Jehova Chuan ‘Chhel Taka Rah Ṭhînte’ Chu A Hmangaih
“Lei ṭhaa mi erawh chu hêng mi hi an ni; . . . chhel takin an rah ṭhîn.”—LUKA 8:15.
HLA: 44, 10
1, 2. (a) Mi tam tak ngaihthlâk duh lohna biala, thu hril zawm zêl unaute avângin engtin nge kan chak theih? (A thupui chunga milem en rawh.) (b) Isua’n “ama khaw” lama thu hrilhna chungchâng eng nge a sawi? (Footnote en rawh.)
SERGIO-A LEH OLINDA-I te nupa chu United States-ah pioneer niin rawng an bâwl a. An nupa chuan kum 80 an pêl tawh a. An chak tawh loh avângin an tân kea kal pawh a harsa a. Mahse, kum tam tak chhûng an lo tih ṭhin angin, zîng dâr sarihah an khuaa mite veivah tamna hmunah kein an kal a. Bus chawlhna hmunah dingin, kawnga kalte chu kan thu leh hla chhuahte an pe ṭhîn a ni. Mi tam zâwkin ngaihven lo mah se, Sergio-a leh Olinda-i te chuan an dinna ngaia ding rengin, anmahni entute chu nui hmêl an hmuh a. Chhûn a lo thlen chuan zawi muanga kalin an haw leh a. A tûk zîng dâr sarihah, chu bus chawlhna hmun vêkah chuan an kal leh a. Kum tluanin, chawlhkâr khatah ni ruk chhûng chu zîng tin thu hrilin an kal ṭhîn a ni.
* (Footnote en rawh.) I entawn tûr siam chuan unau tam tak leh thiltawn ngah unaute pawh a tichak a ni. Bial kantu ṭhenkhatin: “Chûng unau rinawmte nêna rawng kan bâwl tlân hian, an entawn tûr siamte chuan min tichak ni hian ka hria.” “An rinawmna chuan ka rawngbâwlnaah beidawng lo tûr leh huaisen tûrin min tichak a ni.” “An entawn tûr siam chuan ka thinlung a khawih tak zet a ni,” tia an sawite chu lo chhinchhiah ang che.
2 Mi tam zâwkin ngaithla duh lo mah se, Sergio-a leh Olinda-i te anga an awmna biala kum tam tak chhûng thu lo hril tawh mi rinawm unau tam tak an awm a. Chutiang thu hrilhna bialah chuan thu i hril ve mai thei a ni. Chutiang a nih chuan, harsa tak chung pawha chhel taka thu i hrilh zawm zêl avângin kan fak a che.3. Eng zawhna pathumte nge kan ngaihtuah ang a, engvângin nge?
3 He thuziakah hian hêng zawhna pathum: Engvângin nge lunghnual châng kan neih mai theih? Rah tih awmzia chu eng nge ni? Engin nge chhel taka rah ṭhîn tûrin min ṭanpui ang? tihte hi chhân a ni ang. Hêng zawhnate chhânna hriatnain Isua min pêk thu hrilh rawngbâwlna chu thawk zawm zêl tûrin min tichak ang.
ENGVANGA LUNGHNUAL MAI THEI NGE KAN NIH?
4. (a) Juda mi tam zâwkte’n ṭha lo taka an chhân lêtna chu Paula’n engtin nge a ngaih? (b) Engvângin nge Paula’n chutianga a ngaih?
4 I thu hrilh rawngbâwlna biala mite’n Lalram thuchah an ngaihthlâk duh loh avângin i lunghnual ṭhîn tawh em? Chutiang a nih chuan, tirhkoh Paula rilru awm dân tûr chu i hre thiam ngei ang. Kum 30 aia tam thu a hril tawh a, Kristian ni tûrin mi tam tak a ṭanpui a ni. (Tirhkohte 14:21; 2 Korinth 3:2, 3) Mahse, Juda tam tak chu Kristian ni tûrin a ṭanpui thei lo. Mi tam zâwkte chuan Paula thusawi chu an ngaithla duh lo va, ṭhenkhat chuan an tiduhdah hial zâwk a ni. (Tirhkohte 14:19; 17:1, 4, 5, 13) Chutianga chhân lêtna ṭha lo tak chu Paula’n engtin nge a ngaih? “Ka thinlungah hian hrehawmna nasa tak leh lungngaihna reh thei lo ka pai asin,” tiin a sawi. (Rom 9:1-3) Engvângin nge chutianga a ngaih? Thu hrilhna chu a ngainain, mite a hmangaih tak zet vâng a ni. Paula chuan Juda mite chu a ngaihsak tak zet a, Pathian zahngaihna an hnâwl avângin a rilru a na hle a ni.
5. (a) Thu hril tûrin engin nge min chêttîr? (b) Engvângin nge lunghnual châng neih chu thil pângngai tak a nih?
5 Paula ang bawkin, mite kan ngaihsak vâng leh kan ṭanpui duh vângin thu kan hril a. (Matthaia 22:39; 1 Korinth 11:1) Jehova rawngbâwlna chu nun kawng ṭha ber a ni tih kan thiltawn aṭangin kan hria a ni. Nun kawng ṭha lehzual an neih theih dân hre tûra mite ṭanpui chu kan va duh tak êm! Chuvângin, Jehova leh mihringte tâna a thutiamte chungchânga thutak hre tûrin mite chu kan fuih reng a ni. Chu chu an hnêna thilpêk ṭha tak pe tûra kal a: ‘Khawngaihin hei hi pawm rawh,’ tia ngên ang kan ni. Chu thilpêk an hnâwl chuan Paula anga, ‘thinlungah hrehawm’ kan ti hi thil pângngai tak a ni a. Chutianga hrehawm kan ti chu rinna kan tlâkchham vâng ni lovin, mite kan hmangaih tak zet vâng a ni. Lunghnual châng kan neih pawhin thu kan hril zawm zêl a. Kum 25 aia tam pioneer nia rawngbâwl Elena-i’n: “Thu hrilh rawngbâwl chu harsa ka ti. Mahse, hei aia thawh duh hna dang ka nei chuang lo,” tia a sawi chu kan pawmpui ngei ang.
RAH TIH AWMZIA CHU ENG NGE NI?
6. Tûnah eng zawhna nge kan chhân ang?
6 Kan thu hrilhna hmun chu eng ang pawh ni se, rawngbâwlnaah kan hlawhtling thei tih engvângin nge kan chian theih? Chu zawhna pawimawh tak chhâng tûrin, “rah” a ṭûl chhan a sawi laia Isua tehkhin thu pahnihte chu i lo enho vang u. (Matthaia 13:23) Tehkhin thu pakhatna chu grêp hrui chungchâng a ni.
7. (a) Isua tehkhin thua “huan enkawltu,” “grêp hrui,” leh “a pêngte” chuan tute nge an entîr? (b) Kan la chhân tûr zawhna chu eng nge ni?
7 Johana 15:1-5, 8 chhiar rawh. He tehkhin thuah hian Isua chuan Jehova chu “huan enkawltu,” amah chu “grêp hrui,” a zirtîrte chu “a pêngte” tiin a hrihfiah a. * (Footnote en rawh.) Chu bâkah, a tirhkohte hnênah: “He mi avângin ka Pa chu chawimawiin a awm ṭhîn, tam taka in rah hian; chutichuan ka zirtîrte in ni ang,” tiin a hrilh a. A nih leh, rah tih awmzia chu eng nge ni? He tehkhin thuah hian Isua chuan chu rah chu eng nge a nih chiang takin a sawi lo va; mahse, chu zawhna chhânna chu min sawi hmâwr hmuh a ni.
8. (a) Isua tehkhin thua “rah” tih chu engvângin nge zirtîr thar siamna a nih theih loh? (b) Jehova’n ti tûra min phût apiang chu engvângin nge thil dik a nih?
8 Isua chuan a Pa chungchâng heti hian a sawi a: “Ka zawmpui pêng rah lo apiang a paih ṭhîn a,” tiin. Thu danga sawi chuan, kan rah chauhvin Jehova chhiahhlawh kan ni thei a ni. (Matthaia 13:23; 21:43) Chuvângin, he tehkhin thuah hian, rah tih chu zirtîr thar siamna a ni thei lo. (Matthaia 28:19) Chutiang a nih chuan, Isua zirtîr ni tûra tuemaw ṭanpui thei lo Thuhretu rinawmte chu pêng rah lote ang an ni ang. Mahse, chu chu thil dik a ni thei lo! Engvângin nge? Mite chu zirtîr ni tûrin kan tihluih theih loh vâng a ni. Jehova chu hmangaihna a ni a. Kan tih theih loh thilte ti tûrin min phût ngai lo. Kan tih theihte chauh ti tûrin min phût a ni.—Deuteronomy 30:11-14.
9. (a) Engtin nge kan rah theih? (b) Eng tehkhin thu nge kan sawiho vang?
9 A nih leh, rah tih awmzia chu eng nge ni? Chu chu kan vaia kan tih theih thil engemaw a ni tûr a ni. Jehova chuan a chhiahhlawh zawng zawngte hnênah eng hna nge a pêk? Pathian Ram chanchin ṭha hrilh hi a ni. * (Footnote en rawh.) (Matthaia 24:14) Chu chu Isua sawi buh chi thehtu tehkhin thuah a chiang a ni. Chu tehkhin thu chu i lo sawiho vang u.
10. (a) Isua tehkhin thua bu chi leh lei chu eng nge ni? (b) Buh kûng khatin eng angin nge rah a chhuah?
10 Luka 8:5-8, 11-15 chhiar rawh. Buh chi thehtu tehkhin thuah chuan, Isua’n buh chi chu “Pathian thu,” a nih loh leh Pathian Ram chungchâng thuchah a ni tih a sawi a. Lei chu mite thinlung a ni a. Lei ṭhaa tla buh chi chu zung a kaih a, a lo ṭo va, a kûng a lo ni ta a ni. Tichuan, “a leh zain a rah ta a.” Chu buh kûng chuan eng angin nge rah a chhuah ang? Tlêmtê em ni? Ni lo ve, buh chite a rah chhuak a, a hnuah a lo ṭhang lian a, buh kûngte an rawn ni ta a ni. He tehkhin thuah hian, buh chi fang khatin a leh zain a tichhuak a. Hei hian kan rawngbâwlna chungchâng eng nge min zirtîr?
Engtin nge ‘chhel taka kan rah’? (Paragraph 11-na en rawh)
11. (a) Buh chi thehtu tehkhin thu chuan kan rawngbâwlna chungchâng eng nge min zirtîr? (b) Engtin nge buh chi thar kan tihchhuah?
11 Kan Kristian nu leh pate emaw, Thuhretu zînga mi dangin emaw Pathian Ram chanchin min zirtîr hmasak ber khân, lei ṭhaah bu chi an theh ang a ni a. Thuchah kan pawm tih an hmuh chuan an hlim hle a ni. Chu buh chi chu zawi zawiin a lo ṭhang chho va, tichuan, rah a chhuah ta a. A hmaa kan sawi tâk buh kûngin buh kûng thar ni lovin, buh chi thar a tichhuak angin, keini pawh zirtîr thar ni lovin, buh chi thar kan tichhuak a ni. * (Footnote en rawh.) Chu chu engtin nge kan tih? Mite hnêna Pathian Ram chanchin kan hrilh apiang hian kan thinlunga theh buh chi chu kan tipungin, kan theh darh ang a ni. (Luka 6:45; 8:1) Chuvângin, Pathian Ram chungchâng thuchah kan hrilh chhûng chu ‘chhel taka rah ṭhîn’ kan ni.
12. (a) Isua sawi grêp hrui leh buh chi thehtu tehkhin thu aṭangin eng nge kan zir? (b) Chu kan thil zir avâng chuan engtin nge i awm?
12 Isua sawi grêp hrui leh buh chi thehtu tehkhin thu aṭangin eng nge kan zir? “Rah” tih chu mite’n thuchah an ngaihthlâk leh thlâk lohvah a innghat lo tih kan hria a. Thu hrilhnaa kan tel zawm zêlnaah a innghat zâwk a ni. Chutiang bawk chuan, Paula pawhin: “Anmahni thawh rim ang zêlin mahni lâwmman an hmu ve ve ang,” tiin a sawi a ni. (1 Korinth 3:8) Jehova chuan kan hnathawh rah chhuahte avâng ni lovin, kan thawh rimna avângin lâwmman min pe ang. Kum 20 lai pioneer lo thawk tawh Matilda-i chuan, “Jehova’n kan thawh rimnaah lâwmman min pe tih hriatna chuan min tihlim a ni,” tiin a sawi.
ENGTIN NGE CHHEL TAKA KAN RAH THEIH?
13, 14. Rom 10:1, 2-a sawi angin, Paula’n thu hrilhna a bânsan loh chhan chu eng nge ni?
13 Engin nge ‘chhel taka rah’ tûrin min ṭanpui ang? Paula entawn tûr siam chu i lo bih chiang ang u. Judate’n Lalram thuchah Rom 10:1, 2) A nih leh, engvângin nge Paula’n thu a hril zawm zêl?
an hnâwl avângin Paula chu a beidawng hle tih kan hria a. Mahse, an hnêna thu hrilh chu a bânsan ngai lo. Chûng Juda mite chunga a rilru put hmang chu heti hian a sawi a ni: “Ka thinlung duhzâwng leh anni tâna Pathian hnêna ka ṭawngṭaina chhan ber hi chhandama an lo awm theihna tûr a ni. Pathian lamah ṭhahnem an ngai tih ka hriatpui a ni, hre famkim ang erawh chuan an ngai lo,” tiin. (14 Pakhatnaah, Paula chuan ‘a thinlung duhzâwng’ avânga Judate hnêna thu hril tûra chêttîr a nih thu a sawi a. Anni chu chhandam ni tûrin a duh tak zet a ni. (Rom 11:13, 14) Pahnihnaah, ‘an tân Pathian hnênah a ṭawngṭai’ a. Juda mite’n Lalram thuchah an pawm theih nân Jehova hnênah a ngensak a ni. Pathumnaah, “Pathian lamah ṭhahnem an ngai” tih a sawi bawk. Paula chuan mite ṭhatna lai a en a, Jehova rawngbâwl theitu tûr niin a thlîr a. Chûng Juda mi ṭhahnemngai takte chu amah angin Krista zirtîr ṭhahnemngai takte an ni thei tih a hria a ni.
15. Engtin nge Paula kan entawn theih? Entîrnate pe rawh.
15 Engtin nge Paula kan entawn theih? Pakhatnaah, “chatuana nung tûra ruat” apiangte chu hmuh kan duh tak zet tûr a ni a. Pahnihnaah, mi rilru ṭhate hnêna thu kan hrilh hunah ngaihthlâk duhna nei tûrin Jehova hnênah kan dîlsak tûr a ni. Tirhkohte 13:48; 16:14) Chutiang chuan kum 30 dâwn lai pioneer lo thawk tawh Silvana-i’n a ti a. Ani chuan: “Rawngbâwlna biala ka kal chhuah hmain rilru put hmang ṭha nei tûrin Jehova hnênah ka ṭawngṭai,” tiin a sawi. Ngaithla duhtute hmu tûra kan zawnnaah vântirhkohte ṭanpuina kan dîl bawk. (Matthaia 10:11-13; Thu Puan 14:6) Kum 30 chuang pioneer lo thawk tawh Robert-a chuan: “In neitute nuna thil thlen dân hretu vântirhkohte thawhpui chu a phûrawm hle,” tih a sawi. Pathumnaah, mite ṭhatna lai enin, Jehova rawngbâwltu ni thei tûr anga hmuh kan tum a ni. Baptisma a channa kum 50 chuang tawh kohhran upa Carl-a chuan: “Mite’n thinlung ṭha an nei tih hriat theihna—nui hmêl, mit meng, leh hriat duhna nei taka an zawhnate ang—thil tê thamte chu hmuh ka tum a ni,” tiin a sawi. Chutianga kan tih chuan Paula angin, ‘chhel taka rah ṭhînte,’ kan ni thei ang.
(“I KUT SUM SUH”
16, 17. (a) Thuhriltu 11:6 aṭangin eng nge kan zir theih? (b) Engtin nge kan thu hrilhna chuan min lo hmutute chu a nghawng theih?
16 Ngaithla duhtu awm lo angin lang mah se, kan thu hrilhnain mite a nghawng theih dân chu kan theihnghilh ngai tûr a ni lo. (Thuhriltu 11:6 chhiar rawh.) Mite chuan min en reng a. Fel fai taka kan inthuam dânte leh hawihhâwm tak leh nêlawm tak kan ni tihte an hria a ni. Chu chuan an rilru a khawih mai thei a, a hnuah, kan chungchâng dik lo taka ngaihtuahtute meuh pawhin a ṭha zâwngin an ngaihtuah ṭan thei a. Chu mi dikzia chu Sergio-a leh Olinda-i te’n an hmu a ni.
17 Sergio-a chuan: “Dam lohna avângin Bus chawlhna hmunah hun rei tak chhûng kan kal thei ta lo va. Kan kal leh chuan, mite’n ‘Enga ti nge, in va reh ve? In ngaihawm hle mai,’” tiin min zâwt a. Olinda-i chuan nui chung hian: “Bus driver-te chuan an kut an rawn vai a, driver ṭhenkhat chuan, ring takin ‘In ti ṭha e!’ an ti a. Kan magazine-te min dîl bawk,” tiin a sawi belh a ni. Nawrlirh hmanga thu an hrilhna hmunah pa pakhat chu lo kalin pangpâr mawi tak a rawn pe a, an rawngbâwlna avânga lâwm thu a sawi chu Sergio-a leh Olinda-i te chuan mak an ti hle a ni.
18. Engvângin nge ‘chhel taka rah’ i tum tlat ang?
18 Mi dangte hnêna Pathian Ram chungchâng hrilhnaah “i kut sûm suh,’ chutianga i tih chhûng chuan ‘hnam zawng zawng hriattîrnaah’ chanvo pawimawh tak i nei a ni. (Matthaia 24:14) A pawimawh ber chu Jehova i tilâwm tih i hriatna aṭanga hlimna nasa tak i nei thei hi a ni. Ani chuan ‘chhel taka rah ṭhînte’ chu a hmangaih hle!
^ par. 2 Isua ngei pawhin “ama khaw” lama thu hrilh chu a harsa tih a sawi a. Chu chu a rawngbâwlna chungchâng ziakna paliah chhinchhiah a ni.—Matthaia 13:57; Marka 6:4; Luka 4:24; Johana 4:44.
^ par. 7 He tehkhin thua a pêngte tih hi vâna kal tûr Kristiante sawina ni mah se, hetah hian Pathian chhiahhlawh zawng zawngte tân zir tûr a awm a ni.
^ par. 9 “Rah” tih ṭawngkam chuan “thlarau rah” rah chhuak tih pawh a kâwk thei bawk. Mahse, he thuziakah leh a dawta thuziakah chuan “a hming ṭanna hmuite rah,” a nih loh leh Pathian Ram chanchin hrilhna lam sawiho a ni ang.—Galatia 5:22, 23; Hebrai 13:15.
^ par. 11 Hun dangah, Isua chuan bu chi theh leh buh seng entîrnate chu zirtîr siam rawngbâwlna nên a tehkhin a ni.—Matthaia 9:37; Johana 4:35-38.