Jehova Chu Inhumhim Nân I Hmang Em?
“LALPA chuan a chhiahhlawhte nunna chu a tlan ṭhîn a: amaha rinna nghatte chu pakhat mah thiam loh chang an awm lo vang.”—SAM 34:22.
HLA: 49, 32
1. Pathian chhiahhlawh rinawm tam takte chuan thil sual tihna avângin eng ngaih dân nge an neih?
TIRHKOH Paula chuan “mi rethei ka va ni tehlul êm!” tiin a ziak a. (Rom 7:24) Tûn laiah, Pathian chhiahhlawh rinawm tam tak chuan Paula ang bawkin lunghnualna leh rilru hrehawmna an nei a ni. Engvângin nge? Jehova tilâwm duh mah ila, kan vai hian sual kan rochun a, kan ṭhat famkim loh vâng a ni. Chuvângin, Jehova kan tihlungâwi loh hian kan lunghnual thei a. Sual pawi tak ti Kristian ṭhenkhat chuan Jehova’n ngaidam thei lo tûrah an ngai a ni.
2. (a) Sâm 34:22-na chuan Pathian chhiahhlawhte chu a lutuka inthiam lohna an neih a ngai lo tih engtin nge a târ lan? (b) He thuziakah hian eng nge kan zir ang? (“ Zir Tûr Nge Ni A, Entîr Nei Zâwk?” tih bâwm chu en rawh?)
2 Jehova chu inhumhim nâna kan hman chuan a lutuka inthiam lohna kan neih a ngai lo tih Bible-in min hrilh a. (Sâm 34:22 chhiar rawh.) Jehova chu inhumhim nân kan hmang tih awmzia chu eng nge ni? Jehova zahngaihna leh a ngaihdamna dawn kan duh chuan eng nge kan tih ang? Hêng zawhnate chhânna hre tûrin hmân lai Israel rama tualtlânna khawpui chungchânga ruahmannate kan hriat a ngai a. Chu ruahmanna chu Dân thuthlung hnuaia awm a ni a, chu Dân chu C.E. 33 Pentecost nîa thlâk a ni. Dân chu Jehova hnên aṭanga lo kal a nih avângin, tualtlânna khawpui chungchânga ruahmanna chuan thil sual te, thil sual titute, leh inchhîrte chunga Jehova thlîr dân min hriat thiamtîr a ni. A hmasain, Israel mite’n tualtlânna khawpui an neih chhan leh an hman dân i lo en ang u.
“INHUMHIMNA KHUATE SIAM RAWH U”
3. Tualthattu chunga Israel mite tih tûr chu eng nge ni?
3 Mi tuemaw tihhlum a nih hian Jehova chuan pawi a ti hle a. Israel pakhatin mi tuemaw a thah chuan, “thisen phuba latu” tia koh, a thia chhûngkhaw hnai ber mipa chuan tualthattu chu a tihlum tûr a ni. (Numbers 35:19) Chutiang kawng chuan tualthattu chuan pawisawi lo a thah avângin, a nunna aiah ama nunna a pe ang. Tualthattu chu tihhlum nghâl a nih loh chuan Ram Tiam chu a bawlhhlawh, a nih loh leh a thianghlim tawh lo vang. Jehova chuan: “In awmna ram chu in tibawlhhlawh lo vang” tiin thu a pe a, chu chu mihring thisen chhuah loh tûr, a nih loh leh tualthah loh tûr a tihna a ni.—Numbers 35:33, 34.
4. Israel pakhatin tihpalh thil thua tuemaw a tihhlum chuan eng nge a tih ang?
4 Mahse, Israel pakhatin tuemaw chu tihpalh thil thua a tihlum a nih chuan eng nge a tih ang? Thihna chu tihpalh thil avânga thleng ni mah se, pawisawi lo a thah avângin, tualthattu a la ni tho va. (Genesis 9:5) Chutiang dinhmunah chuan Jehova’n zahngaihna lantîr theih a ni tih a sawi. Tihpalh thil thua tualthattu chu thisen phuba latu hnên ata tlân chhiain, tualtlânna khawpui paruk zînga pakhatah a tlân lût thei a ni. Chu khawpuia awm phal a nih tawh chuan humhim a ni ang. Mahse, tualtlânna khawpuia puithiam lal a thih hma loh chu a awm reng tûr a ni.—Numbers 35:15, 28.
5. Tualtlânna khawpuite ruahmanna chuan Jehova chungchâng hre thiam lehzual tûrin engvângin nge min ṭanpui theih?
5 Tualtlânna khawpuite tâna ruahmanna chu mihring ngaih dâna siam a ni lo. Jehova ruahmanna a ni a. Josua hnênah: “Israela thlahte hnênah hian, ‘Inhumhimna khuate siam rawh u khai,’” tiin thu a pe a ni. Tichuan Israel mite’n chûng khawpuite chu “an ruat a.”(Josua 20:1, 2, 7, 8) Jehova chuan chûng khawpuite chu tihthianghlima awm tûrin a duh a. Chuvângin, he ruahmanna aṭangin, Jehova chanchin tam tak kan zir thei a ni. Entîr nân, chu chuan A zahngaihna hre thiam lehzual tûrin min ṭanpui a. Chu bâkah, tûn laiah Jehova chu inhumhim nâna kan hman theih dân min zirtîr bawk.
“UPAHO BENG HRIATAH A CHANCHIN CHU A VA THLEN ANG”
6, 7. (a) Tualthat palhtu chung thu rêltu upaho mawhphurhna chu hrilhfiah rawh. (A thupui chunga milem en rawh.) (b) Engvângin nge tualthat palhtu tân upaho hnêna hrilh chu a finthlâk?
6 Israel miin tihpalh thil thua tuemaw a tihlum a nih chuan tualtlânna khawpuiah a tlân ang a, khawpui kulh kawngkaa upaho hnênah “a chanchin chu a va thlen ang.” Upaho chuan ṭha takin an lo lâwm tûr a ni. (Josua 20:4) A hnuah, khawpui kulh kawngkaa upaho chuan chu pa chu tualthahna thlenna hmuna upahovin a chung thu an rêl theih nân an hnênah an thawn kîr leh ang a. (Numbers 35:24, 25 chhiar rawh.) Chuta upaho chuan thihna chu tihpalh thil thu vânga thleng nia thu tlûkna an siam chuan, ani chu tualtlânna khawpuiah an thawn lêt leh ang.
7 Engvângin nge tualthat palhtuin upate chu a hrilh a ngaih? Upaho chuan Israel hnam thianghlim reng tûr leh tihpalh thil thua tualthattu chu Jehova zahngaihna dawng tûrin an tichiang tûr a ni. Bible lama mi thiam pakhat chuan tualthat palhtu chu upate hnêna a tlân chhiat loh chuan tihhlum theih a ni tiin a ziak a. Pathian thupêk anga a tih loh avângin a thihna mawh chu amah vêkin mawh a phur ang. Tualthat palhtu chuan ṭanpuina a dîl a ngai a, a nun theih nân chu thupêk chu a pawm tûr a ni. Tualtlânna khawpui pakhat khata a tlân loh chuan a mi thaha chhûng hnai ber tuemawin ani chu a that thei a ni.
8, 9. Sual pawi tak ti Kristian chuan engvângin nge upate hnêna a hrilh a ngaih?
8 Tûn laiah, Jehova nêna inlaichînna ṭha nei reng tûr chuan, sual pawi tak ti Kristian pakhat chu upate hnêna a kal a ngai a. Engvângin nge chu chu thil pawimawh tak a nih? A hmasain, sual pawi tak tihna chungchâng rêl tûra upate ruattu chu Jehova a ni. (Jakoba 5:14-16) A pahnihnaah, upate chuan thilsual ti inchhîrte chu Pathian pawm hlawh tûr leh a thil tihsualte tinawn tawh lo tûrin an ṭanpui a. (Galatia 6:1; Hebrai 12:11) A pathumnaah, upate chu thil sual ti inchhîrte thlamuan tûr leh an natnate, inthiam lohna an neihte tinêpsak tûra thuneitute leh zirtîrna dawngte an ni. Jehova chuan chûng upate chu ‘thlihrâng laka inhumhimna ang an ni’ tiin a sawi. (Isaia 32:1, 2) He ruahmanna hi Pathianin kan hnêna zahngaihna a lantîr dân kawngkhat a ni.
9 Pathian chhiahhlawh tam tak chuan upate hnêna an hrilh avângin rilru hahdamna an nei a, ṭanpuina pawh an dawng bawk. Entîr nân, unau Daniel-a chuan sual pawi tak a ti a; mahse, thla engemaw zât chhûng chu upate hrilh lovin a awm a. “Hun rei tak a liam hnuah pawh, upate’n min tihsak theih thil engmah awmin ka hre lo,” tiin a sawi. A thil sual tihte chu tuemawin a hre chhuak ang tih hlau rengin a awm a, Jehova hnêna a ṭawngṭainate chu thupha chawia ṭan ngai niin a inhria a ni. A tâwpah chuan, upate ṭanpuina a dîl ta a. A’n ngaihtuah lêt leh chuan: “Ni e, upate pan chu ka hreh a ni. Mahse, thil awm dân ka hrilh hnu chuan, ka ritphurh chu tuemawin min lâksak ang mai a ni,” tiin a sawi. Daniel-a chuan Jehova hnênah zalên taka thusawi theihna a nei leh ta a. Tûnah chuan, chhia leh ṭha hriatna thiang tak a nei a, tûn hnai khân kohhranho rawngbâwltu a ni.
“CHUNG KHAWPUITE ZINGA A ENGAH EMAW CHUAN A TLAN ANG”
10. Tihpalh thil thua tualthattu chuan ngaihdam a nih theih nân eng nge a tih ngai?
10 Tihpalh thil thua tualthattu chu ngaihdam a nih theih nân tualtlâna khawpui hnai berah a tlân luh vat a ngai a. (Josua 20:4 chhiar rawh.) Khawpui a thlen a, chuta puithiam lal thih thlenga, a awm chauhvin a nun humhim a ni ang. Chu chu tualtlântu tân mahni inphatna a ni. A hna te, a in nuam tak te, leh zalên taka a zin theihnate chu a chân a ngai ngei ang. * (Footnote en rawh.) (Numbers 35:25) Mahse, chu chu inpêkna manhla tak a ni. Tualtlântu chuan puithiam lal thih hma eng hunah pawh khawpui a chhuahsan a nih chuan a tual thahna chu a ngaihsak lo tihna a ni ang a, a nunna atân hlauhawm tak a ni ang.
11. Kristian inchhîr chuan Pathian zahngaihna avanga a lâwmzia engtin nge a lantîr?
11 Tûn laiah pawh thilsual ti inchhîr chuan Pathian ngaihdam a nih theih nân thil engemaw a tih a ngai a. A thil sual tih chu a bânsan tûr a ni. Chutah chuan sual pawi tak min tihtîr thei thilte pumpelh a tel a. Tirhkoh Paula chuan Korinth khuaa Kristian inchhîrte thiltih chu a târ lang a ni. Ani chuan: “Pathian duhzâwnga tihlungngaiha in awmna chuan thil lâk urhsûnna te, . . . sual huatna leh sual hlauhna te, min ngaihna leh ṭhahnemngaihna te, sual titu thunun zêl tûra inpeihna te a neihtîr tâk che u hi,” tiin a ziak a. (2 Korinth 7:10, 11) Chuvângin, thilsual bânsan tûra theih tâwp kan chhuah chuan Jehova hnênah kan dinhmun kan ngaih pawimawhzia leh a zahngaihna dawng nghâl mai tûra kan inngaih lohzia kan lantîr a ni ang.
12. Jehova zahngaihna dawng zawm zêl tûrin Kristian chuan eng nge a chân ngai?
12 Jehova zahngaihna dawng zawm zêl tûrin Kristian chuan eng nge a chân ngai? A thil nuam tihzâwngin sual lamah a hruai lût thei a nih chuan, chûngte chu chân a inhuam tûr a ni. (Matthaia 18:8, 9) Entîr nân, i ṭhiante’n Jehova lawm loh thil ti tûra an thunun che a nih chuan anni chu i kâwm tawh lo ang em? Zu in dân inthunun thei lo mi i nih chuan a lutuka zu in theihna dinhmunte chu i pumpelh ang em? Nungchang bawlhhlawhna lamah inthunun harsa i tih chuan ngaihtuahna bawlhlawh neihtîr thei film te, website-te leh thiltihte i pumpelh ang em? Jehova dânte zâwm tûra kan chânna enpawh chu manhla tak a ni tih hre reng ang che. Jehova’n min thlahthlam nia inhriatna aia lungchhiat thlâk engmah a awm lo va. Jehova’n “kumkhaw ngilneihnain” min khawngaih tih inhriatna aia ṭha zâwk engmah a awm lo bawk.—Isaia 54:7, 8.
“IN TAN INHUMHIMNA A NI ANG”
13. Tualthat palhtu chu tualtlânna khawpui chhûngah him tak leh hlim taka a awm theih chhan hrilhfiah rawh.
13 Tualthattu chu tualtlânna khawpuia a tlân luh tawh chuan a him a. Jehova chuan khawpuite chungchâng heti hian a sawi a ni: “In tân inhumhimna a ni ang,” tiin. (Josua 20:2, 3) Ani chuan tihpalh thil thua tualthattu chu a thiltih ang bawka a chunga tilêt tûrin a phût lo. Thisen phuba latu chu tihpalh thil thua tualthattu that tûrin tualtlânna khawpuia luh phal a ni lo bawk. Tualthattu chu khawpuia a awm chuan Jehova vênhimna hnuaiah a him a ni. Lung in tâng a ni lo va. Hna a thawk theiin, mi dangte a ṭanpui thei a, thlamuang takin Jehova rawng a bâwl thei bawk. Ni e, ani chuan nun hlimawm tak leh lungâwithlâk tak a nei thei bawk a ni!
Jehova’n a ngaidam che tih i ring tlat thei (Paragraphs 14-16-na en rawh)
14. Kristian inchhîr chuan eng nge a rin tlat theih?
14 Pathian mite zînga thil sual pawi tak tite chu an inchhîr hnuah pawh inthiam lohna an la nei reng a. Mi ṭhenkhat chuan an thiltihte chu Jehova’n ngaidam thei ngai lo tûrah an ngai bawk. Chutianga i ngaih chuan Jehova’n a ngaihdam che chuan a ngaidam pumhlûm che tih theihnghilh suh. Inthiam lohna tûr engmah i neih a ngai tawh lo. Chu chu kan sawi tâk Daniel-a chunga thilthleng a ni. Upate’n chhia leh ṭha hriatna thiang tak nei leh tûra an zilh a, an ṭanpui hnuah chuan a rilru a hahdam ta hle a. Heti hian a sawi a ni: “Inthiam lohna engmah ka neih a ngai tawh lo. Sualna chu lâk bo a nih tawh chuan, a bo a ni mai. Jehova’n a sawi tawh angin, i phurrit chu paih thlain hla takah a dahsawnsak che a ni. I hmuh leh a ngai tawh lo vang,” tiin. Tualthat palhtu chu tualtlânna khawpuia a tlân luh tawh chuan, thisen phuba latu chu a hlauh a ngai tawh lo. Chutiang bawkin, Jehova’n kan sualte a ngaihdam hnuah chûngte chu hailang lehin, hrem nân min hmang ang tih kan hlauh a ngai lo.—Sâm 103:8-12 chhiar rawh.
15, 16. Isua’n tlanna a pe tih leh ani chu kan Puithiam Lalber a ni tih hriatna chuan engtin nge Pathian zahngaihna i rinna chu a tihngheh?
15 Dik tak chuan, Israel mite aiin Jehova zahngaihna rinna tûr chhan ṭha kan nei nasa zâwk a. Paula chuan Jehova thu a zawm famkim theih loh avânga “mi rehthei” a nihzia a sawi hnuah: “Isua Krista kan Lalpa avângin Pathian hnênah lâwmthu ka sawi a ni,” tiin a sawibelh a. (Rom 7:25) Eng a sawi duhna nge ni? Ani chuan thil sual tih châknate chu a do va, thil sualte lo ti ṭhîn tawh mah se, a inchhîr a ni. Chuvângin, Isua tlanna inthawina ṭanchhanin Jehova’n a ngaidam tih a ring tlat a. Keini pawh, Isua tlanna inthawina avângin, chhia leh ṭha hriatna thiang leh chhûngrila thlamuanna kan nei thei a ni. (Hebrai 9:13, 14) Kan Puithiam Lalber a nih angin, Isua chuan “Pathian hnêna lo kalte chu a tâwpkhâwk thlengin a chhandam thei bawk a ni, anmahni ṭawngṭaisak tûrin chatuana a nun reng avângin.” (Hebrai 7:24, 25) Hmân laiin, puithiam lalte chuan Israel mite chu Jehova’n an sualte a ngaidam tih ring nghet tûrin an ṭanpui a. Puithiam Lalber Isua kan neih avângin, “zahngaihna kan hmuh theihna tûr leh puih kan ngaih huna ṭanpuina kawngaihna kan hmuh theihna tûrin” chhan ṭha lehzual kan nei a ni.—Hebrai 4:15, 16.
16 Jehova chu inhumhim nâna hmang tûr chuan Isua inthawinaa rinna kan neih a ngai a. Tlanna chu mi nâwlpuite tân chauh a nih ring suh. Tlanna chu mi mal takin i hlâwkpui tih ring tlat rawh. (Galatia 2:20, 21) Tlanna avângin Jehova’n i sualte a ngaidam tih ring ang che. Tlanna chuan chatuan nun beiseina a pe che tih ring bawk rawh. Isua inthawina chu nangma tâna Jehova thilthlâwnpêk a ni!
17. Engvângin nge Jehova chu inhumhim nâna hman i duh?
17 Tualtlânna khawpuite chuan Jehova zahngaihna hre thiam tûrin min ṭanpui a. He ruahmanna aṭang hian Pathianin nunna a hlutzia min zirtîr a ni. Chu chuan upate min ṭanpui dân te, inchhîr tak zet tih awmzia te, leh Jehova’n min ngaidam tih kan chian chhante min hriattîr bawk. Jehova chu inhumhim nân i hmang em? Ani aia inhumhimna ṭha zâwk a awm thei lo! (Sâm 91:1, 2) A dawta thuziakah, tualtlânna khawpuite chuan rorêl dikna leh zahngaihna kawnga entawn tûr ropui ber Jehova entawn tûra min ṭanpui theih dân kan sawiho vang.
^ par. 10 Tualthat palhtu chhûngkhat hnaite chu amah awmpui tûrin tualtlânna khawpuiah an kal tiin Juda mi thiamte’n an sawi.
