1-2. (a) Ephesi 6:16-a sawi angin, engvângin nge “rinna phaw” kan mamawh? (b) Eng zawhnate nge kan sawiho vang?

“RINNA phaw” i nei em? (Ephesi 6:16 chhiar rawh.) I neih ngei a rinawm. Taksa pum vênghim thei phaw angin, kan rinna chuan he khawvêl kalhmang suaksual taka nungchang bawlhhlawhna, tharum thawhna, leh Pathian ngaihsak lohna thununna lakah min vênghim a ni.

² Mahse, “ni hnuhnûngahte” kan awm avângin kan rinna chu fiah a ni chhunzawm zêl ang. (2 Tim. 3:1) Kan rinna phaw chu a ṭha tih chian tûrin engtin nge kan endik theih? Engtin nge kan phaw chu kan vawn ngheh tlat theih? Chûng zawhnate chhânna chu i lo sawiho vang u.

3. Sipaite chuan an phawte chu engtin nge an tih a, engvângin nge?

³ Bible hun laiin, sipaite chuan savuna tuam phawte an hmang ṭhîn a. An phaw tuamtu savunte chu a chhiat loh nân leh a thîrte a tuiêk loh nân hriak an hnawih ṭhîn a. Sipai chuan a phaw chu a chhia tih a hriat chuan indo leh hun atâna inring renga a awm theih nân siam ṭhat a ni ngei tih a chian ṭhîn a ni. Engtin nge chu entîrna chu kan rinna nên a inkûngkaih?

4. Engvângin nge kan rinna phaw chu kan endik ang a, engtin nge kan endik ang?

⁴ Hmân laia sipaite angin, keini pawhin indona atâna inring renga kan awm theih nân kan rinna phaw chu endik a, kan vawn ṭhat a ngai a. Kristiante kan nih angin, thlarau lam indonaah  kan tel a, kan hmêlmate zîngah chuan thlarau suaksualte pawh an tel a ni. (Eph. 6:10-12) Mi dang tu mahin kan rinna phaw chu min vawn ṭhatsak thei lo. Fiahnate hmachhawn thei khawpin kan rinna a nghet tih engtin nge kan chian theih? A hmasain, Pathian ṭanpuina kan dîl tûr a ni. Chumi hnuah, Pathianin min hmuh anga inhmu tûrin Pathian Thu kan hman a ngai bawk. (Heb. 4:12) Bible chuan: “I thinlung zawng zawngin LALPA ring la, nangma hriatnaah innghat suh,” tiin a sawi. (Thuf. 3:5, 6) Chu chu rilruah dahin, tûn hnai maia i thu tlûkna siamte chu engvângin nge i ennawn loh vang? Entîr nân, sum leh pai lamah harsatna lian tak i nei em? Hebrai 13:5-a chhinchhiah: “Engtikah mah ka thlahthlam tawp lo vang chia, kal pawh ka kalsan tawp lo vang che,” tih Jehova thutiam chu i hre chhuak em? Chu thutiam chuan Jehova’n a ṭanpui ang che tih a rin nghehtîr che em? A rin nghehtîr che a nih chuan, i rinna phaw chu i vawng ṭha reng tihna a ni.

5. I rinna i endik hunah eng nge i hmuhchhuah mai theih?

⁵ Ngun taka i rinna i endik huna i thil hmuhchhuahte avângin mak i ti mai thei a. Hun engemawti chhûng chu chak lohnate i lo nei reng tawh tih i hmuchhuak mai thei bawk. Entîr nân, a lutuka lungkhamna te, dâwt sawina te, leh lunghnualnate chuan i rinna a lo tichhe reng tih i hmu chhuak pawh a ni thei. Chutiang a nih chuan, i rinna chu a chhiat zual zêl loh nân engtin nge i vênhim theih?

6. A ṭha lama lungkhamna neih chungchânga entîrna ṭhenkhat chu eng nge ni?

⁶ Lungkhamna ṭhenkhat neih chu a ṭha a. Entîr nân, Jehova leh Isua tihlâwm kan duh avânga lungkhamna neih chu a ṭha a ni. (1 Kor. 7:32) Sual lian tak kan ti a nih chuan, Pathian nêna kan inlaichînna siam ṭhat leh chu kan lungkham ber a ni a. (Sâm 38:18) Kan kawppuite tihlâwm leh kan chhûngte leh kan Kristian unaute ṭhatna tûr ngaihtuahin kan lungkham bawk.—1 Kor. 7:33; 2 Kor. 11:28.

7. Thufingte 29:25-a sawi angin, engvângin nge mihring kan hlauh loh vang?

⁷ Kawng leh lamah chuan, a lutuka lungkhamnain kan rinna a tichhe thei a. Entîr nân, ei tûr leh silh tûr âwm tâwk neih chungchângah lungkhamna kan la nei reng thei a ni. (Mt. 6:31, 32) Chuvângin, sum leh pai neih theih dân ringawt kan ngaihtuah thei a. Sum ngainatna hial pawh kan nei thei bawk. Chutiang mi kan nih chuan, Jehova chunga kan rinna a chak lo vang a, thlarau lam dinhmun hlauhawmah kan awm ang. (Mk. 4:19; 1 Tim. 6:10) A nih loh leh, mi dangte duhsakna dawn loh hlauh lutukna ang chi, a lutuka lungkhamna dangah kan tlu lût thei a ni. Chutiang a nih chuan, Jehova tihlâwm loh hlauh aiin, mite nuihsawh leh tihduhdah chu kan hlau zâwk thei a. Chutiang dinhmun hlauhawm laka kan invên theih nân chûng harsatnate hmachhawn thei tûra kan mamawh rinna leh huaisenna min pe tûrin Jehova hnênah kan ngên tûr a ni.—Thufingte 29:25 chhiar rawh; Lk. 17:5.

8. Engtin nge dâwt thute chu kan chhân lêt ang?

⁸ “Dâwt pa” Setana chuan Jehova leh kan unaute chunghâng dâwt thu theh darh tûrin a thununna hnuaia awmte chu a hmang a. (Joh. 8:44) Entîr nân, kalpêngte chuan website-ah te, TV-ah te, leh media dangte hmangin Jehova inawpna pâwl chungchângah dâwt thu leh chanchin dik lote an theh darh a. Chûng dâwt thute chu Setana “thal alh thei” zînga mi a ni. (Eph. 6:16) Tuemawin chûng  dâwt thute chu min rawn hrilh ta se, engtin nge kan chhân lêt ang? Kan ngaithla lo vang! Engvângin nge? Jehova leh kan unaute kan rin tlat vâng a ni. Dik tak chuan, kalpêngte nêna inzawmna neih kan duh lo rêng rêng. An thusawite hriat chian duhna kan neih hunah pawh, eng kawng mahin anni nêna inhnial chu kan duh lo vang.

9. Engtin nge lunghnualna chuan min nghawng theih?

⁹ Lunghnualna chuan kan rinna a tichak lo thei a. Chuvângin, mi mal harsatnate chu kan ngaihthah mai tûr a ni lo. Chutianga ngaihthah kan tum chuan, chu chu mawhphurhna hlen lohna a ni zâwk ang. A châng chuan, kan lunghnual mai thei a. Mahse, kan harsatnate’n kan ngaihtuahna a thunun chu kan phal tûr a ni lo. Kan phal a nih chuan, Jehova min pêk beiseina ropui tak chu kan hloh thei a ni. (Thup. 21:3, 4) Lunghnualna chuan kan chakna a tikiam theiin, beidawnna min neihtîr thei a. (Thuf. 24:10) Mahse, chûngte chu kan chunga a thlen kher a ngai lo.

10. Unaunu lehkha thawn aṭangin eng nge kan zir?

¹⁰ United States rama unaunuin nasa taka dam lo a pasal a enkawl laia a rinna a vawn ngheh tlat dân hi han ngaihtuah teh. Headquarter-a a lehkha thawnah chuan: “Kan dinhmun chu beidawnthlâk thei hle mah se, kan beiseina chu a nghet tlat a. Jehova hnên aṭanga kan dawn kan rinna tichaktu leh phûrna min neihtîrtu fuihnate avângin ka lâwm hle. Chûng fuihnate chu kan mamawh tak zet a. Chûngte chuan hma lam pan zêl tûr leh Setana’n kan chunga a thlentîr fiahnate tuar chhuak thei tûrin min ṭanpui a ni,” tiin a ziak a ni. He unaunu thusawi aṭang hian lunghnualna chu hneh theih a ni tih kan hria! Engtin nge? Harsatna i tawhte chu Setana fiahna angin thlîr rawh. Jehova chu thlamuanna Hnâr a ni tih hre reng la. Thlarau lam chaw min pêkte chu ngaihlu ang che.

11. Kan rinna a ngheh leh ngheh loh hriat nân, eng zawhnate nge kan inzawh ang?

¹¹ I rinna phawah siam ṭhat ngaihna lai i hmu em? Thla engemaw kaltaahte khân, a lutuka lungkhamna chu i pumpelh thei em? Kalpêngte dâwt thu theh darh chu hnâwlin, anmahni nêna inhnial chu i pumpelh em?  Lunghnualna i neihte chu i hneh thei em? Chutiang a nih chuan, i rinna chu a ṭha tâwk a ni. Mahse, Setana chuan min beih nân hmanraw dangte pawh a neih avângin inring rengin kan awm tûr a ni. Tûnah, chûng zînga pakhat chu i lo ngaihtuah ang u.

12. Hausak âtchilhnain eng nge min thlen theih?

¹² Hausak âtchilhna chuan kan rilru a la pêng theiin, kan rinna phaw min ngaihthahtîr thei a. Tirhkoh Paula chuan: “Sipaia awm tûra thlangtu chu a tihlâwm theih nân, sipai tu mah indo laiin tûn damchhûng khawsaknate hian a intihnawk ngai lo,” tiin a sawi. (2 Tim. 2:4) Dik tak chuan, Rom sipaite chu hna dang engmah thawh phal an ni lo. Sipaiin chu thil phût chu a ngaihthah chuan eng thil nge thleng thei?

13. Engvângin nge sipai chu sumdâwnnaa a inhnamhnawih loh vang?

¹³ Hei hi han mitthla teh. Sipai pâwl khat chuan an khandaihte nên zîngah inzirna an nei a; mahse, an zînga pakhat chu a tel ve lo. Ani chu dâwrah ei tûr zuarin a buai hle a ni. Tlai lamah, sipaite chuan an râlthuamte endik nân leh an khandaihte tah hriam nân hun an hmang a. Ei tûr zuartu sipai erawh chuan a tûka a thil zawrh tûr buatsaih nân hun a hmang thung. Mahse, a tûkah an hmêlmate chuan beisei loh takin an rawn bei ta thut mai a. Chûng sipai zîngah chuan tu nge indona atâna inrâlring a, an hotu tilâwm ang? I bula awm atân tu nge i duh—ṭha taka inbuatsaihtu nge ni a, thil danga a rilru petu zâwk?

14. Krista sipaite kan nih angin, eng nge kan ngaihhlut?

¹⁴ Sipai ṭhate angin, kan thiltum ber—kan hotu Jehova leh Krista lawm hlawh nih kan duhna ata kan rilru kan kal pêntîr lo va. Chu chu Setana khawvêlin min pêk theih thil dang zawng aiin kan ngai hlu zâwk a ni. Jehova rawngbâwl nân leh kan rinna phaw leh thlarau lam râlthuam dangte ṭha taka enkawl nân, kan mamawh hun leh tha kan nei tih kan chian tûr a ni.

15. Eng fuihna nge Paula’n min pêk a, engvângin nge?

¹⁵ Englai mahin kan inthlahdah tûr a ni  lo! Engvângin nge? Tirhkoh Paula’n ‘hausak tumte chuan rinna an kal bosan ang,’ tiin a vaukhân a. (1 Tim. 6:9, 10) “Kal bosan” tih ṭawngkam chuan kan mamawh loh thilte neih belh zêl tumnain kan rilru a la pêng thei tih a kâwk a ni. Chutiang a nih chuan “âtthlâk leh tikhawlo thei duhna tam takah” kan tlu lût thei a. Kan thinlunga chutiang duhnate neih aiin, chûngte chu a nihna ang takin kan thlîr tûr a ni—min tichhe theitu hmêlmate râlthuam angin.

16. Marka 10:17-22-a thute chuan eng zawhnate nge ngaihtuah tûra min chêttîr ang?

¹⁶ Thil tam tak lei nân sum ngah hle angah han inchan teh. Kan mamawh tak tak ni lo, kan thil duh zâwngte lei chu thil sual a ni em? Ni kher lo ve. Mahse, hêng zawhnate hi inzâwt rawh: Chûng thilte chu kan lei thei a nih pawhin, a hman nân leh a enkâwl nân hun leh tha kan pe thei ang em? Chu bâkah, kan thil neihte chu a lutukin kan ngaina ṭan thei ang em? Kan thil neihte ngainatna chuan Pathian rawngbâwlna zauh tûra Isua sâwmna hnâwltu ṭhalai ang chu min nihtîr ang em? (Marka 10:17-22 chhiar rawh.) Nun tisamkhai a, Pathian duh zâwng tih nâna kan hun leh tha hlu takte hman chu kan tân a va ṭha zâwk tak êm!

17. Eng nge kan theihnghilh ngai loh vang?

¹⁷ Indonaah kan awm a, nî tin hian inring rengin kan awm tûr a ni tih kan theihnghilh tûr a ni lo. (Thup. 12:17) Kan unaute chuan kan rinna phaw min vawnsak thei lo va. Keimahni ngeiin nghet takin kan vuan tûr a ni.

18. Hmân laia sipaite chuan engvângin nge an phawte chu an vawn ngheh tlat?

¹⁸ Hmân laiin, indonaa huaisenna lantîrtu sipai chuan chawimawina a dawng ṭhîn a. Mahse, a phaw tel lova a haw chuan, atân a zahthlâk hle ang. Rom mite chanchin ziaktu Tacitus-a chuan: “Phaw kalsan chu mualphona nasa tak a ni,” tiin a ziak a. Chuvângin, sipaite chuan an phawte chu nghet takin an vuan ṭhîn a ni.

19. Engtin nge kan rinna phaw chu kan vawn ngheh tlat theih?

¹⁹ Kan Kristian inkhâwmnaa tel ziahna leh Jehova hming leh a Lalram chanchin mite hnêna hrilhna hmangin kan rinna phaw chu kan vuan nghet tlat a. (Heb. 10:23-25) Chu bâkah, nî tin ṭawngṭaina nêna Pathian Thu chhiarin, kan thiltih engkimah a fuihna leh kaihhruainate chu kan nunpui a ni. (2 Tim. 3:16, 17) Chutianga kan tih chuan Setana beihna eng hmanrua mahin min tichhe hlen thei lo vang. (Is. 54:17) Kan “rinna phaw” chuan min vênghim ang a. Tichuan, nghet taka dingin, kan unaute nên huaisen takin rawng kan bâwl thei ang. Nî tina indonaah hnehna kan chang mai ni lovin,—Isua’n indonaa Setana leh a hnungzuite a hneh hunah a lama ṭangte nia chawimawi kan ni bawk ang.—Thup. 17:14; 20:10.