1-2. (a) Kan harsatnate nî tina hmachhawn thei tûrin engin nge min ṭanpui? Hrilhfiah rawh. (b) He thuziakah hian eng nge kan sawiho vang?

“FIAHNA ka tawhte ka ngaihtuah hian, mahni chauh chuan ka hmachhawn thei lo tih ka hria.” Chutiang chuan i sawi ve tawh em? Kan zînga a tam zâwk chuan kan sawi a ni. Natna khirh tak, a nih loh leh thihnaa hmangaih tak chânna i tawrh chhuah theih dânte i ngaihtuah lêt huna chutianga sawi chu i ni thei. Hun kal tawh i han thlîr lêt hian Jehova’n a thlarau thianghlim hmanga ‘thiltihtheihna nasat tak’ a pêk che avâng chauhva nî tina tuar chhuak thei niin i inhria a ni.—2 Kor. 4:7-9.

² He khawvêl sual tak hmachhawn thei tûr pawhin thlarau thianghlim kan rinchhan a. (1 Joh. 5:19) Chu bâkah, “thlarau sualho awmte” pawh kan do a ngai bawk. (Eph. 6:12) Chûng nêksâwrna kan tawhte chu rilrua dahin, thlarau thianghlimin min ṭanpui theih dân kawng hnih kan sawiho vang. Chumi hnuah, thlarau thianghlim ṭanpuina hlâwkpui pumhlûm tûra kan tih theihte kan sawiho bawk ang.

3. Fiahnate chhel taka tuar chhuak thei tûra Jehova min ṭanpui dân kawng khat chu eng nge ni?

³ Jehova thlarau thianghlim chuan fiahnate tâwk chung pawha kan mawhphurhnate hlen thei tûrin chakna min pe a. Tirhkoh Paula chuan “Krista thiltihtheihna” a rinchhan avângin fiahnate tâwk chung pawhin Jehova rawngbâwl zawm zêl thei niin a inhria a. (2 Kor. 12:9) Missionary nia a zin ṭum hnihnaah, thu hrilhnaah chauh ni lovin, mahni inchâwm nân pawh a thawk rim hle a ni. Korinth khua a tlawh laiin Akuila leh Priskilli te inah a thleng a. Anni chu puan in siam an ni a. Paula chuan an thawh ang a thawh ve avângin, an rualin hunbi neiin a thawk ṭhîn a ni. (Tirh. 18:1-4) Thlarau thianghlim chuan Paula chu eizawnna  hna thawk tûr leh a rawngbâwlna hlen tûrin thiltihtheihna a pe a ni.

4. Korinth thawn hnih 12:7b-9-a sawi angin, Paula’n eng harsatna nge a tawrh?

⁴ Korinth thawn hnih 12:7b-9 chhiar rawh. He Bible chânga Paula’n a “tisaah hlîng” a nei tia a sawi hian eng a tihna nge ni? I taksaah hlîng a luh chuan na i ti hle ngei ang. Chuvângin, Paula chuan mi mal taka a tawrh fiahna khirh tak engemaw a hmachhawn a tihna a ni. Ani chuan chu fiahna chu “Setana tirhkoh, kut thak hnawih nâna mi hmangtu,” tiin a sawi a. Paula tisaa hlîng chu Setana leh a ramhuai vântirhkohte’n an chhun luh a ni kher lo mai thei. Mahse, chûng thlarau sualte chuan chu “hlîng” chu an hmuhin, Paula tawrhna belhchhah nâna thûk lehzuala chhun luh an tum a ni thei ang. Paula’n eng nge a tih?

5. Engtin nge Jehova’n Paula ṭawngṭaina chu a chhân?

⁵ A tîr chuan, Paula’n chu “hlîng” chu lâk bo a duh a. “Chumi chungchâng thu-ah chuan mi kiansan theih nân Lalpa chu vawi thum ka dîl a,” tiin a sawi. Mahse, a ṭawngṭai chung pawhin, a tisaa hlîng chu a la awm reng a ni. Jehova’n Paula ṭawngṭaina a chhâng lo tihna a ni em? Ni lo ve. A chhâng ngei a ni. Ani chuan a harsatna chu lâk bosak lo mah se, tuar thei tûrin chakna a pe a. Jehova chuan: “Ka thiltihtheihna hi chak lohnaah asin tihfamkimin a awm ni,” tiin a sawi. (2 Kor. 12:8, 9) Pathian ṭanpuinain, Paula chuan hlimna leh chhûngrila thlamuanna a nei reng thei!—Phil. 4:4-7.

6. (a) I ṭawngṭainate chu engtin nge Jehova’n a chhân mai theih? (b) Bible chânga târ lan eng tiamkamnain nge tichak che?

⁶ Paula angin, fiahna i tawhte lâk bosak tûr chein Jehova i ngên tawh em? Tih tak zeta i ngên chung pawhin harsatnate’n an la kiansan lo che, a nih loh leh a zual zâwk mah a nih chuan, Jehova chu i chungah a lâwm tâwk lo niin i ngai em? Chutianga i ngai a nih chuan Paula entawn tûr siam hi hre reng ang che. Jehova’n a ṭawngṭainate a chhâng ang bawkin, i ṭawngṭainate pawh a chhâng ngei ang! Ani chuan i harsatnate chu a lâk bosak lo che pawh a ni thei. Mahse, thlarau thianghlim hmanga fiahnate tuar chhuak thei tûrin i mamawh chaknate chu a pe ang che. (Sâm 61:3, 4) “Vuak thlûkin” i awm pawh a ni thei; mahse, Jehova’n a kalsan ngai lo vang che.—2 Kor. 4:8, 9; Phil. 4:13.

7-8. (a) Eng kawngin nge thlarau thianglim chu thli nêna a inan? (b) Engtin nge Petera chuan thlarau thianghlim hnathawh dân chu a târ lan?

⁷ Thlarau thianghlimin min ṭanpui theih dân kawng dang leh chu eng nge ni? Tuipui fâwn but but laia a tum ram thleng tûra lawng chhêm kaltu thli ang maiin, thlarau thianghlim chuan fiahna khirh tak hmachhawn chung pawha Pathian tiam khawvêl thar kan luh thlenga hma lam pan zêl tûrin min ṭanpui thei a ni.

⁸ Sangha mantu a nih angin, tirhkoh Petera chuan lawnga zin chungchâng chu a hre hle a. Chuvângin, lawnga zin nêna inkungkaihna nei ṭawngkam hmanga thlarau thianghlim hnathawh dân a târ lang chu chhinchhiah tlâk tak a ni. Ani chuan: “Thu hrilh lâwk rêng rêng hi mihring thua chhuak a ni ngai si lo a, miten thlarau thianghlim tirhin Pathian hnên ata an sawi zâwk ṭhîn a ni,” tiin a ziak a. “Tirhin” tia lehlin Grik thu mal chu a ngial a ngan chuan “kaihhruaiin; chêttîrin,” tihna a ni.—2 Pet. 1:21.

9. Petera chuan “ti sawn” tih ṭawngkam chu mitthla theih eng thil nên nge a thlunzawm?

⁹ Petera chuan “chêttîrin” tih ṭawngkam chu mitthla theih eng thil nên nge a thlunzawm? Chu Grik thu mal vêk chu Tirhkohte lehkhabu ziaktu Luka chuan thli chhêm ‘lena’ awm lawng sawi nân a hmang a. (Tirh. 27:15) Chuvângin, Bible lama mi thiam pakhat sawi dân chuan,  Petera’n Bible ziaktute chu thlarau thianghlim “tirhin” an awm tia a ziah hian “tuipuia zinna nêna inkûngkaih tehkhinthu mawi tak” a hmang a ni. Dik takin, Petera chuan thli chhêm len avânga lawnglêngin a tum ram a thleng thei ang bawkin, Bible thu hrilh lâwktute leh ziaktute pawh an hna an hlen theih nân thlarau thianghlim chêttîrin an awm tih a sawi. Chu mi thiam vêk chuan: “Zawlneite chu an lawng puanzarte pharh anga sawi theih an ni,” tiin a sawi bawk. Jehova chuan a tih tûr chu a ti a. Ani chuan “thli,” a nih loh leh thlarau thianghlim chu a pe a ni. Bible ziaktute pawhin an tih tûr chu an ti a. Anni chuan thlarau thianghlim kaihhruaina chu an zui a ni.

10-11. Thlarau thianghlim chêttîrin kan awm tih tichiang tûrin eng thil pahnih nge kan tih ngai? Entîrna pe rawh.

¹⁰ Thlarauva thâwk khum thute ziah hun chu tûnah chuan a pêl tawh ngei mai. Mahse, thlarau thianghlim chuan Pathian mite chungah hna a la thawk reng a. Jehova chuan a tih tûr chu a la ti reng bawk. Engtin nge Pathian thlarau thianghlim chu kan hlâwkpui theih? Kan tih tûrte chu kan ti zawm zêl tih kan chian tûr a ni. Engtin nge chu chu kan tih?

¹¹ He khaikhinna hi han ngaihtuah teh. Thli chu hmang ṭangkai tûr chuan, lawng pu chuan thil pahnih a tih a ngai a. A hmasain, a lawng chu thli awmna hmuna a awmtîr a ngai a ni. Lawng pu chu thli tlehna hmun aṭanga hla taka awm lawng chawlhna hmuna a awm chuan a lawng chu a kal sawn thei chuang lo vang. Pahnihnaah, a lawng puanzâr chu a parh thei ang bera a pharh a ngai a ni. Thli chu tleh pawh ni se, lawng puanzârin thli a dawn loh chuan lawng chu a kal sawn thei lo vang. Chutiang bawkin, keini pawh thlarau thianghlim ṭanpuina kan dawn chauhvin Jehova rawngbâwlnaah kan tel chhunzawm thei ang. Chu thlarau thianghlim chu hlâwkpui tûr chuan thil pahnih kan tih a ngai a. Pakhatnaah, Pathianin a thlarau thianghlim hmanga a chhiahhlawhte a tihtîr thilahte kan tel a ngai a. Pahnihnaah, chûng thiltihahte theih tâwp chhuaha telna hmangin  “lawng puanzârte chu kan pharh” a ngai a ni. (Sâm 119:32) Chûng thilte kan tih chuan, thlarau thianghlimin dodâlna leh fiahna tuifâwnte pal tlang thei tûr leh khawvêl thar kan luh thlenga rinawm taka rawngbâwl zawm zêl thei tûrin min ṭanpui ang.

12. Tûnah eng nge kan sawiho vang?

¹² Thlarau thianghlimin min ṭanpui dân kawng hnih kan sawiho tawh a. Thlarau thianghlimin chakna min pein, fiahnate kan hmachhawn laia rinawm reng thei tûrin min ṭanpui a ni. Hma lam pan zêl tûrin min chêttîr bâkah, chatuan nunna kawng zawh reng tûr pawhin min ṭanpui bawk. Tûnah chuan, thlarau thianghlim ṭanpuina hlâwkpui pumhlûm tûra kan tih ngai thil palite kan sawiho vang.

13. Timothea thawn hnih 3:16, 17-a sawi angin, Pathian Thu chuan eng nge min tihsak theih a; mahse, eng nge kan tih ngai?

¹³ Pakhatna, Pathian Thu zir rawh. (2 Timothea 3:16, 17 chhiar rawh.) Pathian chuan a ngaihtuahnate chu Bible ziaktute rilrua lût tûrin thlarau thianghlim hmangin a ‘thâwk khum’ a. Bible kan chhiar a, kan thu chhiarte kan chhût ngun hian Pathian kaihhruainate chu kan rilru leh thinlungah a lût tihna a ni. Chûng thlarauva thâwk khum thute chuan kan nun chu Pathian duh zâwng mila hmang tûrin min chêttîr bawk. (Heb. 4:12) Mahse, thlarau thinghlim hlâwkpui pumhlûm tûr chuan, Bible kan zir ziahin, kan thu chhiarte ngun taka ngaihtuah nân hun kan pe tûr a ni. Chutianga kan tih chuan, Pathian Thuin kan thusawi leh thiltihna zawng zawngah min thunun ang.

14. (a) Engvângin nge kan Kristian inkhâwmnaah thlarau thianghlim a awm tia kan sawi theih? (b) Inkhâwmnaa thlarau thianghlim hlâwkpui pumhlûm tûrin engin nge min ṭanpui ang?

¹⁴ Pahnihnna, unaute rualin Pathian be rawh. (Sâm 22:22) Jehova thlarau chu kan inkhâwmnaah a awm a ni. (Thup. 2:29) Engvângin nge chu chu kan sawi theih? Kristian unaute ruala kan inkhâwm hian thlarau thianghlim dîlin kan ṭawngṭai a, Pathian Thu ṭanchhan Lalram hlate kan sa a; tichuan, thlarau thianghlima ruat unaupate Bible ṭanchhana thusawi kan ngaihthlâk vâng a ni. Chu thlarau thianghlim vêk chuan unaunute chu an chanvote inbuatsaih a, hlen thei tûrin a ṭanpui bawk. Mahse, thlarau thianghlim hlâwkpui pumhlûm tûr chuan, inkhâwmah inbuatsaihin kan tel tûr a ni. Chutiang kawng chuan “lawng puanzâr pharh” ang maiin, thlarau thianghlim dawng tûrin kan inkhâwm a ni ang.

15. Engtin nge thu hrilh rawngbâwlnaah thlarau thianghlim a tel?

¹⁵ Pathumna, thu hrilh rawngbâwlnaah tel rawh. Thu hrilhna leh zirtîrnaa Bible kan hman hian kan rawngbâwlnaah thlarau thianghlim kan teltîr tihna a ni. (Rom 15:18, 19) Mahse, Pathian thlarau thianghlim hlâwkpui pumhlûm tûr chuan, thu hrilh rawngbâwlnaah tel ziahin, a remchân hun apiangah Bible kan hmang tûr a ni. Kan rawngbâwlna awmze nei lehzual tûra kan tih theih dân kawng khat chu Nun leh Rawngbâwlna Inzirna Lehkhabu-a thusawi dân tûr entîrnate hman hi a ni.

16. Thlarau thianghlim dawn theih dân kawng ṭha ber chu eng nge ni?

¹⁶ Palina, Jehova hnênah ṭawngṭai rawh. (Mt. 7:7-11; Lk. 11:13) Thlarau thianghlim dawn theih dân kawng ṭha ber chu Jehova hnêna ṭawngṭaia dîl hi a ni. Kan ṭawngṭaina Jehova hnêna thleng lo tûra engmahin a dâl thei lo ang bawkin, Pathian thilpêk ṭha tak, a thlarau thianghlim dawng lo tûrin engmahin—lung in bang leh Setana meuh pawhin—a dang thei lo. (Jak. 1:17) Thlarau thianghlim hlâwkpui pumhlûm tûrin engtin nge kan ṭawngṭai ang? A chhânna hre tûrin, Chanchin Ṭha Luka ziak chauhva chhinchhiah tehkhin thu  chu ngaihtuahin ṭawngṭaina chungchâng chipchiar lehzualin i lo bih chiang ang u. *

17. Luka 11:5-9, 13-a chhinchhiah Isua sawi tehkhin thu aṭangin ṭawngṭaina chungchâng eng nge kan zir theih?

¹⁷ Luka 11:5-9, 13 chhiar rawh. Isua sawi tehkhin thu chuan thlarau thianghlim dîla ṭawngṭai a ngaih chhan a târ lang a. A tehkhin thu-a pa pakhat chuan a thil mamawh chu “a dîl ngut ngut avângin” a hmu a ni. Ani chuan zan lai ni tawh mah se, a ṭhianpa hnêna ṭanpuina dîl chu a hreh lo. (Luka 11:8, New World Translation study note en rawh.) Isua’n chu tehkhin thu chu ṭawngṭaina chungchâng zirtîr nân engtin nge a hman? Ani chuan: “Dîl rawh u; tichuan, an pe ang che u; zawng rawh u; tichuan, in hmu ang; kik rawh u; tichuan, an hawnsak ang che u,” tiin a sawi a ni. Kan tâna zir tûr chu eng nge ni? Thlarau thianglim ṭanpuina dawng tûrin kan ṭawngṭai fan fan tûr a ni.

18. Isua tehkhin thu-a târ lan angin, Jehova’n a thlarau thianghlim min pe ang tih engvângin nge kan rin ngheh tlat theih?

¹⁸ Isua sawi tehkhin thu chuan Jehova’n thlarau thianghlim min pêk chhan hre thiam tûrin min ṭanpui bawk. Tehkhin thu-a pa pakhat chuan khualchhâwn thiam nih a duh a. Ani chuan zan laia amah rawn tlawhtu chu ei tûr pe duh mah se, pêk tûr engmah a nei lo. Isua’n chu pa chuan chhangpêr a dîl ngut ngut avângin a ṭhenawmpain a pe tih a sawi a. Isua sawi tum chu eng nge ni? Mihring ṭha famkim lo mahin chutianga dîl ngut nguttu a ṭhenawm pa chu ṭanpui a duh chuan, hmangaihnaa khat kan Pa vâna mi chuan a thlarau thianghlim dîl fan fantute chu a va ṭanpui nasa lehzual dâwn êm! Chuvângin, Jehova chuan a thlarau thianghlim kan dîlna chu a chhâng ngei ang tih ring tlatin kan ṭawngṭai thei a ni.—Sâm 10:17; 66:19.

19. Engvângin nge hnehna kan chang ang tih kan chian theih?

¹⁹ Setana’n beidawng lovin min bei chhunzawm zêl mah se, hnehna kan chang ang tih kan chiang thei a ni. Engvângin nge? Thlarau thianghlimin kawng hniha min ṭanpui vâng a ni. Pakhatnaah, fiahnate hneh thei tûrin chakna min pe a. Pahnihnaah, khawvêl thar kan luh thlenga Jehova rawngbâwlnaa hma lam pan zêl tûrin min ṭanpui bawk. Thlarau thianghlim ṭanpuina chu hlâwkpui pumhlûm i tum tlat ang u!