1, 2. (a) Isua nunah eng hna nge pawimawh ber a, engvângin nge? (b) “Pathian hnathawhpuite” kan nih anga hlawhtling tûrin eng nge kan tih ngai?

ISUA KRISTA chu thingrem siamtu a ni a, a hnuah rawngbâwltu a ni. (Marka 6:3; Rom 15:8) Chu hna pahnih chu a thawk thiam hle a. Thingrem siamtu a nih angin, thinga thil ṭha takte siam nân a hmanruate hman dân a zir a ni. Rawngbâwltu a nih angin, Bible hriatna thûk tak a neih chu Pathian Thu-a thutak hre thiam tûra mi nâwlpuite ṭanpui nân a hmang a. (Matthaia 7:28; Luka 24:32, 45) Kum 30 mi a nih chuan thingrem siam hna chu chawlhsanin, rawngbâwlna chu hna pawimawh ber tih a hriat avângin a thawk ṭan ta a ni. Pathian Ram chanchin ṭha hrilh chu Pathianin leia a rawn tirh chhan zînga pakhat a ni tih a sawi. (Matthaia 20:28; Luka 3:23; 4:43) Isua chuan chanchin ṭha hrilh chu a nunah a dah pawimawh ber a, mi dangte pawh chutianga ti ve tûrin a duh a ni.—Matthaia 9:35-38.

² Kan zînga a tam zâwk chu thingrem siamtu ni lovin, mi dangte hnêna chanchin ṭha zirtîra rawngbâwltute kan ni a. He hna hi Pathian telna hna pawimawh tak a ni. Dik tak chuan, “Pathian hnathawhpuite,” tia koh kan ni a. (1 Korinth 3:9;  2 Korinth 6:4) Fakna hla phuahtuin: “I thu infinkhâwm chu thutak a ni,” tia a sawi hi kan pawm a ni. (Sâm 119:159, 160) Jehova thu chu thutak a ni. Chuvângin, kan rawngbâwlnaah ‘thutak thu fel taka hman’ chu kan duh a. (2 Timothea 2:15 chhiar rawh.) Jehova, Isua, leh Lalram chungchâng mi dangte kan zirtîrnaa kan hmanraw bul ber Bible chu thiam lehzuala hman kan tum tlat a ni. Kan rawngbâwlnaa hlawhtlinna kan neih theih nân Jehova inawpna pâwl chuan hmanrawn dang ṭangkai tak takte min pe a, chûng hmanruate hman dân chu kan hriat a ngai a. Chûngte chu kan Zirtîrna Hmanraw Bâwmah a awm a ni.

3. Kan rawngbâwlnaah eng nge kan ngaihven tlat ang a, Tirhkohte 13:48-na chuan chutianga ti tûrin engtin nge min ṭanpui?

³ Kan Thu Hrilhna Hmanraw Bâwm tia ko lova, Zirtîrna Hmanraw Bâwm tia kan koh chhan chu i ngaihtuah mai thei. “Thu hrilh” tih chu thuchah puanchhuah tûr tihna a nih vâng a ni. Mahse, “zirtîr” tih chu thuchah hrilhfiah tûr tihna a ni a, chutianga hrilhfiah a nih chauhvin, miin a hre thiamin, a thu hriatte nunpui tûra chêttîrin a awm ang. He khawvêl tâna hun tlêmtê a la awm chhûng hian, Krista zirtîrte an nih theih nân mite chu thutak zirtîr a, Bible zirpui ṭan chu kan ngaihven tlat tûr a ni. Chu chu ṭhahnemngai taka ‘chatuana nun duhna neite’ zawng chhuak a, Jehova rawngbâwl ṭan tûra kan ṭanpui a ngai tihna a ni.—Tirhkohte 13:44-48 chhiar rawh.

4. Engtin nge ‘chatuana nun duhna rilru dik tak neite’ chu kan zawn hmuh theih?

⁴ Engtin nge ‘chatuana nun duhna neite’ chu kan zawn hmuh theih? Kristian hmasate tân chuan, chûng mite zawn hmuh theih dân kawng awmchhun chu thu hrilh hi a ni. Isua chuan a zirtîrte chu: “Khaw lianah emaw, khaw têah emaw in luhna apiangah a thleng tlâk mi tûr che u zawng chhuak ula,” tiin a hrilh a. (Matthaia 10:11) Keini pawhin chutianga kan tih a ngai a ni. Ni e, mite chuan rilru dik an pu lova, an chapova, Pathian an ngaihsak lo a nih chuan, anni chu chanchin ṭha ngaithla tûrin kan beisei lo. Mi rilru dik tak pute, mi inngaitlâwmte, leh thutak hre duh tak zettute chu kan zawng a. Mite kan zawnna hna chu Isua thingrem siamtu a nih laia a hnathawh dân nên kan khaikhin thei a ni. Thil engemaw, kawngkhâr, nghâwngkawl, a nih loh leh thil dangte a siam hmain thing ṭha tak a zawn hmuh hmasak a ngai a. A hnuah, a hmanraw bâwm a la a, a thiamnate hmangin, a thil siam tûr chu a siam ta a ni. Chutiang bawkin, tûn laiah pawh, mi rilru ṭhate kan zawn hmuh phawt a ngai a, chu mi hnuah, zirtîr ni tûra ṭanpui nân kan hmanruate leh thiamnate chu kan hmang tûr a ni.—Matthaia 28:19, 20.

5. Kan Zirtîrna Hmanraw Bâwma hmanruate chungchânga kan hriat ngai chu eng nge ni? Entîrna pe rawh. (A thupui chunga milem en rawh.)

⁵ Hmanraw Bâwma hmanraw tin chuan tum bîk an nei ṭheuh va. Entîr nân, thingrem siamtu a nih laia Isua hmanruate chu han ngaihtuah teh. * (Footnote en rawh.) A hmanruate chu tehna, chhinchhiahna, thing tanna, thil verhna, leh thing nawr mâmna, leh thing bung nawite zawmkhâwm nâna hman hmanruate a ni. Chutiang bawkin, kan Zirtîrna Hmanraw  Bâwma hmanraw tin chuan tum bîk an nei ṭheuh va. Chuvângin, chûng hmanraw pawimawh takte hman dân chu i lo en ang u.

6, 7. (a) Contact card-te chu engtin nge i hman? (b) Engvângin nge kohhran inkhâwm sâwmnate chu kan hman?

⁶ Contact Card-te. He hmanrua hi tê hle mah se, tu nge kan nih tih hriltu leh kan website jw.org kawhhmuhtu hmanraw ṭangkai tak a ni a. Mite’n kan website aṭangin kan chanchin an hriat belh theih bâkah, Bible zirna pawh an dîl thei bawk. Tûn thleng hian, mi 4,00,000 aia tamte chuan jw.org aṭangin Bible zirna an dîl a, nî tin mi a za têlin chutiang chuan an dîl a ni! Contact card-te chu i pai reng thei a, i mi tawhte i biak apiangin i hmang thei a ni.

⁷ Sâwmnate. Kan inkhâwm sâwmna lehkha phêkah chuan: “Jehova Thuhretute nêna Bible zir tûrin kan sâwm a che,” tih a inziak a. Chu chu “vântlâng inkhâwm kan neihah,” a nih loh leh “mi pakhat nên hian,” i ti thei a ni tiin a sawi bawk. Chuvângin, sâwmna chuan mite hnênah tu nge kan nih tih a hrilh bâkah “rilrua retheite” chu kan ruala Bible zir tûrin a sâwm bawk a ni. (Matthaia 5:3) Ni e, mite chuan Bible zir an duh emaw, duh lo emaw pawh ni se, anni chu kan inkhâwmnaa lo tel tûra sâwm an ni a. Kan inkhâwmnaa an lo tel chuan Bible chungchâng tam tak an zir thei tih an hria ang.

8. Mite chu kan inkhâwmnaa vawi khat tal an lo tel chu engvângin nge a pawimawh? Entîrna pe rawh.

⁸ Mite chu a lo berah vawi khat tal kan inkhâwma lo tel tûra sâwm chu a pawimawh hle a. Engvângin nge? Inkhâwma an lo tel hian, sakhaw dik lote nêna inang lo takin, Jehova Thuhretute chuan Bible aṭangin thutak an zirtîr tih leh Pathian chungchâng hre tûrin mite an ṭanpui tih an hmu ang. (Isaia 65:13) Entîr nân, United States-a nupa tuak khat Ray-a leh Linda-i chuan kum engemaw kal ta khân, chutianga danglamna chu an hmu a. Anni chuan Pathian an ring a, a chanchin hriat belh an duh a ni. Chuvângin, an awmna biala awm biak in zawng zawng an tlawh a, an duh ber pâwla an awm hmain thil pahnih hriat an tum a. Pakhatnaah, biak inah chuan thil engemaw an zir ang, pahnihnaah, chu mi pâwla mite chu Pathian rawngbâwltu an nihna nêna inmilin an inthuam tûr a ni tih hi. Biak in a tam êm avângin kum rei tak chutiang chuan an ti a. Mahse, an lunghnual hle. An kalna biak in apiangah zir mumal engmah a awm lova, an mi leh sate pawh zahawm lo takin an inthuam a ni. An tlawh tum biak in zawng zawng an tlawh hnu chuan, Linda-i chu hna thawk tûrin a kal a, Ray-a chu in lamah a haw a. Haw kawngah chuan, Kingdom Hall awmna kawngah a kal a. ‘Eng nge a an tih hriat nân ka’n lût teh ang,’ tiin a lût ta a. A thiltawn azawnga ṭha ber chu a tawng ta! Kingdom Hall-a mi tinte chu ngil an neiin, an hawihhawm hle a, mawi takin an inthuam a. Ray-a chu tlar hmasa berah a ṭhu a, a thu hriatte chu a ngaina hle! He thiltawn hian vawi khat a inkhâwmnaa: “Pathian in zîngah a awm tak zet” tia sawitu mi pakhat chungchâng tirhkoh Paula sawi chu min hriat chhuahtîr a ni. (1 Korinth 14:23-25) Chuta ṭang chuan, Ray-a chu Chawlhni tin a inkhâwm ta a. Tichuan, chawlhkâr chhûnga  neih inkhâwmahte pawh a tel ṭan a. Linda-i pawh inkhâwmahte a rawn tel ṭan a, kum 70 chuang ni tawh mah se, Bible an zir a, baptisma an chang ta a ni.

9, 10. (a) Engvângin nge tract-te chu hman a awlsam? (b) Pathian Ram Chu Eng Nge Ni? tih tract hman dân chu hrilhfiah rawh.

⁹ Tract-te. Kan hmanraw bâwmah tract chi riat kan nei a. Hman awlsam tak a nih bâkah inbiak ṭanna atâna ṭha tak a ni. Kum 2013-ah chûng tract zînga a hmasa ber chu tihchhuah a nih aṭangin tlûklehdingâwn nga lai chhutchhuah a ni tawh! Chûng tract-te chu pianhmang in ang vek a ni a. Pakhat i hman thiam tawh chuan, a vaiin i hmang thiam a ni mai! Tuemaw i biak ṭan theih nân engtin nge tract chu i hman theih?

¹⁰ Pathian Ram Chu Eng Nge Ni? tih tract chu i hmang duh mai thei a. Phêk hmasa bera zawhna chu hmuhin heti hian zâwt rawh: “Pathian Ram chu eng nge ni tih i ngaihtuah ngai em? . . . i ti em?” Tichuan, he chhânna pathum zînga a thlan tûr chu zâwt ang che. A chhânna chu a dik emaw, dik lo emaw pawh ni se, tract chu keuvin “Bible Sawi Dân Chuan” tih chu hmuh la, chuta târ lan Daniela 2:44 leh Isaia 9:6 chu chhiar rawh. In inbiak zawh chuan, a hnung lama “Ngaihtuah Tûr” tih thupui hnuaia “Pathian Ram rorêlna hnuaia nun chu eng ang nge ni dâwn?” tih zawhna chu zâwt la. In inbiak leh hunah, chu zawhna chu i chhâng thei a ni. In inhmuh leh hunah, Bible zirpui ṭan nâna kan hmanraw pakhat Pathian Min Pêk Chanchin Ṭha! tih brochure zirlai 7-na chu i hmang thei a ni.

11. Kan magazine-te chu engtia duan nge a nih a, chu mi chungchângah eng nge kan hriat ngai?

¹¹ Magazine-te. Vênnainsâng leh Awake! chu khawvêla tihchhuah tam ber leh lehlin tam ber magazine a ni! Ram hrang hranga mi tam takin he magazine an chhiar avângin, a kâwma thupuite chu mi tinte ngaihven tûr zâwnga duan a ni a. Nuna thil pawimawh ber ngaihven tûra mite kan ṭanpuinaah he magazine hi kan hmang tûr a ni. Chuvângin, hêng magazine hi eng ang mite tâna duan nge a nih kan hriat hmasat a ngai a ni.

12. (a) Awake! chu tute tânna duan nge a nih a, chu chuan eng nge a tum? (b) Tûn hnai mai khân, he hmanrua i hman avângin eng thiltawn ṭha nge i neih?

¹² Awake! chu Bible hriatna nei tlêmte, a nih loh leh hre lo hulhualte tâna duan a ni a. Chûng mite chuan Kristian zirtîrna chu an hre lo hulhualin, sakhuana an ring lo pawh a ni thei a, a nih loh leh Bible-in an mi mal nunah a ṭanpui thei tih an hre lo pawh a ni thei bawk. Awake!-in a tum ber chu Pathian a awm tih chhiartute rintîr hi a ni. (Rom 1:20; Hebrai 11:6) Bible hi “Pathian thu a ni,” tih ring thei tûrin a ṭanpui bawk. (1 Thessalonika 2:13) Kum 2018-a tihchhuahah chuan: “Hlimna Kawng,” “Chhûngkaw Hlimna Thurûk 12,” tih leh “Lusûnte Tâna Ṭanpuina,” tih thupui pathum a awm a ni.

13. (a) Vântlâng tâna tihchhuah Vênnainsâng chu tute tâna duan nge a nih? (b) Tûn hnai mai khân, he hmanrua i hman avângin eng thiltawn ṭha nge i neih?

¹³ Vântlâng tâna tihchhuah Vênnainsâng-in a tum ber chu Pathian leh Bible zahna engemaw chen nei tawhte hnêna Bible zirtîrnate hrilhfiah hi a ni a. Bible chungchâng engemaw chen an hria pawh a ni  thei; mahse, Bible zirtîrna chu dik takin an hre thiam lo. (Rom 10:2; 1 Timothea 2:3, 4) Kum 2018-a tihchhuah pathumte chuan: “Bible Hi Tûn Laiah A La Hman Tlâk Em?,” “Kan Hma Lam Hun Tûr Chu Eng Nge Ni?,” tih leh “Pathianin A Ngaihsak Che Em?” tih zawhnate chu a chhâng a ni.

14. (a) Kan Zirtîrna Hmanraw Bâwma video palite chu eng anga duan nge a nih? (b) Hêng video i hman avângin eng thiltawn ṭha nge i neih?

¹⁴ Video-te. Isua hun laia thingrem siamtu neih hmanraw awm chhunte chu kuta hman chi chauh a ni a. Mahse, tûn laiah, thingrem siamtute chuan electric tha hmanga thing zeina te, thil verhna te leh thil nawh mâmnate pawh an nei tawh a ni. Thu kan hrilh hunah, lehkha-a hmuh theih thu leh hla chhuahte bâkah, mite entîr tûr video ṭha tak takte kan nei tawh a. Kan hmanraw bâwma awm palite chu: Engvângin Nge Bible I Zir Ang?, Bible Zirnaah Eng Nge Thleng Ṭhîn?, Kingdom Hall-ah Eng Nge Thleng Ṭhîn?, tih leh Jehova Thuhretute—Tute Nge Kan Nih? tihte hi a ni. Video tâwite chu minute hnih aia tlêma chhuah zawh theih a ni a, tlawh hmasak ber atâna ṭangkai tak a ni a. Video seite chu tlawh kîr atân leh hun tam lehzual pe theite tâna hman theih a ni. Chûng video-te chuan mite chu Bible zir tûr leh kan inkhâwma lo tel tûra a chêttîr theih avângin hmanraw ṭangkai tak a ni.

15. Mite’n an ṭawnga kan video zînga a engemaw ber an en hian an chungah eng nghawng nge a neih theih? Entîrnate pe rawh.

¹⁵ Entîr nân, unaunu pakhat chuan Yapese ṭawng hmang, Micronesia ram aṭanga rawn insâwn nu pakhat chu a tawng a. Unaunu chuan Yapese ṭawngin Engvângin Nge Bible I Zir Ang? tih video chu a entîr a. Video a chhuah ṭan chuan, chu nu chuan: “Kan ṭawng a nih hi. A va mak ve! A awphawi aṭangin ka awmna thliarkâra mi a ni tih ka sawi thei. Kan ṭawngin a sawi!” tiin a sawi a. Chu mi hnu chuan, jw.org-a an ṭawnga hmuh theih zawng zawngte chu chhiar a, a en tûr thu a hrilh a ni. (Tirhkohte 2:8, 11 nên khaikhin rawh.) Entîrna dang leh chu United States-a awm unaunu a ni a, a vahpa chu khawmual danga awm a ni. Ani chuan a vahpa hnênah an ṭawnga hmuh theih, chu video vêk chu link-in a thawn a. Video a en hnu chuan unaunu hnênah email-in: “Khawvêl hi ramhuai thiltithei tak thununna hnuaiah a awm tih hian ka rilru a khawih hle a. Bible zirna ka dîl ta a ni,” tiin a thawn a ni. Kan rawngbâwlna khuahkhirhna rama awm a nih avângin chu chu thil phûrawm tak a va ni êm!

16. Hêng brochure-te tum bîk chu hrilhfiah rawh: (a) Pathian Thu Ngaithlain Chatuanin Nung Rawh. (b) Pathian Min Pêk Chanchin Ṭha! (c) Tute Nge Tûn Laia Jehova Duhzâwng Titute Chu?

¹⁶ Brochure-te. Lehkha chhiar thiam lote emaw, an ṭawnga Bible thu leh hla chhuah nei lote emaw chu engtin nge thutak kan zirtîr theih? Pathian Thu Ngaithlain Chatuanin Nung Rawh * tih brochure chu kan hmang thei a ni. (Footnote en rawh.) Bible zirna neih ṭanna atâna hmanraw ṭha tak chu Pathian Min Pêk Chanchin Ṭha! tih brochure hi a ni a. Mi chu a kâwm hnung lama thupui 14-te hmuhin, a ngaihven ber  pakhat chu i zâwt thei a ni. Tichuan, chu mi zirlai nên zirna ṭan ang che. Tlawhkîr i neih hunah chutiang chuan i tichhin ngai tawh em? Kan hmanraw bâwma brochure pathumna chu Tute Nge Tûn Laia Jehova Duhzâwng Titute Chu? tih hi a ni. Hei hi inawpna pâwl chungchâng kan Bible zirpuite zirtîrna atâna duan a ni a. Bible zirpuina kan neih apianga he brochure hman dân hriat nân, kum 2017 March thla chhuak, Kan Kristian Nun Leh Rawngbâwlna—Inzirna Lehkhabu chu en ang che.

17. (a) Bible zirpuina atâna hman lehkhabute chuan eng tum bîk nge an neih? (b) Baptisma chang zawng zawngte chuan eng nge an tih ngai a, engvângin nge?

¹⁷ Lehkhabu-te. Brochure hmanga zirna i ṭan hnu chuan, Bible Zirtîrna Dik Tak Chu Eng Nge Ni? tih lehkhabu chu eng hunah pawh i hmang thei a ni. He hmanrua hian mite chu Bible zirtîrna bulpuite hre lehzual tûrin a ṭanpui thei a. Kan Bible zirpuiin hma a sâwn a, chu lehkhabu a zir zawh chuan, Pathian Hmangaihnaah Chuan Invawng Ṭha Rawh tih lehkhabu nên i zirpui zawm thei a ni. He hmanrua hian zirlai chu nî tin nuna Bible thu bulte a nunpui theih dân a zirtîr ang. Baptisma a chan hnuah pawh, mi thar chuan chu lehkhabu a zawh hma loh a zir zawm zêl a ngai tih hria ang che. Chu chuan Jehova chunga rinna nghet tak nei tûr leh a laka rinawm tlat tûrin a ṭanpui ang.—Kolossa 2:6, 7 chhiar rawh.

18. (a) Thutak zirtîrtute kan nih angin, 1 Timothea 4:16-na chuan eng ti tûrin nge min fuih a, eng nge a rah chhuah? (b) Kan Zirtîrna Hmanraw Bâwm kan hman huna kan thiltum chu eng nge ni?

¹⁸ Jehova Thuhretute kan nih angin, mite chu chatuan nunnaa hruai thleng theitu “Chanchin Ṭha thutak thu” zirtîr tûra mawhphûrhna kan nei a. (Kolossa 1:3-5; 1 Timothea 4:16 chhiar rawh.) Chu mi tithei tûr chuan, Zirtîrna Hmanraw Bâwmah kan mamawh hmanruate a awm a ni. (“ Zirtîrna Hmanraw Bâwm” tih bâwm chu en rawh.) Chûng hmanruate chu a ṭha thei ang berin i hmang ang u. Hmanraw bâwma hmanruate hman dân tûr leh hman hun tûr chu mahnia thu tlûkna siam tûr a ni. Mahse, kan thiltum chu thu leh hla chhuahte sem chhuah mai a ni lo tih hriain, kan thuchah ngaihven lote hnênah kan pe lo vang. Kan thiltum chu mi ṭha te, mi inngaitlâwm te, Pathian hriat duhna nei tak zet te, leh ‘chatuana nun duhna neite’ zirtîra siam hi a ni.—Tirhkohte 13:48; Matthaia 28:19, 20.