1. Eng thil pahnih nge kan hriat chian theih?

PATHIAN JEHOVA chuan amah betute chu a hmangaih rengin, a hmangaih zawm zêl ang. Ani chuan rorêlna fel a ngaina bawk. (Sâm 33:5) Chuvângin, thil pahnih kan hre chiang thei a ni: (1) Jehova chu a chhiahhlawhte dik lo taka cheibâwl an nih hian a rilru a nâ a. (2) Ani chuan a mite chu fel takin ro a rêlsak ang, tih hi. He thuziak inzawma a hmasa * zâwkah chuan Mosia hmanga Israel mite hnêna pêk Pathian Dân chu hmangaihnaa innghat a ni tih kan hre tawh a. Chu chuan rorêlna fel—mi chanhai te pawh tiamin, mi zawng zawng tân rorêlna fel a awmtîr a. (Deut. 10:18) Chu Dân chuan Jehova’n amah betute a ngaihsakzia a târ lang a ni.

2. Eng zawhnate nge kan chhân ang?

² Mosia Dân chu C.E. 33-a, Kristian kohhran din a nih khân a tâwp a. A nih leh, Kristiante chuan hmangaihnaa innghat rorêlna fel awmtîrtu dân an nei dâwn lo tihna a ni em? Ni lo ve! Kristiante chuan dân thar an nei a. He thuziakah hian, chu dân thar chu kan sawiho hmasa ang a. Chu bâkah, hêng zawhnate hi kan chhâng ang: Engvângin nge chu dân chu hmangaihnaah a innghat kan tih theih? Engvângin nge chu dân chuan rorêlna fel a awmtîr kan tih theih? Chu dân hnuaia awm thuneitute chuan, engtin nge mite chu an cheibâwl ang? tihte hi.

3. Galatia 6:2-a târ lan ‘Krista dânah’ chuan eng nge tel?

³ Galatia 6:2 chhiar rawh. Kristiante chu “Krista dân” hnuaiah kan awm a. Isua chuan a hnungzuitute tân dân chi hrang hrang a ziak chhuak lo va; mahse, an nunpui tûr kaihhruaina te, thupêk te, leh thu bulte a pe zâwk a ni. ‘Krista dânah’ chuan a zirtîrna zawng zawng a tel a. He dân hre thiam lehzual tûrin a hnuaia thute hi i lo ngaihtuah ang u.

4-5. Eng kawngtein nge Isua’n a zirtîr a, eng hunah nge a zirtîr?

⁴ Eng kawngtein nge Isua chuan a zirtîr? A hmasa berah, ṭawngkamin mite chu a zirtîr a. A ṭawngkam chuan Pathian chungchâng thutak a târ lang a, nun awmze dik tak a zirtîr bâkah, mihringte hrehawm tawrhna zawng zawng tibotu tûr chu Pathian Ram a ni tih a kawhhmuh avângin thil a tithei hle a ni. (Lk. 24:19) Isua chuan entîrna hmangin mite a zirtîr bawk. A nun dân hmangin a hnungzuite hnênah nun dân tûr a zirtîr a ni.—Joh. 13:15.

⁵ Eng hunah nge Isua’n a zirtîr? Leia rawng a bâwl chhûngin a zirtîr a. (Mt. 4: 23) A thawhleh hnu lawkah pawh a hnungzuitute chu a zirtîr bawk. Entîr nân, a zirtîr mi 500 aia tam hnênah a inlâr a, ‘zirtîrte siam’ tûrin thu a pe a ni. (Mt. 28:19, 20; 1 Kor. 15:6) Kohhran lû a nih angin, Isua chuan vâna a lâwn hnuah pawh a zirtîrte chu kaihhruaina a pe zawm zêl a. Entîr nân, C.E. 96 vêlah Krista chuan tirhkoh Johana chu hriak thih Kristiante hnêna fuihna leh zilhna pe tûrin a kaihruai a ni.—Kol. 1:18; Thup. 1:1.

6-7. (a) Khawiah nge Isua zirtîrnate chu chhinchhiah a nih? (b) Engtin nge Krista dân chu kan zawm?

⁶ Isua zirtîrnate chu khawiah nge chhinchhiah a nih? Chanchin Ṭha ziak paliahte chuan leia a awm laia Isua thusawi leh thiltih tam tak chhinchhiah a ni a. Thlarau thianghlim thâwk khuma awm, “Krista rilru” ang pu mihringte ziak Kristian Grik Pathian Lehkha Thua thuziak dangte chuan Isua ngaihtuah dânte hre thiam tûrin min ṭanpui a ni.—1 Kor. 2: 16.

⁷ Zir Tûrte: Isua zirtîrnate chu kan nun kawng engkimah a ṭangkai a. Chuvângin, Krista dân chuan inah te, hna thawhnaah te, school-ah te, leh kohhranaah te pawh ni se, kan thiltih engkim a thunun a ni. He dân hi  Kristian Grik Pathian Lehkha Thu chhiarna leh chhût ngunna hmangin kan zir a. Thlarauva thâwk khum, chu lehkhabua kan hmuh kaihhruaina te, thupêk te, leh thu bulte mila nungin chu dân chu kan zâwm a ni. Krista dân kan zawm hian Isua zirtîrna zawng zawng lo chhuahna Hnâr, hmangaihna Pathian, Jehova thu chu kan zâwm tihna a ni.—Joh. 8: 28.

8. Krista dân chu eng lungphûm chungah nge a innghah?

⁸ Lungphûm nghet tak chunga ṭha taka sak in chuan a chhûnga chêngte chu him nia inhriatna a neihtîr a. Chutiang bawkin, lungphûm nghet tak chunga innghat dân ṭha tak chuan a zâwmtute chu him nia inhriatna a neihtîr a ni. Krista dân chu lungphûm azawnga ṭha ber, hmangaihnaah a innghat a ni. Engvângin nge chutianga kan sawi theih?

9-10. Eng entîrnate’n nge Isua chu hmangaihnain a chêttîr tih târ lang a, engtin nge ani chu kan entawn theih?

⁹ A hmasain, Isua thiltih apiang chu hmangaihnain a chêttîr vânga tih a ni. Khawngaihna chu hmangaihna lantîr dân kawng khat a ni a. Chutiang khawngaihnain a chêttîr avângin, Isua chuan mipuite a zirtîr a, dam lote a tidam a, rilṭâmte a hrai a, mitthite a kaitho a ni. (Mt. 14:14; 15:32-38; Mk. 6:34; Lk. 7:11-15) Chutiang thilte tih nân hun leh tha tam tak sên ngai mah se, mahni mamawh aiin mi dangte mamawh chu a dah pawimawh zâwk a. Isua’n hmangaihna a lantîr dân kawng pawimawh ber chu, mi dangte tâna a nun a pêkna hi a ni.—Joh. 15:13.

¹⁰ Zir Tûrte: Keimahni mamawh aia mi dangte mamawh dah pawimawh zâwkna hmangin Isua kan entawn thei a. Kan rawngbâwlna biala mite chunga khawngaihna lantîrin kan entawn thei bawk. Chutiang khawngaihna avânga chanchin ṭha kan hrilh a, kan zirtîr hian Krista dân kan zâwm tihna a ni.

11-12. (a) Jehova’n min ngaihsakzia engin nge târ lang? (b) Jehova hmangaihna chu engtin nge kan entawn theih?

¹¹ Pahnihnaah, Isua chuan a Pa hmangaihna a lantîr a ni. A rawngbâwl chhûngin Isua chuan Jehova’n amah betute a ngaihsakzia a târ lang a. Isua zirtîrnate zîngah chuan hêngte hi a tel a ni: Kan za hian kan Pa vâna mi tân kan hlu hle. (Mt. 10:31) Jehova chuan inlamlêt a, kohhrana lo kîr leh berâm bo chu lawm luh a duh. (Lk. 15:7, 10) Ani chuan tlan nâna a Fapa min pein, min hmangaihzia a târ lang, tihte hi.—Joh. 3:16.

¹² Zir Tûrte: Jehova hmangaihna chu engtin nge kan entawn theih? (Eph. 5:1, 2) Kan unaute chu kan ngaihluin, kan hlut êm êm a, Jehova hnêna lo kîr leh “berâm bo” chu phûr takin kan lo lâwm a ni. (Sâm 119:176) Kan unau ṭanpui ngaite ṭanpui nâna kan hun leh thate pein, kan hmangaihzia kan târ lang a. (1 Joh. 3:17) Mi dangte chunga hmangaihna kan lantîr hian, Krista dân kan zâwm tihna a ni.

13-14. (a) Johana 13:34, 35-a chhinchhiah angin, Isua’n a hnungzuite chu eng mizia lantîr tûrin nge thu a pêk a, engvângin nge chu chu thupêk thar a nih? (b) Engtin nge thupêk thar chu kan zawm?

¹³ Pathumnaah, Isua chuan a hnungzuite chu mahni hmasial lo hmangaihna lantîr tûrin thu a pe a ni. (Johana 13:34, 35 chhiar rawh.) Isua thupêk chuan Israel mite hnêna Pathian pêk Dânin a phût loh hmangaihna—Isua min hmangaih anga unaute chunga hmangaihna lantîr—a phût avângin, chu chu thupêk thar a ni. Chu chuan mahni hmasial lo hmangaihna lantîr a phût a. * Kan unaute chu mahni kan inhmangaih aia nasa zâwkin kan hmangaih tûr a ni. Isua’n kan tâna a tih angin, unaute tâna kan nun pêk inhuam khawpin anni chu kan hmangaih tûr a ni.

 ¹⁴ Zir Tûrte: Engtin nge thupêk thar chu kan zawm? A awlsam zâwnga sawi chuan, kan unaute tâna inpêkna hmangin a ni. Inpêkna lian tak—kan nunna pêk—chauh ni lovin, thil tê thamte pawh chân kan inhuam a. Entîr nân, kan unau tarte chu inkhâwm tûra kan sâwm ziah hunah te, kan hmangaihte hlim zâwk nâna inhuam taka mahni duh zâwng kan chân hunah te, leilung chhiatna tâwkte ṭanpuina pe tûra kan hnathawhna ata chawlh kan lâk hunahte hian Krista dân kan zâwm a ni. Chu bâkah, kohhran chu kan unau zawng zawngte tâna hmun him ni tûrin kan ṭanpui tihna a ni bawk.

15-17. (a) Engtin nge Isua thiltihte’n rorêlna fel nia a hriatte a târ lan? (b) Engtin nge Isua kan entawn theih?

¹⁵ Bible-a hman “rorêlna fel,” tih ṭawngkam hian Pathianin dik nia a sawite thlei bîk nei lova tihna a kâwk deuh ber a. Engvângin nge Krista dân chuan rorêlna fel a awmtîr kan tih theih?

¹⁶ Pakhatnaah, Isua thiltihte’n rorêlna fel nia a hriatte a târ lan dân hi han ngaihtuah teh. Chutih hun lai chuan, Juda sakhaw hruaitute’n Juda mi ni lote chu an huain, Juda mi nâwlpuite chu an hmusit a, hmeichhiate chu an ngainêp bawk. Mahse, Isua chuan chûng mite chu dik tak leh thlei bîk nei lovin a cheibâwl a. Rinna nêna amah rawn pantu Juda mi ni lote pawh a pawm a ni. (Mt. 8:5-10, 13) Inpâwng huatna nei lovin, mi hausa leh mi retheite hnênah thu a hril a. (Mt. 11:5; Lk. 19: 2, 9) Hmeichhiate chu râwng tak leh chaltlai takin a cheibâwl ngai hek lo. Chu aiin, mite hmuhsita awmte pawh tiamin, hmeichhiate chu zahawm tak leh ngilnei takin a cheibâwl zâwk a ni.—Lk. 7:37-39, 44-50.

¹⁷ Zir Tûrte: Mite chu thlei bîk nei lova cheibâwlin, leh khawtlânga an nihna leh an sakhaw vawnte chu engpawh ni se, ngaithla duh apiangte hnêna thu hrilin Isua kan entawn thei a. Kristian unaupate chuan hmeichhiate zahawm taka cheibâwlin, Isua entawn tûr siam chu an zui a ni. Chutianga kan tih chuan Krista dân kan zâwm tihna a ni.

18-19. Isua’n rorêlna fel chungchângah eng nge a zirtîr a, a zirtîrna aṭangin eng nge kan zir?

¹⁸ Pahnihnaah, rorêlna fel chungchânga Isua zirtîrna chu i lo ngaihtuah ang u. A hnungzuite’n dik taka mi dangte an cheibâwl theih nân thu bulte a zirtîr a. Entîr nân, Dân Rangkachak chungchâng hi han ngaihtuah teh. (Mt. 7:12) Kan za hian dik taka cheibâwl kan duh ṭheuh va. Chuvângin, mi dangte chu dik takin kan cheibâwl tûr a ni. Chutianga kan tih chuan, dik taka min cheibâwl tûra chêttîrin an awm thei ang. A nih leh, dik lo taka cheibâwl kan nih chuan engtin nge ni ang? Isua chuan a hnungzuite chu Jehova’n ‘a chhûn a zâna amah kotute phuba chu a lâksak,’ a nih loh leh fel takin ro a rêlsak ang tih ring tûrin a zirtîr a ni. (Lk. 18:6, 7) Dik tak chuan, he thu hi thutiam a ni: Rorêlna fel ngainatu kan Pathian chuan he ni hnuhnûnga kan hmachhawn fiahnate chu a hria a, a hun ruatah kan tân fel takin ro a rêl ang, tih hi.—2 Thes. 1:6-8.

¹⁹ Zir Tûrte: Isua zirtîr thu bulte kan zawm chuan mi dangte chu dik takin kan cheibâwl ang. Setana khawvêla dik lo taka rorêlsak kan nih chuan, Jehova’n kan tân rorêlna fel a awmtîr ang tih hriain thlamuanna kan nei thei a ni.

20-21. (a) Engtin nge thuneitute chuan mite an cheibâwl ang? (b) Engtin nge pasal chuan mahni hmasial lo hmangaihna a lantîr theih a, pa ber chuan a fate chu engtin nge a cheibâwl ang?

²⁰ Krista dân hnuaiah chuan engtin nge thuneitute’n mite an cheibâwl ang? Chu dân chu hmangaihnaa innghat a nih avângin,  thuneitute chuan an enkawlna hnuaia awmte chu an chawimawi ang a, hmangaihna nei takin an cheibâwl ang. Krista kawng chu hmangaihna kawng a ni tih an hre reng tûr a ni.

²¹ Chhûngkuaah. Pasal chuan a nupui chu “Kristan kohhranho a hmangaih” angin a hmangaih tûr a ni. (Eph. 5: 25, 28, 29) Mahni mamawh aia a nupui mamawh leh ṭhatna tûr dah pawimawh zâwkin, mahni hmasial lo Krista hmangaihna chu a entawn tûr a ni. Mipa ṭhenkhat chuan dik tak leh hmangaihna nei taka mite cheibâwl ngaih pawimawh lohna hmuna an seilen avângin chutiang hmangaihna lantîr chu harsa an ti mai thei. An mize ṭha lote bânsan chu harsa an ti mai thei a; mahse, Krista dân an zawm theih nân chutiang inthlâk danglamnate chu an siam ngei tûr a ni. Mahni hmasial lo hmangaihna lantîrtu pasal chuan a nupui zah a hlawh a. Fate hmangaih tak zettu pa ber chuan a ṭawngkam leh thiltihin a fate chu a tina ngai lo. (Eph. 4:31) Chu aiin, a fate chu a hmangaihzia a hrilh ang a, him nia inhriatna nei tûrin a cheibâwl ang. Chutiang pa ber chuan a fate hmangaih leh rin a hlawh a ni.

22. Petera thawn khat 5:1-3-a târ lan angin, ‘berâmte’ chu tu ta nge ni a, anni chu eng anga cheibâwl tûr nge an nih?

²² Kohhranah. Upate chuan ‘berâmte’ chu an ta a ni lo tih an hre reng tûr a ni a. (Joh. 10:16; 1 Petera 5:1-3 chhiar rawh.) “Pathian pâwlho,” a nih loh leh Pathian berâm rualte, leh “in chante,” a nih loh leh enkawl tûra in hnêna pêkte tih ṭawngkamte hian berâmte chu Pathian ta an nihzia upate chu a hriatnawntîr a ni. A berâmte chu hmangaih tak leh khawngaihna nei taka cheibâwl chu a duh a. (1 Thes. 2:7, 8) Berâm enkawltute anga hmangaihna nei taka an mawhphurhna hlentu upate chuan Jehova lawm an hlawh a ni. Chutiang upate chuan an unaute hmangaih leh zah an hlawh bawk.

23-24. (a) Sual lian tak an chinfel huna upate mawhphurhna chu eng nge ni? (b) Chûng thu buaite an chinfel hunah, upate chuan eng nge an ngaihtuah ang?

 ²³ Sual lian tak chinfel a ngaih huna upate mawhphurhna chu eng nge ni? An mawhphurhna chu Pathianin Israel mite hnêna a pêk Dân hnuaia rorêltute leh upate mawhphurhna nên a inang lo. Chu Dân hnuaiah chuan, upate chuan thlarau lam thil chauh ni lovin, khawtlâng thil leh dân bawhchhiatnate thlengin an chingfel a. Mahse, Krista dân hnuaiah chuan upate’n thlarau lama thil sual tihte chauh an chingfel a ni. Sawrkâr thuneitute chuan khawtlâng thilte leh dân bawhchhiatnate chingfel tûrin Pathian pêk mawhphurhna an nei tih upate chuan an hria a. Chu an thuneihnaah chuan hremna leh tân ina khung theihna a tel a ni.—Rom 13:1-4.

²⁴ Kohhrana mi tuemawin sual lian tak a tih hunah upate mawhphurhna chu eng nge ni? Dinhmunte chu Bible ṭanchhana en dikin thu tlûknate an siam a ni. Anni chuan Krista dân chu hmangaihnaa innghat a ni tih an hre reng a. Hmangaihna chuan kohhran upate chu heti hian a ngaihtuahtîr a ni: Thil sual tihna sawhkhâwk tuar kohhran chhûnga mi chu ṭanpui tûrin eng nge tih ngai? Thil sual titu chungchângah hmangaihnain kohhran upate chu heti hian a ngaihtuahtîr ang: Inchhîrna a lantîr em? Thlarau lama ṭha chho leh tûrin kan ṭanpui thei ang em?

25. A dawta thuziakah eng nge kan sawiho vang?

²⁵ Krista dân hnuaia kan awm avângin kan va lâwm tak êm! Chu dân zâwm tûra theih tâwp kan chhuah ṭheuh hian, kohhran chu unaute’n hmangaih, ngaihhlut, leh him nia an inhriatna hmun ni tûrin kan ṭanpui tihna a ni. Mahse, ‘mi sualte an sual zual deuh deuhna’ khawvêlah kan awm a. (2 Tim. 3:13) Chuvângin, kan fîmkhur reng tûr a ni. Kristian kohhran chuan mipat hmeichhiatna lama naupang khawih chhiatna a chinfel hunah engtin nge Pathian rorêlna fel chu a lantîr theih? A dawta thuziakah chu zawhna chu chhân a ni ang.