1-2. Thuhretu tam takin eng harsatna nge an hmachhawn?

TIRHKOH Paula chuan Timothea leh Kristian zawng zawngte chu an rawngbâwlna hlen tûrin a fuih a. (2 Tim. 4:5) Kan za vai hian chu fuihna chu kan ngai pawimawh a ni. Mahse, harsatnate pawh a awm a. Unau tam tak tân thu hrilh rawngbâwlnaa tel tûr chuan huaisenna neih a ngai tak zet a ni. (2 Tim. 4:2) Entîr nân, kan rawngbâwlna khuahkhirhna leh khap behna rama awm kan unaute hi han ngaihtuah teh. Tân ina khung theih an ni tih an hre chung pawhin rawngbâwlnaah an tel a ni.

² Jehova mite chuan anmahni tibeidawng thei harsatna chi hrang hrang an hmachhawn a. Entîr nân, unau tam tak chu an chhûngkaw mamawhte phuhhrûk nân dârkâr tam tak hna an thawh a ngai a. Rawngbâwlnaah tam lehzuala tel duh mah se, chawlhkâr tâwpah chuan an chau hle tawh ṭhîn a ni. Mi dangte chu natna benvawn vâng emaw, an kum upat vâng emawin an tih theihte a beitham hle a; anni chu pâwn an chhuak thei lo pawh a ni thei. Mi dang lehte chuan hlutna nei lo nia inhriatna an nei reng bawk. Middle East-a awm Unaunu Mary-i * chuan: “A thim zâwnga ka thil thlîr dân chu theih tâwp chhuaha ka do avângin ka rilru a chau hle ṭhîn a. Chu chuan rawngbâwlna atâna hman tûr ka hun leh thate a lâk bo avângin inthiam lohna min neihtîr a ni,” tiin a sawi.

3. He thuziakah hian eng nge kan sawiho vang?

³ Kan dinhmun chu eng pawh ni se, Jehova chuan mi mal harsatnate hmachhawn thei tûr leh kan dinhmun azira a rawngbâwl thei tûrin min ṭanpui thei a ni. Chutianga min ṭanpui theih dân kan sawiho hmain, Paula leh Timothea chu harsatna an hmachhawn chung pawha an rawngbâwlna hlen tûra a tihchak dân i lo bih chiang ang u.

4. Eng harsatnate nge Paula’n a hmachhawn?

⁴ Paula chuan harsatna tam tak a hmachhawn a. A bîk takin, vuak te, lunga den te, leh tân ina khungte a nih khân chakna a mamawh lehzual a ni. (2 Kor. 11:23-25) A ngaihtuahna ṭha lote do châng a nei tih tlang takin a sawi a. (Rom 7:18, 19, 24) Ani chuan ‘tisa hlîng’ ang hrisêl lohna chu chhel taka a tawrh a ngai a, chu chu Pathianin paih bosak se tih a duh hle a ni.—2 Kor. 12:7, 8.

5. Paula chuan harsatnate a hmachhawn chung pawhin eng nge a hlen chhuah?

⁵ Paula’n chûng harsatna zawng zawng chu a hmachhawn ngai mah se, Jehova’n ani chu rawngbâwl zawm zêl thei tûrin chakna a pe a. Paula thil hlen chhuahte hi han ngaihtuah teh. Entîr nân, Rom khuaa a ina tântîr a nih khân, Juda sakhaw hruaitute leh sawrkâr thuneitute hmaah ṭhahnemngai takin chanchin ṭha a hril a. (Tirh. 28:17; Phil. 4:21, 22) Praetorian sipai pâwlho hnênah vawi tam tak thu a hrilhin, amah rawn tlawhtu zawng zawngte hnênah thu a hrilh bawk. (Tirh. 28:30, 31; Phil. 1:13) Chutih hun lai chuan, Paula chu tûn laia Kristian dikte hlâwkpui tûr thute ziak tûra thlarauva thâwk khum a ni a. Chu bâkah, Paula entawn tûr siam chuan Rom khua kohhrana unaute chu a tichakin, ‘Pathian thu hrilh kawngah huaisenna nasa tak a neihtîr lehzual a ni.’ (Phil. 1:14) A tihtheihte chuan chin tâwk neih châng nei mah se, chûngte chu a ṭha thei ang berin a hmang a, ‘chachin ṭha tihdarhna tûr a lo ni ta hlauh zâwk ṭhîn a ni.’—Phil. 1:12.

6. Korinth thawn hnih 12:9, 10-a sawi angin, engin nge Paula chu a rawngbâwlna hlen chhuak tûra ṭanpui?

⁶ Paula chuan Jehova rawngbâwlnaah mahni chakna ni lovin, Pathian chakna zâwkin engkim a tithei tih a hria a. Pathian thiltihtheihna chu ‘chak lohnaah tihfamkimin a awm’ tih a sawi bawk. (2 Korinth 12:9, 10 chhiar rawh.) Tihduhdahna te, tân ina khung te, leh harsatna dangte a hmachhawn chung pawha a rawngbâwlna a hlen chhuah theih nân, Pathian Jehova’n Paula chu a thlarau thianghlim hmangin chakna a pe a ni.

7. Timothea chuan a rawngbâwlna hlen chhuak tûrin eng harsatnate nge a hneh ngai?

⁷ Paula ṭhian, ṭhalai Timothea pawhin a rawngbâwlna hlen chhuak tûrin Pathian thiltihtheihna a rinchhan a ngai a. Ani chuan Paula chu a missionary zinkawng thui takah a  zui a. Chu bâkah, Paula chuan Timothea chu kohhrante tlawha fuih tûrin a tîr bawk. (1 Kor. 4:17) Timothea chuan tling tâwk lo nia inhriatna a nei mai thei. Chu chu Paula’n: “I naupanna tu mahin ngainêp suh se,” tia a hrilh chhan pawh a nih ngei a rinawm. (1 Tim. 4:12) Chutih hun lai chuan, Timothea chuan tisaa hlîng a tuar a, ‘a dam lo fo’ bawk. (1 Tim. 5:23) Mahse, Jehova thlarau thianghlim thiltihthei tak chuan chanchin ṭha hril tûr leh a unaute rawngbâwl tûrin chakna a pe ang tih a hria a ni.—2 Tim. 1:7.

8. Engtin nge Jehova’n tûn laia a mite chu a tihchak?

⁸ Tûn laiah, Jehova chuan a mite chu rinawm taka a rawng an bâwl zawm zêl theih nân ‘thiltihtheihna nasa tak’ a pe a ni. (2 Kor. 4:7) Min tichak tûr leh a chunga rinawm reng tûra min ṭanpui nâna Pathian Jehova min pêk ṭanpuina pali: ṭawngṭaina, Bible, Kristian inkawmhona, leh kan rawngbâwlnate chu i lo sawiho vang u.

9. Engtin nge ṭawngṭainain min ṭanpui theih?

⁹ Ṭawngṭaina hmanga tihchakna. Ephesi 6:18-a sawi angin, Paula chuan “eng hun pawha” Pathian hnêna ṭawngṭai tûrin min fuih a. Chutianga kan tih chuan, Pathianin min tichak ang. Bolivia rama awm Jonnie-a chuan harsatna tam tak kârah ṭawngṭainain a ṭanpui dân chu a tawng a. A nupui leh a nu leh pate chu a rualin thih ngamin an dam lo va. Jonnie-a chuan an mamawhte ngaihsak tûrin theih tâwp a chhuah a. A nu chuan a boralsan a, a nupui leh a pa erawh hun rei tak hnuah an ṭha chhuak leh hrâm a ni. A han thlîr lêt chuan, Jonnie-a’n, “Lungngaihna nasa tak ka tawh chhûng zawnga min ṭanpui reng ṭhîntu chu Jehova hnêna ka rilru leih bua a, ṭawngṭai hi a ni,” tiin a sawi. Jehova chuan Jonnie-a chu chhel taka tuar chhuak thei tûrin a mamawh chakna a pe a ni. Bolivia rama kohhran upa Unau Ronald-a chuan a nuin cancer natna a vei tih a hria a. Thla khat hnuah a nu chuan a boralsan a ni. Chu hun harsa tak chhûng chuan engin nge ṭanpui? Ani chuan: “Jehova hnênah ṭawngṭaiin ka thinlunga awmte leh ka rilru hahna zawng zawng ka hrilh vek a. Ani chuan tu dang zawng aiin min hre thiam a, mahni ka inhriat ai pawhin min hre chiang zâwk tih ka hria,” tiin a sawi. A châng chuan, harsatnain min chîmbuai avângin ṭawngṭai huna sawi tûr pawh kan hre lo mai thei. Mahse, Jehova chuan kan ngaihtuahna leh rilru vei zâwngte sawi chhuah harsa kan tih hunah pawh, a hnêna ṭawngṭai tûrin min sâwm a ni.—Rom 8:26, 27.

10. Hebrai 4:12-a târ lan angin, engvângin nge Bible kan chhiar a, kan thu chhiarte chhût ngun chu a pawimawh?

¹⁰ Bible hmanga tihchakna. Paula chuan chakna leh thlamuanna nei tûra Bible thute a rinchhan ang bawkin, keini pawhin kan rinchhan thei a. (Rom 15:4) Pathian Thu kan chhiar a, kan chhût ngun hian, Pathian Jehova chuan a thlarau thianghlim hmangin kan dinhmuna Bible thuin min ṭanpui theih dân hre thiam lehzual tûrin min ṭanpui thei a ni. (Hebrai 4:12 chhiar rawh.) Kan sawi tâk Unau Ronald-a chuan: “Zan tina Bible ka chhiar ṭhin avângin ka lâwm tak zet a ni. Jehova miziate leh hmangaih taka a rawngbâwltute a cheibâwl dânte ka chhût ngun ṭhîn a. Chu chuan chakna nei leh tûrin min ṭanpui a ni,” tiin a sawi.

11. Engtin nge Bible-in lusûn unaunu chu a tihchak?

¹¹ Pathian Thu chhût ngunna hmangin kan dinhmun chungchângah rilru put hmang dik tak kan nei thei a. Lusûn hmeithai pakhatin Bible a hlâwkpui dân hi han ngaihtuah teh. Kohhran upa pakhat chuan Joba bu chhiarna aṭanga zir tûr ṭha tak a neih theih thu a  hrilh a. Chutianga a tih chuan, Joba chu a ngaihtuah dân dik lo avângin sawisêl a duh ta mai a. A rilruin, Joba hnênah: “Joba! I harsatna chauh ngaihtuah suh!” tiin a vaukhân a ni. Mahse, a hnuah, Joba rilru put hmang ang a lo nei reng tih a hre chhuak ta a. Chu chuan a thil thlîr dânte siam ṭha tûr leh a pasal a sûn avânga a rilru nâte hneh tûra chakna nei tûrin a ṭanpui a ni.

12. Entin nge Jehova’n kohhrana unaute hmanga min tihchak?

¹² Kristian inkawmhona hmanga tihchakna. Pathian Jehova’n Kristiante a tihchak dân kawng dang leh chu Kristian unaute hmangin a ni a. Paula chuan thlarau lama a unaute nêna “inthlamuan tawn” a duhzia a ziak a ni. (Rom 1:11, 12) Kan sawi tâk Unaunu Mary-i chuan chutianga unaute nêna inkawmho chu nuam a ti hle a. Ani chuan: “Jehova’n harsatnate ka tâwk tih hre lotu unaute chu a hmang a. Anni chuan min tichak theitu thute min hrilhin, card-te min thawn a, chu chu ka mamawh tak a ni. Chu chuan ka harsatna ang tâwktu unau dangte be pawh tûr leh an thiltawn aṭanga inzir tûrin min ṭanpui a. Chu bâkah, upate chuan kohhrana unaute’n min hmangaih thu min hriatnawntîr ṭhîn,” tiin a sawi.

13. Entin nge kohhran inkhâwmnaah kan intihchak tawn theih?

¹³ Infuih tawnna atâna hmun ṭha ber chu kohhran inkhâwmna hi a ni a. I inkhâwm hunah, engvângin nge mi dangte chu i hmangaihzia leh i ngaihhlutziate hrilh a, tichak tûra hma i lâk loh vang? Entîr nân, kohhran upa Peter-a chuan inkhâwm ṭan hmain ring lotu pasal nei unaunu pakhat hnênah: “Inkhâwmnaa ka hmuh che hian min tichak tak zet a ni. I fate paruk nên in rawn inkhâwm ziahin, chhânna pêk tûrte in rawn inbuatsaih thlap ṭhîn a,” tiin a sawi. Unaunu chuan: “Vawiina i thu min hrilh hi ka mamawh tak a ni tih i hre lo pawh a ni mai thei,” tiin mittui tling chungin a hrilh a ni.

14. Engtin nge rawngbâwlnaa telna chuan min ṭanpui?

¹⁴ Rawngbâwlna hmanga tihchakna. Mi dangte hnêna Bible thutak kan hrilh hian, min chhâng lêt ṭha emaw, ṭha lo emaw pawh ni se, hahdamna leh phûrna kan nei a. (Thuf. 11:25) Unaunu Stacy-i chuan rawngbâwlnain a tihchak dân chu a tawng a. A chhûngte zînga pakhat hnawhchhuah a nih chuan pawi a ti tak zet a, heti hian a inzâwt fo ṭhîn a ni, ‘Ka chhûngte hi hei aiin ka ṭanpui lehzual thei ang em?’ tiin. Chu chuan a rilru a luah khah êm avângin thil dang eng mah a ngaihtuah thei lo va. Chu dinhmun hrehawm tak chu hneh thei tûrin ani chu engin nge ṭanpui? Rawngbâwlna a ni! Thu hrilh rawngbâwlnaah a tel a, a ṭanpuina mamawhtu rawngbâwlna biala mite chu a ngaihven tlat a. Ani chuan: “Chumi hun chhûng chuan, Pathian Jehova’n hmasâwn chak tak Bible zirpui pakhat min pe a. Chu chuan nasa takin min tichak a ni. Ka nuna min ṭanpuitu ber chu rawngbâwlnaa tel hi a ni,” tiin a sawi.

15. Unaunu Mary-i thusawi aṭangin eng nge i zir?

¹⁵ Mi ṭhenkhat chu an dinhmunte avângin rawngbâwlnaah thawk tam tâwk lo angin an inhre mai thei a. Chutianga i inhria a nih chuan, theih tâwp i chhuahnain Jehova a tilâwm tih hre reng ang che. Unaunu Mary-i thiltawn kha han ngaihtuah leh teh. Ṭawng dang hmang thu hrilhna biala a insawn chuan, ṭangkai lo hle niin a inhria a. Ani chuan, “Hun engemawti chhûng rawngbâwlnaa ka tihtheih awm chhun chu tâwi têa thusawi te, Bible châng pakhat chhiarsak te, a nih loh leh tract pakhat pêkte hi a ni,” tiin a sawi. Chu chuan a rawngbâwlna hmuna ṭawng thiam unaute nêna a inkhaikhin chuan tling lo hle nia inhriatna a neihtîr a ni. Mahse, a ngaihtuah dân chu a siamrem ta a. A tihtheihte chu beitham  hle mah se, Jehova’n a hmang thei tih a hria a. Ani chuan, “Nun chhanhim theitu thutak chu mâwlmang tak a ni a, chu chuan mite nun a thlâk danglam thei a ni,” tiin a sawi.

16. Engin nge pâwn chhuak thei lote chu chakna nei tûra ṭanpui?

¹⁶ Jehova chuan pâwn chhuak thei lo kan ni chung pawha rawngbâwlnaa tel duhna kan neih chu a hmuin, a hlut hle a. Ani chuan min enkawltute emaw, doctor-te emaw hnêna thu hrilh theihna hun remchâng min pe thei a ni. Tûn hmaa rawngbâwlnaa kan thawh theih dânte leh tûna kan thawh theih dânte kan khaikhin chuan kan lunghnual thei a. Mahse, tûna Pathian Jehova min ṭanpui dânte kan hriatthiam chuan, eng harsatna pawh tâwk mah ila, hlim taka tuar chhuak thei tûrin kan mamawh chakna kan nei ang.

17. Thuhriltu 11:6-a sawi angin, engvângin nge kan rawngbâwlna rah chhuahte chu hmu nghâl lo mah ila, rawngbâwlnaa kan tel zawm zêl ang?

¹⁷ Thutak chi kan tuhte zînga a khawi ber hian nge zung kai a, ṭhang chho dâwn tih kan hre lo. (Thuhriltu 11:6 chhiar rawh.) Entîr nân, kum 80 aia upa Unaunu Barbara-i chuan phone leh lehkhathawn hmangin thu a hril ṭhîn a. A lehkhathawn pakhatah chuan, “I Tâna Pathian Thiltih Chu,” tih thuziak telna Vênnainsâng, March 1, 2014 chhuak chu a thun tel a. Ani chuan tûn hmaa Jehova Thuhretute lo ni tawh ṭhîn nupa tuak khat hnênah chu lehkha chu a thawn tih rêng a hre lo. Anni chuan chu magazine chu an chhiar nawn fo va. A pasal chuan Pathian Jehova’n mi mal taka a rawn bia angin a hria a. Chu nupa tuak chu an rawn inkhâwm ṭan leh a, an kalbo aṭanga kum 27 hnuah Thuhretu an rawn ni leh ta a ni. Unaunu Barbara-i chu a lehkhathawn pakhatin chutianga rah ṭha a chhuah tih a hmuh huna tihchaka a awm dân tûr leh a phûr dân tûr chu han mitthla teh!

18. Pathian thiltihtheihna hlâwkpui tûrin eng nge kan tihtheih?

¹⁸ Pathian Jehova chuan a thiltihtheihna nasa tak dawng tûrin hun remchâng tam tak min pe a. Ṭawngṭaina te, Bible te, Kristian inkawmhona te, leh rawngbâwlnate ang chi Jehova min pêk ruahmannate kan hman ṭangkai hian ani chuan min ṭanpui theiin, min ṭanpui a duh tih kan rinzia kan târ lang a ni. Chuvângin, ‘a lama rilru dik tak putute chunga a chakzia tilangtu’ kan Pa vâna mi chu i rinchhan tlat ang u.—2 Chro. 16:9.