1. Jehova’n a thiltum tihlawhtling tûrin eng nge a tih theih?

JEHOVA chu a thiltum tihlawhtling tûrin a ṭûl ang apiang a innihtîr thei a. Entîr nân, Jehova nihna tam tak zînga ṭhenkhat chu Zirtîrtu, Thlamuantu, leh Chanchin Ṭha hriltu tihte hi a ni. (Is. 48:17; 2 Kor. 7:6; Gal. 3:8) Mahse, ani chuan a thiltumte tihlawhtling tûrin mihringte a hmang ṭhîn a. (Mt. 24:14; 28:19, 20; 2 Kor. 1:3, 4) Jehova chuan a duh zâwng tihfamkim nâna kan mamawh finna leh chaknate chu tu hnênah pawh a pe thei a. Chûng kan sawi tâkte chu Bible lama mi thiam tam takte hrilhfiah dân angin, Jehova hming awmze pêng hrang hrangte a ni.

2. (a) Engvângin nge Jehova’n min hmang tih rinhlelh châng kan neih mai theih? (b) He thuziakah hian eng nge kan sawiho vang?

² Kan za hian Jehova tâna mi ṭangkai nih kan duh ṭheuh va; mahse, mi ṭhenkhat chuan Jehova hman an ni tih an ringhlel a ni. Engvângin nge? An kum te, an dinhmun te, leh an theihnate avânga an tih theihte chu beitham hle nia an ngaih vâng a ni. Kawng leh lamah, mi ṭhenkhat chu tûna an chanvo neihah an lungawi tâwk mai thei a, anni chuan hmasâwn zawm zêl ngai niin an inhre lo mai thei. He thuziakah hian Jehova’n a thiltum tihlawhtling tûra kan zaa min buatsaih dân kan sawiho vang. A hnuah, Jehova’n a chhiahhlawh a hmei a pate hnêna châkna leh thiltihtheihna a pêk dân chungchânga Bible thute chu kan bih chiang ang a. A tâwpah, Jehova mi hman kan nih theih dân kan sawiho bawk ang.

3. Philippi 2:13-a târ lan angin, engtin nge Jehova’n thil tih châkna min neihtîr mai theih?

³ Philippi 2:13 chhiar rawh. * Jehova chuan thil tih châkna min neihtîr thei a. Chu chu engtin nge a tih theih? Ṭanpui ngai tuemaw, a nih loh leh thil tih tûr engemaw a awm thu kohhran aṭangin kan hre mai thei a. A nih loh leh, upate chuan branch office aṭanga lo kal lehkha chu chhiarin, kohhran bial pâwn lamah ṭanpuina mamawh a nih thu an puang mai thei bawk. Chûng thute kan hriat chuan, heti hian kan inzâwt mai thei a ni: ‘Engtin nge ṭanpuina ka pêk ve theih ang?’ tiin. A nih loh leh, chanvo harsa tak thawk tûra sâwm kan ni a; mahse kan thawh theih dâwn leh dâwn loh kan hre lo pawh a ni thei. A nih loh pawhin, Bible châng khawi lai emaw kan chhiar hnuah, ‘He Bible châng hi mi dangte ṭanpui nân engtin nge ka hman theih ang?’ tiin kan ngaihtuah mai thei bawk. Jehova chuan eng thil mah ti tûrin min nawr lui lo vang. Mahse, ani chuan mahni inenfiah duhna kan nei tih a hmuh chuan, a duh anga thil tih châkna min neihtîr thei a ni.

4. Engtin nge Jehova’n thiltihtheihna a pêk mai theih che?

⁴ Jehova chuan thiltihtheihna pawh min pe thei bawk. (Is. 40:29) Ani chuan a thlarau thianghlim hmangin kan pianpui theihnate chu a tipung thei a. (Ex. 35:30-35) A inawpna pâwl hmangin, hna ṭhenkhat thawh dânte chu min zirtîr thei a ni. I chanvo neihte chu a tih dân tûr i hriat chian loh chuan, ṭanpuina dîl rawh. Chu bâkah, thilphal tak, kan Pa vâna mi hnênah inthlahrung lovin ‘thiltihtheihna nasa tak’ nei tûrin dîl ang che. (2 Kor. 4:7; Lk. 11:13) Bible-ah hian Jehova’n a chhiahhlawh a hmei a pate chu thil tih châkna leh thiltihtheihna pe a, anmahni a thuam dân chungchânga entîrna tam tak a awm a. Chûng zînga ṭhenkhat kan ngaihtuah laiin, Jehova’n chutianga a hman theih dân che chu ngaihtuah ang che.

5. Jehova’n a mite chhanchhuak tûra Mosia a hman dân leh a hman hun aṭangin nge nge kan zir theih?

⁵ Jehova chuan Mosia chu Israel mite chhanchhuaktu a nihtîr a. A nih leh, eng hunah nge Jehova’n ani chu a hman? “Aigupta rama mite finna zawng zawng zirtîr” a nih hnua tling tâwk tawh anga a inngaih hunah em ni? (Tirh. 7:22-25) Ni lo ve, Jehova’n Mosia chu inngaitlâwm tak leh thinnel tak ni tûra a zirtîr hnuah chauh a hmang a. (Tirh. 7:30, 34-36) Aigupta Lalber hmaa ding ngam tûrin huaisenna a pe bawk. (Ex. 9:13-19) Jehova’n Mosia a hman dân leh a hman hun aṭangin eng nge kan zir theih? Ani chuan a neih ang mizia neitute leh chakna nei tûra amah rinchhan tute chu a hmang a ni, tih hi.—Phil. 4:13.

6. Jehova’n Lal Davida ṭanpui tûra Barzilaia a hman dân aṭangin eng nge kan zir theih?

⁶ Kum zabi tam tak hnuah, Jehova chuan Barzilaia chu Lal Davida ṭanpui tûrin a hmang a. Davida leh a mite chu a fapa, Absaloma laka an tlân chhiat lai chuan, “an rilṭâmin an chauvin, an tuihâl tawh êm êm a ni.” Chutih hun laia kum upa tak Barzilaia chuan mi dangte rualin Davida leh a mite ṭanpui tûrin a nun a thâp a. Ani chu a kum upatna avângin Jehova tâna ṭangkai tawh lo niin a inngai lo. Chu aiin, ṭanpui ngai Pathian chhiahhlawhte tân a thil neihte chu phal takin a hmang a ni. (2 Sam. 17:27-29) Kan tâna zir tûr chu eng nge ni? Kan kum chu eng zât pawh ni se, Jehova chuan tualchhûng leh ram danga mamawh bulpui tlachhama awm kan Kristian unaute ṭanpui tûrin min hmang thei a. (Thuf. 3:27, 28;  19:17) Mi mal taka kan ṭanpui thei lo a nih pawhin, ṭanpui an ngaihna hmun leh huna an mamawhte phuhhrûk a nih theih nân khawvêl pum huap rawngbâwlna atân thawhlâwmte kan thawh thei a ni.—2 Kor. 8:14, 15; 9:10, 11.

7. Engtin nge Jehova’n Sumeona chu a hman a, chumi hriatna chuan engtin nge min tihchak theih?

⁷ Jehova’n Jerusalema mi rinawm, kum upa tak Sumeona chu Messia a hmuh hmain a thi lo vang tih a tiam a. Messia lo lan hun tûr chu kum tam tak a lo nghah tawh avângin, chu thutiam chuan Sumeona chu nasa takin a tichak ngei ang. A rinna leh chhelna chu malsâwm a ni. Ni khat chu, “thlarau hriattîrin,” biak inah a kal a. Chutah chuan, nausên Isua chu a hmu a; tichuan, Jehova’n Sumeona chu Krista lo ni tûr, chu naupang chungchânga hrilh lâwkna a sawitîr a ni. (Lk. 2:25-35) Sumeona chuan Isua’n leia a rawngbâwlna a hlen dân a hmu hman lo niin a lang; mahse, a chanvo chu a ngaihlu hle a, chu aia chanvo ṭha zâwk pawh a la dawng ang! Khawvêl tharah chu mi rinawm chuan Isua rorêlnain leia mihringte chunga malsâwmna a thlen dânte chu a la hmu ang. (Gen. 22:18) Keini pawh, Jehova rawngbâwlnaa kan dawn eng chanvo chungah pawh kan lâwm hle tûr a ni.

8. Engtin nge Barnaba anga Jehova mi hman kan nih theih?

⁸ C.E. kum zabi khatnaah, mi thilphal tak Josefa chuan Jehova mi hman nih chu a duh a. (Tirh. 4:36, 37) Josefa chu mite thlamuan thiam tak a nih vâng a ni ngei ang, tirhkohte chuan ani chu “Thlamuanna Fa” tih awmze nei Barnaba tih hming an pe a ni. Entîr nân, Saula chuan kohhrante a lo tihduhdah ṭhin avângin, ringtu a nih hnuah pawh unau tam tak chuan an pan ngam lo va. Mahse, mi rilru ṭha tak Barnaba chuan Saula chu ṭanpuiin, a va thlamuan a, Saula chu a lâwm hle ngei ang. (Tirh. 9:21, 26-28) A hnuah, Jerusalema upate chuan Suria rama Antiokei khua thlengin unaute chu fuih an ngai tih an hria a. Tu nge an tirh tâk? Barnaba a ni! An thlang dik zet mai. Barnaba chuan “ṭhahnemngai taka Lalpa vuan reng tûrin an zain a fuih ta a,” tih kan chhiar a ni. (Tirh. 11:22-24) Chutiang bawkin, tûn laiah pawh, Jehova chuan Kristian unaute tâna “thlamuanna fa” ni tûrin min ṭanpui thei a. Entîr nân, ani chuan thihnaa hmangaih tak chântute thlamuan tûrin min hmang thei a ni. A nih loh leh, dam lo leh rilru haha awm tuemaw chu va tlawh tûrin emaw, phone hmanga thlamuanna thu sawi tûrin emaw min chêttîr thei bawk. Barnaba anga Jehova mi hman nih chu i duh ang em?—1 Thes. 5:14.

9. Jehova’n thlarau lam berâm vêngtu ṭha tak ni tûra unau Vasily-a a ṭanpui dân aṭangin eng nge kan zir?

⁹ Jehova chuan unau Vasily-a chu thlarau lama berâm vêngtu ṭha tak ni tûrin a ṭanpui a. Kum 26 a nih a, kohhran upa nia rawngbâwl tûra ruat a nih chuan Vasily-a chuan kohhrana unaute, a bîk takin, harsatna tâwkte chu thlarau lama ṭanpui tûrin tling tâwk lo niin a inhria a. Mahse, ani chuan thiltawn ngah tak upa dangte hnên aṭang leh Lalram Rawngbâwlna School aṭangin zirtîrna ṭha tak a dawng a ni. Vasily-a chu hmasâwn tûrin a thawk rim hle a. Entîr nân, thiltum tênaute a insiam a. Chûng a thiltumte a hlen apiangin, inrintâwkna a nei chho telh telh a ni. Tûnah chuan, heti hian a sawi a ni: “Tûn hmaa ka thil hlauhte chu tûna hlimna min thlentu berte an ni tawh zâwk a. Jehova’n kohhrana unaute thlamuan nâna an mamawh tak Bible chângte hmu tûra min ṭanpui hian, chu chuan lungawina nasa tak min pe a ni,” tiin a sawi. Unaupate u, Vasily-a anga Jehova mi hman nih in duh chuan, Jehova chuan kohhrana mawhphurhna lian zâwk chelh thei tûrin a ṭanpui thei che u a ni.

10. Abigaili chuan eng nge a tih a, a entawn tûr siam aṭangin eng nge kan zir theih?

¹⁰ Davida leh a mite chu Lal Saula’n a ûm avângin, anni chuan ṭanpuina an mamawh a. Davida mite chuan Israel mi hausa tak Nabala hnênah a neih ang ang, ei tûr tlêm azâwng an va dîl a. Thlalêra Nabala ranrualte an chhanhimsak ṭhin avângin, chutiang chuan an dîl ngam a ni. Mahse, mahni hmasial tak Nabala chuan engmah a pe duh lo va. Davida chu a thin a rim ta hle a; tichuan, Nabala leh a ina awm mipa zawng zawngte chu tihhlum a tum ta a ni. (1 Sam. 25:3-13, 22) Mahse, Nabala nupui Abigaili chu hmêl ṭha tak a nih ang bawkin mi remhre tak pawh a ni a. Ani chuan huaisenna nasa tak lantîrin, Davida chu hmaia lei siin chibai a bûk a; tichuan, phuba lâkna hmanga thisen chhuah lo tûrin a ngên a. Jehova kutah engkim dah tûrin fing takin a hrilh a ni. Inngaitlâwm taka Abigaili thusawite leh fing taka a thiltihte chuan Davida rilru chu a khawih hle a. Ani chuan Abigaili chu Jehova tirh niin a ngai a ni. (1 Sam. 25:23-28, 32-34) Abigaili chuan Jehova tâna mi ṭangkai tak nihtîrtu miziate chu a nei a. Chutiang bawkin, remhriatna leh hriatthiamna nei Kristian unaunute chu an chhûngkua leh kohhrana mite tichak tûrin Jehova mi hman an ni thei a ni.—Thuf. 24:3; Tit. 2:3-5.

11. Saluma fanute chuan eng nge an thawh a, tûn laiah tute’n nge anni chu entawn?

¹¹ Kum zabi tam tak a liam hnuah, Saluma fanute chu Jerusalem kulh sak ṭhat lehnaa Jehova mi hmante zîngah an tel a. (Neh. 2:20; 3:12) An pa chu hotu pakhat ni mah se, anni chuan hna harsa tak leh hlauhawm tak chu inhuam takin an thawk a ni. (Neh. 4:15-18) Hnathawhnaa ‘ring rawlh ve duh lo,’ Teko-ho mi challangte nên chuan an va inang lo tak êm! (Neh. 3:5) Ni 52 chhûng leka kulh sak ṭhat lehna hna an zawh avânga Saluma fanute hlim dân tûr chu han mitthla teh! (Neh. 6:15) Tûn laiah pawh, unaunu inpe takte chuan Jehova hnêna hlan, in sakna leh enkawlnate ang chi rawngbâwlna pêng dangahte chuan phûr takin an ṭanpui a. An thiamna te, phûrna te, leh rinawmnate chu, chu hna thawh hlawhtlin nâna pawimawh tak a ni.

12. Tabithi angin, Jehova’n engtin nge min hman mai theih?

¹² Jehova chuan Tabithi chu a bîk takin hmeithaite ṭanpuinaah “thil tih ṭhat leh thilpêk ngah hle” tûrin a chêttîr a. (Tirh. 9:36) A thih chuan a thilphalna leh a ngilneihna nasa tak avângin mi tam takin an sûn hle a. Mahse, tirhkoh Petera’n a kaihthawh leh chuan an lâwm hle a ni. (Tirh. 9:39-41) Tabithi hnên aṭangin eng nge kan zir theih? A pui a pang, a hmei a pa, kan za hian kan unaute tân mi ṭangkai tak kan ni ṭheuh thei a ni.—Heb. 13:16.

13. Mi zakzum tak unaunu Ruth-i chu engtin nge Jehova’n a hman a, chumi chungchângah eng nge a sawi?

¹³ Mi zakzum tak unaunu Ruth-i chuan missionary nih a duh a. A tleirâwl lai chuan, in tin kala rawngbâwlnaa a chhuah hian, tract semin a kal zung zung a. Ani chuan: “He rawngbâwlna hi nuam ka ti hle,” tiin a sawi. Mahse, mite hnêna Pathian Ram chanchin sawipui chu harsa a ti a. Mi zakzum tak ni mah se, unaunu Ruth-i chu kum 18 a nihin regular pioneer a thawk a. Kum 1946-ah, Watchtower Bible School of Gilead a kal a, a hnuah, Hawaii leh Japan ramahte rawng a bâwl a. Jehova chuan chûng rama chanchin ṭha theh derhnaah nasa takin a hmang a ni. Rawngbâwlnaa kum 80 dâwn lai a inhman hnu chuan, unaunu Ruth-i chuan heti hian a sawi a ni: “Jehova chu mi tichaktu a ni reng ṭhîn. Ka zahzumnate hneh thei tûrin min ṭanpui a. Jehova chuan amah rinchhantu apiang chu a hmang thei tih ka ring nghet tlat a ni,” tiin.

14. Kolossa 1:29-a sawi angin, Jehova mi hman nih kan duh chuan eng nge kan tih ang?

¹⁴ Mihring chanchin tluanchhuakah, Jehova chuan a chhiahhlawhte chu chanvo chi hrang hrang a hlenchhuahtîr tawh ṭhîn a. Nang, eng nge a nihtîr ve ang che? Chu chu inpêk duhna i neih nasat dânah a innghat thui hle. (Kolossa 1:29 chhiar rawh.) Inpêk duhna i neih phawt chuan, Jehova chuan chanchin ṭha hriltu ṭhahnemngai tak, zirtîr thiam tak, mite thlamuantu ṭha tak, hnathawk thiam tak, ṭhian rinchhantlâk tak, a nih loh leh a duh zâwng tihhlawhtlin nâna a ṭûl ang apiang a nihtîr thei che a ni.

15. Timothea thawn khat 4:12, 15-a kaihhruaina angin, ṭhalaite chuan eng ti tûrin nge Jehova hnênah ṭanpuina an dîl ang?

¹⁵ Puitlin lam pan mêk nangni ṭhalaite chungchâng hi eng nge ni ve? Inawpna pâwl chuan kohhranho rawngbâwltute nia mawhphurhna tam zâwk chelhtu tûr unaupa thatho takte chu a mamawh hle a. Kohhran tam takah chuan kohhranho rawngbâwltute aiin upate chu an tam zâwk a. Nangni ṭhalai unaupate zînga ṭhenkhat hian kohhrana mawhphurhna tam zâwk chelh châkna in nei thei ang em? Unaupa ṭhenkhat chuan, “Thuchhuahtu ka nih chuan ka duh tâwk mai,” tia sawi châng an nei a. Chutiang ngaih dân i nei a nih chuan, kohhranho rawngbâwltu nih châkna nei tûr leh a rawngbâwl tûra i mamawh thiltihtheihna pe tûr chein Jehova hnênah dîl ang che. (Thur. 12:1) I ṭanpuina kan mamawh si a!—1 Timothea 4:12, 15 chhiar rawh.

16. Jehova hnênah eng nge kan dîl ang a, engvângin nge?

¹⁶ Jehova chuan a duh zâwng tihhlawhtlin nân a ṭûl ang apiang a nihtîr thei che a. Chuvângin, a rawngbâwlnaa thawh châkna nei tûrin leh chumi atâna i mamawh thiltihtheihna pe tûr chein a hnênah ṭanpuina dîl ang che. Ṭhalai i ni emaw, kum upa i ni emaw pawh ni se, i hun te, i chakna te, leh i thil neih dangte chu Jehova chawimawi nân hmang rawh. (Thur. 9:10) Hlauhna leh tling lo nia inhriatna chu Jehova rawngbâwlnaa i theihna zawng zawng hman theihna hun remchâng hlu tak chântîrtu nihtîr ngai suh. Hmangaihna nei tak kan Pain a phû ang ngeia chawimawina a dawn theih nâna rawngbâwlna pêng hrang hranga kan tel thei chu chanvo hlu a va ni tak êm!