1-2. (a) Engvângin nge nupa tuak tharte chuan Jehova an rinchhan ang? (Sâm 37:3, 4) (b) He thuziakah hian eng nge kan ngaihtuahho vang?

NUPUI pasal nei mai tawh tûr emaw, nei hlim emaw i ni em? Chutiang i nih chuan, i hmangaih tak nêna nun hlimawm tak nei chho tûrin in beisei ngei ang. Ni e, inneihnaah hian harsatnate a lo awm thei a. Thu tlûkna pawimawh tak siam tûrte pawh a awm a ni. Chûng harsatnate in hmachhawn dân leh in thu tlûkna siamte chuan nakin hun zêla in nupa hlimna chu a nghawng ang. Jehova in rinchhan chuan thu tlûkna fing in siam ang a, in inneihna a nghet lehzualin, in hlim lehzual ang. Pathian thurâwnte in nunpui loh chuan, in neihnaah buaina leh hlim lohna thlentu harsatnate in tawh a rinawm.—Sâm 37:3, 4 chhiar rawh.

² He thuziak hi a bîk takin, nupa tuak tharte tân ni mah se, hetah hian nupa zawng zawngte hmachhawn mai theih harsatnate pawh târ lan a ni ang. Bible-a mi rinawm a hmei a pate entawn tûr siamte aṭanga kan zir theihte a thlûr bing ang. Bible-a chûng entîrnate chuan nupa inkâr pawh tiamin, nun kawng hrang hranga kan nunpui theih tûr zir tûrte min zirtîr a. Tûn laia nupa tuak ṭhenkhatte thiltawn aṭanga kan zir theihte pawh kan hmu bawk ang.

3-4. Nupa tuak tharte chuan eng harsatnate nge an hmachhawn mai theih?

³ Mi ṭhenkhat chuan nupa tuak tharte chu mi dangte anga nun pângngaia nung tûrin an fuih mai thei a. Entîr nân, nu leh  pate leh chhûngkhat lainate chuan a rang thei ang bera fate nei tûrin an fuih mai thei a ni. A nih loh leh, ṭhian ṭhate leh chhûngkhatte chuan nupa tuak tharte chu in leia, bungraw man to tak takte lei tûrin a hrilh pawh a ni thei bawk.

⁴ An fîmkhur loh chuan, nupa tuak tharte chuan leiba tam tak neihtîr theitu thu tlûknate an siam palh thei a. Chutiang a nih chuan, chûng an leibate an rulh theih nân an nupaa dârkâr rei tak tak hna an thawh a ngai thei a ni. Eizawnna hnate chuan Bible zirna te, chhûngkuaa Pathian biakna te, leh rawngbâwlnate atâna hman tûr hunte chu a la bo ṭan thei a ni. Nupate chuan sum tam zâwk an hmuh theih nân leh an hna an chân loh nân hunbi pângngai aia tam thawkin, inkhâwmte chu an pelh hial pawh a ni thei bawk. Chutiang a nih chuan, Jehova rawngbâwlna zauh theihna hun remchângte chu an hloh dâwn a ni.

5. Unau Klaus-a leh Marisa-i te nupa thiltawn aṭangin eng nge i zir?

⁵ Thiltawn tam tak chuan kan nuna sum leh pai dah pawmawhnain hlimna a thlen lo tih a târ lang a. Chumi chungchânga nupa tuak khat Klaus-a leh Marisa-i te nupa zir chhuah hi han ngaihtuah teh. * An inneih hlim aṭangin, nuam taka an khawsak theih nân hunbi kimin hna an thawk a. Mahse, lungawina tak tak an nei thei lo. Klaus-a chuan: “Sum leh pai chu kan mamawh aia tam nei mah ila, thlarau lamah thiltum eng mah kan nei lo. Dik taka sawi chuan, kan nun chu buaina leh rilru hahna hlîrin a khat a ni,” tiin a sawi. Sum leh pai lam ngaihvennain lungawina a thlen lo tih chu nangmahni ngeiin in hre mai thei. Chutiang a nih chuan, lunghnual mai suh u. Unau dangte entawn tûr ṭha siam ngaihtuahnain inthlâk danglamna siam tûrin a ṭanpui thei che u a ni. A hmasain, Lal Jehosaphata entawn tûr siam aṭanga pasalte zir theihte chu i lo ngaihtuah ang u.

6. Lal Jehosaphata’n a mite rawn bei tûra sipai rual a hmachhawn khân, engtin nge Thufingte 3:5, 6-a chhinchhiah fuihna thute chu a nunpui?

⁶ Pasalte u, in mawhphurhnate avângin rilru hah châng in nei em? In nei a nih chuan, Lal Jehosaphata entawn tûr siam chu in hlâwkpui thei a ni. Lal a nih angin, Jehosaphata chuan hnam pumpui ṭhatna tûrin mawhphurhna a nei a! Engtin nge chu a hna pawimawh tak chu a hlen? Ani chuan a enkawlna hnuaia awmte humhim tûra a tihtheih chu a ti a. Juda khawpuite chu tinghetin, sipai rual 1,160,000 aia tam a din a ni. (2 Chro. 17:12-19) A hnuah, Jehosaphata’n harsatna lian tak a hmachhawn a. Amon-ho, Moab-ho sipai rual tam takte leh, Seir tlânga chêngte chuan inthuruala rawn beih an tum a. (2 Chro. 20:1, 2) Jehosaphata’n eng nge a tih? Ṭanpuina leh chakna atân Jehova a rinchhan a ni. Chutianga a ti chu Thufingte 3:5, 6-a kan hmuh fuihna thu fing tak nên a inmil hle. (Chhiar rawh.) 2 Chronicles 20:5-12-a chhinchhiah inngaitlâwm taka  Jehosaphata ṭawngṭaina chuan a hmangaih tak a Pa vâna mi a rinchhanzia a târ lang a ni. Engtin nge Jehova’n Jehosaphata ṭawngṭaina chu a chhân lêt?

7. Engtin nge Jehova’n Jehosaphata ṭawngṭaina chu a chhân?

⁷ Jehova chuan Levia mi Jahaziela hmangin Jehosaphata chu a bia a. A hnênah: “Inzâr ula, ding ngawt mai ula, in lama ṭang LALPA chhandamna chu en reng mai rawh u,” tiin a hrilh a ni. (2 Chro. 20:13-17) Dik tak chuan, chu chu râl beih dân pângngai a ni lo chiang hle! Mahse, chûng kaihhruainate chu mihring hnên aṭanga lo kal ni lovin, Jehova hnên aṭanga lo kal a ni. Jehosaphata chuan Pathian a rinchan tlat avângin a hrilh ang chuan a ti a. A mite nêna hmêlmate bei tûra an kal chhuah chuan, hma hruaitu atân râl do thiam tak sipaite ni lovin, râlthuam pawh nei lo hla satute chu a dah a. Jehosaphata’n a rinchhan ang ngeiin, Jehova chuan hmêlmate chu a titlâwm ta a ni.—2 Chro. 20:18-23.

8. Pasalte chuan Jehosaphata entawn tûr siam aṭangin eng nge an zir theih?

⁸ Pasalte u, Jehosaphata entawn tûr siam aṭangin in inzir thei a ni. In chhûngkua ngaihsak tûra mawhphurhna in neih avângin, an tân in thawkrim hle a. Harsatnate in hmachhawn hian, mahnia chinfel theih in inring pawh a ni thei. Mahse, mahni chakna rinchhan duhna chu do tlat rawh u. Chu aiin, Jehova hnênah a ṭanpuina dîlin, mi mal takin ṭawngṭai ang che u. Chu bâkah, in khawppuite nên tih tak zetin ṭawngṭai ang che u. Bible leh Pathian inawpna pâwl tihchhuah Bible ṭanchhan thu leh hla chhuahte zirna hmangin Jehova kaihhruaina zawng ula, chûngte chu nunpui ang che u. Mi dangte chuan Bible ṭanchhana in thu tlûkna siamte chu an pawmpui lo thei che uin, bumin in awm niin an hrilh hial che u pawh a ni thei. Sum leh paiin a lei theih thilte chuan in chhûngkaw tân inhumhimna ṭha ber a pe thei che u niin an sawi pawh a ni thei bawk. Mahse, Jehosaphata entawn tûr siam chu hre reng ang che u. Ani chuan Jehova a rinchhan tlat a, chu chu a thiltihin a lantîr a ni. Jehova chuan chu mi rinawm chu a kalsan lo va, nang pawh a kalsan lo vang che. (Sâm 37:28; Heb. 13:5) Nupate chuan nun hlimawm tak an nei tih chian tûrin eng nge an tih theih?

9. Zâwlnei Isaia leh a nupui chungchâng eng nge kan sawi theih?

⁹ Zâwlnei Isaia leh a nupui chuan an nunah Jehova rawngbâwl chu an dah pawimawh ber a. Isaia chu zâwlnei a ni a; a nupui pawh “zâwlneinu,” tia koh a nih avângin, ani pawhin hrilh lâwkna chungchângah chanvo a neih ve ngei a rinawm. (Is. 8:1-4) Isaia leh a nupui chuan Jehova an biakna chu an nunah an dah pawimawh ber a. Tûn laia nupate tân entawn tûr ṭha an va ni êm!

10. Engtin nge Bible hrilh lâwknate zirna chuan nupate chu Jehova rawngbâwlnaa a tam thei ang bera inhman duhna nei tûra a ṭanpui theih?

¹⁰ Tûn laia nupate pawhin theih tâwp chhuaha rawngbâwlnaa inhmangin, an nun chu Jehova tân an hmang thei a. Bible hrilh lâwknate zir dûn a, a thlen famkim zêl dân hriatna hmangin Jehova an rinchhanna chu an tinghet lehzual thei a ni. * (Tit. 1:2) Bible hrilh lâwkna ṭhenkhat thlenfamkimnaah tel ve theihna an nei tih an târ lang thei a. Entîr nân, tâwpna a lo thlen hmaa khawvêl puma chanchin ṭha hrilh hmasak a nih tûr thu Isua hrilh hlâwkna thlenfamkimnaah an tel thei  a ni. (Mt. 24:14) Nupate’n Bible hrilh lâwkna a thleng dik zêl tih an rinna chu an tihngheh poh leh Jehova rawngbâwlnaa a tam thei ang bera inhman chu an duh lehzual ang.

11. Priskilli leh Akuila te chuan eng nge tih theih neih a, engvângin nge?

¹¹ Nupa tuak tharte chu Rom khuaa awm Juda nupa tuak khat Priskilli leh Akuila te hnên aṭangin an inzîr thei a. Anni chu Isua chungchânga chanchin ṭha an hriat chuan, Kristian an rawn ni a. Nun lungawithlâk tak an nei ngei ang. Mahse, Lalber Klaudia’n Judate chu Rom chhuahsan tûra thu a pêk avângin thâwk leh khatah an nun chu a inthlâkthleng ta thut a. Chu thilthlengin Priskilli leh Akuila te a nghawng dân hi han ngaihtuah teh. An tlângnêlna hmun chhuahsan a, in thar an zawn a ngaih bâkah, hmun thara puan in siama eizawn hna an thawh a ngai a ni. Chutianga an chunga buaina lo thleng chu Lalram hmasâwnna dah pawimawh loh phah nân an hmang em? Chu zawhna chhânna chu in hriat ngei a rinawm. An va insawnna Korinth khuaah chuan, Priskilli leh Akuila chuan tualchhûng kohhran chu zawmin, chuta unaute tichak tûrin tirhkoh Paula nên theih tâwp an chhuah a ni. A hnuah, thuhriltu mamawh zualna hmun khaw dangahte an insawn a ni. (Tirh. 18:18-21; Rom 16:3-5) Nun awmze nei tak leh hlimawm tak an nei a ni.

12. Engvângin nge nupate chuan thlarau lam thiltumte an insiam ang?

¹² Tûn laia nupa tuakte pawhin an nunah Lalram dah hmasain Priskilli leh Akuila te chu an entawh thei a ni. Nupate tân an thiltumte chungchâng sawi dun nâna hun ṭha ber chu an inngaihzâwn lai hi a ni a. Thu tlûknate siam dûna thlarau lam thiltumte hlen an tum hian an nunah Jehova thlarau thianghlimin hna a thawh dân an hmu lehzual a ni. (Thur. 4:9, 12) Unau Russell-a leh Elizabeth-i te entawn tûr siam hi han ngaihtuah teh. Russell-a chuan, “Kan inngaihzâwn laiin, thlarau lama kan thiltumte chu kan sawi dûn ṭhîn,” tiin a sawi. Elizabeth-i pawhin, “Chutianga kan sawi dun chhan chu a hnua thu tlûkna hrang hrang kan siam a ngaih hunah, kan duh thlanna siamte’n chûng kan  thiltumte a dâl loh nân a ni,” tiin a sawi. Unau Russell-a leh Elizabeth-i te chu Micronesia rama thuchhuahtute mamawh zualna hmunah rawngbâwl tûrin an insawn a ni.

13. Sâm 28:7-naa sawi angin, Jehova kan rinchhan chuan eng malsâwmnate nge kan dawn ang?

¹³ Russell-a leh Elizabeth-i angin, nupa tam tak chuan thu hrilh rawngbâwlna leh zirtîr siamnaah a tam thei ang bera an inhman theih nân, thil dang tih nâna inhman lutuk loh an tum a. Nupate chuan Jehova rawngbâwlnaa thiltum ṭha takte neia, chûngte hlen tûra theih tâwp an chhuah hian, thil ṭha tam tak an seng a ni. Jehova’n a ngaihsak dânte an hmuin, amah an rinchhan lehzual ang a, hlimna dik tak an nei bawk ang.—Sâm 28:7 chhiar rawh.

14. Engtin nge tirhkoh Petera leh a nupui chuan Matthaia 6:25, 31-34-a chhinchhiah thutiam hi an rinzia an lantîr?

¹⁴ Nupate chu tirhkoh Petera leh a nupui entawn tûr siam aṭang pawhin an inzir thei a. Tirhkoh Petera chuan Isua a hmuh hmasak ber hun aṭanga thla ruk hnu vêlah, thu tlûkna pawimawh tak a siam a ngai a. Ani chu sangha mana ei zawng a ni. Isua’n hunbi kima a hnungzui tûra a sâwm khân, Petera chuan a chhûngkaw dinhmun chu a ngaihtuah tel a ngai a. (Lk. 5:1-11) Ani chuan Isua thu hrilh rawngbâwlnaa zui chu a thlang ta a ni. Duh thlanna fing a va ni êm! A nupui chuan a thu tlûkna siam chu a thlâwp ang tih rinna tûr chhan ṭha tak kan nei a. Bible chuan Isua thawhleh hnuah, Petera chu rawngbâwla a zin kualnaah hun eng emawti chhûng a nupuiin a zui tih min hrilh a. (1 Kor. 9:5) Kristian nupui a nih anga a entawn tûr siam chuan Petera chu Kristian nupui pasalte tâna thlarauva thâwk khum fuihna thute zalên taka sawi thei tûrin a ṭanpui ngei a rinawm. (1 Pet. 3:1-7) Petera leh a nupui chuan an nuna Lalram an dah hmasak phawt chuan an mamawhte a pe ang tih Jehova thutiam chu an ring tlat tih a chiang a ni.—Matthaia 6:25, 31-34 chhiar rawh.

15. Tiago-a leh Esther-i te thiltawn aṭangin eng nge i zir?

¹⁵ Tûn hnai maia nupui pasal nei i nih chuan, engtin nge rawngbâwlna zauh duhna i neih chu i chhawmnun theih? Tih theih dân kawng khat chu nupa tuak dangte thiltawn aṭanga inzir hi a ni. Entîr nân, Vênnainsâng-a “They Offered Themselves Willingly,” tih thuziak inzawm chu i chhiar thei a. Chûng thuziakte chuan Brazil rama nupa tuak khat Tiago-a leh Esther-i te chu mamawh zualna hmunna rawngbâwl duhna nei tûrin a ṭanpui a ni. Tiago-a chuan: “Jehova’n tûn laia a chhiahhlawhte a ṭanpui dân thiltawnte kan chhiar hian, chutianga Jehova kaihhruaina leh ngaihsakna mahni ngeia tawn ve duhna min neihtîr a ni,” tiin a sawi. A tâwpah, anni pawh Paraguay ramah an insawn a, chutah chuan, kum 2014 aṭang khân Portuguese ṭawng hmanna bialah rawng an bâwl a ni. Esther-i pawhin: “Kan nupaa kan Bible châng duh êm êm pakhat chu Ephesi 3:20 hi a ni a. Jehova rawng kan bâwlnaah chu Bible châng dikzia chu vawi tam tak kan hmu a ni,” tiin a sawi. Chu Bible châng tâwp lamah chuan, Paula chuan Jehova’n kan dîl ai tam min pêk a tiam thu a sawi a ni. Chu thutiam chu a va dik tak êm!

16. Nupa tuak tharte chuan nuna an thiltumte tihlawhtling tûra hma an lâk hunah tute thurâwn nge an lâk theih?

¹⁶ Tûn laia nupa tuak tharte chuan Jehova rinchhantu nupa tuak dangte thiltawn chu an hlâwkpui thei a. Nupa tuak ṭhenkhat chu kum sâwmbi têl hunbi kimin rawng an lo bâwl tawh pawh a ni thei a. In thiltum tihhlawhtlinna kawnga ṭanpuina mamawh nia in inhriat  chuan, engvângin nge an hnên aṭanga thurâwn in lâk loh vang? Chutianga tih chu Jehova in rinchhanzia lantîr dân kawng khat a ni. (Thuf. 22:17, 19) Kohhran upate pawhin nupa tuak tharte chu thlarau lam thiltumte insiam a, hlen thei tûrin an ṭanpui thei bawk.

17. Unau Klaus-a leh Marisa-i te chungah eng thil nge thleng a, an thiltawn aṭangin nge nge kan zir theih?

¹⁷ Mahse, a châng chuan, rawngbâwlna zauh tûra kan thu tlûkna siam chu kan beisei ang a ni lo mai thei. A tîra kan târ lan tâk Unau Klaus-a leh Marisa-i te thiltawn hi han ngaihtuah teh. An inneih aṭanga kum thum a liam hnuah an in chhuahsanin Finland branch saknaa ṭanpui tûrin an inpe a. Mahse, chutah chuan thla ruk aia tam an awm thei lo tih an hria a. A tîr chuan, an lunghnual hle. Mahse, rei vak lovah chuan, Arabic ṭawng zir tûra sâwm an ni a, tûnah chuan ram danga Arabic ṭawng hmanna bialah hlim takin rawng an bâwl mêk a ni. Unaunu Marisa-i’n an thiltawnte chu ngaihtuah lêtin: “Kan tlângnêlna hmun kalsana, Jehova rinchhan pumhlûm chu thil alwsam a ni lo. Mahse, Jehova chuan kan beisei loh tak kawnga min ṭanpui reng dânte chu ka hmu a. Chûng kan thiltawnte chuan, Jehova ka rinchhanna chu a tinghet lehzual a ni,” tiin a sawi. He thiltawnin a târ lan angin, Jehova’n amah i rinchhan pumhlûm phawt chuan mal a sâwm zêl ang che tih i chiang thei a ni.

18. Nupate chuan Jehova rinchhan zawm zêl tûrin eng nge an tih theih?

¹⁸ Inneihna chu Jehova hnên aṭanga kan dawn thilpêk a ni a. (Mt. 19:5, 6) Ani chuan nupate chu, chu thilpêk hlimpui tûrin a duh a ni. (Thuf. 5:18) Nupa tuak tharte u, engvângin nge in nun inhman dân chu in endik loh vang? Jehova’n inneihna thilpêk a pêk che u avânga in lâwmzia chu in tihtheih apiang tiin in lantîr em? Jehova chu ṭawngṭaiin be ṭhîn ang che u. In dinhmuna in hman theih tûr thu bulte chu a Thu, Bible-ah zawng u la. Tichuan, Jehova pêk thurâwnte chu zâwm ang che u. In nunah Jehova rawngbâwlna in dah pawimawh ber phawt chuan, nun hlimawm tak leh lungawithlâk tak in nei ang tih in chiang thei a ni.