1. Fîmkhur tih awmzia chu eng nge ni? (2 Timothea 4:5)

 DINHMUN khirh tak kan tawh hian, Jehova leh a inawpna pâwl chunga kan rinawmna chu fiahin a awm thei a. Engtin nge chûng harsatnate chu kan paltlang theih? Fîmkhur tak leh harhvâng taka awmin, rinnaah chuan kan ding nghet tlat tûr a ni. (2 Timothea 4:5 chhiar rawh.) Thlamuang taka awm a, rilru fîm taka thil kan ngaihtuah a, Jehova thlîr dân aṭanga thil thlîr kan tum hian kan fîmkhur tihna a ni a. Chutianga kan tih chuan, kan ngaihtuahnate chu kan rilru vei zâwngin a thunun lo vang.

2. He thuziakah hian eng nge kan sawiho vang?

² Thuziak hmasaah khân, kohhran pâwn aṭanga kan tawh mai theih harsatna pathumte kan sawiho tawh a. He thuziakah hian, Jehova chunga kan rinawmna fiah theitu kohhran chhûnga thleng harsatna pathumte kan sawiho vang. Chûngte chu (1) Kristian unau tu emawin dik lo taka min cheibâwl nia kan inhriat hunah, (2) zilh kan nih hunah, leh (3) inawpna pâwla inthlâk danglamnate mila insiamrem harsa kan tih hunah a ni. Engtin nge chûng harsatnate kan hmachhawn hunah kan fîmkhur reng theih a, Jehova leh a inawpna pâwl chunga kan rinawm tlat theih?

3. Kristian unau tu emawin dik lo taka min cheibâwl nia kan inhriat hunah engtin nge kan awm mai theih?

³ Kristian unau tu emaw, a nih loh leh kohhran upa tu emawin dik lo takin a cheibâwl che niin i inhre tawh ngai em? Ani chuan i rilru chu tihnat a tum kher lo vang. (Rom 3:23; Jak.  3:2) Chuti chung pawhin, a thiltihte chuan a tilungni lo mai thei che a. Chumi chungchâng chu ngaihtuahin i muhîl thei lo pawh a ni thei. ‘Kristian unauvin hetianga min cheibâwl a nih chuan, hei hi Pathian inawpna pâwl a ni tak tak dâwn em ni?’ tiin i ngaihtuah hial thei a ni. Chutianga ngaihtuah chu Setana duh dân chiah a ni a. (2 Kor. 2:11) Chutianga a thim zâwnga ngaihtuahna chuan Jehova leh a inawpna pâwl aṭangin min inlâkhrantîr thei a ni. Chuvângin, unau tu emawin dik lo taka min cheibâwl nia kan inhriat chuan, engtin nge fîmkhur taka awm a, ngaihtuahna ṭha lo chu kan pumpelh theih?

4. Josefa chu dik lo taka cheibâwl a nih khân engtin nge a fîmkhur reng a, chu a thiltawn aṭang chuan eng nge kan zir theih? (Genesis 50:19-21)

⁴ Thinurna pai reng suh. Josefa tleirâwl lai chuan, a ute’n dik lo takin an cheibâwl a. An hua a, a ute zînga ṭhenkhat chuan tihhlum hial an duh a ni. (Gen. 37:4, 18-22) A tâwpah salah an hralh ta a. Chuvângin, Josefa chuan kum 13 vêl zet chu fiahna khirh takte a hmachhawn a ni. Ani chuan Jehova’n a hmangaih tak tak leh tak tak loh chu a ringhlel thei a. Ṭanpuina a mamawh lai takin Jehova’n a kalsan ta angin a ngai mai thei bawk. Mahse, ani chuan thinurna a pai reng lo. Chu aiin, thlamuang taka awmin a fîmkhur reng zâwk a. A unaute chunga phuba lâk theihna hun remchâng a neih pawh khân, hmangaihna lantîrin anni chu a ngaidam zâwk a ni. (Gen. 45:4, 5) Josefa’n chutianga a tih theih chhan chu rilru fîm taka a ngaihtuah vâng a ni a. A harsatna tawhte ngaihtuah aiin, Jehova duh zâwng a ngaihtuah tlat zâwk a ni. (Genesis 50:19-21 chhiar rawh.) Kan tâna zir tûr chu eng nge ni? Dik lo taka cheibâwl i nih chuan, Jehova chungah thinur lo la, a kalsan ta che angah ngai hek suh. Chu aiin, harsatna i tawhte tuar chhuak tûra a ṭanpui dân che chu ngaihtuah zâwk la. Mi dangin dik lo taka an cheibâwl hunah che, an ṭhat famkim lohnate chu hmangaihnaa khuhbo tum rawh.—1 Pet. 4:8.

5. Unau Miqueas-a chu dik lo taka cheibâwl nia a inhriat khân engtin nge a fîmkhur chhunzawm zêl?

⁵ South America rama awm kohhran upa Miqueas-a b thiltawn hi han ngaihtuah teh. Kohhrana upa ṭhenkhatin dik lo takin an cheibâwl nia a inhriat laite chu a ngaihtuah lêt a. Ani chuan heti hian a sawi a ni: “Khatiang taka rilru hahna kha ka la nei ngai lo. Ka hlauthâwng ṭhîn hle a. Zânah ka muhîl thei lo va, beidawng takin ka ṭap ṭhîn,” tiin. Mahse, Unau Miqueas-a chu fîmkhur chhunzawm zêlin, a rilru vei zâwngte thunun a tum tlat a ni. Jehova hnênah thlarau thianghlim dîl a, tuar chhuak thei tûra chakna dîlin a ṭawngṭai zing hle a. Chu bâkah, kan thu leh hla chhuahahte pawh ṭanpuina a zawng bawk. Kan tâna zir tûr chu eng nge ni? Unau tu emawin dik lo takin a cheibâwl che nia i inhriat chuan thinur nghâl mai lo la, ngaihtuahna ṭha lo i neih theihte chu thunun tum tlat ang che. Chutianga thu sawitîrtu leh thil tihtîrtu i hriatpui loh dinhmunte a tâwk pawh a ni thei. Chuvângin, ṭawngṭaiin Jehova bia la, a thil thlîr dân anga thlîr thiam tûrin a ṭanpuina dîl ang che. Chutianga tihna chuan, i Kristian unau chunga rinna nei tûr leh ngaidam tûrin a ṭanpui thei che a ni. (Thuf. 19:11) Jehova chuan i dinhmun a hriain, tuar chhuak tûra i mamawh chakna a pe ang che tih hre reng rawh.—2 Chro. 16:9; Thur. 5:8.

6. Engvângin nge zilhna chu kan chunga Jehova hmangaihna lantîrna anga kan hmuh thiam a pawimawh? (Hebrai 12:5, 6, 11)

⁶ Zilhna hian rilru a tina hle thei a. Rilru natna lam chauh kan ngaihtuah chuan,  zilhna chu dik lo leh khauh lutuk anga ngaiin kan ngai pawimawh lo ṭan thei a ni. Chu chuan thil pawimawh tak—zilhna hi Pathian min hmangaihzia lantîrna a ni tih min hmuh hmaihtîr thei a ni. (Hebrai 12:5, 6, 11 chhiar rawh.) Chu bâkah, kan rilru vei zâwng kan inthununtîr a nih chuan Setana chu min beih theihna tûr hun remchâng kan siamsak a ni ang. Ani chuan zilhna hnâwl tûr leh chu aia pawi zâwk, Jehova leh a inawpna pâwl aṭanga inla hrang turin min duh a ni. Zilhna i tâwk a nih chuan engtin nge i fîmkhur zawm zêl theih?

7. (a) Milema târ lan angin, Petera’n zilhna a pawm hnuah Jehova’n engtin nge ani chu a hman? (b) Petera entawn tûr siam aṭangin nge nge kan zir?

⁷ Zilhna pawm la, a ṭûl angin insiam ṭha rawh. Isua chuan Petera chu tirhkoh dangte hmaah vawi khat aia tam a zilh a. (Mk. 8:33; Lk. 22:31-34) A zahthlâk duh hle ang! Mahse, Petera chu Isua chungah a rinawm reng tho a ni. Zilhna chu pawmin, a thil tihsualte aṭangin a inzir a. A tâwpah, Jehova’n Petera chu a rinawmna avângin mal a sâwm a, kohhranah mawhphurhna pawimawh tak tak a chelhtîr a ni. (Joh. 21:15-17; Tirh. 10:24-33; 1 Pet. 1:1, 2) Petera entawn tûr siam aṭangin eng nge kan zir theih? Zilhna pawm a, a ṭûl anga kan insiam ṭhat a, a zahthlâkna lai kan en khûm a nih chuan mahni ngeiin kan hlâwkpuiin, mi dangte pawhin an hlâwkpui ang. Chutianga kan tih chuan, Jehova leh kan unaute tân kan ṭangkai lehzual dâwn a ni.

8-9. Bernardo-a chu zilh a nih khân a tîrin engtin nge a awm a, a ngaihtuahna siam ṭha turin ani chu engin nge ṭanpui?

⁸ Mozambique rama awm unau Bernardo-a chunga thilthleng hi han ngaihtuah teh. Kohhran upa a nihna aṭanga chawlhtîr a ni. A tîrin unau Bernardo-a chu engtin nge a awm? Ani chuan, “Min zilhna chu pawm harsa ka tih avângin ka thinur hle,” tiin a sawi. Kohhrana unau dangte’n amah an thlîr dân tûr chu a ngaihtuahin hrehawm a ti a. “Thla eng emaw zât a liam hnuah chauh min zilhna chu a êng zâwngin ka thlîr thei a, Jehova leh a inawpna pâwl chungah rinna ka nei leh thei a ni,” tiin a sawi. Engin nge unau Bernardo-a chu a rilru put hmang thlâk danglam tûra ṭanpui?

⁹ Bernardo-a chuan a ngaihtuahna a siam ṭha a. Ani chuan: “Kohhran upa ka nih lai khân, Hebrai 12:7 hmangin unaute chu Jehova zilhna chungchângah thlîr dân dik nei tûrin ka ṭanpui ṭhîn a. Tûnah chuan heti hian ka inzâwt  a ni, ‘He Bible châng nunpui ngai hi tu nge?’ Keimah ngei pawh telin, Jehova chhiahhlawh zawng zawngte an ni,” tiin a sawi. Chumi hnuah, Bernardo-a chuan Jehova leh a inawpna pâwl chunga rinna nei leh tûrin thil dangte pawh a ti a. Bible chhiar nân leh chhût ngun nân hun tam lehzual a hmang bawk. Unau dangte thlîr dân tûr chuan a rilru la tibuai reng mah se, anni chu rawngbâwlnaah thawhpuiin, kohhran inkhâwmahte pawh chhânna a pe ṭhîn a. A hnuah, kohhran upa a rawn nih leh a ni. Unau Bernardo-a anga zilhna i tâwk a nih chuan zahthlâk i tihna chu dah bovin, zilhna chu pawm la, a ṭûl angin insiam ṭha ang che. c (Thuf. 8:33; 22:4) Chutianga i tih chuan, Jehova’n amah leh a inawpna pâwl i belh tlat avângin lâwmman a pe ang che tih i ring tlat thei a ni.

10. Inawpna pâwla eng inthlâk danglamnain nge Israel mi ṭhenkhatte rinawmna chu fiah mai thei?

¹⁰ Inawpna pâwla inthlâk danglamnate chuan kan rinawmna a fiah thei a. Kan fîmkhur loh chuan, chu chuan Jehova lak ata min ṭhen hrang thei a ni. Entîr nân, Jehova inawpna pâwla inthlâk danglamnain Mosia Dân hnuaia Israel mi ṭhenkhatte a nghawng theih dân hi han ngaihtuah teh. Dân pêk an nih hma chuan, puithiamte tih tûrte chu chhûngkaw lû berte’n an ti mai ṭhîn a. Maichâmte siamin an chhûngkaw tân Jehova hnênah inthawinate an hlân a. (Gen. 8:20, 21; 12:7; 26:25; 35:1, 6, 7; Job. 1:5) Mahse, Dân pêk an nih hnu erawh chuan, chhûngkaw lû berte chuan chûngte chu an ti thei tawh lo. Jehova chuan inthawinate hlân tûrin Arona chhûngkua aṭangin puithiamte a ruat a ni. Chu inthlâk danglamna chu hman ṭan a nih hnu chuan, Arona thlah zînga mi ni lo chhûngkaw lû berin puithiam anga thil a tih chuan tihhlum theih a ni. d (Lev. 17:3-6, 8, 9) Chu inthlâk danglamna chu Mosia leh Arona thuneihna laka Kora te, Dathana te, Abirama te, leh hotu mi 250-te hel chhan kha a ni thei ang em? (Num. 16:1-3) Chiang tak chuan kan sawi thei lo. Mahse, Kora leh amah thlâwptute chu Jehova lakah an rinawm reng lo tih erawh kan hria a ni. Inawpna pâwla inthlâk danglamnate’n kan rinawmna a fiah hunah, eng nge kan tih theih?

11. Kohatha thlah Levi-hote zînga ṭhenkhatte entawn tûr siam aṭangin eng nge kan zir theih?

¹¹ Inawpna pâwla inthlâk danglamnate chu thlâwp tlat rawh. Thlalêra an awm chhûng khân, Kohatha thlahte chuan chanvo pawimawh tak an chelh a. Israel mite’n an riahhmun an sawn apiangin, Kohatha thlah zînga ṭhenkhat chuan thuthlung bâwm chu mipui hmaah an zâwn ṭhîn a ni. (Num. 3:29, 31; 10:33; Jos. 3:2-4) Chanvo hlu a va ni êm! Mahse, Israel mite’n Ram Tiam an luah hnu chuan inthlâk danglamna a lo awm ta a. Bâwm chu sawn kual reng a ngai tawh lo. Chuvângin, Solomona lal lai khân, Kohatha thlah zînga mi ṭhenkhat chu hla satu te, kawngkhâr vêngtu te, leh sum dah khâwmna in enkawltute atâna ruat an ni. (1 Chro. 6:31-33; 26:1, 2, 24) Tûn hmaa chanvo pawimawh tak an lo chelh tawh ṭhin avângin, an chanvo chelh mêkte an sawisêl thu emaw, chanvo sâng zâwk chelh an phût thu emaw târ lanna a awm lo. Eng nge kan zir theih? I chanvo chelh mêk nghawng theitu pawh tiamin, Jehova inawpna pâwla inthlâk danglamna eng pawh chu thinlung zawng zawngin thlâwp tlat la. Eng chanvo  pawh dawng la, lâwm takin pawm ang che. Jehova hmaa i hlutna chu i chanvo dawnah a innghat lo tih hre reng rawh. Ani chuan i chanvo dawnte aiin i thuawihna chu a ngai hlu hle zâwk a ni.—1 Sam. 15:22.

12. Special pioneer thawk tûra Bethel aṭanga chhuahtîr a nih khân Unaunu Zaina-i chu engtin nge a awm?

¹² A chanvo ngaihhlut tak chân a, chanvo dang dawngtu Middle East-a awm unaunu Zaina-i thiltawn hi han ngaihtuah teh. Bethel-ah kum 23 aia tam rawng a bâwl hnuah special pioneer thawk tûra tih a ni a. Ani chuan: “Ka chanvo a inthlâk tih ka hriat chuan min ṭhâwng hle a. Ṭangkai lo nia inhriatna ka nei a, ‘Tihsual eng nge ka neih?’ tiin ka inzâwt reng a ni,” tiin a sawi. Lungchhiatthlâk takin, kohhrana unau ṭhenkhat chuan: “Ṭha taka thawk ni la chuan, inawpna pâwlin i chanvo an thlâksak nachhan tûr che a awm lo,” tiin a rilru an tihrehawm lehzual a ni. Unaunu Zaina-i chu a lunghnual êm avângin hun eng emawti chhûng chu zan tin a ṭap ṭhîn a. Mahse, ani chuan: “Jehova leh a inawpna pâwlin min hmangaihna chu ka ringhlel ngai lo,” tiin a sawi. Engtin nge Unaunu Zaina-i chu fîmkhur taka a awm zawm zêl?

13. Unaunu Zaina-i chuan a ṭha lo zâwnga ngaihtuahna a neih chu hneh tûrin eng nge a tih?

¹³ Unaunu Zaina-i chuan a ṭha lo zâwnga ngaihtuahna a neih chu a hneh thei a ni. Engtin nge? Kan thu leh hla chhuaha a harsatna tawh ang tâwkte chungchâng târ lanna thuziakte a chhiar a. February 1, 2001 chhuak, Vênnainsâng (English)-a “Lunghnualna I Do Hneh Thei!” tih thuziak chuan nasa takin a ṭanpui a ni. Chu thuziak chuan, Bible ziaktu Marka pawh chanvo dang a dawn khân rilru hrehawm taka a awm ve mai theih thu a târ lang a. Unaunu Zaina-i chuan, “Marka entawn tûr siam chu ka lunghnualna hneh thei tûra ka mamawh tak a ni,” tiin a sawi. Chu bâkah, a ṭhiante nêna an inlaichînna chu a tinghet tlat bawk a ni. Unaute kawm leh an ruala thu hrilh chu a bânsan lo va, mahni a inkhawngaih hek lo. Jehova inawpna pâwl chu thlarau thianghlimin a kaihruai tih leh hmahruaitu unaupate’n an ngaihsak tak zet tih a hria a. Chu bâkah, Pathian inawpna pâwl tâna thil pawimawh ber chu a ṭha thei ang bera Jehova hna thawh zawh hi a ni, tih a hre bawk.

14. Unau Vlado-a’n inawpna pâwla eng inthlâk danglamna nge zawm harsa a tih a, engin nge ani chu ṭanpui?

¹⁴ Slovenia rama awm kum 73 mi kohhran  upa Unau Vlado-a chuan a lawina kohhran leh kohhran dang an infin a, a inkhâwm ṭhinna Kingdom Hall khâr a nih chuan hrehawm a ti hle a. Ani chuan: “Kingdom Hall ṭha tak khâr a nih chhan kha ka hre thiam thei lo. Kan thawm ṭhat hnu lawka an khâr tâk mai avângin ka rilru a na hle. Mistiri ka ni a, Kingdom Hall chhûnga bungraw thar ṭhenkhat chu ka siam a ni a. Chu bâkah, inthlâk danglamna avângin insiamremna tam tak neih a ngai a, keini ang thuchhuahtu kum upa tawhte tân chuan thil awlsam a ni lo,” tiin a sawi. Engin nge Unau Vlado-a chu kaihhruainate thlâwp tlat tûra ṭanpui? Ani chuan: “Jehova inawpna pâwla inthlâk danglamnate mila insiamremna chuan englai pawhin malsâwmna a thlen ṭhîn. Hêng inthlâk danglamnate hian lo la awm tûr inthlâk danglamna lian zâwkte atân min buatsaih a ni,” tiin a sawi. Kohhran infinkhâwm emaw, chanvo inthlâk emaw avângin harsatna i tâwk em? Jehova chuan i rilru awm dânte a hre thiam tih ring tlat ang che. Chûng inthlâk danglamnate i thlâwp a, Jehova leh a inawpna pâwl i belh tlat chuan, malsâwmna i dawng ngei ang.—Sâm 18:25.

15. Engtin nge kohhran chhûnga harsatnate kan hmachhawn hunah kan fîmkhur zawm zêl theih?

¹⁵ He khawvêl tâwpna kan hnaih zêl rual hian, kohhran chhûngah pawh harsatnate a thleng thei a. Chûng harsatnate chuan Jehova chunga kan rinawmna a fiah thei a ni. Chuvângin, kan fîmkhur zawm zêl tûr a ni. I Kristian unau tu emawin dik lo takin a cheibâwl che nia i inhriat chuan thinur phah nân hmang suh. Zilhna i dawng a nih chuan a zahthlâkna lai chu en khûmin, zilhna chu pawm la, a ṭûl angin insiam ṭha ang che. Jehova inawpna pâwlin mi mal taka nghawng thei che inthlâk danglamna a siam hunah, thinlung taka pawmin kaihhruainate chu zâwm ang che.

16. Engtin nge Jehova leh a inawpna pâwl chu i rin tlat theih?

¹⁶ I rinawmna fiah a nih hunah Jehova leh a inawpna pâwl chu i ring tlat thei a. Mahse, chutianga ti tûr chuan, i fîmkhur zawm zêl a ngai a; chumi awmzia chu, thlamuang taka awm a, rilru fîm taka thil kan ngaihtuah a, Jehova thlîr dân anga thil kan thlîr a ngai tihna a ni. Chutiang harsatnate hlawhtling taka lo pal tlang tawh Bible-a târ lan mi ṭhenkhatte chungchâng chu zirin, an entawn tûr siamte chu ngun takin ngaihtuah la. Jehova hnênah a ṭanpuina dîlin ṭawngṭai ang che. Chu bâkah, kohhran aṭangin inla hrang ngai suh. Chutianga i tih chuan, eng thil pawh thleng se, Setana chuan Jehova leh a inawpna pâwl lakah a ṭhen hrang thei ngai lo vang che.—Jak. 4:7.