1. Kan inkhâwmnaa rawn tel ngaihventu tam takte rilru khawihtu chu eng nge ni? (Milem en bawk rawh.)

 NUPA tuak khat chu a vawi khatna atân Jehova Thuhretute Kingdom Hall-a an inkhâwm angin han mitthla teh. Unaute nêlawmna leh hmangaihna inlantîr tawn dân an hmuhna chuan an rilru a khawih hle a ni. Inkhâwm bâna an haw kawngah nupui chuan a pasal hnênah, ‘Hêng mite hi mi dang kan tawhte lakah chuan an danglam khawp mai, an zînga awm nuam ka ti tak zet,’ tiin a sawi a ni.

2. Engvângin nge mi ṭhenkhat an tlûk?

² Kristian kohhrana awmte zînga hmangaihna awm chu a chhinchhiah tlâk hle a. Chutih rualin, Jehova Thuhretute chu mi ṭha famkim an ni lo. (1 Joh. 1:8) Chuvângin, kohhrana awmte kan hriat chian poh leh an tlin lohna kan hmuh tam lehzual a rinawm. (Rom 3:23) Lungchhiatthlâk takin, mi ṭhenkhat chuan mi dangte ṭhat famkim lohna chu tlûk phah nân an hmang a ni.

3. Isua hnungzuitu dik takte chhinchhiahna chu eng nge ni? (Johana 13:34, 35)

³ He thuziak ṭanchhan Bible châng hi han ennawn leh teh. (Johana 13:34, 35 chhiar rawh.) Krista hnungzuitu dik takte chhinchhiahna chu eng nge ni? Ṭhat famkimna ni lovin, hmangaihna a ni. Isua’n: ‘Nangni’n ka zirtîrte in ni tih chu miah chuan in inhria ang,’ tia a sawi lo hi chhinchhiah bawk ang che. Ani chuan: “Mi zawng zawngin ka zirtîrte in ni tih chu miah chuan an hria ang,” tiin a sawi zâwk a ni. Chutiang chuan Isua’n a hnungzuitute chauh ni lovin, Kristian kohhran pâwn  lama awmte pawhin a hnungzuitu dik takte chu, mahni hmasial lo hmangaihna an inlantîr tawnna aṭangin an hre dâwn tih a târ lang a ni.

4. Mi ṭhenkhatin Kristian dikte chungchâng eng nge hriat an duh mai theih?

⁴ Jehova Thuhretu ni lo mi ṭhenkhat chuan heti hian an zâwt mai thei: ‘Engtin nge hmangaihnain Isua hnungzuitu dik takte hre tûra min ṭanpui? Engtin nge Isua’n a tirhkohte chungah hmangaihna a lantîr? Tûn laiah engtin nge Isua chu entawn theih a nih?’ tiin. Thuhretute tân pawh chûng zawhnate chhânna ngaihtuah chu a ṭha a ni. Chutianga tihna chuan hmangaihna lantîr lehzual tûr leh, a bîk takin ṭha famkim lo kan nih anga kan indâwr tawn hunah min ṭanpui thei a ni.—Eph. 5:2.

5. Johana 15:12, 13-a Isua thusawite chu hrilhfiah rawh.

⁵ Isua chuan a hnungzuitute chhinchhiahtu tûr hmangaihna danglam bîk tak chungchâng a sawi a. (Johana 15:12, 13 chhiar rawh.) Isua’n an hnêna a thupêk: “Keiin ka hmangaih che u ang bawkin nangni inhmangaih ula,” tih hi chhinchhiah ang che. Chumi awmzia chu eng nge ni? A dawta Isua’n a sawi angin, hei hi mahni hmasial lo hmangaihna a ni a—chu hmangaihna chuan Kristian chu a ṭûl a nih chuan a Kristian unau tâna a nun pe ngam hial khawpin a chêttîr a ni. b

6. Engtin nge Pathian Thuin hmangaihna a pawimawhzia a sawi uar?

⁶ Pathian Thu chuan hmangaihna a pawimawhzia min zirtîr a. Mi tam tak chuan an Bible châng duhte zîngah hêngte hi an telh a ni: “Pathian chu hmangaihna a ni.” (1 Joh. 4:8) “Nangmah i inhmangaih angin i vêngte pawh i hmangaih tûr a ni.” (Mt. 22:39) “Hmangaihnain sual tam tak a khuh si ṭhîn.” (1 Pet. 4:8) “Hmangaihna hi engtikah mah a reh lo vang.” (1 Kor. 13:8) Hêng chângte leh châng dangte  chuan he mize duhawm tak hi neih chhoh va, lantîr a pawimawhzia a târ lang a ni.

7. Engvângin nge Setana’n hmangaihna dik taka mite a inpumkhattîr theih ngai loh vang?

⁷ Mi tam tak chuan heti hian an zâwt a: ‘Engtin nge sakhaw dik ka hriat theih ang? Sakhua zawng zawngte chuan thutak zirtîr niin an inchhâl a; mahse, Pathian chungchângah erawh an zirtîr dân a dang ṭheuh thung,’ tiin. Setana chuan sakhaw dik lo tam tak a din a, chu chuan mite tân sakhaw dik hriat a tiharsa hle. Mahse, ani chuan inhmangaih tawn tak khawvêl pum huap Kristian inunauna a siam thei ngai lo vang. Chu chu Jehova chauhvin a ti thei a ni. He hmangaihna hi Jehova hnên aṭanga lo kal a ni tih kan hria a, Jehova thlarau leh a malsâwmna dawngtute chauhvin an nei thei a. (1 Joh. 4:7) Chuvângin, Isua’n a hnungzuitute chauhvin hmangaihna dik tak an nei dâwn tih a sawi a ni.

8-9. Jehova Thuhretute inhmangaih tawnna an hmuhnain mi tam takte chungah eng nghawng nge a neih?

⁸ Isua’n a sawi lâwk ang chiahin, mi tam takin a hnungzuitu dik takte chu hmangaihna dik tak an inlantîr tawnna aṭangin an hria a. Entîr nân, unau Ian-a’n a in bul infiamna stadium-a neih, inkhâwmpuia a tel hmasak ber ṭum chu a la hre reng a. Ian-a chuan a hma thla rei vak lovah, chu stadium-ah chuan inkhêl a en a ni. Ani chuan: “Inkhêl ka enpuite leh he inkhâwmpuia telte nungchang hi a danglam hlak a ni. Thuhretute chu an hawihhâwmin fel fai takin an inchei a, an fate pawh nungchang ṭha tak tak an ni,” tiin a sawi. Heti hian a sawi belh a ni: “Chu bâkah, hêng mite hian ka neih châk êm êm lungawina leh thlamuanna an nei niin a lang. Chumi nîa thusawite chu ka hre tawh lo; mahse, Thuhretute nungchang chu ka la hre reng a ni,” c tiin. A nihna takah chuan, chutiang nungchang chu hmangaihna dik tak kan inlantîr tawnna rah chhuah a ni a. Kan unaute chu kan hmangaih avângin ngilnei tak leh zah takin kan cheibâwl a ni.

⁹ Unau John-a pawhin kohhran inkhâwma a tel tirhin chutiang chu a tawng a, ani chuan: “Chuta tel zawng zawngte . . . nêlawmna chuan min hneh hle a—an fel êm avângin ṭha famkim tûrin ka ngai hial a ni. An hmangaihna dik tak chuan sakhaw dik ka chhar ta tih min rin nghehtîr,” d tiin a sawi. Hêngte leh thiltawn dang tam takte chuan Jehova mite chu Kristian dik tak an ni tih a târ lang a ni.

10. Eng hunah nge Kristian hmangaihna lantîr theihna hun remchâng ṭha tak kan neih? (Footnote en bawk rawh.)

¹⁰ A tîra kan hriat tâk ang khân, kan Kristian unaute chu ṭha famkim an ni lo va. Min tithinrimtu thute sawi châng leh thilte tih châng an nei ang. e (Jak. 3:2) Chutiang hunah chuan kan chhân lêt dân hmangin, Kristian hmangaihna lantîr theihna hun remchâng ṭha tak kan nei a ni. Chumi chungchângah Isua entawn tûr siam aṭangin eng nge kan zir theih?—Joh. 13:15.

11. Jakoba leh Johana’n eng mize ṭha lo tak nge an lantîr? (Milem en bawk rawh.)

¹¹ Isua chuan a hnungzuitute chu ṭha famkim tûrin a beisei lo va. Chu aiin, Jehova pawm an hlawh theih nân an mize ṭha lo laite chu siam ṭha tûrin hmangaihna nei takin a ṭanpui zâwk a ni. Ṭum khat chu a tirhkoh pahnih Jakoba leh Johana te chuan, an nu hnênah Lalrama dinhmun pawimawh tak dîlsak  tûrin an ngên a. (Mt. 20:20, 21) Chutiang chuan Jakoba leh Johana te chuan mize ṭha lo tak chapona leh tumsânna an lantîr a ni.—Thuf. 16:18.

12. Jakoba leh Johana te chauh chu mize ṭha lo lantîrtu an ni em? Hrilhfiah rawh.

¹² Chumi ṭuma mize ṭha lo lantîrtu chu Jakoba leh Johana te chauh an ni lo va. Tirhkoh dangte’n an chhân lêt dân hi lo chhinchhiah teh: “Tin, sâwmte chuan chu chu an lo hriatin unau pahnihte chungah chuan an thinur ta a,” tih hi. (Mt. 20:24) Jakoba, Johana, leh tirhkoh dangte thinrim taka an inhnial lai chu kan mitthla thei a ni. Tirhkoh dangte chuan heti hian an sawi mai thei: ‘Lalrama dinhmun pawimawh tak dîl tûrin eng nge in nih bîk? Nangni chauh hi Isua bula rim taka thawk awmchhun in ni hlei nêm. Chu dinhmun pawimawh tak chu nangni ang bawkin dawn kan phû ve tho!’ tiin. An ngaihtuahna leh thusawi chu eng pawh ni se, chu dinhmunah chuan hmangaihna leh khawngaihna inlantîr tawn an theihnghilh a ni.

13. Isua’n a tirhkohte tlin lohna chu engtin nge a chhân lêt? (Matthaia 20:25-28)

¹³ Isua’n chu dinhmun chu engtin nge a chinfel? Ani chu a thinrim lo va. Mi dang inngaitlâwm zâwk leh hmangaihnaa incheibâwl reng tûr tirhkoh ṭha zâwk a zawn tûr thu a sawi hek lo. Chu aiin, thil dik tih an duh tih a hriat avângin, anni chu dawhthei takin a chhûtpui a ni. (Matthaia 20:25-28 chhiar rawh.) Hei hi an zînga ropui ber tu nge  ni ang tih chungchânga tirhkohte inhnialna hmasa ber leh hnuhnûng ber a ni lo chung pawhin, Isua chuan anni chu hmangaihna nei takin a cheibâwl zawm zêl a ni.—Mk. 9:34; Lk. 22:24.

14. Isua tirhkohte chu eng ang mite hual vêla seilian nge an nih?

¹⁴ Isua chuan tirhkohte ṭobul chu a ngaihtuah ngei ang. (Joh. 2:24, 25) Anni chu nihna leh dinhmun ngai pawimawh êm êm sakhaw hruaitute hual vêla seilian an ni a. (Mt. 23:6) Juda sakhaw hruaitute chuan mi dangte aia ṭha zâwk niin an inngai bawk. f (Lk. 18:9-12) Chutiang thilte chuan a tirhkohte’n mahni an inthlîr dân leh mi dangte an thlîr dân a nghawng thei tih a hre thiam a ni. (Thuf. 19:11) Ani chuan a zirtîrte chu thil tisual ngai lo tûrin a beisei lo va. Thinlung ṭha tak an nei tih a hriat avângin, an chapona leh tumsânnate chu hneh a, chûngte chu hmangaihnaa thlâk tûrin dawhthei takin a ṭanpui a ni.

15. Jakoba leh Johana te telna thilthleng aṭangin eng nge kan zir theih?

¹⁵ Jakoba leh Johana te telna thilthleng aṭangin thil tam tak kan zir thei a. Lalrama dinhmun sâng tak dîl chu an tân thil dik a ni lo. Amaherawhchu, tirhkoh dangte tân pawh chu dinhmunin an inpumkhatna tihbuai an phal chu thil dik a ni lo bawk. Mahse, Isua chuan tirhkoh 12-te chu ngilnei tak leh hmangaihna nei takin a cheibâwl a ni. Eng nge kan zir theih? Mite thil tihsual chauh ni lovin, an tihsualte leh an tlin lohnate kan chhân lêt dân pawh chu thil pawimawh tak a ni. Engin nge Isua entawn tûrin min ṭanpui thei ang? Kan Kristian unau tuemawin min tihlungnih loh hunah heti hian kan inzâwt thei a ni: ‘Engvângin nge a thiltihin min tihthinrim êm êm? Chu chuan siam ṭhat ngai mize ṭha lo ka nei tih a lan chhuahtîr em? Min tithinrimtu chuan dinhmun harsa tak a tâwk a ni thei ang em? Thinrim nachhan tûr ṭha tak ka nei a nih pawhin, hmangaihna lantîrin amah chu ka ngaidam thei ang em?’ tiin. Mi dangte hmangaihna nei taka kan cheibâwl nasat poh leh, Isua hnungzuitu dik takte kan nihzia kan lantîr nasa lehzual ang.

16. Isua entawn tûr siam aṭangin eng thil dang nge kan zir theih?

¹⁶ Isua entawn tûr siam chuan kan Kristian unaute hriat thiam tum tûrin min zirtîr bawk. (Thuf. 20:5) Isua chuan thinlung a hre thei a. Keini chuan kan hre ve thei lo. Mahse, kan unaute’n min tihthinrim hunah an chungah dawhtheihna kan lantîr thei a. (Eph. 4:1, 3; 1 Pet. 3:8) An ṭobul kan hria a nih chuan chutianga tih chu a awlsam lehzual a ni. Entîrna pakhat i lo ngaihtuahho vang u.

17. Engtin nge bial kantu pakhatin a Kristian unau hriat chian lehzualna chu a hlâwkpui?

¹⁷ Africa khawchhak lama bial kantu pakhat chuan, chuta kohhrana unaupa pakhat chu a la hre reng a. A tîrah chuan, ani chu mi ngilnei lo tak angin a ngai a ni. Bial kantu chuan eng nge a tih? Ani chuan: “Chu unaupa pumpelh ai chuan amah hriat chian lehzual ka tum nghet tlat a ni,” tiin a sawi. Chutia a tihna aṭang chuan, chu unaupa mizia thununtu, a ṭobul chungchânga thil ṭhenkhat chu a hre ta a. Heti hian a sawi chhunzawm a ni: “Chu unaupa tân mi dangte nêna inngeih  taka awm tûra inthlâkthlengna siam a harsat tûrzia leh, nasa taka a inthlâk tawhzia ka hriat chuan ani chu ka ngaisâng ta hle a. Ṭhian ṭha tak kan lo ni ta a ni,” tiin. A nihna takah chuan, kan unaute hriat thiam kan tum hian an chunga hmangaihna lantîr a awlsam lehzual ṭhîn.

18. Kan Kristian unauvin min tilungni lo a nih chuan, eng zawhnate nge kan inzawh theih? (Thufingte 26:20)

¹⁸ A châng chuan, min tilungni lotu kan Kristian unau chu be tûra kan pan a ngai niin kan hre thei a. Mahse, hêng zawhnate inzawh hmasak hi kan tân thil ṭha tak a ni: ‘Thil nih dân engkim ka hria em?’ (Thuf. 18:13) ‘Min tilungni lo palh mai a ni em?’ (Thur. 7:20) ‘Chutiang chuan ka lo ti palh ve tawh ṭhîn em?’ (Thur. 7:21, 22) ‘Hemi chungchâng ka sawipui a nih chuan, buaina chu a zual zâwk ang em?’ tiin. (Thufingte 26:20 chhiar rawh.) Hêng zawhnate hi ngun taka kan ngaihtuah a nih chuan, hmangaihnain thilthleng tawhte ngaihtuah zawm lo tûrin min chêttîr thei a ni.

19. Eng nge tih i tum tlat ang?

¹⁹ Jehova Thuhretute chuan Isua zirtîr dik tak an nihzia inhmangaih tawnna hmangin an lantîr a. Kan unaute an ṭha famkim lo chung pawha an chunga mahni hmasial lo hmangaihna kan lantîr hian, Isua hnungzuitu dik tak kan ni tih kan târ lang a ni. Chutianga kan tih chuan, mi dangte pawhin sakhaw dik chu hriain, hmangaihna Pathian Jehova kan biaknaah min rawn zawm ve thei ang. Kristian dikte chhinchhiahtu, hmangaihna chu lantîr chhunzawm zêl i tum ṭheuh vang u.