Thilthlen dânte ka sawi hmain, hunbi kima rawngbawlna ka ṭan dân ka han hrilh ang che u.

Kum 1942-ah Caribbean thliarkâr mawi taka awm Curaçao khuaah ka piang a. Ka pa chu Suriname rama piang leh seilian ni mah se, chu thliarkârah chuan hna thawk tûrin a insawn a. Ka pian hma deuh lawkin, Curaçao khuaa Jehova Thuhretute nia baptisma chang hmasa berte zîngah a tel a. a Peih lo hle ṭhîn mah ila, kâr tin kan unauvin Bible min zirpui ṭhîn. Kum 14 ka nihin, ka pa chuan kum upa tawh tak a nu enkawl a ngaih avângin kan chhûngkuain Suriname-ah kan lêt leh a ni.

Suriname-ah chuan, ṭhahnemngai taka Jehova rawngbâwltu kohhrana ṭhalaite nên kan inkâwm ṭan a. Anni chu kei aia upa hret chauh mah ni se, regular pioneer thawk an ni. Rawngbâwlnaa an thiltawn an sawi laite chuan an hmêlah an hlimzia ka hmu thei a. Inkhâwm bânah ka ṭhiante nên Bible chungchâng kan sawiho ṭhîn a, arsite thlîr paha kan sawiho chângte pawh a awm bawk. Anni chuan Jehova rawngbâwl ka duh tih hre tûrin min ṭanpui a. Tichuan, kum 16 ka nihin baptisma ka chang a. Kum 18 ka nih chuan regular pioneer ka thawk ṭan ta a ni.

Pioneer ka thawh lai chuan thil tam tak ka zir a, chûngte chuan hunbi kima rawng ka bâwl chhûng zawngin min ṭanpui nasa hle. Entîr nân, ka thil zir hmasak berte zînga pakhat chu mi dangte zirtîr a pawimawhna hi a ni a. Pioneer ka thawh ṭan chuan, missionary Unaupa Willem van Seijl-a chuan min ngaihsak hle a. b Ani chuan kohhrana mawhphurhnate ṭha taka hlen chhuah dân min zirtîr a ni. Chutih hun lai chuan, chutiang khawpa zirtîrna ka mamawhzia chu ka inhre lo. Mahse, a kum lehah chuan special pioneer  thawk tûra tih ka ni a; chu bâkah, Suriname rama ramngaw pilril taka awm group pakhat chu ka kaihruai zui bawk. A hun taka unaupate min zirtîrna chu ka va ngaihlu tak êm! Chuta ṭang chuan an entawn tûr siam chu zuiin, ka hun neihte chu mi dangte zirtîr nân ka hmang ṭhîn a ni.

Ka thil zir pahnihna chu, samkhai taka nun leh ruahmanna felfai tak neih hi a ni. Thla thar apiangin, special pioneer ka thawhpui unaupa nên thla khat chhûnga kan mamawh tûrte chu kan ziak chhuak ṭhîn a. Tichuan, kan awmna aṭanga hla taka awm khawpuia kan mamawhte lei tûrin a tu emaw zâwk zâwk kan kal ṭhîn a ni. Thla tina ṭanpuina pawisa kan dawnte leh kan mawmawh leite chuan thla khat chhûng min daih theih nân ren thiam taka kan hman a ngai a. Ramhnuai pilril taka awm kan nih avângin, tlâkchham kan nei a nih hlauh chuan min ṭanpui theitu an tlêm hle ang. Ka tleirâwl lai aṭanga samkhai taka nun leh ruahmanna felfai tak neih dân ka zirna chuan, ka nunah Jehova rawngbâwlna ngaihven tlat tûrin min ṭanpui tih ka ring tlat a ni.

Ka thil zir pathumna chu, mi dangte hnêna an pianpui ṭawng ngeia zirtîr a hlâwkna hi a ni. Suriname ṭawng hman tlânglâwn Dutch, English, Papiamento, leh Sranantongo (Sranan tia hriat ni bawk) ṭawngte ka thiam a. Mahse, kan awmna hmunah chuan, anmahni ṭawng hman ngeia thu kan hrilh hian mite’n an dawngsawng ṭha lehzual tih ka hmu a ni. An ṭawng hman ṭhenkhat chu harsa ka ti hle a; chûng zîngah chuan thlûk sâng leh hniam hmanga sawi ngai Saramaccan ṭawng pawh a tel. Mahse, theih tâwp chhuaha ka zir hnua ka thiam tâk avângin ka hlim hle. An ṭawng hman ka thiam avângin, kum tam tak chhûng chu mi tam lehzualte hnênah thutak ka zirtîr theih phah a ni.

Thiltawn zahthlâk takte pawh ka nei a. Entîr nân, ṭum khat chu Saramaccan ṭawng hmang ka Bible zirpui hnênah a pum a na tih ka hriat avângin eng nge a an tawh tih zawh ka tum a. Mahse, nau a pai leh pai loh ka zâwt daih hi a lo nia! Ka zawhna chuan a tizak hle. Ṭawng sual châng nei mah ila, ka rawngbâwlna hmuna mite ṭawng hman thiam nâl tumin ṭan ka la chhunzawm zêl a ni.

Kum 1970 khân bial kantu nia rawngbâwl tûra tih ka ni a. Chumi kum chuan, “Visiting the World Headquarters of Jehovah’s Witnesses,” tih thlalâk dah khâwm (slide program) chhuahna hmanga thu sawiin ramhnuai pilrila awm group tam tak chu ka tlawh a. Unaute awmna hmun thleng tûrin, thinga siam lawnglêng sei takah chuangin ramhnuai pilrila lui chu kan zawh a. Kan chuanna lawng chu generator te, awlsam têa ken sawn theih gas bûr te, khawvâr te, leh thlalâk chhuahna tûr hmanruatein a khat a. Kan kal tumna hmun kan han thlen chuan, chûng kan thil phurh zawng zawngte chu slide program kan chhuahna tûr hmunah chuan kan thiar phei a. Hmun kilkhâwra awm kan unaute’n program-te hmuhnawm an tihzia kha ka theihnghilh thei lo. Mite hnêna Pathian Jehova leh lei lama a inawpna pâwl chungchâng ka zirtîr theih avângin ka hlim hle. Jehova rawng ka bâwlnaah hian, tisa lama ka inpêknate chu thlarau lama  malsâwmna ka dawnte nêna khaikhin chuan eng tham mah a ni lo.

Nupui ka neih lohna chuan ka rawngbâwlnaah mawhphurhnate hlen a tiawlsam lehzual tih hre mah ila, dam chhûng atâna kawppui tûr mamawh nia inhriatna ka nei a. Chuvângin, ramhnuai pilril taka hunbi kima rawngbâwlna hautak zet chu chhel taka min thawhpui theitu tûr nupui dîlin ka ṭawngṭai ṭan a. Kum khat vêl a liam hnu chuan, mahni inpêkna rilru put hmang nei tak special pioneer Unaunu Ethel-i nên kan intawng ta a. Naupang tê a nih lai aṭangin, Ethel-i chuan tirhkoh Paula chu a ngaisâng hle a, amah anga Kristian rawngbâwlnaa inhman a duh a ni. Kum 1971 September thlaah kan innei a, kan nupain bial kan hna kan thawk ṭan ta a ni.

Ethel-i hi sam khai taka nung chhûngkuaa seilian a nih avângin, ramhnuai pilrila bial kan hna thawk tûr pawhin a insiamrem zung zung thei a ni. Entîr nân, ramhnuaia awm kohhrante tlawh tûra kan inbuatsaih hian, kan mamawh zualpuite chauh kan keng ṭhîn a. Luiah insuin, kan inbual ṭhîn a ni. Unaute’n ei tûr min chhawp apiang—laiking chikhat iguana emaw, piranha sangha emaw, a nih loh leh ramhnuai leh luia an man eng pawh kan ei mai ṭhîn. Thlêng a awm loh chuan, balhla hnah chu thlêngah kan hmang ṭhîn a. Fian a awm loh chuan, kutin chaw kan ei ṭhîn. Ethel-i nên hian Jehova rawngbâwlnaa kan thawh dunna chuan kan nupa inlaichînna leh Jehova nêna kan inlaichînna a tinghet lehzual tih kan hria a. (Thur. 4:12) Chu chu eng thil nên mah kan thleng ngai lo vang!

A tîr lama ka sawi tâk kan thiltawn kha ramhnuai hmun kilkhâwr taka awm unaute kan tlawh ṭuma haw lama kan thiltawn a ni a. Lui tui khauhna lai kan thlen chuan, kan chuanna lawng chu rei lo tê a pil a; mahse, kan lâng lehnghâl thuai a. Vânneihthlâk takin life jacket kan ha a, tu mah lawng aṭanga tla kan awm lo.  Mahse, kan lawngah chuan tui a lût nasa hle a. Bâwm chhûnga ei tûr kan dahte chu paih chhuakin, chûng bâwmte chu lawng chhûnga tui paih chhuah nân kan hmang a ni.

Ei tûr kan neih tâk loh avângin, lui zawh zêl chungin sangha man kan tum ṭan a. Mahse, pakhat mah kan man lo. Tichuan, chumi nîa kan ei tûr min pe tûrin Jehova hnênah ṭawngṭaiin kan dîl ta a. Kan ṭawngṭai zawha unaupate zînga pakhatin nghakuai a han chiah chuan, chumi zâna mi pangain duh tâwka kan ei khawpa lian a man ta a ni.

Kum li lai bial kantu hna kan thawh dun hnu chuan, beisei loh tak malsâwmna dawngin Ethel-i’n nau a pai a. Chu chuan kan rawngbâwlna a nghawng dân tûr hre lo mah ila min tihlim hle. A theih phawt chuan, kan nupa hian hunbi kima rawngbâwl reng chu kan duh hle a. Kum 1976 khân kan fapa Ethniël-a a piang a. A hnu kum hnih leh a chanveah a nau Giovanni-a a piang ve leh a ni.

Chutih lai chuan Suriname ramah mamawhna a nasat êm avângin, branch office chuan kan fate enkawl paha bial kan hna thawk zawm thei tûrin ruahmanna min siamsak a. Kan fapate an rawn tleirâwl chhoh chuan, thuchhuahtu tlêm zâwk awmna bialte kan tûra tih ka ni a. Chu chuan thla khatah kâr hnih chhûng vêl bial kantu anga rawng ka bâwl hnua kan awmna kohhrana pioneer anga rawngbâwl zawm theihna min neihtîr a ni. Ka nupui leh kan fate chuan kan awmna bul hnaia kohhrante ka tlawh hian min ṭawiawm ṭhîn a. Amaherawhchu, ramhnuai pilrila awm kohhrante kan emaw, bial inkhâwmpui hmanpui emaw a ngaih hunah erawh chuan keimahin ka kal ṭhîn.

Ka mawhphurhnate hlen thei tûr chuan fîmkhur taka ruahmanna ka siam a ngai a. Chhûngkuaa Bible zirna kan neih ziah theih nân ruahmanna ka siam a. Ramhnuai pilrila awm kohhrante ka tlawh hlân chuan, Ethel-i chuan kan fapa pahnihte chu chhûngkuaa Bible zirna a lo neihpui ṭhîn a. Mahse, a theih phawt chuan chhûngkuain thil kan tiho ṭhîn. Kan fate nên intihhlimna kan nei ṭhîn a—a châng chuan games kan khelhpui a, kan in bul hnaia awm hmun tlawh châkawm tak takte chu kan tlawhpui ṭhîn bawk. Theocratic mawhphurhnate inbuatsaih nân zân rei tak thleng ka meng ṭhîn a. Ethel-i chu Thufingte 31:15-a târ lan nupui ṭha tak  angin, kan fate school kal hmaa chhûngkuaa ni châng kan chhiarho theih nân leh zîng chaw kan eiho theih nân khaw vâr hmain a tho ṭhîn a ni. Jehova min pêk mawhphurhnate hlen thei tûra englai pawha min ṭanpuitu nupui inpe zo tak ka neih avâng hian ka lâwm hle!

Nu leh pa kan nih angin, kan fate chu Jehova hmangaih tûr leh Kristian rawngbâwlna ngaina tûra ṭanpuiin theih tâwp kan chhuah a. Nu leh pate’n ti tûra kan duh vâng ni lo va, anmahni duh thu ngeia kan fate’n hunbi kima rawng an bâwl chu kan duh a. Hunbi kima rawngbâwl a hlimawmzia kan hrilh fo ṭhîn. Kan harsatna tawhte sawi hmaih si lovin, Jehova’n chhûngkua anga min ṭanpui dân leh mal min sâwm dânte chu kan sawipui ṭhîn a. Kan fate chu an nuna Jehova dah hmasatute ṭhiana siam tûrin kan ṭanpui bawk.

Jehova chuan kan fate enkawl seilennaa kan mamawh zawng zawng min pe a. Ka chhûngkua ṭanpui tûrin theih tâwp ka chhuah a. Nupui ka neih hmaa special pioneer nia rawng ka bâwl laia ka thiltawnte chuan kan tisa lam mamawhte atâna inruahman lâwk dân min zirtîr a ni. Chutih rual chuan, kan inren hle chung pawha kan mamawhte kan neih vek theih loh chângte erawh a awm tho va. Chutiang hunah chuan, Jehova’n min ṭanpui ṭhîn tih ka hria. Entîr nân, kum 1986-1992 inkâr khân Suriname ramah tualchhûng buaina a chhuak a. Chûng kum chhûngte chuan, kan mamawh zualpuite neih ringawt pawh a harsa hle a. Chutiang harsatna kârah pawh, Jehova’n kan mamawhte chu min pe ṭhîn a ni.—Mt. 6:32.

Jehova chuan englai pawhin min ngaihsak reng a, hlimna leh lungawina nei tûrin min ṭanpui ṭhîn a ni. Kan fate hian min tihlim tak zet a, Jehova rawngbâwl tûra kan enkawl seilen theih avângin kan lâwm hle. Hunbi kima rawngbâwl tûra an thu tlûkna siam avâng pawhin kan lâwm hle bawk. Kan fapa Ethniël-a leh Giovanni-a te chu Lalram Chanchin Puang Chhuaktute School-ah an kal tawh a, tûnah hian an nupuite nên Suriname branch office-ah rawng an bâwl mêk a ni.

Ethel-i nên hian upa tawh hle mah ila, special pioneer nia Jehova rawngbâwlin theih tâwp kan la chhuah zâwm zêl a. Tui hleuh pawh zir hman lo khawpin rawngbâwlnaah ka buai a. Mahse, inchhîrna ka nei lo. Ka’n thlîr lêt hian, ka tlêirâwl lai aṭanga hunbi kima rawngbâwl ka lo thlang kha duh thlanna ka siam theih azawnga ṭha ber a ni tih ka ring nghet tlat a ni.