Engvângin nge Boaza’n “Unaupa” tia a kohvin Ruthi a neih chuan a ro chungchângah “harsatna” a thlen ang tia a sawi? (Rut. 4:1, 6, C.L. Re-edited)

Bible hun lai chuan nupui nei tuemaw chu fa nei lova a thi a nih chuan, zawhna ṭhenkhat chhân ngai a awm a ni: A ram neihte chu engtin nge ni ang? A chhûngkaw hming kumkhuain a bo hlen ang em? Mosia Dân chuan chûng zawhnate chu a chhâng a ni.

Mitthi ta ram, a nih loh leh retheih avânga a in hmun lo ram hralhtu ram chu engtin nge ni ta ang? A unaupa, a nih loh leh a laichîn bulin a ram chu a tlan thei a. Chutiang chuan ram chu an chhûngkaw ta a la ni reng dâwn a ni.—Lev. 25:23-28; Num. 27:8-11.

Engtin nge mitthi ta chhûngkaw hming chu vawn ṭhat a nih? Ruthi dinhmuna thilthleng ang chi pasal unau inneihna hmangin a ni. A unaupa chuan mitthi ta nupui chu neiin chi a thlahsak ang a, chu an fa chuan mitthi ta hming leh thil neihte chu a rochung ang. He ruahmanna duhawm tak avâng hian hmeithaite chu ngaihsakin an awm a ni.—Deut. 25:5-7; Mt. 22:23-28.

Naomi chungchâng hi han ngaihtuah teh. Ani chuan Elimeleka a nei a. A pasal leh a fapate pahnih an thih hnu chuan châwmtu nei lovin a awm a ni. (Rut. 1:1-5) Judai rama an kîr leh hnuah Naomi’n a monu Ruthi chu Boaza hnênah an ram tlansak tûra ngên tûrin a ti a. Ani chu Elimeleka laichîn hnai tak a ni. (Rut. 2:1, 19, 20; 3:1-4) Mahse, Boaza chuan laichîn hnai zâwk, Bible-in “Unaupa” tia a koh a awm tih a hria a. Ani chu tlan theitu dinhmuna ding hmasa zâwk a ni.—Rut. 3:9, 12, 13.

A tîrah, “Unaupa” chuan ṭanpui a inhuam a. (Rut. 4:1-4) Sum leh pai a sên a ngai dâwn tih hre mah se, Elimeleka ram rochungtu tûr fa hring tûrin Naomi chu a upa lutuk tawh tih a hria a ni. Unaupa-a chuan ram chu a nei ang a, a ro zînga chhiar tel a ni ang, chu chu a thil neihte tihpunna ṭha tak angin a lang thei a ni.

Mahse, Unaupa-a chuan Ruthi a neih a ngai dâwn tih a hriat chuan a rilru a thlâk a. Ani chuan: “Keima tân chuan ka tlan thei lo, chutilozawng keima roluah lam thu ka tikhawlo dah ang e,” tiin a sawi a ni. (Rut. 4:5, 6) Engvângin nge a rilru a thlâk?

Unaupa-a emaw, mi dang tuin emaw Ruthi nupuiah a neih a, fapa a hring a nih chuan chu a fapa chu Elimeleka ram rochungtu tûr a ni ang. Chu chuan engtin nge Unaupa-a “roluah” lam thu a ‘tihkhawloh’ theih? Bible-in chu chu sawi lo mah se, a nih theih dân kawngte lo ngaihtuah ta ila.

• Pakhatna, Elimeleka ram chu a ta a nih dâwn loh avângin, chu ram lei nâna a sum hman chu a lo thlâwn mai niin a lang thei a. Ram chu Ruthi fapa ta tûr a ni ang.

• Pahnihna, Naomi leh Ruthi te châwm leh enkawl tûrin mawhphurhna a nei ang.

• Pathumna, Ruthi’n Unaupa-a chu fa dang a hrinsak a nih chuan, a ro chu a fa dangte nên an insem ang.

• Palina, Unaupa-a chuan ama fa bîk a nei lo a nih chuan, Ruthi fapa hrin chuan Elimeleka ram leh Unaupa-a ram chu a rochung ang. Chuvângin, a thih hunah a ram chu ama hming ni lovin, Elimeleka hming rochuntu naupang ta a ni ang. Unaupa-a chuan Naomi ṭanpui nâna a ro tihkhawloh chu a duh lo a ni. Ani chuan dân anga tlan theitu dang, Boaza hnêna chu mawhphurhna hlan chu a duh ta zâwk a. Boaza chuan “mitthi chu a hming dai lova ro luahtu siamsak” a duh avângin chutiang chuan a ti a ni.—Rut. 4:10.

Unaupa-a chuan a hming leh a ro vawn ṭhat chu a ngai pawimawh zâwk niin a lang. Ani chuan a ṭânghma chauh a ngaihtuah a ni. Unaupa-a chuan a hming vawn ṭhat tumin theih tâwp chhuah mah se, tûn laiah a hming tak ngial pawh kan hre lo. Ani chuan Boaza dawn ang chanvo danglam bîk tak Messia, Isua Krista thlahtute zînga pakhat nih theihna chanvo pawh a chân bawk. Unaupa-a tân mahni hmasial taka ṭanpui ngaite ṭanpui theihna hun remchâng a pumpelh sawhkhâwk chu a va lungchhiatthlâk tak êm!