1. Engtin nge Jehova’n min hnaih a duh tih kan hriat?

 JEHOVA chuan amah hnaih tûrin min sâwm a. (Jak. 4:8) Ani chuan kan Pathian, kan Pa, leh kan Ṭhian nih a duh a ni. Kan ṭawngṭainate a chhân bâkah, hun harsate kan tawh hunah min ṭanpui a. Chu bâkah, min zirtîr tûr leh min vênghim tûrin a inawpna pâwl chu a hmang bawk. Mahse, Jehova hnaih tûrin eng nge kan tih ngai?

2. Engtin nge Jehova kan hnaih theih?

² Ṭawngṭaina te, Bible chhiarna te, leh kan thu chhiar chhût ngunnate hmangin Jehova chu kan hnaih thei a. Chutianga kan tih chuan, amah hmangaihna leh a chunga lâwmnain kan khat ang. A phu ang ngeia a thu awih tûr leh amah chawimawi tûra chêttîrin kan awm a. (Thup. 4:10, 11) Jehova kan hriat chian poh leh, amah leh min ṭanpui tûra a hman a inawpna pâwl chu kan ring lehzual ang.

3. Engtin nge Diabola’n Jehova laka min ṭhen hran a tum a, engin nge Jehova leh a inawpna pâwl kalsan ngai lo tûra min ṭanpui ang? (Sâm 31:13, 14)

³ Mahse, Diabola chuan Jehova laka min ṭhen hran a tum tlat a; a bîk takin, harsatnate kan hmachhawn hunah a ni lehzual. Engtin nge min ṭhen hran a tum? Jehova leh a inawpna pâwl kan rinna chu zawi zawia tihchhiat a tum a. Mahse, min ṭhen hran a tumnate chu kan do hneh thei a ni. Kan rinna a ngheh a, Jehova kan rin tlat chuan, amah leh a inawpna pâwl chu kan kalsan ngai lo vang.—Sâm 31:13, 14 chhiar rawh.

4. He thuziakah hian eng nge kan sawiho vang?

⁴ He thuziakah hian, Jehova leh a inawpna pâwl kan rinna tichhe theitu kohhran pâwn aṭanga kan tawh mai theih harsatna pathumte kan sawiho vang. Engtin nge chûng harsatnate  chuan Jehova laka min ṭhen hran theih? Setana’n chutianga min ṭhen hran a tumna chu engtin nge kan do hneh theih?

5. Engtin nge harsatnate’n Jehova leh a inawpna pâwl kan rinna chu a tihchauh theih?

⁵ A châng chuan chhûngte dodâlna, a nih loh leh hna chânna ang chi harsatnate kan hmachhawn a. Engtin nge chûng harsatnate chuan Jehova leh a inawpna pâwl kan rinna chu a tihchauh va, a lak ata min ṭhen hran theih? Hun rei tak chhûng harsatnate kan tawh hian, beisei bo nia inhriatna leh lunghnualna kan nei thei a. Setana chuan chu hun chu hmang ṭangkaiin, Jehova min hmangaihna chu rinhlelhtîr min tum a ni. Ani chuan kan hrehawm tawrhte chu Jehova leh a inawpna pâwl thlentîr anga ngai tûrin min duh a. Chutiang chu Aigupta rama Israel mi ṭhenkhat chungah a thleng a ni. A tîrah chuan, Jehova’n an sal tânna ata chhanchhuak tûrin Mosia leh Arona a ruat tih an pawm a. (Ex. 4:29-31) Mahse, Pharaoa’n an nun a tihhrehawm lehzual hnu chuan, Mosia leh Arona hnênah: “Keimahni min thahna tûra an kuta khandaih kentîrin, Pharaoa mit hmuhah leh a chhiahhlawhteho lakah hian huat min phurhtîr tâk avâng hian,” tia sawiin an harsatna tawhah an mawhpuh a. (Ex. 5:19-21) Pathian chhiahhlawh rinawmte chu an sawisêl a ni. A va lungchhiatthlâk tak êm! Hun rei tak chhûng hrehawm i lo tuar tawh a nih chuan, engtin nge Jehova leh a inawpna pâwl chu i rin zawm zêl theih?

6. Harsatnate chhel taka tawrh chhuah theih dân chungchângah zâwlnei Habakuka hnên aṭangin eng nge kan zir? (Habakuka 3:17-19)

⁶ Ṭawngṭaiin Jehova hnênah i thinlung leih bua la, a ṭanpuina zawng rawh. Zâwlnei Habakuka chuan harsatna tam tak a hmachhawn a. Ṭum khat chu, Jehova’n a ngaihsak tak tak leh tak tak loh a ringhlel niin a lang. Chuvângin, Jehova hnênah ṭawngṭaiin a thinlung a leih bua a. Ani chuan: “Aw LALPA, eng chen nge ka au vang a, min ngaihthlâk loh vang? . . . Engati nge . . . thiltih dik lo takte hi i en reng?” tiin a sawi a ni. (Hab. 1:2, 3) Jehova chuan thinlung taka a chhiahhlawh rinawm ṭawngṭaina chu a chhâng a. (Hab. 2:2, 3) Jehova’n a mite a lo chhanhim tawh dân ngun taka a ngaihtuah hnuin Habakuka chuan hlimna a nei leh ta a. Jehova’n a ngaihsakin, fiahna eng pawh chhel taka tuar chhuak thei tûrin a ṭanpui ang tih a ring nghet tlat a ni. (Habakuka 3:17-19 chhiar rawh.) Kan tâna zir tûr chu eng nge ni? Harsatnate i hmachhawn hunah, Jehova hnênah ṭawngṭaiin, i rilrua thil awmte chu hrilh la. Tichuan, a ṭanpuina zawng ang che. Chutianga i tih chuan, Jehova’n chhel taka tuar chhuak thei tûrin i mamawh chakna a pe ang che tih i ring tlat thei a ni. A ṭanpuina i dawng tih i inhriat hunah i rinna a nghet lehzual ang.

7. Unaunu Shirley-i chu a unaupa’n eng nge rintîr a tum a, Jehova chunga a rinna hloh lo turin engin nge ṭanpui?

⁷ I thlarau lam hun duan chu vawng tlat rawh. Harsatnate a hmachhawn laia chutianga tihnain Papua New Guinea rama awm unaunu Shirley-i a ṭanpui dân hi han ngaihtuah teh. b Shirley-i te chhûngkua chu an retheiin, ei tûr kham khawp neih loh chângte an nei a. A unaupa chuan Jehova a rinna tihchhiatsak a tum a. “Pathian thlarau thianghlimin min ṭanpui i ti a, khaw nge a ṭanpuina che chu? Kan la rethei reng a. Thu hrilin i hun i khawh ral mai mai a ni,” tiin a sawi a ni. Unaunu Shirley-i chuan: “‘Pathianin min ngaihsak nge ngaihsak lo?’ tiin ka inzâwt hial a. Tichuan, Jehova hnênah ṭawngṭai  nghâlin, ka rilrua awm zawng zawng chu ka hrilh ta vek a. Chu bâkah, Bible leh kan thu leh hla chhuahte chhiar chu ka bânsan lo va, thu hrilh rawngbâwlnaah leh inkhâwmahte pawh ka tel zawm zêl a ni,” tiin a sawi. Unaunu chuan Jehova’n an chhûngkua a ngaihsak tih a hre thiam ta thuai a. An chhûngkua chu tlachhamin an awm lo va, an hlim hle a ni. Unaunu Shirley-i chuan: “Jehova’n ka ṭawngṭainate a chhâng tih ka hria,” tiin a sawi. (1 Tim. 6:6-8) I thlarau lam hun duan i vawng tlat a nih chuan, harsatnate, a nih loh leh rinhlelhnate’n Jehova laka a ṭhen hran che chu i phal ngai lo vang.

8. Jehova inawpna pâwla mawhphurhna nei unaupate chungah eng thil nge thleng thei?

⁸ Kan hmêlmate chuan chanchin theh darhna leh social network-te hmangin, Jehova inawpna pâwla mawhphurhna nei unaupate chunga rinhlelhna kan neih theih nân dik lo takin an chanchin an theh darh a. (Sâm 31:13) Unaupa ṭhenkhat chu man leh dân bawhchhiaa puh an ni. Tirhkoh Paula’n dik lo taka puh leh man a tawh khân, kum zabi khatnaa Kristiante pawhin chutiang dinhmun chu an tawng bawk. Engtin nge an chhân lêt?

9. Tân ina tirhkoh Paula khung a nih khân Kristian ṭhenkhatin eng nge an tih?

⁹ Rom khuaa tân ina tirhkoh Paula khung a nih khân, kum zabi khatnaa Kristian ṭhenkhat chuan ani chu an thlâwp zawm ta lo a ni. (2 Tim. 1:8, 15) Engvângin nge? Chûng Kristiante chuan mipuite’n Paula chu mi sual anga an thlîr avângin an zahpui ta mai em ni? (2 Tim. 2:8, 9) A nih loh leh, anni pawhin tihduhdah an hlauh vâng a ni thei ang em? A chhan chu eng pawh ni se, Paula rilru tûr chu han ngaihtuah teh. Ani chuan, chûng unaute tân chuan hrehawm tam tak a lo tawrh tawh bâkah, a nun hial pawh a thâp tawh a ni. (Tirh. 20:18-21; 2 Kor. 1:8) Ṭanpui a ngaih lai taka Paula kalsantute ang nih chu i duh ngai lo vang u! Mawhphurhna nei unaupate’n tihduhdah an tawrh hunah eng nge kan hriat reng ang?

10. Mawhphurhna nei unaupate’n tihduhdahna an tawh hunah eng nge kan hriat reng ang?

 ¹⁰ Tihduhdahna kan tawh chhan leh a thlentîrtu chu hre reng rawh. Timothea thawn hnih 3:12-na chuan: “Tu pawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin a sawi a. Chuvângin, Setana’n mawhphurhna nei unaupate a bitum bîk chu mak kan ti tûr a ni lo. Chutianga beihna hmanga an rinawmna tihchhiat leh keini pawh hlauhna min neihtîr chu a duh a ni.—1 Pet. 5:8.

11. Onesiphora entawn tûr siam aṭangin eng nge kan zir? (2 Timothea 1:16-18)

¹¹ Mawhphurhna nei unaupate chu thlâwp zawm zêlin an chungah rinawm tlat rawh. (2 Timothea 1:16-18 chhiar rawh.) Tân ina Paula khung a nih khân, kum zabi khatnaa Kristian unau Onesiphora chuan mi dangte ang lo takin thil a ti a. Paula chuan, “Ka khaidiat bun pawh mi zahpui si lo va,” tiin a sawi. Ani chuan Paula chu zahpui ahnêkin a zawng zâwk a, a han hmuh chuan amah ṭanpui theih dân kawngte a zawng a ni. Chutiang chuan Onesiphora chuan a nun a thâp a ni. Kan tâna zir tûr chu eng nge ni? Mihring hlauhnain min hneh tûr a ni lo va, chu chuan tihduhdah tuar kan unaute ṭanpui lovin min siam tûr a ni hek lo. Chu aiin, kan unaute ṭanpui tûrin kan tih theih apiang i ti zâwk ang u. (Thuf. 17:17) Anni chuan kan hmangaihna leh ṭanpuina an mamawh si a.

12. Russia rama kan unaute hnên aṭangin eng nge kan zir?

¹² Russia rama kan unaute’n tân ina awm an Kristian unau duh takte an ṭanpui dân hi han ngaihtuah teh. Unau ṭhenkhatte chungthu rêl a nih laiin, unau tam tak chu anmahni thlâwp tûrin court-ah an va kal a ni. Kan tâna zir tûr chu eng nge ni? Mawhphurhna nei unaupate’n dik lo taka puh emaw, man emaw, a nih loh leh tihduhdah emaw an tawh hunah hlau suh ang che. An tân ṭawngṭaisakin, an chhûngte chu ngaihsak la, i thlâwpzia lantîr theih dân kawng dangte chu zawng ang che.—Tirh. 12:5; 2 Kor. 1:10, 11.

13. Engtin nge sawichhiatnain Jehova leh a inawpna pâwl kan rinna chu a tihchauh theih?

¹³ Ring lotu kan chhûngkhat te, hnathawhpui te, a nih loh leh school kalpuite chuan mite hnêna thu kan hrilh avâng leh nungchang lama Jehova tehna sâng tak mila kan nun avângin min sawichhia pawh a ni thei a. (1 Pet. 4:4) Anni chuan: “Nangmah tak hi chu ṭha ka ti che a; mahse, i sakhaw vawn hi a khirhin a hmân lai lutuk,” tiin an sawi pawh a ni thei. Mi ṭhenkhat chuan hnawhchhuah tâwkte kan cheibâwl dân avângin: “Engtin nge hmangaihna nei tak nia i insawi theih zâwk?” tiin min sawisêl mai thei bawk. Chûng an thusawite chuan kan rilruah rinhlelhna min neihtîr thei a. ‘Jehova hian ka lakah a beisei sâng lutuk em ni? A inawpna pâwl hi a khirh mah mah lo maw?’ tiin i ngaihtuah ṭan pawh a ni thei. Chutiang dinhmun chu i hmachhawn a nih chuan, engtin nge Jehova leh a inawpna pâwl chu i hnaih tlat theih ang?

14. Jehova tehnate kan zawm avânga mite’n min sawichhiat hunah engtin nge kan chhân lêt ang? (Sâm 119:50-52)

¹⁴ Jehova tehnate chu zawm tum tlat rawh. Joba chuan sawichhiat a tawh hunah pawh Jehova tehnate chu a zâwm tlat a. A ṭhian der pakhat chuan Pathian tehnate a zawm leh zawm lohvin Pathian tân awmzia a nei lo tih rintîr a tum hial a ni. (Job. 4:17, 18; 22:3) Mahse, Joba chuan chûng dâwt thute chu a ring duh lo va. Thil dik leh dik lo chungchânga Jehova tehnate chu a dik tih a hriat avângin zawm a tum tlat a ni. Mi dangte’n a rinawmna  an tihchhiat chu a phal lo. (Job. 27:5, 6) Kan tâna zir tûr chu eng nge ni? Sawichhiatnate avâng maiin Jehova tehnate chu ringhlel lo la. Nangma thiltawn ngeite chu ngaihtuah lêt ang che. Jehova tehnate chu a dikin i hlâwkpui tih i hmu fo ṭhîn a ni lâwm ni? A tehnate zâwm tlattu a inawpna pâwl chu thlâwp tum tlat ang che. Chutianga i tih chuan, eng sawichhiatna mahin Jehova lakah a ṭhen hrang ngai lo vang che.—Sâm 119:50-52 chhiar rawh.

15. Engvângin nge Unaunu Brizit-i chu sawichhiat a nih?

¹⁵ India rama awm unaunu Brizit-i thiltawn hi han ngaihtuah teh. A rinna avângin a chhûngte’n an sawichhia a. Kum 1977-a baptisma a chan hnu rei vak lo vah, ring lotu a pasal chuan a hna a chân a. Chuvângin, a pasal chuan a nupui fanaute nêna khawpui danga awm a nu leh pate hnêna insawn a tum ta a ni. Chu chuan unaunu Brizit-i tân harsatna nasa lehzual a thlen ngei ang. A pasalin hna a neih loh avângin, an chhûngkaw châwm nân hun bikima hna a thawh a ngai dâwn a. Chu bâkah, an awmna aṭanga kohhran hnai ber chu kilometer 350 (mêl 220) vêla hla a ni. Lungchhiatthlâk takin, a pasal chhûngte chuan unaunu chu a rinna avângin an dodâl a. Dinhmun chu a khirh tâk êm avângin, Unaunu Brizit-i te chhûngkua chu hmun danga an insawn leh a ngai hial a ni. Beisei loh takin a pasal chuan a boralsan zui a. A hnuah, a fanu pakhat chu kum 12 a nihin cancer natnain a boral bawk. A chhûngte chuan chûng thilthlengte chu amah vânga thleng vek nia an mawhpuh avângin, chu chuan a rilru a tihah lehzual a ni. Jehova Thuhretu ni lo se chuan, chûng chhiatnate chu an chunga a thlen loh tûr thu an sawi a. Chuti chung pawhin, Jehova a rinchhan zawm zêl a, a inawpna pâwl chu a bêl tlat a ni.

16. Unaunu Brizit-i chuan Jehova leh a inawpna pâwl a belh tlat avângin eng malsâwmnate nge a dawn?

¹⁶ Unaunu Brizit-i chu kohhran awmna aṭanga hmun hla taka a awm avângin, bial kantu chuan a awmna biala thu hril tûr leh inkhâwmte pawh in lama nei mai tûrin a fuih a. A tîrah chuan a huphurh hle a. Mahse, bial kantu thurâwn pêk ang chuan a ti a ni. Mite hnênah chanchin ṭha a hril a, inah  inkhâwmnate an nei a, a fanute chu chhûngkuaa Pathian biakna a neihpui ziah bawk. Eng nge a rah chhuah? Unaunu Brizit-i chuan Bible zirpui tam tak a nei a, an zînga eng emaw zât chuan baptisma an chang a ni. Kum 2005 khân, regular pioneer niin rawng a bâwl ṭan a. Jehova a rin tlatna leh a inawpna pâwl chunga a rinawm tlatna chu malsâwm a ni. A fanute pawhin rinawm takin Jehova rawng an bâwl a; an awmnaah chuan kohhran pahnih lai a awm tawh a. Unaunu Brizit-i chuan a harsatnate hneh thei tûr leh a chhûngte sawichhiatna chhel taka tuar chhuak thei tûrin Jehova’n chakna a pe tih a ring nghet tlat a ni.

17. Eng nge tih kan tum tlat ang?

¹⁷ Setana chuan harsatnate kan tawh laiin Jehova’n min kalsan tih ring tûr leh a inawpna pâwl thlâwpna chuan kan harsatnate a tizual mai nia ring tûrin min duh a. Mawhphurhna nei unaupate dâwta puh an nih hunah te, tihduhdah an nih hunah te, leh tân ina khung an nih hunahte hlauhna nei tûrin min duh a ni. Sawichhiatna kan tawhna hmanga Jehova tehnate leh a inawpna pâwl kan rinna tihchauh chu a duh bawk. Mahse, vervêk taka min beihnate chu kan hriat chian êm avângin bumin kan awm lo. (2 Kor. 2:11) Setana dâwt thute hnâwl a, Jehova leh a inawpna pâwl chunga rinawm chu tum tlat ang che. Jehova’n a kalsan ngai lo vang che tih hre reng rawh. (Sâm 28:7) Chuvângin, Jehova lakah eng mahin ṭhen hrang che suh se!—Rom 8:35-39.

18. A dawta thuziakah eng nge kan sawiho vang?

¹⁸ He thuziakah hian, kohhran pâwn aṭanga kan tawh mai theih harsatna pathumte kan sawiho tawh a. Mahse, kohhran chhûnga kan tawh harsatnate avâng pawhin Jehova leh a inawpna pâwl kan rinna chu fiahin a awm thei a ni. A nih chuan, engtin nge chûng harsatnate chu hlawhtling taka kan hmachhawn theih? A dawta thuziakah sawiho a ni ang.