‘Tam Taka Kan Rah’ A Ngaih Chhan
“He mi avângin ka Pa chu chawimawiin a awm ṭhîn, tam taka in rah hian; chutichuan ka zirtîrte in ni ang.”—JOHANA 15:8.
1, 2. (a) Isua’n a thih hma zânah a zirtîrte chu eng nge a sawipui? (A thupui chunga milem en rawh.) (b) Thu kan hrilh chhan hriat reng chu engvângin nge kan tân a pawimawh? (c) Eng nge kan sawiho vang?
ISUA chuan a thih hma zân khân a tirhkohte chu rei tak a bia a. A hmangaih tak zet tih a hriattîr a ni. Thuziak hmasaa kan zir tâk grêp hrui tehkhin thu pawh a hrilh bawk. A zirtîrte chu Lalram thuchah puanchhuahnaah chhêlna nei a, ‘tam taka rah’ tûra tihchak a duh a ni.—Johana 15:8.
2 Mahse, Isua chuan a zirtîrte chu an thil tih tûrte chauh ni lovin, an tih a ngaih chhan pawh a hrilh bawk. Thu an hrilh chhunzawm zêl a ngaih chhante a hrilh a. Thu kan hrilh zawm zêl a ngaih chhan hriat reng chu kan tân thil pawimawh tak a ni. Chu mi ngaihtuahna chuan “hnam zawng zawng hriattîrna” thu kan hrilhnaah chhêlna min neihtîr ang. (Matthaia 24:13, 14) He thuziakah hian, Bible aṭanga thu kan hrilh a ngaih chhan pali kan sawiho vang a. Rah reng thei tûra min ṭanpuitu Jehova hnên aṭanga kan dawn thilpêk palite kan sawiho bawk ang.
JEHOVA KAN CHAWIMAWI
3. (a) Johana 15:8 sawi angin, kan thu hrilh chhan ber chu eng nge ni? (b) Isua tehkhin thua grêp rahte chuan eng nge a entîr a, engvângin nge chu khaikhinna chu thil inâwm tak a nih?
3 Thu kan hrilh chhan ber chu Jehova chawimawi a, a hming tihthianghlim kan duh vâng a ni a. (Johana 15:1, 8 chhiar rawh.) Isua’n grêp hrui tehkhin thu a sawi khân, Jehova chu grêp huan neitu, a nih loh leh enkawltu nên a khaikhin a ni. Ani chu grêp hrui a ni a, a hnungzuitute chu a pêngte an ni tih a sawi bawk. (Johana 15:5) Chuvângin, tehkhin thua grêp rah chuan Isua zirtîrte rah, a nih loh leh an thu hrilh rawngbâwlna a entîr a ni. A tirhkohte hnênah: “He mi avângin ka Pa chu chawimawiin a awm ṭhîn, tam taka in rah hian,” tiin a hrilh a. Grêp hruiin rah ṭha a chhuah chuan huan neitu chu chawimawiin a awm a. Chutiang bawkin, Lalram thuchah puang tûra theih tâwp kan chhuah hian Jehova ropuina leh chawimawina kan thlen a ni.—Matthaia 25:20-23.
Lalram chanchin hril tûra theih tâwp kan chhuah hian, Jehova kan chawimawi a ni
4. (a) Engtin nge Pathian hming kan tihthianghlim theih? (b) Pathian hming tithianghlim tûra i neih chanvo chu engtin nge i thlîr?
4 Pathian hming chu a thianghlim sa tawh a. Thianghlim lehzual tûrin engmah tih theih kan nei lo. A nih leh, engtin nge thu kan hrilh hunah Pathian hming kan tihthianghlim theih? Zâwlnei Isaia’n: “Sipaihote LALPA, amah ngei chu in tithianghlim tûr a ni,” tia a sawi hi chhinchhiah ang che. (Isaia 8:13) Pathian Jehova hming chu, hming dang zawng zawng aia chungnung bera kan thlîr a, a zahawmzia hre thiam tûra mi dangte kan ṭanpui hian kan tithianghlim a ni. (Matthaia 6:9.) Entîr nân, Jehova mize duhawm takte leh Paradis-a chatuana nung tûra mihringte tâna a thiltum chungchâng thutak mite kan zirtîr hian, Setana puhna zawng zawng chu dâwt a ni tih hre thiam tûrin kan ṭanpui a ni. (Genesis 3:1-5) Jehova chu ‘ropuina te, chawimawina te, thiltihtheihna te hmu tlâk’ a nihzia hre tûra mi dangte kan ṭanpui hian, Pathian hming kan tithianghlim tihna a ni bawk. (Thu Puan 4:10-11) Kum 16 lai pioneer lo thawk tawh Rune-a chuan: “Lei leh vân Siamtu tâna thuhretu pakhat ka ni thei tih ka inhriat avângin ka lâwm tak zet a. Chu chuan, thu hrilh zawm zêl duhna min neihtîr a ni,” tiin a sawi.
JEHOVA LEH A FAPA KAN HMANGAIH
5. (a) Johana 15:9, 10-ah thu hrilh a ngaih chhan eng nge kan hmuh? (b) Engtin nge Isua’n a zirtîrte chu chhelna an mamawh dâwn tih hre thiam tûra a ṭanpui?
5 Johana 15:9, 10 chhiar rawh. Lalram thuchah kan hrilh chhan a pahnihna chu Jehova leh Isua kan hmangaih vâng a ni. (Marka 12:30; Johana 14:15) Isua chuan a zirtîrte chu ‘a hmangaihnaa awm reng’ tûrin a hrilh a. Chu chu engvângin nge a sawi? A hnungzuitute chuan Kristian dikte nia nung tûrin chhelna an mamawh dâwn tih a hriat vâng a ni. Johana 15:4-10-ah Isua chuan a zirtîrte’n chhelna an mamawh dâwn tih hre thiam tûrin “awm reng” tih thu mal chu vawi tam tak a hmang tih kan hmu a ni.
6. Krista hmangaihnaa awm reng kan duh tih engtin nge kan lantîr?
6 Krista hmangaihnaa awm reng leh a pawm hlawh nih reng kan duh tih engtin nge kan lantîr? A thu kan âwihna hmangin a ni. Isua chuan amah ngeiin a tihte chauh ti tûrin min hrilh a. “Keiin ka Pa thupêkte ka zâwm a, a hmangaihin ka awm reng ang bawk hian,” tiin a sawi. Kan tân entawn tûr ṭha a siam a ni.—Johana 13:15.
7. Engtin nge thuâwihna leh hmangaihna a inzawm?
7 Isua’n: “Tupawh ka thupêkte neia zâwm chu mi hmangaihtu a ni,” tia a sawi khân thuâwihna leh hmangaihnain inzawmna a nei tih fiah takin a sawi a. (Johana 14:21) A thupêk chu a Pa hnên aṭanga lo kal a nih avângin, thu hril tûra a thupêk kan zawm hian Jehova kan hmangaih tih kan lantîr bawk a ni. (Matthaia 17:5; Johana 8:28) Chu bâkah, Jehova leh Isua kan hmangaihzia kan lantîr chuan an hmangaihnaah kan awm reng ang.
MITE KAN VAUKHAN
8, 9. (a) Thu kan hrilh chhan dang leh chu eng nge? (b) Ezekiela 3:18, 19 leh 18:23-a Jehova thute hian thu hril zawm zêl tûrin engtin nge min chêttîr?
8 Thu kan hrilh chhan a pathumna chu, lo thleng tûr Jehova nî chungchâng mi dangte vaukhân kan duh vâng a ni. Bible chuan, Nova chu “thu hriltu” tiin a sawi a. (2 Petera 2:5 chhiar rawh.) Tuilêt hmaa mite hnêna Nova hrilh thuchahah chuan chhiatna lo thleng tûr vaukhânna a tel ngei ang. Engvângin nge chutianga kan sawi theih? Isua ngeiin: “Chûng nî tuilêt hmate chuan Nova lawnga a luh nî thlengin an eiin an bâr a, nupui pasal an innei ṭhîn; tui a lo lêt a, an zaa a lâk bo vek hma loh chuan engmah an hre lo va; Mihring Fapa lo kal lehna chu chutiang bawk a ni ang,” tia a sawi vâng a ni. (Matthaia 24:38, 39) Mite’n ngaihsak lo mah se, Nova chuan Jehova pêk vaukhânna thuchah chu rinawm takin a puang a ni.
9 Tûn laiah, Pathianin mihringte tâna a tihsak tûrte chu mite’n an hriat theih nân Lalram thuchah kan puang a. Jehova angin, keini pawhin mite’n kan thuchah ken an ngaihsak a, “nunna” an neih chu kan duh tak zet a ni. (Ezekiela 18:23) In tinah leh vântlâng hmuna thu kan hrilh hian, Pathian Ram a lo thleng dâwn a, he khawvêl suaksual tak hi a tiboral dâwn tih mi a tam thei ang berte hnênah kan vaukhân tihna a ni.—Ezekiela 3:18, 19; Daniela 2:44; Thu Puan 14:6, 7.
MITE KAN HMANGAIH
10. (a) Matthaia 22:39-ah thu hrilhna tûr chhan eng nge târ lan a nih? (b) Philippi khuaa tân in vêngtu chu Paula leh Sila’n engtin nge an ṭanpui?
10 Thu kan hrilh reng chhan a palina chu mite kan hmangaih vâng a ni a. (Matthaia 22:39) Mite dinhmun a inthlâk hian an rilru pawh a inthlâk thei tih kan hriat avângin chu hmangaihna chuan thu hril zawm zêl tûrin min ṭanpui a ni. Entîr nân, dodâltute’n Paula leh Sila chu Philippi khuaa tân inah an khung a. Mahse, zan laia lîr nghîng chuan tân in chu a sawi nghîng a, kawngkhârte chu a inhawng ta a ni. Tân in vêngtu chuan tângte chu tlân chhuak vêka a ngaih avângin a hlau lutuk chu intihhlum a tum a. Mahse, Paula’n ring takin: “Engmah intih suh,” tiin a khap a ni. Vêngtu chuan: “Chhandama awm tûrin eng nge ka tih tûr?” tiin a zâwt a. Paula leh Sila’n: “Lalpa Isua ring la, tichuan chhandamin i awm ang,” tiin an hrilh a ni.—Tirhkohte 16:25-34.
Jehova, Isua, leh mite kan hmangaih avângin thu kan hril (Paragraph 5, 10-na en rawh)
11, 12. (a) Tân in vêngtu chungchânga thuziak chuan kan rawngbâwlna chungchâng eng nge min zirtîr? (b) Engvângin nge thu hrilh zawm zêl chu kan duh?
11 Tân in vêngtu chungchânga thuziak chuan thu hrilh rawngbâwlna chungchâng eng nge min zirtîr? Lîrnghîn hnuah chauh tân in vêngtuin a rilru put hmang a thlâkin, ṭanpuina a dîl tih chhinchhiah ang che. Chutiang bawkin, Bible thu chah ngaithla duh lotu mi ṭhenkhatte pawh an nunah thil râpthlâk takte a thlen hian an rilru put hmang chu thlâkin, ṭanpuina an zawng mai thei a ni. Entîr nân, ṭhenkhat chu hna chânna emaw, nupa inṭhenna emaw avângin an hlauthâwng mai thei a. Mi dang lehte chu natna khirh tak an nei tih an hriat chhuah emaw, an chhûngte thihna emaw avângin an lunghnual mai thei bawk. Chutiang thilte a thlen hunah, mite chuan nunna chungchânga zawhnate leh tûn hmaa an ngaihtuah ngai loh zawhnate an zâwt ṭan thei a ni. ‘Chhandam ni tûrin eng nge ka tih ang?’ tiin an ngaihtuah pawh a ni thei. Beiseina thuchah kan sawi chu a vawi khatna atân ngaihthlâk an duh thei a ni.
12 Chuvângin, rinawm taka thu kan hrilh zawm zêl chuan, mite’n kan thlamuanna ken pawm an duh hunah ṭanpui tûrin kan inpeih reng tihna a ni ang. (Isaia 61:1) Pioneer a thawhna kum 38 lai ni tawh Charlotte-i chuan: “Tûn laia mite chu kawng bo ang an ni a. Chanchin ṭha an hriat a ngai a ni,” tiin a sawi. Kum 34 chuang pioneer lo thawk tawh Ejvor-i chuan: “Tûn laia mite chu tûn hma zawng aiin an beidawng a. Ṭanpui ka duh tak zet a. Chu chuan thu hril tûrin min chêttîr a ni,” tiin a sawi. Mite kan hmangaihna chu thu hrilh zawm zêlna tûr chhan ṭha tak a ni tih a chiang hle!
CHHEL TURA MIN ṬANPUITU THILPEKTE
13, 14. (a) Johana 15:11-ah eng thilpêk nge târ lan a nih? (b) Engtin nge Isua neih ang lâwmna chu kan neih theih? (c) Engtin nge lâwmna chuan kan rawngbâwlnaah min ṭanpui?
13 A thih hma zân khân, Isua chuan a tirhkohte chu rah chhuak reng tûra ṭanpuitu tûr thilpêkte a hrilh a. Chûng thilpêkte chu eng nge ni a, chu chuan tûn laiah engtin nge min ṭanpui theih?
Johana 15:11 chhiar rawh.) Chu chu engtin nge a nih theih? Isua’n a tehkhin thu sawiah, ani chu grêp hrui, a zirtîrte chu a pêngte nên a khaikhin kha hre reng ang che. Grêp pêngte chu a hrui nên a inzawm chauhvin an mamawh tui leh chaw ṭha an dawng a ni. Chutiang bawkin, Isua nên kan inzawm a, a hniak kan zui chauhvin amah angin kan lâwm ve thei ang a. Tichuan, Isua neih ang, Pathian duhzâwng tihna aṭanga neih theih lâwmna chu kan nei ang. (Johana 4:34; 17:13; 1 Petera 2:21) Pioneer a thawhna kum 40 chuang ni tawh Hanne-i chuan: “Rawngbâwl zawha ka neih lâwmna chuan Jehova rawngbâwlnaa tel chhunzawm zêl tûrin min tichak a ni,” tiin a sawi. Lâwmna chuan mi tam zâwkin an ngaihthlâk duh loh hunah pawh thu hril zawm zêl tûrin chakna min pe ang.—Matthaia 5:10-12.
14 Lâwmna thilpêk. Thu hrilh hi kan tân phurrit a ni em? Ni lo ve. Grêp hrui tehkhin thu a sawi hnuah, Isua chuan thu kan hrilh hian a lâwmna kan nei ang tih a sawi a. (15. (a) Johana 14:27-ah eng thilpêk nge târ lan a nih? (b) Engtin nge thlamuanna chuan rah chhuak reng tûra min ṭanpui?
15 Thlamuanna thilpêk. (Johana 14:27 chhiar rawh.) A thih hma tlaiah, Isua chuan a tirhkohte chu: “Keima thlamuanna ka pe a che u,” tiin a hrilh a. Engtin nge Isua thlamuanna chuan thu hril zawm zêl tûra min ṭanpui theih? Thu kan hrilh reng hian, Jehova leh Isua kan tihlim tih kan hriat avângin thlamuanna kan nei a ni. (Sâm 149:4; Rom 5:3, 4; Kolossa 3:15) Kum 40 lai pioneer lo thawk tawh Ulf-a chuan: “Thu hrilh rawngbâwlna avângin chau hle ṭhîn mah ila, he rawngbâwlna hian lungawina dik tak leh nun awmze nei tak min pe a ni,” tiin a sawi. Thlamuanna tluantling kan nei thei chu kan va lâwm tak êm!
16. (a) Johana 15:15-ah eng thilpêk nge târ lan a nih? (b) Engtin eng tirhkohte chu Isua ṭhian an nih reng theih?
16 Ṭhian nihna thilpêk. A tirhkohte chu lâwmna nei tûra a duhzia a hrilh hnuah, Isua chuan mahni hmasial lo hmangaihna lantîr a pawimawh chhan a hrilhfiah a. (Johana 15:11-13) Tichuan an hnênah: “Ṭhiante ka ti tawh zâwk ang che u,” tiin a hrilh a ni. Isua nêna ṭhian nih theihna chu thilpêk hlu a va ni tak êm! A nih leh, tirhkohte chu engtin nge Isua ṭhian an nih reng theih? Isua’n: “va rah tûr leh in rah awm reng tûrin” tiin a hrilhfiah a. (Johana 15:14-16 chhiar rawh.) Thu danga sawi chuan, thu hrilh zawm zêl tûr tihna a ni. Chu mi hma kum hnihah, Isua’n a tirhkohte hnênah: “In kalin, ‘Van ram chu a lo hnai ta,’ tiin hril zêl ang che u,” tiin a hrilh a. (Matthaia 10:7) Chuvângin, a thih hma zân khân, Isua chuan a zirtîrte chu thu hrilh rawngbâwlnaa chhelna nei tûrin a fuih a ni. (Matthaia 24:13; Marka 3:14) A thu pêk zawm chu thil awlsam a ni dâwn lo tih Isua’n a hria a. Mahse, chu chu an ti theiin, a ṭhiante an ni reng thei a ni. Engtin nge an tih theih? Thilpêk dang ṭanpuina hmangin a ni.
17, 18. (a) Johana 15:7-ah eng thilpêk nge târ lan a nih? (b) Engtin nge chu thilpêk chuan Isua zirtîrte chu a ṭanpui? (c) Eng thilpêkte’n nge tûn laiah min ṭanpui?
17 Kan ṭawngṭainate chhânna thilpêk. Isua chuan: “In duh apiang dîl rawh u, in tân tihin a awm zêl ang,” tiin a sawi a. (Johana 15:7, 16) Chu a thutiam chuan tirhkohte chu a tichak ngei ang! * (Footnote en rawh.) Tirhkohte chuan rei lo têah Isua a thi dâwn tih rêng an hre lo. Mahse, Isua a thih avângin ṭanpuina an hmu lo vang tihna a ni lo. Jehova chu an ṭawngṭaina chhâng tûr leh an thu hrilh rawngbâwlna ṭanpui tûrin a inpeih reng a. A ṭanpui ngei bawk a ni. Isua thih hnu rei vak lovah, tirhkohte chuan huaisenna pe tûrin Jehova hnênah an dîl a, an ṭawngṭainate chu a chhâng a ni.—Tirhkohte 4:29, 31.
Ṭanpui dîla kan ṭawngṭaina chu Jehova’n a chhâng tih kan chiang thei (Paragraph 18-na en rawh)
18 Tûn laiah pawh chutiang chiah chu a ni a. Thu hrilh rawngbâwlnaa chhelna kan neih hian, Isua ṭhian kan ni a. Jehova chuan thu hrilh harsa kan tih hunah ṭanpui dîla kan ṭawngṭaina chu min chhâng ang tih kan chiang thei a ni. (Philippi 4:13) Jehova’n kan ṭawngṭainate a chhân avâng leh Isua chu ṭhiana kan neih avângin kan lâwm tak zet a ni. Chûng Jehova thilpêkte chuan rah reng tûrin min tichak a ni.—Jakoba 1:17.
19. (a) Engvângin nge thu kan hrilh zawm zêl ang? (b) Pathian min pêk hna chu hlen thei tûrin engin nge min ṭanpui?
19 He thuziakah hian, thu kan hrilh reng chhan tûr pali kan hre tawh a, chûngte chu: Jehova chawimawi leh a hming tithianghlim tûr te, Jehova leh Isua kan hmangaihna lantîr tûr te, mite vaukhân tûr te, leh mite kan hmangaih tih lantîr tûrte hi a ni. Thilpêk palite pawh kan hre bawk a: lâwmna te, thlamuanna te, ṭhian nihna te, leh kan ṭawngṭai chhânnate a ni. Chûng thilpêkte chuan Pathian min pêk hna chu hlen thei tûrin min tichak a. ‘Tam taka rah’ tûra theih tâwp kan chhuah a hmuh hian Jehova chu a hlim tak zet a ni!
^ par. 17 Tirhkohte hnêna thu a sawi laiin, Isua chuan an ṭawngṭainate chu Jehova’n a chhâng ang tih vawi tam tak a hriattîr a ni.—Johana 14:13; 15:7, 16; 16:23.