KHAWCHIN sawi lâwktu chuan khawthlîrna khâwl aṭanga boruak chêt vêl dân chu ngun takin a en a. Ani chuan thlipui na takin mi tam tak chênna hmun chu a nuai dâwn tih a hmu a. Mite himna chu a ngaih pawimawh êm avângin, a tlai lutuk hmain, hah pawh hre lovin, vaukhânna a pe a ni.

Chutiang bawkin, Jehova chuan leia mihringte hnênah khawchin chungchânga an hriat tawhte aia hlauhawm zâwk “thlipui” lo thleng tûr lakah a vaukhân a. Engtin nge a vaukhân? Mite’n an chhân lêt theih nân hun tam tâwk a pe ang tih engvângin nge kan chian theih? A chhânna hriat nân, tûn hmaa Jehova pêk vaukhânna ṭhenkhat chu i lo ngaihtuah ang u.

Bible hun laiin, Jehova chuan a thupêk zâwm duh lotute chunga a thlentîr tûr rorêlna, a nih loh leh “thlipui” chi hrang hrang chungchângah vaukhânna a lo pe tawh ṭhîn a. (Thuf. 10:25; Jer. 30:23) Chutianga a pêk apiangin, a tuartu tûrte chu a hmâ aṭangin chiang takin a hriattîr lâwk a, a duh zâwng mila an inthlâk danglam theih nân kaihhruaina a pe bawk. (2 Lal. 17:12-15; Neh. 9:29, 30) Chu bâkah, mite’n ṭha taka an chhân lêt theih nân, a rorêlna lo thleng tûr leh inthlâk danglam vat a ngai tih hriattîr tûrin leia a chhiahhlawh rinawmte chu a hmang ṭhîn a ni.—Amos. 3:7.

Chûng a chhiahhlawh rinawm zînga pakhat chu Nova a ni. Ani chuan kum rei tak chhûng chu, khawvêl puma Tuilêt lo thleng tûr chungchângah nungchang bawlhhlawhte leh tharum thawh hmangte chu huaisen takin a vaukhân a. (Gen. 6:9-13, 17) Chu bâkah, mite chu chhanhim an nih theih nâna an tih ngaite a hrilh avângin ani chu “felna thu hriltu” tia hriat a ni.—2 Pet. 2:5.

Nova’n theih tâwp a chhuah chung pawhin, Tuilêt hmaa mite chuan Pathian hnên aṭanga a dawn vaukhânna thu chu an hnâwl a. Chu chuan rinna an nei lo hulhual tih a târ lang a ni. A tâwpah, ‘tui a lo lêt a, an zain a la bo vek a.’ (Mt. 24:39; Heb. 11:7) An borâlna tûr a lo thlen chuan, Pathianin vaukhânna a pe lo niin chhuanlam an siam thei lo.

Ṭum dangahte chuan, Jehova chuan a rorêlna “thlipui” thlen hmâ deuh lawkah mite chu vaukhânna a pe a. Chuti chung pawhin, an chhân lêt nân hun tam tâwk a pe tih a tichiang a ni. Entîr nân, hmân lai Aigupta rama Hri Sâwm a lêntîr lai khân, vaukhânna a pe lâwk a. Entîrna pakhat chu, Jehova chuan hri sarihna, chhiatna nasa tak thlentu rial a tlâk tûr thu vaukhân tûrin Mosia leh Arona chu Pharaoa leh a chhiahhlawhte hnênah a tîr a. A tûk maia rial a tlâk dâwn avângin, Pathian chuan rial laka an him theih nân hun tam tâwk a pe em? Bible chuan: “Pharaoa chhiahhlawhte zînga LALPA thu pawisa apiang chuan an chhihhlawhte leh an rante chu in chhûngah an tlân luhtîr a: tin, LALPA thu ngaisâng lo apiang chuan an chhiahhlawhte leh an rante chu phûlah chuan an awmtîr mai a,” tiin a sawi. (Ex. 9:18-21) Jehova chuan a vaukhânna chhâng lêt vattute chu hri lêng hlauhawm tak laka an him theih nân vaukhânna tam tâwk a pe tih a chiang a ni.

Pharaoa leh a chhiahhlawhte pawh hri sâwmna a thlen hmâin vaukhân an ni a. Mahse, âtthlâk takin vaukhânna chu an hnâwl a. (Ex. 4:22, 23) Chuvângin, an fa tîrte chu an chân ta a ni. A va râpthlâk tak êm! (Ex. 11:4-10; 12:29) A tlai hmaa vaukhânna chhâng lêt thei dinhmunah an awm em? Awm teh rêng mai! Mosia chuan Israel mite hnênah hri sâwmna lo thleng tûr chu a hriattîr vat a, an chhûngkua an chhanhim theih dân pawh a hrilh bawk a ni. (Ex. 12:21-28) Mi  eng zâtin nge chu vaukhânna chu chhâng lêt? Mi ṭhenkhat chhût dân chuan, Israel mite, leh Israel mi ni lote leh Aigupta mi, “mipui inpawlhsawp tam tak” pawh tiamin, mi maktaduai thumte chu Pathian rorêlna lakah an dam khawchhuak a, Aigupta ram an chhuahsan ta a ni.—Ex. 12:38.

Chûng entîrnate chuan, Jehova’n mite chu a vaukhânna an chhân lêt theih nân hun tam tâwk a pe reng ṭhîn tih a târ lang a. (Deut. 32:4) Chutianga ti tûr chuan Pathian chu engin nge chêttîr? Tirhkoh Petera chuan Jehova’n ‘tu ma boral a duh lova, mi zawng zawng lo sim a duh,’ tiin a hrilhfiah a ni. (2 Pet. 3:9) Ni e, Pathian chuan mite chu a ngaihsak a. Inlamlêt a, a rorêlna thlen hmaa a thupêkte chhâng lêt tûrin a duh a ni.—Is. 48:17, 18; Rom 2:4.

Tûn laiah pawh, khawvêl puma puanchhuah vaukhânna pawimawh tak chu mi zawng zawngin an chhân lêt a ngai a. Leia a awm lai khân, Isua chuan he khawvêl hi “hrehawm nasa tak” chhûngin tihboral a ni dâwn tih a vaukhân a ni. (Mt. 24:21) Chu rorêlna lo awm tûr chungchângah, Isua chuan chu chu a lo hnaih huna a hnungzuite’n hmu tûr leh hmachhawn tûra an beisei theih thilte chu chipchiar takin a sawi lâwk a. Chutiang chuan, Isua’n tûna kan hmuh mêk khawvêl puma thilthleng langsâr zualte chu a târ lang a ni.—Mt. 24:3-12; Lk. 21:10-13.

Chu hrilh lâwkna nêna inmilin, Jehova chuan a rorêlna duhawm tak hnuaia intulût tûrin mi tinte chu a fuih a. Ani chuan a thu âwihtute chu tûna nun ṭha zâwk nei tûr leh felna khawvêl thara malsâwmnate dawng tûrin a duh a ni. (2 Pet. 3:13) A thutiama rinna nghet tak nei tûrin, Jehova chuan nun chhanhimna thuchah, Isua’n “hnam zawng zawng hriattîrna tûrin khawvêl zawng zawngah hrilin a awm ang,” tia a lo sawi lâwk, “Ram chanchin ṭha” chu min pe a ni. (Mt. 24:14) Pathian Jehova chuan a thuchah chu ram 240 vêla ‘hriattîr’ tûr, a nih loh leh hril tûrin amah betu dik takte chu fel takin a rêlbâwl a. Mi a tam thei ang berte chu a vaukhânna ngaithla a, a rorêlna fel “thilpui” lak ata dam khawchhuak tûrin a duh a ni.—Zep. 1:14, 15; 2:2, 3.

Chuvângin, Jehova’n mite chu a vaukhânnate chhâng lêt tûrin hun tam tâwk a pe reng ṭhîn em tih chu zawhna pawimawh ber a ni lo. Thilthlengte chuan hun tam tâwk a pe reng ṭhîn tih a târ lang si a. Zawhna pawimawh zâwk chu: Mite chuan hun a la awm lai hian Pathian vaukhânna chu an chhâng lêt ang em? tih hi a ni. Pathian thuchah kengtute kan nih angin, he khawvêl tâwpnaa dam khawchhuak tûrin a tam thei ang berin mite chu i ṭanpui zawm zêl ang u.