1-2. Mite’n baptisma an chan hian eng thil nge thleng ṭhîn a, he thuziakah hian eng nge kan sawiho vang?

 BAPTISMA chang tûrte chu i thlîr tawh ngai em? Baptisma an chan hmaa zawhna pahnihte rinnghehna nêna an chhâng chu i hria a. An chhûngte leh an ṭhiante chuan an chhuang hle tih i hmu a ni. Baptisma changte tui aṭanga an lo chhuah chuan kut bêng rite i hriain, an hlim hmêlte i hmu bawk. Chawlhkâr tin hian chawhrualin mi a sâng têlte chu Pathian Jehova Thuhretute rawn niin, inpumpêkin baptisma an chang a ni.

² I chungchâng eng nge ni ve? Baptisma chan i rilrûk a nih chuan, he khawvêl suaksual takah hian ‘Pathian zawngtu’ i nih avângin mi hlu tak i ni a. (Sâm 14:1, 2) Naupang i ni emaw, upa i ni emaw he thuziak hi i tâna ziak a ni. Mahse, keini baptisma chang tawhte pawh hian kumkhuaa Jehova rawngbâwl kan duhna chu tihngheh kan duh bawk. Chuvângin, Jehova rawng kan bâwl chhan tam takte zînga pathum i lo ngaihtuahho vang u.

3. Engvângin nge Jehova chhiahhlawhte’n thu dik leh felna an ngainat? (Sâm 119:128, 163)

³ Jehova’n a mite chu ‘thu dik ngaina’ tûrin thu a pe a. (Zak. 8:19) Isua pawhin a hnungzuitute chu felna ûm tûrin a fuih bawk. (Mt. 5:6) Chumi awmzia chu, miin Pathian mit hmuha thil dik, ṭha, leh thianghlim tih duhna nasa tak a neih a ngai tihna a ni. Thu dik leh felna i ngaina em? I ngaina tih kan chiang a ni. Dâwt thu leh thil dik lo leh sual zawng zawngte chu i hua a. (Sâm 119:128, 163 chhiar rawh.) Dâwt sawi hmang chuan he khawvêl rorêltu Setana mizia a entawn a ni.  (Joh. 8:44; 12:31) Setana thiltumte zînga pakhat chu Pathian Jehova hming thianghlim sawichhiat a ni a. Eden huana helna a chhuah aṭang khân, Setana chuan kan Pathian chungchângah dâwt thu a la theh darh zawm zêl a ni. Ani chuan Pathian Jehova chu mahni hmasial tak leh mihringte tâna thil ṭha uitu, rorêltu rinawm lo angin a chhuah bawk. (Gen. 3:1, 4, 5) Setana dâwt thute chuan Pathian Jehova chu mi ṭha lo tak angin mite a la ngaihtîr chhunzawm zêl a. Mihringte’n ‘thutak an ngainat’ loh hian, Setana chuan fel lohnate leh nungchang ṭha lo zawng zawngte a neihtîr thei a ni.—Rom 1:25-31.

4. Engtin nge Pathian Jehova’n “thutak Pathian” a ni tih a lantîr? (Milem en bawk rawh.)

⁴ Jehova chu “thutak Pathian” a ni a, amah hmangaihtute chu phal takin thutak a zirtîr a. (Sâm 31:5) Chutiang chuan anmahni ṭanpuiin Setana dâwt thu lakah a chhuah zalên a ni. Jehova chuan a chhiahhlawhte chu rinawm tak leh fel taka awm tûrin a zirtîr bawk a. Chu chuan mahni inzahna nei lehzual tûr leh chhûngrila muanna nei tûrin a ṭanpui a ni. (Thuf. 13:5, 6) Bible i zir avângin i tân chutiang chuan a ti ve tawh em? Jehova kawngte chu mihring zawng zawngte tân leh i tân ngei pawh a ṭha ber a ni tih i zir tawh a. (Sâm 77:13) Chuvângin, Pathian felna atâna nghet taka din i duh a ni. (Mt. 6:33) Thutak hriattîr leh Setana’n kan Pathian Jehova a sawichhiatna chu a dik lo tih finfiah i duh bawk. Chu chu engtin nge i tih theih ang?

5. Engtin nge thutak leh felna atân i din ngheh theih ang?

⁵ Setana dâwt thu zawng zawng chu i hnâwl vek tih leh, thutak i ṭan tlat tih târ lang zâwngin i nun i hmang thei a. Jehova chu i Rorêltu atân i duh tih leh dik nia a sawite tih i duhzia i lantîr thei bawk a ni. Engtin nge chutiang chuan i tih ang? Ṭawngṭaia Jehova panin, a hnênah inpumpêk la; tichuan, i inpumpêkna vântlâng hmaah baptisma changin lantîr ang che. Thil dik leh fel ngainatna hi baptisma chang tûra chêttîrtu thiltithei tak a ni.

6. Sâm 45:4-in Isua Krista i hmangaih nachhan tûr eng nge a hrilh che?

⁶ Engvângin nge Isua Krista i hmangaih? Sâm 45:4-a târ lan a chhan ṭha takte hi lo chhinchhiah ang che. (Chhiar rawh.) Isua chuan thutak, thuhnuairawlhna, a nih loh leh inngaihtlâwmna, leh felna a ngaina a. Thutak  leh felna i ngaina a nih chuan Isua Krista pawh i hmangaih ang tih a hriat a ni. Isua’n thil dik leh fel huaisen taka a ṭan dân hi ngaihtuah ang che. (Joh. 18:37) A nih chuan, engtin nge Isua’n inngaitlâwm tûra min zirtîr?

7. Isua inngaihtlâwmna chungchângah engin nge i rilru khawih?

⁷ Isua chuan a entawn tûr siam hmangin inngaitlâwm tûrin min zirtîr a. Entîr nân, ani chuan amah a inchawimawi ngai lova, chawimawina zawng zawng chu a Pa hnênah a hlân zâwk a ni. (Mk. 10:17, 18; Joh. 5:19) Chutiang inngaihtlâwmna i hmuhna chuan engtin nge a awmtîr che? Pathian Fapa hmangaih tûr leh zui tûrin a chêttîr che em? Chêttîr ngei ang. Engvângin nge Isua chu a inngaihtlâwm? Inngaitlâwm tak a Pa a hmangaiha, a entawn vâng a ni. (Sâm 18:35; Heb. 1:3) Pathian Jehova miziate ṭha famkima lantîrtu Isua lama hîpin i awm a ni lâwm ni?

8. Isua chu kan Lal a nih angin, engvângin nge kan hmangaih?

⁸ Isua chu Rorêltu ṭha ber a nih avângin kan Lal angin kan hmangaih a. Jehova ngeiin a Fapa chu a zirtîrin, rorêl tûrin a ruat a ni. (Is. 50:4, 5) Isua’n mahni hmasial lo hmangaihna a lantîr dân pawh hi ngaihtuah bawk ang che. (Joh. 13:1) I Lal a nih angin ani chuan i hmangaihna dawn a phû a. Amah hmangaih tak zettute—ṭhiante tia a kohte—chuan a thupêkte zâwmin amah an hmangaihna an lantîr tih a sawi a ni. (Joh. 14:15; 15:14, 15) Jehova Fapa ṭhian nih chu chawimawina ropui a va ni tak êm!

9. Kristiante baptisma chan leh Krista baptisma chan inanna chu eng nge ni?

⁹ Isua thupêkte zînga pakhat chu a hnungzuitute’n baptisma an chang tûr a ni tih a ni a. (Mt. 28:19, 20) Ani chuan entawn tûr a siam a ni. Isua baptisma chan leh a hnungzuitute baptisma chan chu kawng ṭhenkhatin a inang lo va. (“ Isua Baptisma Chan leh A Hnungzuitute Baptisma Chan—A Inan Loh Dân,” tih bâwm chu en rawh.) Mahse, inanna lai an nei bawk. Isua chu baptisma changin a Pa duh zâwng ti tûrin a inpe a. (Heb. 10:7) Chutiang chiah chuan, Krista hnungzuitute’n baptisma an chan hian Pathian Jehova tân an nun an pumpêk tih vântlâng hmaah an lantîr a ni. Tûnah chuan anmahni duh zâwng ni lovin, Pathian duh zâwng tih chu an nunah an dah pawimawh ber a. Chutiang chuan an Pu entawn tûr siam chu an zui a ni.

10. Engvângin nge Isua i hmangaihnain baptisma chang tûra a chêttîr ang che?

¹⁰ Isua chu Jehova Fapa mal neih chhun ang leh kan chunga rorêl tûra Pathian ruat Lal angin i pawm a. Ani chu a inngaitlâwm tih leh ṭha famkimin a Pa a entawn tih i hria a ni. Ani chuan rilṭâmte a hrai puar a, lungngaite a thlamuan a, dam lote pawh a tidam hial tih i hre tawh a. (Mt. 14:14-21) Tûn laia a kohhran a kaihhruai dân pawh i hmu tawh bawk a ni. (Mt. 23:10) Hma lam hunah Pathian Rama Lal a nih angin thil ṭha tam lehzual a ti dâwn tih i hre bawk. Amah i hmangaihna chu engtin nge i lantîr theih? A entawn tûr siam zuina hmangin a ni a. (Joh. 14:21) Jehova hnêna inpumpêka baptisma changin, chutiang chuan i ti ṭan thei a ni.

11. Baptisma chan nachhan tûr pawimawh ber chu eng nge ni a, engvângin nge?

¹¹ Baptisma chan nachhan tûr pawimawh ber chu eng nge ni? Isua chuan Pathian thupêk ropui ber chu târ langin: “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,” tiin a sawi a ni. (Mk. 12:30) Chûng thute chuan Pathian i hmangaihna a târ lang em?

12. Engvângin nge Jehova i hmangaih? (Milem en bawk rawh.)

 ¹² Jehova hmangaih nachhan tûr tam tak a awm a. Entîr nân, ani chu “nunna tuikhur” a ni tih leh “thilpêk ṭha leh thilpêk famkim zawng zawng” Petu a ni tih i hre tawh a. (Sâm 36:9; Jak. 1:17) Thil ṭha i chen zawng zawngte hi kan Pathian thilphal tak leh hmangaihna nei tak hnên aṭanga i dawn vek a ni.

13. Engin nge tlanna chu thilpêk hlu tak nihtîr?

¹³ Tlanna chu Jehova min pêk thilthlâwnpêk hlu tak a ni a. Engvângin nge chutianga kan sawi theih? Jehova leh a Fapa inlaichînna hi han ngaihtuah teh. Isua chuan: “Pain mi hmangaih” tih leh “keiin Pa ka hmangaih” tih a sawi a. (Joh. 10:17; 14:31) An inlaichînna chu kum tlûklehdingâwn têl chhûngin a nghet zual deuh deuh a ni. (Thuf. 8:22, 23, 30) A Fapa hrehawm tuara a thih laia Pathian rilru nat dân tûr chu han ngaihtuah teh. Jehova chuan nang pawh tiamin, mihringte chu a hmangaih êm avângin, nang leh mi dangte chatuana in nun theih nân, a Fapa duh tak chu inthawina atân inhuam takin a pe a ni. (Joh. 3:16; Gal. 2:20) Hei hi Pathian kan hmangaih nachhan tûr ṭha ber a ni.

14. I nuna i neih theih azawnga thiltum ṭha ber chu eng nge ni?

¹⁴ A chanchin tam tak i zir tawh avângin Jehova i hmangaihna chu a ṭhang chho va. Tûnah leh chatuanin amah hnaih lehzual chu i duh  ngei ang. Chutiang chuan i ti thei a ni. Ani chuan a thinlung tilâwm tûrin ngilnei takin a fuih che a. (Thuf. 23:15, 16) Chu chu ṭawngkam mai ni lovin, thiltih pawhin i lantîr thei a ni. Jehova i hmangaih tak zet tih i nun dânin a lantîr ang. (1 Joh. 5:3) Chu chu i nuna i neih theih azawnga thiltum ṭha ber a ni.

15. Engtin nge Jehova i hmangaihna i lantîr theih?

¹⁵ Engtin nge Jehova i hmangaihna i lantîr theih? A hmasain, Pathian dik awmchhun hnêna inpumpêkin a bîk taka ṭawngṭaina i nei a. (Sâm 40:8) Tichuan, i inpumpêkna chu baptisma changin vântlâng hmaah i lantîr a ni. He thuziak tîr lama kan sawiho tawh angin, i baptisma channa chu i nuna hun hlimawm leh pawimawh tak a ni a. I tân ni lovin, Jehova tân nun thar i hmang ṭan a. (Rom 14:8; 1 Pet. 4:1, 2) Chu chu thu tlûkna pawimawh tak angin a lang a, a ni rêng bawk. Chu bâkah, chu chuan nun kawng ṭha ber atân kawng a hawn che a ni. Engtin nge?

16. Sâm 41:12-in a sawi angin, a rawng bâwl tûra inpumpêkte chu Jehova’n engtin nge mal a sâwm ang?

¹⁶ Jehova chu Mi thilphal ber a ni a. A hnênah engpawh pe la, i pêk aia tam a pe lêt leh dâwn che a ni. (Mk. 10:29, 30) He khawvêl suaksual takah pawh hian nun phûrawm ber, lungawithlâk ber, leh hlimawm ber a pe ang che. Chu chu a bul ṭanna mai a ni. Baptisma i chan nî aṭanga i nun kawng zawh chuan tâwp nî a nei lo vang a. I hmangaih tak i Pa rawng chu chatuanin i bâwl thei ang. I Pa nêna in inhmangaihna chu a ṭhang chho zêl ang a, kumkhuain a nun chhûng zawng i nung ve dâwn a ni.—Sâm 41:12 chhiar rawh.

17. Jehova hnênah a la neih loh eng thil nge i pêk theih?

¹⁷ Inpumpêka baptisma chang tûra rahbite i rah hian, i Pa hnênah thilpêk hlu tak pêk theihna chanvo hlu i nei a. Thil ṭha zawng zawng i neihte leh hun hlimawm tak i hmante chu a pêk che a ni. Lei leh vân Neitu hnênah a la neih loh thil—rinawm taka a rawngbâwl i inhuamna—pêk theihna i nei ve thung a ni. (Job. 1:8; 41:11; Thuf. 27:11) Chu aia ṭha zâwka nun i hman theih dân a awm dâwn em ni? Hnial rual lohvin, Jehova i hmangaihna chu baptisma chan nachhan tûr ṭha ber a ni.

18. Eng zawhnate nge i inzawh theih?

¹⁸ A nih chuan, baptisma i chang ang em? tih zawhna hi engtin nge i chhân ang? Chu chu nangmah chauhvin i chhâng thei a ni. Mahse, ‘Eng nge ka la nghah?’ tia inzawhna chuan a ṭanpui mai thei che. (Tirh. 8:36) Chhan pathum kan sawiho tâkte kha hre reng ang che. Pakhatna, thu dik leh felna i ngainatna a ni. Heti hian inzâwt rawh, ‘Mi zawng zawngin thu dik sawi a, thil dik an tih hun tûr hmuh chu ka duh em?’ tiin. Pahnihna, Isua Krista i hmangaihna a ni. Heti hian inzâwt rawh, ‘Pathian Fapa chu ka Lal atân ka duhin, a entawn tûr siam chu zui ka duh em?’ tiin. Pathumna, a pawimawh ber chu Jehova i hmangaihna a ni. Heti hian inzâwt rawh, ‘Ka Pathian anga a rawngbâwlin Jehova thinlung tihlâwm ka duh em?’ tiin. Chûng zawhnate chu, aw tia i chhâng a nih chuan, engvângin nge baptisma i chan loh vang? Eng nge i la nghah?—Tirh. 16:33.

19. Engvângin nge baptisma chan chu i tîm loh vang? Entîrna pe rawh. (Johana 4:34)

¹⁹ Baptisma chan i tîm a nih chuan Isua tehkhin thu hman hi ngaihtuah ang che. (Johana 4:34 chhiar rawh.) Isua chuan a Pa duh zâwng tih chu chaw nên a khaikhin tih chhinchhiah rawh. Engvângin nge? Chaw chu kan tân a ṭha a. Isua chuan Jehova’n ti tûra min duh apiangte chu kan tâna ṭha tûr a ni tih a hria a ni. Jehova chuan min tina thei thil engmah min tihtîr a duh lo. I tâna Jehova duh zâwngah chuan baptisma chan a tel em? Tel e. (Tirh. 2:38) A nih chuan, baptisma chang tûra thupêk zawmna chu i hlâwkpui ang tih i ring nghet tlat thei a ni. Chaw tui ber ei i tîm lo a nih chuan, engvângin nge baptisma chan chu i tîm ang?

20. A dawta thuziakah eng nge kan sawiho vang?

²⁰ Eng nge i la nghah? Mi tam tak chuan “Ka la inpeih lo,” tiin an chhâng mai thei. A nihna takah chuan, Jehova hnêna inpumpêka baptisma chang tûra thu tlûkna chu thu tlûkna i siam theih azawnga pawimawh ber a ni. Chuvângin, i thu tlûkna chungchâng chu ngun taka i ngaihtuah a ngai a, baptisma chang thei tûr chuan hun pêka theih tâwp chhuah a ngai ang. Mahse, baptisma chan duhna i nei tak zet a nih chuan, lo inbuatsaih tûrin tûnah eng nge i tih theih? A dawta thuziakah chu zawhna chhânna chu kan sawiho vang.