KUM tin hian, berâm ang mi tam tak chu Kristian kohhran chhûngah lâk luh leh an ni a. Chûng mite an rawn kîr leh apianga ‘vâna mite an lâwm’ nasat dân tûr chu han mitthla teh! (Lk. 15:7, 10) Kohhrana lâk luh leh i nih hian, Isua, vântirhkohte, leh Pathian Jehova chu kohhran zînga mi i nih leh avângin an lâwm hle tih i chiang thei a ni. Mahse, Jehova nêna in inṭhian ṭhatna tinghet leh tûra hma i lâk laiin, harsatnate i hmachhawn thei a. Chûng zînga ṭhenkhat chu eng nge ni a, paltlang thei tûrin engin nge tanpui thei che?

Unau tam tak chuan kohhrana lâk luh leh an nih hnuah pawh lunghnualna an la nei a. Lal Davida rilru awm dân chu i hre thiam ngei ang. A sualnate ngaihdam a nih hnuah pawh, ani chuan: “Ka khawlohnate chuan mi ûmphâk a,” tiin a sawi. (Sâm 40:12; 65:3) Unau tu emaw chu Jehova hnêna a rawn kîr leh hnuah, kum eng emawti chhûng chu sual nia inhriatna, a nih loh leh zahna a la nei thei a. Kum 20 chhûng hnawhchhuah tâwk Isabelle-i * chuan, “Jehova’n min ngaidam thei tih rin chu harsa tak a ni,” tiin a sawi. Lunghnuala i awm chuan, thlarau lamah chak lovin i awm leh thei a ni. (Thuf. 24:10) Chutiang thil chu i chungah thlentîr suh.

Mi ṭhenkhat chuan Jehova nêna inlaichînna nei leh tûra tih ngai zawng zawngte chu an tih theih loh an hlau va. Lâk luh leh a nih hnuah, Antoine-a chuan: “Hnawhchhuah ka nih hma, Thuhretu ka nih laia ka thil zir leh hriat tam tak chu ka theihnghilh tawh ni hian ka inhria,” tiin a sawi. Mi ṭhenkhat chu chutianga inhriatna an neih avângin, Pathian Jehova tâna an tih theih zawng zawng an ti lo a ni.

Entîr nân, a in thlipui nuai chhiat tâwktu tu emaw chuan a in sa ṭha leh tûra hun leh thate sên a ngaih nasat dân tûr a ngaihtuah chuan, a huphurh  hle thei a. Chutiang bawkin, sual pawi tak i tih avânga Jehova nêna in inlaichînna a chhiat chuan, thlarau lama chak leh tûr chuan theih tâwp chhuah ngai niin i inhre mai thei a. Mahse, chu chu nangmah chauhva i tih a ngai lo.

Jehova chuan heti hian min sâwm a ni: “Hawh teh u, i ngaihtuah tlâng teh ang u!” tiin. (Is. 1:18) Nang pawhin, rilru sêngin thil tam tak “i ngaihtuah” tawh ngei ang. Jehova’n theih tâwp i chhuahna avângin a hmangaih che a ni. Hei hi han ngaihtuah teh: Jehova hnêna i lo kîr leh avângin, ani chuan Setana chu daw thei a nihzia finfiah nân a hmang thei che a ni.—Thuf. 27:11.

Jehova hnêna i lo kîr lehna hmangin, ani chu i hnaih reng tawh a, ani pawhin hnaih che a tiam a ni. (Jak. 4:8) Mahse, kohhranah i rawn lût leh tih unaute’n an hriat mai aia tam i tih a ngai a. I Pa leh i Ṭhian Jehova i hmangaihna chu i tihngheh reng a ngai a ni. Chu chu engtin nge i tih theih?

I hlen theih tûr thiltumte insiam ang che. Pathian Jehova leh a thutiam Paradis chungchânga i thil zir bulpuite chu i la hre reng ngei ang. Mahse, i Kristian nun chu i siam ṭhat leh a ngai a, chutah chuan chanchin ṭha hrilh leh i Kristian unaute nêna inkawm fote a tel a ni. A hnuaia thiltumte hi han ngaihtuah teh.

Jehova chu be fo rawh. I Pa chuan inthiam lohna i neih avângin a hnêna ṭawngṭai chu harsa i ti tih a hre thiam a. (Rom 8:26) Mahse, Jehova hnênah ‘ṭawngṭai fan fanin’ amah nêna inṭhianna neih leh i duhzia hrilh ṭhîn ang che. (Rom 12:12) Unau Andrej-a chuan: “Mahni inthiam lohna nasa tak ka neih avângin, ka zak a. Mahse, ka ṭawngṭai zawh apiangin, ka hahdam sawt ṭhîn. Rilruah thlamuanna ka nei lehzual,” tiin a sawi. Ṭawngṭai dân tûr ber pawh i hriat loh chuan, Sâm 51 leh 65-a chhinchhiah inchhîrna chungchânga Lal Davida ṭawngṭainate hi ngaihtuah ang che.

Bible zir ziah rawh. Chu chuan rinna nghet tak nei tûrin leh Jehova i hmangaihna tipung tûrin a ṭanpui ang che. (Sâm 19:7-11) Unau Felipe-a chuan: “Thlarau lama ka chak loh chhan leh Jehova ka hawisan chhan ber chu thlarau lam hun duan ṭha ka neih loh vâng a ni a. Chutiang sual chu ka tihnawn duh loh avângin, mi mala inzirna ka nei ziak a ni,” tiin a sawi. Nang pawhin, chutiang chuan i ti thei a. Mi mal inzirna atâna i thu zir tûrte chungchânga ṭanpuina i mamawh a nih chuan, engvângin nge i ṭhian puitling tak hnênah ṭanpuina i dîl loh vang?

I Kristian unaute nêna in inṭhian ṭhatna chu siam ṭha leh rawh. Kohhrana lo kîr leh unau ṭhenkhat chuan kohhrana unau dangte’n a chungah a thim zâwnga an thlîr an hlau va. Unaunu Larissa-i chuan: “Ka zak ngawih ngawih a. Ka Kristian unaute hi phatsan ni hian ka inhria. Chutiang chuan hun rei tak chhûng ka awm,” tiin a sawi. Kohhran upate leh thlarau lama puitling unaute chuan Jehova nêna in inlaichînna i siam ṭhat laiin ṭanpui che an duh tih ring tlat ang che. (“ Kohhran Upate’n Eng Nge An Tih Theih?” tih bâwm chu en rawh.) Kohhrana i lo kîr leh avângin an lâwmin, hlim taka awm tûrin an duh che!—Thuf. 17:17.

Kohhran hnaih tûrin engin nge ṭanpui thei che? Unaute’n an tih reng ṭhîn inkhâwmahte leh thlawhhma rawngbâwlnaahte chuan tel ziah ang che. Chu chuan engtin nge a ṭanpui ang che? Unau Felix-a chuan: “Kohhrana unaute chuan ka kîr leh chu an beisei a. Min ngaihlu tak zet ni hian ka hria. Unaute zînga tel leh tûr te, ngaihdam nia inhriatna nei tûr te, leh Jehova rawngbâwl zawm zêl thei tûrin an zain min ṭanpui a ni,” tiin a sawi.—“ Eng Nge I Tih Theih?” tih bâwm chu en rawh.

Setana chuan Jehova nêna in inṭhian ṭhatna i siam ṭhat rualin, thlarau lama tichak lo tûr chein i ṭan lâkna kawngah “harsatnate” a thlentîr zawm zêl ang. (Lk. 4:13) Chuvângin, tûnah hian, Jehova nêna in inlaichînna siam ṭhain, inring rengin awm ang che.

Jehova chuan a berâmte chungchângah: “A bo chu ka zawng ang a, hnawh bote chu ka hruai kîr ang a, an ke tliakte chu ka tuam ang a, ka tichak ang,” tiin a tiam a ni. (Ezek. 34:16) Ani chuan mi dang tam tak pawh amah nêna inlaichînna ṭha nei leh tûrin a ṭanpui tawh a. Amah nêna in inlaichînna tinghet lehzual tûra ṭanpui che a duh tih ring tlat ang che.