1. Jehova’n amah betute chu eng ti tûrin nge a sâwm? (Milem en bawk rawh.)

 TU HNENAH nge thlamuanna leh kaihhruaina kan dîl theih? Chu zawhna chhânna chu kan hria a ni. Ṭawngṭaiin Jehova kan pan thei a. Ani chuan chutianga ti tûr chuan min sâwm a. ‘Bâng lova ṭawngṭai’ tûrin min duh a ni. (1 Thes. 5:17) Ṭawngṭaiin zalên takin kan pan thei a, kan nun kawng engkimah a kaihhruaina kan dîl thei a ni. (Thuf. 3:5, 6) Pathian ngilnei tak a nih avângin, Jehova chuan a hnêna kan ṭawngṭai theih zât a bithliah lo.

2. He thuziakah hian eng nge kan ngaihtuahho vang?

² Ṭawngṭai theihna thilpêk chu kan ngaihlu hle a. Mahse, tih tûr tam tak kan neih avângin ṭawngṭai nâna hun insiam chu harsa kan ti thei a ni. Kan ṭawngṭainate tihhmasâwn a ngai niin kan hre mai thei bawk. Bible aṭanga fuihna leh kaihhruaina kan hmu thei chu a lâwmawm hle. He thuziakah hian, Isua entawn tûr siam bih chiangin ṭawngṭai tûra hun kan insiam theih dân kan sawiho vang a. Kan ṭawngṭainaa thu pawimawh tak panga telha kan ṭawngṭaina kan tihhmasâwn theih dân kan sawiho bawk ang.

3. Ṭawngṭaina chungchângah Isua’n eng nge a hriat?

³ Isua chuan Jehova’n ṭawngṭaina a ngaihlu tih a hria a. Leia a rawn kal hmain, a Pain mi rinawm a hmei a pate ṭawngṭaina  a chhâng tih a hmu a ni. Entîr nân, a Pain Hani te, Davida te, Elija te, leh mi rinawm tam takte tih tak zeta ṭawngṭaina a chhân lai chuan Isua chu a bulah a awm a. (1 Sam. 1:10, 11, 20; 1 Lal. 19:4-6; Sâm 32:5) Chuvângin, Isua chuan a zirtîrte chu rinnghehna nêna ṭawngṭai tûrin a zirtîr a ni.—Mt. 7:7-11.

4. Isua ṭawngṭainate aṭangin eng nge kan zir?

⁴ Pathian Jehova hnêna a ṭawngṭainate hmangin, Isua chuan a zirtîrte tân entawn tûr a siam a. A rawngbâwl chhûngin vawi tam tak a ṭawngṭai a ni. A buai êm ṭhin avâng leh mi tam takin an bâwr luih luih ṭhin avângin ṭawngṭai nân hun a insiam a ngai a. (Mk. 6:31, 45, 46) A fâla ṭawngṭaina hun a neih theih nân zîng hma takah a tho a ni. (Mk. 1:35) Ṭum khat chu, thu tlûkna pawimawh tak a siam hmain a ṭawngṭai zankhua ṭhak a. (Lk. 6:12, 13) Chu bâkah, leia a chanvo harsa ber a hlen chhuah theih nân, a thih hma zânah nasa takin a ṭawngṭai a ni.—Mt. 26:39, 42, 44.

5. Kan ṭawngṭai hunah engtin nge Isua kan entawn theih?

⁵ Isua entawn tûr siam chuan, buai hle mah ila, ṭawngṭai tûrin hun kan insiam a ngai tih min zirtîr a. Isua angin zîng hma taka thovin emaw, zâna meng rei deuh hlekin emaw ṭawngṭaina atân hun kan insiam a ngai thei a ni. Chutianga kan tih chuan, Jehova hnênah he thilpêk hlu tak hi kan ngaihlu tih kan lantîr a ni ang. Unaunu Lynne-i chuan ṭawngṭai theihna chanvo chungchâng a hriat hmasak ber ṭuma a lâwmzia chu a la hre reng a. Ani chuan, “Engtik lai pawhin Jehova ka be thei tih ka hriatna chuan, ani chu ka ṭhian ṭha tak anga thlîr tûr leh ka ṭawngṭainate tihhmasâwn duhna nei tûrin min ṭanpui a ni,” tiin a sawi. Kan zînga tam tak pawh chutiang chuan kan awm ve ngei ang. Chuvângin, ṭawngṭainaa kan telh theih thu pawimawh panga i lo sawiho vang u.

6. Thu Puan 4:10, 11-in a sawi angin, Jehova’n eng nge dawn a phû?

⁶ Jehova fak rawh. Tirhkoh Johana chuan inlârna ropui takah upa 24-te’n vâna Jehova chibai an bûk lai chu a hmu a. Anni chuan Pathian chu “ropuina te, chawimawina te, thiltihtheihna te” dawng tlâk a ni tiin an fak a ni.  (Thu Puan 4:10, 11 chhiar rawh.) Vântirhkoh rinawmte pawhin Pathian Jehova fak a, chawimawi nachhan tûr tam tak an nei bawk. Vânah a kianga awmin, ani chu an hre chiang hle a ni. A thiltihtea a mize lang chhuakte chu an hmu a. Jehova thiltihte an hmuhna chuan amah fak tûrin a chêttîr a ni.—Job. 38:4-7.

7. Eng thilahte nge Jehova kan fak theih?

⁷ Jehova chungchânga kan ngainat leh kan ngaihhlutte sawiin, keini pawhin ṭawngṭaia amah fak kan duh a. Bible i chhiara i zir hunah, Jehova mizia i ngainat takte chu hriat tum la. (Job. 37:23; Rom 11:33) Tichuan, chûng a mizia i ngainat takte chu Jehova hnênah hrilh ang che. Kan tâna a thiltihte leh kan thlarau lam chhûngte zawng zawng tâna a thiltihte avângin kan fak thei bawk. Ani chuan min ngaihsakin min vênghim reng ṭhîn.—1 Sam. 1:27; 2:1, 2.

8. Pathian Jehova hnêna lâwmthu kan sawi nachhan tûr ṭhenkhat chu engte nge ni? (1 Thessalonika 5:18)

⁸ Jehova hnênah lâwmthu sawi rawh. Ṭawngṭaia Jehova hnêna lâwmthu sawi nachhan tûr tam tak kan nei a. (1 Thessalonika 5:18 chhiar rawh.) Thilpêk ṭha zawng zawng a hnên aṭanga lo kal a nih avângin, thil ṭha kan neih engpawh avângin a hnênah lâwmthu kan sawi thei a ni. (Jak. 1:17) Entîr nân, kan leilung mawi tak avâng leh a thil siam mak takte avângin lâwmthu kan sawi thei a. Kan nunna, kan chhûngkua, kan ṭhiante, leh kan beiseina avânga kan lâwmzia kan hrilh thei bawk. Chu bâkah, amah nêna inṭhianna hlu tak kan neih theih avângin Jehova hnênah lâwmthu hrilh kan duh a ni.

9. Engvângin nge Jehova chunga lâwm nachâng hriat kan zir a ngaih mai theih?

⁹ A mi mal taka Jehova chunga lâwm nachhan tûr kan neihte ngaihtuah tûrin theih tâwp kan chhuah a ngai thei a. Lâwm nachâng hriat lohna khawvêlah kan chêng a. Mite chuan an thil neihte ngaihhlut aiin, an thil duh zâwngte an ngaihtuah zâwk fo ṭhîn. Chutiang rilru put hmang chu kan entawn a nih chuan, kan ṭawngṭainate chu dîlna hlîrah a chang thei a ni. Chutiang thil thleng lo tûr chuan, Jehova thil min tihsak zawng zawngte chunga lâwm nachâng hriat a, lantîr ziah a ngai a ni.—Lk. 6:45.

10. Engtin nge lâwm nachâng hriatnain unaunu pakhat chu chhel tûra a ṭanpui? (Milem en bawk rawh.)

¹⁰ Lâwm nachâng hriatna chuan harsatnate chhel taka tuar tûrin min ṭanpui thei a. Vênnainsâng January 1, 2015 chhuaka unaunu Kyung-sook-i thiltawn hi han ngaihtuah teh. Ani chuan chuap cancer nasa tak a nei a. “Ka hrisêl lohna hian min ṭhâwng na hle. Engkim mai ka chân ta niin ka inhria a, ka thlabâr êm êm mai a ni,” tiin a sawi. A harsatna hmachhawn tûrin engin nge ṭanpui? Ani chu zan tin a mut hmain inchung zâwlah a lâwn a, chumi nî atâna a lâwm chhan thil panga sawi chhuakin ring takin a ṭawngṭai ṭhîn a.  Chutianga a tihna chuan tizângkhai huaiin Jehova a hmangaihna sawi chhuak tûrin a chêttîr a ni. A chhiahhlawh rinawmte’n dinhmun hrehawm tak an hmachhawn laia Jehova’n a chhawmdâwl dân a takin a tawng a; chu bâkah, fiahna kan tawhte aiin malsâwmna kan dawnte hi a tam zâwk tih a hre bawk a ni. Kyung-sook-i angin, fiahna kan tawh mêk lai pawhin Jehova chunga lâwm nachhan tûr tam tak kan nei a. Kan lâwm nachhante a hnêna ṭawngṭaia hrilhna chuan chhel tûr leh hahdam taka awm reng tûrin min ṭanpui thei a ni.

11. Isua vâna a kîr leh hnuah, engvângin nge a zirtîrte’n huaisenna an mamawh?

¹¹ Rawngbâwlnaa huaisenna nei tûrin Jehova hnênah dîl rawh. Isua chuan vâna a kîr leh hma lawkin, a zirtîrte chu “Jerusalem khuaah te, Judai leh Samari ram khaw tinah te, kâwlkil thleng” pawha a thu hriattîr tûra an chanvo chu a hriatnawntîr a. (Tirh. 1:8; Lk. 24:46-48) A hnu lawkah, Juda hruaitute chuan tirhkoh Petera leh Johana te chu manin Sanhedrin hmaah an hruai a, chûng mi rinawmte chu thu hril tawh lo tûra tiin an vau hial a ni. (Tirh. 4:18, 21) Engtin nge Petera leh Johana’n an chhân lêt?

12. Tirhkohte 4:29, 31-in a sawi angin, tirhkohte’n eng nge an tih?

¹² Juda sakhaw hruaitute vauna chu chhâng lêtin, Petera leh Johana te chuan: “Pathian mithmuhin Pathian thu zawm aiin nangni thu zawm a dik zâwk emaw chu ngaihtuah rawh u. Keini zawng thil kan hmuh leh kan hriatte kha sawi lovin kan awm thei lo,” tiin an sawi a. (Tirh. 4:19, 20) Petera leh Johana te chhuah an nih hnuah, zirtîrte chu a duh zâwng an tih zêl theih nân Jehova hnênah ring takin: “I bâwihte hi huai takin i thu hriltîr la,” tiin an ṭawngṭai a. Jehova chuan tih tak zeta an ṭawngṭaina chu a chhâng a ni.—Tirhkohte 4:29, 31 chhiar rawh.

13. Jin-hyuk-a thiltawn aṭangin eng nge kan zir theih?

¹³ Sawrkâr thuneitute’n thu hril tawh lo tûra thu min pe chung pawha hril zawm zêlin, zirtîrte kan entawn thei a. A tualdawih avânga lung ina tâng unau Jin-hyuk-a thiltawn hi lo ngaihtuah ta ila. Tân inah chuan, khung hrana awm mi tâng dangte ei tûr leh thil dang pe tûra tih a ni a. Mahse, Bible chungchâng pawh tiamin, chu a hnathawh nêna inkûngkaihna nei lo eng thil mah an hnêna sawi lo tûra tih a ni. Chuvângin, hun remchâng a neih apianga thu hril tûrin huaisenna leh remhriatna dîlin a ṭawngṭai a. (Tirh. 5:29) Ani chuan: “Tân in kawngkhâr bula minute nga chhûng lek lek Bible zirpui tûr tam tak nei thei tûra huaisenna leh finna min pein, Jehova’n ka ṭawngṭainate a chhâng a. Tichuan, zân lamah a tûka chûng mi tângte hnêna ka pêk tûr lehkhathawnte ka ziak a ni,” tiin a sawi. Keini pawhin kan rawngbâwlna hlen chhuak tûrin Jehova’n min ṭanpui ang tih kan ring tlat thei a. Jin-hyuk-a angin, huaisenna leh finna dîlin kan ṭawngṭai thei bawk.

14. Harsatnate kan hmachhawn hunah engin nge min ṭanpui thei? (Sâm 37:3, 5)

¹⁴ Harsatnate hmachhawn thei tûrin Jehova hnênah a ṭanpuina dîl rawh. Kan zînga tam tak chuan hmangaih tak chânna te, chhûngkaw dinhmun khirh tak te, tihduhdahna te, a nih loh leh thil dangte avângin tisa leh rilru lamah harsatna kan tâwk a. Hripui lêng leh indona te chuan chûng harsatnate chu hmachhawn a tiharsa lehzual a ni. Jehova hnênah i thinlung leih baw rawh. I ṭhian ṭha tak hnêna i hrilh ang maiin i dinhmun chu hrilh la. Jehova’n i tân “a ti vek ang” tih ring tlat ang che.—Sâm 37:3, 5 chhiar rawh.

15. Engtin nge ṭawngṭainain ‘hrehawm tuarna kawnga chhel’ tûra min ṭanpui theih? Entîrna pe rawh.

 ¹⁵ Ṭawngṭai fan fanna chuan ‘hrehawm tuarna kawnga chhel’ tûrin min ṭanpui ang. (Rom 12:12) Jehova chuan amah betute tawrhna chu a hria a—ṭanpui dîla “an au thâwm a hria” a ni. (Sâm 145:18, 19) Kum 29 mi pioneer Kristie-i chuan chumi dikzia chu a tawng a. Ani chuan beisei loh takin natna khirh takte a nei a. Chuvâng chuan, rilru hahna nasa tak a neih phah a ni. A hnuah, a nu pawhin nunna atâna hlauhawm natna khirh tak a nei tih a hre leh a. Kristie-i chuan: “Nî tina ka mamawh chakna min pe tûrin Jehova hnênah nasa takin ka ṭawngṭai a. Inkhâwmnaa tel ziahin leh mahnia inzirna nei ziahin thlarau lam hun duan ṭha neih reng ka tum a ni,” tiin a sawi. Ani chuan: “Ṭawngṭaina chuan hun harsate tuar chhuak tûrin min ṭanpui a. Jehova chu ka tân a awm reng tih ka hria a, chu chuan thlamuanna nasa tak min pe a ni. Ka natna chu dam nghâl lo mah se, chhûngrila muanna leh rilru hahdamna min pein Jehova’n ka ṭawngṭainate a chhâng a ni,” tiin a sawi belh bawk. “[Jehova] chuan amah ngaihsaktute chu thlêmna ata chhan chhuah dân . . . a hria,” tih i theihnghilh ngai lo vang u.—2 Pet. 2:9.

16. Engvângin nge thlêmna do thei tûra Jehova ṭanpuina kan mamawh?

¹⁶ Thlêmna do thei tûrin Jehova hnênah a ṭanpuina dîl rawh. Mihring ṭha famkim lo kan nih angin, thil dik lo ti tûra thlêmna chu kan do reng a ngai a. Chu thlêmna do tiharsa lehzual tûr chuan Setana’n a tih theih apiang a ti a ni. Kan ngaihtuahna tihbawlhhlawh a tum dân kawng khat chu intihhlimna ṭha lo hmangin a ni a. Chutiang intihhlimnate chuan kan rilru chu ngaihtuahna bawlhhlawhin a tikhat thei a, chu chuan kan chhûng lam nihna tibawlhhlawhin, sual pawi tak min tihtîr thei a ni.—Mk. 7:21-23; Jak. 1:14, 15.

17. Engtin nge thlêmna pumpelh tûra kan dîlna nêna inmilin hma kan lâk theih ang? (Milem en bawk rawh.)

 ¹⁷ Thil dik lo ti tûra thlêmna do hneh tûrin Jehova ṭanpuina kan mamawh a. Isua chuan ṭawngṭai dân tûr a zirtîrnaah he thu hi a telh a ni: “Sual tûra thlêmnaah min hruai lût suh la, mi sual lakah chuan min chhandam zâwk ang che,” tih hi. (Mt. 6:13) Jehova chuan min ṭanpui a duh a; mahse, a ṭanpuina kan dîl a ngai a ni. Kan ṭawngṭainate nêna inmilin hma kan la tûr a ni bawk. Setana khawvêla ngaih dân lâr takte chhiar leh ngaihthlâk pumpelh tûrin theih tâwp kan chhuah thei a. (Sâm 97:10) Bible chhiara, zirin kan rilru chu ngaihtuahna ṭhatein kan tikhat thei a ni. Inkhâwmna leh rawngbâwlnaa telna chuan kan ngaihtuahna a vênghim bawk ang. Chu bâkah, Jehova chuan kan tawrh theih bâk thlêmna min tawrhtîr lovang tih min tiam bawk a ni.—1 Kor. 10:12, 13.

18. Ṭawngṭaina chungchângah kan zaa kan tih ngai chu eng nge ni?

¹⁸ He ni hnuhnûng hun khirh tak chhûnga Jehova chunga rinawm reng tûr chuan, tûn hma zawng aia nasa lehzuala kan ṭawngṭai a ngai a. Nî tin tih tak zeta ṭawngṭai tûrin hun insiam rawh. Jehova chuan ṭawngṭaia ‘kan thinlung chu a hmaa leihbaw’ tûrin min duh a. (Sâm 62:8) A thiltih zawng zawngte avângin Jehova fakin, lâwmthu hrilh ang che. Rawngbâwlnaa huaisenna pe tûr chein dîl la. Harsatna eng pawh tuar chhuak thei tûr leh, thlêmna i tawh theih eng pawh do thei tûrin a ṭanpuina ngên ang che. Jehova hnêna ṭawngṭai ziah tûrin eng thil mah, a nih loh leh tu mah indâltîr suh. A nih chuan, engtin nge Jehova’n kan ṭawngṭainate a chhân? Chu zawhna pawimawh tak chu a dawta thuziakah kan sawiho vang.