1, 2. Mosia thih hnuah Josua’n eng hna lian tak nge a chelh?

JEHOVA’N Josua hnênah: “Ka chhiahhlawh Mosia chu a thi ta a; chutichuan tho la, nang leh hêng mipuiho zawng zawngte nên hian Jordan lui hi kân ula, anmahni . . . ka pêk ramah chuan kal rawh u,” tiin a hrilh a. (Josua 1:1, 2) Kum 40 dâwn lai Mosia chhawmdâwltu Josua tân inthlâk danglamna a va ni êm!

² Mosia chuan Israel mite chu kum rei tak chhûng a lo kaihruai tawh a; mahse, tûnah, Josua’n a kaihruai tawh dâwn a ni. Chuvângin, ani chuan an hruaitu atân an pawm dâwn leh dâwn loh a ngaihtuah mai thei. (Deuteronomy 34:8, 10-12) Bible hrilhfiahna lehkhabu pakhatin Josua 1:1, 2 chungchâng a sawinaah, tûn hma leh tûn laiah, hnam khat tâna hun harsa ber leh hlauhawm ber chu hruaitu inthlâk hun hi a ni tiin a sawi a ni.

3, 4. Engtin nge Pathianin amah a rinchhan avânga Josua chu mal a sâwm a, eng zawhna nge kan inzawh theih?

 ³ Josua chuan hlauhthawnna tûr chhan ṭha tak a nei a. Mahse, Jehova a rinchhan a, a kaihhruainate chu a zâwm nghâl a ni. (Josua 1:9-11) Pathianin amah a rinchhan avângin mal a sâwm a, Josua leh Israel mite kaihruai tûrin vântirhkoh pakhat a hmang a ni. Chu vântirhkoh chu Pathian fa tîr, Thu-a a nih a rinawm.—Exodus 23:20-23; Johana 1:1.

⁴ Jehova chuan Israel hnam chu an hruaitu thar Josua avânga lo awm inthlâk danglamnate mila insiamrem tûrin a ṭanpui a. Tûn laiah pawh, inthlâk danglamna lian tak takte a awm a ni. ‘Pathian inawpna pâwlin hma a sâwn chhoh zêl lai hian, Hruaitu atâna a ruat Isua chu rinchhanna tûr chhan ṭha kan nei em?’ tiin kan ngaihtuah mai thei. (Matthaia 23:10 chhiar rawh.) Chu zawhna chhân nân, tûn hmaa inthlâk danglamna a awm laia Jehova’n a mite a kaihhruai dân kan bihchiang ang.

5. Josua’n Jeriko khaw bulah eng thiltawn danglam tak nge a tawn? (A thupui chunga milem en rawh.)

⁵ Israel mite’n Jordan an kân hnu rei vak lovah, Josua chuan thil danglam tak a tawng a. Jeriko khawpui bulah, khandaih kêng mi pakhat a tâwk a ni. Josua chuan chu pa chu: “Kan lama ṭang nge i nih, kan hmêlmate lama ṭang?” tiin a zâwt a. Ani chuan Pathian mite humhim tûra inpeih reng vântirhkoh, “LALPA sipaihote hotua,” a ni tia a sawi chuan, Josua’n mak a ti hle a. (Josua 5:13-15 chhiar rawh.) Bible châng hmun dangahte chuan tlang taka Josua betu chu Jehova a ni tih târ lang mah se, tûn hmaa a lo tih ṭhin angin, Pathianin he vântirhkoh hi a aiawha thusawitu atân a hmang niin a lang.—Exodus 3:2-4; Josua 4:1, 15; 5:2, 9; Tirhkohte 7:38; Galatia 3:19.

6-8. (a) Vântirhkoh kaihhruaina ṭhenkhat chu engvângin nge mak danglam tak anga a lan? (b) Kaihhruainate chu a ṭhain, a hun taka pêk a nihzia engtin nge kan hriat? (Footnote en rawh.)

⁶ Vântirhkoh chuan Josua chu Jeriko hneh tûra a tih ngai thilte chiang takin a hrilh a. A tîr chuan, kaihhruaina ṭhenkhat chu danglam tak angin a lang a ni. Entîr nân, vântirhkoh chuan Josua hnênah sipai zawng zawng chu serhtan tûrin a hrilh a. Ni engemaw tichhûng chu râl an bei thei dâwn lo tihna a ni. Chu chu an tân serhtan nâna hun ṭha ber a ni ang em?—Genesis 34:24, 25; Josua 5:2, 8.

⁷ Sipaite chuan, ‘Hmêlmate’n kan riahhmun rawn bei ta se, engtin nge kan chhûngte kan humhim ang?’ tiin an ngaihtuah mai thei. Mahse, thil beisei loh tak mai a lo thleng ta! Jeriko mite chuan Israel mite chu va beih ahnêkin an hlau zâwk a. Heti hian kan chhiar a ni: “Jeriko khua chu Israel te an luh theih loh nân an khâr tlat a; tumah an chhuak lo va, tumah an lût hek lo,” tiin. (Josua 6:1) Chu chanchin avâng chuan Israel mite’n Pathian kaihhruaina chu an rinchhan lehzual ngei ang!

⁸ Vântirhkoh chuan Josua hnênah Israel mite’n Jeriko khua chu bei lo tûrin a hrilh a. Chu aiin, khawpui chu ni ruk chhûngin, ni khatah vawi khat zêl hêl chhuak a, a ni sarihnaah vawi sarih an hêl chhuak tûr a ni. Sipaite chuan ‘Hun leh tha kan sêng thlâwn mai a ni ang!’ tiin an ngaihtuah mai thei. Mahse, hmuh theih lova Israel mite hruaitu chuan a thiltih chu a hre chiang hle si a! A kaihhruainate zawmnain Israel mite rinna a tichak  lehzual ang a, Jeriko khuaa sipaite chu an beih a ngai lo vang.—Josua 6:2-5; Hebrai 11:30. * (Footnote en rawh.)

9. Pathian inawpna pâwl aṭanga kan dawn kaihhruaina engpawh chu engvângin nge kan zui ang? Entîrna pe rawh.

⁹ He Bible thu aṭangin eng nge kan zir theih? Jehova inawpna pâwl chuan kawng thara thil a tih châng a awm a, a tih chhan chu kan hre thiam lo pawh a ni thei. Entîr nân, mi mal inzirnaah, rawngbâwlnaah, leh inkhâwmnaahte electronic lam thil hman chu a ṭha tih kan lo ngaihtuah ngai lo va. Mahse, tûnah chuan, a theih huna chûng thilte hman a ṭangkaizia kan hmu tawh a. Chûng inthlâk danglamna ṭhatziate kan hmuh hian kan rinna a chak lehzual a, unaute nêna kan inpumkhatna a nghet lehzual a ni.

10. Serhtan chungchânga Jerusalema governing body inkhâwm pawimawh tak ruahmantu dik tak chu tu nge ni?

¹⁰ Serhtan loh Jentail Kornelia chu Kristian a nih hnu kum 13 vêlah, Juda Kristian ṭhenkhat chuan serhtan chu a la ṭûl niin an sawi a. (Tirhkohte 15:1, 2) Antiokei khuaa unaute chu, chu mi chungchângah an inhnial a. Chuvângin, upate chuan Paula chu Jerusalemah kal a, governing body hnêna chu mi chungchâng zâwt tûrin ruahmanna an siam ta a ni. Mahse, chuta va kal tûra ruahmanna siamtu dik tak chu tu nge ni? Paula chuan: “Hriattîrna avângin ka han kal  a,” tiin a sawi. Thil awm dân kaihruaitu Krista chu governing body hmanga zawhna chhângtu a ni tih a chiang hle.—Galatia 2:1-3.

11. (a) Juda Kristian ṭhenkhat chuan serhtan chungchâng eng nge an la rin cheu? (b) Paula’n Jerusalema upate chu inngaitlâwm takin a thlâwp tih engtin nge a lantîr? (Footnote en rawh.)

¹¹ Krista chuan governing body chu Juda mi ni lo Kristiante tân serhtan a ngai tawh lo tih tichiang tûrin a kaihruai a. (Tirhkohte 15:19, 20) Mahse, kum tam tak a liam hnuah, Juda Kristian tam tak chuan an fapate serh an la tan zawm zêl a ni. A hnuah, Jerusalema upate chuan Paula’n Mosia Dân a zah lo tih an hria a. Tichuan, upate’n Paula chu Dân a zahzia lantîrtu thil engemaw ti tûrin an phût a ni. * (Footnote en rawh.) (Tirhkohte 21:20-26) Dân a zahzia mite’n an hmuh theih nân biak inah mi pali hruai tûrin an hrilh a. Paula’n a duh chuan: ‘Awmzia a nei lo! Engvângin nge hei hi ti tûra min phût? Serhtan chungchâng hre thiam lo Juda Kristiante hi buaina siamtute an ni,’ tiin a sawi thei a. Mahse, upate chuan Kristian zawng zawng chu inpumkhat tûrin an duh tih Paula’n a hriat avângin an kaihhruainate chu inngaitlâwm takin a zâwm a ni. Isua a thih khân, Mosia Dân chu tihtâwpin awm mah se, Isua’n hun rei tak chhûng serhtan chungchânga buaina awm a phal chhan kan ngaihtuah mai thei a ni.—Kolossa 2:13, 14.

12. Engvângin nge Krista chuan serhtan chungchânga buaina a chinfel hmain hun engemaw chen a liamtîr a nih mai theih?

¹² Hriatthiamna thar mila insiamrem tûr chuan hun pêk a ngai thei a. Juda Kristian ṭhenkhat tân Dân hnuaiah an awm tawh lo tih pawm nân hun a ngai a ni. (Johana 16:12) Serhtan chu Pathian nêna inlaichînna ṭha neihna atâna chhinchhiahna angin an lo thlîr reng tawh a. (Genesis 17:9-12) Mi dangte chuan an danglam avânga an Judapuite tihduhdah an nih an hlau bawk. (Galatia 6:12) Mahse, a hun takah, Krista chuan Paula kaltlanga lehkhate thawnin an hnênah kaihhruaina a pêk belhchhah a ni.—Rom 2:28, 29; Galatia 3:23-25.

13. Tûn laiah, Krista kaihhruaina thlâwp tûrin engin nge min ṭanpui thei?

¹³ Krista chu tûn thlengin Kristian kohhran Hruaitu a la ni reng a. Chuvângin, inawpna pâwlin kan hriatthiam loh inthlâk danglamna a siam a nih chuan, Krista’n tûn hmaa Pathian mite a kaihhruai dân chu ngaihtuah ang che. Josua hunah leh tirhkohte hunah pawh, Krista chuan Pathian mite humhim a, an rinna tichak lehzual a, inpumkhata an awm theih nân kaihhruaina ṭha tak takte a pe reng a ni.—Hebrai 13:8.

14-16. Engtin nge “bawi rinawm leh fing” aṭanga lo kal kaihhruaina chuan Krista’n kan rinna chak reng tûra min ṭanpui a duhzia a finfiah?

¹⁴ Tûn laiah, “bawi rinawm, fing tak”  chuan kan mamawh kaihhruainate chu a hun takah min pe a. (Matthaia 24:45) Chu kaihhruaina chuan Isua’n min ngaihsak tih a finfiah a ni. Fa pali nei Marc-a chuan: “Setana’n chhûngkuate dovin, kohhrante chak lo tûrin a bei mêk a. Chawlhkâr tina chhûngkuaa Pathian biakna nei tûra tûn laia fuihna kan dawn hi chhûngkaw lû tâna thuchah chiang tak a ni—i chhûngkua vênghim rawh!”

¹⁵ Krista min kaihhruai dân kan hmuh hian, kan rinna chak reng tûra ṭanpui min duhzia kan hria a. Entîr nân, kohhran upa Patrick-a chuan: “A tîr chuan, ṭhenkhatin chawlhkâr tâwpa thlawhhma rawngbâwlna atâna mi tlêmtê inhmuh khâwm chu thil phûrawm lo tak niin an ngai,” tiin a sawi. Mahse, hei hi Isua’n kohhrana mi tinte a ngaihsakzia lantîrtu inthlâk danglamna a ni tiin a sawi a ni. Entîr nân, chu ruahmanna chuan unau zakzumte, a nih loh leh thlawhhma rawngbâwlnaa tel ngai lote chu ṭangkai leh hmantlâk nia inhriatna a neihtîr lehzual a. Chu chuan an rinna a tichak a ni.

¹⁶ Krista chuan he leia hna azawnga hna pawimawh ber thu hrilh rawngbâwlna chu ngaihven reng tûrin min ṭanpui bawk. (Marka 13:10 chhiar rawh.) Kohhran upa ni thar André-a chuan Jehova inawpna pâwl aṭanga lo kal kaihhruaina thar engpawh chu zawm a tum reng ṭhîn a. Ani chuan: “Branch office personnel-in Bethel-a rawngbâwltute a tihtlêmna chuan hun hmanhmawhthlâk tawhzia leh thu hrilh hnaa ṭan kan lâk a ṭûlzia ngaihven tûrin min hriatnawntîr a ni,” tiin a sawi.

17, 18. Inthlâk danglamnate mila insiamremna kan neih aṭanga hlâwkna kan hmuh dânte chu engvângin nge kan ngaihven tlat ang?

¹⁷ Min awp mêktu, kan Lal Isua Krista hnên aṭanga kan dawn kaihhruaina chuan  tûnah leh nakinah min ṭanpui ang. Tûn hnai maia inthlâk danglamnate mila i insiamrem avânga hlâwkna i neihte chu ngaihven tum tlat ang che. Chhûngkuaa Pathian biakna in neih hunah, inkhâwm leh rawngbâwl dân inthlâk danglamna siamte chuan i chhûngkua a ṭanpui dânte chu in sawiho thei a ni.

¹⁸ Jehova inawpna pâwl aṭanga lo kal kaihhruainate zawmnain rah ṭha tam tak a chhuah tih i hriat chuan, chu kaihhruaina chu zawm a awlsam lehzual ang a, i hlim bawk ang. Entîr nân, thu leh hla chhuahte chu tûn hma anga tama kan tihchhuah tawh loh avângin, sum kan hman tlêm phah a. Chu bâkah, thiamna tharte kan hman avângin mi tam lehzualte hnênah chanchin ṭha kan thlen thei a ni. Electronic-a thu leh hla chhuahte leh media-te chu a mi malin kan hmang thei ang em? Hei hi inawpna pâwl thil neihte fing taka hmang tûra min duhtu Krista, kan thlâwp theih dân kawng khat a ni.

19. Engvângin nge Krista kaihhruaina chu kan thlâwp ang?

¹⁹ Krista kaihhruaina kan thlâwp hian, kan unaute chu rinna nghet tak nei tûr leh inpumkhat lehzual tûrin kan ṭanpui a. André-a chuan khawvêl puma Bethel chhûngkua tihtlêm chungchânga tûn hnai maia inthlâk danglamna chu heti hian a sawi a ni: “Chûng inthlâk danglamnate mila insiamremtu Bethel-a rawng lo bâwl ṭhînte lantîr rilru put hmang ṭha chuan rinna leh zahna min neihtîr a ni. An chanvo dawn apiang chu lâwm takin an pawm a, Jehova tawlailîr rualin hmalam an pan zêl a ni,” tiin.

20, 21. (a) Engvângin nge min Hruaitu Krista chu kan rinchhan theih? (b) A dawta thuziakah eng zawhna nge kan sawiho vang?

²⁰ Nakin lawkah, min Hruaitu Isua Krista chuan “hneh zêl tûrin” hma a la ang a, tichuan “thil râpthlâk takte,” a ti ang. (Thu Puan 6:2; Sâm 45:4) Ani chuan, tûnah ngei pawh, khawvêl thara nun leh chuta thawh tûr, tholehte zirtîrna leh lei paradis chantîrna hna atân min buatsaih mêk a ni.

²¹ Eng pawh lo thleng se, kan Hruaitu leh kan Lal kan rinchhan phawt chuan, ani chuan khawvêl tharah min hruai lût ang. (Sâm 46:1-3 chhiar rawh.) Tûn laiah, inthlâk danglamnain kan beisei loh kawnga kan chunga nghawng a neih hian, a bîk takin a harsa thei a. Chutiang chu a thleng a nih chuan, rilru thlamuanna leh Jehova chunga kan rinna nghet tak chu engtin nge kan vawn tlat theih? Chu zawhna chu a dawta thuziakah kan sawiho vang.