1-2. (a) Mihringte’n thlamuanna kan mamawhin, kan pe chhuak thei tih eng entîrnain nge târ lang? (b) Naupang ṭhenkhat chuan eng hliam nge an tawh?

MIHRINGTE hian thlamuanna kan mamawhin, kan pe chhuakthei bawk a. Entîr nân, naupang chu a infiam laiin a tlu a, a khûp a pilh a, ṭap chungin a nu emaw, a pa emaw chu a pan ṭhîn. Anni chuan tidam thei lo mah se, an thlamuan thei a ni. Thil thlen dânte an zâwtin, a mittui an hrûksak a, duat taka thlêm pahin a hliamah damdawite hnawihsakin, an tuamsak ṭhîn a ni. Nakin lawkah, naupang chu a bâng a, a infiam zawm leh hial thei a. A hnuah, a hliam chu zawi zawiin a dam ta a ni.

² Mahse, naupangte chuan chu aia hliam nasa zâwk tawrh châng an nei a. Ṭhenkhat chuan mipat hmeichhiatna lama khawih chhiat an tâwk a ni. Chutianga khawih chhiatna chu vawi khat emaw, kum tam tak chhûng emaw an tâwk thei a. A enga pawh chu ni se, chutianga khawih chhiatna chuan rilruah ser thûk tak a neihtîr thei a ni. Dinhmun ṭhenkhatah chuan, chutiang thil sual titu chu man a, hrem a ni a. A dangah chuan, hrem a tâwk lo pawh a ni thei. Mahse, thil sual titu chu hrem nghâl a nih pawhin, khawih chhiata awm naupang chuan a puitlin thlengin a tawrh phah thei a ni.

3. Korinth thawn hnih 1:3, 4-a târ lan angin, Jehova duh zâwng chu eng nge ni a, eng zawhnate nge kan sawiho vang?

³ Naupan laia khawih chhiata awm Kristianin a puitlin thlenga rilru lama hliam a tawh reng chuan, ani chu engin nge ṭanpui thei ang? (2 Korinth 1:3, 4 chhiar rawh.) Jehova duh zâwng chu a berâmte’n an mamawh hmangaihna leh thlamuanna an dawn hi a ni a. Chuvângin, hêng zawhna pathumte hi i lo ngaihtuah ang u: (1) Engvângin nge naupan laia khawih chhiatna tâwkte chuan thlamuanna an mamawh? (2) An mamawh thlamuanna  chu tute’n nge pe thei? (3) Engtin nge ṭha taka kan thlamuan theih?

4-5. (a) Naupangte chu puitlingte nên an inang lo tih hriat chu engvângin nge a pawimawh? (b) Inkhawih chhiatna chuan naupangin mi dang a rinna chu engtin nge a tihchhiat theih?

⁴ Naupan laia khawih chhiatna tâwk puitling ṭhenkhat chuan kum tam tak a liam hnuah pawh thlamuanna an la mamawh reng thei a ni. Engvângin nge? Chumi hre thiam tûr chuan, naupangte chu puitlingte nên an inang lo hle tih kan hriat hmasak a ngai a. Dik lo taka cheibâwlnain naupang chunga nghawng a neih dân leh puitling chunga nghawng a neih dân chu a inang lo hle ṭhîn a ni. Entîrna ṭhenkhat han ngaihtuah ta ila.

⁵ Naupangte tân anmahni enkawltute leh ngaihsaktute nêna inpawhna ṭha tak neih leh an rinchhan tlat a ngai a ni. Chutianga inpawhna chuan naupangte chu him nia inhriatna nei tûr leh anmahni hmangaihtute rinchhan dân a zirtîr a ni. (Sâm 22:9) Lungchhiatthlâk takin, naupang khawih chhiatna chu in chhûng lumah a thleng tlângpui ṭhîn a, a khawih chhetute chu chhûngkhat hnaite leh hmêlhriatte an ni tlângpui ṭhîn. Chutiang kawnga naupang rinna tihchhiatsakna chuan kum tam tak a liam hnuah pawh naupang tân mi dang rin a tiharsa thei a ni.

6. Engvângin nge mipat hmeichhiatna lama inkhawih chhiat chu râwng tak leh hlauhawm tak a nih?

⁶ Mahnia invênghim thei lo naupangte mipat hmeichhiatna lama khawih chhiat chu râwng tak leh hlauhawm tak a ni. Nupui pasal neia mipat hmeichhiatna hmang tûra tisa lam, rilru lam, leh ngaihtuahna lama an puitlin hmaa naupangte khawih chhiatna chuan an chungah chhiatna nasa tak a thlen a. Chutianga khawih chhiatna chuan mipat hmeichhiatna an thlîr dân te, mahni an inthlîr dân te, leh anmahni ṭhiana siam tumtute an thlîr dânte chungah nghawng ṭha lo tak a nei thei a ni.

7. (a) Engvângin nge mite khawih chhiat chîng mi sual tân naupang bum chu awlsam tak a nih theih a, engtin nge a tih mai theih? (b) Chûng dâwt thute chuan eng nge a rah chhuah theih?

⁷ Naupangte chu thilte ngaihtuaha thu tlûkna siam tûr leh thil hlauhawmte hriaa pumpelh tûrin an puitling tâwk lo. (1 Kor. 13:11) Chuvângin, naupangte chu khawih chhiat tumtute tân bum awlsam tak an ni. Chûng mite chuan naupangte hnênah an thiam loh a nih thu te, an thup tlat a ngaih thu te, an sawi pawhin tuman an âwihsak loh tûr thu te, leh naupang leh puitling inkâra hmangaihna dik tak lantîrna mai a nih thute ang chi dâwt thu hlauhawm takte chu an hrilh ṭhîn. Chûng dâwt thute chuan naupang ngaihtuahna leh thu dik a hriatthiamna chu kum tam tak chhûng a tichhe thei a. Chutiang naupang chu tihchhiat leh tihbawlhhlawha awm nia inhriain, hmangaihna leh thlamuanna dawng tlâk lovah a inngai thei a ni.

8. Jehova chuan rilru hliamte chu a thlamuan thei tih engvângin nge kan chian theih?

⁸ Chuvângin, mipat hmeichhiatna lama khawih chhiatna tâwktuin hun rei tak chhûng a tawrh phah chu thil mak a ni lo. Dân bawhchhiatna rapthlâk tak a va ni êm! Hetiang thil sual tihna hluar tak hian mi tam takte’n ‘hmangaihna pianpui an neih lohna’ leh ‘mi sual leh tihdertute an sual zual deuh deuhna’ hun, ni hnuhnûngah kan awm tawh tih a tichiang hle a ni. (2 Tim. 3:1-5, 13) Min tihnat nâna Setana thiltih chu a râpthlâk hle a, mite’n Diabola tilâwm zâwnga thil an ti ṭhîn hi a lungchhiatthlâk hle a ni. Mahse, Jehova chu Setana leh a mite aiin a chak zâwk a. Setana thiltih dânte chu a hre vek a ni. Jehova chuan kan hrehawm tawrhte chu a hre chiangin, kan mamawh thlamuannate pawh min pe thei tih kan chiang thei bawk. ‘Thlamuanna zawng zawng Pathianin keimahni min thlamuanna ngeiin hrehawm  eng anga awmte pawh chu kan thlamuan ve theihna tûrin, kan hrehawmna zawng zawnga min thlamuan ṭhîntu’ rawng kan bâwl thei chu kan ham ṭha hle a ni. (2 Kor. 1:3, 4) A nih leh, Jehova’n thlamuanna pe tûrin tute nge a hman?

9. Sâm 27:10-a kan hmuh Lal Davida thusawi aṭangin, Jehova chu chhûngte kalsana awmte tân eng nge a nih ang?

⁹ Nu leh pa kalsana awmte, a nih loh leh chhûngkhat hnaite khawih chhiatna tâwkte chuan thlamuanna an mamawh lehzual a. Fakna hla phuahtu Davida chuan thlamuanna petu rinchhan tlâk ber chu Jehova a ni tih a hria a ni. (Sâm 27:10 chhiar rawh.) Ani chuan Jehova chu chhûngte kalsana awmte tân Pa a ni dâwn tih a ring nghet tlat a. Engtin nge Jehova’n a tih? A chhiahhlawh mi rinawmte hmangin a ti a ni. Jehova betu kan unaute chu thlarau lama kan chhûngte an ni a. Entîr nân, Isua chuan Jehova betute chu a unau te, a farnu te, a nu te an nih thu a sawi a ni.—Mt. 12:48-50.

10. Engtin nge tirhkoh Paula chuan kohhran upa anga a rawngbâwlna chu a sawi?

¹⁰ Kristian kohhrana kan neih chhûngkaw khat anga inlaichînna hi han ngaihtuah teh. Tirhkoh Paula chu kohhran upa taima tak leh rinawm tak a ni a. Ani chuan entawn tûr ṭha min hnutchhiah a, Krista a entawn anga amah entawn tûra mi dangte fuih tûrin thlarauvin a thâwk khum hial a ni. (1 Kor. 11:1) Paula’n upa anga a rawngbâwlna a sawi dân hi chhinchhiah ang che: “Nu, nau pawmin ama fate a duat angin in zîngah nunnêm takin kan awm zâwk kha,” tih hi. (1 Thes. 2:7) Tûn laia kohhran upa rinawmte pawhin ṭanpui ngaite chu Bible ṭanchhana an thlamuan hunah ngilneihna leh lainatna ṭawngkamte an hmang thei a ni.

11. Upate chauh chu thlamuanna pe thei awmchhun an ni lo tih engin nge târ lang?

¹¹ Upate chu khawih chhiatna tuartute thlamuan theitu awmchhun an ni em? Ni lo ve. Kan za hian “inthlamuan tawn” tûrin mawhphurhna kan nei ṭheuh va. (1 Thes. 4:18) Thlarau lama puitling Kristian unaunute chuan a bîk takin, thlamuanna mamawh unaunute chu  an thlamuan thei a ni. Pathian Jehova pawh fate thlamuantu nu ber nên inâwm takin a inkhaikhin a. (Is. 66:13) Bible-ah hian lungngaite thlamuantu hmeichhiate entawn tûr siam a chuang a ni. (Job. 42:11) Jehova’n tûn laia Kristian hmeichhiate’n rilrua hrehawm tuar an unaunute an thlamuan tih a hmuh hian a va lâwm tak êm! Dinhmun ṭhenkhatah chuan, upa pakhat emaw, pahnih emaw chuan rilrua hrehawm tuar unaunu ṭanpui tûrin thlarau lama puitling unaunu chu remhre takin an zâwt thei a ni. *

12. Eng ti lo tûrin nge kan fîmkhur ang?

¹² Unaute kan ṭanpui hunah an sawi duh loh thilte chu zâwt lo tûrin kan fîmkhur tûr a ni ngei mai. (1 Thes. 4:11) Mahse, ṭanpuina leh thlamuanna mamawhte tân eng nge kan tih theih? Bible ṭanchhan thlamuanna kan pêk theih dân kawng nga chu i lo ngaihtuah ang u.

13. Lalte pakhatna 19:5-8-a târ lan angin, Jehova vântirhkoh chuan Elija tân eng nge a tihsak a, engtin nge chu vântirhkoh chu kan entawn theih?

¹³ Ṭanpuina ṭangkai tak pe rawh. Zâwlnei Elija chu a nun atâna a tlânchhiat lai khân, thih duh hial khawpin a beidawng a. Jehova chuan a chhiahhlawh beidawng tak tlawh tûrin vântirhkoh chak tak a tîr a ni. Chu vântirhkoh chuan ṭanpuina ṭangkai tak a pe a. Elija chu chhangpêr lum a pe a, ei tûrin a fuih a ni. (1 Lalte 19:5-8 chhiar rawh.) He Bible thu hian thu dik pawimawh tak a târ lang: A châng chuan ngilneihna thil chhe tê tihnain thil ṭha tam tak a rah chhuak thei, tih hi. Chaw vawi khat eipui, thilpêk tlâwm tak, leh ngaihsakna lantîrna card te chuan lunghnual tak unaute chu kan hmangaihna leh ngaihsakna a hriattîr ang. Mi mal thil emaw, thil sawi nuam lote emaw chu sawipui hrehawm kan tih chuan, kan sawi tâk ṭanpuina ṭangkai takte chu kan pe thei tho vang.

14. Elija chanchin aṭangin eng nge kan zir theih?

¹⁴ Khawih chhiat tawh vânga lunghnualte chu him nia inhriatna leh rilru hahdamna neihtîr rawh. Elija chanchin aṭangin zir tûr dang pawh kan nei thei a. Jehova chuan zâwlnei chu Horeb tlâng thleng kal tûra a mamawh ṭanpuina chu mak danglam takin a pe a ni. Elija chuan Jehova’n tûn hmaa a mite nêna thu a lo thlunna hmun, chu hmun hla takah chuan him nia inhriatna a nei ngei ang. Amah tihhlum tumtute khawih phâk lohva awm niin a inhre mai thei bawk. Zir tûr eng nge kan neih? Khawih chhiatna tuartute thlamuan kan duh a nih chuan, him nia inhriatna nei tûrin kan ṭanpui hmasa thei a ni. Entîr nân, lunghnual tak unaunu chuan Kingdom Hall-a inhmuh khâwm aiin, a ina boruak zâng tak hnuaia thingpui in paha inkawm chu him a tiin, nuam a tizâwk mai thei tih upate chuan an hre tûr a ni. Mi dangte erawh chuan Kingdom Hall-a inbiak chu an duh zâwk mai thei bawk.

15-16. Ngaithlatu ṭha nihnaah eng nge tel?

¹⁵ Ngaithlatu ṭha ni rawh. Bible chuan: “Mi tinin ngaihthlâk chuh sela, thusawi chuh lo sela,” tiin thurâwn chiang tak min pe a. (Jak. 1:19) Ngaithlatu ṭha kan ni em? Ngaithla tih chu engmah sawi lo va, a thusawi lai lo en mai mai niin kan ngai thei a. Mahse, ngaithlatu ṭha tihah chuan chu aia tam a tel a ni. Entîr nân, Elija’n a tâwpa a rilrua awmte a phawrh chhuah chuan, Jehova’n ngun takin a ngaihthlâksak a. Elija chu a hlau va, mal nia inhriatna a neiin, a thiltih zawng zawng chu engmah lo mai niin a ngai tih Jehova’n a hria a. Chûng chu hneh tûrin hmangaihna nei takin a ṭanpui a. Elija thusawi chu ngun takin a ngaihthlâksak tih a târ lang a ni.—1 Lal. 19:9-11, 15-18.

¹⁶ A nih leh, engtin nge kan ngaihthlâk laiin,  hmangaihna mize pêng pahnih, lainatna leh khawngaihna chu kan lantîr theih? A châng chuan, remhre taka ṭawngkam ṭha tlêm tê sawi chhuahna chuan kan rilru vei zâwng a târ lang thei a. Heti hian i sawi thei a ni: “Hetiang thil i tâwk hi pawi ka ti khawp mai! Naupangte chunga hetianga tih tûr a ni lo asin le!” tiin. Rilru hliama awm i ṭhian thusawi chu i hriat chian nân zawhna pahnih, khat i zâwt thei a ni: “Khawngaihin, i sawi tum tak chu min hrilhfiah thei ang em?” a nih loh leh “I thusawi chu, . . . tiin ka hre thiam a, ka hre dik em?” tiin. Chutiang hmangaihna ṭawngkamte chuan a thusawi i ngaithla tak zetin, hriatthiam i tum tih a târ lang a ni.—1 Kor. 13:4, 7.

17. Engvângin nge dawhtheihna kan neih a, ‘thusawi kan chuh loh’ vang?

¹⁷ Mahse, “thusawi chuh lo” tûrin fîmkhur ang che. Thurâwn pe tûr leh a thlîr dân siam ṭha tûrin a thusawi lai chu pawt chat suh. Dawhtheihna lantîr rawh! A tâwpa Elija’n Jehova hnêna a rilrua awmte a sawi chhuah khân, a lungngaihna nasa tak chu a chhâk chhuak a. Jehova’n a rinna a tihchak hnuah pawh Elija chuan a thusawi ngai bawk a sawi chhuak leh a ni. (1 Lal. 19:9, 10, 13, 14) Eng nge kan zir? Heta ṭang hian, mi lunghnualte’n an rilru vei zâwng chu vawi khat aia tam an sawi chhuah a ngaih châng a awm thei tih kan zir a ni. Jehova angin, dawhthei taka ngaihthlâk chu kan duh a. A chinfel dân hrilh tum aiin, lainatna leh khawngaihna kan lantîr zâwk a ni.—1 Pet. 3:8.

18. Engtin nge kan ṭawngṭainate chu rilrua hrehawm tuarte tân thlamuanna a nih theih?

¹⁸ Rilrua hrehawm tuartu chu ṭhahnemngai takin ṭawngṭaipui rawh. Rilru beidawnna nasa tak neitu chu a ṭawngṭai hlei thei lo mai thei a. Jehova hnaih tlâk lo niin a inhre hial thei a ni. Chutiang mi chu thlamuan kan duh chuan a hming lamin, a awm lai ngeiin kan ṭawngṭai thei a. Chu rilru beidawngtu kan unau chu kan tân leh kohhran tâna a hlutziate kan chham tel thei bawk. Jehova hnênah a berâm hlu tak chu hnêm a, thlamuan tûrin kan dîlsak thei bawk  a ni. Chutianga ṭawngṭaina chuan nasa takin a thlamuan ang.—Jak. 5:16.

19. Tuemaw thlamuan tûra inbuatsaihnaah engin nge min ṭanpui thei?

¹⁹ Mi tidam thei leh thlamuan thei ṭawngkamte thlang rawh. Thu i sawi hmain ngaihtuah hmasa rawh. Ngaihtuah chiang lova thusawi chuan rilru a tina thei a. Ngilneihna ṭawngkam erawh chuan mi a tidam thei a ni. (Thuf. 12:18) Chuvângin, ṭawngkam ngilnei tak, mi thlamuan thei, leh mi hnêm theite hmang thei tûrin Jehova ṭanpuina dîl rawh. Bible-a chhinchhiah Jehova thusawite aia ṭawngkam thilti thei zâwk a awm lo tih hre reng ang che.—Heb. 4:12.

20. Mi ṭhenkhat chu an thiltawn ṭha lote avângin eng angin nge an inngaih theih a, eng nge hriatnawntîr kan duh?

²⁰ Tûn hmaa khawih chhiatna lo tuar tawh ṭhenkhat chuan tenawm tak, hlutna nei lo, leh hmangaih loh, a nih loh leh hmangaih tlâk loh ni hialin an inngai mai thei a. Chu chu dâwt hulhual a ni! Chuvângin, Jehova tâna an hlutzia hriattîr tûrin Bible chângte hmang ang che. (“ Bible Aṭanga Thlamuanna” tih bâwm chu en rawh.) Vântirhkoh pakhatin zâwlnei Daniela rilru beidawn lai leh a chak loh laia ngilnei taka a tihchak dân chu hre reng ang che. Jehova chuan chu a mi duhawm tak chu a tân a hlutzia hriattîr a duh a ni. (Dan. 10:2, 11, 19) Chutiang bawkin, kan unau rilru na takte chu Jehova tân an va hlu tak êm!

21. Thil sual ti inlam lêt lote chuan eng nge an hmabâk a; mahse, chumi hun a lo thlen hmain, eng nge tih kan tum tlat ang?

²¹ Mi dangte kan thlamuan hian Jehova’n a hmangaih tih kan hriatnawntîr a. Jehova chu rorêlna fel Pathian a ni tih kan theihnghilh ngai tûr a ni lo. Khawih chhiatna thil sual tih engpawh chu Pathian hmaa thup theih a ni lo. Jehova chuan engkim a hmu a, thil sual ti inlam lêt lote chu hrem lohvin a chhuah lo vang. (Num. 14: 17, 18) Chumi hun a lo thlen hmain, khawih chhiatna tuartute chungah hmangaihna lantîr tûrin kan tih theih apiang i ti ang u. Chu bâkah, Setana leh a khawvêl avânga khawih chhiatna tuar zawng zawngte chu Jehova’n a tidam hlen dâwn tih hriat chu a va thlamuanthlâk tak êm! Rei lo têah, chûng mi tinatu thilte chu rilru leh thinlungah hriat chhuah a ni tawh lo vang.—Is. 65:17.