1, 2. (a) Kristian ṭhalaite chuan Setana leh ramhuaite chu engvângin nge an do hneh theih? (A thupui chunga milem en rawh.) (b) Eng nge kan sawiho vang?

TIRHKOH Paula chuan Kristiante chu sipaite nên a khaikhin a. Indonaah kan awm a, kan hmêlmate chu a tak tak an ni! Mahse, kan dote chu mihringte ni lovin, Setana leh ramhuaite an ni. Anni chu indonaah kum sâng tam tak chhûng an tel tawh avângin indo an thiam hle a. Chuvângin, ṭhalaite kan nih chuan he indona hi hneh theih loh tûr angin a lang mai thei. Chûng hmêlma chak takte chu an do hneh thei ang em? Hneh thei e, an hneh rêng a ni! Engvângin nge? Jehova hnên aṭanga chakna an hmuh avângin. Chu bâkah, ṭha taka inzir sipaite angin, anni chu ‘Pathian râlthuam famkimin an inthuam a,’ indo tûrin an inbuatsaih a ni.—Ephesi 6:10-12 chhiar rawh.

² Paula’n he tehkhin thu a sawi hian Rom sipaite râlthuam chu a ngaihtuah a ni mai thei a. (Tirhkohte 28:16) He thuziakah hian, he tehkhin thu ṭha tak hi kan bih chiang ang.  Ṭhalai ṭhenkhatte hmachhawn harsatnate leh thlarau lam râlthuam famkim an inthuam avânga hlâwkna an neihte chu kan sawiho vang.

3, 4. Engtin nge Bible-a thutak chu Rom sipai kawnghrên nên a inang?

³ Ephesi 6:14 chhiar rawh. Rom sipai kawnghrên chu a kâwng vênhim nâna siam thir phêk a ni a, chu chuan a âwmphaw rit tak chu insawn lo tûrin a tinghet a ni. Kawnghrên ṭhenkhatah chuan ngûnhnâm leh chêmte paina nghet tak a awm a. Kawnghrên chu nghet taka hrên a nih chuan indo tûra a chhuah hunah inrintâwkna a nei thei ang.

⁴ Kawnghrên angin, Pathian Thu aṭanga kan hriat thutak chuan zirtîrna dik lo lakah min vênghim a. (Johana 8:31, 32; 1 Johana 4:1) Pathian Thu aṭanga thutak kan ngainat poh leh Pathian tehnate mila nun, a nih loh leh “âwmphaw” inbel chu kan tân a awlsam lehzual ang. (Sâm 111:7, 8; 1 Johana 5:3) Chu bâkah, chûng thutakte chu kan hriatthiam poh leh kan hmêlmate kan hneh thei lehzual ang.—1 Petera 3:15.

5. Engvângin nge thu dik kan sawi reng ang?

⁵ Pathian Thua thutakte chu kan tân a pawimawh avângin, Bible sawite chu kan zâwmin, thu dik chu englai pawhin kan sawi a ni. Dâwt sawi hi Setana hmanraw ṭangkai tak zînga pakhat a ni a. Dâwt thu chuan a sawitu leh a ringtu chu a tinâ thei a. (Johana 8:44) Chuvângin, ṭha famkim lo ni mah ila, dâwt sawi lo tûrin theih tâwp kan chhuah tûr a ni. (Ephesi 4:25) Chu chu a harsa mai thei. Kum 18 mi Abigail-i chuan: “Thu dik sawi chu a ṭha reng lo mai thei, a bîk takin, dâwtsawinain dinhmun harsa min pumpelhtîr theih hunah a ni lehzual,” tiin a sawi. A nih leh, engvângin nge thu dik sawi reng a tum? “Thu dik ka sawi hian, Jehova hmaah chhia leh ṭha hriatna thiang tak ka nei a. Ka nu leh pa, leh ka ṭhiante rin ka hlawh a ni,” tiin a sawi. Kum 23 mi Victoria-i chuan: “Thu dik i sawi a, i rinnaa i din ngheh chuan hnehchhiah i tâwk mai thei a. Mahse, hlâwkna ṭha tak i hmu reng ang: Mahni inrintâwkna, Jehova nêna inhnaih lehzual nia inhriatna, leh i hmangaihte zahna i dawng ang,” tiin a sawi. ‘Thutaka inhrên’ reng a pawimawh chhan i hmu em?

6, 7. Engvângin nge felna chu âwmphaw nêna khaikhin a nih?

⁶ Rom sipai âwmphaw chu a âwm mil thlapa tihkum, thîr phêka siam a ni ṭhîn a. Chûng thîr phêkte chu savun hrui leh dâr kawma man beh tlat a ni. A dârte pawh chu savuna man beh thîr phêka tuam a ni a. Awmphaw chuan chêt vêl a tihharsat deuh avângin chûng thîr phêkte chu a nih dân tûr anga a awm leh awm loh en dik reng a ngai a ni. Mahse, chu âwmphaw chuan ngûnhnâm leh feiin thinlung  leh taksa pêng dangte a chhun tlang theih loh nân a vênghim a ni!

⁷ Kan “thinlung,” a nih loh leh kan chhûngril nihna vênghimtu Jehova tehna felte chu, chu âwmphaw nêna khaikhin theih a ni. (Thufingte 4:23) Sipai chuan a thîr âwmphaw chu thîr nêm zâwka siam âwmphaw nên a thlâk ngai lo vang. Chutiang bâwkin, thil dik chungchânga Jehova tehnate chu dik nia kan ngaihte nên kan thlâk ngai lo vang. Keini mihringte hi thinlung vênghim tûrin kan fing tâwk lo. (Thufingte 3:5, 6) Chuvângin, kan “âwmphaw” hian kan thinlung a vênhim leh him loh kan enfiah reng tûr a ni.

8. Engvângin nge Jehova tehnate chu kan zawm ang?

⁸ Jehova tehnate chuan i zalênna leh i thil tihduhte tihna a dâl nia i ngaih châng a awm em? Kum 21 mi Daniel-a chuan: “Zirtîrtute leh school kalpuite’n Bible tehnate mila ka nun avângin min nuihzat ṭhîn a. Hun engemaw chhûng chu, inrintâwkna ka hlohvin, ka rilru a hah hle a ni,” tiin a sawi. Mahse, tûnah chuan engtin nge a awm? “A tâwpah chuan, Jehova tehnate mila nun a hlâwkzia ka hmu a. Ka ‘ṭhian’ ṭhenkhatte chuan ruihhlote an hmang ṭan a, ṭhenkhat chu school aṭanga hnawhchhuah an ni. An nun kawng rahchhuahte hmuh chu a nuam lo hle a. Jehova chuan min vênghim tak zet a ni,” tiin a sawi. Kum 15 mi Madiso-i chuan: “Jehova tehnate mila nun leh ka rualpuite ṭha leh nuam tih anga awm ve loh chu harsa ka ti” tiin a sawi. Tichuan, eng nge a tih tâk? “Jehova hming pu ka ni a, chu thlêmna chu Setana min beihna mai a ni tiin ka inhriatnâwntîr a ni. Ka harsatnate ka hneh hian ka awm a nuam sawt ṭhîn,” tiin a sawi.

9-11. (a) Kristiante chuan eng entîr nei pheikhawk nge an bun? (b) Hahdam taka thu hril thei tûrin engin nge min ṭanpui thei?

⁹ Ephesi 6:15 chhiar rawh. Rom sipai chu pheikhawk tel lovin indonaah a kal thei lo. An pheikhawkte chu savun thuah thuma siam a nih avângin a tlo hle a. Bun a nuamin, inrintâwkna neiin an kal thei a, an tawlh thlu thei lo bawk.

¹⁰ Rom sipaite bun pheikhawk chuan indonaah hlawhtling tûrin a ṭanpui a, entîr nei kan pheikhawk chuan “remna chanchin ṭha” puang tûrin min ṭanpui a ni. (Isaia 52:7; Rom 10:15) Mahse, a châng chuan thu hril tûrin huaisenna nasa tak neih a ngai a. Kum 20 mi Bo-a chuan: “Ka school kalpuite hnêna thu hrilh chu ka hlau va. Ka zâm deuh ni hian ka hria. Ka’n thlîr lêt hian chutianga ka lo awm chhan chu ka hre thiam lo. Mahse, tûnah chuan ka rualpuite chu hlim takin thu ka hrilh tawh a ni,” tiin a sawi.

¹¹ Kristian ṭhalai tam tak chuan inbuatsaih lâwk a, thu an hrilh hian nuam an ti lehzual tih an hria a. Inbuatsaih tûrin eng nge i tih theih? Kum 16 mi Julia-i chuan:  “Ka school iptê-ah thu leh hla chhuahte chu ka dah a, ka school kalpuite’n an ngaih dân leh an thurinte an sawi chu ka ngaithla a. Tichuan, anmahni ṭanpui theih dân ka hre thei a ni. Ka inbuatsaih hian, an hlâwkpui ngei tûr thute chu ka hrilh thei a ni,” tiin a sawi. Kum 23 mi Makenzie-i chuan: “Ngilneihna i neih a, ṭha taka i ngaihthlâk ṭhin chuan, i rualpuite harsatna chu i hre thiam thei ang. Ṭhalaite tâna tihchhuah thuziak zawng zawng chu ka chhiar vek a. Chu chuan ka rualpuite ṭanpui theitu tûr Bible-a thute, a nih loh leh jw.org aṭanga thute kawhhmuh tûrin min ṭanpui a ni,” tiin a sawi. Thu hril tûra ṭha taka inbuatsaih chu i ke mil chiah “pheikhawk” bun ang a ni.

12, 13. Setana “thal alh thei” ṭhenkhat chu eng nge ni?

¹² Ephesi 6:16 chhiar rawh. Rom sipai chuan kil li nei indanna phaw a keng a. Chu chuan dar aṭanga khup thleng a khuh a, ngûnhnâm te, fei te, leh thâlte lakah a vênghim a ni.

 ¹³ Eng ‘thal alh theitein’ nge Setana’n a kah theih che? Jehova chungchânga dâwt thu hmangin a do mai thei che a ni. Ani chuan Jehova’n a hmangaih lo che a, tuman an ngaihsak lo che tia ngai tûrin a duh che a ni. Kum 19 mi Ida-i chuan: “Jehova hian min hnaih lo va, ka Ṭhian nih pawh a duh lo ni hian ka hria,” tiin a sawi. Chutianga a inhriat chuan eng nge a tih tâk? “Inkhâwmte hi ka rinna tichaktu ber a ni a. Ka inkhâwm ṭhîn naa, ka chhânnate chu tuman an ngaihthlâk duh ka rin loh avângin chhânna ka pe ngai lo. Mahse, tûnah chuan inkhâwm atân ka inbuatsaih a, chhânna pahnih, thum pêk ka tum a. Harsa chu ka ti a; mahse, chhânna ka pêk chuan nuam ka ti ṭhîn hle a ni. Unaute chuan min tichak hle a. Inkhâwm bân apiangin Jehova’n min hmangaih tih ka hre ṭhîn,” tiin a sawi.

14. Ida-i thiltawn aṭangin eng nge kan zir theih?

¹⁴ Sipai indanna phaw chu a intiat thlap a. Ida-i thiltawn aṭanga kan hriat angin, kan rinna erawh chutiang a ni lo. Kan rinna chu a ṭhang theiin, a kiam thei a, a chak theiin, a chau thei bawk. Duh kan thlang thei a ni. (Matthaia 14:31; 2 Thessalonika 1:3) Kan “rinna phaw” invênhimtîr tûr chuan, kan tihchak a, kan tihngheh a ngai!

15, 16. Engtin nge kan beiseina chu lukhum nên a inang?

¹⁵ Ephesi 6:17 chhiar rawh. Rom sipai chuan a lû, a nghâwng, leh a hmai te vênhim nân lukhum a khum a. Sipaiin kuta a khai theih nân lukhumah chuan khaina awm châng a awm a.

¹⁶ Lukhumin sipai thluak a vênghim angin, kan “chhandam beiseina” chuan kan ngaihtuahna a vênghim a. (1 Thessalonika 5:8; Thufingte 3:21) Beiseina chuan Pathian thutiamte ngaihtuah tlat tûr leh kan harsatnate avânga lunghnual lo tûrin min ṭanpui a ni. (Sâm 27:1, 14; Tirhkohte 24:15) Mahse, kan beiseinain min vênhim kan duh chuan, chu chu kan tân a tak a nih a ngai a. Kan “lukhum” chu kan keng tûr a ni lo va, kan khum tûr a ni!

17, 18. (a) Engtin nge Setana’n kan lukhum phelh tûra min bum theih? (b) Setana bumin kan awm lo tih engtin nge kan lantîr theih?

¹⁷ Engtin nge Setana’n kan lukhum phelh tûra min bum theih? Isua tihtîr a tum chu han ngaihtuah teh. Isua chu mihringte chunga rorêltu tûr a ni tih a hria a. Mahse, ani chu hrehawm tuar a, a thih hmasat phawt a ngai a ni. Chu bâkah, Lal ni tûra Jehova hun ruat a thlen hma chu a nghah a ngai bawk. Chuvângin, Setana chuan rorêltu nih nghâl theihna hun remchâng a pe a ni. Vawi khat chauh chibai a bûk chuan, khawvêl rorêltu a ni nghâl thei tih a tiam a. (Luka 4:5-7) Setana chuan Jehova’n khawvêl tharah thil ṭha tam tak pêk min tiam tih a hre bawk. Mahse, chu thutiam a taka a lo thlen hun chu kan nghah a ngai a, chumi hma chu, buaina tam tak kan hmachhawn thei a ni. Chuvângin, Setana chuan tûna nun nuam tak nei tûrin hun remchâng min pe a. Nuam kan tih zâwngte dah hmasa a, Pathian Ram dah hnuhnûng zâwk tûrin min duh a ni.—Matthaia 6:31-33.

¹⁸ Kristian ṭhalai tam tak chu Setana bumin an awm lo. Entîr nân, kum 20 mi  Kiana-i chuan: “Kan buaina zawng zawng chingfel tûra beiseina awm chhun chu Pathian Ram hi a ni tih ka hria,” tiin a sawi. Engtin nge a beiseina chuan a ngaihtuahna leh a nun a nghawng? He khawvêla thilte chu rei lote tân chauh a ni tih hre tûrin a ṭanpui a. A theihna zawng zawng he khawvêla hman ral aiin, a hun leh thate chu Jehova rawngbâwlnaah a hmang zâwk a ni.

19, 20. Pathian Thu hmannaah engtin nge thiamna kan tihhmasâwn theih?

¹⁹ Rom sipaite chuan centimeter 50 (inchi 20) vêla sei ngûnhnâm chu an hmang a. Ni tin a hman dân an zir ṭhin avângin a hmang thiam hle a ni.

²⁰ Tirhkoh Paula chuan Pathian Thu chu ngûnhnâm ang a ni tih a sawi a. Jehova’n chu ngûnhnâm chu min pe a ni. Mahse, chu ngûnhnâm chu kan rinna vênhim nân leh kan ngaihtuah dânte siam ṭhat nân thiam taka hman dân kan zir tûr a ni. (2 Korinth 10:4, 5; 2 Timothea 2:15) Engtin nge kan thiamna kan tihhmasâwn theih? Kum 21 mi Sebastian-a chuan: “Bible ka chhiar a piangin bung khat chhûnga châng khat tal hi ka ziah chhuak a. Ka châng duh berte chu ka la khâwm ṭhîn,” tiin a sawi. Chu chuan Jehova ngaihtuah dân hre thiam tûrin a ṭanpui a ni. Daniel-a chuan: “Bible ka chhiar hian, rawngbâwlna biala mite tâna ṭha tûra ka ngaih Bible chângte chu ka thlang a. Mite chuan Bible i ngaina tak zet tih leh ṭanpui i duh tak zet tih an hriat chuan ṭha takin an chhâng lêt ṭhîn tih ka hmu a ni,” tiin a sawi.

21. Setana leh ramhuaite chu engvângin nge kan hlauh loh ang?

²¹ He thuziaka ṭhalaite thiltawn aṭanga kan hriat angin, Setana leh ramhuaite chu kan hlauh an ngai lo va. Thil an ti thei tih chu a dik ngei mai; mahse, Jehova aiin thil an ti thei lo a ni. Chu bâkah, anni chu chatuanin an nung lo vang. Phuar beh an ni ang a, Krista Kum Sang Rorêl chhûngin tumah an ti na thei lo vang a, a hnuah, tihboral an ni ang. (Thu Puan 20:1-3, 7-10) Kan hmêlma, a bumnate, leh a thiltum chu kan hria a. Jehova ṭanpuinain, kan ding nghet tlat thei a ni!