1-2. (a) Eng zawhnate nge kan sawiho vang? (b) Jehova’n min ṭanpui a duhzia engin nge târ lang?

 JEHOVA chuan nuna harsatnate chhel taka tuar chhuak thei tûr leh a rawngbâwlna thianghlima hlimna nei tûrin min ṭanpui thei a ni. Eng kawngtein nge min ṭanpui? Engtin nge Jehova ṭanpuinate chu kan hlâwkpui tak zet theih? Chûng zawhnate chu he thuziakah hian chhân a ni ang. Mahse, a chhânnate kan sawiho hmain, chumi nêna inkûngkaih he zawhna: Jehova chuan min ṭanpui a duh tak zet em? tih hi i lo ngaihtuahho vang u.

² Hebrai mite hnêna a lehkhathawna tirhkoh Paula thu mal hman chuan a chhânna hre tûrin min ṭanpui thei a ni. Paula chuan: “Lalpa chu mi ṭanpuitu a ni, ka hlau lo vang; mihringin eng nge mi tih theih ang?” tiin a ziak a. (Heb. 13:6) Bible lehlin pakhat chuan he Bible chânga hman, “ṭanpuitu” tih thu mal hi, tu emaw ṭanpui tûra hmanhmawh taka pantu sawina a nih thu a târ lang. Jehova chu mangang taka awm tu emaw chhan chhuak tûrin a hmanhmawh hle angah han mitthla teh. Chu chuan min Ṭanpuitu nih a inhuamzia—a duhzia—a târ lang chiang hle tih i pawm ngei ang. Jehova’n min ṭanpui hian fiahnate chu hlim takin kan tuar chhuak thei a ni.

3. Fiahnate hlim taka tuar chhuak thei tûra Jehova min ṭanpui dân kawng thumte chu eng nge ni?

³ Fiahna kan tawhte hlim taka tuar chhuak thei tûra Jehova min ṭanpui dân kawng ṭhenkhat chu engte nge ni? A chhânna hriat nân, Isaia bu hi i lo en ang u. Engvângin nge? Zâwlnei Isaia hnêna Jehova puan chhuah hrilh lâwkna tam tak chu tûn laia Pathian chhiahhlawhte tân pawh a nih vâng a ni. Chu bâkah, Isaia chuan Jehova chungchâng chu awlsam taka kan hriatthiam theih tûr ṭawngkamte hmangin a târ lang fo va. Entîr nân, Isaia  bung 30-na hi lo en ta ila. Chutah chuan, Isaia’n chiang taka kan mitthla theih tûr ṭawngkamte hmangin Jehova’n a mite kan nih anga (1) kan ṭawngṭaina ngun taka ngaithlaa min chhânna hmangin, (2) kaihhruaina min pêkna hmangin, leh (3) tûna malsâwmna min pêkte leh nakina min la pêk tûrte hmanga min ṭanpui dânte chu a târ lang a ni. Jehova min ṭanpui dân kawng thumte chu i lo bih chiang ang u.

4. (a) Engtin nge Jehova’n Isaia hun laia Juda mite chungchâng chu a târ lan a, a hnuah eng thil nge a thlen a phal? (b) Jehova’n mi rinawmte hnênah eng beiseina nge a pêk? (Isaia 30:18, 19)

⁴ Isaia bung 30-na tîr lamah, Jehova chuan Juda mite chu ‘sual chunga sualna belhchhahtu’ “fa hel hmangho,” tiin a sawi a. Chumi hnuah: “Chûngho chu mi hel hmang te, . . . LALPA dân ngaithla duh lo te an ni,” tiin a sawi zawm a ni. (Is. 30:1, 9) Judate’n a thu an ngaihthlâk duh loh avângin, Jehova chuan hrehawm an tawrh a phal tûr thu Isaia’n a sawi lâwk a. (Is. 30:5, 17; Jer. 25:8-11) Sawi lâwk ang ngeiin, anni chu Babulon sala hruai an ni a. Mahse, Judate zîngah chuan mi rinawm ṭhenkhat an awm a, chûng mite tân chuan Isaia’n beiseina thuchah a nei a ni. Ani chuan engtik nîah emaw Jehova’n Jerusalemah a kîrtîr leh ang tih a hrilh a. (Isaia 30:18, 19 chhiar rawh.) Chutiang chiah chuan a thleng a ni. Jehova chuan Babulon aṭangin a chhuah zalên a. Mahse, chutianga chhuah zalen chu an ni nghâl mai lo. “LALPA chuan a khawngaih theihna tûr che uin a nghâk ang,” tih thu chuan mi rinawmte chhanchhuah an nih hmain hun eng emaw chen a liam tûr thu a târ lang a. Dik tak chuan, sal tâng a la bângte Jerusalema an kîr leh hmain Israel mite chu kum 70 chhûng Babulon salah an tâng a ni. (Is. 10:21; Jer. 29:10) An rama an han kîr leh chuan, sal tânna avânga an lungngaihna mittuite chu lâwmna mittuiah a chang ta a ni.

5. Isaia 30:19-nain eng thu nge min tiam?

⁵ Tûn laiah pawh: “Ṭanpui dîla in au thâwm a hriat chuan a lainat ngei ang che u,” tih thu aṭang hian thlamuanna kan hmu thei a. (Is. 30:19 C.L. Re-edited.) Isaia chuan ṭanpuina dîla kan auh hunah Jehova’n ngun takin min ngaihthlâksak ang tih min tiam a. “A hriat veleh a chhâng ang che u,” tiin a sawi belh bawk. Min tichak thei tak chûng thute chuan, Pathianin amah autute ṭanpui chu a duh—a châk hle—tih min hriat nawntîr a. Chumi hriatna chuan kan harsatnate hlim taka tuar chhuak tûrin min ṭanpui a ni.

6. Engtin nge Isaia bu-a thute chuan Jehova’n a chhiahhlawh tinte ṭawngṭaina a ngaihthlâksak tih a târ lan?

⁶ He Bible châng aṭang hian kan ṭawngṭaina chungchângah eng thutiam dang nge kan hmuh? Jehova chuan mi mal tinte ṭawngṭaina chu ngun takin a ngaihthlâksak a ni. Engvângin nge chutianga kan sawi theih? Isaia bung 30-na tîr lamah, Jehova’n a mite chu a huho anga a sawi avângin, pakhat aia tam sawina “in” tih thu mal hman a ni a. Mahse, a tîra ziakah chuan châng 19-naah hian mi pakhat sawina, “i” tih thu mal hman a ni. Hebrai ṭawnga an thu mal hman chuan, chu thuchah chu mi mal tin tân a ni tih a tar lang a. Isaia’n: ‘I [mi pakhat sawina] ṭap leh tawh lo vang;’ ‘a khawngaih ngei ngei ang che [mi pakhat sawina];’ ‘a chhâng ang che [mi pakhat sawina],’ tia a sawi hian, Jehova’n mi mal tinte ṭawngṭaina a ngaihthlâksak tih a sawina a ni. Jehova chu hmangaihna nei tak pa a ni a; chuvângin, lunghnual taka awm a fapa emaw, a fanu emaw chu, “I unaupa, a nih loh leh i unaunu angin i chak tûr a ni,” tiin a hrilh lo. Ani chuan min ngaihsak ṭheuhvin, kan ṭawngṭainate chu ngun takin min ngaihthlâksak zâwk a ni.—Sâm 116:1; Is. 57:15.

7. Engtin nge Isaia leh Isua’n ṭawngṭaia dîl ngut ngut a ṭûlzia an sawi uar?

⁷ Kan lungkhamnate Jehova hnêna ṭawngṭaia kan thlen hian, tuar chhuak thei tûra kan  mamawh chakna min pein min chhâng nghâl vat pawh a ni thei. Fiahnate chu kan beisei anga a tâwp nghâl mai lo a nih pawhin, tuar chhuak thei tûrin Jehova hnênah chakna kan dîl nawn fo a ngai thei a. Ani chuan chutianga ti tûr chuan min sâwm a ni. Chu chu Isaia thusawi: “LALPA . . . chu awm hle hletîr hlek suh u,” tih thu aṭang hian a hriat theih a ni. (Is. 62:6, 7) Chumi awmzia chu eng nge ni? Jehova hnêna ṭawngṭaia kan dîl ngut ngut a ngaih avângin, ani chu awm hle hle thei lovin kan siam tihna ang a ni. Isaia thusawite chuan Luka 11:8-10, 13-naa kan hmuh ṭawngṭaina chungchânga Isua tehkhinthute chu min hriat chhuahtîr a. Chutah chuan, Isua’n ṭawngṭaia “dîl ngut ngut” tûr leh thlarau thianghlim “dîl” zawm zêl tûrin min fuih a ni. Jehova hnênah thu tlûkna ṭha siam thei tûra kan mamawh kaihhruaina min pe tûrin kan ngên thei bawk.

8. Engtin nge Isaia 30:20, 21-a thute chu hmân laia a thlen famkim?

⁸ Isaia 30:20, 21 chhiar rawh. Babulon sipai rualin kum khat leh a chanve chhûng Jerusalem an hual khân, mite hrehawm tawrhna chu a nasat êm avângin thil pângngaiah a chang hman hial a ni. Mahse, châng 20 leh 21-naa sawi angin, Jehova chuan Judate chu an inchhîr a, an nungchang an thlâk a nih phawt chuan, a chhan chhuah tûr thu a tiam a. Jehova chu an “zirtîrtute,” b angin a sawi a, chu chu anmahni “Zirtîrtu Ropui Ber [NWT]” a ni tihna a ni. Isaia chuan mite chu Jehova’n a pawm tlâka amah an biak dân a zirtîr tûr thu a tiam a. Chûng thute chu an sal tânna ata Juda mite chhuah zalên an nih khân a thleng famkim a. Jehova chuan an tâna Zirtîrtu Ropui Ber a nihzia a lantîr a, a kaihhruaina hnuaiah a mite chuan hlawhtling takin biakna dik an din ṭha leh thei a ni. Tûn laiah pawh, Jehova chu kan tâna Zirtîrtu Ropui Ber a nih avângin kan hlim hle.

9. Tûn laia Jehova kaihhruaina kan dawn dân kawng khat chu eng nge ni?

⁹ Entîr nei ṭawngkam chu hmang chhun zawmin Isaia chuan Jehova zirtîrna dawngtu zirlaite kan nih dân kawng hnih a sawi a. Pakhatnaah, Isaia’n: “In mitin in [Zirtîrtu Ropui Ber] chu a hmu zâwk tawh ang,” tiin a sawi. He tehkhin thu-ah hian, Zirtîrtu chu a zirlaite hmaa ding anga târ lan a ni a. Tûn laia Jehova zirtîrna kan hlâwkpui thei hi chanvo hlu tak a ni. Engtin nge min zirtîr? A inawpna pâwl hmangin min zirtîr a ni. Chumi aṭanga kan dawn kaihhruaina chiang takte avângin kan va lâwm tak êm! Kohhran inkhâwmte leh inkhâwmpuite  bâkah, kan thu leh hla chhuah te, JW Broadcasting^® te, leh kawng dang tam taka kan dawn kaihhruainate chuan harsatna kan tawhte chu hlim taka tuar chhuak thei tûrin min ṭanpui a ni.

10. Eng kawngin nge “[kan] hnung lama thu” chu kan hriat?

¹⁰ Isaia chuan Jehova min zirtîr dân kawng hnihna chu heti hian a sawi a ni: “In bengin in hnung lama thu . . . a hre zêl ang,” tiin. Zâwlnei chuan hetah hian Jehova chu zirtîrtu ṭha tak, zirlaite hnung lam aṭanga an kalna tûr kawhhmuhtu leh kaihruaitu angin a târ lang a. Tûn laiah pawh, Pathian aw chu kan hnung lam aṭangin kan hre thei a ni. Engtin nge? Thlarauva thâwk khum Pathian thute chu hun rei tak aṭang tawh khân Bible-a chhinchhiah a ni a. Chuvângin, Bible kan chhiar hian Pathian aw chu kan hnung lam aṭanga hria ang kan ni.—Is. 51:4.

11. Hlim taka rawngbâwl zawm zêl thei tûrin eng tih dân pahnih nge kan zui ngai a, engvângin nge?

¹¹ Engtin nge Jehova inawpna pâwl leh a Thu, Bible aṭanga kan dawn kaihhruainate chu kan hlâwkpui pumhlûm theih? Isaia sawi thil pahnih hi lo chhinchhiah teh. Pakhatna, “hei hi kawng a nih hi.” Pahnihna, “tah hian kal rawh u.” (Is. 30:21) “Kawng” hriat chu a tâwk mai lo. Chutah chuan kan “kal” a ngai a ni. Jehova Thu, Bible chu a inawpna pâwl hmanga hrilhfiah a nih avângin kan laka a phûtte chu kan hre thei a. Kan thu hriatte nunpui dân pawh kan hre bawk. Hlim taka Jehova rawngbâwl zawm zêl thei tûr chuan, chu tih dân pahnih chu kan zui a ngai a. Chutianga kan tih chauhvin, Jehova malsâwmnate kan dawng ang tih kan chiang thei a ni.

12. Isaia 30:23-26-a kan hmuh angin, engtin nge Jehova’n a mite chu mal a sâwm?

¹² Isaia 30:23-26 chhiar rawh. Engtin nge he hrilh lâwkna hi Babulon aṭanga Israel rama kîr leh Juda sal tângte chunga a thlen famkim? Anni chuan tisa lam leh thlarau lamah malsâwmna nasa tak an dawng a. Jehova chuan a mite chu ei tûr tam tak a pe a ni. Mahse, chu aia pawimawh zâwk chu, zawi zawia biakna dik din ṭhat leh a nih laia thlarau lam chaw hnianghnâr tak pea mal a sâwm kha a ni a. Pathian mite chuan chutiang taka malsâwmna nasa chu tûn hmain an la dawng ngai lo. Châng 26-na chuan, Jehova’n a Thu an hriatthiam theih nân êng nasa lehzual a pêk thu a târ lang a. (Is. 60:2) Jehova malsâwmnate chuan a chhiahhlawhte chu ‘thinlunga lâwmna’ a neihtîr avângin, hlim tak leh rilru nghet taka a rawngbâwl zawm zêl tûrin a ṭanpui a ni.—Is. 65:14.

13. Engtin nge din ṭhat lehna chungchânga hrilh lâwkna chu tûn laiah a thlen famkim?

 ¹³ Biakna thianghlim din ṭhat lehna chungchânga hrilh lâwkna chuan tûn laia Pathian mite nên inzawmna a nei em? Nei teh rêng mai! Eng kawngin nge? Kum 1919 aṭang khân, mi maktaduai tam tak chu khawvêl sakhaw dik lo lalram, Babulon Khaw Ropui aṭanga chhuah zalên an ni a. Anni chu Pathianin Israelte hnêna a pêk Ram Tiam aia hmun ṭha zâwkah hruai luh an ni a. Thlarau lam paradis-ah hruai luh an ni. (Is. 51:3; 66:8) Chu thlarau lam paradis chu eng nge ni?

14. Thlarau lam paradis chu eng nge ni a, tûn laiah chutah chuan tute nge chêng? (Ṭawngkam Hrilhfiahna chu en rawh.)

¹⁴ Kum 1919 aṭang khân, hriak thih Kristiante chu thlarau lam paradis-ah an chêng a. c Hunte a liam zêl chuan, lei lam beiseina nei “berâm dang” pawh chu thlarau lam paradis-ah chuan awmin, Jehova malsâwmna tam tak an dawng a ni.—Joh. 10:16; Is. 25:6; 65:13.

15. Thlarau lam paradis chu khawiah nge a awm?

¹⁵ Thlarau lam ram, a nih loh leh thlarau lam paradis chu tûn laiah khawiah nge a awm? Jehova chibai bûktute chu khawvêl hmun tinah an awm a. Chuvângin, an awmna thlarau lam paradis pawh khawvêl pumah a awm a ni. Tûn laiah hian khawi hmunah pawh awm mah ila, tih tak zeta biakna dik kan thlâwp chhûng chuan thlarau lam paradis-ah kan awm thei a ni.

16. Engtin nge thlarau lam paradis mawina chu kan hmuh zawm zêl theih?

¹⁶ Thlarau lam paradis-a awm reng thei tûr chuan, thil dangte bâkah, khawvêl pum huapa Kristian kohhran ngaihhlutna thûk tak kan nei reng tûr a ni. Chu chu engtin nge kan tih theih? Chuta chêngte ṭhat famkim lohna ni lovin, an mawinate ngaihven tlatna hmangin kan ti thei a ni. (Joh. 17:20, 21) Engvângin nge chu chu thil pawimawh tak a nih? He khaikhinna hi han ngaihtuah teh. Ramngaw mawi takah chuan thingkûng chi hrang hrang hmuh kan beisei ngei ang. Chutiang bawkin, tûn laia kohhranahte hian thingkûngte nêna khaikhin theih kohhran timawitu mi chi hrang hrang an awm a. (Is. 44:4; 61:3) Kan bul hnaia awm ‘thingkûngte’  mawi lohna lai ni lovin, “ramngaw” mawina chu kan ngaihven tlat zâwk tûr a ni. Kan ṭhat famkim lohna emaw, unaute ṭhat famkim lohna emawin khawvêl pum huap Kristian kohhran inpumkhat tak mawina hmu thei lo khawpa min tihbuai chu kan phal tûr a ni lo.

17. Kohhrana inpumkhatna awmtîr tûrin mi tinin eng nge an tih theih?

¹⁷ Kohhrana inpumkhatna awmtîr tûrin mi tinin eng nge kan tih theih? Remna siamtu kan nih a ngai a ni. (Mt. 5:9; Rom 12:18) Kohhrana unaute nêna inrem taka awm tûra hma kan lâk apiang hian, thlarau lam paradis mawina chu kan belhchhah tihna a ni a. Jehova chuan thlarau lam paradis-a awm mi tinte chu biakna thianghlimah a hîp tih kan hre reng tûr a ni. (Joh. 6:44) A ngaihhlut êm êm a chhiahhlawhte zînga remna leh inpumkhatna tinghet tûra theih tâwp kan chhuah a hmuh huna a hlim dân tûr chu han mitthla teh!—Is. 26:3; Hag. 2:7.

18. Eng nge kan chhût ngun fo vang a, engvângin nge?

¹⁸ Engtin nge Pathian chhiahhlawhte kan nih anga malsâwmna kan dawnte chu kan hlâwkpui tak zet theih? Bible leh Bible ṭanchhan thu leh hla chhuahte hmanga kan thu zirte chu ngun takin kan ngaihtuah thei a. Chutianga zirna leh chhût ngunna chuan, kohhrana “unaute hmangaih” tûr leh ‘hmangaih taka inlainat tawn’ tûra min chêttîrtu Kristian miziate nei tûrin min ṭanpui ang. (Rom 12:10) Tûna malsâwmna kan dawnte kan chhût ngunnain, Jehova nêna kan inlaichînna a tinghet lehzual a. Nakina kan dawn tûr Jehova malsâwmnate kan chhût ngunnain, chatuana a rawngbâwl kan beiseina chu a titak lehzual a ni. Chûngte chuan tûna Jehova rawng kan bâwlnaah hlimna nei lehzual tûrin min ṭanpui ang.

19. (a) Isaia 30:18-a sawi angin, eng nge kan rin tlat theih? (b) Harsatnate hlim taka tuar chhuak thei turin engin nge min ṭanpui ang?

¹⁹ Jehova’n he khawvêl suaksual tak hi a tihtâwp hunah, ani chu kan tân a “ding chhuak ang.” (Is. 30:18) Jehova chu “rorêl felna Pathian” a ni tih leh ani chuan Setana khawvêl chu a remtih chin bâk awm a phal lo vang tih kan ring tlat a ni. (Is. 25:9) Lo thleng tûr chhandamna nî atân Jehova chu dawhthei takin kan nghâk a. Chu hun a lo thlen hma chuan ṭawngṭai te, Bible zir leh nunpui te, leh malsâwmna kan dawnte chhût ngun theihna chanvo hlute chu ngaihhlut zawm zêl kan tum tlat a ni. Chutianga kan tih chuan, Jehova’n amah kan biaknaa ka tawh harsatnate chu hlim taka tuar chhuak thei tûrin min ṭanpui ang.