ZIR TUR THUZIAK 41
“Hrehawm Nasa Tak” Chhûngin Rinawm Tlat Rawh
“A mi rinawm zawng zawngte u, Jehova chu hmangaih rawh u: Jehova chuan mi rinawm chu a humhim a.”—SAM 31:23, NW.
HLA 154 Kan Chhel Zêl Ang
THLIR LAWKNA *
1-2. (a) Hnamte chuan nakin lawkah eng nge an puanchhuah ang? (b) Kan chhân ngai zawhnate chu eng nge ni?
HNAMTE chuan hun rei tak chhûng an lo nghah tawh “muanna leh himna” chu an puangchhuak hlim hlawl angah han mitthla teh. Khawvêlah chutiang taka muanna a la awm ngai loh avângin an inchhuang mai thei a. Anni chuan khawvêl dinhmun chu an thunun thei tawh nia min rintîr an duh ang. Mahse, a hnua thil lo thleng tûrte chu an thunun thei hauh lo vang! Engvângin nge? “Chawp leh chilha boralna an chungah a thleng ang a, an pumpelh tawp lo vang,” tia Bible-in a hrilh lâwk vâng a ni.—1 Thes. 5:3.
2 Kan chhân ngai zawhna pawimawh takte chu: “Hrehawm nasa tak” chhûngin eng thilte nge thleng ang? Chumi hun chhûng chuan Jehova’n eng ti tûrin nge min beisei ang? Hrehawm nasa tak chhûnga rinawm tlat tûrin tûnah engtin nge mi mal taka kan inbuatsaih theih? tihte hi a ni.—Mt. 24:21.
“HREHAWM NASA TAK” CHHUNGIN ENG THILTE NGE THLENG ANG?
3. Thu Puan 17:5, 15-18-a sawi angin, engtin nge Pathianin “Babulon Khaw Ropui” chu a tihchhiat ang?
3 Thu Puan 17:5, 15-18 chhiar rawh. “Babulon Khaw Ropui” chu tihchhiat a ni ang! A chunga târ lan angin, hnamte chuan chumi huna thilthlengte chu an thunun thei lo vang. Engvângin nge? Pathianin ‘a duh zâwng an tihna tûrin an thinlunga a tirh’ dâwn vâng a ni. A duh zâwng chu eng nge ni? Kristianna ram * pawh tiamin, sakhaw dik lo lalram tihboral hi a ni. Pathian chuan a duh zâwng chu “ki sâwm nei, sakawlh sen tak” thinlungah chuan a dah ang. Ki sâwm chuan “sakawlh”—United Nations thlâwptu sawrkâr zawng zawngte chu a entîr a. (Thup. 17:3, 11-13; 18:8) Chûng sawrkârte chuan sakhaw dik lo an bei ang a, chu chu hrehawm nasa tak a inṭan tih chhinchhiahna a ni ang. Chu chu khawvêla thilthleng râpthlâk tak a ni ngei bawk ang.
4. (a) Hnamte chuan sakhaw dik lo an beih chhanah eng chhuanlam nge an siam mai theih? (b) Chûng sakhaw mi leh sa lo ni tawh ṭhînte chuan eng nge an tih ang?
4 Hnamte chuan Babulon Khaw Ropui an beih chhan atâna chhuanlam an siam mai theihte chu kan hre lo va. Anni chuan khawvêl sakhuate chu muanna dâltu leh sawrkârte chawk buaitu niin an sawi mai thei. A nih loh leh, sakhaw pâwlte chuan sum leh pai leh in hmun lo ram an ngah lutuk niin an sawi pawh a ni thei bawk. (Thup. 18:3, 7) Chu beihna chuan chûng sakhaw pâwla tel zawng zawngte a tiboral vek lo tûr chu thil inâwm tak a ni ang. Chu aiin, hnamte chuan chûng sakhaw pâwlte chu a tiboral zâwk dâwn niin a lang. Chûng pâwlte tihboral an nih hunah an mi leh sa lo ni tawh ṭhînte chuan an sakhaw hruaitute hlawhchhamzia chu an hria ang a, chûng sakhuate laka inthiar fihlîm chu an tum ngei ang.
5. Jehova’n hrehawm nasa tak chungchângah eng nge min tiam a, engvângin nge?
5 Bible chuan Babulon Khaw Ropui tihchhiatna chu engtianga rei nge a nih dâwn tih a târ lang lo va; mahse, hun rei lo te chhûng a ni ang tih erawh kan hria a. (Thup. 18:9, 10, 21) Jehova chuan a ‘mi thlante’ leh sakhaw dik dam khawchhuah theih nân, “chûng nîte” chu tihtawi a tiam a ni. (Mk. 13:19, 20) A nih leh, Jehova’n hrehawm nasa tak a inṭan aṭanga Armageddon indona a thlen hma inkârah eng ti tûrin nge min beisei ang?
BIAKNA THIANGHLIM CHU VUAN TLAT RAWH
6. Engvângin nge sakhaw dik lo nêna inzawmna tihchah mai chu a tâwk loh?
6 Thuziak hmasaa kan sawiho tâk ang khân, Jehova chuan amah betute chu Babulon Khaw Ropui aṭanga inla hrang tûrin a beisei a. Mahse, chutah chuan sakhaw dik lo nêna kan inzawmna tihchah mai aia tam a tel a. Sakhaw dik—Jehova biakna thianghlim chu nghet takin kan vuan tlat tûr a ni. Chutianga kan tih theih dân kawng hnih chu i lo ngaihtuah ang u.
Hun harsaah pawh, kan inkhâwmte i bânsan ngai lo vang u (Paragraph 7-na en rawh) *
7. (a) Engtin nge nungchang lama Jehova tehna fel takte chu kan zawm tlat theih? (b) Hebrai 10:24, 25-na chuan a bîk takin, tûna inkhâwm kan pelh loh a pawimawhzia engtin nge a sawi uar?
7 Pakhatnaah, nungchang lama Jehova tehna fel takte chu kan zâwm tlat tûr a ni. Khawvêlin a ngaihhlutte leh a tehnate chu kan pawm thei lo. Entîr nân, neih inang inneihna leh mawngkawhurna pawh tiamin, nungchang bawlhhlawhna ang chi rêng rêng chu kan pawm lo a ni. (Mt. 19:4, 5; Rom 1:26, 27) Pahnihnaah, kan Kristian unaute rualin Pathian kan be zawm zêl tûr a ni. Chu chu Kingdom Hall-ah emaw, a ṭûl dân azirin mi mal inah emaw, a rûkin emaw pawh ni se, kan awmna apiangah kan ti ang. Eng thil pawh thleng se, inkhâwma Pathian biak chu kan bânsan ngai lo vang. Dik tak chuan, ‘ni chu a lo hnai telh telh tih kan hriatin infuih tawn nasa lehzual’ tûra kan inkhâwm a ngai a ni.—Hebrai 10:24, 25 chhiar rawh.
8. Engtin nge kan thuchah ken chu nakin hunah thlâk danglam a nih mai theih?
8 Hrehawm nasa tak chhûngin, kan thuchah puanchhuah chu thlâk danglam a nih a rinawm. Tûnah chuan, Lalram chanchin ṭha hrilin, mite chu zirtîrahte siam kan tum a. Mahse, chutih hunah chuan rial den anga nâ, thuchah kan hrilh a ngai mai thei. (Thup. 16:21) Setana khawvêl tlu chhe mai tawh tûr chungchâng kan hril mai thei bawk. A hun takah chuan, kan thuchah puanchhuah tûr leh chu chu engtia puanchhuah tûr nge tih chiang takin kan hria ang. Kan rawngbâwlna hlenchhuah nâna kum za chuang lai kan lo hman tawh tih dânte hi kan la hmang zêl ang em? Nge ni a, tih dân dang kan hmang zâwk dâwn? Chumi hre tûr chuan kan nghah a ngai a ni. Engpawh ni se, huaisen taka Jehova rorêlna thuchah puanchhuah theihna chanvo hlu kan nei dâwn niin a lang!—Ezek. 2:3-5.
9. Hnamte chuan kan thuchah puanchhuah chu engtin nge an chhân lêt mai theih a; mahse, eng nge kan chian theih?
9 Kan thuchah puanchhuah chuan hnamte chu a tithinur ang a, anni chuan kan thu hrilhna tihtâwp hlentîr min tum ang. Chuvângin, tûna kan rawngbâwlnaa Jehova ṭanpuina kan rinchhan ang hian, nakinah pawh a ṭanpuina kan rinchhan a ngai ang. Pathianin a duh zâwng tihlawhtling tûrin a thiltihtheihnain min thuam ang tih kan chiang thei a ni.—Mik. 3:8.
PATHIAN MITE BEIHNA HUN ATAN INBUATSAIH RAWH
10. Luka 21:25-28-a sawi lâwk angin, mi a tam zâwkte chuan hrehawm nasa tak chhûnga thilthlengte chu engtin nge an chhân lêt ang?
10 Luka 21:25-28 chhiar rawh. Mite chuan hrehawm nasa tak chhûngin, khawvêla thil ngelnghet nia an ngaihte tlu chhe lai an hmuh chuan mak an ti ngei ang. Mihring chanchina hun harsa bera an awm avângin thih hlauh avânga ‘hrehawmin’ an awm ang a. (Zep. 1:14, 15) Chutih hunah chuan, Jehova mite tân pawh nun chu a harsa lehzual ngei ang. Khawvêla mi kan nih loh avângin, harsatna ṭhenkhat kan hmachhawn mai thei a. Nuna kan mamawh thil ṭhenkhatte nei lova kan awm a ngai pawh a ni thei bawk.
11. (a) Engvângin nge Jehova Thuhretute chu hnamte beih tum ber an nih ang? (b) Engvângin nge hrehawm nasa tak chu kan hlauh a ngaih loh?
11 Engtik hunah emaw chuan, an sakhua tihchhiatsaka awmte chu Jehova Thuhretute’n kan sakhuana kan la kalpui reng avângin an thin a rim hle thei a. Chu chuan, social media-ah pawh tiamin, mite thinrimna a tihsosân dân tûr chu kan mitthla thei a ni. Hnamte leh an chunga rorêltu Setana chuan sakhaw la ding awmchhun kan nih avângin min haw hle ang. Mahse, leia sakhua zawng zawng tihboral an tumna chu a hlawhtling lo vang. Chuvângin, an beih tum ber kan ni ang a. Chutih hunah chuan, hnamte chuan Magog rama Goga * angin thil an ti ang. Anni chuan ṭangrualin Jehova mite chu an theihna zawng zawngin an bei dâwn a ni. (Ezek. 38:2, 14-16) Thil awm dân tûrte chu chipchiar taka kan hriat loh avângin, hrehawm nasa tak chhûnga thil lo thleng tûrte ngaihtuahin kan lungkham ṭan thei a. Mahse, hrehawm nasa tak chu kan hlauh a ngai lo tih erawh a chiang a ni. Jehova chuan nun chhanhimna tûr kaihhruainate min pe ang. (Sâm 34:19) Kan “tlanna tûr chu a hnai” * tih kan hriat avângin, ‘en chhovin, kan dâk chhuak’ thei a ni.
12. Engtin nge “bawi rinawm, fing tak” chuan nakina thil lo thleng tûr atâna min buatsaih?
12 “Bawi rinawm, fing tak” chuan hrehawm nasa tak chhûnga rinawm tlat thei tûrin min buatsaih a. (Mt. 24:45) Min buatsaih dân kawng tam tak a awm a, entîrna pakhat chu, a hun taka kan neih kum 2016-2018 chhûnga kan inkhâwmpuite kha a ni. Chûng inkhâwmpuite chuan Jehova nî a hnaih zêl rualin, kan neih ngai miziate neih belh tûrin min fuih a ni. Chûng miziate chu i lo ennawn leh ang u.
I RINAWMNA, CHHELNA, LEH HUAISENNA CHU NEIH BELH ZEL RAWH
“Hrehawm nasa tak” ata dam khawchhuak tûrin tûnah inbuatsaih rawh (Paragraph 13-16-na en rawh) *
13. Engtin nge Jehova chunga kan rinawmna kan tihngheh theih a, engvângin nge tûnah ngei hian chu chu kan tih ang?
13 Rinawmna: Kum 2016 Regional inkhâwmpui thupui chu “Jehova Chungah Rinawm Zêl Rawh!” tih a ni a. Chu inkhâwmpui chuan Jehova nêna inlaichînna nghet tak kan neih chuan a lakah kan rinawm tlat ang tih min zirtîr a ni. Awmze nei taka ṭawngṭaina leh taima taka a Thu zirna hmangin Jehova kan hnaih thei tih hriatnawntîr kan ni a. Chutianga tihna chuan dinhmun harsa berte pawh pal tlang thei tûrin chakna min pe a ni. Setana khawvêl tâwpna a hnaih zêl rualin, Pathian leh a Lalram chunga kan rinawmna chungchângah fiahna khirh tak takte hmachhawn kan inbeisei thei a. Mite nuihsawh kan ni chhunzawm zêl dâwn niin a lang. (2 Pet. 3:3, 4) A bîk takin, tualdâwihna chungchânga fiahnate kan tawh hunah a ni lehzual thei a. Hrehawm nasa tak chhûnga kan rinawm reng theih nân tûnah ngei hian kan rinawmna kan tinghet tûr a ni.
14. (a) He leia hruaitu unaupate chungchângah eng inthlâk danglamna nge awm ang? (b) Engvângin nge chutih hunah pawh kan rinawm a ngaih?
14 Hrehawm nasa tak chhûngin, he leia hruaitu unaupate chungchângah inthlâk danglamna a awm ang. Engtik niah emaw chuan, he leia hriak thih la bâng zawng zawng chu Armageddon indonaa tel tûrin vânah lâk khâwm an ni ang. (Mt. 24:31; Thup. 2:26, 27) Chumi awmzia chu Governing Body chuan he leiah hian min awmpui tawh dâwn lo tihna a ni. Mahse, mipui tam tak chu ṭha taka inrêlbâwl an la ni zêl ang a. Berâm dangte zînga hruaitu atâna tling unaupate chuan an kaihruai chhunzawm ang. Chûng unaute chu thlâwpin leh Pathian pêk an kaihhruainate chu zuiin, rinnawmna kan lantîr a ngai ang a. Kan dam khawchhuahna chu an kaihhruaina kan zawmnaah a innghat ang.
15. Engtin nge chhelna chu kan neih lehzual theih a, tûna chutianga tih chu engvângin nge a pawimawh?
15 Chhelna: Kum 2017 inkhâwmpui thupui chu “Tlâwm Suh!” tih a ni a. Chu inkhâwmpui chuan fiahnate chhel taka tuar chhuak thei tûrin min tichak a ni. Kan chhelna chu dinhmun ṭhaa innghat a ni lo tih kan hria a. Jehova rinchhanna hmangin chhelna kan nei lehzual thei a ni. (Rom 12:12) Isua thutiam: “A tâwp thlenga tuar peih apiang chu, chu mi ngei chu chhandamin a awm ang,” tih chu kan theihnghilh ngai lo vang. (Mt. 24:13) Chu chu fiahna engpawh tâwk mah ila, kan rinawm tlat tûr tihna a ni. Fiahna kan tawh apiang chhel taka kan tuar chhuah zêl chuan, hrehawm nasa tak a lo thlen hmain kan chak lehzual sauh vang.
16. Huaisenna kan neih leh neih loh chu engah nge a innghah a, engtin nge huaisenna chu tûn aṭanga kan neih belh theih?
16 Huaisenna: Kum 2018 inkhâwmpui thupui chu “Huaisen Rawh!” tih a ni a. Chu inkhâwmpui chuan kan huaisenna chu kan pianpui theihnaah a innghat lo tih min hriatnawntîr a. Chhelna nei tûra Jehova kan rinchhan a ngai ang bawkin, huaisenna dik tak nei tûr pawhin, amah kan rinchhan a ngai a ni. Jehova kan rinchhanna chu engtin nge kan tihngheh theih? Nî tina a Thu chhiarna leh Jehova’n tûn hmaa a mite a chhanchhuah dânte chhût ngunna hmangin kan tinghet thei a. (Sâm 68:20; 2 Pet. 2:9) Hnamte’n hrehawm nasa tak chhûnga min beih hun chuan tûn hma zawng aiin huaisenna leh Jehova rinchhanna kan neih lehzual a ngai ang. (Sâm 112:7, 8; Heb. 13:6) Tûn aṭanga chutianga Jehova kan rinchhan chuan, Goga beihna hmachhawn tûrin kan mamawh huaisenna chu kan nei ang. *
I CHHANCHHUAHNA CHU BEISEI TLAT RAWH
Isua leh a vân lam sipaite chuan Pathian hmêlmate chu Armageddon indonaah tiboral tûrin an rawn bei thuai ang! (Paragraph 17-na en rawh)
17. Engvângin nge Armageddon chu kan hlauh loh vang? (A kâwma milem en rawh.)
17 Thuziak hmasaa târ lan tawh angin, kan zînga a tam zâwkte hian kan nun pumhlûm chu ni hnuhnûng chhûngin kan hmang a. Chu bâkah, hrehawm nasa tak chhûnga dam khawchhuah pawh kan beisei bawk a ni. Armageddon indona chuan he khawvêl hi a titâwp hlen ang. Mahse, hlauh tûr engmah kan nei lo. Engvângin nge? Chu chu Pathian indona a nih dâwn vâng a ni. (Thuf. 1:33; Ezek. 38:18-20; Zek. 14:3) Jehova thupêkin, Isua Krista chuan chu indonaah chuan hma a hruai ang. Ani chuan tho leh hriak thihte leh vântirhkoh chhiarsên lohte pawh a nei ang a. An zain Setana, a ramhuaite leh lei lama a sipaite chu an do vang.—Dan. 12:1; Thup. 6:2; 17:14.
18. (a) Jehova’n eng nge min tiam? (b) Thu Puan 7:9, 13-17-na chuan nakin hun chungchângah engtin nge rinnghehna min neihtîr?
18 Jehova chuan: “Nangmah beihna tûra hriam chher rêng rêng a sâwt lo vang,” tih min tiam a. (Is. 54:17) Jehova chhiahhlawh rinawm “mipui tam tak” chu “hrehawm nasa tak ata” an dam chhuak ang! Pathian hnênah rawngbâwlna thianghlim an hlân chhunzawm zêl ang. (Thu Puan 7:9, 13-17 chhiar rawh.) Chutiang chuan, Bible-in chhandam kan ni ang tih rinnghehna tûr chhan tam tak min pe a ni. “LALPA chuan mi rinawm chu a humhim” tih kan hria a. (Sâm 31:23) Jehova hmangaih a, chawimawitu zawng zawngte’n a hming tihthianghlim a ni tih an hmuh chuan an hlim hle ang.—Ezek. 38:23.
19. Nakin lawkah eng beiseina ropui takin nge min hmuak?
19 Timothea thawn hnih 3:2-5-nain Setana thununna aṭanga fihlîm khawvêl thara mite chungchâng târ lang dâwn ta se, a târ lan dân tûr chu han ngaihtuah teh. (“ Chutih Huna Mite Awm Dân Tûr” tih bâwm chu en rawh.) Governing Body member nia rawngbâwl tawh Unau George Gangas-a * chuan heti hian a sawi a: “Mi zawng zawng Jehova betu an nih huna khawvêl nawm dân tûrzia mai chu! Nakin lawkah chuan khawvêl tharah kan nung thei tawh dâwn a. Jehova angin, kumkhuain kan nung tawh ang,” tiin. Chu chu beiseina ropui tak a va ni êm!
HLA 32 Tihchêt Rual Lohvin Nghet Rawh U!
^ par. 5 Mi zawng zawng chungah “hrehawm nasa tak” chu a lo thleng thuai dâwn tih kan hria a. Chu chuan kan tân eng awmzia nge a neih ang? Chumi hun chhûng chuan Jehova’n eng ti tûrin nge min beisei ang? Kan rinawm tlat theih nân eng miziate nge tûna kan neih belh ngai? He thuziakah hian a chhânna kan hmu ang.
^ par. 3 ṬAWNGKAM HRILHFIAHNNA: Kristianna ram chu Kristian nia inchhâl; mahse, Jehova tehnate nên inmila amah be tûra mite zirtîr lo sakhuate an ni.
^ par. 11 ṬAWNGKAM HRILHFIAHNA: Magog rama Goga (a lam tâwi chu, Goga) tih ṭawngkam hian hrehawm nasa tak chhûnga biakna dik beitu tûr hnam insuih khâwm a kâwk a ni.
^ par. 11 Armageddon thlen hmaa thilthleng tûrte hriat belh nân, God’s Kingdom Rules! (English) lehkhabu bung 21-na en rawh. Magog rama Goga beihna leh Jehova’n Armageddon chhûnga a mite a humhim dân tûr hriat belh nân, Pure Worship of Jehovah—Restored At Last! (English) lehkhabu bung 17 leh 18-na en rawh.
^ par. 16 “Hmangaihna A Reh Ngai Lo Vang!” tih kum 2019 Regional inkhâwmpui thupui chuan Jehova humhimna duhawm tak hnuaiah him taka kan awm theihzia min rinnghehtîr a ni.—1 Kor. 13:8.
^ par. 19 Vênnainsâng (English), December 1, 1994, chhuaka “His Deeds Follow Him” tih thuziak chu en rawh.
