1. Engvângin nge Jehova chuan kan inpêkna pumhlûm chu a phû?

JEHOVA chu min Siamtu leh Nunna min Petu a nih avângin, ani chuan kan inpêkna pumhlûm chu a phû a. (Thup. 4:10, 11) Mahse, harsatna kan hmachhawn a ni. Ani chu kan hmangaih a, kan zah hle chung pawhin, a phû angin a hnênah kan inpe pumhlûm lo pawh a ni thei. Chutiang a nih theih dân chu kan hriatthiam a ngai a ni. A hmasain, inpêkna pumhlûmah chuan engte nge tel tih i lo ngaihtuah ang u.

2. Matthaia 4:10-a sawi angin, Jehova hnêna kan inpêk pumhlûm chuan eng nge kan tih ang?

² Bible sawi dân chuan, Pathian hnêna inpêknaah chuan amah hmangaihna thûk tak a tel a. Jehova hnêna kan inpêk pumhlûm chuan, amah chauh chibai kan bûk ang. Kan thinlungah tu mah leh eng mahin hmun a chan kan phal lo vang.—Matthaia 4:10 chhiar rawh.

3. Engvângin nge Jehova hnêna kan inpêkna chu rinthua thiltih mai a nih loh?

³ Jehova hnêna kan inpêkna chu rinthua thiltih mai a ni lo. Engvângin nge? A chanchin kan zirna aṭanga kan thu hriata innghat a nih vâng a ni. A mize duhawm takte chu kan ngaina hle a. A duh zâwng leh duh loh zâwngte chu kan hriain, kan pawm a. Kan tâna a thiltumte pawh kan hre thiamin, kan thlâwp bawk a ni. A ṭhian nih theihna chu chanvo hlu angin kan ngai a. (Sâm 25:14) Min Siamtu chungchânga kan thu hriatte chuan amah min hnaihtîr a ni.—Jak. 4:8.

4. (a) Diabola chuan Jehova hnêna kan inpêkna tikiam tûrin eng nge a hman? (b) He thuziakah hian eng nge kan sawiho vang?

 ⁴ Diabola chuan khawvêl hi a thunun mai bâkah, kan pianpui châkna leh tisa lam chak lohnate hîp zâwngin a hmang a. (Eph. 2:1-3; 1 Joh. 5:19) A thiltum chu Jehova hnêna kan inpêk pumhlûm theih loh nâna kan hmangaihna lâk pên hi a ni. Hlawhtlinna engemaw chen a neih theihna kawng hnih i lo en ang u. Pakhatnaah, hausakna ûm tûrin min thlêm a tum a; pahnihnaah, intihhlimna chungchângah duh thlanna ṭha lo siam tûrin min thunun a tum a ni.

5. Engvângin nge tangka sum ngainatna laka kan invên ang?

⁵ Ei tûr hnianghnâr tak, thawmhnaw ṭha tak, leh chênna tûr in ṭha tak neih chu kan duh tlângpui a. Mahse, tangka sum ngainatna lakah kan invêng tûr a ni. Setana khawvêla mi tam tak chu “tangka ngainatu te” leh chumiin a lei theih thil ngainatute an ni a. (2 Tim. 3:2) Isua chuan a hnungzuite chu chutiang ngainatna nei tûra thlêm an ni thei tih a hria a. Ani chuan, “Tu mân hotu pahnih rawng an bâwl kawp thei lo; pakhat huain pakhat an duh ang, a nih loh leh, pakhat ṭanin pakhat an hmusit ang. Pathian leh sum rawng in bâwl kawp thei lo ve,” tiin a sawi a ni. (Mt. 6:24) Jehova be chung si a, he khawvêl hausaknate neih tuma hun leh tha tam tak sêngtu chu hotu pahnih rawngbâwl tum nia sawi theih a ni. Chutiang mi chuan Jehova hnênah inpêkna pumhlûm a hlân thei lo vang.

6. Laodikei khuaa kohhran hnêna Isua thusawi aṭangin eng nge kan zir theih?

⁶ C.E. kum zabi khatna tâwp lamah, Laodikei khuaa kohhrana mite chuan inchhuang takin: “Ka hausa a, sum ka ngah a, engmah ka tlachham lo ve,” tiin an sawi a. Mahse, Jehova leh Isua mit hmuhah chuan anni chu “mi rethei, khawngaihthlâk, pachhia, midel,  saruak” mai an ni. Isua chuan an hausak vâng ni lovin, tangka sum an ngainatnain Jehova nêna an inlaichînna a tihchhiat avângin anni chu a zilh a. (Thup. 3:14-17) Chuvângin, kan thinlungah tangka sum ngainatna kan nei ṭan tih kan hriat chuan kan ngaihtuahna chu kan siam ṭha nghâl vat tûr a ni. (1 Tim. 6:7, 8) Chutianga kan tih loh chuan, khawvêl thilte chu kan ngaina ṭan ang a, Jehova’n kan biakna chu a pawm lo vang. Ani chuan ‘kan thinlung zawng zawnga’ amah hmangaih tûrin min duh a ni. (Mk. 12:30) Sum leh pai chungchânga thlîr dân inbûk tâwk tak kan neih chu engtin nge kan hloh mai theih?

7-9. Kohhran upa David-a thiltawn aṭangin eng nge kan zir?

⁷ United States rama awm kohhran upa taima tak David-a thiltawn hi han ngaihtuah teh. Ani chuan hnathawhnaa inpumpêk tak niin a insawi a. A hnathawhna company-ah kaisântîr a nih bâkah, a hnathawh ṭhat avângin ram puma hriat hlawh a ni bawk. Unau David-a chuan: “Chutih lai chuan, chûng ka hlawhtlinnate chu Jehova malsâwmna niin ka ngai,” tiin a sawi. Chu chu Jehova malsâwmna a nih tak zet em?

⁸ David-a chuan a hnain Jehova nêna an inlaichînnaah nghawng ṭha lo a nei tih a hre ṭan a. “Kohhran inkhâwmnaah leh rawngbâwlnaahte chuan ka hna chungchânga buaina ringawt ka ngaituah a. Sum tam tak chu ka la lût ngei mai; mahse, rilru hahna ka nei chho va, chu chuan kan nupa inkâr a tichhia,” tiin a sawi.

⁹ David-a chuan a nuna a thil dah pawimawhte chu a ennawn a ngai tih a hria a. “Ka dinhmun chu siam ṭhat ka tum ta a,” tiin a sawi a ni. Ani chuan a hun duan siam ṭhat a duh thu a hnathawhna pu hnênah a hriattîr a. Eng nge a rahchhuah? David-a chuan a hna a chân ta tlat mai le! Engtin nge a chhân lêt? “A tûkah  chuan, auxiliary pioneer thawk tûrin dîlna ka theh lût a ni,” tiin a sawi. Mahni inchâwm nân, David-a leh a nupui chuan in tihthianghlim hna an thawk ṭan a. A hnu deuhah chuan, regular pioneer a thawk ṭan a, a tâwpah, a nupui pawhin pioneer a thawk ve ta a ni. He nupa tuak hian mi tam takte ngaihnêp hna chu thawh an thlang a; mahse, eng ang hna nge an thawh tih chu an tân a pawimawh ber lo. An sum lâk luh chu tûn hma aiin a lêt sâwmin tlêm mah se, an sênso zât phuhru tûra an mamawh chu thla tinin an hmu a. Jehova chu an nunah dah pawimawh ber an duh a, Lalram dah hmasatute chu Jehova’n a ngaihsak tih an thiltawn aṭangin an hria a ni.—Mt. 6:31-33.

10. Engtin nge kan thinlung kan vên theih?

¹⁰ Kan hausa emaw, hausa lo emaw pawh ni se, kan thinlung kan vên a ngai a ni. Engtin nge? Hausak duhna rilru chu hnâwl rawh. I eizawnna hna chu Jehova rawngbâwlna aiin dah pawimawh suh. Chutiang chu i lo ni reng tih engtin nge i hriat theih? Hêng zawhna ṭhenkhatte hi inzâwt rawh: ‘Inkhâwmah leh rawngbâwlnaah ka hna chungchâng ringawt ka ngaihtuah em? Nakin hun atân sum leh pai lama lungkhamna ka la nei fo vem? Sum leh pai leh hausaknate chu kan nupa inkâra buaina thlentu a ni em? Tam lehzuala Jehova rawngbâwl theihna a nih dâwn chuan mite ngaihnêp hnate chu thawh ka inhuam ang em?’ tihte hi. (1 Tim. 6:9-12) Chûng zawhnate kan ngaihtuah hunah, Jehova’n min hmangaih tih leh he a thutiam: “Engtikah mah ka thlahthlam tawp lo vang chia, kal pawh ka kalsan tawp lo vang che,” tih hi i hre reng ang u. Chuvângin, tirhkoh Paula chuan: “In rilru putzia chu tangka ngainatna tel lo ni rawh se,” tiin a ziak a ni.—Heb. 13:5, 6.

11. Intihhlimna chuan mi chungah eng nghawng nge a neih theih?

¹¹ Jehova chuan hlim tûrin min duh a, intihhlimna chuan chutiang hlimna nei tûrin min ṭanpui thei a ni. Dik tak chuan, Pathian Thu chuan “mihring tân chuan ei leh in te leh a thawhrimnaa a rilru tihnawm te aliama ṭha a lo awm lo,” tiin a sawi. (Thur. 2:24) Mahse, khawvêla intihhlimna tam zâwk chuan kan chungah nghawng ṭha lo a nei thei a. Chu chuan nungchang lama tehnate a tihniamin, Pathian Thuin a dem thilte chu ngaizam tûr leh ngaina hial tûrin min chêttîr thei a ni.

12. Korinth thawn khat 10:21, 22-a sawi angin, engvângin nge intihhlimna chu fîmkhur taka kan thlan ang?

¹² Jehova hnêna inpêk pumhlûm kan duh avângin ‘Lalpa dawhkâna mi leh ramhuai  dawhkâna mi kan ei kawp thei’ lo. (1 Korinth 10:21, 22 chhiar rawh.) Tuemaw nêna chaw kan ei dun hian chu chu kan inṭhianna târ langtu a ni tlângpui a. Tharum thawhna te, dawithiamna te, nungchang bawlhhlawhna te, a nih loh leh tisa lam leh rilru lam châkna chawi lârtu intihhlimnate kan thlang a nih chuan, Pathian hmêlmate buatsaih chaw hlui kan kîl tihna a ni ang. Chutiang a nih chuan, dinhmun hlauhawmah kan indah mai ni lovin, Jehova nêna kan inṭhian ṭhatna pawh kan tichhia ang.

13-14. Jakoba 1:14, 15-na ṭanchhanin, engvângin nge intihhlimna thlan chungchângah kan fîmkhur a ngaih? Entîrna pe rawh.

¹³ Intihhlimna chu chaw nêna a inan dân kawng ṭhenkhat lo ngaihtuah ta ila. Thil kan ei dâwn hian, kan ei tûrte chu kan thlang thei a. Mahse, kan ei tawh chuan, chumiin kan taksaa hna a thawh dân chu kan thunun thei tawh lo. Chaw ṭha chuan min tihrisêl thei a, chaw ṭha lo chuan kan hrisêlna a tichhe thei a ni. A nghawng chu zan khat thil thu-ah lang chhuak nghâl lo mah se, lan chhuah hun a la nei dâwn tho a ni.

¹⁴ Chutiang bawkin, intihhlimna kan thlan hunah kan duh zâwngte chu kan enin, kan ngaithla thei a. Chutianga kan tih hnu chuan, chûng kan thil en leh ngaihthlâkte chuan kan rilru leh thinlungah nghawng a nei ang. Intihhlimna ṭha chuan min tihahdam thei a; intihhlimna ṭha lo erawh chuan min tichhe thei thung. (Jakoba 1:14, 15 chhiar rawh.) Intihhlimna ṭha lo sawhkhâwkte chu lang chhuak nghâl mai lo mah se, a hnuah a lang chhuak leh ṭhîn a. Chuvângin, Bible chuan: “Bumin awm suh u; Pathian chu hmuhsit zia a ni lo ve; miin a theh apiang, chu mi vêk chu a seng bawk dâwn si a; Mahni tisa lama thehtu chuan tisaa mi chhiatna a seng ang,” tiin a sawi a ni. (Gal. 6:7, 8) Jehova huat zâwngte chawi lârtu intihhlimna zawng zawng hnâwl chu kan tân a va pawimawh tak êm!—Sâm 97:10.

15. Jehova’n kan hlimna tûrin eng thilpêkte nge min buatsaihsak?

¹⁵ Jehova mite chuan kan Internet television station aṭanga tihchhuah JW Broadcasting^® chu en nuam an ti hle a. Unaunu Marilyn-i chuan: “JW Broadcasting chuan min tihlim lehzual a, chutah chuan en tûr bîk ka thlan a ngai lo. Mal nia ka inhriat hunah emaw, lunghnualna ka neih hunah emaw hian mi tichak thei thusawi ṭha tak ka ngaihthlâk loh leh Morning Worship ka en ṭhîn a. Chu chuan Jehova leh a inawpna pâwl nêna inhnaih lehzual nia inhriatna min neihtîr a ni. JW Broadcasting-a ka thil ente chuan ka nun pum chu a thlâk danglam a ni,” tiin a sawi. Jehova hnên aṭanga lo kal he thilpêk hi i hlâwkpui ve em? Thla tin hian thil thar en tûr a awm zêl a, JW Broadcasting-ah hian aw ngaihthlâk tûr leh video en tûr te, leh englai pawha ngaihthlâk theih hla ṭha tak takte pawh a awm a ni.

16-17. Intihhlimna atâna kan hun hman chungchângah engvângin nge kan fîmkhur ang a, engtin nge chutianga kan tih theih?

¹⁶ Intihhlimna kan thlante mai ni lovin, chumi atâna kan hun hman zâtah pawh kan fîmkhur tûr a ni a. Kan fîmkhur loh chuan, Jehova rawngbâwlna aiin intihhlimna atâna kan hun hman chu a tam zâwk thei a ni. Mi tam tak chuan intihhlimna atâna an hun hman chu thunun harsa an ti a. Kum 18 mi Abigail-i chuan: “Nilênga buai hnua, TV han en chu a hahdamthlâk thei khawp mai. Mahse, ka fîmkhur loh chuan, TV en nân, dâr kâr tam tak ka khawhral thei a ni,” tiin a sawi. Ṭhalai Samuel-a chuan: “Internet aṭangin video tawi tê tê ka ennaah hun tam tak ka khawhral tih ka inhmu chhuak a. Video pakhat ka’n en ṭan a, ka inhriat chhuah meuh chuan dârkâr thum emaw, li emaw lai a lo liam hman tawh a ni,” tiin a sawi.

¹⁷ Intihhlimna atâna i hun hman zât chu engtin nge i thunun theih? A hmasa berah, chumi  atâna hun i lo hman ṭhin zât hriat hi a ni. Chawlhkâr khat chhûnga intihhlimna atâna i hun hman zât chu engvângin nge i chhinchhiah loh vang? TV en nân te, Internet khawih nân te, leh games khelh nântea i hun hman zât chu calendar-ah chhinchhiah la. I hmang tam lutuk nia i inhriat chuan hun duan siam tum ang che. Thil pawimawh zâwkte tih nân hun pe hmasa la, chumi hnuah chauh intihhlimna atân hun in siam rawh. Tichuan, Jehova hnênah i hun duan anga ti zêl thei tûrin ṭanpuina dîl ang che. Chutiang kawng chuan, mi mal Bible zirna te, chhûngkuaa Pathian biakna te, kohhran inkhâwmna te, leh thu hrilh leh zirtîrna hmanga Jehova rawngbâwlnate atâna i mamawh hun leh thate chu i nei thei ang. Chu bâkah, intihhlimna atâna i hun hman dân chungchânga mahni inthiam lohna pawh i nei tlêm deuh ngei ang.

18-19. Jehova hnênah kan inpe pumhlûm tih engtin nge kan târ lan theih?

¹⁸ Setana khawvêl tâwpna leh khawvêl thar lo thleng tûr chungchâng a ziah hnuah, tirhkoh Petera chuan: “Duh takte u, chutiang thilte chu in beisei avângin bawlhhlawh kai lo leh sawisêlbovin, thlamuang taka in awm a hmuh theih nân che u, taihmâk chhuah rawh u,” tiin a sawi a. (2 Pet. 3:14) Chu fuihna chu kan zawm a, nungchang lamah leh thlarau lamah thianghlim taka awm reng tûra theih tâwp kan chhuah chuan Jehova hnênah kan inpe pumhlûm tih kan târ lang a ni ang.

¹⁹ Setana leh a khawvêl chuan nuna kan thil dah pawimawhte thlâk danglam tûrin min thlêm zawm zêl dâwn a. (Lk. 4:13) Mahse, eng ang harsatna pawh hmachhawn mah ila, kan thinlungah Jehova chauh lo chu tu mah leh thil dang eng mahin hmun a chan kan phal ngai lo vang. Jehova hnênah chuan amah chauhvin a dawn tûr chu pêk kan tum tlat a ni—inpêkna pumhlûm chu!