Kum 1983-ah ka piang a. Ka naupan lai chuan naupang hrisêl ṭha pângngai ka ni a; mahse, kum sâwm ka lo tlin chuan ka taksa pum hi na ka ti ngawih ngawih a. Kum hnih vêl a liam hnu chuan, zîng ka tho chu ka che thei ta rêng rêng lo mai a. Ka kete chu tihchêt ka tum ngial pawhin, ka tiche thei thlâwt lo. Chumi nî aṭang chuan ka kal leh thei tawh ngai lo. Chu ka natna avâng chuan ka taksa pawh a ṭhang thei tawh lo va. Tûn thleng hian naupang ang maiin ka la tê reng a ni.

Ka natna avânga pâwn chhuak thei lo va thla engemawti chhûng ka awm hnu chuan Jehova Thuhretu pahnihin min rawn tlawh a. Kan ina mi an lo kal hian ka biru ṭhîn a; mahse, chumi nî chuan min rawn tlawhtu hmeichhiate chu ka lo bia a. Paradis chungchâng an sawi chuan, kum nga mi ka nih laia kan thu hriat chu ka hre chhuak leh a ni. Chutih hun lai chuan, Suriname rama awm missionary Jethro-a chuan ka pa chu thla khatah vawi khat rawn tlawhin, Bible a zirpui ṭhîn a. Jethro-a chuan min khawngaih thei lutuk a, kei pawhin ka ngaina lutuk. Chu bâkah, ka pi leh pute chuan kan khuaa Thuhretute inkhâwmnaah min hruai ṭhîn a. Chuvângin, chumi nîa min rawn tlawhtute zînga pakhat zâwk Florence-i’n Pathian thu zir belh ka duh leh duh loh min zawh chuan ka duh thu ka lo hrilh a ni.

Florence-i chu a pasal Justus-a nên an lo kal leh a; tichuan, Bible min zirpui ṭan a. Lehkha chhiar thiam lo ka ni tih an hriat chuan chhiar dân min zirtîr a. Hun engemaw chen a liam hnu chuan, keimahin ka chhiar thei ta a ni. Ni khat chu, an nupain Suriname rama rawngbâwl tûra ruat an nih thu min hrilh a. Kan khua Orealla-a Bible min zirpuitu tûr tu mah an awm tawh lo chu a lungchhiatthlâk hle. Mahse, Jehova’n min hriat reng avângin ka lâwm tak zet a ni.

A hnu rei vak lovah kan khuaah pioneer Floyd-a a rawn thleng a, in tin kala rawng a bâwlnaah min rawn hmu a. Bible zir ka duh leh duh loh min zawh chuan ka nui a. “Engah nge i nuih?” mi ti a. Tûn hmain Eng Nge Pathianin Min Phût? tih brochure ka zir tawh thu leh Chatuan Nunnaa Hruaitu Hriatna * tih lehkhabu pawh ka zir ṭan tawh thu ka hrilh a. Ka zir chhun zawm tawh lo chhan pawh ka hrilh bawk. Floyd-a nên chuan Hriatna lehkhabu chu kan zir zo va; mahse, ani pawh hmun danga rawngbâwl tûra ruat a ni leh a. Bible zirtîrtu nei lovin ka awm leh ta a ni.

Mahse, kum 2004-ah, special pioneer pahnih Granville-a leh Joshua-a chu kan khua Orealla-a  rawngbâwl tûra ruat an ni leh a. Anni pawhin in tin kala rawng an bâwlnaah min hmu a. Bible zir ka duh leh duh loh min zawh chuan, ka nui a. Hriatna lehkhabu chu a bul aṭanga min zirpui leh tûrin ka ngên a. Chu chu a hmaa min zirpuitute thu min zirtîr nêna a inan leh an loh hriat ka duh vâng a ni. Granville-a chuan inkhâwmte chu kan khuaah neih a nih thu min hrilh a. In ka chhuahsan lohna kum sâwm dâwn lai a nih tawh avângin, inkhâwma tel chu ka duh a. Granville-a chuan ka tân wheelchair rawn kengin, Kingdom Hall-ah min hruai a ni.

A hnuah, Granville-a’n Theocratic Rawngbâwlna School-a tel tûrin min fuih a. Ani chuan: “Rualban lo ni mah la, thu i sawi thei a. Engtik nîah emaw chuan, vântlâng thusawina pawh i la nei ang. Chumi nî chu a la thleng ngei ang,” tiin min hrilh a. A fuihna thu chuan min tichak tak meuh a ni.

Unau Granville-a rualin thu hrilh rawngbâwlnaah ka tel ṭan a. Mahse, kan khaw kawng tam tak chu wheelchair nêna kalna atân chuan a bumboh hle a. Chuvângin, unau Granville-a chu nawrlîra min nawr tûrin ka ngên a. Chu chu a lo ṭha ta phian a. April thla, 2005-ah baptisma ka chang a. A hnu rei vak lovah, unaute chuan kohhrana thu leh hla chhuahte enkawl dân leh Kingdom Hall-a sound system khawih dânte min zirtîr a ni.

Tichuan, kum 2007-ah, lungchhiatthlâk takin, lawnglêng chêtsualnaah ka pa’n min boralsan a. Kan chhûngkua min ṭhâwng hle a. Unau Granville-a chuan min ṭawngṭaipuiin, Bible-a thlamuanna thute min hrilh a. Kum hnih a liam hnu chuan, chhiatna dang chuan min ṭhâwng leh ta—unau Granville-a chu lawnglêng chêtsualnaah a boral ve leh a ni.

Kan kohhran tê tak leh khawhar tak chuan kohhran upate leh kohhranho rawngbâwltute a nei lo va. Unau Granville-a chu ka ṭhian ṭha tak a nih avângin min boralsan chu ka tuar thiam lo hle. Ani chuan tisa lam leh thlarau lama ṭanpui ka ngaihna apiangah rinawm takin min ṭanpui ṭhîn a. A thih hnu chawlhkâra inkhâwmah chuan Vênnainsâng Zirna-ah paragraph chhiar tûra chanvo pêk ka ni a. Paragraph pahnihna thleng chu ka chhiar thei a; mahse, chumi hnu chuan ka lung a chhiain, ka mittui a tla ta zawih zawih mai a. Dawhsân aṭang chuan ka chhuk ta ringawt mai a ni.

Kan kohhran min rawn ṭanpui tûra kohhran dang aṭanga unaupate an rawn kal hnu chuan ka hlim ve thei ta deuh va. Chu bâkah, branch office chuan special pioneer Kojo-a an rawn tîr a. Ka nu leh ka nau chuan Bible zir a, baptisma an chan avângin ka lâwm hle. Chumi hnuah, March 2015-ah, kohhranho rawngbâwltu ka rawn ni a. Chumi hnu rei vak lovah chuan, a hmasa ber atân vântlâng thusawina ka nei ta. Chumi nî chuan, unau Granville-a’n: “Engtik nîah emaw chuan vântlâng thusawina i la nei ang. Chumi nî chu a la thleng ngei ang,” tia min hrilh laite ka ngaihtuah lêt a, ka lâwm avângin ka mittui a tla hial a ni.

JW Broadcasting^® program aṭangin ka dinhmun anga ding kan Kristian unaute chanchin chu ka hria a. Rualban lo ni mah se, nun hlimawm tak an nei thei a ni. Kei pawhin, thil engemaw ka la tithei a. Jehova tâna ka chakna zawng zawng hman ka duhna chuan regular pioneer thawk tûrin min chêttîr a. September 2019-ah ka beisei loh tak chanchin ka dawng ta! Chumi thla chuan thuchhuahtu 40 vêl awmna kan kohhranah upa nia rawngbâwl tûra ruat ka ni.

Bible min zirpuitu unau duh takte leh ka rawngbâwlnaa min ṭanpuitute chungah ka lâwm hle a. Thil dang zawng aiin, Jehovan min hriat reng avângin ka lâwm tak zet a ni.