1. Kan zînga tam takin eng harsatna nge kan hmachhawn?

 THLARAU lam thiltum i insiam tawhah tihhlawhtlin harsa tih i nei em? b I nei a nih chuan nangmah chauh i ni lo. Entîr nân, Philip-a chuan a ṭawngṭaina tihhmasâwn leh tam lehzuala ṭawngṭai a duh a; mahse, ṭawngṭaina atâna hun neih harsa a ti a ni. Erika-i thiltum chu thlawhhma rawngbâwlna inhmuhkhâwmnaa a hun taka thlen a ni a; mahse, inkhâwm zawng zawng deuhthawah a la tlai reng a ni. Tomáš-a chuan vawi tam tak Bible chhiar chhuah a tum a. Ani chuan: “Bible chhiar hi nuam ka ti lo. Vawi thum ka bei tawh a; mahse, Leviticus bu thleng bâk ka chhiar peih ngai lo,” tiin a sawi.

2. Kan thlarau lam thiltum kan la tihlawhtling thei lo a nih chuan, engvângin nge kan lunghnual mai loh vang?

² Thiltum la tihhlawhtlin loh i nei a nih chuan lunghnual mai suh. Thiltum ho tê hlen tûr pawhin hun leh tha tam tak sên a ngai fo ṭhîn. A nihna takah chuan, i thiltum hlen chhuah i la duh rengna chuan Jehova nêna in inlaichînna i ngaihluin, i neih ṭha ber pêk i duh tih a târ lang a ni. Jehova’n i ṭan lâkna chu a ngaihlu hle a. Ani chuan i pêk theih aia tam pe tûrin a beisei lo che. (Sâm 103:14; Mik. 6:8) Chuvângin, thiltum i insiam hunah i hlen theih tûr insiam ang che. Thiltum i insiam hnuah, hlen tûrin eng nge i tih theih? Rawtna ṭhenkhat i lo sawiho vang u.

3. Engvângin nge tihchâkna neih chu thil pawimawh tak a nih?

³ Thlarau lam thiltumte hlen tûr chuan, chumi tihchâkna nasa tak neih chu thil pawimawh tak a ni a. I thiltum hlen duhna nasa tak i nei a nih chuan, chumi ti tûr chuan theih tâwp i chhuah ang. Tihchâkna chu a tum ram lam pana puanzâr lawng chhêm kaltu thlî nên kan tehkhin thei a. Thlî chu a thaw reng a nih chuan lawngpu chuan a tum ram a thleng ngei ang. Thlî thaw chu a nat viau phei chuan a thleng hma lehzual dâwn a ni. Chutiang chiah chuan, tihchâkna kan neih nasat poh leh kan thiltumte kan hlen theih lehzual ngei a rinawm. El Salvador rama unau David-a chuan: “Tihchâkna ka neih nasat poh leh ka bei nasa lehzual a. Ka thiltum hlen tûrin eng thil mah indâltîr loh ka tum tlat a ni,” tiin a sawi. A nih chuan, tihchâkna nei lehzual tûrin eng nge i tih theih?

4. Ṭawngṭainaah eng nge kan dîl theih? (Philippi 2:13) (Milem en bawk rawh.)

⁴ Tihchâkna nei lehzual tûrin ṭawngṭai rawh. Pathian Jehova chuan a thlarau thianghlim hmangin i thiltum hlen tûrin a chêttîr thei che a. (Philippi 2:13 chhiar rawh.) A châng chuan kan tih tûr a ni tih kan hriat avângin thiltum kan insiam a, chu chu thil ṭha tak a ni. Mahse, chumi hlen duhna kan nei tak tak lo mai thei. Chu chu Uganda rama unaunu Norina-i thiltawn aṭangin kan hre thei a. Ani chuan Bible zirpui nei tûrin thiltum a insiam a; mahse, zirtîrtu ni tûra tling tâwk lova a inngaih avângin chu a thiltum hlen a duhna chu a nasa tâwk lo a ni. Engin nge ani chu ṭanpui? Ani chuan: “Bible zirpui neih duhna nasa lehzuala ka neih theih nân Jehova hnênah nî tin ka dîl a. Ka ṭawngṭainate mila ka zirtîr thiamna tihmasâwn tûrin theih tâwp ka chhuah a. Thla rei lote hnuah ka duhna a nasa lehzual tih ka hria a. Chumi kumah vêk chuan Bible zirpui pahnih ka nei ṭan ta a ni,” tiin a sawi.

5. Tihchâkna nasa lehzual nei tûrin eng nge kan chhût ngun theih?

⁵ I tâna Jehova thiltih chu chhût ngun rawh. (Sâm 143:5) Tirhkoh Paula chuan Jehova’n a chunga khawngaihna a lantîr chu a chhût ngun a, chu chuan Jehova rawngbâwlnaa theih tâwp chhuah tûrin a chêttîr a ni. (1 Kor. 15:9, 10; 1 Tim. 1:12-14) Chutiang chiah chuan, i tâna Jehova thiltihte i chhût ngun poh leh i thiltum hlen duhna i nei lehzual ang. (Sâm 116:12) Honduras rama unaunu pakhat, regular pioneer thawk thei tûra ṭanpuitu hi i lo ngaihtuah ang u. Ani chuan: “Jehova’n min hmangaih nasatzia ka chhût ngun a. Ani chuan a mite zîngah min teltîr a. Min ngaihsakin, min vênghim bawk. Chutianga chhût ngunna chuan amah ka hmangaihna a tinghet lehzual a, ka thiltum hlen duhna min neihtîr lehzual a ni,” tiin a sawi.

6. Eng thil dangin nge tihchâkna min neihtîr lehzual thei?

⁶ I thiltum hlennain a thlen tûr hlâwknate chu ngaihtuah tlat rawh. Hun vawn dik a tumna  kawnga, a hmaa kan sawi tâk Erika-i ṭanpuitu hi lo chhinchhiah ang che. Ani chuan: “Rawngbâwlnaa ka tlai hian thil tam tak ka chân tih ka hria. Ka thlen hma erawh chuan unaute lo lâwmin, an bulah hun ka hmang thei a. Rawngbâwlnaa hlim tûr leh, hmasâwn tûra min ṭanpui theitu thurâwn ṭangkai tak takte pawh ka hre thei bawk,” tiin a sawi. Erika-i chuan hun vawn dik hlâwknate chu a ngaihtuah tlat a; chuvângin, a thiltum chu a hlen thei ta a ni. Eng hlâwknate nge i ngaihtuah tlat theih? I thiltum chu Bible chhiar, a nih loh leh ṭawngṭaina nêna inkûngkaih a nih chuan, chumiin Jehova nêna in inṭhianna a tihngheh dân tûr chu ngaihtuah la. (Sâm 145:18, 19) I thiltum chu Kristian mizia neih chhoh a nih chuan, chumiin mi dangte nêna in inlaichînna a tihṭhat dân tûr chu ngaihtuah ang che. (Kol. 3:14) I thiltum hlen i duh nachhante chu engvângin nge i ziah chhuah loh vang? Chûng i ziah chhuahte chu en ziah ṭhîn ang che. A hmaa kan sawi tâk Tomáš-a chuan: “Ka thiltum tihhlawhtlinna tûr chhan ka neih tam poh leh, chumi tihlawhtling tûr chuan ka bei nasa lehzual a ni,” tiin a sawi.

7. Engin nge Julio-a leh a nupui chu an thiltum hlen tûra ṭanpui?

⁷ I thiltum hlen tûra fuih theitu che kâwm rawh. (Thuf. 13:20) An rawngbâwlna zauh an tumna hlen tûra Julio-a leh a nupui ṭanpuitu hi lo chhinchhiah teh. Julio-a chuan: “Kan thiltum hlen tum tûra min fuihtu ṭhiante kan thlang a, anni chu kan thiltumte kan sawipui a ni. An zînga tam tak chuan chutiang thiltum chu an lo tihhlawhtlin tawh avângin, rawtna ṭangkai tak tak min pe thei a. Kan ruahmanna siam dânte chu min zâwt a, kan mamawh hunah fuihna min pe bawk,” tiin a sawi.

8. Tihchâkna kan neih hunah chauh kan thiltum tihlawhtling tûrin hma kan la a nih chuan eng thil nge thleng thei? (Milem en bawk rawh.)

⁸ Mahse, kan za hian thil tihchâkna neih loh châng kan nei ṭheuh va. Chu chu kan thiltum tihlawhtling tûrin hma kan la thei lo tihna a ni em? Ni lo ve. Entîr nân, a tum ram thleng tûra puanzâr lawng chhêm kaltu thlî chu a na hle thei a. Mahse, thli thâwt nat zâwng chu a inang lo thei, a châng chuan a thaw miah lo thei a ni. Chu chu lawng khalhtuin a khalh zawm zêl thei lo tihna a ni em? Ni lo ve. Entîr nân, puanzâr lawng ṭhenkhat chuan a tikaltu khâwl an nei a, lawng dangte chuan karfung an nei thung. Lawng khalhtu chuan chûngte chu a tum ram pan zawm zêl tûrin a hmang thei a ni. Tihchâkna chu thlî nên tehkhin theih a ni a, a nasat dân chu nî tin a danglam thei a ni. A châng chuan kan thiltum tihlawhtling tûra hma lâk châkna kan nei lo thei a. Tihchâkna kan neih hunah chauh hma kan la a nih chuan kan thiltum chu kan hlen thei ngai lo vang. Mahse, a tum ram thleng tûra lawng khalhtuin kawng dang a zawng angin, tihchâkna kan neih loh hunah pawh hma kan la thei reng tho a ni. Chutianga tih chu a awlsam lo vang; mahse, i thiltum i hlen hunah chuan i hlim hle dâwn  a ni. Kan tih theihte kan sawiho hmain, zawhna lo awm thei hi i lo sawiho hmasa ang u.

9. Tihchâkna kan neih loh lai pawha kan thiltum hlen tûra hma lâk zawm zêl chu thil dik lo a ni em? Hrilhfiah rawh.

⁹ Pathian Jehova chuan hlim tak leh inhuam taka a rawngbâwl tûrin min duh a. (Sâm 100:2; 2 Kor. 9:7) A nih chuan, tihchâkna kan neih loh lai pawhin thlarau lam thiltum hlen tûrin hma kan la zawm zêl ang em? Tirhkoh Paula entawn tûr siam hi lo ngaihtuah ta ila. Ani chuan: “Ka taksa ka tichhel a, ka thuhnuaiah ka dah tawh,” tiin a sawi. (1 Kor. 9:25-27) Paula chuan Pathian Jehova’n ti tûra a duhte tihchâkna a neih loh lai pawhin tih a tum hrâm hrâm a. Paula rawngbâwlna chu Jehova’n a pawm em? Pawm tehrêng mai! Jehova’n a ṭan lâkna chu mal a sâwm a ni.—2 Tim. 4:7, 8.

10. Tihchâkna kan neih loh hun pawha thiltumte hlen tûra hma lâk zawm zêl hlâwknate chu eng nge ni?

¹⁰ Chutiang chiah chuan, tihchâkna kan neih loh lai pawha hma kan la zawm zêl tih a hmuh hian Pathian Jehova chu a lâwm a. Kan thiltih chu nuam kan tih vânga ti kan ni reng lo tih leh, amah kan hmangaih avânga ti kan ni tih a hriat hian ani chu a lâwm a ni. Pathian Jehova’n Paula mal a sâwm angin, keini pawh kan ṭan lâknaah mal min sâwm ve ngei ang. (Sâm 126:5) Chu bâkah, Jehova malsâwmna kan dawn hian tihchâkna kan nei ṭan leh hial thei a ni. Poland rama unaunu Lucyna-i chuan heti hian a sawi: “A châng chuan rawngbâwlnaa chhuah hi ka peih lo ṭhîn hle a, ka chauh laiin a ni lehzual. Chuti chung pawhin, ka kal chhuah hian hlimna ka nei a, chu chu thilpêk ropui tak a ni,” tiin. Tûnah chuan tihchâkna kan neih loh hun pawha kan tih theihte i lo enho vang u.

11. Engtin nge Jehova’n mahni inthunun tûra min ṭanpui theih?

¹¹ Insûmtheihna, a nih loh leh mahni inthununna nei tûrin ṭawngṭai rawh. Mahni inthununna chu ngaihtuahna leh thiltihte thunun theihna a ni a. Chu ṭawngkam chuan thil ṭha lo tihna laka mahni inthununna a kâwk fo a ni. Chutih rualin, thil ṭha ti tûr pawhin mahni inthununna neih a ngai bawk, a bîk takin kan tih tûr chu thil harsa tak a ni emaw, tihchâkna kan neih loh emaw hian a ngai lehzual a. Mahni inthununna, a nih loh leh insûmtheihna hi thlarau rah pêng a ni tih hre reng la, Jehova hnênah chu mize pawimawh tak nei chho tûr chuan a thlarau thianghlim dîl ang che. (Lk. 11:13; Gal. 5:22, 23) A hmaa kan sawi tâk David-a chuan mahnia inzirna neih ziah a duh a, ṭawngṭainain a ṭanpui thu a sawi a ni. Ani chuan: “Jehova hnênah mahni inthununna nei chho tûra min ṭanpui tûrin ka dîl a. A ṭanpuinain mahnia inzirna hun ṭha tak ka nei ṭan a, chutiang chuan ka ti reng thei a ni,” tiin a sawi.

12. Engtin nge Thuhriltu 11:4-a thu bulte chuan thlarau lam thiltum hlen tûra min ṭanpui?

¹² Dinhmun a ṭhat hun nghâk suh. He khawvêlah hian duhthusâma ṭha dinhmun kan neih theih a rinawm loh. Chutiang hun chu kan nghâk a nih chuan kan thiltumte kan hlen thei ngai lo vang. (Thuhriltu 11:4 chhiar rawh.) Unau Dayniel-a chuan: “Dinhmun duhthusâm a awm thei lo. Chuvângin, kan nghâk tûr a ni lo, kan ti ṭan nghâl zâwk tûr a ni,” tiin a sawi a. Uganda rama unau Paul-a chuan kan tâwi khawmuan loh nachhan tûr dang chu heti hian a sawi bawk a ni: “A harsa hle chung pawha kan tih ṭan hian, Jehova hnênah mal min sâwm theihna hun remchâng kan pe a ni,” tiin.—Mal. 3:10.

13. Thiltum tênaute insiama bul ṭan chu engvângin nge a ṭhat?

¹³ Thil tênau aṭangin ṭan rawh. Kan thiltum chu tihhlawhtlin harsa tak anga a lan chuan tihchâkna kan nei lo thei a. Chutiang dinhmuna i ding a nih chuan, thiltum tênau zâwkte i insiam thei ang em? I thiltum chu mize ṭha neih chhoh a nih chuan, engvângin nge zawi  zawia i lantîr ṭan loh vang? I thiltum chu Bible chhiar chhuah a nih chuan, chhiarna hun tâwi tê tê insiamin i ṭan thei ang em? A tîra kan sawi tâk Tomáš-a chuan kum khat chhûnga Bible chhiar chhuah chu harsa a ti hle a. Ani chuan: “Vawi khatah tam deuh deuh ka chhiar tih ka inhre chhuak a. Chuvângin, chhiar nawn leh ka tum a; mahse, tûn ṭumah chuan nî tin tlêm tê têa chhiar a, chûngte chu chhût ngun tûrin ruahmanna ka siam a ni. Chuvâng chuan, Bible chhiar chu nuam ka ti ta hle,” tiin a sawi. Tomáš-a chuan Bible chhiar nuam a tih ṭan tâk avângin hun rei zâwk chhiar a duh ta a. A hnuah, Bible chu a bu pumin a chhiar chhuak ta a ni. c

14. Min tiṭhuanawp thei thil eng nge kan tawh theih?

¹⁴ Lungchhiatthlâk takin, tihchâkna kan neih a, mahni kan inthunun chung pawhin min tiṭhuanawp thei thilte kan la tâwk thei reng a. Entîr nân, “beisei loh thilte” chuan kan thiltum tihhlawhtlinna atâna kan mamawh hun chu a la hêk thei a. (Thur. 9:11, NWT) Kan harsatna tawh chuan lunghnual tak leh chak lo takin min awmtîr thei a ni. (Thuf. 24:10) Kan ṭhat famkim loh avângin kan thiltum hlen tiharsa zual thei thilte kan tipalh thei a. (Rom 7:23) A nih loh leh kan chau hle thei bawk. (Mt. 26:43) Min tiṭhuanawp thei thilte hneh tûrin engin nge min ṭanpui thei?

15. Tihṭhuanawpa kan awm hian kan hlawhchham tihna a ni em? Hrilhfiah rawh. (Sâm 145:14)

¹⁵ Tihṭhuanawpa i awm avângin i hlawhchham tihna a ni lo tih hre reng rawh. Bible chuan harsatnate chu vawi eng emaw zât kan tâwk thei tih a sawi a. Chutih rualin, Jehova ṭanpuinain kan thiltumte hlen kan tum leh thei tih chiang takin a sawi bawk a ni. (Sâm 145:14 chhiar rawh.) A hmaa kan sawi tâk unau Philip-a chuan hlawhtlinna chungchâng heti hian a sawi: “Ka hlawhchham zât chu ka  ngaihtuah reng lo. Chu aiin, ka thiltum hlen tûra ka beih ṭan leh dânte ka ngaihtuah tlat zâwk a ni,” tiin. A hmaa kan sawi tâk David-a chuan: “Min tiṭhuanawptu chu min dâltu anga thlîr loh ka tum a; chu aiin, Jehova ka hmangaihna lantîr theihna hun remchâng angin ka thlîr zâwk a ni,” tiin a sawi. Ni e, tiṭhuanawp theitu thilte i tâwk chung pawha hma lam i panna chuan Jehova tihlâwm i duh tih a târ lang a ni. I thiltum tihlawhtling tûra i bei zawm zêl a hmuh hunah Jehova chu a va hlim dâwn êm!

16. Min tiṭhuanawp thei thilte chuan eng nge min zirtîr theih?

¹⁶ Min tiṭhuanawp thei thilte chu inzirna angin thlîr rawh. Tiṭhuanawptu che thilthleng chu ngaihtuah la, heti hian inzâwt ang che, ‘Hetiang thil thleng nawn lo tûr hian eng nge ka tih theih?’ tiin. (Thuf. 27:12) Mahse, a châng chuan min tiṭhuanawp thei thilte chuan kan thiltum chu kan tihhlawhtlin theih loh tûr a ni tih a târ lang thei a ni. Chutiang chu nangmahah a dik nia i hriat chuan, i thiltum chu i tâna tihhlawhtlin theih tûr a la ni reng em tih ngaihtuah nawn ang che. d I tihhlawhtlin theih loh thiltum i hlen loh avângin, Jehova chuan hlawhchham angin a thlîr lo vang che.—2 Kor. 8:12.

17. Engvângin nge kan thil hlen chhuah tawhte chu kan rilruah kan vawn reng ang?

¹⁷ I tihhlawhtlin tawhte chu i rilruah vawng reng rawh. Bible-in “in hnathawh . . . chu theihnghilh tûrin Pathian chu mi fel lo a ni si lo,” tiin a sawi a. (Heb. 6:10) Chuvângin, nang pawhin i theihnghilh tûr a ni lo. I thil lo hlen chhuah tawh—Jehova nêna in inṭhianna te, a chungchâng mi dangte hnêna i hrilh te, a nih loh leh i baptisma chante—chu ngaihtuah ṭhîn ang che. Hun kal tawha hma i lo sâwn tawh ang leh thlarau lam thiltumte i lo hlen tawh ang khân, tûna i thiltumah pawh hma i sâwn zawm zêl thei a ni.—Phil. 3:16.

18. Kan thiltum tihlawhtling tûra hma kan lâk rualin, eng nge kan hriat reng ang? (Milem en bawk rawh.)

¹⁸ Lawng khalhtuin a tum ram hlim taka a thleng angin, Jehova ṭanpuinain i thiltum i hlen thei a. Mahse, lawng khalhtu tam tak chuan an zin kawng chu nuam an ti tel tih hre reng ang che. Chutiang bawkin, i thlarau lam thiltumtihlawhtling tûra hma i lâk zêl rualin, i tum ram i pan laia Jehova’n a ṭanpui dân che leh mal a sâwm dân che chu hmuh tum ziah ṭhîn ang che. (2 Kor. 4:7) Beidawng lova i beih hrâm hrâm chuan, malsâwmna nasa zâwk i dawng ang.—Gal. 6:9.