1. Engvângin nge Jehova hnêna kan intukluh ang?

JEHOVA chu min Siamtu a nih avângin a hnênah kan intulût * tûr a ni a. Ani chuan a thil siamte tâna tehna siam tûrin dikna a nei a ni. (Thup. 4:10-11) A thu kan âwihna tûr chhan ṭha tak dang leh chu a rorêl dân a ṭhat ber vâng a ni. Mihring chanchin tluan chhuakah hian, rorêltu tam tak chuan mi dang chungah thuneihna leh thiltihtheihna engemaw chen an lo nei tawh ṭhîn a. Chûng rorêltute nêna khaikhin chuan, Jehova chu rorêltu azawnga Rorêltu fing ber, hmangaihna nei ber, ngilneina leh khawngaihna ngah ber a ni.—Ex. 34:6; Rom 16:27; 1 Joh. 4:8.

2. Hebrai 12:9-11-na chuan Jehova hnêna intukluhna tûr chhan eng nge a târ lan?

² Jehova chuan amah kan hlauh vâng ni lovin, kan hmangaih vâng leh hmangaihna ngah tak Pa anga kan thlîr avânga a thu âwih tûrin min duh a. Hebrai mite hnêna a lehkha thawnah, Paula chuan Pathianin ‘kan ṭhatna tûra’ min zirtîr avângin, “Pa thu thuin kan awm” tûr a ni tiin a hrilhfiah a ni.—Hebrai 12:9-11 chhiar rawh.

3. (a) Jehova hnênah kan intulût tih engtin nge kan lantîr? (b) Eng zawhnate nge kan sawiho vang?

³ Thil engkimah Jehova thu âwih tûra theih tâwp chhuahin leh mahni hriatnaa innghah duhna chu do tlatin, a hnênah kan intulût a ni. (Thuf. 3:5) Jehova mize duhawm takte kan hriatna chuan a hnêna intukluh a tiawlsam lehzual a. Engvângin  nge? Chûng a miziate chu a thiltih zawng zawnga a lan chhuah vâng a ni. (Sâm 145:9) Jehova chanchin kan zir tam poh leh, amah kan hmangaih lehzual ang. Chu bâkah, Jehova kan hmangaih chuan tih tûr leh tih loh tûr min hrilhtu dân tam tak kan mamawh lo vang. Chu aiin, kan ngaihtuahna leh rilru vei zâwngte chu Jehova duh zâwng nên inmiltîr kan tum zâwk ang. (Sâm 97:10) Mahse, a châng chuan Jehova thuâwih chu harsa kan ti mai thei. Engvângin nge? Kohhran upate, leh nu leh pate chuan Ram Awptu Nehemia te; Lal Davida te; leh Isua nu Mari te entawn tûr siam aṭangin eng nge an zir theih? He thuziakah hian chûng zawhnate chu chhân a ni ang.

4-5. Rom 7:21-23-a sawi angin, engvângin nge Jehova hnêna intukluh chu harsa kan tih mai theih?

⁴ Jehova hnêna intukluh harsa kan tih mai theih chhan pakhat chu sual kan rochun vâng leh kan ṭhat famkim loh vâng a ni a. Chuvângin, Pathian thuâwih chu a awlsam reng ṭhîn lo. Adama leh Evi’n Pathian laka an hel a, ei phal loh thei rah an ei hnu chuan, mahniin tehkhâwng an insiam a. (Gen. 3:22) Tûn laiah pawh, mi tam zâwk chuan thil ṭha leh ṭha lo chungchângah mahnia thu tlûkna siamin, Jehova thu âwih loh chu an thlang a ni.

⁵ Jehova hria a, hmangaihtute ngei pawhin a hnêna intukluh pumhlûm chu harsa an ti mai thei a. Tirhkoh Paula pawhin chutianga harsa tih châng a nei a ni. (Rom 7:21-23 chhiar rawh.) Paula angin, Jehova mithmuhah thil ṭha tih kan duh a. Mahse, thil ṭha lo tih châkna kan neihte chu kan do tlat tûr a ni.

6-7. Jehova hnêna intukluh a harsat chhan kawng dang leh chu eng nge ni? Entîrna pe rawh.

⁶ Jehova hnêna intukluh a harsat chhan dang leh chu kan seilenna hnam dânin min thunun vâng a ni thei. Mi tam takte ngaih dân chu Jehova duh zâwng nêna a inkalh avângin, chûng mite ngaihtuah dân anga ngaihtuah ve loh chu a harsa mai thei bawk. Entîrna pakhat lo ngaihtuah ta ila.

⁷ Hmun ṭhenkhatah chuan ṭhalaite chu sum tam tak zawng tûra fuih an ni a. Unaunu Mary * chuan chutiang chu a tawng a ni. Jehova chanchin a zir hmâ chuan, an rama school ṭha ber zînga pakhatah a kal a. Mary chuan sum tam tak hmuh theihna, hna ṭha tak thawk tûrin a chhûngte’n an nawrlui niin a hria a ni. Ani pawhin chutiang hna chu thawh a duh a. Mahse, Jehova chanchin zir a, amah hmangaihna a rawn neih hnu chuan a thiltum chu a thlâk ta a ni. Chuti chung pawhin, ani chuan: “A châng chuan, ka thlarau lam hun duante tichhe thei, sum tam tak hmuh theihna hnate chu thawh ka châk ṭhîn a. Min enkawl seilen dân avângin, chutiang hna ṭha tak hnâwl chu harsa ka la ti a ni. Ka rawngbâwlna ata min la pêng thei hnate thawh châkna ka neih chu do thei tûrin Jehova hnêna ṭanpuina ka dîl a ngai,” tiin a sawi.—Mt. 6:24.

8. Tûnah eng nge kan ngaihtuah ang?

⁸ Jehova hnêna kan intukluh hian mahni ngeiin kan hlâwkpui a. Mahse, kohhran upate leh nu leh pate ang thuneihna engemaw chen neitute chuan mi dangte ṭanpui theihna hun remchâng an neih avângin, Pathian kaihhruaina zawmna tûr chhan dang an nei a ni. Tûnah chuan, Jehova tilâwm zâwnga thuneihna hman dân chungchâng min zirtîrtu Bible-a entîrna ṭhenkhat i lo ngiahtuah ang u.

9. Nehemia chuan eng harsatnate nge a hmachhawn?

⁹ Jehova chuan upate chu a mite enkawl tûrin mawhphurhna pawimawh tak a pe a.  (1 Pet. 5:2) Nehemia’n Jehova mite a cheibâwl dân an bih chianna aṭangin upate chuan thil tam tak an zir thei a ni. Judai ram awptu a nih angin, Nehemia chuan thuneihna sâng tak a nei a. (Neh. 1:11; 2:7, 8; 5:14) Nehemia hmachhawn harsatna ṭhenkhat chu han mitthla teh. Ani chuan mite’n Pathian in an tibawlhhlawh tih leh Dânin a phût angin, Levia mite chu sum leh pai lamah an ṭanpui lo tih a hria a. Juda mite chuan Chawlhni tibawrhbângin, an mipate chuan hnam dang hmeichhiate nupuiah an nei a. Ram awptu Nehemia chuan chu dinhmun khirh tak chu a chinfel a ngai a ni.—Neh. 13:4-30.

10. Nehemia chuan a hmachhawn harsatnate chu engtin nge a chhân lêt?

¹⁰ Nehemia chuan Pathian mite chu ama tehnate zui luihtîr tûrin a thuneihna chu dik lo takin a hmang lo. Chu aiin, ani chuan ṭhahnemngai taka ṭawngṭaiin Jehova kaihhruaina a zawng a, mite chu Pathian dânte a zirtîr zâwk a ni. (Neh. 1:4-10; 13:1-3) A unaute ruala inngaitlâwm taka hna thawkin, Jerusalem kulh sak ṭhat lehnaah a ṭanpui bawk.—Neh. 4:15.

11. Thessalonika thawn khat 2:7, 8-a sawi angin, upate chuan kohhrana unaute chu engtin nge an cheibâwl ang?

¹¹ Upate chuan Nehemia tawn ang harsatnate chu an tawng lo pawh a ni thei; mahse, ani chu kawng tam takin an entawn thei a ni. Entîr nân, an unaute ṭhatna tûrin an thawk rim hle a. An thuneihna chu chapo phah nân an hmang lo. Chu aiin, kohhran chu dimdâwih takin an cheibâwl zâwk a ni. (1 Thessalonika 2:7, 8 chhiar rawh.) An hmangaihna thûk tak leh an inngaihtlâwmna chuan mi dangte an biak dân chu a thunun a. Thiltawn ngah tak kohhran upa Andrew-a chuan: “Upate ngilneihna leh ngaihsakna chu unaute’n an chhâng lêt ṭha tlângpui tih ka hmu a. Chûng miziate chuan unaute chu upate nên thawhhona ṭha tak nei tûrin a chêttîr a ni,” tiin a sawi. Hun rei tak chhûng upa ni tawh unau Tony-a chuan: “Philippi 2:3-a kan hmuh fuihna chu  nunpui ka tum a, mi dangte chu mahni aia ṭha zâwka thlîr ka tum reng ṭhîn a ni. Chu chuan mahni ngaih dân chauh kalpui duhna nei lo tûrin min ṭanpui,” tiin a sawi.

12. Engvângin nge upate tân inngaihtlâwm chu a pawimawh?

¹² Upate chu Jehova angin an inngaitlâwm tûr a ni a. Jehova chu lei leh vâna Lal Chungnungber ni mah se, “rethei chu vaivut ata” kai tho tûrin a “intihnuai” ṭhîn a. (Sâm 18:35; 113:5-7) Dik takin, Jehova tân chuan mi chapote leh intiveite chu tenawm tak an ni.—Thuf. 16:5.

13. Engvângin nge upa chuan ‘a lei a vên ṭhat’ ang?

¹³ Jehova hnêna intulûttu upa chuan ‘a lei a vêng ṭha’ tûr a ni a. Chutilochuan, tuemawin zah lohna a lantîr hunah ngilneihna nei lo takin a ṭawng chhuak thei a ni. (Jak. 1:26; Gal. 5:14, 15) A chunga kan sawi tâk Andrew-a chuan: “Mite zah nachâng hre lo unau tuemaw chu ngilnei taka biak harsa tih châng ka nei a. Mahse, Bible-a mi rinawmte entawn tûr siam chu ka chhût ngun a, chu chuan inngaihtlâwmna leh thuhnuairawlhna neih a pawimawhzia hre tûrin min ṭanpui a ni,” tiin a sawi. Upate chuan an thawhpui upa dangte pawh tiamin, kohhrana unaute an biak hunah hmangaihna leh khawngaihna lantîrin, Jehova hnêna an intukluhzia an lantîr a ni.—Kol. 4:6.

14. Jehova’n pate chu eng mawhphurhna nge a pêk a, an chungah eng nge a beisei?

¹⁴ Jehova chuan pate chu chhûngkaw lû nihna a pêk avângin fate zirtîr a, thunun tûrin a beisei a. (1 Kor. 11:3; Eph. 6:4) Mahse, an thuneihna chuan chin tâwk a nei a, an chhûngkuate an cheibâwl dânah Siamtu, Jehova hmaah an chanchin an la sawi dâwn a ni. (Eph. 3:14, 15) Pate chuan an thuneihna chu Jehova tilâwm zâwnga hmangin a hnêna an intukluhzia an lantîr a. Anni chuan Lal Davida nun kawng chu bih chiangin, thil tam tak an zir thei a ni.

15. Engvângin nge Lal Davida chu pate tâna entawn tûr ṭha tak a nih?

¹⁵ Jehova chuan Davida chu chhûngkaw lû mai ni lovin, Israel hnam pumpui hruaitu atân a ruat a. Davida chuan lal a nih angin thuneihna nasa tak a nei a. A châng chuan, a thuneihna chu hmang sualin, sual lian tak a ti a ni. (2 Sam. 11:14, 15) Mahse, Jehova zilhna chu pawmin, a hnêna a intukluhzia a lantîr a. Jehova hnênah ṭawngṭaiin a thinlung a leihbua a ni. A fuihnate chu theih tâwp chhuahin zawm a tum bawk. (Sâm 51:1-4) Chu bâkah, mipate hnên aṭang chauh ni lovin, hmeichhiate thurâwn pêk pawh pawm duh khawpin a inngaitlâwm a. (1 Sam. 19:11, 12; 25: 32, 33) Davida chuan a thil tihsual aṭanga inzirin, Jehova rawngbâwl chu a nunah a dah pawimawh ber a ni.

16. Pate chuan Davida hnên aṭangin eng nge an zir theih?

¹⁶ Lal Davida hnên aṭanga pate’n an zir theih zir tûr ṭhenkhat hi han ngaihtuah teh: Jehova pêk thuneihna chu a ṭha lo zâwngin hmang suh. I thil tihsual chu pawm la, mi dangin Bible ṭanchhan zilhna an pêk che hunah hnâwl suh. Chutianga i tih chuan, i chhûngte’n i inngaihtlâwmna avângin an zah ang che. I chhûngte nêna in ṭawngṭai hunah, Jehova i rinchhanzia an hriat theih nân i thinlung chu leihbua la. Eng dang zawng aiin, Jehova rawngbâwlna chu i nunah dah pawimawh ber ang che. (Deut. 6:6-9) I entawn tûr ṭha siam chu i chhûngte hnêna i pêk theih thil hlu berte zînga pakhat a ni.

17. Jehova’n nute hnênah eng chanvo nge a pêk?

¹⁷ Jehova chuan nute chu chhûngkuaah chanvo hlu tak leh fate chunga thuneihna engemaw chen a pe a. (Thuf. 6:20) Dik tak chuan, nu thusawi leh thiltihte chuan an fate chungah an dam chhûngin nghawng a nei thei a ni. (Thuf. 22:6) Nute’n Isua nu Mari hnên aṭanga an zir theihte chu chhinchhiah ang che.

18-19. Nute chuan Mari entawn tûr siam aṭangin eng nge an zir theih?

¹⁸ Mari chuan Pathian Lehkha Thu chu a hre chiang hle a. Ani chuan Jehova zahna thûk tak leh amah nêna inlaichînna nghet tak a nei bawk. A nun kawng pumhlûm thlâk danglam a ngaih hunah pawh, Jehova kaihhruaina hnuaiah lâwm takin a intulût a ni.—Lk. 1:35-38, 46-55.

¹⁹ Nute u, Mari chu kawng tam takin in entawn thei a ni. Engtin nge? A hmasain, mi mala Bible zirna leh ṭawngṭaina hmanga Jehova nêna inlaichînna nghet tak neih hi a ni a. A dawtah chuan, Jehova tilâwm tûra inhuam taka inthlâk danglamna siam hi a ni. Entîr nân, thinrim hmâ tak leh fate vin hmang tak nu leh pate enkawl seilen i ni mai thei a. Chuvângin, chutianga fate enkawl chu tih dân pângngai tûrah i ngai mai thei a ni. Jehova tehnate i hriat hnuah pawh, a bîk takin, i chauh huna i fate an awm ṭhat duh loh hian an chunga dawhtheihna leh zaidamna lantîr chu harsa i ti mai thei. (Eph. 4:31) Chutiang hunahte chuan ṭawngṭai a, Jehova i rinchhan lehzual a ngai ang. Nu pakhat Lydia-i chuan: “Ka fapain ka thu a âwih loh hian thinrim taka ka chhân loh nân nasa taka ka ṭawngṭai a ngaih châng a awm a. A hnêna thu ka hrilh lai mêk pawhin, Jehova hnênah ri lova ṭawngṭaiin a ṭanpuina ka dîl a. Ṭawngṭaina chuan inbengdai tûrin min ṭanpui a ni,” tiin a sawi.—Sâm 37:5.

20. Nu ṭhenkhatin eng harsatna nge an hmachhawn a, chu harsatna chu engtin nge an hneh theih?

 ²⁰ Nu ṭhenkhat chuan chutiang harsatna chu an hmachhawn a—an fate an hmangaihzia lantîr chu harsa an ti a ni. (Tita 2:3-5) Nu ṭhenkhat chu inlaichînna ṭha awm lohna chhûngkuaa seilian an ni a. Chutiang chhûngkuaa seilian i nih chuan, i nu leh pate thil tihsual chu i tihnawn kher a ngai lo. Jehova duh zâwng tiduhtu nu chuan fate chunga hmangaihna lantîr dân a zir a ngai thei a. A ngaihtuah dân te, a rilru vei zâwng te, leh a thiltih dânte thlâk danglam chu harsa a ti mai thei bawk. Mahse, chutianga inthlâk danglamna siam chu thil theih loh a ni lo va, amah leh a chhûngte’n an hlâwkpui dâwn a ni.

21-22. Isaia 65:13, 14-a sawi angin, Jehova hnêna intukluhna aṭangin eng hlâwknate nge kan dawn?

²¹ Lal Davida chuan Jehova hnêna intukluhnain hlâwkna a nei tih a hria a. Ani chuan: “LALPA thununna thu chu a dik a, thinlung a tilâwm ṭhîn: LALPA thupêk chu a thianghlim a, mitte a tivâr ṭhîn. Chu lo pawh chu, chûng chuan i chhiahhlawh hi zilhin ka awm ṭhîn a: chûng zawm chu lâwmman nasa tak neihna a ni ṭhîn,” tiin a ziak a. (Sâm 19:8, 11) Tûn laiah, Jehova hnêna intulûtte leh a zilhna duhawmtak hnâwltute inkâra danglamna chu kan hmu thei a ni. Jehova hnêna intulûtte chu “thinlunga an lâwm avângin hlim takin an zai ang.”—Isaia 65:13, 14 chhiar rawh.

²² Kohhran upa te, pa te, leh nu te chuan Jehova hnêna inhuam taka an intukluh hian, an nunin awmzia a nei lehzual a, an chhûngte chu an hlim lehzualin, kohhran pumpui pawh an inlungrual lehzual a ni. A pawimawh ber chu, Jehova thinlung an tilâwm hi a ni. (Thuf. 27:11) Chu aia lâwmman hlu zâwk a awm thei dâwn em ni?