1, 2. (a) Pathian chhiahhlawhte chuan eng lâwmman nge an thlîr tlat? (b) Lâwmman thlîr reng tûrin engin nge min ṭanpui ang? (A thupui chunga milem en rawh.)

HRIAK thih Kristiante chuan beiseina hlu tak an nei a. Anni chuan vân nunna an beisei a ni. Tirhkoh Paula’n chu beiseina chu “Pathian chung lam koh chhan lâwmman,” tiin a sawi a. (Philippi 3:14) Vâna Isua Krista Lalramah amah nên ro an rêl ang a, mihringte chu ṭha famkim ni tûrin an thawhpui ang. (Thu Puan 20:6) Beiseina ropui tak a va ni êm! Berâm dangte pawhin lâwmman danglam tak an beisei a. Chu chu lei Paradis-a chatuana nun beiseina a ni a, chu chuan a va tihlim tak êm!—2 Petera 3:13.

² Paula chuan a unau hriak thih Kristiante chu rinawm tlat tûr leh lâwmman dawng tûra ṭanpui a duh a. An hnênah: “Chung lama thil awmahte chuan in rilru nghat tlat rawh u,” tiin a hrilh a ni. (Kolossa 3:2) An vân lam beiseina hlu taka an  rilru an nghah tlat a ngai a. (Kolossa 1:3-5) Jehova malsâwmnate ngaihtuahna chuan Pathian chhiahhlawh zawng zawngte chu lâwmman thlîr tlat tûrin a ṭanpui ang. Chu chu vân beiseina neite tân leh lei lam beiseina neite tân a dik a ni.—1 Korinth 9:24.

3. Paula’n Kristiante chu eng chungchângah nge a vaukhân?

³ Paula chuan Kristiante chu lâwmman chântîr theitu thil hlauhawmte chungchângah a vaukhân bawk. Entîr nân, Kolossa khuaa mite hnênah Kristaa rinna nghat lova Mosia Dân zâwma Pathian tihlâwm tumtu Kristian dik lote chungchâng a ziak a. (Kolossa 2:16-18) Chu bâkah, tûn laia Kristiante tân lâwmman min chântîr theitu thil hlauhawmte pawh a sawi bawk. Châkna bawlhhlawh kan do theih dân leh chhûngkuaa buaina, a nih loh leh kohhranna unaute nêna buaina kan neih huna kan tih tûrte pawh a sawi bawk a ni. Paula thurâwn pêk hlu tak chuan tûn laiah min ṭanpui thei a. Chuvângin, Kolossa khuaa mite hnêna a lehkha thawna kan hmuh vaukhânna ṭhenkhat chu i lo ngaihtuah ang u.

4. Engvângin nge nungchang bawlhhlawh châkna chuan lâwmman min chântîr theih?

⁴ Paula’n a unaute chu an beisei hlu tak chungchâng a hriattîr hnuah heti hian a ziak a: “Chutichuan in taksa pêng leia awmte hi tihlum rawh u, inngaihna te, bawlhhlawhna te, hurna te, châkna sual te, duhâmna te hi,” tiin. (Kolossa 3:5) Nungchang bawlhhlawh châkna chu a nasa hle thei a, Jehova nêna kan inlaichînna leh nakin hun atâna kan beiseina a tichhe thei a ni. A châkna sual do zo lo; mahse, a hnua kohhrana lo kîr leh unaupa chuan chûng châkna sualin a hneh êm avângin, “a tlai lutuk hnuah chauh a bânsan thei,” tih a sawi.

5. Dinhmun hlauhawm aṭangin engtin nge kan invên theih?

⁵ Nungchang lama Jehova tehnate zâwm lo tûra min awmtîr thei dinhmuna kan awm a nih chuan kan fîmkhur lehzual a ngai a. Entîr nân, inngaizâwngte chuan an inngaihzâwn ṭantîr lamah inkhawih te, infawh te, leh a fâla pahnih chauhva awm ang chi dinhmunahte chuan ram ri an insiam a ṭha ang. (Thufingte 22:3) Dinhmun hlauhawm dang leh chu neih inang lo tuemaw nên sumdâwnga khual kan zin hunah emaw, hna kan thawh dun hunah emawh a ni a. (Thufingte 2:10-12, 16) Mahni invên nân eng nge i tih theih? Jehova Thuhretu pakhat i ni tih inhriattîr rawh. Zahawm takin awm la, inchhai derna chuan thil ṭha lo a thlen thei tih hre reng ang che. Kan lunghnual hunah leh mal nia kan inhriat hunah pawh kan fîmkhur a ngai bawk. Tuemaw hian min duh se tih kan ngaihtuah pawh a ni mai thei a. Mal nia kan inhriat avângin tuemawin min ngaihsak hian kan rilru a thle palh thei bawk. Chu chu thil hlauhawm a ni. Chutianga i awm a nih chuan, lâwmman chântîr theitu tûr thil engmah ti suh. Ṭanpuina hmu tûrin Jehova leh i unaute pan ang che.—Sâm 34:18; Thufingte 13:20 chhiar rawh.

6. Intihhlimna kan thlan hunah eng nge kan hriat reng ang?

⁶ Nungchang bawlhlawh châkna tihlum tûr chuan intihhlimna bawlhhlawhte kan hnâwl a ngai a. Tûn laia hmuh theih intihhlimna tam takte chuan Sodom leh Gomora khuaa thiltihte chu min hriatchhuahtîr a  ni. (Juda 7) Intihhlimna tichhuaktute chuan nungchang bawlhhlawhna chu thil pângngai leh mi tichhe thei lo angin an lantîr a. Chuvângin, kan fîmkhur reng a ngai a ni. Khawvêlin intihhlimna a tihchhuah apiangte chu kan pawm mai tûr a ni lo. Chu aiin, nunna lâwmman min chântîr lotu intihhlimnate kan thlan a ngai a ni.—Thufingte 4:23.

7. Kristian kohhranah eng buainate nge lo chhuak thei?

⁷ Kristian kohhran zînga kan tel ve avângin kan lâwm a. Inkhâwmnaah Pathian Thu kan zîr a, tichuan hmangaih takin kan inṭanpui tawn a. Chu chuan lâwmman thlîr reng tûrin min ṭanpui a ni. Mahse, a châng chuan kan unaute nêna kan inkâra buaina thlen theitu inhriatsualnate a awm ṭhîn. Chûng buainate chu kan chinfel loh chuan, awlsam takin min tithinur thei a ni.—1 Petera 3:8, 9 chhiar rawh.

8, 9. (a) Eng miziate’n nge lâwmman dawng tûra min ṭanpui ang? (b) Kristian unau pakhatin min tilungni lo a nih chuan remna vawng reng tûrin engin nge min ṭanpui thei?

⁸ Thinurnain lâwmman min chântîr chu kan phal lo vang. Paula chuan Kristiante tih tûr chu heti hian a sawi a: “Pathian mi thlan, mi thianghlim leh duh takte angin lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u. Tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u. Tin, chûng zawng zawng chungah chuan hmangaihna inbel rawh u, chu chu phuar famkimna a ni,” tiin.—Kolossa 3:12-14.

⁹ Hmangaihna leh ngilneihna chuan mi dangte ngaidam tûrin min ṭanpui thei a. Tuemaw thusawi leh thiltihin kan rilru a tina a nih chuan, hmangaihna nei lo taka kan thusawi leh kan thiltihte mi dangin min ngaihdam hun lai kan ngaihtuah thei a ni. An hmangaihna leh ngilneihna avângin kan va lâwm tak êm! (Thuhriltute 7:21, 22 chhiar rawh.) Krista’n betu dikte chu ngilnei taka a inpumkhattîr avângin kan lâwm tak zet a. (Kolossa 3:15) Pathian pakhat kan be tlâng a, thuchah thuhmun kan hril a, kan buaina neihte pawh a inang a ni. Ngilneihna leh hmangaihna neia kan inngaihdam tawn chuan, kohhranah inlungrualna a awm lehzual ang a, lâwmman chu kan thlîr tlat thei ang.

10, 11. (a) Engvângin nge îtsîkna neih chu a hlauhawm? (b) Itsîkna avânga lâwmman chân lo tûrin eng nge ka tih ngai?

¹⁰ Itsîknain kan lâwmman dawn tûr chu a dâl thei a. Bible-a entîrnate chuan îtsîkna hlauhawmzia a târ lang a ni. Entîr nân, Kaina’n Abela a îtsîk avângin a that a. Kora, Dathana, leh Abiramate chuan Mosia an îtsîk avângin a chungah an hel a ni. Lal Saula chuan Davida a îtsîk avângin thah a tum bawk. Pathian Thuin: “Inîtsîkna leh inelna awmnaah chuan buaina leh thiltihsualna tinrêng a awm ṭhîn,” tia a sawi hi a dik tak zet a ni.—Jakoba 3:16.

¹¹ Hmangaihna leh ngilneihna dik tak neih kan tum tlat chuan, îtsîkna rilru kan nei mai lo vang. Pathian Thu chuan: “Hmangaihnain a dawhthei a, ngil a nei bawk ṭhîn; hmangaihnain a îtsîk lo va,” tiin a sawi. (1 Korinth 13:4) Itsîkna chu kan mize pêng nihtîr lo tûr chuan Jehova thil thlîr dân anga kan  thlîr a ngai a. Kan unaute chu kohhran nêna tehkhin kan taksa pêngte anga ka thlir a ngai a ni. Bible chuan: “Pêng khat chawimawiin a awm chuan pêng zawng zawngin an lâwmpui ṭhîn,” tiin a sawi a. (1 Korinth 12:16-18, 26) Kan unau pakhat chunga thil ṭha a thlen hunah kan îtsîk lo ang a, kan lâwmpui zâwk ang. Lal Saula fapa Jonathana entawn tûr ṭha siam hi han ngaihtuah teh. Amah aia Davida lal tûra thlan a nih khân a îtsîk lo va. Davida chu a fuihin a thlâwp zâwk a ni. (1 Samuela 23:16-18) Jonathana angin hmangaihna leh ngilneihna kan lantîr thei ang em?

12. Bible-a eng thurâwn pêkin nge chhûngkuaa lâwmman dawng tûra ṭanpui che?

¹² Chhûngkuaa Bible thu bulte kan zawm chuan chhûngkuaah remna leh hlimna a awm ang a, lâwmman kan dawng ang. Paula chuan chhûngkuate hnênah heti hian thurâwn fing tak a pe a ni: “Nupuite u, Lalpaa a âwm tâwk ang zêlin in pasalte hnênah intulût rawh u. Pasalte u, in nupuite hmangaih ula, an lakah vîn suh u. Naupangte u, engkimah in nu leh in pate thu zâwm rawh u, chu chu Lalpaah chuan a lâwmawm si a. Pate u, in fate tinuar suh u, chutilochuan an bei a dawng dah ang e,” tiin. (Kolossa 3:18-21) He thurâwnin i chhûngkua a ṭanpui theih dân i hmu em?

13. Engtin nge Kristian unaunu chuan a pasal ring lotu chu Jehova biak duhna nei tûra a ṭanpui theih?

¹³ Jehova be lotu pasal i nei pawh a ni mai thei. A cheibawl dân tûr che anga cheibawl lo nia i hriat chuan eng nge i tih ang? I thin a rimin in inhnial pawh a ni mai thei; mahse, chu chuan dinhmun chu a tiṭha zâwk ang em? Hnial hneh pawh ni la, chu chuan Jehova  biak duhna a neihtîr thei ang em? A neihtîr theih a rinawm loh. Chu aiin, chhûngkaw lû a nihnaah zahna i lantîr chuan, chhûngkuaah remna awm lehzual tûrin i ṭanpui thei ang a, Jehova i chawimawi tihna a ni zâwk ang. I entawn tûr ṭha siam chuan i pasal chu Jehova biak duhna hial pawh a neihtîr theih bâkah in nupain lâwmman in dawng thei a ni.—1 Petera 3:1, 2 chhiar rawh.

14. Kristian pasal chuan ring lotu a nupuiin zahna a lantîr loh chuan eng nge a tih ang?

¹⁴ Jehova be lotu nupui i nei pawh a ni mai thei. A zah lo che nia i hriat chuan eng nge i tih ang? Amah ânkhumin thuneitu zâwk i nihzia lantîr i tum chuan a zah che ang em? A zah hauh lo vang che! Pathian chuan Isua entawntu hmangaihna nei tak pasal ni tûrin a beisei che a ni. (Ephesi 5:23) Kohhran lû Isua chuan dawhtheihna leh hmangaihna a nei reng a. (Luka 9:46-48) Isua i entawn tlat chuan a tâwpah i nupui pawhin Jehova biak duhna a nei thei a ni.

15. Kristian mipa chuan a nupui a hmangaih tih engtin nge a lantîr ang?

¹⁵ Jehova chuan pasalte chu: “In nupuite hmangaih ula, an lakah vîn suh u,” tiin kaihhruaina a pe a. (Kolossa 3:19) Hmangaihna nei pasal chuan a nupui chu a chawimawi a ni. Engtin nge a chawimawi? A nupui ngaih dânte ngaihthlâksakin a thusawite chu atân a pawimawh tih a hriattîr a ni. (1 Petera 3:7) A thil dîlte chu a tihsak reng thei lo a nih pawhin, a thusawite ngaihthlâksakna chuan thu tlûkna ṭha zâwk siam tûrin a ṭanpui thei ang. (Thufingte 15:22) Hmangaihna nei tak pasal chuan amah zah tûrin a nupui chu a tilui lo vang. Chu aiin, a nupuiin zahna a lantîr theih nân hma a la zâwk ang. Pasalin a nupui fanaute a hmangaih hian, chhûngkuaa Jehova rawng an bâwlnaah an hlim  lehzual ang a, nunna lâwmman an dawng ngei ang.

16, 17. Ṭhalai i nih angin, nu leh pate chunga lungnih lohna nasa tak neih chu engtin nge i pumpelh theih ang?

¹⁶ Tleirâwl i ni a, i nu leh pate’n an hre thiam lo chein, anni chu khirh lutuk angin i ngai pawh a ni mai thei. Chu chuan a tihlunghnual êm che avângin Jehova rawngbâwl duhna pawh a hlohtîr thei che a ni. Mahse, Jehova i hawisan a nih chuan i Kristian nu leh pa leh kohhrana i ṭhiante’n an hmangaih che ang tlûkin khawvêla tumahin an hmangaih lo che tih i hmu chhuak ang.

¹⁷ Hei hi han ngaihtuah teh: I nu leh pate’n an zilh ngai lo che a nih chuan an ngaihsak tak tak che tih engtin nge i hriat theih ang? (Hebrai 12:8) Ni e, anni chu an ṭha famkim lo va, an zilh dân che chuan a tilunghnual che pawh a ni mai thei. Mahse, an zilh dân ringawt chu ngaihtuah suh. Chu aiin, an zilh chhan che leh an sawi chhante chu hriatthiam tum zâwk rawh. Rilru dam takin awm la, a lutuka chhân lêt loh tum ang che. Pathian Thu chuan: “A thu sawia insûm ṭhîn chuan finna a nei a, rilru dam mi chuan hriat thiamna a nei,” tiin a sawi. (Thufingte 17:27) Zilhnate pawm thei khawpa mi puitling nih tum la, zilh dân chu engtiang pawh ni se, chu mi aṭangin inzîr tum rawh. (Thufingte  1:8) Jehova hmangaihtu nu leh pate i nei hi thilpêk hlu tak a ni tih theihnghilh ngai suh. Chatuan nunna i neih theih nân an ṭanpui duh che a ni.

18. Engvângin nge lâwmman chu i thlîr tlat ang?

¹⁸ Kan chatuan nun beiseina chu vânah emaw, lei paradis-ah emaw pawh ni se, kan vai hian hma lam hun ropui tak chu kan thlîr thei a. Kan beiseina chu a tak a ni. Chu chu lei leh vân Siamtu thutiamah a innghat a, ani chuan: “Leilung hi LALPA hriatnain a khat zo vek dâwn a ni,” tiin a sawi. (Isaia 11:9) Rei lo têah leia mi zawng zawngte chu Pathian zirtîrin an awm tawh ang. Chu lâwmman dawng tûra thawhrim chu manhla tak a ni. Chuvângin, Jehova’n a tiam che chu hre reng la, engmah hian lâwmman chântîr che suh se!