1. Korinth thawn hnih 3:1-3-na chuan engtin nge baptisma chang thei tûra Bible zirlai ṭanpui theihna chanvo chu ngaihlu tûra min ṭanpui? (A kâwma milem en rawh.)

IN KOHHRAN thu hrilhna biala Bible zirlai pakhatin baptisma a chang i hmuh hian engtin nge i awm? Chu chuan a tihlim hle ngei ang che! (Mt. 28:19) Amah zirpuitu i nih chuan baptisma a chang hmuh chu a phûrawm lehzual ngei ang! (1 Thes. 2:19, 20) Baptisma chang thar zirtîrte chu anmahni zirpuitute tân chauh ni lovin, kohhran pum tâna “sawimawina lehkha” an ni.—2 Korinth 3:1-3 chhiar rawh.

2. (a) Eng zawhna pawimawh tak nge kan ngaihtuah ngai a, engvângin nge? (b) Bible zirna chu eng nge ni? (Footnote en rawh.)

² Kum li kalta chhûng khân, khawvêl pumah chawhrualin thla tin Bible zirpui * 10,000,000 vêl an awm tih hriat chu a hlimawm hle a. Chûng kum chhûng vêk chuan chawhrualin, kum tin mi 2,80,000 aia tamte chu Jehova Thuhretute rawn niin Isua Krista zirtîr tharte an ni. Bible zirlai maktaduai tam tak dangte chu baptisma chang tûrin engtin nge kan ṭanpui theih? Jehova’n mite chu Krista zirtîrte rawn ni tûra dawhthei taka hun remchâng a pêk chhûng chuan, a rang thei ang bera baptisma chang thei tûra theih tâwp chhuaha anmahni ṭanpui chu kan duh a ni. Hun hi a liam chak hle si a!—1 Kor. 7:29-31; 1 Pet. 4:7.

3. He thuziakah hian Bible zirna kaihhruai dân chungchângah eng nge kan sawiho vang?

 ³ Zirtîr siam a hmanhmawh thlâkzia ngaihtuahin, branch office-te chuan kan Bible zirpuite chu baptisma an chan thlenga hmasâwn zêl tûra kan ṭanpui theih dân hre tûrin zir chianna a nei a. He thuziak leh a dawta thuziakah hian, thiltawn ngah tak pioneer te, missionary te, leh bial kantute hnên aṭanga kan zir theihte kan hria ang. * (Thuf. 11:14; 15:22) Anni chuan Bible zirtîrtute leh zirlaite’n zirna hlawhtling lehzual nei tûra an tih theihte chu an sawi a ni. He thuziakah hian, baptisma an chan thlenga hmasâwn chho zêl tûra Bible zirlaite tih ngai thil panga sawiho a ni ang.

4. Kawtkaia Bible zirna neih chungchângah eng nge kan hriat ngai?

⁴ Kan unau tam tak chuan Bible zirna chu in neitute kawtkaiah an kaihruai mai a. Chu chu tuina nei tûra bul ṭanna ṭha tak ni mah se, chutianga sawihonate chu hun rei lo te chhûng a ni tlângpui a, chawlhkâr tina neih a ni kher lo thei bawk. Tuina nei chho zêl tûrin, unau ṭhenkhat chuan tuina neite hnênah inbiak pawh theih dân tûrte an zâwt a, chumi hnuah, an va tlawh leh hmaa an lo ngaihtuah tûr Bible châng ṭhenkhat chu phone-in emaw, SMS-in emaw an hriattîr ṭhîn a ni. Bible zirna hmasâwn tak neih theih hmain chutianga a châng chânga sawihona chuan thla tam tak a awh pawh a ni thei. Zirlai chuan Pathian Thu zir nâna chutianga hun tlêm tê chauh a pe a nih chuan Pathian hnêna inpumpêk a, baptisma chang thei khawpin hma a sâwn thei tak tak ang em? A theih a rinawm loh.

5. Luka 14:27-33-ah, Isua’n zirtîr siamnaa min ṭanpui theitu eng thu nge a sawi?

⁵ Ṭum khat chu, Isua’n a zirtîr nihnain a ken telte chungchângah entîrna a sawi a. In sâng sak tumtu leh indo tûra chhuah tum lal pakhat chungchâng a sawi a. In sak tumtu chuan “a tîrah ṭhuin” sak zawhna khawp sum a neih leh neih loh hre tûrin, ‘a man tûr chin a chhût’ tûr a ni tih leh lalin “a tîrah ṭhuin” a sipai rualin hmêlmate an hneh theih dâwn leh dâwn loh hre tûrin ‘mi a râwn’ tûr a ni tih a sawi a. (Luka 14:27-33 chhiar rawh.) Chutiang bawkin, Isua’n a zirtîr ni duhtu chuan a tih ngaite chu ngun takin a ngaihtuah hmasa tûr a ni tih a hria a. Chuvângin, kan Bible zirpuite chu chawlhkâr tina zirhona nei tûra kan fuih a ngai a ni. Engtin nge chu chu kan tih theih?

6. Bible zirna hmasâwn tak nei tûrin eng nge tih kan tum ang?

 ⁶ Kawtkaia Bible zirna chu hun rei deuh zâwka neihpui tum ang che. I va tlawh apiangin Bible châng pakhat aia tam i sawipui thei a. In neituin chutianga hun rei deuh zâwka sawihona chu ngaia a neih hunah, ṭhu chunga insawiho a rem leh rem loh zâwt ang che. In neitu chhânna aṭangin Bible zirna a ngaih pawimawh leh pawimawh loh a hriat theih ang. Chumi hnuah, hma a sâwn lehzual theih nân, chawlhkâr khata vawi hnih zir a duh leh duh loh i zâwt thei a. Chuti chung pawhin, chawlhkâr tina vawi khat emaw, vawi hnih emaw zirna neih mai aia tam tih a la ngai thei a ni.

7. Engtin nge zirtîrtu chu Bible zirpuina a neih dâwn apianga ṭha taka a inbuatsaih theih?

⁷ Zirtîrtu kan nih angin, Bible zirpuina kan neih dâwn apiangin ṭha taka kan inbuatsaih a ngai a. Zir tûr thuziakte chhiarin, Bible châng târ lante chu kan lo en lâwk thei a ni. Tichuan, a thu pawimawh laite chu chhinchhiah la. Zir tûr thupui te, a thupui tê te, zawhna te, “chhiar rawh” tih Bible châng te, milem te, leh in thu zir lai nêna inmil video-te pawh ngaihtuah lâwk rawh. Chumi hnuah, i Bible zirpuiin awlsam taka a hriatthiam theih nân leh a nunpui theih nân, ani chu rilrua dahin, i sawi tûr thute chu mawlmang tak leh fiah taka i sawi theih dân tûr ngaihtuah lâwk bawk ang che.—Neh. 8:8; Thuf. 15:28a.

8. Kolossa 1:9-12-a chhinchhiah tirhkoh Paula thu chuan kan Bible zirpuite tâna ṭawngṭai chungchângah eng nge min zirtîr?

⁸ I inbuatsaih huna Jehova hnêna i ṭawngṭainaah, i Bible zirpui leh a mamawhte chu telh la. A thinlung thleng tûra Bible aṭanga zirtîr thei tûrin Jehova hnênah ṭanpuina dîl ang che. (Kolossa 1:9-12 chhiar rawh.) Zirlai tâna hriatthiam leh pawm harsa mai theite chu hriat tum la. Baptisma a chan thlenga hmasâwn thei tûra ṭanpui chu i thiltum a ni tih hre reng ang che.

9. Engtin nge zirtîrtu chuan zirlai chu zirna atâna inbuatsaih tûra a ṭanpui theih? Hrilhfiah rawh.

⁹ Bible i zirpui ziah avângin, zirlai chuan Jehova leh Isua thiltihte ngaihhlutna leh zir belh zêl duhna a neih chu kan beisei a ni. (Mt. 5:3, 6) Zirna hlâwkpui pumhlûm tûr chuan, zirlai chuan a thil zirah tih tak zeta rilru a pêk a ngai a. Chutianga a tih theih  nân, zir tûrte chhiar lâwkin leh a thu zirte nunpui theih dân ngaihtuahna hmanga zir tûr tin atâna lo inbuatsaih lâwk a pawimawhzia chu a thinlungah tuh nghet ang che. Engtin nge zirtîrtu chuan a ṭanpui theih? Inbuatsaih dân a hriat theih nân zir tûrte chu inbuatsaihpui rawh. * Zir tûra zawhna chhânnate tlang taka hmuh theih dân chu hrilh la, a chhânna hre tûrin thu pawimawh lai târ langtu thu mal emaw, thu hlâwm khat emaw chauhva chhinchhiah dân kawhhmuh rawh. Tichuan, mahni irâwm chhuaka chhânna pe tûrin fuih ang che. Chutianga a chhân hunah, a thu zirte chu engtiang khawpin nge a hriatthiam tih i hre thei ang. I Bible zirpuiin a tih ngai thil dang pawh a la awm a, chu chu ti tûrin i fuih thei a ni.

10. Engvângin nge nî tina Bible chhiar chu a pawimawh a, chumi hlâwkpui tak zet tûr chuan eng nge tih ngai?

¹⁰ Amah zirtîrtu nêna chawlhkâr tina an zir dunna mai bâkah, zirlai chuan nî tina a thiltih ṭhenkhat aṭangin hlâwkna a nei thei a. Jehova nêna inbiak pawhna a neih a ngai a ni. Engtin nge? Jehova thusawi ngaithlain leh a hnêna ṭawngṭaina hmangin. Nî tina Bible chhiarin Pathian thusawi chu a ngaithla thei a. (Jos. 1:8; Sâm 1:1-3) Kan website jw.org * chhûnga pho chhuah “Bible Chhiar Tûr Hun Duan” hman dân chu hrilh la. Bible chhiarna a hlâwkpui tak zet theih nân, Jehova chungchânga Bible zirtîrnate chu chhût ngun tûr leh a thu hriatte nunpui tûrin fuih ang che.—Tirh. 17:11; Jak. 1:25.

11. Engtin nge zirlaiin tih tak zeta ṭawngṭai dân a zir theih a, engvângin nge Jehova hnêna ṭawngṭai fo chu a pawimawh?

¹¹ I Bible zirpui chu Jehova hnêna nî tina ṭawngṭai tûrin fuih la. Zirna in neih apiangin a ṭannaah leh a tâwpnaah thinlung takin ṭawngṭai la, i Bible zirpui tân dilsak bawk ang che. I ṭawngṭainate a hriat chuan, thinlung tak leh tih tak zeta Isua Krista hminga Jehova hnêna ṭawngtai dân a hria ang. (Mt. 6:9; Joh. 15:16) Nî tina Bible chhiarna (Jehova thusawi ngaihthlâk) leh ṭawngṭaina (Jehova biak) chuan Pathian hnaih lehzual tûra i Bible zirpui a ṭanpui dân tûr chu han mitthla teh! (Jak. 4:8) Chûng thilte a tihna chuan zirlai chu Pathian hnêna inpumpêk a, baptisma chang thei tûra a tih ngai thil dangte ti tûrin a ṭanpui ang.

12. Engtin nge zirtîrtu chuan zirlai chu Jehova nêna inlaichînna nei tûra a ṭanpui theih?

¹² Zirlaiin Bible zirna aṭanga a thu hriatte chu ṭha a ti mai ni lovin, thinlung takin a ngaina tûr a ni. Engvângin nge? Kan thinlung—kan duh zâwng te, ngaihtuahna te, leh rilru vei zâwngte—chuan thil ti tûra min chêttîr vâng a ni. Isua chuan mite chu thiam takin a chhûtpui ṭhîn a. Mahse, mite’n a hnung an zui chhan chu an thinlung thleng tûra a zirtîr vâng a ni. (Lk. 24:15, 27, 32) I Bible zirpui chuan Jehova chu inlaichînna a neihpui theih Mi tak tak ang leh a Pa, a Pathian, leh a Ṭhian anga a hriat a ngai a ni. (Sâm 25:4, 5) Bible zirna in neih laiin, Pathian mize duhawm takte chu ngaihven tûrin ṭanpui la. (Ex. 34:5, 6; 1 Pet. 5:6, 7) Eng chungchâng pawh zir mah ula, Jehova chu eng ang Pathian nge a nih tih ngaihven tlat ang che. Zirlai chu hêng Jehova mize duhawm tak tak hmangaihna te, ngilneihna te, leh khawngaihnate hi ngaihlu tûrin ṭanpui bawk ang che. Isua chuan “thu pêk ropui leh pawimawh ber” chu ‘Lalpa i Pathian hmangaih’ hi a ni tih a sawi a. (Mt. 22:37, 38) Chuvângin, i Bible zirpui chu thinlung taka Pathian hmangaihna nei tûrin ṭanpui ang che.

13. Jehova mize duhawm takte hre tûra zirlai ṭanpui theih dân entîrna pakhat sawi rawh.

¹³ I Bible zirpui nêna in tîtî hunah, Jehova i hmangaihzia sawi lang ṭhîn ang che. Chu chuan Pathian nêna mi mal taka inlaichînna ṭha neih a pawimawhzia hre tûrin a ṭanpui thei a ni. (Sâm 73:28) Entîr nân, in thu zirah emaw, in Bible châng chhiarah emaw Jehova hmangaihna te, finna te, rorêl dikna te, leh thiltihtheihnate chungchânga i thinlung khawihtu thu ṭhenkhat a awm em? A awm a nih chuan, chu chu zirlai hnênah sawi lang la, kan Pa vâna mi i hmangaih chhan tam tak zînga pakhat a nih thu hriattîr ang che. Bible zirlaite tân baptisma chan thlenga hmasâwn tûra tih ngai thil dangte pawh a la awm a ni.

14. Hebrai 10:24, 25-na chuan Bible zirlaite hmasâwn tûra ṭanpui theitu kohhran inkhâwm chungchâng eng nge a sawi?

¹⁴ Kan za hian kan Bible zirpuite chu baptisma an chan thlenga hmasâwn tûrin kan duh a. Kan ṭanpui theih dân kawng pawimawh tak pakhat chu kohhran inkhâwmahte tel tûra fuih hi a ni. Thiltawn ngah zirtîrtute chuan inkhâwma rawn tel nghâl zirlaite chuan hma an sâwn chak hle tih an sawi. (Sâm 111:1) Zirtîrtu ṭhenkhat chuan an zirpuite  hnênah Bible hriatna chu an zirhona aṭangin a chanve an nei ang a, a chanve dang chu inkhâwmna aṭangin an nei ang tih an hrilh a ni. Zirlai chu Hebrai 10:24, 25 thu chhiarpuiin, inkhâwma lo tel a ṭhat chhante chu hrilhfiah ang che. (Chhiar rawh.) Tichuan, Kingdom Hall-ah Eng Nge Thleng Ṭhîn? * tih video chu chhuahsak la. Chawlhkâr tina inkhâwma tel chu ngai pawimawh tûrin ṭanpui ang che.

15. Zirlai chu inkhâwma tel ziah tûrin engtin nge kan fuih theih?

¹⁵ I Bible zirpui chu inkhâwmah a la tel ngai lo emaw, a tel ziah lo emaw a nih chuan eng nge i tih theih? Tûn hnai maia inkhâwma i thu hriatte chu phûr takin hrilh ang che. Chu chuan zirlai chu inkhâwma lo tel duhna nei lehzual tûrin a chêttîr thei a ni. Inkhâwma in zir mêk Vênnainsâng leh Nun leh Rawngbâwlna Inzirna Lehkhabu chu pe la. Inkhâwm lo awm tûra zir tûrte chu kawhhmuhin, a thu ngaihven ber chu zâwt ang che. A inkhâwm hmasak ber ṭuma a thil hmuh leh hriatte chu sakhaw danga a inkhâwmna aiin a lêt tam takin a ṭha zâwk ngei ang. (1 Kor. 14:24, 25) Entawn tûr ṭha siamtute leh baptisma an chan thlenga hmasâwn tûra ṭanpui theitu unaute chu a hmu ang.

16. Baptisma chang thei tûr khawpa Bible zirna kaihruai tûrin eng nge kan tih ngai a, a dawta thuziakah eng nge kan hriat ang?

¹⁶ Zirlaiin baptisma chang thei tûr khawpin engtin nge Bible zirna chu kan kaihhruai theih? Chawlhkâr tina zirhona nei tûr leh zir tûr tinte atâna inbuatsaih ziah tûra fuiha zirna pawimawhzia hre tûra ṭanpuina hmangin a ni. Nî tina Jehova nêna inbiak pawhna nei tûr leh Amah nêna mi mal inlaichînna nei tûra fuih kan duh a. Zirlai chu kohhran inkhâwma tel châkna nei tûra ṭanpui kan duh bawk. (Phêk 12-naa “ Baptisma Chan Thlenga Hmasâwn Tûra Zirlaite Tih Ngai Chu,” tih bâwm chu en rawh.) Mahse, a dawta thuziaka kan hriat tûr angin, baptisma an chan thlenga zirlaite an ṭanpui theih nâna zirtîrtute tih theih thil panga a la awm a ni.