1-2. Juda mi Babulona chêngte’n eng thu tlûkna pawimawh tak nge an siam ngai? (Ezra 1:2-4)

 THUPEK chu chhuah a ni ta! Juda mi Babulona kum 70 vêl sala tâng tawhte chu an ram, Israel rama kîr leh tûrin an zalên ta. (Ezra 1:2-4 chhiar rawh.) Jehova chauhvin chu thil chu a thlentîr thei a ni. Engvângin nge chutianga kan sawi theih? Babulon mite chuan an salte chu an chhuah ngawt ngai lo va. (Is. 14:4, 17) Mahse, Babulon chu tihtlâwm a ni a, rorêltu thar chuan Juda mite chu an rama an kîr leh theih thu a hrilh a ni. Chuvângin, Juda mi zawng zawng a bîk takin chhûngkaw lûte chuan thu tlûkna pawimawh tak an siam a ngai a. Chu chu thu tlûkna siam harsa tak a ni ngei ang. Engvângin nge?

² An zînga tam tak chu an upat tawh êm avângin chutianga hla chu an zin thei lo va. Chu bâkah, Juda mi tam zâwk chu Babulona piang an ni a, hmun dangah an la chêng ngai lo. An tân Israel chu an thlahtute ram mai a ni. Juda mi ṭhenkhat chu Babulonah chuan an hausa hle a, an in nuam takte leh an ei zawnnate kalsana, hriat ngai loh rama va awm chu an tân a harsa thei a ni.

3. Israel rama kîr leh Juda mi rinawmte chu eng malsâwmnain nge hmuak?

³ Juda mi rinawmte chuan Israel rama kîr leh chu an inpêkna eng pawh aiin a hlu zâwk hle tih an hria a. An malsâwmna  dawn tûr ropui ber chu Pathian an biakna hi a ni. Babulonah chuan milem pathian biak in 50 chuang awm mah se, Jehova biak in erawh pakhat mah a awm lo. Chu hmunah chuan Israel mite tân Mosia Dânin a phût anga, hâlral thil hlanna tûr maichâm a awm lo va, hâlral thil hlân tûra ruat puithiamte pawh an awm lo bawk. Chu bâkah, Jehova leh a tehnate ngaisâng lo, milem betute lakah chuan Jehova mite chu an tlêm hle a. Chuvângin, Juda mi Pathian ṭihtu a sâng têlte chuan biakna dik an tundin leh theihna tûr hmun, an rama kîr leh chu an nghâkhlel hle a ni.

4. Juda mi Israel rama kîr lehte chu Jehova’n eng ṭanpuina nge pêk a tiam?

⁴ Babulon aṭanga Israel panna zin kawng hautak zet chuan thla li vêl a awh thei a; mahse, Jehova chuan an kîr lehna dâl thei anga lang harsatna eng pawh thenfaisak a tiam a ni. Isaia chuan: “LALPA kawng buatsaih ula, ram rovah kan Pathian tân lamlian tirual rawh u. . . . Tlâng tin . . . tihhniam a ni bawk ang: . . . a bumboh laite tihrual a ni bawk ang,” tiin a ziak a ni. (Is. 40:3, 4) Thlalêr paltlangtu kawngpui leh tlâng kâra hmun zâwl chu han mitthla teh. Zin mite tân zawh a va han nuam dâwn tak êm! Tlâng te, phai te, leh ruamtea chhuk chho leh kual taka kal aiin, kawngpui ngîl tak zawh chu an tân a awlsam zâwk ngei ang a. Kal pawh an kal sâwt zâwk ngei bawk ang.

5. Babulon leh Israel inkâra entîr nei kawngpui chu eng nge a hming?

⁵ Tûn laia kawngpui tam tak chu hming, a nih loh leh number pêk an ni a. Isaia târ lan entîr nei kawngpui pawh hian hming a nei a. Heti hian kan chhiar a ni: “Chutah chuan lamlian a awm ang, kawng nên, chu chu ‘Thianghlimna Kawng,’ an ti ang a; mi bawlhhlawh chu chutah chuan an kal lo vang,” tiin. (Is. 35:8) Chu thutiam chuan a hun laia Israel mite tân eng awmzia nge a neih a? Tûn laiah kan tân eng awmzia nge a neih?

6. Engvângin nge he kawng hi thianghlimna kawng tia koh a nih?

⁶ “Thianghlimna Kawng”—kawngpui hming mawi tak a va ni êm! Engvângin nge chu kawng chu thianghlimna kawng tia koh a nih? Israel hnam din thar lehah chuan Juda mi, “mi bawlhhlawh”—nungchang bawlhhlawhna te, milem biakna te, a nih loh leh sual pawi tak dang titute—tân hmun a awm lo. Juda kîr lehte chu an Pathian tân “hnam thianghlim” an lo ni ang. (Deut. 7:6) Mahse, chu chu Babulon chhuahsantute tân Jehova tilâwm tûrin inthlâk danglamna siam a ngai lo tihna a ni lo.

7. Juda mi ṭhenkhat tân eng inthlâk danglamna nge siam ngai? Entîrna pe rawh.

⁷ Kan hriat tâk angin, Juda mi a tam zâwkte chu Babulona piang an ni a, an zînga tam tak chuan Babulon mite thil thlîr dân leh an thil ngaihhlutte chu an ṭâwmpui ngei a rinawm. Juda mi Israel rama kîr leh hmasa berte thlen hnu kum sâwm bi têlah, Ezra chuan Juda mi ṭhenkhatin milem betu hmeichhiate nupuiah an nei tih a hria a. (Ex. 34:15, 16; Ezr. 9:1, 2) A hnuah, Ram Awptu Nehemia pawhin Israel rama piang naupangte’n, Juda ṭawng an thiam lo tih a hriat chuan mak a ti hle. (Deut. 6:6, 7; Neh. 13:23, 24) Chûng naupangte chuan Pathian Thu ziahna atâna ṭawng hman ber, Hebrai ṭawng chu an hre thiam lo a nih chuan, engtin nge Jehova hmangaih leh amah biak dân an zir theih tehlul ang? (Ezr. 10:3, 44) Chuvângin, chûng Juda mite chuan inthlâk danglamna nasa tak an siam a ngai a; mahse, an tân chutianga inthlâk danglamna siam chu zawi zawia biakna thianghlim din thar lehna hmun Israel ramah a awlsam zâwk ngei ang.—Neh. 8:8, 9.

8. Engvângin nge hun rei tak kal taa thilthlengte chu tûn laiah kan ngaihven ang? (A kâwma milem en rawh.)

 ⁸ Mi ṭhenkhat chuan heti hian an ngaihtuah mai thei: ‘Chûng thilte chu ngaihvenawm hle mah se, hun rei tak kal tawha Juda mite chunga thilthleng chuan tûn laiah kan tân awmzia a nei dâwn em ni?’ tiin. Nei tehrêng mai, a chhan chu “Thianghlimna Kawng” zawh mêk ang kan nih vâng a ni. Hriak thih kan ni emaw, “berâm dang” kan ni emaw, thlarau lam paradis leh Lalram malsâwmna lo thleng tûrte lama min hruai avângin “Thianghlimna Kawnga” kan kal reng a ngai a. b (Joh. 10:16) C.E. kum 1919 aṭang khân, a hmei a pa a pui a pang mi maktaduai têlte chuan khawvêl sakhaw dik lo lalram, Babulon Khaw Ropui chu chhuahsanin chu entîr nei kawng chu an zawh ṭan a. An zîngah i tel ngei a rinawm. Chu kawng chu kum 100 kalta vêla hawn chauh ni mah se, kawngpui buatsaih hna chu kum za tam tak kaltaah khân ṭan a lo ni tawh a ni.

9. Isaia 57:14 thu nêna inmilin, engtiang kawngin nge “Thianghlimna Kawng” chu buatsaih a nih?

⁹ Babulon chhuahsantu Juda mite tân Jehova’n kawnga tlûkna thlen thei thilte a paih bosak a. (Isaia 57:14 chhiar rawh.) Tûn laia “Thianghlimna Kawng” chungchâng hi eng nge ni ve? Kum 1919 thlen hma kum zabi tam tak aṭangin, Jehova chuan Pathian ṭihtu mipate chu Babulon Khaw Ropui aṭanga chhuahna kawng buatsaih tûrin a hmang a. (Isaia 40:3 nên khaikhin rawh.) Anni chuan a hnua mi rilru ṭhate’n sakhaw dik lo an chhuahsan theihna tûr leh, a mite ruala Jehova an biak theihna tûrin hna pawimawh tak, thlarau lam kawng buatsaihna hna chu an thawk a ni. He “kawng buatsaihna hnaah” hian eng nge tel? Buatsaihna hna lo thawh tawh ṭhenkhat chu i lo ngaihtuah ang u.

10-11. Engtin nge Bible chhut chhuahna leh lehlinna chuan Bible hriatna thehdarh kawngah a ṭanpui? (Milem en bawk rawh.)

¹⁰ Lehkha chhut chhuahna. Kum zabi 15-na laihâwl thleng khân Bible chu kuta ziak chhâwn a ni a. Chu hna chuan hun a duh reiin, Bible ziak chhâwnte chu a vângin a to hle bawk. Mahse, lehkha chhutna khâwl siam chhuah a nih hnuah, Bible chu awlsam zâwka chhut chhuah leh sem darh theih a ni ta a ni.

¹¹ Ṭawng lehlinna. Kum zabi tam tak chhûngin Bible chu lehkha thiamte chauhvin an hriatthiam, Latin ṭawng deuh chauhva hmuh theih a ni a. Lehkha chhut chhuah a lo lâr tâk hnuah chuan, Pathian ṭihtute chuan mipui vântlâng ṭawng hmantein Bible lehlin hna chu nasa takin an thawk a ni. Bible chhiartute chuan sakhaw hruaitute zirtîrna leh, Bible zirtîrna dik tak chu tûnah chuan an khaikhin thei tawh a ni.

12-13. Tihtak zeta Bible zirtute’n kum zabi 19-na laia sakhaw dik lo zirtîrnate an laih lan ṭan dân entîrna pe rawh.

¹² Bible zirna ṭanpuitu lehkhabute. Ngun taka Bible zirtute chuan Pathian Thu an chhiarna aṭangin thil tam tak an zir a. Mahse, chûng Bible zirlaite’n an thu zirte mi dangte hnêna an hrilh avângin sakhaw hruaitute chu an thinrim hle. Entîr nân, kum zabi 19-naah mi ṭhahnemngai tak takte chuan kohhrante zirtîrna dik lo, lai langtu Bible tract-te an tichhuak a ni.

¹³ Kum 1835 vêlah Pathian ṭihtu Henry Grew-a chuan mitthite dinhmun chungchâng sawina tract a tichhuak a. Chutah chuan, mihringte hian thlarau thi thei lo kan nei tia kohhran tam zâwkte zirtîrna chu a dik lo tih leh, thih theih lohna nun chu Pathianin a pêkate chauhvin an nei zâwk ang tih Bible aṭangin finfiahna a pe a ni. Kum 1837-ah rawngbâwltu  George Storrs-a chuan rêla a chuan laiin chu tract chu a hmu a. A chhiar hnuah, thutak pawimawh tak a hmu chhuak tih a ring nghet tlat a ni. A thil hriat chu mi dangte hnênah hrilh a tum ta a. Kum 1842-ah “Zawh Chianna—Mi Suaksualte’n Thih Theih Lohna Nun An Nei Em?” tih thupui ngaihvenawm tak ṭanchhanin thusawi inzawm a pe a. George Storrs-a thuziakte chuan ṭhalai Charles Taze Russell-a chungah nghawng ṭha tak a nei a ni.

14. Unau Russell-a leh a ṭhiante’n tûn hmaa thlarau lam kawng buatsaihna chu eng kawngtein nge an hlâwkpui? (Milem en bawk rawh.)

¹⁴ Unau Russell-a leh a thiante’n tûn hmaa thlarau lam kawng buatsaihna chu eng kawngtein nge an hlâwkpui? An zirnaah chuan an hun hmaa lo buatsaih tawh dictionary te, thu har hrilhfiahna te, leh Bible lehlin hrang hrangte an râwn thei a. Henry Grew-a te, George Storrs-a te, leh mi dangte’n Bible zir bingna an lo neih tawhte pawh an hlâwkpui hle. Unau Russell-a leh a ṭhiante chuan Bible ṭanchhan lehkhabu leh tract tam tak tichhuakin anmahni ngeiin thlarau lam kawng buatsaihnaah an ṭanpui a ni.

15. Kum 1919-ah eng hmasâwnna pawimawh tak nge thleng?

¹⁵ Kum 1919-ah Babulon Khaw Ropui chuan Pathian mite chunga a thununna chu a hloh va. Chumi kum chuan “bawi rinawm, fing tak” chuan hna a thawk ṭan a; chuvângin, thinlung ṭha pute chuan “Thianghlimna Kawng” an zawh ṭan thei a ni. (Mt. 24:45-47) Chu kawng buatsaih tûra hun kal tawha mi rinawmte hnathawh chuan, chu kawngpui zawh ṭantute chu Pathian Jehova leh a thiltumte tam lehzuala hre tûrin a ṭanpui a. (Thuf. 4:18) Anni chu Jehova thil phûtte milin an nung thei a ni. Pathian Jehova chuan a mite chu vawilehkhata inthlâk danglam nghâl tûrin a beisei lo va. Chu aiin, anni chu zawi zawiin a tithianghlim zâwk a ni. (“ Jehova’n A Mite Zawi Zawiin A Tithianghlim,” tih bâwm chu en rawh.) Kan thiltih apianga Jehova kan tihlâwm theih hunah chuan kan va hlim dâwn êm!—Kol. 1:10-12.

16. Kum 1919 aṭang khân “Thianghlimna Kawng” chu eng anga thawm ṭhat nge a nih? (Isaia 48:17; 60:17)

¹⁶ Kawng rêng rêng hian thawm ṭhat reng a mamawh a. Kum 1919 aṭang khân, mi tam lehzualin Babulon Khaw Ropui an chhuahsan theih nân “Thianghlimna Kawng” buatsaih hna chu thawh chhunzawm zêl a ni. Bawih rinawm leh fing tak ruat thar chuan hna a thawk ṭan nghâl a, kum 1921-ah Bible thutak zir duhte ṭanpui nâna duan Bible zirna ṭanpuitu thu leh hla a tichhuak a. A hnuah, chu thu leh hla chhuah, The Harp of God tih lehkhabu chu ṭawng 36-in bu maktaduai ruk deuh thaw sem chhuah a ni a, chumi aṭang chuan mi tam takin thutak an zir a ni. Tûn hnai lawkah Bible zirtîr nâna hman tûr thu leh hla chhuah ṭha tak, Chatuanin I Hlim Thei! tih lehkhabu kan nei a. Ni hnuhnûng chhûng hian, Jehova chuan “Thianghlimna Kawng” kan zawh zawm zêl theih nân, a inawpna pâwl hmangin thlarau lam chaw min pe chhunzawm zêl a ni.—Isaia 48:17; 60:17 chhiar rawh.

17-18. “Thianghlimna Kawng” chuan khawiah nge min hruai thlen ang?

¹⁷ Tuemawin Bible zir a duh hian “Thianghlimna Kawng” zawh theihna hun remchâng a nei tiin kan sawi thei a. Mi ṭhenkhatin chu kawngpui chu tâwi tê zawhin, an pênsan leh ṭhîn a. Mi dangte chuan an tum ram an thlen hma loh, chu kawng chu zawh chhunzawm zêl an tum a ni. Chu an tum ram chu eng nge ni?

¹⁸ “Thianghlimna Kawng” chuan vân lam beiseina neitute chu vâna ‘Pathian paradis-ah’ a hruai thleng ang a. (Thup. 2:7) Lei lam beiseina neitute erawh chu, kum 1,000 tâwpah ṭhat famkimnaah a hruai thleng ang. Chu kawngpui chu i zawh mêk a nih chuan hawikîr lo la. Khawvêl thar i zawh thlen hma loh chuan pênsan suh ang che! Chu zin kawng chu “tluang taka zawh” tûrin duhsakna kan hlân a che.