1. Engtin nge Bible-in hmangaihna dik a hrilhfiah?

 HMANGAIHNA “alh chu meialh a ni a, Jaa meialh chu. Tui tam takin a tidai thei hek lo, hmangaihna zawng, tui lianin a chîm pil thei hek lo.” b (HTK. 8:6, 7, NWT) Hmangaihna dik hrilhfiahna mawi tak a va ni êm! Hêng thu-ahte hian nupate fuihna thu a chuang a ni: Hmangaihna dai ngai lo an inlantîr tawn thei tih hi.

2. Nupate chuan an inhmangaihna dai lo tûrin eng nge an tih ngai?

² Nupate chuan an dam chhûngin inhmangaih tawn tûrin theih tâwp an chhuah a ngai a. Entîr nân, mei chu tuemawin a tuah chhunzawm zêl chuan a alh reng thei a; mahse, tuah zawm zêltu a awm loh chuan a rêm mai ṭhîn a ni. Chutiang bawkin, nupate chuan an inlaichînna an tihngheh reng chuan an inhmangaihna chu a nghet reng thei ang. A châng chuan nupate chuan an inhmangaihna chu a dai telh telh angin an hre thei a, a bîk takin sum leh paia harsatna te, hrisêl lohna te, a nih loh leh fate enkawl seilen chungchânga lungkhamnate an neih hian a ni lehzual a ni. A nih leh kawppui nei i nih chuan, engtin nge “Jaa meialh” chu in nupa inkârah i alhtîr reng theih ang? He thuziakah hian in inlaichînna in tihngheh reng theih dân leh, nupa hlim tak in nih theih dân kawng thum kan sawiho vang. c

3. Engtin nge Jehova nêna inlaichînna nghet tak neihnain, nupate chu an inhmangaihna vawng nung reng tûra a ṭanpui? (Thuhriltu 4:12) (Milem en bawk rawh.)

³ “Jaa meialh” tialh reng tûrin nupate chuan Jehova nêna inlaichînna nghet tak nei tûrin ṭan an la ve ve tûr a ni a. Engtin nge chu inlaichînna chuan an inneihna a ṭanpui? Nupate’n an Pa vâna mi nêna an inṭhianna an ngaihhlut hian, a thurâwnte nunpui duhna an nei a. Chu chuan an inhmangaihna tidai thei harsatnate pumpelh tûr leh hneh tûrin a ṭanpui a ni. (Thuhriltu 4:12 chhiar rawh.) Jehova nêna inṭhianna nghet tak neitute chuan amah entawn tûrin theih tâwp an chhuah a, ngilneihna, dawhtheihna, leh ngaihdamna ang chi Pathianin a lantîr miziate chu neih chhoh an tum a ni. (Eph. 4:32–5:1) Chûng miziate lantîrtu nupate tân chuan inhmangaih telh telh chu a awlsam lehzual a ni. An inneihna kum 25 lai ni tawh unaunu Lena-i chuan, “Thlarau lam mi tak hmangaih leh zah chu awlsam ka ti,” tiin a sawi a ni.

4. Engvângin nge Jehova’n Mari leh Josefa chu Messia nu leh pa ni tûra a thlan?

⁴ Bible-a thilthleng pakhat hi lo ngaihtuah ta ila. Jehova’n Messia nu leh pa tûrte a thlan khân, Davida thlah tam tak zîng aṭangin Mari leh Josefa te a thlang a ni. Engvângin nge? An pahnih chuan Jehova nêna inlaichînna ṭha an nei ve ve a, an inneihnaah amah an dah hmasa ang tih a hriat vâng a ni. Nupate u, Mari leh Josefa te hnên aṭangin eng nge in zir theih?

5. Josefa hnên aṭangin pasalte’n eng nge an zir theih?

⁵ Josefa chuan inhuam takin Jehova kaihhruaina a zâwm a, chu chuan pasal ṭha lehzual a nihtîr a ni. A lo berah, ṭum thum lai Pathian Jehova hnên aṭangin a chhûngkaw chungchângah kaihhruainate a dawng a. Chûng dinhmun tinahte chuan inthlâk danglamna lian tak siam ngai mah se, a zâwm nghâl vat a ni. (Mt. 1:20, 24; 2:13-15, 19-21) Pathian kaihhruaina chu zâwmin, Josefa’n Mari chu a vênghim a, a ṭanpuiin a ngaihsak a ni. Josefa thiltihte’n a chunga Mari hmangaihna leh zahna a tihthûk lehzual dân tûr chu han mitthla teh! Pasalte u, in chhûngkua in enkawlnaah Bible ṭanchhan thurâwnte zawngin Josefa in entawn thei a. d Inthlâk danglamna siam a ngai chung pawha chûng kaihhruainate in zâwm a nih chuan, in nupuite in hmangaihzia in târ langin, in inneihna in tinghet lehzual a ni. An inneihna kum 20 chuang lai ni tawh Vanuatu rama unaunu pakhat chuan heti hian a sawi: “Ka pasalin Jehova kaihhruainate a zawna a zawm hian, ani chu ka zah lehzual a. Him nia inhriatna ka neiin a thu tlûkna siamte chu ka ring nghet tlat a ni,” tiin.

6. Mari hnên aṭangin nupuite’n eng nge an zir theih?

 ⁶ Mari chuan Jehova nên mi mal inlaichînna a nei a, a rinna chu Josefa thiltihah a innghat lo. Ani chuan Pathian Lehkha Thute chu a hre chiang hle a. Chûngte chhût ngunna atân hun a insiam bawk. (Lk. 2:19, 51) Pathian nêna an inlaichînna ṭha tak chuan Mari chu nupui ṭha tak a nihtîr tih a chiang hle. Tûn laiah, nupui tam takin Mari chu entawn an tum a. Entîr nân, unaunu Emiko-i chuan: “Pasal ka neih hma chuan keimahin thlarau lam hun duante ka insiam a. Mahse, pasal ka neih hnuah chuan ka pasal chuan kan nupa aiawha ṭawngṭaina a hman a, chhûngkuaa Pathian biakna a kaihhruai ṭhin avângin, ka rinna chu a thiltihah a innghat ṭan tih ka hria a. Keimah ngeiin Pathian Jehova nêna kan inlaichînna ka tihngheh zawm zêl a ngai tih ka hre bawk. Tûnah chuan, Pathian nêna a fâla hun hman—ṭawngṭai, Bible chhiar, leh a ngaihtuahna chhût ngun—nân hun ka insiam a ni,” tiin a sawi. (Gal. 6:5) Nupuite u, Jehova nêna in inṭhianna in tihngheh zawm zêl chuan, in pasalte’n fakna tûr leh hmangaihna tûr che u chhan ṭha lehzual an nei ang.—Thuf. 31:30.

7. Nupate’n Pathian biak dun chungchângah Mari leh Josefa hnên aṭangin eng nge an zir theih?

⁷ Mari leh Josefa te chuan Jehova nêna an inlaichînna tinghet tûrin hma an la dûn bawk a. Chhûngkuaa Pathian Jehova biak a pawimawhzia an hre thiam a ni. (Lk. 2:22-24, 41; 4:16) Chutianga tih chu fanau an neih belh zêl chuan a harsa thei a, mahse an ti thei a ni. Tûn laia nupate tân entawn tûr ṭha an va ni tak êm! Mari leh Josefa te angin fate in nei a nih chuan, inkhâwma tel emaw, chhûngkuaa Pathian biak nâna hun insiam emaw chu a harsa thei a. Nupaa inzirna leh ṭawngṭai dunna hun neih chu a harsa lehzual thei a ni. Mahse, Jehova in biak dun hian amah in hnaih lehzual a, nangmahni pawh in inhnaih lehzual tih hre rengin, biakna chu dah pawimawh ang che u.

8. Nupa inkâra harsatna neite chuan chhûngkuaa Pathian biakna chu hlâwkpui lehzual tûrin eng nge an tih theih?

⁸ In nupa inkârah harsatna in nei a nih chuan, engtin nge ni ang? Chhûngkuaa Pathian biakna neih dun chu a châkawm lo thei a. Chutiang a nih chuan, in pahniha nuam ti taka in sawi dun theih tûr thu tlêm tê thlangin bul ṭan ang che u. Chu chuan in inlaichînna a tinghet theiin, thlarau lam thilte tihdun duhna a neihtîr lehzual thei che u a ni.

9. Engvângin nge nupate’n hun an hman dun ang?

⁹ Nupate u, in inhmangaihna chu hun hmang dûnin in tinung reng thei bawk a. Chutianga tihna chuan i kawppui ngaihtuahna leh rilru vei zâwng hre tûrin a ṭanpui ang che. (Gen. 2:24) Kum 15 chuang innei tawh, Lilia-i leh Ruslan-a te’n an inneih hnu lawka an thil hmuh chhuah hi chhinchhiah ang che. Lilia-i chuan: “Kan beisei angin hun kan hmang dûn tam thei lo tih kan hre chhuak a. Ei zawnna hna te, in lam hna te, leh kan fate avângin kan buai thei hle a. Kan nupaa hun hman dunna hun kan insiam lo a nih chuan, kan inhlat tial tial thei tih kan hmu chhuak a ni,” tiin a sawi.

10. Engtin nge nupate’n Ephesi 5:15, 16-a thu bul chu an nunpui theih?

¹⁰ Nupate’n hun an hman dun theih nân eng nge an tih theih? Hun hmang dûn tûrin hun an insiam thei a ni. (Ephesi 5:15, 16 chhiar rawh.) Nigeria rama unaupa Uzondu-a chuan, heti hian a sawi: “Ka thil tih tûrte atâna hun duan ka insiam hian, kan nu nêna hun kan hman dun theih hun tûr ka telh ṭhîn a, chu chu ka ngai pawimawh hle,” tiin. (Phil. 1:10, 11) Moldova rama bial kantu nupui  Anastasia-i’n a ṭha thei ang bera hun a hman dân hi han ngaihtuah teh. Ani chuan heti hian a sawi: “Ka pasalin a chanvote tia a buai laiin, ka tih tûr ṭûlte ka lo ti ṭhîn a. Chutiang chuan a hnuah hun kan hmang dûn thei a ni,” tiin. Mahse, i hun hman dân chuan nupaa hun hman a tiharsa a nih chuan, engtin nge ni ang?

11. Priskilli leh Akuila te’n eng thilte nge an tihdun ṭhin?

¹¹ Kristian hmasa tam takin an ngainat êm êm Priskilli leh Akuila te entawn tûr siam aṭangin nupate chu an inzir thei a. (Rom 16:3, 4) Bible-in an nupa chungchâng tam tak târ lang lo mah se, hnathawhnaah te, thu hrilhnaah te, leh mi dangte ṭanpuinaahte an thawk dûn ṭhîn tih a târ lang a ni. (Tirh. 18:2, 3, 24-26) A nihna takah chuan, Bible-in Priskilli leh Akuila te chungchâng a târ lan apiangin an pahnihin a târ lang kawp ziah a ni.

12. Nupate’n hun hmang dûn tam lehzual tûrin eng nge an tih theih? (Milem en bawk rawh.)

¹² Engtin nge nupate’n Priskilli leh Akuila an entawn theih? In nupaa in tih ngai thil tam tak han ngaihtuah teh. Chûng thilte chu mahnia ti mai lovin in tidûn thei ang em? Entîr nân, Priskilli leh Akuila te chu thu hrilhnaah an thawk dûn a. Chutianga ti ziah tûr chuan ruahmanna in siam em? Priskilli leh Akuila te chuan hna pawh an thawk dûn bawk. In nupa hnathawh chu a inang lo mai thei a, mahse inchhûng khur hnate in thawk dûn thei ang em? (Thur. 4:9) Chutianga in inṭanpui tawn chuan, ṭangrual nia inhriatna nei lehzualin inbiakna hun remchâng in nei thei ang. Robert-a leh Linda-i te chu kum 50 chuang an innei tawh a. Robert-a chuan: “Zêp lovah chuan, intihhlimna atâna hun hmang dûn tûrin hun kan nei tlêm hle a. Mahse, thlêng ka sil hian kan nu chuan a lo hru hul ṭhîn a, a nih loh leh huan lama hna ka thawh hian ka bulah rawn kalin min rawn pui a, chu chuan min tihlim hle. Thil tihdunna chuan min inpawhtîr lehzual a. Kan inhmangaih tawlh tawlh bawk a ni,” tiin a sawi.

13. Inpumkhat tak zet tûrin nupate’n eng nge an tih ngai?

¹³ Chutih rualin, chên dunna mai chuan nupate chu a inpumkhattîr lo tih hre reng ang che. Brazil rama nu pakhat chuan: “Tûn laiah mi tinte hi kan buai hle a, chuvângin in khata chên dun avâng maia hun hmang dûn nia inhriatna neih chu a awl hle. Chên dun mai aia tam tih a ngai tih ka hria a ni. Ka pasal chu ka ngaihsak a ngai tih ka hre bawk,” tiin a sawi. Bruno-a leh a nupui Tays-i te’n inngaihsak tawn tûra hma an lâk dân hi lo chhinchhiah bawk ang che. Bruno-a chuan: “Kan hun âwl neihte kan hman dun chhûng hian, phone khawih lovin nuam takin hun kan hmang ṭhîn,” tiin a sawi a ni.

14. Nupate’n hun hman dun nuam an tih loh chuan eng nge an tih theih?

¹⁴ Mahse, in nupain hun hman dun nuam ti  lo ta ula, engtin nge ni ang? In tui zâwng a inang lo emaw, in inngeih lo emaw a ni thei a. Eng nge in tih theih? A tîra mei chungchâng kan sawi kha han ngaihtuah teh. Mei chu a alh vut vut nghâl mai lo. Zawi zawia thingfâk i tuah belh zêl a ngai a ni. Chutiang bawkin, engvângin nge tûn aṭangin nî tina hun tlêm azâwng in hman dun ṭan loh vang? Thinrimna thlen thei thilte ni lovin, in pahniha nuam in tih zâwngte chu ti ang che u. (Jak. 3:18) Thil ho tê aṭanga bul ṭanin, in inhmangaihna chu in tizual leh thei a ni.

15. Nupate inhmangaihna nung reng tûrin engvângin nge inzah tawnna a pawimawh?

¹⁵ Inzah tawnna chu nupate neih ngai thil pawimawh tak a ni a. Chu chu mei tialh zualtu oxygen ang a ni. Oxygen tel lo chuan meialh chu rang takin a thi ang. Chutiang bawkin, inzah tawnna tel lo chuan an inhmangaihna chu a dai thuai thei tih nupate chuan an hria a ni. Kawng leh lamah, inzah tawnna lantîr tum tlattu nupate chuan an inhmangaihna vawn nun kawngah hma an la a. Mahse, zahna i lantîr nia inhriatna aiin, i kawppuiin zahna dawng nia inhriatna a nei em tih chu a pawimawh zâwk tih hre reng ang che. Penny-i leh Aret-a te chu kum 25 chuang an innei tawh a. Penny-i chuan: “Kan inzah tawnna chuan kan in chhûngah boruak nuam tak a siam a. Kan ngaih dânte kan inngaihhlutsak tawn tih kan hriat avângin kan rilrua awmte sawi chhuah kan tîm lo,” tiin a sawi. A nih chuan, i kawppuiin i zah tak zet nia inhriatna a neih theih nân eng nge i tih theih? Abrahama leh Sari te entawn tûr siam hi lo ngaihtuah ta ila.

16. Pasalte’n Abrahama hnên aṭangin eng nge an zir theih? (1 Petera 3:7) (Milem en bawk rawh.)

¹⁶ Abrahama’n Sari chu zah takin a cheibâwl a. Ani chuan Sari ngaih dân chu ngaih pawimawhsakin a rilru vei zâwng chu a zahsak a ni. Ṭum khat chu Sari chu a lungni lo hle a, Abrahama hnênah a rilrua awmte sawi chhuakin, a dem hial a ni. Abrahama chuan thinrim takin a chhâng lêt em? Chhâng lêt lo. Ani chuan Sari chu nupui intulût tak leh ṭanpuitu ṭha tak a ni tih a hria a. Chuvângin, a thusawi chu ngaihthlâksakin harsatna chu chinfel a tum a ni. (Gen. 16:5, 6) Eng nge kan zir theih? Pasal i nih chuan, i chhûngkaw aiawha thu tlûkna siam tûrin thuneihna i nei a. (1 Kor. 11:3) Mahse, thu tlûkna i siam hmain, a bîk takin i thu tlûkna siam tûrin i nupui chungah nghawng a nei dâwn a nih chuan, amah râwn chu thil ṭha tak a ni. (1 Kor. 13:4, 5) Hun dangah chuan, i nupui chu a rilru a hahin, a rilrua awmte sawi chhuah a duh thei a. Ngun taka a thusawi ngaihthlâksakin a rilru vei zâwng chu i zahsak em? (1 Petera 3:7 chhiar rawh.) Angela-i leh Dmitry-a te chu kum 30 dâwn lai an innei tawh a. Angela-i  chuan a pasalin zah nia inhriatna a neihtîr dân heti hian a sawi: “Dmitry-a chu ka thinrim laiin emaw, thusawi ka duh hunah emaw min ngaithla tûrin a inpeih reng ṭhîn a. Dam taka thu ka sawi loh lai pawhin ka chungah a dawhthei hle,” tiin.

17. Sari hnên aṭangin nupuite’n eng nge an zir theih? (1 Petera 3:5, 6)

¹⁷ Sari chuan Abrahama thu tlûkna siamte thlâwpin zahna a lantîr a. (Gen. 12:5) Ṭum khat chu, Abrahama’n beisei loh taka anmahni rawn tlawhtute chungah khualchhâwn thiamna lantîr a tum a. Ani chuan Sari chu a thiltih lai tâwpsan a, chhang tam tham tak siam tûrin a hrilh a ni. (Gen. 18:6) Sari chuan rang taka hma la nghâlin Abrahama thu tlûkna siam chu a thlâwp a ni. Nupuite u, in pasalte thu tlûkna siam thlâwpin Sari chu in entawn thei a. Chutianga in tih chuan in inneihna in tinghet ang. (1 Petera 3:5, 6 chhiar rawh.) Paragraph hmasaa kan sawi tâk Dmitry-a chuan a nupuiin zahna dawng nia inhriatna a neihtîr dân heti hian a sawi: “Kan ngaih dân a inan loh lai pawha ka thu tlûkna siam thlâwp tûra Angela-i ṭan lâkna chu ka ngaihlu hle. Chûng ka thu tlûkna siamte’n rah ṭha ber a chhuah lo a nih pawhin, ani chuan min sawisêl mai lo,” tiin. Nangmah zahtu che hmangaih chu a va awlsam dâwn êm!

18. Engtin nge nupate chuan an inhmangaihna tinung reng tûra theih tâwp an chhuahna chu an hlâwkpui?

¹⁸ Tûn laiah Setana chuan Kristian nupate inhmangaihna chu tihreh a duh a. Ani chuan nupate chu an inhmangaih tawh lo a nih chuan, Pathian Jehova an hlat telh telh thei tih a hria a ni. Mahse, hmangaihna dik chu tihmih theih a ni lo! Chuvângin, in nupa inkâra hmangaihna chu Hla Thlan Khâwmtea târ lan hmangaihna ang ni rawh se. In inneihnaah Jehova dah hmasak tum tlat ula, hun hmang dûn ula; tichuan, in rilru vei zâwng leh mamawhte inzah tawnsak ang che u. Chutianga in tih chuan, in inneihna chuan hmangaihna dik tak lo chhuahna Hnâr Jehova a chawimawi ang a, tichuan in inhmangaihna chu ṭha taka chhawm nun reng mei angin a alh reng dâwn a ni.