ZIR TUR THUZIAK 22
Inzirna I Neih Dân Tihmasâwn Rawh!
“Thil pawimawh zâwkte chu fiah rawh u.” —PHIL. 1:10, 11, New World Translation.
HLA 42 “Chak Lote In Ṭanpui Tûr A Ni”
THLIR LAWKNA *
1. Engvângin nge mi ṭhenkhat tân inzirna neih chu thil châkawm lo a nih mai theih?
TUN lai huna nung dam zawm zêl tûr chuan theih tâwp chhuah a ngai a. Kan unau tam tak chuan an chhûngkaw mamawh phuhru tûrin dârkâr tam tak hna an thawk a. Mi dang tam tak chuan an nî tin hnathawhnaa kal nân leh haw nân dârkâr engemaw zât an hmang bawk. Mi tam takte chuan mahni inchâwm nân hna hahthlâk tak takte an thawk a. Tlai lam a lo thlen meuh chuan, chûng kan unau thawkrim tak takte chu an va chau thei tak êm! Ni khat a liam hmaa mi tam takte tih duh ber chu inzirna neih hi a ni.
2. Eng hunah nge inzirna i neih ang?
2 Dik tak chuan, Pathian Thu leh Kristian thu leh hla chhuahte zir nân hun kan pe tûr a ni a. Jehova nêna kan inlaichînna leh kan chatuan nunna chu, chutah chuan a innghat tlat si a! (1 Tim. 4:15) Mi ṭhenkhat chuan zâna chawlh hahdamna an neih hnuah, zîng hma takah thovin an rilru fîm lai leh hun reh lai takin inzirna an nei ṭhîn a. Mi dangte chuan thlarau lam chaw ei a, chhût ngunna nei tûrin tlai lamah minute rei lotê hun an insiam a ni.
3-4. Thu leh hla tihchhuah zât chungchângah eng insiamremna nge awm a, engvângin nge?
3 Inzir nâna hun pêk chu thil pawimawh tak a ni tih i pawm ngei ang. A nih leh, eng nge kan zir ang? ‘Chhiar tûr a tamin, chhiar zawh sên lah a ni si lo,’ i ti mai thei. Kan unau ṭhenkhat chuan thlarau lam chaw zawng zawng chu a kimin an hlâwkpui thei a; mahse, kan unau tam tak chuan chutianga tih nâna hun insiam chu harsa an ti a ni. Governing Body
chuan chu chu a hria a. Chumi avâng chuan, tûn hnai mai khân, thu leh hla chhuahte titlêm deuh tûra kaihhruaina pêk a ni.4 Entîr nân, mi tichak thei thiltawnte chu kan website jw.org®-ah leh thla tina chhuak JW Broadcasting®-a hmuh theih a nih tawh avângin, Yearbook of Jehovah’s Witnesses tih lehkhabu chu tihchhuah a ni tawh lo. Vântlâng tâna tihchhuah Vênnainsâng leh Awake! magazine chu tûnah chuan, kum khatah vawi thum chauh tihchhuah a ni tawh. He insiamremnate hi thil dang tihna tûra hun kan pêk theih nâna siam a ni lo. Insiamrem a nih chhan chu “thil pawimawh zâwkte” kan ngaihsak lehzual theih nân a ni. (Phil. 1:10, 11, NW) Tûnah, thil pawimawh zâwkte dah hmasak theih dân leh mi mal Bible zirna aṭanga hlâwkna pumhlum kan hmuh theih dânte kan sawiho vang.
DAH PAWIMAWH ZAWK NEI RAWH
5-6. Eng thu leh hla chhuahte nge ngun taka kan zir ang?
5 Kan dah pawimawh zâwk tûrahte chuan eng nge tel? Pathian Thu zir nân nî tin hun kan pe ngei tûr a ni. Kan thu chhiarte chhût ngun nân leh zir bingna atâna hun tam zâwk kan neih theih nân, kohhrana chawlhkâr chhûng Bible chhiar atâna hun duan chu tihtlêm a ni tawh a. Kan thiltum chu kan chanvo dawnte chhiar zawh mai ni lovin, Bible thuchahin kan thinlung a khawih a, Jehova hnaih lehzual hi a ni.—Sâm 19:14.
6 Eng dangte nge ngun taka kan zir ang? Ni e, Zir TûrVênnainsâng leh Kohhran Bible Zirnaa zir tûr thute inbuatsaih leh chawlhkâr chhûng inkhâwm atâna zir tûr dangte lo chhiar lâwk chu kan duh a. Vênnainsâng leh Awake! magazine chhuak apiang chu chhiar vek kan tum tûr a ni.
7. Kan website leh JW Broadcasting-a tihchhuah thlarau lam châwmna hmêlhmang chi hrang hrangte chu chhiar a, kan en kim thei lo a nih pawhin kan lunghnual tûr a ni em?
7 ‘A dik alâwm; mahse, kan website jw.org-a kan hmuh theih zawng zawngte leh JW Broadcasting-a tihchhuahte hi engtin nge ni ang? A tam lutuk!’ i ti mai thei. He tehkhin thu hi han ngaihtuah teh: Chaw dâwrah chuan ei tûr tuihnai chi hrang hrang a awm a. Dâwra eitute chuan an chhawp zawng zawng chu an tem chhin vek lo vang. Chu aiin, an duh zâwngte chauh an thlang ang. Chutiang bawkin, electronic hmanga tihchhuah apiang chu chhiar a, i enkim vek thei lo a nih pawhin lunghnual suh. I en theih leh chhiar theihte chu en la, chhiar ang che. Tûnah, inzirnaa telte leh inzirna kan hlâwkpui theih dân berte chu i lo sawiho vang u.
INZIRNA CHU HNA A NI!
8. Vênnainsâng zirna kan neih hunah eng tih nge kan duh mai theih a, chutianga tih chu engtin nge kan hlâwkpui ang?
8 Inzirna chu thiltum neia tih tak zeta rilru pea chhiar hi a ni a. Kan chanvo neihte chhiar thuak thuak a, a chhânnate rîn mai hi a ni lo. Entîr nân, Zir Tûr Vênnainsâng tâna kan inbuatsaih hian thuziak tîr lama thlîr lâwkna chu kan ngaihven hmasa tûr a ni. A dawtah, thuziaka a thupui leh a thupui tê te, ennawnna zawhnate chu ngaihtuah ang che. Tichuan, thuziak chu muangchâng leh ngun takin chhiar la. Paragraph tina sentence hmasa bera lang ṭhîn, a thupui thlâwptu sentence chu ngaihven bawk ang che. A thupui thlâwptu sentence chuan paragraph-a thu pawimawh laite chu a hriattîr ang che a. I chhiar zawm zêl chuan, paragraph tinin thupui tê a thlâwp dân leh thuziak thupui
nêna inzawmna a neih dânte pawh ngaihtuah rawh. Chu bâkah, thu mal hriat chian lohte leh a hnua zir chian i duh thu pawimawhte chu chhinchhiah ang che.9. (a) Vênnainsâng kan zir hunah engvângin nge Bible chângte chu kan ngaihven bîk ang a, engtin nge kan ngaihven ang? (b) Josua 1:8-a târ lan angin, Bible chângte chhiar mai bâkah eng nge kan tih ang?
9 Zir Tûr Vênnainsâng chu Bible zirna a ni a. Chuvângin, kohhrana kan zir huna chhiar tûr Bible chângte chu ngaihven bîk ang che. Bible chânga thu mal emaw, ṭawngkauchheh emawin paragraph-a thu pawimawhte a thlâwp dân chu a bîk takin chhinchhiah bawk ang che. Chu bâkah, Bible châng i chhiarte chu chhût ngun la, mi mal taka nunpui theih dânte chu ngaihtuah bawk rawh.—Josua 1:8 chhiar rawh.
Nu leh pate u, in fate chu inzirna neih dân zirtîr rawh u (Paragraph 10-na en rawh) *
10. Hebrai 5:14-na nêna inmilin, engvângin nge nu leh pate chuan an fate chu chhûngkhaw Pathian biaknaah inzir dân leh zir bingna neih dân an zirtîr ang?
10 Nu leh pate chuan chawlhkâr tina Chhûngkuaa Pathian Biakna chu an fate’n nuam ti se tih an duh chu hriatthiamawm tak a ni. Mahse, nu leh pate chuan chhûngkaw Pathian biaknaa sawiho tûrte chu an ruahman tûr ni mah se, thiltihhona engemaw bîk tak emaw, thiltih phûrawm tak emaw chu ruahman reng tûrah an inngai tûr a ni lo. Chhûngkhaw Pathian Biaknaah thla tina chhuak JW Broadcasting en te, a nih loh leh Nova lawng tuk ang chi thil emaw bîk tak tih chângte awm mah se, inzirna neih dân naupangte zirtîr chu a pawimawh hle a ni. Entîr nân, kohhran inkhâwm atâna inbuatsaih dân leh school-a an hmachhawn harsatnate tâna zir bingna neih dânte an zir a ngai a. (Hebrai 5:14 chhiar rawh.) In lamah Bible zirna engemaw chen an neih chuan, video en tûr awm zen zen lo kohhran inkhâwm te leh inkhâwmpuitea an thu hriatte chu an ngaihven lehzual thei ang. Zirna hun rei zâwng chu naupang kum leh a mizia azirin a ni tûr a ni.
11. Engvângin nge Bible zirpuite chu mahnia awmze nei taka inzirna neih dân kan zirtîr chu thil pawimawh tak a nih?
11 Kan Bible zirpuite pawhin, inzirna neih dân an hriat a ngai a. Bible an zir ṭan hian, Bible zirna leh kohhran inkhâwm atâna an inbuatsaihnaah a chhânnate an rîn kan hmuh hian kan hlim a. Mahse, anni chu zir bingna neih dân leh awmze nei taka inzirna neih dân hre tûra kan zirtîr a ngai a ni. Chutiang kawng chuan harsatna an tawh hunah kohhrana tuemaw hnêna ṭanpuina dîl nghâl mai lovin, kan thu leh hla chhuahte chu
mahnia zir bingna neiin thurâwn ṭangkai takte an hre thei ang.THILTUM NEIA INZIR
12. Inzirna kan neih hunah eng thiltumte nge kan neih mai theih?
12 Inzir mi tak i nih loh chuan, inzirna nuam tak neih chu a theih loh niin i ngai mai thei a. Mahse, chu chu thil theih a ni. A tîr lamah chuan hun rei lotê hmang la, a hnuah zawi zawiin hun rei zâwk hmang ang che. Thiltum neiin i zir rawh. Ni e, kan tum ber chu Jehova hnaih hi a ni. Tûn la laa kan thiltum chu tuemawin thil min zawh huna chhâng thei tûr leh kan hmachhawn buaina atâna zir bingna neih hi a ni thei ang.
13. (a) School kal lai tleirâwl pakhatin, a rinna hrilhfiah tûra hma a lâk theih dânte chu sawi rawh. (b) Kolossa 4:6-a thurâwn chu engtin nge i nunpui theih?
13 Entîr nân, school kal lai tleirâwl i ni em? I school kalpui zawng zawng chuan chanchhâwnna an ring mai thei a. Bible zirtîrna chu hrilhfiah i duh a; mahse, hrilhfiah thiam lo niin i inngai mai thei. Chu tak chu inzir i ngaih chhan a ni! I thiltum chu pahnih a ni thei: (1) Pathianin thil engkim a siam tih i rinna tihchak leh (2) i rinna hrilhfiah thiam lehzual tûra i thiamna tihhmasâwn hi a ni. (Rom 1:20; 1 Pet. 3:15) Heti hian i inzâwt mai thei a: ‘Ka school kalpuite hian engvângin nge chanchhâwnna an rin?’ tiin. Tichuan, kan thu leh hla chhuah hmangin, zir bingna ṭha tak nei rawh. I rinna hrilhfiah chu i rin aiin a awlsam daih ang. Mi tam takin chanchhâwnna an rin chhan chu an min zah takte’n, chu chu a dik tia an hrilh vâng mai a ni. Chumi atâna a chhânna pahnih khat i hriat chuan, thinlung dik tak pua zâwttu chu chhânna lungawithlâk tak i pe thei ang.—Kolossa 4:6 chhiar rawh.
I TUINA TIZUAL RAWH
14-16. (a) I hriat chian vak loh Bible-a lehkhabute chu engtin nge i hriat chian lehzual theih ang? (b) Bible châng târ lante hmangin, Amosa lehkhabu i hriatthiam lehzual theih dân hrilhfiah rawh. (“ Bible-a Mite Chu I Tân Mi Tak Tak Nihtîr Rawh!” tih bâwm chu en bawk rawh.)
14 Lo awm tûr kohhran inkhâwmah i hriat ngai vak loh zâwlnei tênau tia kohte zînga zâwlnei pakhat thuziak zir angah han inchan teh. Chu zâwlnei thuziak hriat belh duhna i neih hmasak a ngai ngei ang. Chu chu engtin nge i tih theih ang?
15 A hmasain, heti hian inzâwt rawh: ‘He lehkhabu ziaktu chungchâng eng nge ka hriat? Tu nge a nih a, khawiah nge a chên a, eng hna nge a thawh?’ tiin. Zâwlnei a nih hmaa a nun dân chuan a ṭawngkam hman te, leh a tehkhin thu hmante hre thiam tûrin a ṭanpui thei che a. Bible i chhiarin, a ziaktu mizia târ langtu ṭawngkauchhehte chu chhinchhiah ang che.
16 A dawtah, a lehkhabu ziah hun chu i hria ang. Chu chu New World Translation of the Holy Scriptures bu hnung lama “Table of the Books of the Bible” tih i en chuan awlsam takin i hre thei ang. Chu bâkah, Appendix A6-a zâwlneite leh lalte hming chuanna chart pawh i en thei a. Bible hrilh lâwknate i zir chuan, chu hrilh lâwkna ziah a nih laia mite dinhmun hriat pawh a ṭha ang. Zâwlnei chuan eng rilru put hmang ṭha lo leh thiltih ṭha lote nge pumpelh tûra a duh? A dam rualpuite chu tute nge ni? A chanchin kim chang taka hre tûr chuan, lehkhabu pakhat mai aia tam i râwn a ngai a. Entîr nân, zâwlnei Amosa dam laia thilthlengte kim taka hre tûr chuan, Amosa 1:1-in a kawhhmuh Bible châng dang 2 Lalte leh 2 Chronicles bute i chhiar chuan i hlâwkpui ngei ang. Chu bâkah, Amosa dam rualpui ni mai thei, Hosea ziakte pawh i ennawn thei bawk. Chûng lehkhabute chuan Amosa hun laia mite dinhmun hre thiam tûrin a ṭanpui ang che.—2 Lal. 14:25-28; 2 Chro. 26:1-15; Hos. 1:1-11; Amos. 1:1.
CHIPCHIAR TAKIN CHHUT NGUN RAWH
17-18. Paragraph-a entîrnate, a nih loh leh mahni thiltawn aṭangin, thu chipchiar tak anga langte ngaihvennain mi mal Bible zirna hlimawm tak a siam thei tih entîrna sawi rawh.
17 Bible kan chhiar hian hriat belh duhna neia chhiar hi a ṭha a. Entîr nân, Messia thihna chungchâng sawi lâwkna Zakaria bung 12-na chhiar angah han inchan teh. (Zak. 12:10) Châng 12-na i chhiar thlen chuan ‘Nathana thlah chhûngkuain’ Messia thihna chu nasa takin a sûn ang tih i hmu ang. Chu thu chu chhiar liam mai lovin, châwl lawkin, heti hian inzâwt ang che: ‘Nathana thlah chhûngkua chu Messia nên eng inkûngkaihna nge an neih? Hemi chungchângah hriat belh tûr a awm em?’ tiin. Tlêm azâwng i han chhui chiang leh deuh va. Bible châng kawhhmuhna chuan 2 Samuela 5:13, 14-na chu a kawhhmuh leh che ang a, chutah chuan Nathana chu Lal Davida fapate zînga pakhat a ni tih i hmu ang. Bible châng kawhhmuhna dang Luka 3:23, 31-na chuan Isua chu Mari pu, Nathana thlah a ni tih a târ lang a ni. (Luka 3:23 study note-a “Helia fa, Josefa” tih chu en rawh.) I hmu chhuak ta chiah mai le! Isua chu Davida thlah a nih tûr thu hrilh lâwk a ni tih i hria a. (Mt. 22:42) Mahse, Davida chuan fapa 20 aia tam a nei a. Zakaria’n Nathana chhûngkuain Isua thihna chu a sûn ang tia a sawi chat thei chu a mak hle lo maw?
18 Entîrna dang hi han ngaihtuah leh teh. Lk. 1:32, 33) Isua chu “Chungnungbera Fapa” a ni ang tia Gabriela thuchah chuan kan rilru a la mai thei a. Ani chuan Isua chu “a lal ang” tih pawh a sawi lâwk bawk. Chuvângin, Gabriela thusawi chuan Mari tân eng awmzia nge a neih ang tih pawh kan ngaihtuah mai thei a. Mari’n Isua chu Lal Heroda thlâktu, a nih loh leh a aiawhtu Israel lal pakhat a ni dâwn tiin a ngaihtuah ang em? Isua chu lal ni ta se, Mari chu lal nu a ni ang a, a chhûngte chu lal inah an chêng dâwn a ni. Mahse, Mari’n chutiang thil ni theite chungchângah Gabriela a zâwt tih chhinchhiahna a awm lo va; Isua zirtîr pahnihte tih angin, Lalramah dinhmun ṭha chang tûrin a ngên tih pawh kan chhiar hek lo. (Mt. 20:20-23) Chûng thu chipchiar takte chuan Mari chu entawn tlâk hmeichhe inngaitlâwm tak a nihzia min va rin nghehtîr tak êm!
Luka bung khatna kan chhiar chuan vântirhkoh Gabriela’n Mari a va tlawh thu leh fapa a hrin tûr thu heti hian a sawi a ni: “Ani chu mi lian a la ni ang a, Chungnungbera Fapa an ti ang; Lal Pathianin a hnênah a thlahtu Davida ṭhutphah chu a pe ang a; Jakoba thlahte chungah chatuanin a lal ang,” tiin. (19-20. Jakoba 1:22-25 leh 4:8-naa târ lan angin, inzirna kan neih huna kan thiltumte chu eng nge ni?
19 Pathian Thu leh kan Kristian thu leh hla chhuahte zir huna kan thiltum ber chu Jehova hnaih hi a ni tih i hre reng ang u. ‘Mi eng ang nge kan nih’ tih leh Pathian tilâwm tûrin eng inthlâk danglamnate nge kan siam ngai tih hriat chian pawh kan duh bawk. (Jakoba 1:22-25; 4:8 chhiar rawh.) Chuvângin, inzirna kan neih ṭan hunah Jehova hnênah a thlarau thianghlim kan dîl tûr a ni. Kan thu zirte hlâwkpui lehzual tûr leh Pathianin min hmuh anga inhmu thiam tûra min ṭanpui tûrin kan ngên bawk tûr a ni.
20 Kan za hian fakna hla phuahtuin: “A lâwmna chu LALPA dânah a ni zâwk a; a dân thu chu a chhûn a zânin a ngaihtuah ṭhîn. . . . A thiltih apiang chu a hmuingîl zêl ang,” tia a sawi Pathian chhiahhlawh rinawm ang nih i tum ṭheuh ang u.—Sâm 1:2, 3.
HLA 11 Jehova Thinlung Tilâwm Rawh
^ par. 5 Jehova chuan kan en tûr video-te, chhiar tûr te, leh zir tûr thu leh hla chhuahte chu phal takin min pe a. He thuziak hian i zir tûrte hre tûrin a ṭanpui ang che a, mi mal inzirna hlâwkpui tak zet tûra ṭanpuitu rawtna ṭangkai takte a pe bawk ang che.
^ par. 61 MILEM HRILHFIAHNA: Nu leh pate’n an fate chu chawlhkâr chhûnga neih Zir Tûr Vênnainsâng inbuatsaih dân an zirtîr.
^ par. 63 MILEM HRILHFIAHNA: Unaupa chuan Bible ziaktu Amosa chungchâng zir bingna a nei. A hnunga milemte hian unaupain Bible chhiar leh chhût ngunna a neih laia a thil mitthlate a entîr a ni.