1-2. Baptisma chang tûra i la inpeih lo a nih chuan, engvângin nge i lunghnual mai loh vang? (A kâwma milem en rawh.)

 BAPTISMA chan i duh a nih chuan, thiltum ṭha tak i insiam tihna a ni a. Chu rahbi rap tûr chuan i inpeih tawh em? Inpeih tawh nia i inhriat a, upate’n an pawmpui bawk che chuan, hun remchâng hmasa bera baptisma chan chu hreh suh ang che. Chutianga i tih chuan Jehova rawngbâwlnaah nun lungawithlâk tak i nei ang.

² Kawng leh lamah chuan, baptisma chang thei tûrin hmasâwn ngaihna lai la nei nia hrilh i ni em? A nih loh leh, nangmah ngeiin hmasâwn ngaihna lai nei niin i inhria em? Chutiang a nih chuan, lunghnual suh ang che. Ṭhalai i ni emaw, kum upa i ni emaw chu rahbi pawimawh tak rap tûr chuan hma i sâwn thei a ni.

3. Ethiopia hotu lian chuan Philipa chu eng nge a zawh a, eng zawhna nge lo chhuak? (Tirhkohte 8:36, 38)

³ Tirhkohte 8:36, 38 chhiar rawh. Ethiopia ram aṭanga lo kal hotu lian chuan chanchin ṭha hriltu Philipa chu: “Baptisma channa tûr engin nge mi dâl kher?” tiin a zâwt a. Chu Ethiopia mi chuan baptisma chan a duh a; mahse, chu rahbi pawimawh tak rap tûr chuan a inpeih tak zet em?

4. Ethiopia mi chuan zir belh zêl a duhzia engtin nge a lantîr?

⁴ Ethiopia mi chu “Jerusalem khuaah Pathian be tûrin a han kal a.” (Tirh. 8:27) Chuvângin, ani chu Juda saphun a nih ngei  a rinawm. Hebrai Pathian Lehkha Thu thianghlimte aṭangin, Jehova chungchâng a hre tawh ngei ang tih chu rinhlelh rual a ni lo. Chutichung chuan zir belh a duh a ni. Philipa’n kawnga a tawh khân, ani chuan eng nge a lo tih? Zâwlnei Isaia lehkha zial chu a lo chhiar a ni. (Tirh. 8:28) Chu chu Bible thutak ril tak a ni a. Chu hotu lian chuan Bible zirtîrna bulpuite hriat mai chu a duh tâwk lo; zir belh zêl a duh a ni.

5. Ethiopia mi chuan a thu zirte chungchângah eng nge a tih?

⁵ Ethiopia mi chu Lalnu Kandaki hnuaia thuneitu pawimawh tak a ni a; ani chu “a ro zawng zawng enkawltu” a ni. (Tirh. 8:27) Chuvângin, ani chuan mawhphurhna tam tak a nei ang a, a buai thei hle ngei ang. Mahse, Jehova be tûrin hun a insiam a. Thutak zir chu a duh tâwk mai lova, a thu zirte milin thil a ti a ni. Chuvângin, Jerusalema biak inah Jehova be tûrin Ethiopia aṭangin a zin vang vang a ni. Chu zin kawng atân chuan hun leh sum leh pai tam tak sên a ngai ngei ang a; mahse, Jehova biak a duh avângin a ṭûl ang apiang tih a inhuam a ni.

6-7. Ethiopia miin Jehova a hmangaihna chu engtin nge a tihpun zawm zêl?

⁶ Ethiopia mi chuan Philipa hnên aṭangin thutak pawimawh tak takte a zir a, chûng zîngah chuan Isua chu Messia a ni tih pawh a tel a ni. (Tirh. 8:34, 35) Isua’n a tâna thil a tihsakte a hriat chuan, chu chuan a rilru a khawih hle. Chumi a hriat hnu chuan engtin nge hma a lâk? Juda saphun zahkai tak angin a awm reng thei a. Mahse, Jehova leh A Fapa a hmangaihna chu a ṭhang chho zêl zâwk a ni. Isua Krista hnungzuitu anga baptisma a chan theih nân thu tlûkna pawimawh tak siam tûra chêttîrin a awm a. Ani chu a inpeih tawh tih Philipa’n a hriat chuan a baptis ta a ni.

⁷ Ethiopia mi entawn tûr siam i zui chuan, baptisma chang tûrin i inpeih thei ang. Nang pawhin inring tâwk takin, “Baptisma channa tûr engin nge mi dâl kher?” tiin i sawi ve thei dâwn a ni. A rahbi rah ang i rah theih dân i lo ngaihtuahho vang u: A zir zawm zêl a, a thu zirte milin thil a ti a; chu bâkah, Pathian a hmangaihna a tipung zawm zêl a ni.

8. Johana 17:3-in i tih tûr eng nge a hrilh che?

⁸ Johana 17:3 chhiar rawh. Heta Isua thusawite hian Bible zir tûrin a ṭanpui che em? Kan zînga tam tak chu min ṭanpui a ni. Mahse, chûng thute chuan zir zawm zêl tûrin min hrilh tel em? Hrilh tel e. “Pathianin a tîr ata a tâwp thlenga thil a tih chu” kan hmu chhuak thei ngai lo vang. (Thur. 3:11) Chatuanin kan zir zawm zêl ang a. Kan zir tam poh leh Jehova kan hnaih lehzual dâwn a ni.—Sâm 73:28.

9. Bible zirtîrna bulpuite kan hriat hnuah eng nge kan tih ngai?

 ⁹ Jehova chungchâng kan zir hian Bible zirtîrna bulpuite kan zir ṭan chauh a ni a. Hebrai mite hnêna a lehkhathawnah, tirhkoh Paula chuan Bible zirtîrna bulpuite chu “A AW B” tiin a sawi a. Ani chuan “thu bul,” a nih loh leh Bible zirtîrna bulpuite chu a ngainêp a ni lova; nausênin a rin hnute tui nên a khaikhin mai zâwk a ni. (Heb. 5:12; 6:1, 2) Ani chuan Kristian zawng zawngte chu chûng zirtîrna bulpuite chauh ni lovin, Pathian Thua thutak ril zâwkte zir tûr pawhin a fuih bawk. Chûng thutak ril zâwkte chu zir duhna i nei em? Jehova leh a thiltumte chungchâng zir belh zêlin, hmasâwn duhna i nei em?

10. Engvângin nge mi ṭhenkhatin zirna neih chu harsa an tih mai theih?

¹⁰ Kan zînga tam tak tân zirna neih chu thil harsa a ni a. Zirna neih chu engtin nge i ngaih? Ṭha taka chhiar dân leh zirna neih dân school-ah i zir em? Zirna neih chu nuam i tiin, hlâwkthlâk i ti em? Nge ni a, lehkhabute aṭanga zirna neih chu nuam lo i ti zâwk? Nuam i ti lo a nih chuan nangmah chauh i ni lo. Mahse, Jehova’n a ṭanpui thei che. Ani chu a ṭha famkim a, Zirtîrtu ṭha ber a ni bawk.

11. Engtin nge Jehova’n “Zirtîrtu Ropui Ber,” a nihzia a lantîr?

¹¹ Jehova chuan “Zirtîrtu Ropui Ber,” tiin a insawi a. (Is. 30:20, 21, NWT) Ani chu Zirtîrtu dawhthei tak, ngilnei tak, leh hriatthiamna ngah tak a ni. A zirlaite ṭhatna lai a zawng a. (Sâm 130:3) Chu bâkah, kan tih theih aia tam min phût ngai lo. Ani chu thilpêk ropui tak, i thluak siamtu a ni tih hre reng ang che. (Sâm 139:14) Zir duhna chu kan zain kan pianpui a. Min Siamtu chuan kumkhuaa zir zawm zêl tûr leh hlim taka zir zawm zêl tûrin min duh bawk. Chuvângin, tûna Bible thutak zir ‘châkna’ neih chu a finthlâk a ni. (1 Pet. 2:2) I hlen theih tûr thiltumte insiam la, Bible chhiarna leh zirna nei ziah ang che. (Jos. 1:8) Jehova ṭanpuinain a chungchâng chhiar leh zir chu nuam i ti telh telh dâwn a ni.

12. Engvângin nge Isua nun leh rawngbâwlna chungchâng zir chu kan tum tlat ang?

¹² Isua nun leh rawngbâwlna chungchâng chhût ngun nân hun hmang ziah ang che. A bîk takin, tûn hun harsa tak kârah hian Jehova rawngbâwl kan duh chuan Isua hniak kan zui a pawimawh tak zet a ni. (1 Pet. 2:21) Isua chuan a hnungzuitute’n harsatna an tâwk dâwn tih tlang takin a sawi a. (Lk. 14:27, 28) Mahse, amah angin a hnungzuitu dik takte chu Pathian chungah an rinawm reng thei tih a ring nghet tlat a ni. (Joh. 16:33) Isua nun kawng chu chip chiar zâwkin zir la, i nî tin nuna amah entawn tûrin thiltumte insiam ang che.

13. Jehova hnênah eng nge i dîl zawm zêl ang a, engvângin nge?

¹³ Hriatna neih ringawt chu a tâwk mai lo. Hriatna i mamawh chhan chu Jehova chungchâng zir belh a, amah hmangaihna leh rinna ang chi miziate i neih theih nân a ni. (1 Kor. 8:1-3) I zir belh zêl rualin, rinna tam lehzual i neih theih nân Jehova hnênah dîl zawm zêl ang che. (Lk. 17:5) Chutiang ṭawngṭaina chhân chu nuam a ti hle a ni. Kan Pathian chungchâng hriatna dik taka innghat rinna chuan hmasâwn zêl tûrin a ṭanpui ang che.—Jak. 2:26.

14. Engtin nge tirhkoh Petera’n kan thu zirte mila thil kan tih a pawimawhzia a târ lan? (Milem en bawk rawh.)

¹⁴ Tirhkoh Petera chuan Krista hnungzuitute tân, an thu zirte mila thil an tih zawm zêl a pawimawhzia a târ lang a. Ani chuan Bible-a Nova chungchâng a sawi a ni. Jehova chuan tui tilêtin, chutih hun laia mi suaksualte chu a tiboral dâwn tih Nova a hrilh a. Tui a lêt dâwn  tih hriatna ringawt chu Nova leh a chhûngte chhanhim an nih theih nân a tâwk lo. Petera’n Tuilêt hma “lawng siam chhûng” hun chungchâng a sawi a ni tih chhinchhiah ang che. (1 Pet. 3:20) Nova leh a chhûngte chuan lawng lian tak tukin, Pathian hnên aṭanga an thu hriat milin thil an ti a. (Heb. 11:7) Chumi hnuah, Petera chuan Nova thiltih chu baptisma nên khaikhinin, heti hian a ziak a ni: “Chu mi anpui (baptisma) chuan . . . tûnah a chhandam che u a ni,” tiin. (1 Pet. 3:21) Chuvângin, baptisma chang thei tûra inbuatsaih nâna tûna i thiltihte chu, Nova leh a chhûngte’n lawng tuk nâna kum tam tak chhûnga an thiltihte nên kan khaikhin thei a ni. Baptisma chang tûra inpeih tûrin eng nge i tih ngai?

15. Kan sim tak zet tih engtin nge kan lantîr theih?

¹⁵ Kan tih hmasak ngaite zînga pakhat chu kan sualte sim tak zet hi a ni a. (Tirh. 2:37, 38) Kan sim tak zet chuan inthlâk danglamna dik tak kan nei ang. Nungchang bawlhhlawhna, vaihlo hmanna, ṭawngkam bawlhhlawh emaw, sawichhiatna emaw ang chi Jehova tilâwm lo thiltihte chu i bânsan tawh em? (1 Kor. 6:9, 10; 2 Kor. 7:1; Eph. 4:29) I la bânsan lo a nih chuan, inthlâk danglamna siam tum zawm zêl ang che. Bible zirpuitu che bia la, a nih loh leh kohhran upate hnênah ṭanpuina leh kaihhruaina dîl rawh. Ṭhalai i niha i chhûngte bula chêng i nih chuan, baptisma i channa tûr dâl theitu thil chînte bânsan thei tûrin i nu leh pate ṭanpuina dîl ang che.

16. Thlarau lam hun duan ṭha neihnaah chuan eng nge tel?

¹⁶ Thlarau lam hun duan ṭha tak neih reng chu a pawimawh hle bawk a. Chutah chuan Kristian inkhâwmtea tel leh chhânnate pêk a tel a ni. (Heb. 10:24, 25) Thu hril tûra i tlin hunah, chutah chuan tel ziah ang che. Thu hrilhnaa i tel tam poh leh nuam i ti lehzual ang. (2 Tim. 4:5) Ṭhalai i niha i chhûngte bula chêng i nih chuan, heti hian inzâwt ang che: ‘Ka nu leh pate’n inkhâwma tel tûrin emaw, rawngbâwlnaa tel tûrin emaw min hriatnawntîr ziah ka ngai em? Nge ni a, hriatnawntîr ngai lovin ka ti ṭhîn zâwk?’ tiin. Chûng thilte mahnia tihna hmangin i rinna i târ lang a, Pathian Jehova i hmangaihna leh a chunga i lâwmzia i lantîr bawk. Chûngte chu ‘Pathian ngaihsakna’ thilpêk, Jehova hnêna i hlan a ni.  (2 Pet. 3:11; Heb. 13:15) Phal taka kan pêk thilpêk zawng zawngte chuan Jehova a tilâwm a. (2 Korinth 9:7 nên khaikhin rawh.) A hnêna kan thil neih ṭha ber kan pêknain hlimna min thlen avângin chutiang chuan kan ti a ni.

17-18. Eng thil pawimawh takin nge baptisma chang tûra hmasâwn tûrin ṭanpui ang che, engvângin nge? (Thufingte 3:3-6)

¹⁷ Baptisma chang tûra hma i sâwn chhoh zêl rualin harsatnate pawh i hmachhawn dâwn a. I rinna thar avâng chuan mi ṭhenkhatin an nuihsawh thei che a; an dodâl chein an tiduhdah hial thei bawk che a ni. (2 Tim. 3:12) Thil chîn ṭha lo bânsan i tum laiin tih leh palh châng i nei thei a. A nih loh pawhin, i thiltum chu hlen harsa lutuk anga i ngaih avângin dawhthei lo leh beidawng takin i awm mai thei bawk. Engin nge bei hrâm hrâm tûrin ṭanpui ang che? Thil pawimawh tak—Jehova i hmangaihnain a ni.

¹⁸ Jehova i hmangaihna chu i thil neih azawnga ṭha ber leh duhawm ber a ni a. (Thufingte 3:3-6 chhiar rawh.) Pathian i hmangaihna nasa tak chuan nuna harsatnate hlawhtling taka hmachhawn tûrin a ṭanpui thei che. Bible chuan a chhiahhlawhte chunga Jehova hmangaihna rinawm chungchâng a târ lang fo va. Hmangaihna rinawm tih chu a chhiahhlawh rinawmte chu a hmangaih rengin, a kalsan ngai lovang tihna a ni. (Sâm 100:5) Pathian anpuia siam i ni a. (Gen. 1:26) Engtin nge chutiang hmangaihna chu i lantîr theih ang?

19. Jehova’n i tâna a thiltih zawng zawngte chungah lâwmna nasa lehzual engtin nge i neih theih? (Galatia 2:20)

¹⁹ Lâwm nachâng hriatnain bul ṭan rawh. (1 Thes. 5:18) Nî tin heti hian inzâwt ang che, ‘Engtin nge Jehova’n min hmangaihna a lantîr?’ tiin. Tichuan, Jehova hnênah i tâna a thil tihsak che avângin lâwmthu hrilh ang che. A hmangaihna thiltihte chu tirhkoh Paula’n ama tân liau liauva ti anga a ngai ang khân, nang pawhin a mi mal taka a tihsak che angin ngai ve ang che. (Galatia 2:20 chhiar rawh.) Heti hian inzâwt rawh: ‘A chungah hmangaihna lantîr lêt ve ka duh em?’ tiin. Jehova i hmangaihna chuan thlêmnate do chhunzawm zêl tûr leh harsatnate hlawhtling taka hmachhawn tûrin a ṭanpui ang che. Chu chuan thlarau lam hun duan ṭha nei reng tûr leh, nî tina i Pa i hmangaihna lantîr zawm zêl tûrin a chêttîr dâwn che a ni.

20. Jehova hnêna i inpumpêknaah chuan eng nge tel a, he thu tlûkna hi engtiang khawpa pawimawh nge a nih?

 ²⁰ A hnuah, Jehova i hmangaihna chuan a bîk taka ṭawngṭaina nei tûrin a chêttîr che ang a. A hnênah i inpumpêk dâwn a ni. Jehova hnêna i inpumpêk tawh chuan, he beiseina ropui tak hi i nei thei tih hria ang che: Kumkhuain a ta i ni thei tih hi. Jehova hnêna i inpumpêk hian a nuamah pawh, a hrehawmah pawh a rawngbâwl tûrin i intiam tihna a ni. Chu thutiam chu i tiam nawn fo a ngai lo. Ni e, kan inpumpêk hian thu tlûkna pawimawh tak kan siam a. Hei hi han ngaihtuah teh: I nunah thu tlûkna tam tak i siam dâwn a, a ṭhen chu a ṭha hle ang a; mahse, Jehova hnêna inpumpêkna aia thu tlûkna ṭha zâwk i siam ngai lo vang. (Sâm 50:14) Setana chuan i rinawm reng theih loh beiseiin, i Pa i hmangaihna chu tihdaih a tum dâwn a ni. Setana chu inhnehtîr ngai suh! (Job. 27:5) Jehova i hmangaihna nasa tak chuan i inpumpêkna mila nung tûrin a ṭanpui che ang a, i Pa vâna mi a hnaih lehzualtîr bawk ang che.

21. Engvângin nge baptisma channa hi a tâwpna ni lovin, a bul ṭanna tia kan sawi theih?

²¹ Jehova hnêna i inpumpêk hnuah, in kohhrana upate chu a dawta rahbi pawimawh tak rah tûr chungchâng zâwt ang che. Baptisma chan hi a tâwpna ni lovin, a bul ṭanna a ni tih i hre reng dâwn nia. Chu chu tâwp ngai lo tûr Jehova rawngbâwlna nun kawng inṭanna a ni. Chuvângin, i Pa i hmangaihna chu tûnah hian tinghet lehzual ang che. Nî tina i hmangaihna a pun chhoh zêl theih nân thiltumte insiam la. Chutianga tihna chuan baptisma chang tûrin a chêttîr ang che. I baptisma chan nî chu ni hlimawm tak a ni ang. Mahse, chu chu a bul ṭanna mai a la ni. Pathian Jehova leh a Fapa i hmangaihna chu kumkhuain pung chho zêl rawh se!