1-2. Thufingte 4:25-a kan hmuh fuihna chu engtin nge kan nunpui theih? Entîrna pe rawh.

HENG dinhmunte hi han ngaihtuah teh. Kum upa tak Kristian unaunu chuan a tûn hma hun duhawm takte chu a ngaihtuah lêt a. Tûnah, a nun chu a harsa chho telh telh chung pawhin, Jehova tâna a tih theihte chu a la ti zêl a ni. (1 Kor. 15:58) A hmangaih takte nên Pathian tiam khawvêl thara chêngho angin nî tin a inmitthla ṭhîn a. Unaunu dang pakhat chuan a Kristian unaunuin a rilru a lo tihnat tawhna chu la hre chhuak ṭhîn mah se, chu chu a ngaihtuah reng lo. (Kol. 3:13) Unaupa chuan tûn hmaa a thiltih sual chu a hre chiang hle a; mahse, tûn aṭang chuan rinawm tlat a tum a ni.—Sâm 51:10.

² Chûng Kristian unau pathumte inanna chu eng nge ni? An zain hun kal tawha thilthlengte chu hre chhuak ṭhîn mah se, chûngte chu an ngaihtuah reng lo. Chu aiin, hma lam chu ‘ngîl takin an thlîr’ zâwk a ni.—Thufingte 4:25 chhiar rawh.

3. Engvângin nge ‘ngîl taka hma lam kan thlîr’ a ngaih?

³ Engvângin nge ‘ngîl taka hma lam thlîr’ chu thil pawimawh tak a nih? Hnung lam en reng chunga ngîl taka kal chu thil theih a ni lo ang bawkin, keini pawh, kan nun hluite kan ngaihtuah reng chuan Jehova rawngbâwlnaah hma lam kan pan thei lo vang.—Lk. 9:62.

4. He thuziakah hian eng nge kan sawiho vang?

⁴ He thuziakah hian nun hlui ngai * rêng rênga min awmtîr theitu thang pathum sawiho a ni ang. Chûngte chu: (1) lunglênna te, (2) thinurna te, leh (3) a lutuka mahni inthiam lohnate a ni. A mal tê têa kan sawi hunah, Bible thu bulte’n “hnung lama thil awmte chu” theihnghilh a, “hma lama thil awmte” en tlat  tûra min ṭanpui theih dân kan hmu ang.—Phil. 3:13.

5. Thuhriltu 7:10-na chuan eng thang lakah nge min vaukhân?

⁵ Thuhriltu 7:10 chhiar rawh. He Bible châng hian: “Engvângin nge hmân lai nîte a ṭhat?” tia zawh chu thil sual angin a sawi lo hi chhinchhiah ang che. Hriatrengna ṭha chu Jehova hnên aṭanga kan dawn thilpêk a ni a. Chu aiin, chu Bible châng chuan: “Nang chuan zâwt suh, hmân lai nîte ṭhat zâwkzia, tûn lai aiin,” a ti a. Thu danga sawi chuan, kan tûn hma nun leh tûna kan nun chu khaikhin a, thil engkim a chhe tawh zâwk nia thu tlûkna siam a hlauhawm thei tih a sawina a ni. Bible lehlin dang chuan he châng hi: “Engtizia nge tûnlai aiin hmânlai a ṭhat zâwk? ti suh, zawhna âtthlâk tak a ni,” tiin a sawi a ni.

6. Engvângin nge kan tûn hma nun ṭha zâwk nia ngaihtuah reng chu thil finthlâk a nih loh? Entîrna pe rawh.

⁶ Engvângin nge kan tûn hma nun ṭha zâwk nia ngaihtuah reng chu thil finthlâk a nih loh? Lunglênna chuan kan tûn hma nuna thil ṭhate chauh min hriat chhuahtîr thei a. Kan lo hmachhawn tawh harsatnate chu min ngaihthahtîr thei bawk a ni. Entîr nân, hmân lai Israel mite chungchâng hi han ngaihtuah teh. Aigupta an chhuahsan hnu chuan, chuta an nun hrehawmzia chu an theihnghilh ta thuai a. Chu aiin, ei tûr ṭha an ei ṭhinte chu an ngaihtuah zâwk a ni. Anni chuan: “Duh duha Aigupta rama sangha kan ei ṭhinte chu kan hre reng a, fanghmate, hmazilte, purûn hel ei mite, rûn bâlte, purûn vâr mite pawh,” tiin an sawi a. (Num. 11:5) A nih leh, chûngte chu ‘duh duhin’ an ei thei tak tak em? Thei lo. Israel mite chuan chumi ei tûrin thil tam tak an chân a ngai a; chutih hun lai chuan, Aigupta bâwih niin, râwng taka chhawr an ni. (Ex. 1:13, 14; 3:6-9) Mahse, a hnuah, chûng harsatnate chu theihnghilhin, tûn hma nuna kîr leh an châk a. Anni chuan Jehova’n tûna an tâna a tihsak thil ṭhate ngaihtuah ahnêkin, hun nuam an lo hman tawhte chu an ngaihven zâwk a. Jehova chu an rilru put hmang avângin a lâwm lo.—Num. 11:10.

7. Unaunu pakhat chu lunglênna thang pumpelh tûrin engin nge ṭanpui?

 ⁷ Lunglênna thang chu engtin nge kan pumpelh theih? Kum 1945-a Brooklyn Bethel-a rawngbâwl ṭan unaunu entawn tûr siam hi han ngaithuah teh. Kum engemaw zât a liam hnu chuan, Bethel-a unaupa pakhat nên an innei a, kum tam tak chhûng rawng an bâwl dûn a ni. Mahse, kum 1976-ah a pasal chu a dam lo ṭan a. A dam rei tawh dâwn lo tih a inhriat chuan, a thihsan hnua a awm dân tûr chungchângah thurâwn ṭha tak a pêk thu unaunu chuan a sawi. A nupui hnênah chuan: “Nupa hlim thei tak kan ni a. Nupa tam tak chuan hetiang thil an tawng lo a nia,” tiin a hrilh a. Heti hian a fuih bawk a ni: “Nun hluite chu hriat chhuah châng nei mah la, chumi ngaiin awm reng suh. Khua reiin a hnêm ang che. Rilru na leh lung chhe lutukin awm lo la. Jehova rawng kan bâwl dun theih avângin lâwm rawh. . . . Thil hriat reng theihna hi Pathian thilpêk a ni,” tiin a sawi. Chu chu thurâwn ṭha tak a va ni êm!

8. Kan unaunu chuan nun hlui ngaia awm reng loh chu engtin nge a hlâwkpui?

⁸ Unaunu chuan chûng thute chu a hre reng a. Kum 92 mi nia a thih thlengin rinawm takin Jehova rawng a bâwl a ni. A thih hma kum rei vak lovah, heti hian a sawi a: “Jehova rawngbâwlnaah hunbi kima kum 63 chuang ka lo thawh tawhnate ka’n thlîr lêt hian, nun lungawithlâk tak ka nei tih ka sawi thei,” tiin. Engvângin nge? Heti hian a sawi a ni: “Nun lungawithlâk tak min neihtîrtu chu unaute nêna inlaichhînna duhawm tak ka neih leh Siamtu Ropui leh Pathian dik awmchhun, Jehova rawng kan bâwlhona tûr lei paradis-a chatuana nun beiseina ka neih hi a ni,” tiin. * Ngîl taka hma lam hun thlîrtu entawn tûr siam ṭha tak a va ni êm!

9. Leviticus 19:18-a sawi angin, eng hunah nge kan thinurna chu theihnghilh harsa kan tih mai theih?

⁹ Leviticus 19:18 chhiar rawh. Kan Kristian  unau te, ṭhian hnai tak te, leh chhûngkhat lainate’n dik lo taka min cheibâwl hian thinur lova awm chu harsa kan ti ṭhîn a. Entîr nân, unaunu pakhat chu unaunu dangin a pawisa rû-ah a puh a. A hnuah, a puhtu unaunu chuan ngaihdam a dîl a ni; mahse, unaunu chuan a chunga thilthleng chu a theihnghilh thei lo. Chutiang chu i tawng tawh ngai em? Chutiang dinhmun chiah chu tawng lo mah ila, kan zînga a tam zâwk chuan thinur hle châng kan neiin, chu chu kan theihnghilh theih kan ring lo pawh a ni hial thei.

10. Kan thinur hunah engin nge min ṭanpui thei?

¹⁰ Kan thinur hunah engin nge min ṭanpui thei? Min ṭanpui theitu pakhat chu Jehova’n thil engkim a hmu tih hriat hi a ni. Dik lo taka mite min cheibâwlna pawh tiamin, kan thiltawn zawng zawng chu a hre vek a. (Heb. 4:13) Kan tawrhnate chu min tawrhpui a. (Is. 63:9) Dik lo taka kan tawrhna zawng zawng chu a tibo vek ang tih min tiam a ni.—Thup. 21:3, 4.

11. Thinurna pai reng loh chu engtin nge kan hlâwkpui?

¹¹ Thinurna pai reng loh chu kan ṭhatna tûr a ni tih hriat a ṭha bawk. Chu chu dik lo taka puhna tâwk kan unaunuin a hnua a hriatthiam chu a ni. Hunte a liam zêl chuan, a thinurna chu a theihnghilh thei ta a. Mi dangte kan ngaihdam hian, Jehova’n min ngaidam tih a hria a. (Mt. 6:14) A chunga a unaunu thiltih chu a dik lo tih a hria a; mahse, a thinurna a pai reng lo. Chuvângin, kan unaunu chu a hlim lehzualin Jehova rawngbâwl chu a ngaihsak thei a ni.

12. Johana thawn khat 3:19, 20-na aṭangin eng nge kan zir?

¹² Johana thawn khat 3:19, 20 chhiar rawh. Mahni inthiam lohna neih chu thil pângngai tak a ni a. Entîr nân, mi ṭhenkhat chuan thutak an hriat hmaa an thiltihte avângin mahni inthiam lohna an nei a. Mi dangte chuan baptisma an chan hnua an thil sual tihte avângin mahni inthiam lohna an nei a ni. Chu chu thil pângngai tak a ni. (Rom 3:23) Ni e, thil dik tih chu kan duh a. Mahse, “kan zain thil tam tak kan tisual fo ṭhîn.” (Jak. 3:2; Rom 7:21-23) Mahni inthiam lohna kan neih chu thil duhawm angin lang lo mah se, chu chuan thil ṭha ṭhenkhat min thlen thei a ni. Engvângin nge? Mahni inthiam lohna chuan kan nun kawng siam ṭha tûr leh kan thil sual tihte tinawn tawh lo tûra min chêttîr theih avângin.—Heb. 12:12, 13.

13. Engvângin nge a lutuka mahni inthiam lohna laka kan invên a ngaih?

¹³ Kawng lehlamah chuan, a lutuka mahni inthiam lohna kan nei thei a—chu chu kan inchhîr hnuah leh Jehova min ngaihdam hnuah pawh mahni inthiam lohna kan neih zawm zêlna hi a ni. Chutianga inthiam lohna neih chu thil hlauhawm a ni thei. (Sâm 31:10; 38:3, 4) Engtin nge? Tûn hmaa a thiltih sual avânga tûn thlenga mahni inthiam lohna la nei reng unaunu thiltawn hi han ngaihtuah teh. Ani chuan: “Chhandam ka nih ka inrin loh avângin Jehova rawngbâwlnaa theih tâwp chhuah hi ṭangkaina awm lo ni hian ka hria,” tiin a sawi. Kan zînga tam tak chu he unaunu ang hian kan awm tawh ṭhîn ngei ang. Chuvângin, a lutuka mahni inthiam lohna thanga âwk lo tûra kan invên hi a pawimawh hle. Engpawh ni se, kan chunga Jehova a beidawng lo chung pawha kan beidawng a nih chuan, Setana hlim dân tûr chu ngaihtuah ang che!—2 Korinth 2:5-7, 11 nên khaikhin rawh.

14. Jehova chu kan chungah a beidawng lo tih engtin nge kan hriat theih?

¹⁴ Chuti chung pawhin, ‘Jehova chu ka chungah a beidawng lo tih engtin nge ka hriat chian theih?’ tiin kan ngaihtuah mai thei. Chu zawhnaah chuan a chhânna pawh a tel nghâl a tih theih a ni. Kum sâwmbi kal ta khân,  Vênnainsâng chuan: “Kan thil sual tih ngai chu kan tinawn fo pawh a ni theiin, Jehova rawng kan bâwl ṭan hmaa kan neih chak lohna chu kan hneh thei tak tak lo pawh a ni thei. . . . Mahse, lunghnual suh. Ngaihdam theih loh thil sual ti angin inngai hek suh ang che. Setana chuan chutianga inngai tûrin a duh che a ni. Rilru hrehawm leh mahni inthiam lohna i neihna chu Jehova ngaihdam theih lo khawpa mi sual i ni lo tih finfiahna a ni. Inngaitlâwm taka awmin, Pathian hnênah ngaihdam dîlin ṭhahnemngai takin ṭawngṭai ṭhîn la, chhia leh ṭha hriatna thiang tak nei tûrin a ṭanpuina dîl ang che. Naupang chuan engtiang khawpa zingin harsatna tâwk mah se, a pa hnênah ṭanpuina dîlin a pan reng ṭhîn anga Jehova hnêna ṭanpuina i dîl reng chuan ani chuan a ṭanpui ang che,” tiin a sawi a ni. *

15-16. Unau ṭhenkhat chu an chungah Jehova a beidawng lo tih an hriat chuan engtin nge an awm?

¹⁵ Jehova chhiahhlawh tam tak chuan an chungah Jehova a beidawng lo tih hriain thlamuanna an nei a. Entîr nân, kum engemaw zât kal ta khân, unaupa pakhat chu “Bible-in Nun A Thlâk Danglam,” tih thuziaka thiltawn pakhatin a rilru a khawih hle a. Chu thuziakah chuan unaunu pakhat chuan tûn hmaa a nun dân avângin Jehova’n a hmangaih ang tih rin harsa a tih thu a sawi a. Baptisma a chan aṭanga kum tam tak hnuah pawh chutiang ngaih dân chu a la nei reng a. Mahse, tlanna chungchâng a chhût ngun hnu chuan a ngaih dân a thlâk thei ta a ni. *

¹⁶ Unaunu thiltawn chuan kan sawi tâk unaupa chu engtin nge a nghawng? Ani chuan: “Ka naupan laiin, saruak lem leh thuziakte en lovin ka awm thei lo va. Tûn hnai mai khân, chu chîn dân chu ka nei ṭan leh a. Kohhran upate hnênah ṭanpuina ka dîl a, ka harsatna chu zawi zawiin ka hneh thei ta a ni. Upate chuan Pathianin min hmangaihin, min ngaidam duh tih ring tûrin min ṭanpui a. Mahse, hlutna nei lo leh Jehova’n min hmangaih tak tak thei lo tûra inhriat châng ka la nei reng a. [He unaunu] thiltawn ka chhiarna hian min ṭanpui tak zet a ni. Pathianin min ngaidam thei lo anga ka ngaihtuah hian,  chu chu a Fapa inthawinain ka sualte a khuh zo lo tia sawi ang ka ni tih ka inhre ta a. Chu thuziak chu mahni inthiam lohna leh hlutna nei lo nia ka inhriat apianga ka chhiara, ka chhût ngun theih nân chep thlain ka kawl reng a ni,” tiin a ziak a ni.

17. Engtin nge tirhkoh Paula’n a lutuka mahni inthiam lohna thang chu a pumpelh?

¹⁷ Chutiang thiltawnte chuan tirhkoh Puala min hriatchhuahtîr a. Ani chuan Kristian a nih hmain thil sual tam tak a ti a. A thiltihte chu hre chhuak ṭhîn mah se, chûngte chu a ngaihtuah reng lo. (1 Tim. 1:12-15) Tlanna chu Pathian hnên aṭanga a dawn mi mal thilpêk angin a thlîr a. (Gal. 2:20) Chuvângin, Paula chuan a lutuka mahni inthiam lohna thang chu pumpelhin, Jehova hnênah a neih ṭhat ber pêk chu a tum tlat a ni.

18. He thuziakah hian eng nge kan zir?

¹⁸ He thuziaka kan sawiho tâk thangte chungchâng bih chianna aṭangin eng nge kan zir? (1) Thil hriat reng theihna ṭha chu Jehova hnên aṭanga kan dawn malsâwmna a ni a; mahse, kan tûn hma nun chu engtiang khawpa ṭha pawh ni se, khawvêl thar lo awm tûra kan nun chu a aiin a ṭha lehzual ang. (2) Mi dangte chuan kan rilru an tina mai thei a; mahse, kan ngaihdam chuan Jehova rawngbâwlna chu kan ngaihven tlat thei ang. (3) A lutuka mahni inthiam lohna chuan hlim taka Jehova rawng kan bâwlna tûr a dâl thei a. Chuvângin, Paula angin, Jehova’n min ngaidam tih kan ring tlat tûr a ni.

19. Khawvêl tharah chuan tûn hmaa kan thiltih sualte avângin rilru hahin kan awm tawh lo vang tih engtin nge kan hriat?

¹⁹ Chatuana nun beiseina kan nei a. Pathian khawvêl tharah chuan tûn hmaa kan thiltih sualte avângin rilru hahin kan awm tawh lo vang. Chumi hun chungchângah Bible chuan: “Tûn hma thilte chu hriat rengin a awm tawh lo vang,” tiin a sawi a. (Is. 65:17) Han ngaihtuah teh: Kan zînga ṭhenkhat chuan kum upa tak an nih thlengin Jehova rawng an bâwl a; mahse, khawvêl tharah chuan an tleirâwl thar leh vek ang. (Job. 33:25) Chuvângin, nun hluite ngaiin i awm suh ang u. Chu aiin, hma lam hun i thlîr tlat zâwk ang u!