1-3. (a) Sâm 5:4-6-a sawi angin, Jehova chuan suahsualna chu engtin nge a ngaih? (b) Engvângin nge naupang khawih chhiat chu “Krista dân” nên a inkalh kan tih theih?

PATHIAN JEHOVA chuan suahsualna zawng zawng chu a hua a. (Sâm 5:4-6 chhiar rawh.) Mipat hmeichhiatna lama naupang khawih chhiatna ang chi sualna râpthlâk tak chu a va haw lehzual dâwn tak êm! Jehova entawntu a Thuhretute kan nih angin, naupang khawih chhiatna chu kan hua a, chutiang thil sual chu Kristian kohhran chhûnga a awm kan phal lo.—Rom 12:9; Heb. 12:15, 16.

² Naupang khawih chhiatna engpawh chuan “Krista dân” a kalh tlat a! (Gal. 6:2) Engvângin nge chutianga kan sawi theih? Thuziak hmasaa kan hriat tâk angin, Krista dân—a thusawi leh a entawn tûr siam hmanga Isua zirtîrna zawng zawng—chu hmangaihnaa innghat a nih a, rorêlna fel a awmtîr vâng a ni. Chu dân thununa awmin, Kristian dikte chuan naupangte chu him leh hmangaihna dawng nia inhriatna nei tûrin an cheibâwl a. Mahse, naupang khawih chhiatna chu naupangte him lo leh hmangaihna dawng lo nia inhriatna neihtîrtu, mahni hmasialna thiltih dik lo tak a ni.

³ Lungchhiatthlâk takin, naupang khawih chhiatna chu khawvêl pumah hri angin a lêng a, chu chuan Kristian dikte pawh a nghawng a ni. Engvângin nge? “Mi sual leh tihdertute” chu an tam hle a, an zînga ṭhenkhat chuan kohhran chhûnga rawn luh an tum thei a ni. (2 Tim. 3:13) Chu bâkah, kohhran chhûnga mi nia inchhâl mi ṭhenkhat chu tûn hmaa tisa châkna herh nei leh naupang lo khawih chhe tawhte an ni. Naupang khawih  chhiat chu sual lian tak a nih chhan i lo sawiho vang u. A hnuah upate’n naupang khawih chhiatna sual pawh tiamin, sual pawi tak titute dinhmun an chinfel dân leh nu leh pate’n an fate an vênhim theih dân kan sawiho bawk ang. *

4-5. Engtin nge naupang khawih chhiatna chu a tuartu chunga thil sual tihna a nih?

⁴ Naupang khawih chhiatna chuan nghawng thui tak a nei a. Khawih chhiatna tuartu bâkah amah lainattu—a chhûngte leh Kristian unaute pawh a nghawng tel a ni. Naupang khawih chhiat chu sual lian tak a ni.

⁵ Naupang khawih chhiat hi a tuartu * chunga thil sual tihna a ni. Mi dangte chunga rilru natna leh hrehawm tawrhna thlentîr chu sual a ni a. A dawta thuziaka kan hmuh leh tûr angin, naupang khawih chhetu chuan chutiang sual chu a ti a—naupang chungah rilru natna nasa tak a thlen a ni. Naupangin a rinchhanna chu a tihchhiatsak a, him nia a inhriatna pawh a lâk bosak bawk. Naupangte chu chutiang thil sual lak ata vênhim tûr an ni a, khawih chhiat tuarte chuan thlamuanna leh ṭanpuina an mamawh a ni.—1 Thes. 5:14.

6-7. Engtin nge naupang khawih chhiat chu kohhran leh sawrkâr thuneitute chunga thil sual tihna a nih?

⁶ Naupang khawih chhiat hi kohhran chunga thil sual tihna a ni. Kohhran chhûnga miin naupang a khawih chhiat hian kohhran hming a tichhia a ni. (Mt. 5:16; 1 Pet. 2:12) Chu chu ‘rinna lama ṭhahnemngai taka beitu’ Kristian rinawm maktaduai tam takte tân a va runthlâk tak êm! (Jud. 3) Inchhîrna nei lo va thil sual titute leh kohhran hming tichhetute chu kan zînga an awm kan phal lo.

⁷ Naupang khawih chhiat hi sawrkâr thuneitute chunga thil sual tihna a ni. Kristiante chu “an chunga rorêltute thu thuin” an awm tûr a ni a. (Rom 13:1) Kan chênna ram dânte zâwmin kan intukluhzia kan lantîr a ni. Kohhran chhûnga miin naupang khawih chhiatna ang chi, dân bawhchhiatna thil sual a tih chuan, sawrkâr thuneitute chunga thil sual ti a ni. (Tirhkohte 25:8 nên khaikhin rawh.) Upate chuan ram dân kengkawh tûrin thuneihna nei lo mah se, naupang khawih chhetu chu a thil sual tih sawhkhâwk lakah an hum lo. (Rom 13:4) Thil sual titu chuan a sual man chu a seng ang.—Gal. 6:7.

8. Engtin nge Jehova chuan mahni mihringpui chunga thil sual tihna chu a thlîr?

⁸ Naupang khawih chhiat hi a bul berah chuan, Pathian chunga thil sual tihna a ni. (Sâm 51:4) Mahni mihringpui chunga thil sual tih chu Jehova chunga thil sual tihna a ni a. Israel mite hnêna Pathian pêk Dân aṭanga entîrna pakhat han ngaihtuah ta ila. Dânin a ṭhenawm rawktu emaw, bumtu emaw chuan ‘LALPA thu a bawhchhia’ tih a sawi a. (Lev. 6:2-4) Chutih a nih chuan, kohhran chhûnga miin naupang a khawih chhiat a, a himna a rawk chuan, ani chuan Pathian thu a bawhchhia a ni. Chutianga mi chuan Jehova hming nasa takin a tichhia a. Chuvângin, naupang khawih chhiatna chu a nihna ang takin Pathian chunga thil sual tihna lian tak anga thiam loh chantîr ngei tûr a ni.

9. Kum tam tak aṭang tawh khân, Jehova inawpna pâwl chuan naupang khawih chhiatna chungchânga Bible ṭanchhan eng thute nge a tihchhuah a, engvângin nge?

 ⁹ Kum tam tak aṭang tawhin, Jehova inawpna pâwl chuan naupang khawih chhiatna chungchângah Bible ṭanchhan thu tam tak a tichhuak a. Entîr nân, Vênnainsâng leh Awake! thuziakahte chuan mipat hmeichhiatna lama khawih chhiat tâwkte’n rilru lama an hliam tawh hmachhawn dân tûr te, mi dangte’n an ṭanpui theih dân leh an fuih theih dân te, leh nu leh pate’n an fate an vênhim theih dânte chu târ lan a ni a. Upate chuan naupang khawih chhiatna sual chinfel dân chungchângah Bible ṭanchhan zirtîrna chu chipchiar takin an dawng a ni. Inawpna pâwl chuan kohhranin naupang khawih chhiatna sual a chinfel dân chu a enfiah reng a. Engvângin nge? Kan chinfel dân chu Krista dân nên a inmil tih a chian duh vâng a ni.

10-12. (a) Upate chuan sual lian tak telna thil engpawh an chinfel hunah, eng nge an hriat reng ang a, eng nge an ngaihtuah tel ang? (b) Jakoba 5:14, 15-a sawi angin, upate chuan eng nge tih an tum tlat?

¹⁰ Upate chuan sual lian tak telna thil engpawh an chinfel hunah Krista dânin berâmte chu hmangaih taka cheibâwl tûr leh Pathian mithmuha dik tak leh fel taka ti tûrin a phût tih an hre reng a. Chuvângin, sual lian tak tih chungchânga hriattîrna an dawn hunah ngaihtuah tûr tam tak an nei a ni. Upate chuan Pathian hming tihthianghlimna chu an ngai pawimawh ber a. (Lev. 22:31, 32; Mt. 6:9) Anni chuan kohhrana an unaute thlarau lam chu an ngaihsak tak zet a, thil sual tihna tuartute ṭanpui chu an duh a ni.

¹¹ Chu bâkah, thil sual titu chu kohhran chhûnga mi a nih chuan, upate’n chu pa chu a theih chuan thlarau lama tun din leh an tum a ni. (Jakoba 5:14, 15 chhiar rawh.) Châkna sual avânga sual lian tak titu Kristian chu thlarau lamah a dam lo va. Chu chu Jehova nêna inlaichînna ṭha a nei tawh lo tihna a ni. * Upate chu thlarau lam doctor-te anga sawi theih an ni a. Anni chuan ‘dam lo [hetah hi chuan, thil sual titu] chu tihdam’ an tum a ni. Bible ṭanchhana an fuihnate chuan Pathian nêna an inlaichînna siam ṭha leh tûrin a ṭanpui thei a; mahse, chu chu inchhîrna dik tak a neih chauhvin a ni ang.—Tirh. 3:19; 2 Kor. 2:5-10.

¹² Upate chuan mawhphurhna rit tak an nei tih a chiang hle. Pathianin a kawltîr berâmte chu an ngaihsak tak zet a ni. (1 Pet. 5:1-3) An unaute chu kohhranah him nia inhriatna nei tûrin an duh a. Chuvângin, naupang khawih chhiatna pawh tiamin, thil sual lian tak tihna chungchânga hriattîrna an dawn hunah hma an la nghâl vat ṭhîn a ni. Paragraph  13,  15, leh  17-na tîra zawhnate chu ngaihtuah rawh.

13-14. Upate chuan naupang khawih chhia nia puhna chu sawrkâr thuneitute hnêna hriattîr tûr a ni tih sawrkâr dân an zâwm em? Hrilhfiah rawh.

 ¹³ Upate chuan naupang khawih chhia nia puhna chu sawrkâr thuneitute hnêna hriattîr tûr a ni tih sawrkâr dân an zâwm em? Zâwm e. Chutiang dân awmna ramahte chuan, upate’n naupang khawih chhia nia puhna thu an dawn hian sawrkâr dânte chu zawm an tum a ni. (Rom 13:1) Chutiang dânte chu Pathian dân nên a inkalh lo. (Tirh. 5:28, 29) Chuvângin, naupang khawih chhiaa puhna thu an hriat hunah, sawrkâr thuneitute hnêna hriattîr dân tûr chungchânga kaihhruaina chu an zawng nghâl ṭhîn a ni.

¹⁴ Upate chuan khawih chhiat tuartu leh a nu leh pate, leh chu mi chanchin hretu mi dangte hnênah sawrkâr thuneitute an hriattîr thei tih an hrilh ang. A nih leh, thil sual titu chu kohhran chhûnga mi a nih a, chutianga a  hrilh avângin tlâng hriat lo ni ta se, engtin nge ni ang? Sawrkâr thuneitute hnêna va hrilhtu Kristian chuan Pathian hming a tichhia niin a inngai tûr a ni em? Ni lo ve. Pathian hming tichhetu chu naupang khawih chhetu zâwk a ni.

15-16. (a) Timothea thawn khat 5:19-a sawi angin, upate’n judicial committee an din hmain engvângin nge a lo berah hretu pahnih an awm a ngaih? (b) Kohhrana tuemaw chu naupang khawih chhia nia puh a nih chuan upate’n eng nge an tih ang?

 ¹⁵ Kohhranah upate chuan judicial committee an din hmain engvângin nge a lo berah hretu pahnih an awm a ngaih? He thil phût hi rorêlna fel chungchânga Bible tehna sâng tak zînga mi a ni a. Thil sual tih inpuanna a awm loh chuan, puhna chu a dik a ni tih nemngheh nân leh upate’n judicial committee an din theih nân hretu pahnih an awm a ngai a ni. (Deut. 19:15; Mt. 18:16; 1 Timothea 5:19 chhiar rawh.) Chu chu naupang khawih chhiatna chungchângah pawh thuneitute hnêna hriattîr nân hretu pahnih an awm a ngai tihna a ni em? Ni lo ve. Upate emaw, mi dang tân emaw hetiang dân bawhchhia nia puhna chungchâng thuneitute hnêna hriattîr nân, hretu pahnih an neih hmasak a ngai lo.

¹⁶ Kohhrana tuemaw chu naupang khawih chhetua puh a ni tih an hriat hunah upate chuan chutiang thil chungchânga sawrkâr dân chu an zâwm ang a; tichuan, judicial committee din tlâk a nih leh nih loh an chhui chiang ang. Ani chuan puhna a lo pawm duh loh chuan, kohhran upate chuan thil awm dân hretute thusawi chu an ngaithla ang. A lo berah pawh mi pahnih—a puhtu bâkah chu thilthleng hretu, a nih loh leh ṭum danga naupang a khawihchhiatna hretu mi dang—a awm chuan, judicial committee din a ni ṭhîn. * Hretu dang a awm loh pawhin, a puhtu chuan dâwt a sawi tihna a ni chuang lo. Thil sual tih chu hretu pahnih hmanga nemngheh theih a nih loh pawhin, upate chuan mi dangte rilru natna nasa tak thlentu thil sual tihna lian tak a thleng tak tak pawh a ni thei tih an hria a ni. Upate chuan chutiang thil avânga rilru lam hliam tuarte chu an thlamuanin, an ṭanpui zawm zêl tûr a ni a. Chu bâkah, naupang khawih chhetu nia an puha chuan kohhrana mi dangte a tihchhiat loh nân upate chu an harhvâng reng tûr a ni.—Tirh. 20:28.

17-18. Judicial committee-a telte mawhphurhna chu hrilhfiah rawh.

 ¹⁷ Judicial committee mawhphurhna chu eng nge ni? “Judicial” tih ṭawngkam hian naupang khawih chhetu chu dân anga hrem a nih dâwn leh dâwn loh chungchângah upate’n ro an rêl tihna a kâwk lo. Anni chu sawrkâr dân kenkawhnaah an inrawlh lo va; dân bawhchhetute hrem chu sawrkâr thuneitute kutah an dah a ni. (Rom 13:2-4; Tit. 3:1, 2) Chu aiin, upate chuan thil sual titu chu kohhran chhûnga a awm zawm theih leh theih loh chungchângah thu tlûkna an siam mai zâwk a ni.

¹⁸ Judicial committee-a tel upate chuan thil sual titu leh Pathian leh a unaute inkâra an inlaichînna chungah chauh mawhphurhna an nei a. Bible ṭanchhanin, naupang khawih chhetuin inchhîrna a neih leh neih loh chungchângah thu tlûkna an siam a ni. Inchhîrna a neih loh chuan, hnawh chhuah a ni ang a, chu chu kohhranah puan a ni ang. (1 Kor. 5:11-13) A inchhîr tak zet erawh chuan, kohhranah a awm chhun zawm thei ang. Mahse, upate chuan kohhranah chanvo leh nihna chelh tûrin a tling thei ngai tawh lo pawh a ni thei tih an hrilh ang. Upate chuan naupangte himna tûr an ngaihtuah avângin, kohhran chhûnga kum tling lo naupang nei nu leh pate chu thil sual titu nêna an fate inkawm dân endik tûrin a  rûkin an vaukhân ang. Chutianga vaukhânna an pêk hunah, upate chuan khawih chhiat tâwktu chanchin sawi lang lo tûrin an fîmkhur a ni.

19-22. Nu leh pate chuan an fate vênghim tûrin eng nge an tih theih? (A kâwma milem en rawh.)

¹⁹ Dinhmun hlauhawm laka fate vênghim tûra mawhphurhna nei chu tute nge ni? Nu leh pate an ni. * I fate chu ‘LALPA laka rochan,’ a nih loh leh thilpêk hlu tak an ni a. (Sâm 127:3) Chu thilpêk vênhim chu i mawhphurhna a ni. Naupang khawih chhiatna laka i fate vênghim tûrin eng nge i tih theih?

²⁰ A hmasain, naupang khawih chhiatna chungchâng zir rawh. Naupang khawih chhiat chîngte chungchâng leh an bum dân chu zir la. Dinhmun hlauhawm leh mi hlauhawmte chu hriat tum ang che. (Thuf. 22:3; 24:3) Naupang khawih chhetu chu naupangin a hriat chian leh a mi rin tak a ni tlângpui ṭhîn tih hria ang che.

²¹ A pahnihnaah, i fate nên hian inbiakpawhna ṭha nei reng rawh. (Deut. 6:6, 7) Chutah chuan ṭha taka ngaithlatu nih a tel a. (Jak. 1:19) Naupangte chuan khawih chhiatna an tawh chu sawi chhuah an hreh ṭhîn tih hria ang che. An thusawi chu mite’n an âwih loh an hlau mai thei a, a nih loh leh amah khawih chhetuin sawi chhuak lo tûrin a vau bet tlat pawh a ni thei bawk. Thil fel lo awm nia i hriat chuan ngilnei takin zâwt la, dawhthei takin ngaithla ang che.

²² A pathumnaah, I fate chu zirtîr rawh. An kum azirin mipat hmeichhiatna chungchâng zirtîr ang che. Tuemawin mawi lo taka khawih a tum huna an sawi tûr leh an tih tûrte chu zirtîr rawh. Pathian inawpna pâwlin fate vênhim dân tûr chungchânga kaihhruaina min pêkte chu hmang rawh.—“ Mahni Inzirin, I Fate Pawh Zirtîr Rawh” tih bâwm chu en ang che.

23. Engtin nge mipat hmeichhiatna lama naupang khawih chhiatna chu kan thlîr a, a dawta thuziakah eng zawhna nge kan sawiho vang?

²³ Jehova Thuhretute kan nih angin, mipat hmeichhiatna lama naupang khawih chhiat chu sual lian tak leh thil sual râpthlâk tak niin kan thlîr a. Krista dân thununa awm, kan kohhran chuan naupang khawih chhetute chu an thil sual tih sawhkhâwk lakah a hum lo. Chutih rualin, khawih chhiatna tâwkte chu engtin nge kan ṭanpui theih? A dawta thuziak chuan chu zawhna chu a chhâng ang.