1. Eng nge kan beisei theih a, eng nge kan rin tlat theih?

 KAN thu hrilh rawngbâwlnaah hian dodâlna kan hmachhawn ang tih kan beisei thei a. Chutiang dodâlna chu a nasa chho zêl pawh a ni thei. (Dan. 11:44; 2 Tim. 3:12; Thup. 16:21) Mahse, Jehova’n kan mamawh ṭanpuina min pe ang tih kan ring tlat thei a ni. Engvângin nge? Jehova chuan a chhiahhlawhte hnêna a pêk mawhphurhna chu eng anga harsa pawh ni se, hlen chhuak tûrin a ṭanpui reng ṭhîn. Chumi hre chiang tûr chuan, Babulona Juda sal tângte hnêna thu hriltu zâwlnei Ezekiela nuna thilthleng ṭhenkhat chu i lo ngaihtuahho vang u.

2. Engtin nge Jehova’n Ezekiela rawngbâwlna biala mite chu a târ lan a, he thuziakah hian eng nge kan sawiho vang? (Ezekiela 2:3-6)

² Ezekiela thu hrilhna biala mite chu eng ang mi nge an nih? Jehova’n anni chu mi “luhlul leh tihmawhte” leh “helhmang” an nih thu a sawi a. Hlîng anga mi tina thei leh khawmualkaikuang anga hlauhawm an ni. Chuvângin, Jehova’n Ezekiela hnêna: “Hlau suh,” tia a hrilh nawn fo pawh hi a mak lo ve! (Ezekiela 2:3-6 chhiar rawh.) Ezekiela’n a thu hrilh rawngbâwlna a hlen theih chhan chu, (1) Jehova mi tirh a nih vâng te, (2) Pathian thlarauvin a tihchak vâng te, leh (3) Pathian Thuin a tihchak vângte a ni. Engtin nge chûng thil pathumte chuan Ezekiela a ṭanpui? Chu chuan tûn laiah engtin nge min ṭanpui?

3. Eng thute’n nge Ezekiela chu tihchak a, chu chuan Jehova’n a ṭanpui ngei dâwn tih engtin nge a rinnghehtîr?

³ Jehova’n Ezekiela chu: “Ka tîr a che,” tiin a hrilh a. (Ezek. 2:3, 4) Chu thu chuan Ezekiela a tichak ngei ang. Engvângin  nge? Ani chuan Jehova’n a zâwlnei atâna Mosia leh Isaia a thlan laia chûng thu a lo hman tawhnate chu a hriat chhuah ngei a rinawm. (Ex. 3:10; Is. 6:8) Chu bâkah, harsatnate hneh thei tûra chûng zâwlnei pahnihte a ṭanpui dân pawh a hre ngei bawk ang. Chuvângin, Jehova’n a hnêna: “Ka tîr a che,” tia vawi hnih lai a hrilh khân, Jehova’n a ṭanpui ang tih rinna tûr chhan ṭha tak a nei a ni. Jehova’n a biak khân, Ezekiela chuan ṭum eng emaw zât: “LALPA thu chu ka hnênah a lo thleng a,” tih a sawi. (Ezek. 6:1) Chu bâkah: “LALPA thu chu ka hnênah a lo thleng leh a,” tiin vawi tam tak a sawi bawk. (Ezek. 12:1) Chuvângin, Ezekiela chuan Jehova mi tirh a ni tih a inhre chiang a ni. Chu bâkah, Ezekiela pa chu puithiam a ni a. Ani chuan Ezekiela hnênah Jehova’n a zâwlneite chu eng lai pawha ṭanpui a tiam thu a hrilh ngei a rinawm. Jehova chuan Isaaka te, Jakoba te, leh Jeremia te hnênah pawh: “I hnênah ka awm,” tiin a lo hrilh tawh ṭhîn a ni.—Gen. 26:24; 28:15; Jer. 1:8.

4. Eng thu thlamuanthlâk takte’n nge Ezekiela chu tichak ang?

⁴ Engtin nge Israel mi a tam zâwkin Ezekiela thu hrilh chu an chhân lêt? Jehova chuan: “Israel chhûngte chuan an ngaithla lo vang che, kei mi ngaithla dâwn si lo va,” tiin a sawi. (Ezek. 3:7) Mite chuan Ezekiela thusawi pawm duh lohna hmangin Jehova an hnâwl a ni. Chûng thute chuan mite’n a thu sawi an pawm duh loh chhan chu zâwlnei a nih anga a mawhphurhna a hlen loh vâng a ni lo tih a hriat chiantîr ngei ang. Jehova chuan Ezekiela chu a thu puan chhuah anga rorêlna a thlen hunah, mite chuan “an zîngah zâwlnei a awm tih an hre” dâwn tih a hriat chiantîr bawk. (Ezek. 2:5; 33:33) Chûng thu thlamuanthlâk takte chuan Ezekiela chu a rawngbâwlna hlen tûra a mamawh chakna a neihtîr ngei ang.

5. Isaia 44:8-a sawi angin, khawi aṭangin nge chakna kan neih?

⁵ Keini pawhin Jehova mi tirh kan ni tih inhriatna aṭangin chakna kan nei a. A thu “hriatpuitute” tia min kovin, min chawimawi a ni. (Is. 43:10) Chu chu chanvo hlu a va ni tak êm! Jehova’n Ezekiela hnêna: “Hlau suh,” tia a fuih angin, keini pawh: “Ṭih hek suh u,” tiin min fuih a ni. Engvângin nge min dodâltute hlauh nachhan tûr kan neih loh? Ezekiela ang bawka Jehova mi tirh kan nih vâng leh a ṭanpuina kan dawn vâng a ni.—Isaia 44:8 chhiar rawh.

6. (a) Engtin nge Jehova’n min ṭanpui a tiam? (b) Khawi aṭangin nge thlamuanna leh chakna kan hmuh?

⁶ Jehova chuan min ṭanpui a tiam a. Entîr nân, ani chuan: “Mi hriatpuitute in ni,” tia a sawi hma lawkin: “Tuite in dai kai lai pawhin kei in hnênah ka awm ang a; luite in dai kai lai pawhin a chîm pil lo vang che u. Meia in kal tlang lai pawhin in kâng lo vang a, meialhin a tialh hek lo vang che u,” tiin a sawi a ni. (Is. 43:2) Rawngbâwlnaa theih tâwp kan chhuahnaah tui lian anga dodâlnate leh mei anga fiahnate hmachhawn châng kan nei ṭhîn a. Chuti chung pawhin, Jehova ṭanpuinain thu kan hril zawm zêl a ni. (Is. 41:13) Ezekiela hun lai ang bawkin, tûn laia mi a tam zâwkte chuan kan thuchah ken chu an hnâwl a. Chutianga an hnâwl avâng chuan, Pathian Thuhretute anga kan rawngbâwlnaah kan hlawhchham tihna a ni lo tih erawh kan hre reng a ni. Rinawm taka A thuchahte kan puan chhunzawm zêl hian Jehova a lâwm tih hriatna aṭangin thlamuanna leh chakna kan hmu a. Tirhkoh Paula chuan: “Anmahni thawh rim ang zêlin mahni lâwmman an hmu . . . ang,” tiin a sawi. (1 Kor. 3:8; 4:1, 2) Kum rei tak chhûng pioneer lo thawk tawh unaunu pakhat chuan: “Jehova’n kan thawhrimnate mal a sâwm tih hriatna chuan min tihlim hle,” tiin a sawi a ni.

7. Ezekiela chu inlârnaa a thil hmuhte a ngaihtuah lêt apiangin engtin nge a awm ṭhin? (A kâwma milem en rawh.)

⁷ Ezekiela chuan Pathian thlarau thiltihtheihzia a hmu a. Inlârnaa a thil hmuh chuan thlarau thianghlimin vântirhkoh thiltithei takte a ṭanpui tih leh vân tawilailîr ke lian takte a kaltîr tih hre tûrin a ṭanpui a ni. (Ezek. 1:20, 21) Chu a thil hmuh avâng chuan Ezekiela chu engtin nge a awm? Thil thlen dân chu heti hian a ziak a ni. “Ka hmuhin bawkkhupin ka tlu a,” tiin. Mak a tih êm avângin leiah a tlu a. (Ezek. 1:28) Chu inlârna ropui tak chu a ngaihtuah lêt apiangin, chu chuan Pathian thlarau ṭanpuinain a rawngbâwlna a hlen thei tih a rinna chu a tinghet lehzual ngei ang.

8-9. (a) Jehova’n Ezekiela hnêna “ding rawh,” tia thu a pêk khân a chungah eng thil nge thleng? (b) Engtin nge Jehova’n Ezekiela chu a thu hrilhna biala mi tawhkhirh takte hmachhawn tûra a tihchak lehzual?

⁸ Jehova’n Ezekiela chu: “Mihring fapa, i kein ding rawh, i hnênah thu ka sawi dâwn e,” tiin thu a pe a. Chu thupêk leh Pathian thlarau thianghlim chuan Ezekiela chu a kea ding tûrin chakna a pe a ni. Ezekiela chuan: “Thlarau chu keimahah a lo lût a, ka kein mi dintîr a,” tiin a ziak. (Ezek. 2:1, 2) A hnua a rawngbâwl chhûng zawngin, ani chu Pathian “kut”—Pathian thlarau thianghlima kaihhruaiin a awm a ni. (Ezek. 3:22; 8:1; 33:22; 37:1; 40:1) Pathian thlarau chuan Ezekiela chu mi “luhlul tak leh tihmawh takte” hnêna thu hril tûra a chanvo dawn thawk tûrin a tichak a. (Ezek. 3:7) Jehova chuan a hnênah: “Luhlul tak leh deh khirh takin anmahni ang maiin ka siam ang che. Lung chang tak, meilung aia changa deh khirhin ka siam a che, hlau suh la, an mitmelhah zâm hek suh,” tiin a hrilh a. (Ezek. 3: 8, 9) Dik tak chuan Jehova’n: ‘Mite luhlulnain tilunghnual che suh se. Ka tichak ang che,’ tia a hrilh ang a ni.

⁹ Chumi hnu chuan, Pathian thlarauvin Ezekiela chu a thu hrilhna tûr bialah a hruai a. Ezekiela chuan: “LALPA kut chu ka chungah a chak si a,” tiin a ziak a ni. Ani chuan a thuchah puan chhuah tûr chu rinnghehna nei chunga fiah leh chiang taka a sawi theih nân chawlhkâr khat vêl a zir a. (Ezek. 3:14, 15) Tichuan, Jehova’n Ezekiela chu amaha ‘thlarau a luhna’ hmun phaizâwlah chuan a hruai a. (Ezek. 3:23, 24) Ezekiela chu thu hril tûrin a inpeih ta a ni.

10. Kan thu hrilh rawngbâwlna hlen tûrin eng ṭanpuina nge kan mamawh a, engvângin nge?

¹⁰ Kan thu hrilh rawngbâwlna hlen tûrin eng ṭanpuina nge kan mamawh? A chhânna atân, Ezekiela chunga thilthleng kha han ngaihtuah lêt leh ta ila. Thu a hrilh ṭan hmain, Pathian thlarauvin a mamawh chakna a pe a ni. Ezekiela ang bawkin, keini pawh tûn laiah hian Pathian thlarau ṭanpuina avâng chauhvin thu kan hril thei a ni. Engvângin nge? Setana’n kan thu hrilh rawngbâwlna tihtâwpsak tuma min beih vâng a ni. (Thup. 12:17) Mihring thlîrna aṭang chuan Setana chu hneh theih rual loh angin a lang a. Mahse, thu hrilh rawngbâwlna hmangin kan hneh mêk a ni. (Thup. 12:9-11) Eng kawngin nge? Rawngbâwlnaa kan tel hian Setana min beihnate kan hlauh lohzia kan lantîr a. Mite hnêna thu kan hrilh apiangin Setana chu a tlâwm a ni. A nih chuan, dodâlna tâwk chung pawha thu hrilh rawngbâwlnaa kan tel theih avângin eng thu tâwp nge kan siam theih? Thlarau thianghlim tihchakin kan awm a, Jehova duhsakna kan dawng tih kan sawi thei a ni.—Mt. 5:10-12; 1 Pet. 4:14.

11. Pathian thlarauvin eng nge min tihsak ang a, engtin nge chu chu kan dawn reng theih?

¹¹ Jehova’n thu hril tûra Ezekiela mamawh chakna a pêk dân kan ngaihtuah hian eng thil dang nge kan hriat? Pathian thlarau chuan rawngbâwlnaa kan tawh theih harsatnate hneh tûrin chakna min pe thei a ni. (2 Kor. 4:7-9)  A nih chuan, Pathian thlarau kan dawng reng tih kan hriat theih nân eng nge kan tih theih? Jehova’n kan ṭawngṭainate a ngaithla ang tih ring tlatin, thlarau thianghlim chu ṭhahnemngai taka kan dîl a ngai a ni. Isua chuan a zirtîrte chu: “Dîl rawh u, . . . zawng rawh u, . . . kik rawh u,” tiin a zirtîr a. Chuvângin, Jehova chuan ‘a dîltute chu thlarau thianghlim a pe’ ang.—Lk. 11:9, 13; Tirh. 1:14; 2:4.

12. Ezekiela 2:9–3:3-a kan hmuh angin, lehkhabu zial chu khawi aṭanga lo chhuak nge a nih a, chutah chuan eng nge chuang?

¹² Ezekiela chu Pathian thlarauva tih chaka a awm bâkah, Pathian thua tihchakin a awm bawk a. Ani chuan inlârnaah tu emawin lehkhabu zial a keng lai a hmu a ni. (Ezekiela 2:9–3:3 chhiar rawh.) Chu lehkhabu zial chu khawi aṭanga lo chhuak nge? Chutah chuan eng nge chuang? Engtin nge chu chuan Ezekiela a tihchak? I lo en ang u. Chu lehkhabu zial chu Pathian lalṭhutthlêng aṭangin a lo chhuak a. Ezekiela hmuh vântirhkoh pali zînga pakhat chu Jehova’n Ezekiela hnêna lehkhabu zial petu atân a hmang a ni ngei ang. (Ezek. 1:8; 10:7, 20) Chu lehkhabuah chuan Pathian thu, hel hmang sal tângte hnêna Ezekiela sawi tûr rorêlna thuchah sei tak a chuang a. (Ezek. 2:7) Chu thuchah chu lehkhabu zial a leh lam leh lama ziak khah a ni.

13. Jehova’n Ezekiela chu lehkhabu zial chungchângah eng ti tûrin nge a hrilh a, engvângin nge chu lehkhabu zial chu a thlum?

¹³ Jehova chuan a zâwlnei chu lehkhabu zial eia “[a] kawchhûng tikhat” tûrin a hrilh a. Thuawih takin Ezekiela chuan a ei zo ta vek a ni. He inlârna awmzia hi eng nge ni? Ezekiela chuan a thuchah puan chhuah tûr chu a hriatthiam vek a ngai a. Puan chhuah duhna nei khawpin amah ngeiin chu thuchah chu a rin a ngai bawk a ni. A hnuah thil mak tak mai a lo thleng a. Ezekiela chuan chu lehkhabu zial “thlumzia chu . . . khawizu ang mai a ni,” tih a hre ta a ni. (Ezek. 3:3) Engvângin nge? Ezekiela tân chuan Jehova aiawhtu nihna chanvo hlu chu thil thlum tak ang, a nih loh leh thiltawn duhawm tak ang mai a ni a. (Sâm 19:8-11) Jehova’n a zâwlnei anga rawngbâwl tûra a ruat avângin a lâwm tak zet a ni.

14. Engin nge Ezekiela chu a chanvo dawn thawk ṭan tûra ṭanpui?

¹⁴ A hnuah, Jehova’n Ezekiel hnênah: “I hnêna ka thu sawi tûr zawng zawng chu i bengin ngaithla la, i thinlungah khung rawh,” tiin a hrilh a. (Ezek. 3:10) Chûng kaihhruainate chu hmangin, Jehova chuan Ezekiela chu lehkhabu ziala thute a rilrua chhinchhiah tlat a, chhût ngun tûrin a hrilh a ni. Chutianga a han tih chuan, a rinna chu a chak lehzual a ni. Chu bâkah, chu lehkhabu zialah chuan mite hnêna puan chhuah tûr thuchah khauh tak pawh a tel a. (Ezek. 3:11) A thinlung leh kâa Pathian thuchah a awm tlat tawh avângin, Ezekiela chu a chanvo dawn thawk ṭan tûr leh hlen tûrin a inpeih tawh a ni.—Sâm 19:14 nên khaikhin rawh.

15. Chhelna nei tûra ‘thinlunga kan khung’ ngai chu eng nge ni?

¹⁵ Kan rawngbâwlnaa chhelna nei tûr chuan, keini pawh Pathian thua kan intihchak zawm zêl a ngai a. Jehova thu min hrilh zawng zawngte chu kan ‘thinlunga kan khung’ a ngai bawk. Tûn laiah chuan, Jehova’n a Thu, Bible hmangin kan hnênah thu a sawi tawh a ni. A nih leh, engtin nge Pathian Thu, Bible-in kan ngaihtuahna te, rilru vei zâwng te, leh min chêttîrtute chu a la nghawng zawm zêl tih kan chian theih?

16. Engtin nge Pathian Thu chu kan thinlunga kan khung theih?

¹⁶ Chaw tak tak einain tisa lama min tihchak  ang bawkin, Pathian Thu, Bible zirna leh chhût ngunna chuan thlarau lamah min tichak a. Lehkhabu ziala zir tûrte chu rilruah kan vawng reng a ni. Ani chuan a Thute chu ‘kan kawchhûnga tikhat,’ a nih loh leh kan thinlunga khung tûrin min duh a; chu chu a Thu chiang taka hre thiam tûrin min duh tihna a ni. Ṭawngṭaina te, chhiarna te, leh chhût ngunnate hmangin chutiang chuan kan ti thei a ni. A hmasain, Pathian ngaihtuahnate chuan kan thinlung a khawih theih nân kan ṭawngṭai a. Tichuan, Bible kan chhiar a. Chumi hnuah, kan thu chhiarte ngun taka chhût tûr leh ngaihtuah tûrin kan châwl lawk ṭhîn. Chutianga tihna chuan eng nge a thlen ang? Pathian Thu kan hre thiam lehzual ang a, chu chuan kan rinna a tichak lehzual ang.

17. Engvângin nge Bible chhiar leh chhût ngun chu thil pawimawh tak a nih?

¹⁷ Engvângin nge Bible chhiar leh chhût ngun chu thil pawimawh tak a nih? Chutianga tihna chuan Lalram thuchah hril tûra kan mamawh chakna min pêk avâng leh nakin lawka kan hrilh mai theih rorêlna thuchah khauh tak puang chhuak tûra kan mamawh chakna min pêk dâwn vâng a ni. Chu bâkah, Jehova mize duhawm tak takte kan chhût ngunna chuan amah nêna kan inlaichînna a tinghet lehzual ang a. Chutianga kan tihna aṭang chuan, thil thlum tak—chhûngrila thlamuanna leh lungawina kan nei ang.—Sâm 119:103.

18. Kan rawngbâwlna biala mite hriat ngai chu eng nge ni a, engvângin nge?

¹⁸ Ezekiela chu zâwlnei a ni a, keini erawh kan ni lo. Mahse, thu hrilh rawngbâwlna hi Jehova’n tâwk a tih hma chu a Thu, Bible-a a vawn ṭhat, thlarauva thâwk khum thuchah chu puan chhuah zawm zêl kan tum tlat a ni. Chutianga kan tih chuan, rorêlna nî a lo thlen hunah, kan rawngbâwlna biala mite chuan vaukhânna dawng lo ang leh Pathianin anmahni a hnâwl anga sawi nachhan tûr an nei lo vang a. (Ezek. 3:19; 18:23) Kan thuchah puan chhuahte chu Pathian hnên aṭanga lo kal a ni tih an hre tawh zâwk ang.

19. Engin nge kan rawngbâwlna hlen tûra chakna min pe ang?

¹⁹ Engin nge kan rawngbâwlna hlen tûra chakna min pe ang? Ezekiela tichaktu thil pathumte tho kha a ni. Thu kan hrilh zawm zêl chhan chu Pathian Jehova mi tirh kan nih vâng te, a thlarau thianghlima tihchak kan nih vâng te, leh a Thua tihchak kan nih vângte a ni a. Jehova ṭanpuinain, kan rawngbâwlna hlen tûr leh “a tâwp thlenga” chhelna lantîr tûra chettîrin kan awm a ni.—Mt. 24:13.