aṭanga paihthlâk a nih avângin, ‘a thinur êm êm a ni.’ (Thup. 12:12) Ani chuan min tiduhdahtute chu ‘Pathian chunga thil ṭha tia’ inhriatna a neihtîr a. (Joh. 16:2) Pathian ring lotu mi dangte chuan khawvêl thununa kan awm loh avângin min tiduhdah a ni. Mite chuan engtiang pawhin min tiduhdah mah se, kan hlauh a ngai lo. Engvângin nge? Bible chuan: “Lalpa chu a rinawm e, ani chuan a tinghetin, mi sual lakah chuan a hum ang che u,” tia min hrilh avângin. (2 Thes. 3:3) Engtin nge Jehova’n min humhim? Min humhim dân kawng hnih i lo sawiho vang u.

4. Ephesi 6:13-17-a sawi angin, Jehova’n min humhim nân eng nge min pêk?

⁴ Jehova chuan Setana beihna laka min vênghim theitu thlarau lam râlthuamte min pe a. (Ephesi 6:13-17 chhiar rawh.) Chûngte chu a ṭhain, a rin tlâk hle! Mahse, chûng râlthuamtea kan inthuam a, kan hman chauhvin, chûng chuan min vênghim ang. Chûng râlthuamte chuan eng nge a entîr? A mal malin i lo en ang u.

5. Thutak kâwnghrên chu eng nge ni a, engvângin nge chu chu kan hrên ang?

⁵ Thutak kâwnghrên chuan Pathian Thu, Bible-a kan hmuh thutak a entîr a. Engvângin nge he kâwnghrên hi kan hrên ang? “Dâwt pa” Setana buma kan awm loh nân a ni. (Joh. 8:44) Ani chuan kum sâng tam tak chhûng dâwt a lo sawi tawh a, “khawvêl zawng zawng” a bum a! (Thup. 12:9) Mahse, Bible-a kan hmuh thutak chuan buma awm lo tûrin min humhim a ni. Engtin nge he entîr nei kâwnghrên hi kan hrên ang? Jehova chungchâng thutak zir a, ‘thlarau leh tih tak zeta’ amah chibai bûkin leh dik taka thil engkim tihna hmangin kan hrêng a ni.—Joh. 4:24; Eph. 4:25; Heb. 13:18.

6. Felna âwmphaw chu eng nge ni a, engvângin nge chu chu kan hâk ang?

⁶ Felna âwmphaw chuan Jehova tehna felte a entîr a. Engvângin nge chu âwmphaw chu kan hâk ang? Awmphawin sipai lung chu chhun tlang a nih loh nâna a vênghim angin, felna âwmphaw chuan entîr nei kan thinlung, a nih loh leh chhûng lama kan nihna chu he khawvêl thununna ṭha lo lakah a vênghim a ni. (Thuf. 4:23) Jehova chuan thinlung zawng zawnga amah hmangaih a, a rawngbâwl tûrin min beisei a. (Mt. 22:35-37) Chuvângin, Setana chuan thinlung zawng zawnga Jehova rawng kan bâwl theih loh nân, Jehova huat zâwng khawvêl thilte chu ngainattîr min tum a ni. (Jak. 4:4; 1 Joh. 2:15, 16) Chu a thiltum a hlawhtlin loh chuan, Jehova tehnate mila nung lo tûrin min tihduhah a tum ang.

7. Engtin nge felna âwmphaw chu kan hâk ang?

⁷ Thil dik leh dik lo chungchânga Jehova tehnate pawmin leh chûng tehnate mila nungin felna âwmphaw chu kan ha a. (Sâm 97:10) Mi ṭhenkhat chuan Jehova tehnate chu khirh lutuk niin a ngai a ni. Mahse, Bible thu bulte kan nunpui tawh lo a nih chuan, sipaiin rit a tih lutuk avânga indo laia a âwmphaw a phelh nên kan inang ang. Chutianga tih chu a va âtthlâk dâwn êm! Jehova hmangaihtute tân chuan a thupêkte chu ‘a khirh lo va,’ nun chhanhimna a ni zâwk a ni.—1 Joh. 5:3.

8. Remna chanchin ṭha inbuatsaihna chu kea bun tih awmzia chu eng nge ni?

⁸ Paula chuan remna chanchin ṭha inbuatsaihna chu kea bun tûrin min fuih bawk. Thu danga sawi chuan, Lalram chanchin ṭha hril tûrin kan inpeih reng a ngai tihna a ni. Mite hnêna Bible thuchah kan hrilh hian kan rinna chu tihchakin a awm a. Khawvêl puma Jehova mite chuan hnathawhnaah te, school-ah te, sumdâwnna hmunah te, in tinah te, dâwr hmunah te, ring lotu chhûngte an tlawh hunah te, hmêlhriat dangte an biak hunah te, leh hun engemawti chhûng ina khuahkhirh a nih hunahte pawh chanchin ṭha hril tûrin hun remchâng an zawng reng tih hriatna chuan min tichak hle a ni. Hlauh avânga thu hrilh kan bânsan a nih chuan indo laia pheikhawk phelhtu sipai ang kan ni ang; a kête chu awlsam taka hliam theih a ni ang. Chutiang chuan, hmêlmate tân beih awlsam tak a ni ang a, sipai hotu thupêk zawm chu harsa a ti hle bawk ang.

9. Engvângin nge rinna phaw chu kan hman a ngaih?

⁹ Rinna phaw chuan Jehova kan rinna a  entîr a. Ani chuan a thutiam zawng zawng chu a thlen famkimtîr ang tih kan ring tlat a ni. Chu rinna chuan ‘mi sual thal alh thei zawng zawng timit’ tûrin min ṭanpui ang. Engvângin nge chu rinna phaw chu kan hman a ngaih? Chu chuan kalpêngte zirtîrna laka min vênhim bâkah, mite’n kan rinna avânga min sawisêl hunah pawh lunghnual lo tûra min ṭanpui vâng a ni. Rinna tel lo chuan, Jehova tehnate hnâwl tûra thlêmna chu kan do hneh lo vang. Kawng leh lamah chuan, hnathawhnaah emaw, school-ah emaw rinna atâna kan dinngheh apiang hian kan rinna phaw chu kan hmang tihna a ni a. (1 Pet. 3:15) Pathian kan biakna tibuai thei tûr sum tam tak hmuh theihna hnate kan hnâwl apiangin kan rinna phaw chu kan hmang tihna a ni. (Heb. 13:5, 6) Dodâlna tâwk chung pawha Jehova rawng kan bâwl zawm zêl hian kan rinna phawin min vênghim tihna a ni bawk.—1 Thes. 2:2.

10. Chhandamna lukhum chu eng nge ni a, engvângin nge chu chu kan khum ang?

¹⁰ Chhandamna lukhum chu Jehova min pêk beiseina a ni a—chu chu thihna ata min chhanchhuak ang tih leh a duh zâwng titu zawng zawng chu lâwmman a pe ang tih beiseina hi a ni. (1 Thes. 5:8; 1 Tim. 4:10; Tit. 1:1, 2) Lukhum chuan sipai lû a vênghim angin,  chhandam beiseina chuan kan ngaihtuahna chu a vênghim a ni. Eng kawngin nge? Pathian thutiamte ngaihven tlat tûr leh kan harsatnate avânga lungkham lutuk lo tûra min ṭanpuina hmangin. A nih leh, engtin nge chu lukhum chu kan khum? Pathian ngaihtuah anga thil kan ngaihtuahna hmangin a ni. Entîr nân, kan beiseina chu sum rinawm lovah ni lovin, Pathianah kan nghat tlat zâwk a ni.—Sâm 26:2; 104:34; 1 Tim. 6:17.

11. Thlarau ngûnhnâm chu eng nge ni a, engvângin nge chu chu kan hman ang?

¹¹ Thlarau ngûnhnâm chu Pathian Thu, Bible hi a ni a. Chu ngûnhnâm chuan dâwt thu tinrêng a hai lang theiin, zirtîrna dik lo leh nungchang ṭha lo bâwih ata mite a chhuah zanlên thei a ni. (2 Kor. 10:4, 5; 2 Tim. 3:16, 17; Heb. 4:12) Mi mala inzirna leh Pathian inawpna pâwl aṭanga kan dawn zirtîrnate aṭangin chu ngûnhnâm ṭha taka hman dân chu kan zir a. (2 Tim. 2:15) Jehova chuan chûng thlarau lam râlthuamte bâkah, invênna ṭha tak dang pawh min pe a ni. Chu chu eng nge ni?

12. Eng thil dang nge kan mamawh a, engvângin nge?

¹² Thiltawn ngah tak sipai chuan hmêlma rual chu mahni chauhvin a do hneh thei lo tih a hria a; sipai dangte ṭanpuina a mamawh a ni. Chutiang bawkin, Setana leh a hnungzuitute chu mahni chauhva kan do hneh thei loh avângin kan unaute ṭanpuina kan mamawh a. Jehova chuan min ṭanpui tûra inpeih reng khawvêl pum huap “unaute” min pe a ni.—1 Pet. 2:17.

13. Hebrai 10:24, 25-a sawi angin, inkhâwma tel chu engtin nge kan hlâwkpui?

¹³ Ṭanpuina kan dawn theih dân kawng khat chu inkhâwma telna hmangin a ni. (Hebrai 10:24, 25 chhiar rawh.) Kan za hian lunghnual châng kan neih ṭheuh va, chutiang hunah chuan inkhâwmte chuan min tichak thei a ni. Thinlung taka kan unaute chhânna pêk chuan min tichak tak zet a. Bible ṭanchhan thusawite leh thusawi dân tûr entîrnate chuan Jehova rawngbâwl duhna min neihtîr lehzual a ni. Inkhâwm ṭan hma leh bân hnua unaute nêna inkawmhona chuan min tichak bawk. (1 Thes. 5:14) Chu bâkah, kan inkhâwmte chuan mi dangte ṭanpuina aṭanga lo awm hlimna nei tûrin hun remchâng min pe a ni. (Tirh. 20:35; Rom 1:11, 12) Kan inkhâwmte chuan kawng dang pawhin min ṭanpui a. Chu chuan rawngbâwlna atâna min buatsaih avângin, thlarau lam indonaa kan thiamnate a tipung a ni. Entîr nân, kan Zirtîrna Hmanraw Bâwma hmanruate thiam taka hman dân kan zir a. Chuvângin, kohhran inkhâwmte atân ṭha takin inbuatsaih ang che. Inkhâwm chhûngin ngun takin ngaithla la. Chûng i thu zirte chu nunpui ang che. Chutianga i tih chuan, “Krista Isua sipai ṭha tak” i ni ang.—2 Tim. 2:3.

14. Eng ṭanpuina dang nge kan la neih?

¹⁴ Vântirhkoh thiltithei tam takte ṭanpuina pawh kan dawng a. Vântirhkoh pakhat chauh pawhin thil a tihtheihzia hi han ngaihtuah teh! (Is. 37:36) Chumi hnuah, vântirhkoh rual thiltithei takin thil an hlenchhuah theih dân tûr pawh ngaihtuah bawk ang che. Mihringte leh ramhuaite zîngah Jehova sipai rual thiltithei tak hneh thei tu mah an awm lo. Jehova chu Engkimtithei a nih avângin ani’n min awmpui chuan min dodâltute chu tute pawh ni se, anni aiin kan chak reng ang. (Jud. 6:16) Chu chu a va dik tak êm! I hnathawhpui te, school kalpuite, leh ring lotu i chhûngte’n i lunghnualna tûr thil engemaw an sawi a, an tih hunah nangmah ṭanpui theitu chûng vântirhkohte chu hre reng la. Chu indonaah chuan nangmah chauh i ni lo tih hre reng  bawk ang che. Jehova kaihhruaina chu i zawm avângin a ṭanpuina i dawng ngei ang.

15. Isaia 54:15, 17-a sawi angin, engvângin nge Pathian mite chu ngawihtîr theih an nih loh?

¹⁵ Setana thunun he khawvêl hian min huatna tûr chhan tam tak a nei a. Politics-ah kan tualdâwih tlat a, eng râlthuam mah kan hmang lo. Pathian hming chu puangin, a Lalram chu remna thlentu atâna beisei tûr awmchhun a ni tih mite kan hriattîr bâkah, a tehna felte chu kan zâwm tlat a. He khawvêl rorêltu hi bum hmang leh tual thattu ṭihbaiawm tak a ni tih kan hai lang a ni. (Joh. 8:44) Setana khawvêl hi tihchhiat a ni thuai dâwn tih kan puang bawk. Setana leh a hnungzuitute chuan chutianga puang lo tûrin min dang thei ngai lo vang. Chutih ahnêkin, Jehova chu kan fak theih dân kawng tinrêngin kan fak zawm zêl ang! Setana chu thiltithei tak ni mah se, ani chuan Lalram thuchah chu khawvêl pum puia mite hnêna hrilh lo tûrin min dang thei lo. Jehova humhimna avâng chauhva chutianga ti thei chu kan ni.—Isaia 54:15, 17 chhiar rawh.

16. Engtin nge Jehova’n a mite chu hrehawm nasa tak chhûnga a chhanhim ang?

¹⁶ Kan hma lawkah eng thil nge lo thleng dâwn? Hrehawm nasa tak chhûngin, Jehova chuan kawng danglam tak chi hnihin min chhanhim ang. Pakhatna, ani chuan khawvêl sakhaw dik lo lalram, Balulon Khaw Ropui tichhe tûra leia lalte a chêttîr hunah a chhiahhlawh rinawmte chu a chhanhim ang a. (Thup. 17:16-18; 18:2, 4) Pahnihna, Setana khawvêla a la bâng zawng zawngte chu Armageddon-a a tihboral hunah a mite chu a chhanhim ang.—Thup. 7:9, 10; 16:14, 16.

17. Engtin nge Jehova hnaih chu kan hlâwkpui?

¹⁷ Pathian Jehova kan hnaih tlat chuan Setana’n kan chhiat hlenna tûrin eng mah a ti thei lo vang. Dik tak chuan, chatuana tihborala awm tûr zâwk chu amah hi a ni. (Rom 16:20) Chuvângin, thlarau lam râltuamte chu a kimin inthuam zawm zêl ang che! Thlarau lama indona chu mahni chauhva beih tum suh. I unaute chu ṭanpui la. Jehova kaihhruaina zui ang che. Chutianga i tih chuan, min hmangaihtu kan Pa vâna mi chuan a tichakin, a vênghim ang che tih i ring nghet tlat thei a ni.—Is. 41:10.