1, 2. (a) Nuna inthlâk danglam thutna chuan engtin nge min nghawng theih? (A thupui chunga milem en rawh.) (b) Sâm 131-a târ lan angin, rilrua thlamuanna nei tûrin engin nge min ṭanpui thei?

LIOYD-a leh Alexandra-i te chu Bethel-a kum 25 aia tam rawng an bâwl hnuah thlawhhmaa rawngbâwl tûra tih an ni a. A tîr chuan an lung ni lo a. Lloyd-a chuan: “Bethel leh ka chanvo chu ka ta liau liau ni hian ka ngai a. Inthlâk danglamna siam a nih chhante chu ṭha ka ti a; mahse, chawlhkâr tam tak leh thla tam tak chhûng chu hnâwl nia inhriatna ka nei a ni,” tiin a sawi. Lloyd-a chuan inthlâk danglamna chu a ṭha zâwnga thlîr châng a nei a, lunghnual châng pawh a nei bawk.

² Nunah beisei loh taka inthlâk danglamna a thlen châng a awm a, chu chuan lungkhamna leh rilru hrehawmna nasa tak min thlen thei a ni. (Thufingte 12:25) Inthlâk danglamnate  chu pawm a harsat, a nih loh leh chu mi mila insiamrem a harsat hunah rilrua thlamuanna nei reng tûrin eng nge kan tih theih? (Sâm 131:1-3 chhiar rawh.) Tûn hma leh tûn laia Jehova chhiahhlawh ṭhenkhatte’n an nunah inthlâk danglam thutna an tâwk chung pawha rilrua thlamuanna an neih theih dân i lo en ang u.

3. Engtin nge Josefa nun chu a inthlâk danglam thut?

³ Entîr nân, Josefa chungchâng hi han ngaihtuah teh. Jakoba’n a fapate zîngah Josefa chu a hmangaih ber a. Chu chu a unaute chuan an thîk hle a ni. Josefa chu kum 17 mi a nih chuan, salah an hralh a. (Genesis 37:2-4, 23-28) Kum 13 chhûng chu sal a ni hmasa a, a hnuah lung in tângin Aigupta ramah hrehawm a tuar a. Josefa chu a hmangaih êm êm a pa hnên aṭanga hla takah a awm a ni. A dinhmun chuan beisei bo leh thinrimin a siam thei a; mahse, chutiang chuan a awm lo. Engin nge ani chu ṭanpui?

4. (a) Josefa chuan lung ina a awm laiin eng nge a tih? (b) Engtin nge Jehova’n Josefa ṭawngṭaina chu a chhân?

⁴ Lung ina a awm laiin, Josefa chuan Jehova’n a ṭanpui dânte chu a ngaihtuah ngei ang. (Genesis 39:21; Sâm 105:17-19) A tleirâwl laia a hmuh hrilh lâwkna mumang chungchâng a ngaihtuah avângin Jehova’n a awmpui ang tih pawh a ring nghet ngei ang. (Genesis 37:5-11) Jehova hnênah a thinlunga awm zawng zawng chu hrilhin a ṭawngṭai fo pawh a ni thei. (Sâm 145:18) Jehova chuan eng thil pawh thleng se, “a hnênah a awm” ang tih rinnghehna neihtîrin a ṭawngṭainate chu a chhâng a ni.—Tirhkohte 7:9, 10. * (Footnote en rawh.)

5. “Pathian thlamuanna” chuan Jehova rawngbâwl kan tum tlatna chu engtin nge a tihngheh theih?

⁵ Kan dinhmun harsat dân chu engpawh ni se, kan “ngaihtuahnate” min vênsaktu leh rilru hahdamna min neihtîrtu “Pathian thlamuanna” chu kan nei thei a. (Philippi 4:6, 7 chhiar rawh.) Kan rilru a beidawn a, hrehawm kan tih hian “Pathian thlamuanna” chuan Jehova rawngbâwl zêl tûr leh tlâwm lo tûrin min tichak thei a ni. Tûn laia chutiang dinhmun lo tawng tawh unaute entîrna ṭhenkhat i lo en ang u.

6, 7. Kan ṭawngṭaina chuan engtin nge rilrua thlamuanna nei leh tûra min ṭanpui theih? Entîrna pe rawh.

⁶ Ryan-a leh Juliette-i te chu temporary special pioneer an thawh lai mêka chawlhtîr an nih chuan an lunghnual hle a. Ryan-a chuan: “He mi chungchâng hi Jehova hnênah ṭawngṭaiin kan thlen nghâl a. A chunga rinna lantîrna tûr hun remchâng ṭha tak kan nei tih kan hria. Kohhrana mi tam tak chu thutaka an la puitlin loh avângin an tân rinna kawnga entawn ṭha siam thei tûrin Jehova hnênah ṭawngṭaiin ṭanpuina kan dîl a ni,” tiin a sawi.

⁷ Engtin nge Jehova’n an ṭawngṭaina chu a chhân? Ryan-a chuan: “Kan ṭawngṭai zawh chuan a tîra kan neih a ṭha lo zâwnga thil thlîr dân leh lungkhamnate chu a bo ta a. Pathian thlamuanna chuan kan  thinlung leh kan ngaihtuahnate chu min vênsak a ni. Rilru put hmang dik kan neih reng chuan Jehova tân mi ṭangkai tak kan ni reng thei tih kan hre bawk,” tiin a sawi.

8-10. (a) Kan lungkham hunah engtin nge Pathian thlarau chuan min ṭanpui theih? (b) Jehova’n a rawngbâwlna kan ngaihven tlat chuan engtin nge min ṭanpui theih?

⁸ Pathian thlarau chuan rilru hahdamna min neihtîr theih bâkah, nuna thil pawimawh tak zette hre thiam tûra min ṭanpuitu Bible chângte min hriatchhuahtîr thei bawk. (Johana 14:26, 27 chhiar rawh.) Kum 25 dâwn lai Bethel-a rawng lo bâwl tawh ṭhîn Philip-a leh Mary-te nupa chunga thilthleng hi han ngaihtuah teh. Thla li chhûngin an nu te ve ve leh an chhûngkhat dangte an thi a, rilru lam buaina nasa tak nei Mary pa chu an enkawl a ngai bawk.

⁹ Philip-a chuan: “Engemaw chen chu ka chingfel thei a; mahse, thil engemaw kim lo ni hian ka hria a. Vênnainsâng zir tûr thuziaka Kolossa 1:10-12 chu ka hmu ta a. Chhelna chu ka lantîr ngei mai; mahse, a famkim erawh chuan a ni lo. “Hlim taka chhelna leh dawhtheihna tinrêng,” ka neih a ngai a ni. He Bible châng hian ka hlimna chu ka dinhmuna innghat ni lovin, ka nuna Pathian thlarau hnathawh dân azir a ni tih min hriatchhuahtîr a ni,” tiin a sawi.

¹⁰ Philip-a leh Mary-i chuan Jehova rawngbâwlna an ngaihven tlat avângin, kawng tam takin malsâwmna an dawng a. Bethel aṭanga an chhuah hnu rei vak lovah, hmasâwn chak tak leh chawlkâr khata vawi khat aia tam zirna nei duh Bible zirpuite an hmu a. Mary-i chuan: “Anni chu kan hlimna an ni a, engkim a ṭha zêl ang tia Jehova’n min hrilh ang a ni,” tiin a sawi.

11, 12. (a) Jehova’n a malsâwm theih nân Josefa’n eng thil nge a tih? (b) Engtin nge Jehova’n mal a sâwm?

¹¹ Kan nunah inthlâk danglamna a awm thut hian, kan buainate chauh ngaihtuahin kan lungkham hle thei a. Chutiang chu Josefa chungah a thleng thei a ni. Mahse, ani chuan a dinhmuna a tih theih ṭha ber chu a ti a. Josefa chuan Potiphara tâna a thawhrim ang bawkin, tân in vêngtuin ti tûra a tih apiang chu theih tâwp chhuahin a ti a ni.—Genesis 39:21-23.

¹² Ni khat chu, Pharaoa lal in chhûnga rawngbâwl lung in tâng pahnih enkawl tûrin Josefa chu mawhphurhna pêk a ni a. Josefa chu an chunga ngil a neih avângin an lungkhamnate leh zan hmasaa anmahni  tibuaitu an mumangte chu a hnênah an hrilh ngam a ni. (Genesis 40:5-8) Chutianga an tîtîna chuan a tâwpah lung in ata a chhuah zalêntîr ang tih a tîrin Josefa’n a hre lo. Kum hnih a liam hnu chuan, lung in aṭangin a chhuak a, Aigupta rama rorêltu thiltithei tak a lo ni ta a. Josefa aia thuneitu awmchhun chu Pharaoa chauh a ni!—Genesis 41:1, 14-16, 39-41.

13. Kan dinhmun chu engpawh ni se, Jehova malsâwmna dawng thei tûrin eng nge kan tih theih?

¹³ Josefa angin, kan thunun theih loh dinhmunahte kan awm thei a. Mahse, dawhtheihna kan lantîr a, theih tâwp kan chhuah chuan, Jehova’n mal min sâwm ang. (Sâm 37:5) Rilru buainate leh lungkhamnate kan nei a nih pawhin, “kan bei a dawng” lovin, beisei bo kan ni lo. (2 Korinth 4:8) Rawngbâwlna kan ngaihven tlat chuan Jehova’n min awmpui ang.

14-16. Chanchin ṭha hriltu Philipa nun chu inthlâk danglam mah se, engtin nge ani chuan a rawngbâwlna chu a ngaihven tlat?

¹⁴ Chanchin ṭha hriltu Philipa chu nuna inthlâk danglamnate awm chung pawha rawngbâwlna ngaihven tlattu tân entawn tûr ṭha tak a ni. Ṭum khat chu, Jerusalemah chanvo thar a nei a. (Tirhkohte 6:1-6) A hnuah, thil engkim a inthlâk danglam ta a ni. Stephena tihhlum a nih hnuah, Kristiante chungah tihduhdahna nasa tak a thleng a, Jerusalem aṭangin an tlânchhia a. Philipa erawh chu Jehova rawngbâwl zawm zêl a duh avângin chanchin ṭha hrilh mamawhna hmun Samari khuaah a kal ta a ni.—Matthaia 10:5; Tirhkohte 8:1, 5.

¹⁵ Philipa chuan Pathian thlarau thianghlim kaihhruaina hmun apianga kal chu a duh a. Chuvângin, Jehova’n ani chu chanchin ṭha la hre lo mite hnêna thu hril tûrin a hmang a ni. Juda mi tam tak chuan Samari mite chu an hmusitin, ṭha lo takin an cheibâwl a. Mahse, Philipa chuan inpâwng huatna a nei lova, chanchin ṭha chu phûr takin a hrilh a. Samari mite chuan a thusawi chu “rilru hmunkhatin” an ngaithla a ni!—Tirhkohte 8:6-8.

¹⁶ Chu mi hnuah, Pathian thlarau chuan Philipa chu Jentail mite awmna Asdod khua leh Kaisari khuaa thu hril tûrin a tîr a. (Tirhkohte 8:39, 40) Tichuan, Philipa nunah inthlâk danglamna a awm leh a. Chutah chuan awmhmun khuarin, chhûngkua a din ta a ni. Philipa nun chu engtiang pawhin inthlâk danglam mah se, a rawngbâwlnaah a buai reng a, Jehova’n amah leh a chhûngte chu mal a sâwm zawm zêl a ni.—Tirhkohte 21:8, 9.

17, 18. Kan nun chu kawng engemaw taka a inthlâk danglam chuan rawngbâwlna ngaihven tlatnain engtin nge min ṭanpui ang?

 ¹⁷ Hunbi kima rawngbâwl tam tak chuan an dinhmunte inthlâk danglam mah se, rawngbâwlna an ngaihven tlatnain hlimna leh rilru ṭha nei reng tûrin a ṭanpui tih an sawi. Entîr nân, South African rama awm nupa tuak khat Osborne-a leh Polite-ite’n Bethel an chhuahsan chuan hunbi neia hnathawhna leh awmna tûr hmun chu awlsam taka an hmuh theih an inring a. Mahse, Osborne-a chuan: “Vânduaithlâk takin, kan beisei angin, hna kan hmu nghâl lo,” tiin a sawi. Polite-i chuan: “Thla thum chhûngin hna kan hmu lo va, sum khâwl pawh kan nei hek lo. Chona lian tak a ni,” tiin a sawi.

¹⁸ Osborne-a leh Polite-i chu an dinhmun khirh tak hmachhawn tûrin engin nge ṭanpui? Osborne-a chuan: “Kohhranna unaute nêna thu hrilhna chuan rawngbâwlna ngaihven tlat tûr leh rilru ṭha pu tûrin nasa takin min ṭanpui,” tiin a sawi. Lungkham neia ina ṭhut reng ai chuan, rawngbâwlnaa buai reng chu an thlang zâwk a. Chu chuan hlimna a va thlen nasa tak êm! Osborne-a chuan: “Hna hmu tûrin kan zawng chhun zawm zêl a, a tâwpah chuan kan hmu ta,” tiin a sawibelh a ni.

19-21. (a) Rilrua thlamuanna nei reng tûrin engin nge min ṭanpui ang? (b) Beisei loh inthlâk danglamna mila insiamremna chu engtin nge kan hlâwkpui theih?

¹⁹ Kan hriat tâk angin, kan dinhmun azira a ṭha thei ang bera thil kan tih a, Jehova kan rinchhan tlat chuan, eng thil pawh thleng se, rilrua thlamuanna kan nei reng thei ang. (Mika 7:7 chhiar rawh.) A tâwpah, inthlâk danglamna mila insiamremna chuan Jehova nêna kan inṭhian ṭhatna chu a tinghet lehzual tih kan hria ang. Polite-i chuan mawhphurhna dang chelh tûra Bethel aṭanga kan chhuahna chuan nun chu harsa anga a lan hunah pawh Jehova rinchhan tih awmze dik tak hre tûrin min zirtîr  tih a sawi a. “Amah nêna kan inṭhian ṭhatna chu a nghet lehzual a ni,” tiin a sawi.

²⁰ A chunga kan sawi tâk Mary-i chu kum upa tak a pa enkawl reng chungin pioneer a la thawk reng a. Ani chuan: “Lungkhamna ka neih hian, ṭawngṭaina atâna hun lain, chawlh hahdam ka mamawh tih ka hria. Jehova kuta innghah chu ka zir tûr pawimawh ber a la ni reng a, nakinah phei chuan a ṭûl lehzual ang,” tiin a sawi.

²¹ Lloyd-a leh Alexandra-i chuan an nuna inthlâk danglamnate chu an beisei loh kawnga an rinna fiahtu a ni tih an pawm a. Mahse, chûng fiahnate’n a ṭanpui tak zet tih an hria. An rinna chu buainate an neih hunah anmahni thlamuan thei khawpin a chak tâwk tih an hre ta a, mi ṭha zâwk niin an inhre bawk.

22. Kan dinhmun azira a ṭha thei ang bera kan tih chuan, eng nge kan chian theih?

²² He khawvêlah hian, kan nunah inthlâk danglam thutna a awm thei a. Jehova rawngbâwlnaah chanvo dang kan dawng pawh a ni thei a, kan hrisêlna a ṭha lo ṭan a, a nih loh leh kan chhûngte chu kawng dang daiha kan enkawl a ngai pawh a ni thei bawk. Eng thil pawh thleng se, Jehova’n a ngaihsak che tih leh a hun dik takah a ṭanpui ang che tih ring tlat rawh. (Hebrai 4:16; 1 Petera 5:6, 7) Tûnah chuan i dinhmuna i tih theih ṭha ber chu ti ang che. Kan Pa, Jehova hnênah ṭawngṭaiin, amah rinchhan tlat tum ang che. I dinhmun chu engtiang pawhin inthlâk danglam mah se, Jehova hnên aṭanga lo kal rilrua thlamuanna i nei reng thei a ni.