1. Jehova’n eng tih nge min phalsak?

JEHOVA chuan mahnia nun kawng kan thlan a phal a. Ani chuan duh thlanna ṭha siam dân min zirtîr a, a lâwm zâwnga thu tlûkna kan siam hunah hlawhtling tûrin min ṭanpui bawk. (Sâm 119:173) Pathian Thu-a kan hmuh finnate kan nunpui poh leh thu tlûkna ṭha kan siam thei lehzual ang.—Heb. 5:14.

2. Thu tlûkna kan siam hnuah eng harsatna nge kan hmachhawn mai theih?

² Thu tlûkna fing kan siam hnuah pawh hlen harsa kan ti mai thei. Entîrna ṭhenkhat hi han ngaihtuah teh: Ṭhalai unaupa chuan Bible chhiar chhuah a tum a. Chawlhkâr engemaw chen chu pelh lovin a chhiar a; mahse, a hnuah chhan engemaw avângin a chawlhsan a ni. Unaunu chuan regular pioneer thawh a tum a; mahse, a thawh ṭan hun tûr nî chu a sawhsawn zêl a ni. Kohhran upate chuan kohhrana unaute hnêna berâm tlawhna nei tûrin lungrual takin thu tlûkna an siam a; mahse, thla tam a liam hnuah pawh an la bawhzui thei lo. Chûng dinhmunte chuan inang lo mah se, inanna pakhat erawh an nei a ni. An thu tlûkna siam chu an hlen lo vek. Kum zabi khatnaa Korinth khuaa Kristiante pawhin chutiang harsatna chu an hmachhawn a. An hnên aṭanga kan zir theihte chu i lo sawiho vang u.

3. Korinth khuaa mite chuan eng thu tlûkna nge an siam a; mahse, eng thil nge thleng?

³ C.E. 55 vêl khân, Korinth khuaa mite chuan thu tlûkna pawimawh tak an siam a. Anni chuan Jerusalem leh Judai rama an unaute chu an harsain, rethei takin an awm tih leh kohhran dangte’n anmahni ṭanpui tûrin thawhlâwm an khawn tih an hria a. Korinth khuaa mite chu ngilnei tak leh thilphal tak an ni  a, chûng unaute chu ṭanpui an duh avângin, tirhkoh Paula hnênah ṭanpui theih dân tûr an zâwt a ni. Ani chuan kohhranho hnênah kaihhruainate a pe a, Tita chu thawhlâwm khawnnaah ṭanpui tûrin a ruat a ni. (1 Kor. 16:1; 2 Kor. 8:6) Mahse, thla rei lo tê hnuah Paula chuan Korinth khuaa mite’n an thu tlûkna siam an bawhzui lo tih a hria a. Chuvângin, an thilpêkte chu kohhran dangte thawhlâwm ruala Jerusalema keng tûrin an peih hman lo niin a lang.—2 Kor. 9:4, 5.

4. Korinth thawn hnih 8:7, 10, 11-a târ lan angin, Paula chuan Korinth khuaa mite chu eng ti tûrin nge a fuih?

⁴ Korinth khuaa mite chuan thu tlûkna ṭha an siam a, Paula’n an rinna nghet tak avâng leh thilphal tak nih an duh avângin a fak a ni. Mahse, an thiltihte hlen chhuak tûrin fuih an ngai bawk. (2 Korinth 8:7, 10, 11 chhiar rawh.) An thiltawn chuan Kristian rinawmte pawhin thu tlûkna ṭha an siam chu hlen harsa an ti thei tih min hriattîr a ni.

5. Eng zawhnate nge kan chhân ang?

⁵ Korinth khuaa mite angin, kan thu tlûkna siam chu hlen harsa kan ti mai thei. Engvângin nge? Kan ṭhat famkim loh avângin, thil tih tûrte chu kan sawhsawn leh mai ṭhîn a. A nih loh leh, hriat lâwk loh thilthlengte avângin kan thu tlûkna siamte chu kan bawhzui thei lo pawh a ni thei bawk. (Thur. 9:11; Rom 7:18) Engtin nge kan thu tlûkna siam chu kan ennawn theih a, siamrem a ngaih leh ngaih loh kan hriat theih? Chu bâkah, kan thil tihte kan hlen chhuak tih engtin nge kan chian theih?

6. Eng hunah nge kan thu tlûkna siam chu siamrem a ngaih mai theih?

⁶ Thu tlûkna pawimawh ṭhenkhat chu kan thlâk danglam ngai lo vang. Entîr nân, Jehova rawngbâwl tûra kan thu tlûkna siam chu kan vawng nghet tlat a, kan kawppuite chungah rinawm kan tum tlat bawk. (Mt. 16:24; 19:6) Mahse, thu tlûkna dangte erawh chu siamrem a ngai mai thei. Engvângin nge? Dinhmunte a inthlâk danglam ṭhin vâng a ni. A ṭha thei ang bera thu tlûkna siam tûrin engin nge min ṭanpui thei?

7. Eng atân nge kan ṭawngṭai ang a, engvângin nge?

⁷ Finna dîlin ṭawngṭai rawh. Jehova chuan Jakoba chu: “In zîngah tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se,” tih thu hi ziak tûrin a thâwk khum a. (Jak. 1:5) Ka za hian kawng engemaw ti takin ‘finna kan tlachham’ vek a. Chuvângin, thu tlûknate i siam hunah leh siamrem a ngaih hunah Jehova rinchhan rawh. Chutianga i tih chuan Jehova’n thu tlûkna fing siam tûrin a ṭanpui ang che.

8. Thu tlûkna kan siam hmain eng zir bingnate nge kan neih ang?

⁸ Zir bingna ṭha tak nei rawh. Pathian Thu chu râwn la, Jehova inawpna pâwl tihchhuah thu leh hla chhuahte chhiarin, i mi rin theihte chu bia ang che. (Thuf. 20:18) I hnathawh thlâk tûr te, awm hmun insawn tûr te, a nih loh leh rawngbâwlna ṭanpui thei tûr zirna thlang tûrtea thu tlûkna i siam hmain chutianga zir bingna neih chu thil pawimawh tak a ni.

9. Rilru dik tak put chu engtin nge kan hlâwkpui ang?

⁹ Chettîrtu che chu endik rawh. Thil ti tûra min chêttîrtu chu Jehova tân thil pawimawh tak a ni. (Thuf. 16:2) Ani chuan kan thiltih engkimah rilru dik tak pu tûrin min duh a. Chuvângin, thu tlûkna kan siam hunah mahni leh mi dangte chunga rilru put hmang dik tak neih kan duh a ni. Rilru dik tak pu-a kan tih loh chuan, kan thu tlûkna siam chu hlen harsa kan ti ang. Entîr nân, ṭhalai unaupa chuan regular pioneer thawh a tum mai thei a. Mahse, hun engemaw chen a liam hnu chuan, dârkâr phût zât chu tlin harsa a tiin, rawngbâwlnaa a  hlimna chu a hloh pawh a ni thei. Pioneer a thawh chhan ber chu Jehova tihlâwm a duh vâng niin a inhre mai thei a. Mahse, a chêttîrtu ber chu a nu leh pa emaw, a ngainat tak tuemaw tihlâwm a duh vâng zâwk a ni thei ang em?

10. Inthlâk danglamna siam tûrin eng nge ngai?

¹⁰ Mei zûk bânsan tum Bible zirlai pakhat dinhmun hi han ngaihtuah teh. A tîr chuan theih tâwp chhuahin chawlhkâr hnih khat chu nghei thei mah se, a hnuah a zu leh ṭhîn a. A tâwpah chuan, a bânsan thei ta a ni! Jehova a hmangaihna leh tihlâwm a duhna chuan a thil chîn chu bânsan thei tûrin a ṭanpui a ni.—Kol. 1:10-12; 3:23, 24.

11. Engvângin nge thiltum bîkte kan neih ang?

¹¹ Thiltum bîk nei rawh. Thiltum bîkte kan neih chuan, kan thil tihte hlen a awlsam lehzual ang. Entîr nân, Bible chhiar zin lehzual i tum pawh a ni mai thei. Mahse, hun duan ṭha tak i neih loh chuan i thiltum chu i hlen lo mai thei a ni. * A nih loh leh, kohhran upate chuan berâm tlawhna neih zin lehzual an tum mai thei a; mahse, hun engemaw chen a liam hnuah pawh an thu tlûkna siam chu an la bawhzui lo. Hlawhtling tûr chuan, he zawhna hi an inzâwt thei a ni: “Berâm tlawh zin lehzualna hlâwkpui bîk tûr unaute hming ziah chhuah sa kan nei em?” tih hi.

12. Eng nge kan tih ngai mai thei a, engvângin nge?

¹² A âwm tâwk inbeisei rawh. Kan thiltih duh apiang ti tûrin kan hun te, tha leh zung te, leh neih sumte’n a tlin lo va. Chuvângin, a âwm tâwk inbeisei la, a ṭûl angin insiamrem rawh. A ṭûl chuan, i hlen chhuah theih loh tûr i thu tlûkna siam chu i siamrem a ngai mai thei a. (Thur. 3:6) I thu tlûkna siam chu ennawnin, a ṭûl anga i siamrem hnua hlen thei ta angah han inchan teh. I thil tih hlen chhuak tûra i tih ngai thil pangate hi ngaihtuah ang che.

13. I thu tlûkna siam hlen tûra i mamawh chakna chu engtin nge i neih theih?

¹³ Chakna nei tûrin ṭawngṭai rawh. Pathian chuan i thu tlûkna siam hlen thei tûrin “thiltihtheihna” a pe thei che a ni. (Phil. 2:13, New World Translation) Chuvângin, i mamawh chakna pe tûr chein Jehova hnênah a thlarau thianghlim dîl la. I ṭawngṭaina chu chhân a nih nghâl loh pawhin dîl chhunzawm zêl rawh. Isua’n: ‘Dîl rawh u; tichuan, [thlarau thianghlim] a pe ang che u!’ tiin a sawi si a.—Lk. 11:9, 13.

14. Thufingte 21:5-a târ lan thu bul chuan i thu tlûkna siam hlen tûrin engtin nge a ṭanpui theih che?

¹⁴ Ruahmanna siam rawh. (Thufingte 21:5 chhiar rawh.) I thil tih engpawh hlen tûr chuan, ruahmanna i siam a ngai a. Chumi hnuah, i ruahmanna siam anga i thawh a ngai a ni. Chutiang bawkin, thu tlûkna i siam hunah i hlen chhuah theih nâna i tih ngai zawng zawngte chu ziak chhuak ang che. Hna lian tham deuhte chu thawh a awlsam zâwk nân ṭhen hrang la, chu chuan hlen chhuah a tiawlsam lehzual ang. Paula chuan Korinth khuaa mite chu thawhlâwmte khawn tûra a thlen hun nghah aiin, “ni sarih ni hmasa berah” an thawhlâwm thawhte chu dah hrang tûrin a fuih a ni. (1 Kor. 16:2) Thawh a awlsam zâwk nâna hna lian tham deuhte ṭhen hranna chuan thawk zo thei lo tûra inhriatna nei lo tûrin a ṭanpui bawk ang che.

15. Ruahmanna kan siam hnuah eng nge kan tih theih?

¹⁵ Ziak thlapa ruahmanna siamna chuan i thu tlûkna siamte hlen chhuak tûrin a ṭanpui thei che a ni. (1 Kor. 14:40) Entîr nân, kohhran upate chu an thu tlûkna siam bawhzuitu tûr leh zawh fel hun tûr pawh tiamin, an thu tlûkna siamte chhinchhiah tûra upa  pakhat ruat tûrin kaihhruaina pêk an ni a. Chu kaihhruaina zuitu upate tân chuan an thu tlûkna siamte hlen chhuah chu a awlsam lehzual ngei ang. (1 Kor. 9:26) Chutiang tih dân chu mi mala i thil tihnaah pawh i hmang chhin thei a ni. Entîr nân, vawiin nia i tih tûrte chu a pawimawh dân indawtin i ziak chhuak thei a. Chu chuan i thil tih tûrte chu hlen chhuak mai ni lovin, hun tlêm zâwk chhûnga zo tûrin a ṭanpui thei che a ni.

16. Kan thu tlûkna siam hlen thei tûra kan tih ngai chu eng nge ni a, chu chu Rom 12:11-nain engtin nge a thlâwp?

¹⁶ Theih tâwp chhuah rawh. I ruahmnna siam bawhzui a, i thil tihte hlen chhuak tûr chuan thawhrim a ngai a. (Rom 12:11 chhiar rawh.) Paula chuan Timothea chu “bei uar” tûr leh zirtîrtu ṭha lehzual ni “reng” tûrin a hrilh a. Chu fuihna chu thlarau lam thiltum dangte ûm nân pawh a hman theih a ni.—1 Tim. 4:13, 16.

17. Engtin nge Ephesi 5:15, 16-na chu thu tlûkna hlennaah kan hman theih?

¹⁷ Fing takin i hun ruahman rawh. (Ephesi 5:15, 16 chhiar rawh.) I thu tlûkna siam hlen tûrin hunbi ruat la, i hun ruat chhûngin hlen chhuah ngei tum ang che. Hma i lâk theihna tûr hun ṭha zâwk nghâk suh; a lo thleng lo pawh a ni thei. (Thur. 11:4) Thil pawimawh zâwkte tih nâna i mamawh hun leh thate chu thil pawimawh lo zâwkte tih nâna hmang ral mai lo tûrin fîmkhur ang che. (Phil. 1:10, 11) A theih chuan, mite tihbuaia i awm loh hun tûr chu thlang la. Mi dangte chu mahnia hun hman i mamawh thu hriattîr rawh. I phone off la, mahnia hun i hman zawhah chauh e-mail, a nih loh leh social media chu en ang che. *

18-19. Thu tlûkna i siamte hlen chhuak tûra harsatna i tawh hunah beidawng nghâl mai lo tûrin engin nge ṭanpui thei che?

¹⁸ A rah chhuahte chu ngaihtuah rawh. I thu tlûkna siamin a rah chhuah chu i zin chhuah huna i thlen tumna hmun ang a ni a. Chumi hmun i thlen duh tak zet chuan i kalna kawng chu khâr a nih pawhin kawng dang zawhin i kal zawm zêl ngei ang. Chutiang bawkin, kan thu tlûkna siamin a rah chhuahte kan ngaihtuah tlat chuan, harsatnate kan tawh hunah pawh kan beidawng nghâl mai lo vang.—Gal. 6:9.

¹⁹ Thu tlûkna ṭha siam chu a harsain, chumi hlen chhuah chu chona a ni thei a. Mahse, Jehova ṭanpuinain, thu tlûkna i siamte hlen chhuak tûra i mamawh finna leh chakna i nei thei a ni.