1. Nu leh pate’n an fate tân eng nge an duhsak?

 NANGNI nu leh pate u, Jehova hre tûr leh hmangaih tûrin in fate ṭanpui in duh tih kan hria a. Mahse, Pathian chu hmuh theih a ni si lo. Amah chu Mi tak tak anga hmu tûr leh hnaih tûrin, engtin nge in fate chu in ṭanpui theih ang?—Jak. 4:8.

2. Engtin nge nu leh pate’n an fate chu Jehova miziate an zirtîr theih?

² Jehova hnaih tûra fate ṭanpui theih dân kawng pawimawh tak pakhat chu Bible zirpui hi a ni a. (2 Tim. 3:14-17) Mahse, Bible chuan naupangte’n Jehova chungchâng an zir theih dân kawng dang pawh a târ lang bawk. Thufingte buah chuan, pa pakhatin a fapa chu thil siamtea lang Jehova miziate hmuh hmaih ngai lo tûrin a hriatnawntîr a. (Thuf. 3:19-21) Nu leh pate’n an fate chu thil siamte hmanga Jehova mizia zir tûra an ṭanpui theih dân kawng ṭhenkhat kan ngaihtuah ang.

3. Nu leh pate’n an fate chu engtin nge an ṭanpui ang?

³ Bible chuan Pathian chungchângah “thil hmuh theih loh (a chatuan thiltihtheihna leh a Pathianzia chu) khawvêl siam tirh ata fiah taka hmuhin a awm,” tiin a sawi a ni. (Rom 1:20) Nu leh pate u, in fate nêna pâwn lama hun hmanho chu nuam in ti ngei ang. Chûng hunte chu ‘thil siamte’ leh Jehova mize ropui takte a inzawm dân hmu thiam tûra in fate ṭanpui nân hmang ang che u. Hemi chungchânga nu leh pate’n Isua entawn tûr siam aṭanga an zir theihte i lo en ang u.

4. Engtin nge Isua’n a zirtîrte zirtîr nân thil siamte a hman? (Luka 12:24, 27-30)

 ⁴ Isua’n thil siamte hmanga a zirtîr dân hi lo chhinchhiah teh. Ṭum khat chu Isua’n a zirtîrte chu choâkte leh tûktin pârte en tûrin a ti a. (Luka 12:24, 27-30 chhiar rawh.) Isua chuan ramsa, a nih loh leh thlai engpawh chungchâng a sawi thei a; mahse, a zirtîrte’n an hriat chian tak sava leh pangpâr a thlang a ni. Zirtîrte chuan vâna choâk thlâwk ṭhîn leh rama pangpârte chu an hmu ṭhîn ngei ang. A thusawi laia, Isua’n chûng thilte a kâwk lai chu i mitthla thei em? Entîrnate a sawi hnuah eng nge a tih? A zirtîrte chu an Pa vâna mi thilphalna leh ngilneihna chungchângah thil pawimawh tak a zirtîr a ni: Jehova chuan choâkte leh rama pangpârte a châwm angin, a chhiahhlawh rinawmte chu a châwmin, silhfên a pe ang tih chu.

5. Nu leh pate’n an fate hnêna Jehova chungchâng zirtîr nâna an hman theih thil siam ṭhenkhat chu eng nge ni?

⁵ Nu leh pate u, in fate in zirtîrnaah engtin nge Isua in entawn theih? In fate chu thil siamte zînga in ngainat ber ramsa, a nih loh leh thlai chungchâng in hrilh thei a. Chutianga in tih hunah, chu thilin Jehova chungchâng a târ lan dân hrilh theihnghilh suh ang che u. Tichuan, i fa chu ramsa, a nih loh leh thlai a ngainat ber chungchâng i zâwt thei a. Zirtîr nâna thil siam a ngainat tak i hmang a nih chuan, Jehova miziate chungchâng i hrilh hunah i thusawi a ngaithla lehzual ngei ang.

6. Christopher-a nu entawn tûr siam aṭangin eng nge kan zir theih?

⁶ Nu leh pate chuan ramsa, a nih loh leh thlai eng emawin Jehova chungchâng a târ lan dân an fate an sawipui hmain, zir bingna atân hun tam tak an sên a ngai em? Ngai lo ve. Isua chuan savate chaw zawn dân, a nih loh leh ram tûktin pâr ṭhan dân chungchâng thui takin a sawi lo. I fain Jehova thil siamte chungchâng chipchiar taka hriat a duh a nih pawhin, a châng chuan thu hotê, a nih loh leh zawhna pakhat lek pawh i fa ṭanpui nân a tâwk thei a ni. Unau Christopher-a’n a têt lai chanchin a sawi hi lo chhinchhiah ang che: “Ka nu chuan kan chhehvêla thil siamte ngaihhlutna nei tûra kan unau thuma min ṭanpui nân thu hriat awlsam takte a sawi ṭhîn a. Entîr nân, tlâng bul hnaiha kan kal chuan heti hian a sawi ṭhîn a ni: ‘Sâwng tlâng lenzia leh mawizia saw en teh u! Jehova hi a ropui ti r’u?’ A nih loh leh, tuifinriat kama kan kal a nih chuan: ‘Tui fâwnte chakzia saw en teh u! Pathian hian thil a ti thei ti r’u?’ a ti ṭhîn a ni,” tihte hi. Christopher-a chuan: “Chûng thu mâwlmang tak, mahse awmze nei takte chuan kan ngaihtuahna a chawk tho tak zet,” tiin a sawi.

7. Engtin nge i fate chu thil siamte chungchâng ngaihtuah tûra i zirtîr theih?

⁷ I fate chu an ṭhan len zêl rualin, thil siamte chungchâng ngaihtuaha chuta ṭanga Jehova chungchâng zir tûrin i ṭanpui thei a ni. Pathian thil siam pakhat târ langin, i fate chu heti hian zâwt rawh: “Hei hian Jehova chungchâng eng nge a zirtîr che?” tiin. Chumi chungchânga i fate thusawi i hriat chuan mak i ti hle mai thei.—Mt. 21:16.

8. Israel nu leh pate’n zin ‘kawnga an kal laiin’ eng hun remchâng nge an neih?

⁸ Israel nu leh pate chu ‘kawnga an kal laia’ Jehova thupêkte an fate hnêna zirtîr tûra hrilh an ni a. (Deut. 11:19) Israel rama thingtlâng hmun nuam takte chu kawngin a pawh vek a. Ramsa, sava, leh pangpâr chi hrang hrangte a hmuh theih a ni. Chûng kawngtea Israel chhûngkuate an zin hian, nu leh pate chuan Jehova thil siamte chungchâng an fate hnêna hrilh theihna hun remchâng an nei a.  Nangni nu leh pate pawhin, in fate zirtîr nâna thil siamte hman theihna hun remchâng in neih ve ngei a rinawm. Nu leh pa ṭhenkhatin chutianga an tih dân i lo ngaihtuah ang u.

9. Punitha-i leh Katya-i te hnên aṭangin eng nge i zir theih?

⁹ India rama khawpui lian taka chêng nu pakhat Punitha-i chuan: “Thingtlânga awm kan chhûngte kan tlawh hian, chu chu Jehova thil siam ropui takte chungchâng zir tûra kan fate ṭanpuina hun remchâng angin kan thlîr a. Kawtthlêr lûn tak leh khawpuia motor zi nuaih nuaihte hlata an awm hian, ka fate’n thil siamte an hre chiang lehzual niin ka hria,” tiin a sawi. Nu leh pate u, in fate’n hmun nuam taka hun in hmanpui chu an hriat reng a rinawm. Moldova rama unaunu Katya-i chuan: “Ka naupan lai hun ka la hriat chian êm êm chu, thingtlâng hmun nuam taka ka nu leh pate nêna hun kan hmanho lai a ni a. Ka naupan têt aṭangin ding a, Jehova thil siamte ena, chûng thil siamte aṭanga amah hmu thiam tûra min zirtîr avângin an chungah ka lâwm hle,” tiin a sawi.

10. Nu leh pate’n khawpui aṭanga zin chhuah harsa an ti a nih chuan eng nge an tih theih? (“ Nu leh Pate Tâna Ṭanpuitu,” tih bâwm chu en rawh.)

¹⁰ Thingtlâng hmun nuam taka zin chu i tân remchâng lo ta se, engtin nge ni ang? India rama awm Amol-a chuan heti hian a sawi: “Ka chênna hmunah chuan nu leh pate’n dârkâr rei tak tak hna an thawh a ngaih bâkah, thingtlâng hmun nuam taka zin chu a hautak hle. Mahse, park-ah emaw, in chhâwng bathlârah emaw ka awm laiin, Jehova thil siamte ka hmu theiin a miziate ka hre thei a ni,” tiin. Ngun taka i en a nih chuan, i in leh a chhehvêlah i fate i kawhhmuh theih tûr thil siam tam tak a awm tih i hmu chhuak ngei ang. (Sâm 104:24) Sava te, thil nung te tak tê tê te, thlai te, leh thil dang tam takte i hmuh ngei a rinawm. Germany rama awm Karina-i chuan: “Ka nu chuan  pangpâr a ngaina hle a; chuvângin, ka naupan laia min kal chhuahpui apiangin pangpâr mawi tak takte min kawhhmuh ṭhîn,” tiin a sawi. Nu leh pate u, in fate zirtîr nân thil siamte chungchânga kan inawpna pâwlin a tih chhuah video-te leh thu leh hla chhuahte chu in hmang thei bawk a ni. Ni e, i dinhmun chu engpawh ni se, Pathian thil siamte zir tûrin i fate chu i ṭanpui thei a ni. Tûnah chuan i fate hnêna i hrilh theih Jehova mize ṭhenkhat lo ngaihtuah ta ila.

11. Engtin nge nu leh pate’n Jehova hmangaihna hre tûra an fate an ṭanpui theih?

¹¹ Jehova hmangaihna hmu thiam tûra i fate ṭanpui nân, ramsa tam takin an note dimdawih taka an enkawl dân chu i kawhhmuh thei a. (Mt. 23:37) Thil siam kan hlimpui theih chi hrang hrang i hrilh thei bawk. A hmaa kan sawi tâk Karina-i chuan: “Ka nu nêna kan kal chhuah hian, ani chuan pangpâr tinte danglam dân leh an mawinain Jehova hmangaihna a lantîr dânte chu ding a, ngun taka en tûrin min fuih ṭhîn a. Kum tam tak a liam hnuah pawh, pangpârte rawng a inan loh dân leh inang lo ṭheuhva siam an nih dân chu ngun takin ka la thlîr reng ṭhîn a. Jehova min hmangaihzia min la hriatnawntîr reng a ni,” tiin a sawi.

12. Engtin nge nu leh pate’n an fate chu Pathian finna hre thiam tûra an ṭanpui theih? (Sâm 139:14) (Milem en bawk rawh.)

¹² I fate chu Pathian finna hre tûrin ṭanpui rawh. Jehova chu keini aiin nasa takin a fing zâwk a. (Rom 11:33) Entîr nân, chhûm tuipaite hmun khat aṭanga hmun danga awlsam taka an tawlh sawn dân chu i kawhhmuh thei a. (Job. 38:36, 37) Mihring taksa mak ropui taka duan a nih dân pawh i hrilh thei bawk. (Sâm 139:14 chhiar rawh.) Pa pakhat Vladimir-a’n chutianga a tih dân chu lo ngaihtuah ila. Ani chuan: “Ni khat chu kan fapa chu cycle a khalh laiin a tlu a, a inhliam na hle a ni. Mahse, ni rei lote hnuah a hliam chu a lo dam a. Kan nu nên chuan Jehova’n kan taksaa cell-te anmahnia insiam ṭha leh thei tûra a siam dân chu kan hrilhfiah a ni. Chutiang chu mihringte thil siam engah mah hmuh tûr a awm lo. Entîr nân, motor hi a chêtsual hnuah amahin a insiam ṭha thei lo. He a thiltawn hian kan fapa chu Jehova finna hre thiam tûrin a ṭanpui a ni,” tiin a sawi.

13. Engtin nge nu leh pate’n Pathian thiltihtheihna hre tûra an fate an ṭanpui theih? (Isaia 40:26)

 ¹³ Jehova chuan vân lama kan mitte lên chho va, a thiltihtheihna nasa tak hmanga arsite an hmun taka a dah dân ngaihtuah tûrin min sâwm a ni. (Isaia 40:26 chhiar rawh.) I fate chu vân lam thlîra an thil hmuhte ngaihtuah tûrin i fuih thei ang. Taiwan rama unaunu Tingting-i’n a têt laia thilthleng chungchâng a sawi hi lo chhinchhiah teh, ani chuan: “Ṭum khat chu ka nuin ramhnuaiah min riah chhuahpui a, khawpuia êngte tihbuai lohvin zânah vân lam kan thlîr a ni. Chutih hun lai chu ṭhiante nêksâwrna avânga ka rilru hah lai leh, Jehova rawng rinawm takin ka bâwl chhunzawm zêl thei ang em tih ka ngaihtuah lai a ni a. Ka nu chuan arsi zawng zawngte siam nâna Jehova hman a thiltihtheihna chungchâng ngaihtuah tûr leh, chu a thiltihtheihna chu ka fiahna tawh engpawh hmachhawn tûra min ṭanpui nân a hmang thei tih hre reng tûrin min fuih a. Chu kan riah chhuahnaa thil siamte ka en hnu chuan, Jehova hre chiang lehzual tûr leh a rawngbâwl tum lehzual tûra chêttîrin ka awm a ni,” tiin a sawi.

14. Engtin nge nu leh pate’n Jehova chu Pathian hlim a ni tih hmu thiam tûra an fate ṭanpui nân thil siamte an hman theih ang?

¹⁴ Jehova thil siamte chuan ani chu mi hlim thei tak a ni tih a târ lang a. Scientist-te chuan savate leh sanghate pawh tiamin, ramsa tam zâwkte chu an infiam ṭhîn tih an hria a ni. (Job. 40:20) Ramsate infiam an en laiin i fate chu an nui ngai em? Zawhte notêin ball mûm a ûm lai emaw, uitê infiam lai emaw chu an hmu ṭhîn mai thei. Chûng ran vulhte infiam lai an hmuha an nuih leh hunah, Pathian hlim rawng kan bâwl tih engvângin nge i hriatnawntîr loh vang?—1 Tim. 1:10, 11.

15. Engin nge nu leh pate chu an fate ngaihtuahna phawrh chhuak tûra ṭanpui thei? (Thufingte 20:5) (Milem en rawh.)

¹⁵ Nu leh pate chuan an fate’n harsatna an tawhte sawi chhuahtîr chu harsa tih châng an nei thei a. Chutiang chu i dinhmun a nih chuan, i fate ngaihtuahna i phawrh chhuah thiam a ngai ang. (Thufingte 20:5 chhiar rawh.) Nu leh pa ṭhenkhat chuan an fate nêna  thil siamte an hlimpui laiin chutianga tih chu awlsam an ti a ni. Engvângin nge? A chhan pakhat chu naupangte leh nu leh pate tân tibuaitu a tlêm vâng a ni. Taiwan rama pa pakhat Masahiko-a chuan a chhan dang tihian a sawi: “Tlânga lâwn, a nih loh leh tuifinriat kama kal ang chi pâwn lama hun kan hman hian kan fate chu an hahdam lehzual a. Chuvângin, an rilrua awm phawrh chhuah leh an ngaihtuahnate hriat chu a awlsam kan ti lehzual,” tiin. A hmaa kan sawi tâk Katya-i chuan: “School bânah ka nuin park mawi takah min hruai ṭhîn a. Chutiang boruak hahdam takah chuan school-a ka thiltawn, a nih loh leh ka lungkhamnate hrilh chu awlsam ka ti lehzual,” tiin a sawi.

16. Engtin nge chhûngkuate’n Jehova thil siamte thlîra hahdamna leh hlimna an neih theih?

¹⁶ Chhûngkuate’n Jehova thil siamte an hlimpui hian, an hahdamin nuam an ti tlâng a, chu chuan inhmangaih tawn lehzual tûrin a ṭanpui ang. Bible chuan “nuih hun a awm” tih leh “ṭah hun a awm” tih a sawi a. (Thur. 3:1, 4.) Jehova chuan kan nuam tih zâwngte kan tih theih nân, he leiah hian hmun mawi tak takte a siam a ni. Chhûngkaw tam tak chuan nungcha humhalhna hmun te, thingtlâng hmun nuam tak te, tlâng te, leh tuifinriat kamtea hun hmanho chu nuam an ti hle a. Naupang ṭhenkhat chuan park-a tlân leh infiam te, ramsa en te, a nih loh leh lui, dîl, leh tuipuia chênte chu nuam an ti hle. Jehova thil siamte hlimpui theihna hun remchâng a va tam tak êm!

17. Engvângin nge nu leh pate’n an fate chu Jehova thil siamte hlimpui tûra an ṭanpui ang?

¹⁷ Pathian khawvêl tharah chuan nu leh pa leh naupangte chuan Jehova thil siamte chu tûn hma zawng aia nasain an hlimpui ang a. Tûn lai hun ang lo takin ramsate kan hlau lo vang a, anni pawhin min hlau hek lo vang. (Is. 11:6-9) Jehova thil siamte chu kumkhuain kan hlimpui tawh ang. (Sâm 22:26) Mahse, nu leh pate u, thil siamte hlimpui tûra in fate ṭanpui nân chu hun lo thlen hun chu nghâk kher suh u. I fate hnêna Jehova chungchâng zirtîr nân thil siamte i hmang a nih chuan, anni chuan Lal Davida’n: “Aw LALPA . . . i thiltihte ang hi thiltih rêng rêng a awm hek lo,” tia a sawi hi an pawmpui ngei a rinawm.—Sâm 86:8.