1, 2. (a) Tûnah eng ang thlamuanna, a nih loh leh remna nge kan neih theih? (b) Engvângin nge remna tluantling neih chu a la theih loh? (A thupui chunga milem en rawh.)

 KAN nunah remna neih a, lungngaihnate neih loh chu kan duh ṭheuh va. Chuvângin, Jehova’n ‘a thlamuanna’ min pe chu kan lâwm tak zet a ni. Chu thlamuanna chu lungngaihnate leh rilru mangangnate laka min vêng theitu hahdamna a ni. (Philippi 4:6, 7) Jehova hnêna kan inpumpêk tawh avângin, “Pathian nên inremin” kan awm tawh a. A awmzia chu amah nên inlaichînna ṭha kan nei tihna a ni.—Rom 5:1.

² Mahse, khawvêla remna tluantling thleng tûra Pathian hun ruat chu a la thleng rih lo. Hun hnuhnûngah kan awm avângin, min tilungngaitu buaina tam tak a awm a. Mi nunrawngte hualvêlin kan awm a. (2 Timothea 3:1-4) Setanna leh a tihchhuah zirtîrna dik lote chu kan do a ngai bawk a ni.  (2 Korinth 10:4, 5) Manganna min thlentu ber chu Jehova rawngbâwl lo kan chhûngkhatte hnên aṭanga dodâlna hi a ni a. An zînga ṭhenkhat chuan kan thurinte an nuihsawh thei a, a nih loh leh chhûngkaw tikehtute angin min puh thei a ni. Chu bâkah, Jehova rawngbâwl kan bânsan loh chuan chhûngkaw zînga mi ni thei tawh lo tûr hial pawhin min hrilh thei bawk. Chuvângin, chhûngte dodâlna chu engtin nge kan thlîr ang? Chûng thilte a thlen hunah engtin nge remna kan neih reng theih?

3, 4. (a) Isua zirtîrnain eng nghawng nge a neih? (b) Eng hunah nge Isua hnungzui chu a harsat lehzual theih?

³ Isua chuan a thu zirtîr chu mi zawng zawngin an pawm dâwn lo tih a hria a. A zirtîrte chu mi ṭhenkhatin an dodâl dâwn avângin huaisenna an neih a ngai tih a hre bawk. Chutiang dodâlna chuan chhûngkaw remna a tichhe thei a ni. Ani chuan: “Khawvêlah hian rem lêntîr tûra lo kal emaw mi ti suh u; rem lêntîr tûra lo kal ka ni lo va, khandaih lêntîr tûra lo kal ka ni zâwk. Mi a pa dotîr tûrin funu a nu dotîr tûrin, mo a pi dotîr tûrin lo kal ka ni asin. Mi a hmêlmate chu ama chhûngte zînga mi ngei an ni ang,” tiin a sawi a ni.—Matthaia 10:34-36.

⁴ Isua’n “rem lêntîr tûra lo kal emaw mi ti suh u,” tia a sawi hian eng a sawi duhna nge? Mite chu a zirtîrte an rawn nih chuan a sawhkhâwk a awm dâwn tih hriattîr a duh a. Ni e, Isua thiltum chu chhûngkaw ṭhendarhtîr ni lovin, Pathian chungchânga thutak zirtîr hi a ni. (Johana 18:37) Mahse, a zirtîrte chuan an tân Isua hnungzui chu a awlsam reng lo vang, a bîk takin, ṭhian ṭhate leh chhûngkhaw zînga mite’n thutak an pawm loh hunah a ni lehzual ang tih an hriat a ngai a ni.

5. Isua hnungzuitute chuan eng nge an tawn ang?

⁵ Chhûngte dodâlna chu a hnungzuitute hmachhawn tûr zînga pakhat niin a sawi a. (Matthaia 10:38) Isua tilâwm tûr chuan, chhûngte nuihsawhna emaw, hnâwlna emaw chu a zirtîrte’n an tawrh a ngai a ni. Mahse, an thil chân aiin an hmuhte chu a tam zâwk daih ang.—Marka 10:29, 30 chhiar rawh.

6. Kan chhûngkhatte’n min dodâl a nih chuan eng nge kan hriat reng ang?

⁶ Jehova kan biak avânga kan chhûngkhate’n min dodâl a nih pawhin, anni chu kan hmangaih tho va. Pathian leh Krista kan hmangaihna chu mi tuemaw kan hmangaihna aiin a nasa zâwk tûr a ni tih kan hriat reng a ngai a. (Matthaia 10:37) Chu bâkah, Setana chuan chhûngte kan hmangaihna chu Jehova laka rinawm lo tûrin hmanruaah a hmang thei tih kan hriat a ngai bawk. Dinhmun harsa ṭhenkhatte leh kan tawrh chhuah theih dânte i lo en ang u.

7. I khawppuiin Jehova a be lo a nih chuan i dinhmun chu engtin nge i thlîr ang?

⁷ Bible chuan nupui pasal neite’n “hrehawm,” a nih loh leh buainate an tâwk ang tiin a vaukhân a. (1 Korinth 7:28) Jehova be lotu tuemaw i nei a nih chuan, inneihnaah rilru hahna leh lungkhamna a tam lehzual thei a ni. Mahse, i dinhmun chu  Jehova thlîr dân anga i thlîr thiam a pawimawh a. Kan kawppui chu Jehova a biak loh vâng maiin kan awm hrang thei emaw, kan ṭhen thei emaw tihna a ni lo. (1 Korinth 7:12-16) I pasalin Jehova a be lo va, biakna dikah hma a hruai lo a nih pawhin, chhûngkaw lû a nihna chu i zah a ngai a ni. I nupuiin Jehova a be lo a ni pawhin, i hmangaih a, ṭha taka i ngaihsak a ṭûl bawk.—Ephesi 5:22, 23, 28, 29.

8. I kawppuiin i biakna khuahkhirh a tum a nih chuan eng zawhnate nge i inzawh theih?

⁸ I kawppuiin i biakna khuahkhirh a tum a nih chuan eng nge i tih ang? Unaunu chu a pasalin chawlhkâr chhûnga ni engemawah chauh rawngbâwlnaah a chhuahtîr a. Chutiang dinhmunah i awm a nih chuan, heti hian inzâwt rawh: ‘Ka kawppui chuan Jehova be tawh lo tûrin min ti em? Min ti lo a nih chuan, a thil phût chu ka tihsak thei ang em?’ Hriatthiamna i hman chuan, in inneihnaah buaina a tlêm phah ngei ang.—Philippi 4:5.

9. Kristiante chuan an fate chu ring lotu nu emaw, pa emaw chawimawi tûrin engtin nge an zirtîr theih?

⁹ I kawppuiin Jehova a be lo a nih chuan i fate zirtîr chu a harsa mai thei a. Entîr nân, “I nu leh i pa chawimawi rawh,” tih Bible thupêk zâwm tûrin i fate chu i zirtîr a ngai a. (Ephesi 6:1-3) A nih leh, i kawppuiin Bible tehnate a zâwm lo a nih chuan eng nge i tih ang? Ani chu chawimawiin i fate tân entawn tûr ṭha i siam thei a ni. A mize ṭhate chu ngaihtuah la, chhûngkaw tâna a thil tihte chunga i lâwmzia hrilh ang che. A tlin lohnate chu i fate hmaah sawi lang suh. Mi tinin Jehova rawng an bâwl dâwn leh dâwn loh chungchângah duhthlanna an siam a ngai tih i fate hrilhfiah zâwk rawh. I fate chu ring lotu i kawppui chawimawi tûra i zirtîr chuan, an nungchang ṭha chuan i kawppui chu Jehova chanchin zir tûrin a chêttîr mai thei a ni.

10. Engtin nge Kristian nu leh pate chuan an fate chu Jehova hmangaih tûra an zirtîr theih?

¹⁰ Kawppui ring lotute chuan an fate chu  milem betute ni serh hmang tûrin emaw, sakhaw dik lo zirtîrnate zir tûrin emaw an duh mai thei a. Pasal ṭhenkhatte chuan an Kristian nupuite’n an fate Bible an zirtîr chu an khap mai thei bawk. Chutiang dinhmunah pawh, nupui chuan a fate thutak zirtîr tûrin a tih theih apiang chu a ti ang. (Tirhkohte 16:1; 2 Timothea 3:14, 15) Entîr nân, ring lotu pasal chuan a nupuiin an fate Bible a zirpui a, inkhâwma a hruai ṭhîn chu a duh lo pawh a ni thei. A pasal thu tlûkna siam chu zahna a lantîr rualin, a remchân hun apiangah a fate chu a rinna chungchâng a hrilh thei a ni. Chutiang kawng chuan, an fate chuan Jehova leh thil dik leh dik lo chungchânga a tehnate chu an zir thei a ni. (Tirhkohte 4:19, 20) A tâwpah, an fate chuan Jehova rawng an bâwl dâwn leh dâwn loh chungchângah thu tlûkna an siam thei ang. a (Footnote en rawh.)—Deuteronomy 30:19, 20.

11. Jehova be lotu kan chhûngkhatte nêna buaina min neihtîr theitu chu eng nge ni?

¹¹ Jehova Thuhretute nêna Bible kan zir ṭan hian, kan chhûngte chu kan hriattîr lo mai thei a. Mahse, kan rinna a rawn ngheh chhoh chuan, Jehova rawngbâwl kan duh tih kan hriattîr a ngai ta a ni. (Marka 8:38) Pathian laka i rinawmna chuan i chhûngte nêna in inkârah buaina a awmtîr thei a. Remna vawng tlat tûr leh Jehova chunga rinawm tlat tûra i tih theih thil ṭhenkhate chu i lo sawiho vang u.

12. Engvângin nge kan chhûngkhatte chuan min dodâl mai theih a, an ngaih dânte kan ngaihsak tih engtin nge kan lantîr theih?

¹² Ring lotu i chhûngkhatte ngaih dân chu hriatthiam tum rawh. Bible aṭanga thutak kan hriat avângin kan lâwm hle a. Mahse, kan chhûngkhatte chuan bumin kan awm ta emaw, sakhaw danglam takah kan tel ta emaw niin an ring mai thei a. An ruala hunserhte kan hman tâk loh avângin kan hmangaih tawh lovah an ngai pawh a ni mai thei a. Kan thih hnuah kan chunga thil ṭha lo a thlen an hlau pawh a ni thei bawk. Min ngaihtuah chhan hre tûr chuan, an ngaih dânte hriat thiam kan tum ang a, an thusawite ngun takin kan ngaihthlâksak tûr a ni. (Thufingte 20:5) Tirhkoh Paula chuan “mi zawng zawng” hnêna chanchin ṭha a hrilh theih nân anni chu hriatthiam a tum a. Kan chhûngkaw zînga mite hriatthiam kan tumna chuan thutak zirtîr dân hre tûrin min ṭanpui ang.—1 Korinth 9:19-23.

13. Engtin nge ring lotu kan chhûngkhatte chu kan dâwr ang?

¹³ Zaidam takin sawi rawh. Bible chuan: ‘In ṭawngka chhuakah chuan khawngaihna tel fo rawh se,’ tiin a sawi a. (Kolossa 4:6) Chu chu thil awl a ni lo. Kan chhûngkhatte chungah khawngaihna leh ngilneihna lantîr thei tûrin Jehova hnênah  a thlarau thianghlim kan dîl thei a. An thurin dik lote chungchângah kan hnial tûr a ni lo. An thusawi leh an thiltihin kan rilru a tina a nih chuan, tirhkohte kan entawn thei a ni. Paula chuan: “Miin min hauvin mal kan sâwmsak ṭhîn a; miin min tihduhdahin kan tuar hrâm hrâm ṭhîn a; miin min hêkin kan thlêm ṭhîn a,” tiin a sawi.—1 Korinth 4:12, 13.

14. Nungchang ṭhain eng hlâwknate nge a thlen?

¹⁴ Nungchang ṭha vawng rawh. Hei hi engvângin nge a pawimawh? Zaidam taka thusawinain kan chhûngkhatte nên min inremtîr theih rualin, kan nungchang ṭha chuan chu aiin thil a tithei zâwk a ni. (1 Petera 3:1, 2, 16 chhiar rawh.) Jehova thuhretute chuan chhûngkaw nun hlim tak neiin, an fate an enkawl ṭha a, Bible tehnate milin an nung a, nun awmze nei tak an nei tih i entawn tûr siamte aṭangin i chhûngkhat lainate’n hre rawh se. Kan chhûngkhat lainate chuan thutak pawm lo mah se, kan nungchang ṭhain Jehova a tilâwm tih kan hriat avângin kan hlim thei a ni.

15. Kan chhûngkhatte nêna inhnial lo tûrin engtin nge kan inruahman lâwk theih?

¹⁵ Ruahman lâwk rawh. I chhûngkhatte nêna inhnialna thlentîr thei dinhmunte chu ngaihtuah la. Tichuan, i tih tûr chu ruahman lâwk ang che. (Thufingte 12:16, 23) Chutiang chuan Australia rama unaunu chuan a ti a. A pasala pain nasa takin thutak a dodâl a, a châng chuan a thin a rim ṭhin hle a ni. Chuvângin, phone-a an biak hmain, an nupa chuan thinrim taka an chhân lêt loh nân Jehova hnênah ṭawngṭaiin ṭanpuina an dîl a. An sawi tlân theih tûr thu ṭhate chu an ngaihtuah lâwk ṭhîn a. Rei taka inbiakna chuan sakhaw chungchânga inhnialna a thlen ṭhin avângin, hun rei lote chhûng chauh an be ṭhîn a ni.

16. I chhûngkhatte tihlâwm lohna avânga inthiam lohna chu engtin nge i hneh theih?

¹⁶ Ring lotu i chhûngkhatte nêna inhnialna awmtîr thei dinhmun zawng zawngte i pumpelh thei lo tih chu a dik ngei mai. Chuvângin, inhnialna a lo awm hunah, anmahni i hmangaiha leh tihlâwm i duhna avângin, inthiam lohna i nei mai thei a ni. Mahse, Jehova chunga i rinawmna chu i chhûngte i hmangaihna aiin a nghet zâwk tûr a ni tih hre reng ang che. I chhûngkhatte’n chu chu an rawn hriatthiam hunah Jehova rawngbâwl a pawimawh dân an hre thiam thei ang. Thutak pawm tûrin tumah i tilui thei lo. Mahse, Jehova kaihhruaina mila nun a ṭhatzia mi dangte i hmuhtîr thei a ni. Dik tak chuan, Jehova’n a rawngbâwl tûra duhthlanna min pêk ang bawkin, anni pawh a pe a ni.—Isaia 48:17, 18.

17, 18. Chhûngkaw zînga miin Jehova a hawisan chuan engin nge ṭanpui thei che?

¹⁷ Chhûngkaw zînga mi chu hnawhchhuah, a nih loh leh kohhran aṭanga a  inla hrang a nih chuan, chutiang dinhmun chu tawrh harsa tak a ni ngei ang. Chu chu khandaiha chhun ang tlukin a na thei a. Chutiang anga na chu engting nge i tawrh chhuah theih ang?

¹⁸ Jehova rawngbâwlnaah i rilru pe tlat rawh. Chutiang rilru natna i neih hunah, i rinna chu i tihchak a ngai a. Chuvângin, Bible chhiar ziahna te, inbuatsaih lâwka inkhâwm ziahna te, leh thu hrilhnaa tel ziahnate hmangin, Jehova hnênah chhêlna nei tûrin chakna dîl rawh. (Juda 20, 21) Chûng zawng zawng i tih hnuah pawh i rilru a la na a nih chuan engtin nge ni ang? Beidawng mai suh! Jehova rawngbâwlnaah i rilru pe tlat zâwk ang che. Hunte a lo rei chuan, i ngaihtuahnate leh i rilru veizâwngte chu i thunun thei ang. Sâm 73-na ziaktu pawhin chutiang chu a lo tawng tawh ṭhîn a. A nunah, a ngaihtuahnate leh a rilru veizâwngte thunun harsa a tih chângte a awm a. Mahse, Jehova biakna chuan thilte chu dik taka thlîr leh thei tûrin a ṭanpui a ni. (Sâm 73:16, 17) I tân pawh chutiang chu a ni thei ang.

19. Jehova’n a mite a thunun dân chu engtin nge zahna i lantîr theih?

¹⁹ Jehova thununna chu zah rawh. Pathianin hnawhchhuahte pawh tiamin, a thununna dawng tawh phawt chuan an hlâwkpui ang tih a hria a. Kan hmangaihte zilh an nih hian na ti hle mah ila, chu chuan Jehova hnêna kîr leh tûrin a ṭanpui thei a ni. (Hebrai 12:11 chhiar rawh.) An rawn kîr leh hma chu, chûng hnawhchhuahte ‘pâwl lo tûra’ Jehova kaihhruainate chu kan zah tûr a ni. (1 Korinth 5:11-13) Mahse, chu chu thil awlsam a ni lo. Chu bâkah, phone-a biak te, SMS thawn te, lehkha thawn te, leh e-mailte hmanga inbiak pawhna ang chite chu kan pumpelh tûr a ni.

20. Eng nge kan beisei tlat ang?

²⁰ Beisei tlat rawh! Hmangaihna chuan “engkim a beisei a,” chuvângin, kan hmangaihte Jehova hnêna an kîr leh chu kan beisei tlat a ni. (1 Korinth 13:7) I chhûngkaw zînga mi chu rilru lamah hma a sawn tih finfiahnate i hmuh chuan, Bible aṭanga chakna hmu tûr leh “Ka hnênah lo kîr leh rawh u,” tia Jehova sâwmna pawm tûrin i ṭawngṭawisak thei a ni.—Isaia 44:22.

21. Isua hnung i zui avânga i chhûngte’n an dodâl che a nih chuan eng nge i tih ang?

²¹ Isua chuan tudang zawng aiin amah kan hmangaih zâwk tûr a ni a ti a. A zirtîrte chu an chhûngte’n dodâl mah se, a chungah an rinawm tlat ang tih a ring a ni. Isua hnung i zui avânga i chhûngte’n an dodâl che a nih chuan, Jehova rinchhan tlat la. Chhel taka tuar chhuak thei tûrin a ṭanpuina dîl rawh. (Isaia 41:10, 13) Jehova leh Isua chuan i rinawmna avângin i chungah an lâwm tih leh chumi avânga lâwmman an pe dâwn che tih hriain hlim ang che.