He Bible châng chhiar liam maitute chuan chutiang chuan an ngaihtuah a ni. Mahse, chûng Bible chângahte chuan Mephibosetha tih hmingpu mi pahnih an awm a, thilthlengte ennawnna hmangin thil eng emaw zir theih kan nei a ni.

Israel Lal Saula chuan fapa pasarih leh fanu pahnih a nei a. Saula fa upa ber chu Jonathana a ni a. Lal Saula chuan a hnuah a hmei Rizpi lakah Mephibosetha tih hmingpu fapa a nei leh a ni. Ngaihvenawm takin, Jonathana pawhin Mephibosetha tih hmingpu fapa a nei bawk. Chuvângin, Lal Saula chuan Mephibosetha tih hmingpu fapa leh tupa a nei tihna a ni.

Ṭum khat chu, Lal Saula chuan Israel mite zînga chêng Gibeon mite a huat tâk avângin anni chu tihboral a tum a. An zînga mi eng emaw zât chu a tihlum ta rêng a. Chu chu thil dik lo tak a ni. Engvângin nge? Josua hun laiin Israel mite zînga mi liante’n Gibeon mite nêna inremna thuthlung an lo siam tawh vâng a ni.—Jos. 9:3-27.

Chu thuthlung chu Lal Saula hun thlengin a la nung a. Lal chuan chu thuthlung kalhin Gibeon mite chu tihboral a tum a. Chutianga hma a lâkna chuan, ‘a chungah leh a chhûngte chungah thisen chhuahna sual’ a thlen a ni. (2 Sam. 21:1) A tâwpah, Davida chu lal a lo ni a. Gibeon mite zînga dam khawchhuakte chuan chu thil sual lian tak chu Davida an hrilh a. Davida chuan Jehova’n Israel ram mal a sâwm leh theih nâna Saula thiltih râpthlâk tak avânga an inkâra remna a siam leh theih dân tûr chungchâng chu a zâwt a. Gibeon mite chuan sum dîl lovin, anmahni ‘tihboral tumtu’ fapa pasarihte chu an kuta hlân tûr leh tihlum tûrin an dîl a. (Num. 35:30, 31) Davida chuan an thil phût chu a tihsak a ni.—2 Sam. 21:2-6.

A hnuah, Saula leh Jonathana chu indonaah an thi a; mahse, Jonathana fapa Mephibosetha chu a thi ve lo. Ani chu chêtsualna avânga a naupan lai aṭanga kebai a ni a, a puin Gibeon mite a beihnaah a tel ve lo. Davida chuan Jonathana nên inṭhianna thuthlung a siam a, chu chu Mephibosetha pawh tiamin, Jonathana thlahte’n an hlâwkpui a ni. (1 Sam. 18:1; 20:42) Bible chuan: ‘Lal [Davida] chuan Saula fapa Jonathana nêna an inkâra chhechhamna avângin Saula fapa Jonathana fapa Mephibosetha chu a hum a,’ tiin a sawi a ni.—2 Sam. 21:7.

Mahse, Davida chuan Gibeon mite ngenna ang chuan a tihsak a. Saula fapa pahnih, pakhat zâwk hming chu Mephibosetha leh Saula tupa pangate chu a hlân a. (2 Sam. 21:8, 9) Davida hma lâkna avângin ram chhûnga thisen chhuahna thleng chu a tâwp ta a ni.

Hêng thute hi chanchin satliah mai a ni lo. Pathian dân chuan chiang takin a târ lang a ni. ‘Pate avângin fate tihhlum tûr a ni lo,’ tiin. (Deut. 24:16) Saula fapa pahnih leh tupa pangate chu thil sual tihnaah inhnamhnawih lo se chuan, Jehova chu an chunga thilthleng avângin a lâwm lo ngei ang. Pathian dân chuan: “Mi tin mahni sual avâng ṭheuhva tihhlum tûr a ni,” tiin a sawi si a. Tihhluma awm Saula thlah pasarihte chuan Gibeon mite bei tûra Saula hma lâknaah kawng eng emaw takin tel vena an nei a ni ngei ang. Chuvângin, an thil sual tih man chu an seng a ni.

He chanchin hian miin thil sual a tih chhan chu kaihhruaina a zawm vâng mai nia ngaiin emaw, sawiin emaw chhuanlam a siam thei lo tih a târ lang a. Thufing pakhat chuan: “I kê atân kawng tirualrem la, i kawng zawng zawng tihngheh ni rawh se,” tiin a sawi a ni.—Thuf. 4:24-27; Eph. 5:15.