1. Hla sakna chuan eng ti tûrin nge min ṭanpui?

HLA phuahtu hmingthang tak pakhat chuan: “Thu malte chuan thil min ngaihtuahtîr a. Rimawi chuan rilrua veina min neihtîr a. Hla erawh chuan thil ngaihtuahte min veitîr thung a ni,” tiin a lo sawi tawh ngai a. Kan hlate chuan kan Pa vâna mi, Jehova fakna a thlen a, amah kan hmangaihna a târ lan bâkah, amah min hnaihtîr lehzual a ni. Chuvângin, a mi malin emaw, unaute nên emawa hlasak hian biakna dika hmun pawimawh tak a chan chhan chu awlsam takin kan hre thei a ni.

2, 3. (a) Mi ṭhekhatin kohhranho nêna ring taka hla sak chu engtin nge an ngaih? (b) He thuziakah hian eng zawhnate nge kan sawiho vang?

² A nih leh, kohhranho nêna ring taka hla sak chu engtin nge i ngaih? Chu chuan a tizak che em? Hnam dân ṭhenkhatah chuan mipa tân mi hmaa hla sak chu nuam lo tak a ni thei a. Chutiang ngaih dân chuan kohhran chhûngah nghawng ṭha lo a neihtîr thei a, a bîk takin, upate’n hla sak an tîm emaw, hla sak laia thil dang an ti emaw a nih hian a ni lehzual a ni.—Sâm 30:12.

 ³ Fakna hla sak chu Jehova kan biakna pêng pakhat a ni a. Chuvângin, hla sak laia pâwna chhuah leh chu inkhâwmna pêng pakhat pelh chu kan duh lo ngei ang. Chuvângin, heti hian kan inzâwt tûr a ni: ‘Inkhâwma hla sak hi engtin nge ka ngaih? Mi hmaa zai ka hreh chuan eng nge ka tih theih? Chu bâkah, engtin nge thinlung taka hla ka sak theih ang? tiin.

4, 5. Hmân lai Israelte huna biak ina hla sak chungchângah eng ruahmanna nge awm?

⁴ Mihring chanchin tluan chhuakah, Jehova betute chuan amah fak nân rimawi an hmang ṭhîn a. Jehova chunga Israel mite an rinawm lai khân, hla sak hi an biakna pêng pawimawh tak a ni chu ngaihvenawm tak a ni. Entîr nân, Davida chuan biak in sak a buatsaih khân, rimawi tuma Jehova faktu tûr Levia mi 4,000 a ruat a. Chûng zîngah chuan ‘LALPA tâna hla sak zir, thiam sa tawh zawng zawngte chu’ mi 288 an ni.—1 Chronicles 23:5; 25:7.

⁵ Rimawi leh hla sak chu biak in hlannaa pêng pawimawh tak a ni bawk. Bible chuan: “Tawtawrâwt hâmtute leh hla satuten LALPA fakna leh lâwm thu sawi nâna an tum rîk chu ri khat ang maiin a hriat a; tawtawrâwt leh dârbenthek leh thil tum rîk nêna an aw an han chhuah a, . . . LALPA ropuinain Pathian in chu a khat ta vek si a!” tiin min hrilh a. Chu chuan Israel mite rinna a tihchak dân tûr chu han mitthla teh!—2 Chronicles 5:13, 14; 7:6.

6. Jerusalem awptu a nih khân, Nehemia’n rimawi leh hla sakna chungchângah eng ruahmanna nge a siam?

⁶ Jerusalem kulh bang sa ṭha leh tûra Israel mite hruaikhâwmtu Nehemia chuan hla sa tûr leh rimawi tum tûrin Levi-hote chu a ruat bawk a. An hla sak leh rimawi chuan kulh hlanna chu a tihlimawm lehzual a ni. Nehemia chuan “lâwm thu sawia inzui duah duaha kal tûr pâwl lian tak pâwl hnih” a ruat a. Zaipâwlte chu pâwl hniha inṭhenin biak in hnaih ber kulha an intawh thlengin khawpui kulh chungah an kal a. An thâwm chu hla taka mite hriat phâk khawpin a ring a ni. (Nehemia 12:27, 28, 31, 38, 40, 43) Jehova chuan a mite’n phûr taka amah fakna hla an sak a hriat chuan a lâwm tih a chiang a ni.

7. Hla sak chu Kristiante tâna biakna pêng pawimawh tak a ni tih engtin nge Isua’n a târ lan?

⁷ Isua hun laiah pawh rimawi chu biakna dik pêng pawimawh tak a la ni chhunzawm zêl a. Mihring chanchina zân pawimawh bera thilthleng kha han ngaihtuah teh. Isua leh a zirtîrte’n Lalpa Zanriah an kîl hnuah an vaiin Jehova fakna hla an sa a ni.—Matthaia 26:30 chhiar rawh.

8. Kristian hmasate chuan Pathian fakna hla sak kawngah eng entawn tûr nge an siam?

⁸ Kristian hmasate chuan Pathian fakna hla sak kawngah entawn tûr ṭha an siam a. Jehova be tûra biak ina kal Israel mite ang lo takin chûng Kristiante chu mi mal inahte an inhmukhâwm a. Chûng inte chu biak in anga mawi leh ṭha ni lo mah se, unaute chuan phûr takin hla an sa tho a ni. Dik takin, tirhkoh Paula chuan a Kristian unaute chu: “Fakna hla te, Pathian hla te, thlarau lam hla tea inzirtîrin inzilh tawn ula, thinlungah khawngaihna neiin Pathian chu hla saksak rawh u,” tiin a hrilh a. (Kolossa 3:16) Kan hla bua hlate  chu ‘thinlung’ taka sak tûr a ni tih a chiang hle a. Chûng hlate chu ‘Bawi rinawm, fing takin a hun tak apianga min pêk chaw’ zîngah a tel a ni.—Matthaia 24:45.

9. (a) Engvângin nge ṭhenkhatin kan inkhâwmnaa hlim taka hla sak chu an hreh mai theih? (b) Engtin nge Jehova fakna hla chu kan sak ang, tute’n nge kaihruai ang? (A thupui chunga milem en rawh.)

⁹ Hla sak i hreh mai theih chhan ṭhenkhat chu eng nge ni? In chhûngkuaah emaw, in hnam dânah emaw hla sak hi chîn ṭhan a ni lo mai thei a. A nih loh leh, radio emaw, TV emawa zaithiam tak takte zai i ngaithlain, an zai dân chu i zai dân nêna i khaikhin chuan i zakin, i lunghnual pawh a ni mai thei bawk. Mahse, kan vai hian Jehova faka hla sa tûrin mawhphurhna kan nei ṭheuh va. Chuvângin, i hla bu chu keng sâng la, dâk deuh hlek la, phûr takin sa ang che! (Ezra 3:11; Sâm 147:1 chhiar rawh.) Tûn laia Kingdom Hall tam takah chuan TV vuah a ni tawh a, chutah chuan kan hla thute târ lan a ni a, chu chuan ring taka zai tûrin min ṭanpui thei a ni. Upate tâna Lalram Rawngbâwlna School-ah Lalram hlate sakna telh a ni ta hi ngaihvenawm tak a ni bawk. Chu chuan upate tân kohhran inkhâwma hla saknaah ṭhahnemngai taka an sak a pawimawhzia a târ lang a ni.

10. Ring taka zai kan hreh a nih chuan eng nge kan hriat reng ang?

¹⁰ Mi tam tak chuan an aw a ring lutuk emaw, an aw a ṭha lo emaw nia an inngaih avângin an zai ring ngam lo va. Mahse, hei hi han ngaihtuah teh. Thu kan sawi hunah ‘kan zain thil tam tak kan tisual fo ṭhîn a.’ Mahse, chu chu thu sawi loh phah nân kan hmang chuang lo. (Jakoba 3:2) Chuvângin, kan aw ṭhat lohna chu Jehova fakna  hla sak loh phah nân kan hmang dâwn em ni?

11, 12. Engtin nge kan hla sak dân chu kan tihhmasâwn theih?

¹¹ Hla sak dân kan hriat loh avângin zai kan hreh pawh a ni mai thei a. Mahse, kan hla sak dân tihmasâwn tûra kan tihtheih thil ṭhenkhat a awm a ni. *—Footnote en rawh.

¹² Thâwk lâk dân i thiam chuan ring tak leh fiah takin i zai thei a. Electric-in mei a tiêng thei ang bawkin, i thaw lâk dânin thu i sawi hunah leh hla i sak hunah aw ṭha a chhuahtîr thei che a ni. Thu i sawi huna i aw ri pângngai, a nih loh leh chu aia ring zâwkin hla i sa tûr a ni. (Benefit From Theocratic Ministry School Education lehkhabu phlêk 181 aṭanga 184-naa “Properly Control Your Air Supply,” tih thupui hnuaia rawtnate chu en ang che.) Dik tak chuan, Bible-in Jehova betute chu ‘hlim taka’ fakna hla sa tûra a sawi châng a awm.—Sâm 33:1-3.

13. Inrintâwkna nei lehzuala hla sak dân sawifiah rawh.

¹³ Chhûngkuain emaw, mi malin emaw Pathian biakna kan neih hunah heti hian tih tum ang che: Kan hla bua i duh ber hla pakhat thlang la, hla thute chu ring tak leh fiah takin chhiar rawh. Chumi hnuah, chu i aw ki ngai vêk chuan thu hlawm khata thu mal awm zawng zawng chu thâwk la lovin sawi chhuak rawh. Tichuan, i aw ki ngai bawk chuan chu ṭawngkam hlawm khat chu sa ang che. (Isaia 24:14) I aw ri chhuak chu a ṭha lehzual ang a, chu tak chu i hmasawnna a ni ang. Chutianga tih chu tîm lo la, zak hek suh!

14. (a) Engtin nge kâ ân zauna chuan kan hla saknaah min ṭanpui theih? (“ Hla Sak Kan Thiam Lehzual Theih Dân” tih bâwm chu en rawh.) (b) Aw ri chhuak ṭha lo chinfel dân chungchângah eng rawtnate nge ṭangkai i tih?

¹⁴ Ṭha taka aw ri chhuak tûr chuan kâ ân zau a ngai a. Chuvângin, hla i sak hunah i thusawi huna i kâ ân aia zauvin âng ang che. Mahse, i aw ki chu a hniam emaw, a sâng lutuk emaw nia i hriat chuan eng nge i tih ang? Benefit From Theocratic Ministry School Education tih lehkhabu phêk 184-naa “Overcoming Specific Problems,” tih bâwmah rawtna ṭangkai tak takte hmuh theih a ni.

15. (a) Kum 2016-a neih kum tin inkhâwm (annual meeting) ah eng thu nge puan a nih? (b) Hla bu siam ṭhat a nih chhan ṭhenkhat chu eng nge ni?

¹⁵ Kum 2016-a neih kum tin inkhâwm (annual meeting) ah Governing Body member pakhat Unau Stephen Lett-a’n Jehova Fakin “Hlim Takin Hla Sa Rawh” (“Sing Out Joyfully” to Jehovah) tih hla bu thar a tlângzarh chuan inkhâwma tel zawng zawngte chu an hlim hle a. Unau Lett-a’n a hrilhfiah angin, hla bu thar kan neih chhan pakhat chu New World Translation of the Holy Scriptures siam ṭhat a nih vâng a ni. New World Translation-ah ṭawngkam ṭhenkhat paih a nih avângin hla thute pawh thlâk a ni a. Thu hrilh rawngbâwlna leh tlanna chungchâng hla tharte belhchhah a ni bawk. Chu bâkah, hla sak hi kan biakna pêng pawimawh tak a nih avângin Governing Body chuan hla bu ṭha tak tihchhuah a duh a. Chuvângin, hla bu thar chu New World Translation Bible anga ṭhaa siam a ni.

16, 17. Hla bu thara thlâk danglamna ṭhenkhat chu eng nge ni?

¹⁶ Hla bu chu awlsam taka hman a nih theih nân hlate chu a thupui azira dah khâwm a ni a. Entîr nân, a hmasa lam hla 12 te chu Jehova chungchâng a niin, a dawta hla 8 te chu Isua leh tlanna  chungchâng a ni a, a dangte pawh chutiang bawka remkhâwm a ni. Hla bu phêk hmasa berah chuan hla thupuite chu a vaia târ lan a ni a. Entîr nân, unaupain vântlâng thusawi atâna hla a thlan duh hunah, chu chuan a ṭanpui thei ang.

¹⁷ Tupawhin thinlung taka hla an sak theih nân hla thu ṭhenkhatte chu fiah lehzual tûra thlâk a ni a. Hla thuahte chuan “a ni dâwn” tih ang chi hman ngai vak loh ṭawngkamte chu hman a ni tawh lo. Chu bâkah “I Thinlung Vêng Ṭha Rawh” tih thupui chu “Kan Thinlung Kan Vêng Ṭha” tia thlâk a ni chu inâwm tak a ni. Engvângin nge? Miin hla bu hluia he hla thute a sak hian mi dangte thiltih tûr hrilh ang a ni thei a. Chu chu kohhran inkhâwmah leh inkhâwmpuia rawn tel mi thar te, ngaihventu te, ṭhalai te, leh unaunute tân ngaihthlâk a nuam lo thei a ni. Chuvângin, hla thupuite leh hla thute chu thlâk a ni.

18. Engvângin nge kan hla bu thara hlate chu kan zir ang? (Footnote en rawh.)

¹⁸ Jehova Fakin “Hlim Takin Hla Sa Rawh” tih hla bu thara hla tam tak chu ṭawngṭaina ang a ni a. Chûng hlate chuan Jehova hnênah i rilru chhûnga awmte hrilh tûrin a ṭanpui thei che a ni. Hla dangte chuan “hmangaih leh thil ṭha” ti tûra fuih tûrin min ṭanpui ang. (Hebrai 10:24) Rimawi te, hla thlûk dân te, leh hla thute chu hriat kan duh a. Chuvângin, kan tih theih dân kawng khat chu kan unaute hla sak record ngaihthlâk hi a ni. Chûng record-te chu jw.org-ah hmuh theih a ni a. Ina hla i zir hunah inrintâwkna leh thinlung taka sak dân i zir thei a ni. *—Footnote en rawh.

19. Engtin nge kohhrana mi zawng zawngin Jehova an biak theih?

¹⁹ Hla sak hi kan biakna pêng pawimawh tak a ni tih hre reng ang che. Chu chu Jehova kan hmangaih a, kan tâna a thiltih zawng zawng chunga kan lâwmzia lantîrna ṭha tak a ni. (Isaia 12:5 chhiar rawh.) Phûr taka hla i sak hian mi dangte pawh chutianga sa ve tûrin i tiphûr thei a. Kohhrana mi zawng zawng, a pui a pangte leh mi tharte chuan chutiang chuan Jehova an be thei a ni. Chuvângin, thinlung taka hla sak chu hreh suh. Fakna hla phuahtuin: “LALPA chawimawiin zai rawh u!” tia a sawi hi zâwm ang che. Ni e, hlim takin zai rawh!—Sâm 96:1.